ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܽܘܒܰܝܟܝ ܐܶܡܳܐ ܕܟܺܝܬܳܐ܆ ܒܬܽܘܠܬܳܐ ܝܳܠܕܰܬ ܐܰܠܳܗܳܐ܆ ܕܦܺܐܪܳܐ ܕܡܶܢܶܟܝ܆ ܡܰܥܒܰܪ ܚܰܫ̈ܶܐ ܕܰܚܛܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܠܩܺܐܒܽܘܬܳܐ ܕܢܳܡܽܘܣܳܐ܆ ܘܰܠܓܶܙܬܳܐ ܕܳܡܝܳܐ ܡܰܪܝܰܡ܆ ܕܒܳܗ̇ ܐܶܣܬܰܝܰܟܘ܆ ܐ̱ܪ̈ܳܙܶܐ ܟܽܠܗܽܘܢ ܕܰܢܒܺܝ̈ܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܕܰܐܫܘܺܝܬܳܢ ܕܢܶܙܡܰܪ ܠܳܟ܆ ܫܽܘܒܚܳܐ ܒܕܽܘܟܪܳܢ ܝܳܠܶܕܬܳܟ܆ ܚܰܕܳܢ ܥܰܡܳܗ̇܆ ܒܡܰܠܟܽܘܬܳܐ ܗܳܝ ܕܰܫܡܰܝܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟ ܕܰܕܢܰܚ ܡܶܢ ܥܽܘܒܶܟܝ܆ ܡܰܠܝܰܬ ܪ̈ܰܚܡܶܐ ܘܛܰܝܒܽܘܬܳܐ܆ ܘܪܰܡܪܶܡ ܘܰܐܘܪܶܒ܆ ܝܰܘܡܳܐ ܫܒܺܝܚܳܐ ܕܕܽܘܟܪܳܢܶܟܝ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܠ ܝܽܘܪܕܢܳܢ

ܒܪܺܝܟܳܐ ܗ̱ܝ ܡܰܪܝܰܡ: ܕܰܠܦܳܪܽܘܩܳܐ ܝܶܠܕܰܬ: ܘܗܳܐ ܡܶܙܕܰܝܰܚ: ܕܽܘܟܪܳܢܳܗ̇ ܡܶܢ ܕܳܪ ܠܕܳܪ܀

ܒܪܺܝܟܽ ܗ̱ܘ ܕܰܐܘܪܶܒ: ܕܽܘܟܪܳܢܳܗ̇ ܕܰܒܬܽܘܠܬܳܐ: ܠܥܶܠ ܒܰܫܡܰܝܳܐ: ܘܒܰܥܕܶܝܢ ܥܰܠ ܡܰܕܒܚܳܐ܀

ܛܽܘܒܰܝܟܝ ܒܬܽܘܠܬܳܐ: ܒܰܪ̱ܬ ܕܰܘܺܝܕ ܩܰܕܺܝܫܬܳܐ: ܕܰܟܡܳܐ ܝܪܶܒܬܝ: ܒܰܡܫܺܝܚܳܐ ܕܰܕܢܰܚ ܡܶܢܶܟܝ܀

ܒܰܨ̈ܠܰܘܳܬܶܟܝ: ܝܳܠܕܰܬ ܐܰܠܳܗܳܐ ܡܰܪܝܰܡ: ܚܰܣܳܝ ܚܰܘ̈ܒܰܝܢ: ܘܒܺܝ̈ܫܳܬܳܐ ܕܰܣܥܰܪܢܰܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܕܰܠܕܽܘܟܪܳܢܳܐ܆ ܕܶܐܡܳܐ ܒܬܽܘܠܬܳܐ ܕܺܝܠܶܕܬܳܟ܆ ܡܰܘܪܶܒ ܐܰܢ̱ܬ ܘܰܡܝܰܩܰܪ ܐܰܢ̱ܬ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܗܰܘ ܕܰܠܥܺܝܪ̈ܶܐ ܘܪ̈ܰܒܰܝ ܡܰܠܰܐܟ̈ܶܐ܆ ܙܰܡܶܢܬ ܠܝܰܘܡܳܐ ܕܕܽܘܟܪܳܢܳܗ̇܆ ܕܶܐܡܳܐ ܕܺܝܠܳܟ ܩܰܕܺܝܫܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܛܽܘܒܰܝܟܝ ܡܰܪܝܰܡ ܒܬܽܘܠܬܳܐ ܒܰܪ̱ܬ ܕܰܘܺܝܕ܆ ܕܰܒܝܰܕ ܦܺܐܪܳܐ ܕܡܶܢ ܥܽܘܒܶܟܝ܆ ܥܒܰܪ ܗ̱ܘܳܐ ܚܶܣܕܳܐ ܕܐ̱ܢܳܫܽܘܬܰܢ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܒܰܫܪܳܪܳܐ

ܗܳܕܳܐ ܗ̱ܝ ܒܰܫܪܳܪܳܐ܆ ܐܶܡܳܐ ܡܰܠܝܰܬ ܛܰܝܒܽܘܬܳܐ܆ ܗܳܝ ܕܶܐܬܢܰܒܝܰܬ ܥܰܠ ܢܰܦܫܳܗ̇܆ ܕܟܽܠ ܫܰܪ̈ܒܳܬܳܐ ܕܺܐܝܬ ܥܰܠ ܐܰܪܥܳܐ܆ ܛܽܘܒܳܐ ܪܰܒܳܐ ܝܳܗ̈ܒܳܢ ܠܳܗ̇܆ ܥܰܠ ܝܰܠܕܳܐ ܡܳܪܳܢܳܝܳܐ ܕܰܕܢܰܚ ܡܶܢܳܗ̇܆ ܗܰܘ ܕܠܶܗ ܗܽܘ ܡܫܰܒܚܺܝܢܰܢ ܠܥܳܠܰܡ ܥܳܠܡܺܝܢ܀

ܫܠܳܡ ܠܶܟܝ ܟܰܠܬܳܐ܆ ܢܰܨܺܝܚܬܳܐ ܐܶܡܶܗ ܕܡܰܠܟܳܐ܆ ܫܠܳܡ ܠܶܟܝ ܕܡܶܢܶܟܝ ܐܶܬܺܝܠܶܕ܆ ܗܰܘ ܕܰܫܡܰܝܳܐ ܠܳܐ ܡܣܰܝܟܺܝܢ ܠܶܗ܆ ܫܠܳܡ ܠܶܟܝ ܐܳܘ ܡܒܰܪܰܟܬܳܐ܆ ܕܡܶܢ ܟܪ̈ܽܘܒܶܐ ܣܰܓܺܝ ܡܝܰܩܪܰܬܝ܆ ܒܗܳܝ ܕܰܕܢܰܚ ܡܶܢ ܥܽܘܒܶܟܝ ܕܰܟܝܳܐ܆ ܐܰܠܳܗܳܐ ܕܥܰܠ ܟܽܠ܆ ܕܠܶܗ ܗܽܘ ܡܫܰܒܚܺܝܢܰܢ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܛܽܘܒܰܝܟܝ ܡܰܪܝܡ ܒܰܪܬ ܕܰܘܺܝܕ: ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ: ܕܡܶܢ ܥܽܘܒܶܟܝ ܕܰܟܝܳܐ ܕܢܰܚ ܠܰܢ: ܢܽܘܗܪܳܐ ܠܥܳܠܡܳܐ ܚܶܫܽܘܟܳܐ܀

ܕܽܘܟܪܳܢܳܗ̇ ܕܰܡܒܰܪܰܟܬܳܐ: ܡܶܢ ܣܰܘ̈ܦܶܝܗ̇ ܠܣܰܘ̈ܦܶܝܗ̇ ܕܰܐܪܥܳܐ: ܕܛܶܥܢܰܬ ܙܰܝܚܰܬ ܘܝܰܩܰܪܬܶܗ: ܘܗܳܐ ܥܰܕܥܺܐܕܳܗ̇ ܒܶܝܬ ܥܰܡ̱̈ܡܶܐ܀

ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܳܗ̇: ܕܝܳܠܶܕܬܶܗ ܒܰܐܪܒܰܥ ܦܶܢ̈ܝܳܢ: ܘܗܳܐ ܝܳܗܒܳܢ ܠܳܗ̇ ܟܽܠ ܛܽܘ̈ܒܺܝܢ: ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ

ܒܕܽܘܟܪܳܢܳܗ̇ ܕܶܐܡܳܐ ܡܒܰܪܰܟܬܳܐ܆ ܚܴ̈ܕܝܳܢ ܟܽܠܗܶܝܢ ܒܶܪ̈ܝܳܬܳܐ ܘܙܳܡܪ̈ܳܢ ܫܽܘܒܚܳܐ܆ ܠܡܳܪܝܳܐ ܕܰܕܢܰܚ ܡܶܢ ܥܽܘܒܳܗ̇܆ ܘܪܰܡܪܶܡ ܘܰܐܘܪܶܒ ܕܽܘܟܪܳܢܳܗ̇܆ ܠܶܗ ܫܰܒܰܚܘ ܥܰܒ̈ܕܰܘܗ̱ܝ ܘܟܽܠܗܶܝܢ ܒܶܪ̈ܝܳܬܶܗ ܘܝܰܬܺܝܪ ܢܪܰܡܪܶܡ ܘܢܰܘܕܶܐ܆ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܩܺܐܒܽܘܬܳܐ ܕܕܺܝܰܬܺܝܩܺܐ܆ ܘܰܡܢܳܪܬܳܐ ܘܫܰܒܛܶܗ ܕܰܐܗܪܽܘܢ ܒܶܟܝ ܐܶܬܛܦܶܣܘ܆ ܒܬܽܘܠܬܳܐ ܡܰܠܝܰܬ ܟܽܠ ܫܽܘܦܪ̈ܺܝܢ܆ ܕܰܗܘܰܝܬܝ ܐܶܡܳܐ ܠܰܐܠܳܗܳܐ܆ ܠܶܗ ܫܰܒܰܚܘ ܥܰܒ̈ܕܰܘܗ̱ܝ ܘܟܽܠܗܶܝܢ ܒܶܪ̈ܝܳܬܶܗ ܘܝܰܬܺܝܪ ܢܪܰܡܪܶܡ ܘܢܰܘܕܶܐ܆ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܡܫܺܝܚܳܐ ܐܰܠܳܗܳܐ܆ ܗܰܘ ܫܶܡܫܳܐ ܕܙܰܕܺܝܩܽܘܬܳܐ܆ ܨܶܡܚܳܐ ܕܡܶܢ ܐܰܒܳܐ ܕܢܽܘܗܪ̈ܶܐ܆ ܕܰܕܢܰܚ ܡܶܢ ܒܬܽܘܠܬܳܐ ܡܰܪܝܰܡ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܢܶܣܓܽܘܕ ܠܶܗ܀

ܒܝܰܘܡܳܐ ܕܕܽܘܟܪܳܢܳܗ̇܆ ܕܡܰܠܝܰܬ ܫܽܘܦܪ̈ܶܐ ܘܢܶܨܚܳܢ̈ܶܐ܆ ܐܶܡܳܐ ܕܺܝܠܳܟ ܩܰܕܺܝܫܬܳܐ܆ ܚܰܣܳܐ ܠܥܰܡܳܟ ܐܰܠܳܗܳܐ܆ ܕܢܰܘܕܶܐ ܘܢܶܣܓܽܘܕ ܠܳܟ܆ ܘܢܶܙܡܰܪ ܠܳܟ ܫܽܘܒܚܳܐ܀

ܒܪܺܝܟ ܕܰܐܘܪܶܒ ܥܺܐܕܳܗ̇܆ ܕܝܳܠܶܕܬܶܗ ܒܰܐܪܒܰܥܦܶܢ̈ܝܳܢ܆ ܘܗܳܐ ܝܳܗ̈ܒܳܢ ܠܳܗ̇ ܟܽܠ ܛܽܘ̈ܒܺܝܢ܆ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܢܶܣܓܽܘܕ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܡܳܐ ܕܶܐܬܦܰܠܰܓ

ܠܶܟܝ ܛܽܘܒܰܝܟܝ ܐܳܘ ܒܰܪ̱ܬ ܕܰܘܺܝܕ ܒܬܽܘܠܬܳܐ ܡܰܪܝܰܡ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ ܠܒܰܪ ܐܰܠܳܗܳܐ܆ ܘܰܕܢܰܚ ܫܽܘܒܚܶܗ ܡܶܢ ܥܽܘܒܶܟܝ ܘܪܰܡܪܶܡ ܘܰܐܘܪܶܒ ܕܽܘܟܪܳܢܶܟܝ܆ ܒ̈ܥܺܕܳܬܳܐ ܘܰܒܕܰܝܪ̈ܳܬܳܐ ܘܒܰܐܪܒܰܥ ܦܶܢ̈ܝܳܢ܆ ܘܗܳܐ ܡܫܰܒܚܺܝܢ ܠܶܗ ܒܕܽܘܟܪܳܢܶܟܝ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐܰܢ̱ܬܝ ܗ̱ܺܝ ܥܢܳܢܳܐ ܩܰܠܺܝܠܬܳܐ ܕܰܥܠܶܝܗ̇ ܐܶܡܰܪ܆ ܐܶܫܰܥܝܳܐ ܗܰܘ ܒܰܪ ܐܰܡܽܘܨ ܟܰܕ ܡܶܬܢܰܒܶܐ܆ ܕܗܳܐ ܡܳܪܝܳܐ ܪܟܺܝܒ ܥܰܠ ܥܢܳܢ̈ܶܐ ܩܰܠܺܝ̈ܠܳܬܳܐ ܘܥܳܐܶܠ ܠܡܶܨܪܶܝܢ܆ ܘܟܽܠܗܽܘܢ ܓܠܺܝ̈ܦܶܐ ܕܡܶܨܪ̈ܳܝܶܐ ܢܳܦܠܺܝܢ ܩܽܘܕܡܰܘܗ̱ܝ܆ ܘܓܰܠܝܳܐܺܝܬ ܓܳܠܶܝܢ ܫܽܘܒܚܶܗ܆ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܠܶܟܝ ܛܽܘܒܰܝܟܝ܆ ܐܳܘ ܡܰܪܝܰܡ ܒܰܪ̱ܬ ܕܰܘܺܝܕ ܐܶܡܳܐ ܡܒܰܪܰܟܬܳܐ܆ ܕܰܕܢܰܚ ܡܶܢܶܟܝ ܒܰܪ ܐܰܠܳܗܳܐ ܒܚܰܪܰܬ ܙܰܒ̈ܢܶܐ܆ ܘܗܳܐ ܡܶܙܕܰܝܰܚ ܕܽܘܟܪܳܢܶܟܝ܆ ܒܰܐܪܒܰܥ ܦܶܢ̈ܝܳܬܳܐ܀

ܝܰܘܡܳܢܳܐ܆ ܢܶܙܡܰܪ ܫܽܘܒܚܳܐ ܠܗܰܘ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ܆ ܕܰܕܢܰܚ ܡܶܢܳܗ̇ ܐܰܝܟ ܨܶܒܝܳܢܳܐ ܕܰܐܠܳܗܽܘܬܶܗ܆ ܘܪܰܡܪܶܡ ܘܰܐܘܪܶܒ ܕܽܘܟܪܳܢܳܗ̇܆ ܒܰܫܡܰܝܳܐ ܘܒܰܐܪܥܳܐ܀

ܠܳܟ ܬܶܫܒܽܘܚܬܳܐ܆ ܝܰܠܕܳܐ ܣܓܺܝܕܳܐ ܕܡܶܢ ܐܰܒܳܐ ܒܕܽܘܟܪܳܢ ܝܳܠܶܕܬܳܟ܆ ܕܰܒܛܰܝܒܽܘܬܳܟ ܗܘܰܝܬ ܒܰܪܢܳܫܳܐ ܕܠܳܐ ܫܽܘܚܠܳܦܳܐ܆ ܘܚܰܪܰܪܬ ܨܰܠܡܳܟ ܕܶܐܬܚܰܒܰܠ ܒܰܥܒܳܪ ܦܽܘܩܕܳܢܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ

ܫܡܰܝܳܐ ܕܬܰܪܬܶܝܢ ܕܰܛܥܶܢܬܶܗ: ܠܰܐܠܳܗܳܐ ܐܰܝܟ ܨܶܒܝܳܢܶܗ: ܐܰܦܺܝܣܝ ܘܰܒܥܳܝ ܠܺܝܚܺܝܕܶܟܝ: ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܛܽܘܒܰܝܟܝ ܐܶܡܶܗ ܕܰܐܠܳܗܳܐ: ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ: ܕܰܛܥܶܢܬܝ ܘܙܰܚܰܝ̣ܬܝ ܥܰܠ ܒܽܘܪ̈ܟܰܝܟܝ: ܠܰܒܪܳܐ ܚܰܝܳܐ ܕܰܐܠܳܗܳܐ܀

ܠܶܟܝ ܛܽܘܒܰܝܟܝ ܛܽܘܒܳܢܺܝܬܳܐ: ܐܶܡܳܐ ܡܰܠܝܰܬ ܒܽܘܪ̈ܟܳܬܳܐ: ܕܠܳܐ ܪܳܡܳܐ ܫܡܰܝܳܐ ܡܶܢܶܟܝ: ܕܙܰܚܰܝܬܝ ܠܡܳܪܳܐ ܕܰܫܡܰܝܳܐ܀

ܒܕܽܘܟܪܳܢܳܗ̇ ܕܰܡܒܰܪܰܟܬܳܐ: ܚܳܕ̈ܝܳܢ ܟܽܠܗܶܝܢ ܒܶܪ̈ܝܳܬܳܐ: ܘܙܳܡܪ̈ܳܢ ܫܽܘܒܚܳܐ ܘܬܰܘܕܺܝܬܳܐ: ܠܰܐܠܳܗܳܐ ܕܰܕܢܰܚ ܡܶܢܳܗ̇܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܒܗܳܢܳܐ ܝܰܘܡܳܐ܆ ܕܕܽܘܟܪܳܢܳܗ̇ ܕܶܐܡܳܐ ܡܒܰܪܰܟܬܳܐ܆ ܚܳܕܝܴ̈ܢ ܟܽܠܗܶܝܢ ܒܶܪ̈ܝܳܬܳܐ ܘܰܡܫܰܒ̈ܚܳܢ. ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܟܝ ܡܰܪܝܰܡ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ܆ ܠܗܰܘ ܕܰܡܠܶܝܢ ܫܡܰܝ̈ܳܐ ܡܶܢ ܫܽܘܒܚܶܗ ܘܰܡܫܰܒܚܺܝܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܶܬܬܥܺܝܪܝ ܐܶܬܬܥܺܝܪܝ. ܥܺܕܬܳܐ ܘܰܙܡܰܪܝ ܬܶܫܒܽܘܚܬܳܐ܆ ܒܕܽܘܟܪܳܢܳܗ̇ ܕܶܐܡܳܐ ܡܒܰܪܰܟܬܳܐ ܟܰܕ ܐܳܡܪܰܬܝ܆ ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܟܝ ܡܰܪܝܰܡ܆ ܕܰܐܝܢܶܩܬܺܝܘܗ̱ܝ ܚܰܠܒܳܐ ܒܬܽܘܠܳܐܺܝܬ܆ ܠܗܰܘ ܙܳܐܶܢ ܛܽܘ̈ܗܡܶܐ ܘܫܰܪ̈ܒܳܬܳܐ ܟܰܕ ܐܳܡܪܰܬܝ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܡܰܝܳܐ ܕܬܰܪܬܶܝܢ܆ ܕܰܛܥܶܢܬܶܗ ܠܰܐܠܳܗܳܐ ܡܶܠܬܳܐ܆ ܐܰܦܺܝܣ ܘܰܒܥܳܝ ܠܶܗ ܕܢܶܥܒܶܕ ܥܠܰܝܢ ܪ̈ܰܚܡܶܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ ܠܪ̈ܰܚܡܰܝܟ܆ ܐܰܠܳܗܳܐ ܕܰܕܢܰܚܬ ܡܶܢ ܒܬܽܘܠܬܳܐ܆ ܘܰܐܘܪܶܒܬ ܝܰܘܡܳܐ ܕܕܽܘܟܪܳܢܳܗ̇ ܒܰܐܪܒܰܥ ܦܶܢ̈ܝܳܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܒ̈ܕܰܘܗ̱ܝ ܕܰܐܠܳܗܳܐ
ܣܳܠܶܩ: ܒܬܽܘܠܬܳܐ ܩܰܕܺܝܫܬܳܐ

ܒܪܶܡܙܳܟ ܡܳܪܝ ܛܥܺܝܢ ܐܰܢ̱ܬ: ܠܰܫܡܰܝܳܐ ܘܠܰܐܪܥܳܐ: ܘܰܒܬܽܘܠܬܳܐ ܡܰܪܝܰܡ: ܛܶܥܢܰܬ ܠܪܰܒܽܘܬܳܟ܀

ܘܳܠܶܐ ܕܰܢܙܰܡܰܪ: ܒܝܰܘܡܳܐ ܕܕܽܘܟܪܳܢܳܗ̇: ܕܦܺܐܪܳܐ ܕܡܶܢܳܗ̇ ܕܢܰܚ: ܦܰܪܩܰܢ ܡܶܢ ܛܽܘܥܝܰܝ܀

ܥܺܕܬܳܐ ܡܗܰܝܡܰܢܬܳܐ: ܡܙܰܝܚܳܐ ܠܕܽܘܟܪܳܢܶܟܝ: ܒܬܽܘܠܬܳܐ ܩܰܕܺܝܫܬܳܐ: ܐܶܡܶܗ ܕܰܡܪܰܝܡܳܐ܀

ܫܽܘܒܚܳܐ ܠܗܰܘ ܕܰܐܘܪܶܒ: ܕܽܘܟܪܳܢ ܝܳܠܶܕܬܶܗ: ܒܰܫܡܰܝܳܐ ܘܒܰܐܪܥܳܐ: ܘܒܰܐܪܒܰܥ ܦܶܢ̈ܝܳܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܛܽܘܒܳܐ ܪܰܒܳܐ܆ ܢܶܬܠܳــ̈ـܢ ܠܺܝ ܟܽܠ ܫܰܪ̈ܒܳܬܳܐ܆ ܐܶܡܪܰܬ ܡܰܪܝܰܡ ܕܺܝܠܶܕܬܶܗ ܠܦܳܪܽܘܩܶܗ ܕܥܳܠܡܳܐ܆ ܐܶܬܕܰܟܪܰܝܢ ܡܳܪܝܳܐ܀

ܛܽܘܒܰܝܟܝ ܡܰܪܝܰܡ܆ ܕܰܒܚܰܠܒܶܟܝ ܐܶܬܪܰܒܺܝ ܗ̱ܘܳܐ܆ ܙܳܐܶܢ ܛܽܘ̈ܗܡܶܐ ܘܫܰܪ̈ܒܳܬܳܐ ܥܰܡ ܝܳܠܽܘܕܶܗ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܡܳܐ ܕܰܡܦܺܝܣܳܐ܆ ܡܰܪܝܰܡ ܐܶܡܳܐ ܕܺܝܠܶܕܬܳܟ܆ ܚܠܳܦ ܓܶܢܣܳܐ ܕܰܒܢܰܝ̈ܢܳܫܳܐ ܕܢܶܬܚܢܶܢ ܒܝܽܘܡ ܕܺܝܢܳܐ܆ ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܕܽܘܟܪܳܢܳܗ̇ ܕܰܒܬܽܘܠܬܳܐ܆ ܕܟܺܝܬܳܐ ܡܰܪܝܰܡ ܗܳܐ ܡܶܙܕܰܝܰܚ܆ ܒܪܰܘܡܳܐ ܘܥܽܘܡܩܳܐ ܘܥܶܠܳܝ̈ܶܐ ܥܰܡ ܬܰܚܬܳܝ̈ܶܐ܆ ܙܳܡܪܺܝܢ ܫܽܘܒܚܳܐ܆ ܠܡܳܪܝܳܐ ܕܰܕܢܰܚ ܡܶܢ ܥܽܘܒܳܗ̇܀

ܠܶܟܝ ܛܽܘܒܰܝܟܝ ܩܰܕܺܝܫܬܳܐ܆ ܘܰܡܫܰܒܰܚܬܳܐ ܡܰܠܝܰܬ ܫܽܘܦܪ̈ܶܐ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ ܠܒܰܪ ܐܰܠܳܗܳܐ܆ ܘܝܰܩܰܪ ܘܰܐܘܪܶܒ܆ ܕܽܘܟܪܳܢܶܟܝ ܥܕܰܡܳܐ ܠܥܳܠܰܡ܀

ܒܝܽܘܡ ܕܽܘܟܪܳܢܶܟܝ ܩܰܕܺܝܫܬܳܐ܆ ܘܰܡܫܰܒܰܚܬܳܐ ܒܬܽܘܠܬܳܐ ܡܰܪܝܰܡ܆ ܐܰܦܺܝܣܝ ܘܰܒܥܳܝ ܠܺܝܚܺܝܕܶܟܝ ܕܰܢܫܰܘܙܶܒ ܠܰܢ܆ ܒܰܨ̈ܠܰܘܳܬܶܟܝ܆ ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ܀

ܫܽܘܒܚܳܐ

ܬܰܘܕܶܐ ܘܬܶܣܓܽܘܕ ܘܰܬܫܰܒܰܚ܆ ܥܺܕܰܬ ܩܽܘܕܫܳܐ ܘܟܽܠܗܽܘܢ ܝܰܠ̈ܕܶܝܗ̇܆ ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ ܚܰܕ ܐܰܠܳܗܳܐ܆ ܕܰܢܚܶܬ ܘܰܫܪܳܐ܆ ܒܓܰܘ ܥܽܘܒܳܗ̇ ܕܡܰܠܝܰܬ ܫܽܘܦܪ̈ܶܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܐܺܝܢ ܕܰܘܺܝܕ ܢܰܨܺܝܚܳܐ ܢܒܺܝܳܐ ܕܪܽܘܚܳܐ

ܠܶܟܝ ܛܽܘܒܰܝܟܝ ܒܰܪ̱ܬ ܕܰܘܺܝܕ ܒܬܽܘܠܬܳܐ ܡܰܪܝܰܡ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ ܠܰܒܪܳܐ ܕܰܐܠܳܗܳܐ܆ ܕܰܒܪ̈ܰܚܡܶܐ ܫܰܠܚܶܗ ܐܰܒܳܐ ܘܶܐܬܳܐ ܠܥܳܠܡܳܐ܆ ܘܰܚܙܳܐ ܒܶܟܝ ܡܰܟܺܝܟܽܘܬܳܐ ܘܡܶܢܶܟܝ ܐ̱ܢܳܫܳܐ ܗܘܳܐ܆ ܒܪܺܝܟ ܐܰܒܳܐ ܕܫܰܠܚܶܗ ܠܦܽܘܪܩܳܢܰܢ܆ ܘܰܒܪܺܝܟ ܒܪܳܐ ܕܡܶܢܶܟܝ ܐܶܬܓܰܫܰܡ܆ ܬܰܘܕܺܝ ܠܪܽܘܚܳܐ ܩܰܕܺܝܫܳܐ ܕܰܐܘܪܶܒ ܕܽܘܟܪܳܢܶܟܝ܀

ܫܽܘܒܚܳܐ

ܦܐܶܐ ܘܰܪܓܺܝܓ ܕܽܘܟܪܳܢܶܟܝ ܛܽܘܒܳܢܺܝܬܳܐ܆ ܘܢܳܨܰܚ ܝܰܘܡܳܐ ܕܥܰܕܥܺܐܕܶܟܝ ܡܶܢ ܣܰܘ̈ܦܶܐ ܠܣܰܘ̈ܦܶܐ܆ ܘܗܳܐ ܥܺܕ̈ܳܬܳܐ ܘܕܰܝܪ̈ܳܬܳܐ ܫܽܘܒܚܳܐ ܙܳܡܪ̈ܳܢ܆ ܝܰܡܳܐ ܘܝܰܒܫܳܐ ܒܬܶܕܡܽܘܪܬܳܐ ܚܳܕܶܝܢ ܐܳܦ ܪܳܘܙܺܝܢ܆ ܠܗܰܘ ܥܺܝܪܳܐ ܕܰܐܥܺܝܪ ܕܰܡܟܽܘܬܰܢ܆ ܘܗܳܐ ܒܥܺܐܕܶܟܝ ܐܰܫܘܝܰܢ ܕܢܶܙܡܰܪ ܠܶܗ܆ ܫܽܘܒܚܳܐ ܠܶܗ ܡܶܢ ܟܽܠ ܦܽܘܡܺܝ̈ܢ܆ ܒܝܰܘܡܳܐ ܕܕܽܘܟܪܳܢܶܟܝ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢ̱ܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢ̱ܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢ̱ܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢ̱ܬܽܘܢ. ܡܢܰܚܡܳܢܳܐ ܕܝܰܠ̈ܕܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܶܟܝ ܛܽܘܒܰܝܟܝ ܡܰܪܝܰܡ ܕܺܝܠܶܕܬܺܝܘܗܝ

ܒܕܽܘܟܪܳܢܳܗ̇ ܕܶܐܡܳܐ ܡܒܰܪܰܟܬܳܐ: ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇: ܚܳܕܶܐ ܬܽܘܒ ܐܳܕܳܡ ܘܰܡܫܰܒܰܚ: ܕܰܦܢܳܐ ܠܶܗ ܠܓܰܘ ܦܰܪܕܰܝܣܳܐ. ܚܳܕܝܳܐ ܚܰܘܳܐ ܕܒܶܟܝ ܩܳܡܰܬ: ܣܚܺܝܦܽܘܬܳܗ̇ ܕܰܣܚܺܝܦܳܐ ܗ̱ܘܳܬ: ܕܝܰܠܕܳܐ ܕܰܕܢܰܚ ܡܶܢ ܥܽܘܒܶܟܝ: ܗܽܘ ܣܰܚܦܶܗ ܠܳܐܟܶܠ ܩܰܪܨܳܐ: ܘܶܐܫܬܰܦܰܠܘ ܚܰܝ̈ܠܰܘܳܬܶܗ܀

ܫܽܘܒܚܳܐ

ܫܽܘܒܚܳܐ ܠܶܗ ܠܡܰܠܟܳܐ ܫܡܰܝܳܢܳܐ: ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ: ܘܰܗܘܳܐ ܐ̱ܢܳܫܳܐ ܡܶܢ ܡܰܪܝܰܡ: ܘܰܦܪܰܩ ܥܰܡ̱̈ܡܶܐ ܒܡܽܘܟܳܟܶܗ: ܘܝܽܘܡ ܕܽܘܟܪܳܢܳܗ̇ ܕܝܳܠܶܕܬܶܗ: ܢܰܨܰܚ ܘܰܐܘܪܶܒ ܐܳܦ ܝܰܩܰܪ: ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܡܶܢ ܣܰܘ̈ܦܶܝܗ̇ ܠܣܰܘ̈ܦܶܝܗ̇ ܕܰܐܪܥܳܐ: ܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܐܶܢ ܦܰܓ݂ܪܶܟ݂ܝ̱ ܪܰܚܺܝܩ ܡܶܢܰܢ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܳܠܳܗܳܐ)

ܠܡܰܪܝܰܡ ܟܽܠ ܫܰܪ̈ܒܳܢ ܛܽܘܒܳܐ ܢܶܬܠܳــ̈ـܢ ܠܳܗ̇܆ ܕܦܺܐܪܳܐ ܕܰܕܢܰܚ ܡܶܢ ܥܽܘܒܳܗ̇ ܐܰܘܪܶܒ ܠܰܫܡܳܗ̇܆ ܛܽܘܒܶܝܗ̇ ܕܰܗܘܳܬ ܡܰܪܟܰܒܬܳܐ ܘܙܰܝܰܚܬܶܗ܆ ܠܗܰܘ ܕܰܫܡܰܝܳܐ ܡܠܶܝܢ ܡܶܢܶܗ ܘܰܙܥܽܘܪܺܝܢ ܠܶܗ܀

ܫܽܘܒܚܳܐ

ܫܽܘܒܚܳܐ ܠܶܗ ܠܰܐܒܳܐ ܕܰܓܒܳܐ ܠܒܰܪ̱ܬ ܕܰܘܺܝܕ܆ ܘܠܰܒܪܳܐ ܕܰܕܢܰܚ ܡܶܢ ܥܽܘܒܳܗ̇ ܩܰܕܺܝܫܳܐܺܝܬ܆ ܘܰܠܪܽܘܚܳܐ ܕܩܽܘܕܫܳܐ ܕܰܐܘܪܶܒ ܕܽܘܟܪܳܢܳܗ̇܆ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ ܒܰܨ̈ܠܰܘܳܬܳܗ̇܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܫܩܰܠܘ̱ ܦܰܓ݂ܪܳܟ݂ ܦܳܪܽܘܩܰܢ. ܘܶܐܫܬܺܝܘ ܟܳܣܳܐ ܕܦܽܘܪܩܳܢܳܐ ܕܡܳܟ݂ ܝܰܩܺܝܪܳܐ. ܢܰܚܶܡ ܐܶܢܽܘܢ ܡܶܢ ܩܰܒܪ̈ܶܐ ܕܠܳܐ ܚܒܳܠܳܐ. ܘܰܐܠܒܶܫ ܐܶܢܽܘܢ ܬܶܫܒܽܘܚܬܳܐ ܕܠܳܟ݂ ܗ̱ܽܘ ܡܣܰܟܶܝܢ܀

ܦܶܬܓܳܡܳܐ: ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ: ܘܡܰܠܟܬܳܐ ܡܶܢ ܝܰܡܺܝܢܳܟ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܛܢܳܐ ܒܟܰܪܣܳܐ ܘܓ̈ܶܦܶܐ ܕܥܺܝܪ̈ܶܐ ܝܳܩܕܺܝܢ ܡܶܢܶܗ܆ ܒܡܰܪܝܰܡ ܟܽܠܶܗ ܘܒܰܐܒܽܘܗ̱ܝ ܟܽܠܶܗ ܘܠܳܐ ܡܶܣܬܰܝܰܟ܆ ܣܺܝܡ ܥܰܠ ܒܽܘܪ̈ܟܶܐ ܕܶܐܡܳܐ ܛܠܺܝܬܳܐ ܘܝܳܢܶܩ ܚܰܠܒܳܐ܆ ܘܪܶܡܙܶܗ ܡܕܰܒܰܪ ܐܰܬܪ̈ܰܘܳܬܳܐ ܓܢܺܝܙ̈ܶܐ ܕܰܠܥܶܠ܀

ܬܗܰܪܘ ܒܳܗ̇ ܥܺܝܪ̈ܶܐ ܒܶܐܡܳܐ ܛܠܺܝܬܳܐ ܕܰܛܥܺܝܢܳܐ ܠܶܗ܆ ܠܗܰܘ ܕܰܛܥܺܝܢܺܝܢ ܥܰܠ ܡܰܪܟܰܒܬܳܐ ܘܠܳܐ ܚܳܙܶܝܢ ܠܶܗ܆ ܫܽܘܒܚܳܐ ܠܪ̈ܰܚܡܰܘܗ̱ܝ ܟܡܳܐ ܐܶܬܡܰܟܰܟ ܡܶܛܽܠܳܬܰܢ܆ ܕܢܰܣܩܰܢ ܥܰܡܶܗ ܠܰܐܬܪܳܐ ܕܰܐܒܽܘܗ̱ܝ ܠܶܗ ܬܶܫܒܽܘܚܬܳܐ܀

ܡܰܠܝܰܬ ܪ̈ܰܚܡܶܐ ܐܰܦܺܝܣܝ ܘܰܒܥܳܝ ܠܰܡܠܶܐ ܪ̈ܰܚܡܶܐ܆

ܕܢܶܥܒܶܕ ܪ̈ܰܚܡܶܐ ܥܰܳܠ ܢܰܦ̈ܫܳܬܳܐ ܕܫܳܐܠܳــ̈ــܢ ܪ̈ܰܚܡܶܐ܀