ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܐܶܢ ܦܰܓܪܶܟܝ̱ ܪܰܚܺܝܩ ܡܶܢܰܢ (ܣܳܠܶܩ: ܒܡܰܪܝܰܡ ܝܳܠܕܰܬ ܐܳܠܳܗܳܐ)

ܠܡܰܪܝܰܡ ܟܽܠ ܫܰܪ̈ܒܳܢ ܛܽܘܒܳܐ ܢܶܬܠܳــ̈ـܢ ܠܳܗ̇܆ ܕܦܺܐܪܳܐ ܕܰܕܢܰܚ ܡܶܢ ܥܽܘܒܳܗ̇ ܐܰܘܪܶܒ ܠܰܫܡܳܗ̇܆ ܛܽܘܒܶܝܗ̇ ܕܰܗܘܳܬ ܡܰܪܟܰܒܬܳܐ ܘܙܰܝܰܚܬܶܗ܆ ܠܗܰܘ ܕܰܫܡܰܝܳܐ ܡܠܶܝܢ ܡܶܢܶܗ ܘܰܙܥܽܘܪܺܝܢ ܠܶܗ܀

ܫܽܘܒܚܳܐ

ܫܽܘܒܚܳܐ ܠܶܗ ܠܰܐܒܳܐ ܕܰܓܒܳܐ ܠܒܰܪ̱ܬ ܕܰܘܺܝܕ܆ ܘܠܰܒܪܳܐ ܕܰܕܢܰܚ ܡܶܢ ܥܽܘܒܳܗ̇ ܩܰܕܺܝܫܳܐܺܝܬ܆ ܘܰܠܪܽܘܚܳܐ ܕܩܽܘܕܫܳܐ ܕܰܐܘܪܶܒ ܕܽܘܟܪܳܢܳܗ̇܆ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ ܒܰܨ̈ܠܰܘܳܬܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܶܟܝ ܛܽܘܒܰܝܟܝ ܡܰܪܝܰܡ ܕܺܝܠܶܕܬܺܝܘܗܝ

ܒܕܽܘܟܪܳܢܳܗ̇ ܕܶܐܡܳܐ ܡܒܰܪܰܟܬܳܐ: ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇: ܚܳܕܶܐ ܬܽܘܒ ܐܳܕܳܡ ܘܰܡܫܰܒܰܚ: ܕܰܦܢܳܐ ܠܶܗ ܠܓܰܘ ܦܰܪܕܰܝܣܳܐ. ܚܳܕܝܳܐ ܚܰܘܳܐ ܕܒܶܟܝ ܩܳܡܰܬ: ܣܚܺܝܦܽܘܬܳܗ̇ ܕܰܣܚܺܝܦܳܐ ܗ̱ܘܳܬ: ܕܝܰܠܕܳܐ ܕܰܕܢܰܚ ܡܶܢ ܥܽܘܒܶܟܝ: ܗܽܘ ܣܰܚܦܶܗ ܠܳܐܟܶܠ ܩܰܪܨܳܐ: ܘܶܐܫܬܰܦܰܠܘ ܚܰܝ̈ܠܰܘܳܬܶܗ܀

ܫܽܘܒܚܳܐ

ܫܽܘܒܚܳܐ ܠܶܗ ܠܡܰܠܟܳܐ ܫܡܰܝܳܢܳܐ: ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ: ܘܰܗܘܳܐ ܐ̱ܢܳܫܳܐ ܡܶܢ ܡܰܪܝܰܡ: ܘܰܦܪܰܩ ܥܰܡ̱̈ܡܶܐ ܒܡܽܘܟܳܟܶܗ: ܘܝܽܘܡ ܕܽܘܟܪܳܢܳܗ̇ ܕܝܳܠܶܕܬܶܗ: ܢܰܨܰܚ ܘܰܐܘܪܶܒ ܐܳܦ ܝܰܩܰܪ: ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܡܶܢ ܣܰܘ̈ܦܶܝܗ̇ ܠܣܰܘ̈ܦܶܝܗ̇ ܕܰܐܪܥܳܐ: ܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܛܽܘܒܰܝܟܝ ܡܰܪܝܰܡ ܕܡܶܢ ܥܽܘܒܶܟܝ܆ ܐܶܬܺܝܠܶܕ ܗܰܘ ܓܰܢ̱ܒܳܪܳܐ܆ ܕܰܚܒܰܫ ܦܰܟܪܶܗ ܠܡܳܪܽܘܕܳܐ܆ ܗܰܘ ܕܰܐܛܥܺܝ ܠܶܐܡܰܢ ܚܰܘܳܐ܆ ܛܽܘܒܰܝܟܝ ܕܰܕܢܰܚ ܡܶܢ ܥܽܘܒܶܟܝ܆ ܚܰܝ̈ܶܐ ܚܰܕ̱̈ܬܶܐ ܠܥܰܦܪ̈ܳܢܶܐ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܰܗܘܳܐ ܥܽܘܠܳܐ ܒܓܰܘ ܟܰܪܣܶܟܝ܆ ܫܽܘܒܚܳܐ ܠܶܗ ܕܰܕܢܰܚ ܡܶܢܶܟܝ܆ ܘܠܳܐ ܫܪܳܐ ܛܰܒ̈ܥܶܐ ܕܰܒܬܽܘ̈ܠܰܝܟܝ܆ ܫܽܘܒܚܳܐ ܠܶܗ ܕܪܰܡܪܶܡ ܘܰܐܘܪܶܒ܆ ܕܽܘܟܪܳܢܶܟܝ ܒܰܐܪܒܰܥ ܦܶܢ̈ܝܳܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܩܽܘ̈ܠܳܣܶܝܗ̇ ܕܝܳܠܕܰܬ ܐܰܠܳܗܳܐ