ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‌ܠܳܗܳܐ

ܩܠܐ

ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ܆ ܠܡܶܫܰܐܠ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢ ܚܰܘ̈ܒܶܐ. ܢܺܐܬܶܐ ܒܨܰܦܪܳܐ ܘܢܶܣܓܽܘܕ ܠܳܟ ܦܳܪܽܘܩܰܢ: ܕܰܐܢ̱ܬ ܗܽܘ ܚܳܐܶܢ ܠܚܰܛܳܝ̈ܶܐ ܡܶܢ ܚܰܘܒܰܝ̈ܗܽܘܢ܀

ܩܕܡܝܐ

ܐܶܢ ܦܰܓܪܶܟܝ̱ ܪܰܚܺܝܩ ܡܶܢܰܢ. ܩܰܕܺܝܫܬܳܐ. ܨܠܰܘ̈ܳܬܶܟܝ̱ ܥܰܡܰܢ ܐܶܢܶܝܢ. ܒܟܽܠ̈ܥܶܕܳܢܺܝܢ. ܠܗܰܘ ܚܰܝܠܳܐ ܟܰܣܝܳܐ ܕܰܢܚܶܬ܆ ܘܰܫܪܳܐ ܒܶܟܝ̱. ܐܶܬܟܰܫܰܦܝ̱ ܠܶܗ ܩܰܕܺܝܫܬܳܐ܆ ܢܪܰܚܶܡ ܥܠܰܝ܀

ܬܪܝܢܐ

ܡܒܰܪܰܟܬܳܐ ܕܰܗܘܳܬ ܐܶܡܳܐ. ܠܰܐܠܳܗܳܐ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܕܠܳܐ ܙܽܘܘܳܓܳܐ. ܒܥܳܝ ܪ̈ܰܚܡܶܐ ܒܗܳܢܳܐ ܝܰܘܡܳܐ. ܕܕܽܘܟܪܳܢܶܟܝ̱. ܕܢܶܗܘܶܐ ܒܶܗ ܢܝܳܚܳܐ ܠܡܺܝ̈ܬܶܐ ܘܣܰܒܪܳܐ ܠܚ̈ܰܝܶܐ܀

ܬܠܝܬܝܐ

ܫܠܳܡܳܐ ܥܰܡܳܗܿ ܕܡܰܫܪܺܝܬܟܽܘܢ ܩܰܕܺܝ̈ܫܶܐ. ܬܰܓܳܪ̈ܶܐ ܛܥܺܝ̈ܢܰܝ ܚܰܝ̈ܶܐ ܠܰܒܢܰܝ̈ܢܳܫܳܐ. ܦܬܰܚܘ̱ ܓܰܙܳܐ ܕܰܨ̈ܠܰܘܬܟܽܘܢ ܠܰܣܢܺܝ̈ܩܶܐ. ܘܛܰܪܘ̱ ܐܰܬܪܳܐ ܕܰܫܪܶܝܬܽܘܢ ܒܶܗ ܡܶܢ ܢܶܟ̈ܝܳܢܶܐ܀

ܪܒܝܥܝܐ

ܩܽܘܡܘ̱ ܣܳܗ̈ܕܶܐ ܣܰܬܰܪܽܘܢܳܗܿ ܠܰܒܪܺܝܬܳܐ. ܡܶܢ ܓܰܠ̱̈ܠܶܐ ܘܡܶܢ ܡܰܚ̈ܫܽܘܠܶܐ ܕܰܟܪܺܝܟܺܝܢ ܠܳܗܿ. ܐܰܝܟ ܕܣܰܬܰܪ ܗ̱ܘܳܐ ܢܽܘܚ ܟܺܐܢܳܐ ܒܟܶܐܘܶܠܳܐ. ܠܚܰܝ̈ܘܳܬܳܐ ܕܥܰܠ̈ܝ̱ ܗ̱ܘܰܝ̈ ܥܰܡܶܗ ܒܝܽܘܡ ܛܰܘܦܳܢܳܐ܀

ܚܡܝܫܝܐ

ܐܰܠܳܗܳܐ ܫܰܦܝܳܐ ܕܪܳܚܶܡ ܠܰܫ̈ܦܰܝܳܐ. ܗܰܒܠܰܢ ܡܳܪܝ ܫܰܦܝܽܘܬ ܠܶܒܳܐ ܒܟܽܠ̈ܥܶܕܳܢܺܝܢ. ܘܰܐܥܒܰܪ ܡܶܢܰܢ ܡܰܪ̈ܢܝܳܬܳܐ ܣܪ̈ܺܝܩܳܬܳܐ. ܘܟܽܠ ܚܽܘ̈ܫܳܒܶܐ ܘܕܽܘ̈ܘܳܕܶܐ ܕܠܳܟ ܠܳܐ ܫܳܦܪܺܝܢ܀

ܫܬܝܬܝܐ

ܐܰܠܳܗܳܐ ܕܚܳܣ ܥܰܠ ܢܺܝܢܘܶܐ ܚܽܘܣ ܥܠܰܝܢ. ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܶܗ ܕܕܳܪܰܢ ܕܰܚܛܳܐ. ܘܶܐܢ ܬܰܪܥܳܟ ܬܶܐܚܽܘܕ ܒܰܐܦܰܝ̈ܢ ܚܰܢܳܢܳܐ. ܒܰܬܪܰܥ ܡܰܢ ܢܺܐܙܰܠ ܢܶܩܽܘܫ ܪܳܚܶܡ ܐ̱ܢܳܫܳܐ܀

ܫܒܝܥܝܐ

ܐܶܡܰܪ ܐܳܕܳܡ ܣܳܓܶܕ ܐ̱ܢܳܐ ܠܗܰܘ ܩܳܠܳܐ: ܕܰܩܪܳܐ ܠܺܝ ܒܶܝܬ ܐܺܝ̈ܠܳܢܶܐ ܘܚܳܒܶܬ ܡܶܢܶܗ: ܗܽܘ ܢܶܩܪܶܐ ܠܺܝ ܘܰܠܝܰܠ̈ܕܰܝ ܒܢܽܘܚܳܡܳܐ: ܘܰܢܩܺܝܡܰܢܝ ܡܶܢ ܝܰܡܺܝܢܳܐ ܕܰܐܠܳܗܽܘܬܶܗ܀

ܬܡܝܢܝܐ

ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ ܦܳܪܽܘܩܰܢ. ܘܶܐܫܬܺܝܘ ܟܳܣܳܐ ܕܦܽܘܪܩܳܢܳܐ ܕܡܳܟ ܝܰܩܺܝܪܳܐ. ܢܰܚܶܡ ܐܶܢܽܘܢ ܡܶܢ ܩܰܒܪ̈ܶܐ ܕܠܳܐ ܚܒܳܠܳܐ. ܘܰܐܠܒܶܫ ܐܶܢܽܘܢ ܬܶܫܒܽܘܚܬܳܐ ܕܠܳܟ ܗ̱ܽܘ ܡܣܰܟܶܝܢ܀