ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‌ܠܳܗܳܐ

ܩܕܡܝܐ

ܐܺܝܢ ܛܰܠܝܳܐ ܪܓܺܝܓܳܐ ܫܠܶܝܡܽܘܢ ܐܰܝܕܳܐ ܗ̱ܝ ܓܰܢܬܳܐ ܕܠܳܗܿ ܗܽܘ ܡܢܰܨܰܪ ܗ̱ܘܰܝܬ. ܕܰܐܚܺܝܕܳܐ ܗ̱ܘܳܬ ܘܰܚܬܺܝܡܳܐ ܒܰܒܬܽܘܠܽܘܬܳܗ̇. ܡܰܪܝܰܡ ܗ̱ܺܝ ܕܰܕܢܰܚ ܡܶܢܳܗܿ ܗܰܘ ܓܰܢܳܢܳܐ ܕܢܰܨܒܶܗ ܠܦܰܪܕܰܝܣܳܐ܀

ܬܪܝܢܐ

ܡܰܢ ܗ̱ܺܝ ܗܳܕܶܐ ܕܒܰܒܬܽܘ̈ܠܶܝܗܿ ܩܰܒܠܰܬ ܒܰܛܢܳܐ ܣܛܰܪ ܡܶܢ ܙܽܘܘܳܓܳܐ. ܡܰܪܝܰܡ ܗ̱ܺܝ ܗܳܝ ܕܶܐܫܰܥܝܳܐ ܥܠܶܝܗܿ ܐܶܬܢܰܒܺܝ. ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ ܝܰܠܕܳܐ ܕܺܐܝܬܰܘܗ̱ܝ ܟܽܠܶܗ ܕܽܘܡܳܪܳܐ܀

ܬܠܝܬܝܐ

ܒܨܰܦܪܳܐ ܩܰܕܶܡ ܒܰܪ ܡܰܠܟܳܐ ܕܢܶܐܓܽܘܪ ܦܳܥ̈ܠܶܐ ܠܟܰܪܡܳܐ ܕܒܶܝܬ ܐܰܒܽܘܗ̱ܝ. ܘܶܐܓܰܪ ܠܽܘܩܕܰܡ ܠܰܢ̈ܒܺܝܶܐ ܐܳܦ ܠܰܫܠܺܝ̈ܚܶܐ. ܘܒܰܥܣܰܪ ܘܰܚܕܳܐ ܠܓܰܝܳܣܳܐ ܝܰܗ̱ܒ ܠܶܗ ܩܠܺܝ̈ܕܶܐ ܘܫܰܕܪܶܗ ܠܦܰܪܕܰܝܣܳܐ܀

ܪܒܝܥܝܐ

ܐܶܡܰܪܘ̱ ܠܺܝ ܣܳܗ̈ܕܶܐ ܒܪ̈ܺܝܟܶܐ ܐܰܝܢܰܘ ܚܶܙܘܳܐ ܚܙܰܝܬܽܘܢ ܒܶܝܬ ܕܺܝܢܳܐ. ܚܙܰܝܢܰܢ ܣܰܝ̈ܦܶܐ ܕܰܠܛܺܝܫܺܝܢ ܘܢܽܘܪܳܐ ܕܝܳܩܕܳܐ. ܘܪܽܘܚ ܩܽܘܕܫܳܐ ܕܓܳܕܠܳܐ ܟܠܺܝ̈ܠܶܐ ܘܣܳܝܡܳܐ ܒܪܺܝܫܳܐ ܕܟܽܠܗܽܘܢ ܩܰܕܺܝ̈ܫܶܐ܀

ܚܡܝܫܝܐ

ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܆ ܘܡܶܢ ܒܶܝܬ ܓܰܙܳܟ: ܪ̈ܰܚܡܶܐ ܫܳܐܶܠ ‌ܐ̱ܢܳܐ. ܚܰܛܳܝܳܐ ܐ̱ܢܳܐ ܕܰܫ̈ܢܰܝܳܐ ܣ‍ܛܺܝܬ ܡܶܢ ܐܽܘܪܚܳܟ. ܗܰܒܠܺܝ ܕܰܐܘܕܶܐ ܒܰܚ̈ܛܳܗܰܝ ܘܶܐܥܒܰܪ ܡܶܢܗܽܘܢ: ܘܺܐܚܶܐ ܒܛܰܝܒܽܘܬܳܟ܀

ܫܬܝܬܝܐ

ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܗܘܺܝ ܠܺܝ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ. ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ ܕܡܰܩܪܶܒ ܥܰܡܰܢ. ܒܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ ܡܳܐ ܕܡܶܬܦܰܪܫܺܝܢ ܛܳܒ̈ܶܐ ܡܶܢ ܒܺܝ̈ܫܶܐ܀

ܫܒܝܥܝܐ

ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ ܠܪ̈ܳܥܰܘܳܬܳܐ ܕܰܪܥܰܘ ܡܰܪܥܺܝܬܳܟ. ܘܠܰܢ̈ܒܺܝܶܐ ܫܠܺܝ̈ܚܶܐ ܘܣܳܗ̈ܕܶܐ ܘܟܺܐܢ̈ܶܐ ܘܟܳܗ̈ܢܶܐ. ܘܰܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܡܶܢ ܕܳܪ ܠܕܳܪ ܘܰܥܕܰܡܳܐ ܠܥܳܠܰܡ܀

ܬܡܝܢܝܐ

ܩܪܺܝ ܒܩܳܠܳܟ ܦܳܩܽܘܕܳܐܺܝܬ ܒܰܪ ܐܰ‌ܠܳܗܳܐ ܠܡܺܝ̈ܬܶܐ ܕܰܒܩܰܒܪ̈ܶܐ܆ ܘܰܢܩܽܘܡܽܘܢ ܩܰܠܺܝܠܳܐܺܝܬ ܡܶܢ ܩܰܒܪ̈ܰܝܗܽܘܢ. ܘܢܶܥܠܽܘܢ ܥܰܡܳܟ ܦܨܺܝܚܳܐܺܝܬ: ܠܰܓܢܽܘܢ ܢܽܘܗܪܳܐ: ܕܟܺܐܢ̈ܶܐ ܚܳܕܝܳܐܺܝܬ܀