ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܰܘ ܕܺܝܠܺܝܕ ܡܶܢ ܐܰܒܳܐ܆ ܩܕܳܡ ܥܳܠ̈ܡܶܐ ܪܽܘܚܳܢܳܐܺܝܬ܆ ܡܰܪܝܰܡ ܒܬܽܘܠܬܳܐ܆ ܝܺܠܶܕܬܶܗ ܦܰܓܪܳܢܳܐܺܝܬ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܕܢܰܚ ܡܰܠܟܳܐ ܒܳܐܦܰܪܬܳܐ܆ ܘܪܺܝܫܳܐ ܕܥܰܡ̱̈ܡܶܐ ܒܒܶܝܬ ܠܚܶܡ܆ ܘܰܐܙܺܝܥ ܘܰܐܪܗܶܒ܆ ܠܡܰܠ̈ܟܶܐ ܘܟܳܗ̈ܢܶܐ ܘܰܢܒܺܝ̈ܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܒܝܰܠܕܳܐ ܕܺܝܠܶܗ܆ ܡܓܽܘ̈ܫܶܐ ܐܶܬܰܘ ܡܶܢ ܦܳܪܶܣ܆ ܘܥܰܠܘ ܘܰܣܓܶܕܘ ܠܶܗ܆ ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܶܢ ܠܘܳܬ ܐܰܒܳܐ ܐܶܫܬܠܰܚ܆ ܗܰܘ ܨܶܡܚܳܐ ܕܰܩܕܳܡ ܥܳܠ̈ܡܶܐ܆ ܘܰܢܚܶܬ ܘܰܫܪܳܐ܆ ܒܰܒܬܽܘܠܬܳܐ ܕܟܺܝܬܳܐ ܡܰܪܝܰܡ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ܆ ܐܶܬܺܝܠܶܕ ܠܰܢ ܦܳܪܽܘܩܳܐ܆ ܘܙܳܚܰܬ ܦܳܪܶܣ܆ ܘܣܶܓܕܰܬ ܠܶܗ ܥܰܡ ܩܽܘܪ̈ܒܳܢܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܗܰܘ ܢܽܘܗܪܳܐ ܓܰܐܝܳܐ

ܟܽܠܗܽܘܢ ܟܶܢ̈ܫܶܐ ܫܡܰܝ̈ܳܢܶܐ܆ ܗܳܐ ܡܫܰܒܚܺܝܢ ܠܳܟ ܒܰܫܡܰܝܳܐ܆ ܘܰܒܢܰܝ̈ܢܳܫܳܐ ܥܰܠ ܐܰܪܥܳܐ܆ ܗܳܐ ܙܳܡܪܺܝܢ ܠܳܟ ܬܶܫܒܽܘܚܬܳܐ܀

ܢܚܶܬܬ ܡܳܪܝ ܒܰܚܢܳܢܳܟ ܦܳܪܽܘܩܰܢ܆ ܨܶܝܕ ܚܰܛܳܝ̈ܶܐ ܒܛܰܝܒܽܘܬܳܟ܆ ܘܰܦܪܰܩܬ ܐܶܢܽܘܢ ܒܝܰܕ ܪ̈ܰܚܡܰܝܟ܆ ܘܗܳܐ ܙܳܡܪܺܝܢ ܠܳܟ ܬܶܫܒܽܘܚܬܳܐ܀

ܟܰܘܟܒܳܐ ܣܰܒܰܪ ܗ̱ܘܳܐ ܠܰܡܓܽܘ̈ܫܶܐ܆ ܡܶܛܽܠ ܝܰܠܕܳܟ ܡܰܚܶܐ ܟܽܠ܆ ܘܰܛܥܶܢܘ ܘܰܐܝܬܺܝܘ ܠܳܟ ܫܰܪܺܝܪ̈ܶܐ܆ ܩܽܘܪ̈ܒܳܢܶܐ ܕܠܳܐ ܦܽܘܠܳܓܳܐ܀

ܡܶܛܽܠ ܡܰܘܠܳܕܳܟ ܡܰܚܶܐ ܟܽܠ܆ ܘܶܐܬܩܰܛܰܠܘ ܐܳܦ ܝܰܠܽܘ̈ܕܶܐ܆ ܟܰܕ ܥܰܩܶܒ ܗ̱ܘܳܐ ܗܶܪܳܘܕܶܣ܆ ܠܰܡܓܽܘ̈ܫܶܐ ܕܶܐܬܰܘ ܨܶܐܕܰܘܗ̱ܝ܀

ܡܶܢ ܓܰܘܳܗ̇ ܕܦܳܪܶܣ ܐܰܝܬܺܝܘ ܠܳܟ܆ ܩܽܘܪ̈ܒܳܢܶܐ ܥܰܡܳܐ ܪܰܒܳܐ܆ ܘܰܣܓܶܕܘ ܒܰܡܥܰܪܬܳܐ ܠܡܰܘܠܳܕܳܟ܆ ܘܩܰܪܶܒܘ ܠܳܟ ܩܽܘܪ̈ܒܳܢܰܝܗܽܘܢ܀

ܣܓܺܝܕ ܘܰܡܫܰܒܰܚ ܘܰܡܗܰܕܰܪ܆ ܡܶܢ ܦܽܘܡܳܐ ܕܟܽܠܗܽܘܢ ܡܠܺܝ̈ܠܶܐ܆ ܝܶܫܽܘܥ ܐܰܠܳܗܳܐ ܦܳܪܽܘܩܰܢ܆ ܥܰܡ ܐܰܒܳܐ ܘܪܽܘܚܳܐ ܕܩܽܘܕܫܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܫܡܰܝ̈ܳܐ ܚܳܕܶܝܢ ܘܰܐܪܥܳܐ ܪܳܘܙܳܐ ܘܝܰܡܳܐ ܕܳܐܶܨ܆ ܘܟܽܠ ܒܶܪ̈ܝܳܢ ܙܳܡܪ̈ܳܢ ܫܽܘܒܚܳܐ܆ ܠܺܐܝܬܝܳܐ ܓܢܺܝܙܳܐ ܕܰܒܝܽܘܡ ܝܰܠܕܶܗ ܐܰܦܨܰܚ ܐܶܢܶܝܢ܆ ܘܚܰܪܰܪ ܐܶܢܶܝܢ ܡܶܢ ܛܽܘܥܝܰܝ܀

ܒܨܰܦܪܳܐ ܡܓܽܘ̈ܫܶܐ ܒܶܝܬ ܗܶܪܳܘܕܶܣ ܠܟܳܗ̈ܢܶܐ ܫܰܐܶܠܘ܆ ܕܰܐܝܟܰܘ ܡܰܠܟܳܐ ܕܶܐܬܺܝܠܶܕ܆ ܟܰܘܟܒܶܗ ܚܙܰܝܢܰܢ ܘܰܐܙܠܶܓ ܢܽܘܗܪܶܗ ܡܶܢ ܒܶܝܬ ܠܚܶܡ܆ ܘܶܐܬܰܝܢ ܠܡܶܣܓܰܕ ܠܺܐܝܩܳܪܶܗ܀

ܠܪ̈ܳܥܰܘܳܬܳܐ ܐܳܦ ܠܰܡܓܽܘ̈ܫܶܐ ܟܰܘܟܒܳܐ ܗܰܕܺܝ܆ ܕܢܺܐܬܽܘܢ ܠܺܐܝܩܳܪܶܗ ܕܡܰܠܟܳܐ܆ ܦܬܰܚܘ ܣܺܝ̈ܡܳܬܗܽܘܢ ܘܩܰܪܶܒܘ ܗ̱ܘܰܘ ܠܶܗ ܩܽܘܪ̈ܒܳܢܰܝܗܽܘܢ܆ ܘܰܣܓܶܕܘ ܘܰܢܦܰܩܘ ܟܰܕ ܚܳܕܶܝܢ܀

ܐܳܡܪܳܐ ܡܰܪܝܰܡ ܠܰܒܪܳܗ̇ ܒܽܘܟܪܳܐ ܟܰܕ ܝܺܠܶܕܬܶܗ܆ ܫܽܘܒܚܳܐ ܠܳܟ ܪܳܚܶܡ ܐ̱ܢܳܫܳܐ܆ ܕܡܶܢ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ ܐܰܚܬܽܘܟ ܪ̈ܰܚܡܰܝܟ܆ ܠܥܰܙܪܽܘܪ̈ܶܐ ܕܡܶܣܟܺܢܽܘܬܳܐ܀

ܒܗܳܢܳܐ ܝܰܘܡܳܐ ܢܚܶܬܘ ܡܰܠܰܐܟ̈ܶܐ ܠܰܡܣܰܒܳܪܽܘ܆ ܠܪ̈ܳܥܰܘܳܬܳܐ ܒܓܰܘ ܕܰܒܪܳܐ܆ ܕܶܐܬܺܝܠܶܕ ܠܟܽܘܢ ܡܳܪܝܳܐ ܡܫܺܝܚܳܐ ܒܩܽܘܪܝܰܬ ܕܰܘܺܝܕ܆ ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܐܰܢܺܝܚ ܡܳܪܝܳܐ ܠܥܰܒ̈ܕܶܐ ܕܺܝܠܳܟ ܒܗܳܝ ܡܰܠܟܽܘܬܳܐ: ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ: ܘܰܟܬܽܘܒ ܐܶܢܽܘܢ ܠܰܫܡܳܗܰܝ̈ܗܽܘܢ ܒܰܣܦܰܪ ܚܰܝ̈ܶܐ: ܒܽܐܘܪܺܫܠܶܡ ܗܳܝ ܕܒܰܫܡܰܝܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܡܰܠܰܐܟ̈ܶܐ ܗܳܐ ܚܳܕܶܝܢ܆ ܒܝܰܠܕܳܟ ܡܠܶܐ ܬܶܗܪܳܐ܆ ܡܥܰܪܬܳܐ ܪܳܘܙܳܐ ܘܽܐܘܪܝܳܐ ܕܳܐܶܨ ܡܓܽܘ̈ܫܶܐ ܚܳܕܶܝܢ܆ ܘܟܰܘܟܰܒ ܢܽܘܗܪܳܐ ܒܰܕܶܩ ܗ̱ܘܳܐ܆ ܕܗܳܢܰܘ ܦܳܪܽܘܩܳܐ܀

ܝܰܘܡܳܢܳܐ܆ ܐܶܬܺܝܠܶܕ ܦܳܪܽܘܩܳܐ ܡܶܢ ܒܬܽܘܠܬܳܐ ܡܳܪܝܰܡ܆ ܘܶܐܬܰܘ ܡܓܽܘ̈ܫܶܐ ܘܰܣܓܶܕܘ ܩܽܘܕܡܰܘܗ̱ܝ ܒܩܽܘܪ̈ܒܳܢܰܝܗܽܘܢ܆ ܘܰܩܥܰܘ ܘܶܐܡܰܪ ܫܰܘܝܳܐܺܝܬ܆ ܒܪܺܝܟ ܝܰܠܕܳܟ ܡܳܪܰܢ܀

ܝܰܘܡܳܢܳܐ܆ ܛܥܶܢܘ ܡܓܽܘ̈ܫܶܐ ܒܩܽܘܪ̈ܒܳܢܶܐ ܡܶܢ ܐܰܪܥܳܐ ܕܦܳܪܶܣ܆ ܘܥܰܠܘ ܠܰܡܥܰܪܬܳܐ ܘܰܣܓܶܕܘ ܠܰܒܪܳܐ ܘܩܰܪܶܒܘ ܗ̱ܘܰܘ ܠܶܗ܆ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܘܰܗܦܰܟܘ ܟܰܕ ܚܳܕܶܝܢ܀

ܝܰܘܡܳܢܳܐ܆ ܐܶܫܬܰܡܠܺܝܘ ܟܽܠ ܐ̱ܪ̈ܳܙܺܝܢ ܕܒܰܕܶܩܘ ܥܰܠ ܝܰܠܕܳܟ܆ ܕܰܥܬܺܝܕ ܕܢܶܕܢܰܚ ܡܶܢ ܐܰܒܪܳܗܳܡ ܐܳܦ ܡܶܢ ܕܰܘܺܝܕ܆ ܝܰܠܕܳܐ ܬܡܺܝܗܳܐ ܕܕܽܘܡܳܪܳܐ܆ ܕܰܦܪܰܩ ܒܶܪ̈ܝܳܬܳܐ܀

ܟܰܘܟܰܒ ܢܽܘܗܪܳܐ܆ ܒܝܰܕ ܕܶܢܚܶܗ ܐܰܙܺܝܥܳܗ̇ ܠܦܳܪܶܣ ܥܰܫܺܝܢܬܳܐ܆ ܘܰܒ̈ܢܰܝ ܐܰܬܪܳܐ ܫܩܰܠܘ ܩܽܘܪ̈ܒܳܢܶܐ ܘܩܰܪܶܒܘ ܗ̱ܘܰܘ ܠܶܗ܆ ܠܡܰܠܟܳܐ ܕܺܝܠܺܝܕ ܒܰܡܥܰܪܬܳܐ܆ ܘܰܗܦܰܟܘ ܟܰܕ ܚܳܕܶܝܢ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܥܰܡ ܟܶܢ̈ܫܶܐ ܫܡܰܝ̈ܳܢܶܐ

ܙܳܚܘ ܘܰܢܚܶܬܘ ܡܰܠܰܐܟ̈ܶܐ܆ ܘܥܺܝܪ̈ܰܝ ܪܰܘܡܳܐ ܢܝܰܩܪܽܘܢ ܡܰܘܠܳܕܳܟ܆ ܘܶܐܬܚܰܠܰܛ ܫܽܘܒܚܳܐ ܒܰܡܥܰܪܬܳܐ܆ ܡܶܢ ܥܶܠܳܝ̈ܶܐ ܘܬܰܚܬܳܝ̈ܶܐ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܝܰܘܡܳܢܳܐ ܒܒܶܝܬ ܠܚܶܡ܆ ܐܶܬܺܝܠܶܕ ܠܰܢ ܝܰܠܕܳܐ ܡܶܢ ܡܰܪܝܰܡ܆ ܘܰܟܪܰܟܬܶܗ ܒܬܽܘܠܬܳܐ ܒܥܰܙܪܽܘܪ̈ܶܐ܆ ܘܕܰܫܦܰܪ ܠܶܗ ܒܽܐܘܪܝܳܐ ܣܳܡܬܶܗ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܒܽܐܘܪܝܳܐ ܣܳܡܬܶܗ ܡܰܪܝܰܡ ܠܰܒܪܳܐ ܚܰܝܳܐ: ܕܰܕܢܰܚ ܡܶܢ ܥܽܘܒܳܗ̇: ܓܢܶܐ ܒܽܐܘܪܝܳܐ: ܘܒܳܟܶܐ ܐܰܝܟ ܫܰܒܪܳܐ: ܘܥܺܝܪ̈ܶܐ ܪܗܺܝܒܺܝܢ ܡܶܢ ܙܺܝܘܶܗ: ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ ܚܰܕ̱ܬܳܐ ܘܦܰܐܝܳܐ܆ ܪܥܶܡ ܒܰܡܥܰܪܬܳܐ ܒܝܰܘܡܳܐ ܕܡܰܘܠܳܕܶܗ܆ ܕܡܰܠܰܐܟ̈ܶܐ ܘܪ̈ܳܥܰܘܳܬܳܐ ܘܰܕܝܰܘܣܶܦ ܕܰܚܙܳܐ ܡܰܘܠܳܕܶܗ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܟܰܘܟܒܳܐ ܢܓܰܕ ܠܰܡܓܽܘ̈ܫܶܐ܆ ܘܰܐܝܬܺܝ ܐܶܢܽܘܢ ܕܢܶܚܙܽܘܢ ܡܰܘܠܳܕܶܗ܆ ܐܰܝܟ ܫܰܒܪܳܐ ܚܙܰܐܘܽܗ̱ܝ ܥܰܡ ܐܶܡܶܗ܆ ܘܰܐܝܟ ܐܰܠܳܗܳܐ ܒܪܶܟܘ ܘܰܣܓܶܕܘ ܠܶܗ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܓܽܘ̈ܫܶܐ ܦܬܰܚܘ ܣܺܝ̈ܡܳܬܗܽܘܢ܆ ܩܽܘܕܡܰܬ ܡܰܠܟܳܐ ܕܺܝܠܺܝܕ ܒܰܡܥܰܪܬܳܐ܆ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܩܽܘܪ̈ܒܳܢܶܐ ܬܠܳܬܳܐ ܩܰܪܶܒܘ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ: ܩܥܰܘ ܥܶܠܳܝ̈ܶܐ ܠܝܰܠܕܳܐ ܕܡܶܢ ܐܰܒܳܐ: ܕܰܒܚܰܪܰܬ ܙܰܒ̈ܢܶܐ ܐܶܬܺܝܠܶܕ: ܘܠܳܐ ܬܪܶܝܢ ܗ̱ܽܘ ܐܶܠܳܐ ܐܶܢ ܚܰܕ: ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܝܰܘܡܳܢܳܐ ܚܰܕܽܘܬܳܐ ܘܰܦܨܺܝܚܽܘܬܳܐ ܠܟܽܠܗܶܝܢ ܒܶܪ̈ܝܳܬܳܐ܆ ܕܰܐܠܳܗܳܐ ܗܘܳܐ ܗ̱ܘܳܐ ܒܰܪܢܳܫܳܐ܆ ܘܰܦܪܰܩ ܐܶܢܶܝܢ ܡܶܢ ܛܽܘܥܝܰܝ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ ܠܰܐܒܳܐ ܕܓܰܒܠܰܢ܆ ܘܣܶܓܕܬܳܐ ܠܰܒܪܳܐ ܕܦܰܪܩܰܢ ܒܝܰܕ ܝܰܠܕܶܗ܆ ܬܰܘܕܺܝܬܳܐ ܠܪܽܘܚܳܐ ܩܰܕܺܝܫܳܐ܆ ܕܰܫܦܺܝܥ ܚܢܳܢܶܗ ܥܰܠ ܟܽܠܳܐ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܣܠܶܩܬ ܠܰܨܠܺܝܒܳܐ

ܐܰܢ̱ܬܝ ܒܶܝܬ ܠܚܶܡ܆ ܩܪܺܝܬܳܐ ܙܥܽܘܪܬܳܐ ܡܫܰܒܰܚܬܳܐ܆ ܠܳܐ ܒܨܺܝܪܰܬܝ ܒܡܰܠ̈ܟܶܐ ܕܺܝܗܽܘܕ܆ ܡܶܢܶܟܝ ܓܶܝܪ ܢܶܦܽܘܩ ܪܳܥܝܳܐ܆ ܕܗܽܘ ܢܶܪܥܶܝܘܗ̱ܝ ܠܥܰܡܝ ܝܺܣܪܳܐܶܝܠ܀

ܩܥܳܐ ܐܶܫܰܥܝܳܐ܆ ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ܆ ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܆ ܘܢܶܩܪܽܘܢ ܫܡܶܗ ܥܰܡܰܢܽܘܐܶܝܠ܆ ܕܡܶܬܬܰܪܓܰܡ ܥܰܡܰܢ ܐܰܠܳܗܰܢ܀

ܕܠܳܐ ܫܽܘܪܳܝܳܐ܆ ܠܳܟ ܛܰܠܝܳܐ ܠܰܡ ܝܺܠܶܕܬܳܟ܆ ܝܺܡܶܐ ܡܳܪܝܳܐ ܘܠܳܐ ܢܟܰܕܶܒ܆ ܕܰܐܢ̱ܬܽ ܗ̱ܘ ܟܽܘܡܪܳܐ ܕܰܠܥܳܠܰܡ܆ ܒܰܕܡܽܘܬܶܗ ܕܡܰܠܟܺܝܙܕܶܩ܀

ܗܳܐ ܚܙܳܬ ܥܺܕܬܳܐ܆ ܫܪܳܪܳܐ ܓܰܠܝܳܐ ܕܡܶܠܰܝ̈ܗܽܘܢ܆ ܕܰܢܒܺܝ̈ܶܐ ܕܰܐܟܪܶܙܘ ܝܰܠܕܳܟ܆ ܘܐ̱ܪ̈ܳܙܶܐ ܘܛܽܘ̈ܦܣܶܐ ܕܨܳܪܘ ܠܳܟ܆ ܘܰܣܓܶܕܘ ܠܳܟ ܟܽܠܗܽܘܢ ܝܰܠ̈ܕܶܝܗ̇܀

ܫܽܘܒܚܳܐ

ܥܒܶܕ ܒܰܚܢܳܢܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܢܝܳܚܳܐ ܘܕܽܘܟܪܳܢܳܐ ܛܳܒܳܐ: ܠܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ: ܘܰܢܩܽܘܡܽܘܢ ܡܶܢ ܝܰܡܺܝܢܳܟ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܐܶܡܪܰܬ ܡܰܪܝܰܡ ܠܓܰܒܪܺܐܶܝܠ

ܡܳܪܝܳܐ ܡܳܪܰܢ܆ ܟܶܢ̈ܫܶܐ ܫܓܺܝܪ̈ܶܐ ܕܓܰܘܙܰܠܬܳܐ ܠܥܶܠ ܒܰܫܡܰܝܳܐ ܡܚܰܦܶܝܢ ܐܰܦܰܝ̈ܗܽܘܢ܆ ܡܶܢ ܬܶܫܒܽܘܚܬܳܐ܆ ܕܢܽܘܗܪܳܐ ܦܰܐܝܳܐ ܘܰܓܢܺܝܙܳܐ܆ ܕܒܶܗ ܥܳܡܰܪ ܐܰܢ̱ܬ ܒܟܽܘܪܣܰܝ ܪܰܒܽܘܬܳܟ܆ ܝܰܘܡܳܢ ܒܰܐܪܥܳܐ܆ ܚܙܰܘ ܡܰܘܠܳܕܳܟ ܒܒܶܝܬ ܠܚܶܡ܆ ܘܰܙܡܰܪܘ ܫܽܘܒܚܳܐ ܠܚܶܙܘܳܐ ܕܡܽܘܟܳܟܳܟ܆ ܗ̄ ܒܪܺܝܟ ܡܰܘܠܳܕܳܟ ܕܶܐܬܚܰܘܺܝ ܠܟܶܢ̈ܫܶܐ ܕܥܺܝܪ̈ܶܐ܆ ܕܰܓܢܺܝܙ ܗ̱ܘܳܐ ܡܶܢܗܽܘܢ܀

ܫܽܘܒܚܳܐ

ܡܳܪܝܳܐ ܡܳܪܰܢ܆ ܒܽܐܘܪܝܳܐ ܣܳܡܬܳܟ ܒܰܪ̱ܬ ܕܰܘܺܝܕ ܒܓܰܘ ܒܶܝܬ ܠܚܶܡ܆ ܒܝܰܘܡܳܐ ܕܒܶܗ ܗܽܘ ܕܢܰܚܬ܆ ܫܡܰܝܳܐ ܙܥܽܘܪܝܳܐ܆ ܘܠܳܐ ܡܣܰܝܟܳܐ ܠܳܗ̇ ܠܪܰܒܽܘܬܳܟ܆ ܘܒܶܝܬ ܬܰܚ̈ܬܳܝܶܐ ܟܪܺܝܟ ܐܰܢ̱ܬ ܥܰܙܪܽܘܪ̈ܶܐ܆ ܘܒܰܪ̱ܬ ܡܶܣ̈ܟܺܢܶܐ܆ ܝܳܗܒܳܐ ܚܰܠܒܳܐ ܟܰܕ ܣܳܓܕܳܐ ܠܚܰܝܠܳܟ ܟܰܣܝܳܐ܆ ܕܰܡܣܰܒܰܥ ܐܰܠܦ̈ܶܐ܆ ܗ̄ ܫܽܘܒܚܳܐ ܠܳܟ ܘܰܠܝܳܠܽܘܕܳܟ ܥܰܡ ܪܽܘܚ ܩܽܘܕܫܳܐ܆ ܣܶܓܕܬܳܐ ܘܪܽܘܡܪܳܡܳܐ܀

ܡܶܢ ܥܳܠܰܡ

ܐܺܝܠ ܓܰܢ̱ܒܳܪܳܐ܆ ܕܩ̣ܳܡ ܥܰܠ ܪܰܘܡܳܗ̇ ܕܓܳܓܽܘܠܬܳܐ: ܘܰܩܥ̣ܳܐ ܒܩܳܠܶܗ: ܘܫܽܘ̈ܥܶܐ ܐܶܨܛܰܪܺܝ̣ܘ. ܐܰܫܡܰܥ ܩܳܠܳܟ. ܒܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ܆ ܘܢܰܚܶܡ ܐܶܢܽܘܢ: ܠܰܫܟܺܝ̈ܒܰܝ ܥܰܦܪܳܐ ܗ̄ ܕܢܰܘܕܽܘܢ ܠܳܟ ܥܰܠ ܛܰܝܒܽܘܬܳܟ. ܕܰܐܢ̱ܬ ܗ̣ܽܘ ܐܺܝܬܰܝܟ: ܡܢܰܚܡܳܢܳܐ ܕܡܺܝ̈ܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ
(ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܠܰܘ ܒܦܰܓܪܳܐ ܕܐ̱ܢܳܫܳܐ ܦܪܺܝܩܳܢ ܩܳܥܝܳܐ ܥܺܕܬܳܐ܆ ܐܶܠܳܐ ܒܦܰܓܪܶܗ ܕܰܡܫܺܝܚܳܐ ܕܺܝܠܺܝܕ ܡܶܢ ܡܰܪܝܰܡ܆ ܡܶܠܬܶܗ ܕܰܐܒܳܐ ܕܶܐܫܬܰܕܰܪ ܕܢܰܚ ܡܶܢ ܐܰܢ̱ܬܬܳܐ܆ ܘܰܒܕܶܢܚܶܗ ܦܪܺܝܩܺܝܢ ܝܰܠ̈ܕܰܝ ܡܶܢ ܣܶܓܕܰܬ ܨܰܠ̈ܡܶܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܰܐܒܳܐ ܕܫܰܕܰܪ ܠܺܝܚܺܝܕܳܝܶܗ܆ ܘܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܕܶܒ̈ܚܶܐ ܕܛܽܘܥܝܰܝ܆ ܘܟܰܕ ܐܶܬܺܝܠܶܕ ܢܗܰܪܘ ܣܰܘ̈ܦܶܐ ܥܰܡ ܦܶܢ̈ܝܳܬܳܐ܆ ܘܗܳܐ ܡܫܰܒܚܺܝܢ ܠܶܗ ܕܠܳܐ ܫܰܠܘܳܐ ܐܺܝܡܳܡܳܐ ܘܠܺܠܝܳܐ܀

ܡܶܢ ܥܳܠܰܡ

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ: ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ: ܕܰܐܢ̱ܬ ܗ̱ܽܘ ܡܢܰܚܡܳܢܗܽܘܢ܀

ܦܶܬܓܳܡܳܐ: ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܪ̈ܳܬܳܐ: ܩܽܘܪ̈ܒܳܢܶܐ ܢܰܝܬܽܘܢ ܠܶܗ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܠܥܶܠ ܒܰܡܪ̈ܰܘܡܶܐ ܕܒܶܝܬ ܡܺܝܟܳܐܶܝܠ ܟܳܘܙܺܝܢ ܡܶܢܶܗ܆ ܘܰܠܬܰܚܬ ܒܰܐܪܥܳܐ ܩܪܶܒܘ ܓܰܝ̈ܳܣܶܐ ܘܫܰܠܰܚܘ ܡܳܐܢܰܘ̈ܗ̱ܝ܆ ܠܥܶܠ ܒܰܡܪ̈ܰܘܡܶܐ ܟܣܶܐ ܒܥܽܘܒ ܐܰܒܽܘܗ̱ܝ ܘܠܳܐ ܡܶܬܕܪܶܟ܆ ܘܰܠܬܰܚܬ ܒܰܐܪܥܳܐ ܒܫܽܘ̈ܩܶܐ ܡܫܰܦܶܦ ܒܰܝܢܳܬ ܫܰܒܪ̈ܶܐ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܨܶܝܕ ܬܰܚ̈ܬܳܝܶܐ܆ ܘܣܶܓܕܬܳܐ ܠܰܒܪܳܐ ܕܰܒܫܺܝܛܽܘܬܳܐ ܐܶܬܳܐ ܠܘܳܬܰܢ܆ ܬܰܘܕܺܝ ܠܪܽܘܚܳܐ ܕܓܰܫܡܶܗ ܠܰܒܪܳܐ ܡܶܠܬܳܐ ܒܟܰܪܣܳܐ܆ ܚܰܕ ܗ̱ܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀