ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܐ̱ܪ̈ܳܙܶܐ ܘܛܽܘ̈ܦܣܶܐ ܘܦ̈ܶܠܳܐܬܳܐ

ܗܰܘ ܕܰܓܢܺܝܙ ܗ̱ܘܳܐ ܒܺܐܝܬܽܘܬܶܗ܆ ܘܰܡܥܰܠܰܝ ܒܰܐܠܳܗܽܘܬܶܗ܆ ܒܥܽܘܒܳܐ ܕܰܐܒܽܘܗ̱ܝ ܟܰܣܝܳܐ ܪܰܒܽܘܬܶܗ܆ ܨܒܳܐ ܘܶܐܬܬܰܚܬܺܝ ܒܛܰܝܒܽܘܬܶܗ܆ ܘܰܠܒܶܫ ܦܰܓܪܳܐ ܕܐ̱ܢܳܫܽܘܬܰܢ܆ ܕܒܶܗ ܢܶܦܪܽܘܩ ܗ̱ܘܳܐ܆ ܠܓܶܢܣܳܐ ܕܒܶܝܬ ܐܳܕܳܡ܆ ܐܰܫܠܶܡ ܢܰܦܫܶܗ ܠܰܙܩܺܝܦܳܐ܆ ܘܛܶܦܣܰܬ ܒܶܗ ܥܺܕܰܬ ܩܽܘܕܫܳܐ܆ ܘܰܒܦܽܘܡ ܝܰܠ̈ܕܶܝܗ̇ ܩܳܥܝܳܐ ܠܶܗ ܘܳܐܡܪܳܐ܆ ܠܳܐ ܬܰܪܦܶܐ ܒܺܝ ܐܺܝܕ̈ܰܝܳܐ܆ ܕܠܰܝܬ ܠܺܝ ܡܳܪܳܐ ܠܒܰܪ ܡܶܢܳܟ܆ ܗ̄ ܘܒܳܟ ܐܶܚܕܶܬ ܓܰܘܣܳܐ܀

ܫܽܘܒܚܳܐ

ܗܰܘ ܕܰܢܒܺܝ̈ܶܐ ܒ̈ܦܶܠܳܐܬܗܽܘܢ܆ ܘܚܰܙܳܝ̈ܶܐ ܒܰܣܬܺܝܪ̈ܳܬܗܽܘܢ܆ ܥܠܰܘܗ̱ܝ ܐܶܬܢܰܒܺܝܘ ܕܳܐܬܶܐ ܠܡܰܘܠܳܕܳܐ܆ ܕܢܰܚ ܡܶܢ ܐܰܒܳܐ ܘܡܶܢ ܡܰܪܝܰܡ܆ ܘܶܐܬܺܝܠܶܕ ܒܓܰܘ ܒܶܝܬ ܠܚܶܡ܆ ܝܰܠܕܳܐ ܕܰܩܕܳܡ ܥܳܠ̈ܡܶܐ ܘܒܶܪ̈ܝܳܬܳܐ܆ ܫܽܘܒܚܳܐ ܠܶܗ ܕܥܺܝܪ̈ܰܝ ܪܰܘܡܳܐ܆ ܘܡܰܠܰܐܟ̈ܶܐ ܠܳܐ ܚܳܙܶܝܢ ܠܶܗ܆ ܘܰܒܓܰܘ ܡܥܰܪܬܳܐ ܒܽܐܘܪܝܳܐ ܐܶܬܺܝܠܶܕ܆ ܘܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܆ ܙܳܡܪܺܝܢ ܫܽܘܒܚܳܐ ܠܡܽܘܟܳܟܶܗ܆ ܗ̄ ܕܡܶܛܽܠ ܦܽܘܪܩܳܢܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܥܠܰܝܟ ܐܶܬܢܰܒܺܝ ܐܶܪܰܡܝܳܐ܆ ܕܩܰܕܺܝܫ ܐܰܢ̱ܬ ܡܶܢ ܓܰܘ ܟܰܪܣܳܐ܆ ܘܩܰܕܺܝܫܳܐܺܝܬ ܐܶܬܺܝܠܶܕܬ܆ ܝܰܘܡܳܢܳܐ ܒܓܰܘ ܒܶܝܬ ܠܚܶܡ܀

ܠܳܟ ܗ̱ܽܘ ܚܙܳܐ ܗ̱ܘܳܐ ܚܰܙܩܺܝܐܶܝܠ܆ ܒܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ܆ ܕܡܽܘܬܳܐ ܕܰܐܪܝܳܐ ܘܰܕܬܰܘܪܳܐ܆ ܘܰܕܢܶܫܪܳܐ ܘܰܕܒܰܪܢܳܫܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܰܬܪܶܝܢ ܕܒܳܬܰܪ ܝܰܠܕܳܐ