ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܰܘ ܕܒܰܥܡܳܕܳܐ ܕܺܝܠܶܗ܆ ܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܕܰܡܕܰܟܝܳܐ ܠܰܢ܆ ܡܶܢ ܛܰܡܽܐܘܬܳܐ ܕܰܚܛܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܒܝܽܘܪܕܢܳܢ ܢܰܗܪܳܐ܆ ܡܶܢ ܝܽܘܚܰܢܳܢ ܐܶܬܥܡܶܕ܆ ܐܰܫܺܝܓ ܡܶܢܰܢ. ܠܨܳܐܬܳܐ ܕܚܰܫ̈ܶܐ ܕܰܚܛܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܐܟܪܶܙ ܝܽܘܚܰܢܳܢ. ܒܰܝܢܳܬ ܟܶܢ̈ܫܶܐ ܟܰܕ ܐܳܡܰܪ܆ ܕܗܳܢܰܘ ܐܶܡܪܶܗ܆ ܘܰܒܪܶܗ ܚܰܝܳܐ ܕܰܐܠܳܗܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟܽ ܗ̱ܘ ܢܽܘܗܪܳܐ ܕܡܶܢ ܐܰܒܳܐ܆ ܕܰܐܢܗܰܪ ܠܰܐܪܥܳܐ ܒܙܰܠܺܝܩܰܘ̈ܗ̱ܝ܆ ܘܰܐܦܢܺܝ ܠܥܰܡ̱̈ܡܶܐ܆ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܥܺܕܬܳܐ ܕܰܚܙܳܬ ܠܰܒܪܳܐ܆ ܕܰܥܡܰܕ ܘܰܣܠܶܩ ܡܶܢ ܡܰܝ̈ܳܐ܆ ܩܶܪܒܰܬ ܣܶܓܕܰܬ܆ ܘܶܐܡܪܰܬ ܠܶܗ ܒܪܺܝܟ ܐܺܝܩܳܪܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܆ ܕܰܟܡܳܐ ܐܰܪܟܢܽܘܟ ܨܶܝܕ ܓܶܢܣܰܢ܆ ܕܰܬܪܺܝܡ ܫܶܦܠܶܗ܆ ܕܳܐܕܳܡ ܨܰܠܡܳܐ ܕܪܰܒܽܘܬܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܫܽܘܒܚܳܐ ܠܰܡܫܺܝܚܳܐ܆ ܕܰܕܢܰܚ ܡܶܢ ܐܰܒܳܐ܆ ܘܰܒܓܰܘ ܝܽܘܪܕܢܳܢ܆ ܐܶܬܥܡܶܕ ܡܶܢ ܝܽܘܚܰܢܳܢ܆ ܟܰܕ ܩܳܠܶܗ ܕܰܐܒܳܐ܆ ܕܡܰܙܥܶܩ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܚܰܒܺܝܒ܆ ܕܒܶܗ ܗ̱ܽܘ ܐܶܨܛܒܺܝܬ܀

ܡܫܺܝܚܳܐ ܕܰܕܢܰܚ ܠܰܢ܆ ܘܶܐܬܳܐ ܡܶܢ ܪܰܘܡܳܐ܆ ܘܰܒܝܽܘܪܕܢܳܢ ܐܶܬܥܡܶܕ܆ ܡܶܢ ܝܽܘܚܰܢܳܢ ܟܳܪܽܘܙܶܗ܆ ܘܥܰܡ ܩܳܠܶܗ ܕܰܐܒܳܐ܆ ܪܽܘܚܳܐ ܐܰܝܟ ܝܰܘܢܳܐ܆ ܥܰܠ ܪܺܝܫܶܗ ܫܶܟܢܰܬ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܪܗܶܛ ܪܶܡܙܳܐ ܩܽܘܕܡܰܘܗ̱ܝ܆ ܘܰܢܚܶܬ ܫܪܳܐ ܒܡܰܝ̈ܳܐ܆ ܘܥܽܘܙܳܐ ܕܢܰܒܪܰܫܬܶܗ܆ ܫܰܓܪܶܗ ܠܡܳܡܽܘܠܳܐ܆ ܒܪܺܝܟܽ ܗ̱ܘ ܕܒܰܥܡܳܕܶܗ܆ ܩܰܕܫܰܢ ܓܡܺܝܪܳܐܺܝܬ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܝܽܘܚܰܢܳܢ ܐܰܙܥܶܩ܆ ܥܰܠ ܝܽܘܪܕܢܳܢ ܢܰܗܪܳܐ܆ ܕܗܳܢܳܐ ܐܺܝܬܰܘܗ̱ܝ܆ ܐܶܡܪܶܗ ܚܰܝܳܐ ܕܰܐܠܳܗܳܐ܆ ܘܰܒܨܶܒܥܳܐ ܚܰܘܝܶܗ܆ ܠܟܶܢ̈ܫܶܐ ܟܰܕ ܐܳܡܰܪ܆ ܕܗܳܢܰܘ ܕܰܫܩܰܠ܆ ܚܛܺܝܬܶܗ ܕܥܳܠܡܳܐ ܘܦܳܪܶܩ ܠܶܗ܀

ܐ̱ܪܳܙܳܐ ܬܠܺܝܬܳܝܳܐ܆ ܚܙܰܝܢܰܢ ܝܰܘܡܳܢܳܐ ܥܰܠ ܢܰܗܪܳܐ ܝܽܘܪܕܢܳܢ܆ ܒܰܥܡܳܕܶܗ ܕܒܰܪ ܐܰܠܳܗܳܐ܆ ܐܰܒܳܐ ܟܰܕ ܩܳܥܶܐ܆ ܘܰܒܪܳܐ ܟܰܕ ܥܳܡܶܕ܆ ܘܪܽܘܚܳܐ ܕܰܡܪܰܚܶܦ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܒܕܶܢܚܳܟ ܡܰܢܗܰܪ ܟܽܠ. ܢܶܬܦܨܰܚ ܘܢܰܘܕܶܐ ܠܳܟ܆ ܟܶܢܫܳܐ ܕܰܦܪ̈ܺܝܩܶܐ܆ ܕܶܐܬܚܢܶܢܘ ܒܓܶܠܝܳܢܳܟ܆ ܘܰܟܠܺܝ̈ܠܶܐ ܕܫܽܘܒܚܳܐ܆ ܢܶܓܕܠܽܘܢ ܒܩܳܠܰܝ̈ܗܽܘܢ܆ ܥܰܡ̱̈ܡܶܐ ܕܶܐܬܚܰܣܺܝܘ. ܒܰܥܡܳܕܳܟ ܡܒܰܪܟܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ ܕܰܙܗܺܝܪܳܐ

ܕܢܰܚ ܠܰܢ ܢܽܘܗܪܳܐ ܡܶܢ ܐܰܒܳܐ܆ ܘܰܐܢܗܰܪ ܠܰܐܪܥܳܐ ܒܙܰܠܺܝ̈ܩܰܘܗ̱ܝ܆ ܘܥܰܡ̱̈ܡܶܐ ܕܰܛܥܰܘ ܒܰܦܬܰܟܪ̈ܶܐ܆ ܝܺܕܰܥܘ ܠܗܽܘܢ ܐܽܘܪܚܳܐ ܕܚܰܝ̈ܶܐ܆ ܕܰܚܙܰܘ ܕܶܐܬܳܐ ܠܰܥܡܳܕܳܐ܆ ܡܚܰܣܶܐ ܚܛܳܗ̈ܶܐ ܘܫܳܒܶܩ ܚܰܘ̈ܒܳܬܳܐ܆ ܘܰܐܝܟ ܡܶܣܟܺܢܳܐ ܐܶܬܬܰܚܬܺܝ܆ ܠܡܽܘ̈ܫܚܳܬܳܐ ܐ̱ܢܳܫܳܝ̈ܳܬܳܐ܆ ܫܽܘ݉ܒܚܳܐ ܠܡܽܘܟܳܟܶܗ ܕܥܺܝܪ̈ܶܐ ܠܳܐ ܡܨܶܝܢ ܚܳܙܶܝܢ ܠܶܗ܆ ܘܰܒܬܽܘܠܳܐ ܒܰܪ ܥܰܩܪܽܘܬܳܐ ܠܒܺܝܟ ܡܰܥܡܶܕ ܠܶܗ܆ ܠܗܰܘ ܡܳܪܳܐ ܕܩܰܕܺܝܫܽܘܬܳܐ܀

ܫܽܘܒܚܳܐ

ܪܰܒ ܗ̱ܽܘ ܕܶܢܚܳܟ ܡܳܪܶܐ ܟܽܠ܆ ܕܰܐܢܗܰܪ ܠܰܐܪܥܳܐ ܘܠܰܫܡܰܝܳܐ܆ ܘܙܺܝܘܳܟ ܪܰܕܦܶܗ ܠܚܶܫܽܘܟܳܐ ܕܰܦܪܺܝܣ ܗ̱ܘܳܐ ܥܰܠ ܒܶܪ̈ܝܳܬܳܐ܆ ܘܰܚܙܰܘ ܢܽܘܗܪܳܐ ܐܰܝܟ ܕܰܟܬܺܝܒ܆ ܥܰܡܳܐ ܕܝܳܬܶܒ ܒܛܶܠܳܠܰܝ̈ܝ ܡܰܘܬܳܐ܆ ܘܰܗܘܳܐ ܠܗܽܘܢ ܥܰܪܡܳܐ ܠܫܰܦܝܳܐ܆ ܘܰܐܬܪܳܐ ܥܰܣܩܳܐ ܠܰܦܩܰܥܬܳܐ܆ ܘܰܚ݉ܙܳܐ ܗ̱ܘܳܐ ܟܽܠ ܒܣܰܪ ܕܰܐܢ̱ܬ ܗ̱ܽܘ ܡܚܰܪܰܪ ܒܶܪ̈ܝܳܬܳܐ܆ ܘܰܒܝܽܘܡ ܕܶܢܚܳܟ ܐܶܫܬܰܝܰܢܘ܆ ܐܰܝܟ ܕܰܐܡܺܝܪܳܐ ܪܰܘܡܳܐ܆ ܘܥܽܘܡܩܳܐ ܘܟܽܠ ܕܰܒܗܽܘܢ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܟ ܬܶܫܒܽܘܚܬܳܐ ܡܶܠܬܳܐ ܕܚܰܝ̈ܶܐ

ܒܢܰܗܪܳܐ ܝܽܘܪܕܢܳܢ܆ ܝܽܘܚܰܢܳܢ ܚܙܳܐ ܬܶܕܡܽܘܪܬܳܐ܆ ܡܰܠܰܐܟ̈ܶܐ ܕܰܡܝܰܒܒܺܝܢ ܗ̱ܘܰܘ܆ ܘܰܣܪ̈ܳܦܶܐ ܕܰܡܩܰܕܫܺܝܢ ܗ̱ܘܰܘ܆ ܪܽܘܚܳܐ ܕܦܶܪܚܰܬ ܗ̱ܘܳܬ ܘܢܶܚܬܰܬ܆ ܘܥܰܠ ܪܺܝܫܶܗ ܕܰܒܪܳܐ ܩܰܘܝܰܬ܆ ܘܩܳܠܳܐ ܐܶܬܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܒܪܺܝܟ ܕܰܢܚܶܬ ܠܰܒܫܶܗ ܠܳܐܕܳܡ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܫܽܘܒܚܳܐ

ܚܙܳܝܗ̱ܝ ܝܽܘܚܰܢܳܢ܆ ܠܰܒܪܳܐ ܚܰܝܳܐ ܕܰܐܠܳܗܳܐ܆ ܟܰܕ ܐܶܬܳܐ ܕܢܶܥܡܰܕ ܡܶܢܶܗ܆ ܘܰܥܢܳܐ ܘܗܳܟܰܢ ܐܶܡܰܪ ܠܶܗ܆ ܕܰܐܢ̱ܬ ܗ̱ܽܘ ܡܫܺܝܚܳܐ ܦܳܪܽܘܩܰܢ܆ ܘܒܺܐܝܕܰܝ̈ܟ ܐܶܬܬܰܩܰܢܘ ܥܳܠ̈ܡܶܐ܆ ܘܰܐܝܟܰܢܳܐ ܡܶܢܝ ܥܳܡܶܕ ܐܰܢ̱ܬ܆ ܕܺܐܝܬܰܝ ܥܰܦܪܳܐ ܘܕܰܚܺܝܚܳܐ܆ ܫܽܘܒܚܳܐ ܠܶܗ ܠܰܐܒܳܐ ܕܫܰܠܚܶܗ܆ ܟܰܕ ܠܳܐ ܫܰܢܺܝ ܡܶܢ ܨܶܐܕܰܘܗ̱ܝ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܩܕܳܡ ܐܶܘܰܢܓܶܠܝܳܘܢ

ܬܶܫܒܽܘܚܬܳܐ ܘܗܶܕܪܳܐ ܘܪܽܘܡܪܳܡܳܐ ܡܕܰܫܢܺܝܢܰܢ ܠܓܰܐܝܳܐ ܘܓܰܢ̱ܒܳܪܳܐ ܘܬܰܩܺܝܦ ܥܽܘܫܢܳܐ. ܥܰܠ ܦܽܘܪܩܳܢܳܐ ܘܙܳܟ̣ܽܘܬ̣ܳܐ ܕܥܰܡܳܟ ܝܺܣܪܳܐܝܠ܀

ܟܰܕ ܡܥܰܢܝܳܐ ܡܰܪܝܰܡ. ܒܰܦܠܰܓ̈ܶܐ. ܘܒܰܪ̈ܒܺܝܥܶܐ. ܠܝܰܗ ܡܳܪܝܳܐ܀

ܗܰܠܶܠܘ̱ ܗܰܠܶܠܘ̱ ܗܰܠܶܠܘ̣ܢܳܝܗܝ. ܠܺܐܝܠ ܬܰܩܺܝܦܳܐ. ܕܐܬ̣ܳܐ ܠܰܥܡܳܕܳܐ܀

ܫܰܒܰܚܘ̱ ܫܰܒܰܚܘ̱ ܫܰܒܰܚܘ̣ܢܳܝܗܝ. ܠܺܐܝܠ ܥܰܫܺܝܢܳܐ. ܕܐܬ̣ܳܐ ܠܰܥܡܳܕܳܐ܀

ܙܰܡܰܪܘ̱ ܙܰܡܰܪܘ̱ ܙܰܡܰܪܘܢܳܝܗܝ. ܠܺܐܝܠ ܥܰܙܺܝܙܳܐ ܕܐܬ̣ܳܐ ܠܰܥܡܳܕܳܐ܀

ܡܶܛܽܠ ܕܰܡܫܰܒܚܳܐ ܐܺܝܬ̣ܰܘܗ̱ܝ܀

ܦܶܬܓܳܡܳܐ: ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܪܬܰܚ ܗ̱ܘܳܐ ܠܩܽܘܒܠܳܟ ܝܽܘܪܕܢܳܢ ܢܰܗܪܳܐ ܟܰܕ ܥܳܡܶܕ ܗ̱ܘܰܝܬ܆ ܕܢܶܕܰܥ ܟܽܠܢܳܫ ܥܰܠܡܰܢ ܪܶܬܚܰܬ ܡܰܥܡܽܘܕܺܝܬܳܐ܆ ܐܶܬܓܰܘܙܰܠܘ ܗ̱ܘܰܘ ܡܰܝ̈ܳܐ ܒܒܰܪ̈ܩܶܐ ܕܫܰܠܗܶܒܺܝܬܳܐ܆ ܕܢܽܘܪܳܐ ܚܰܝܬܳܐ ܐ̱ܶܬܳܬ ܠܰܥܡܳܕܳܐ ܕܰܒܗܽܘܢ ܬܶܣܚܶܐ܀

ܙܡܰܪܘ ܬܶܫܒܽܘܚܬܳܐ ܣܶܕܪ̈ܶܐ ܘܬܶܓ̈ܡܶܐ ܒܢܰܝ̈ ܓܰܘܙܰܠܬܳܐ܆ ܟܰܕ ܚܳܝܪܺܝܢ ܒܶܗ ܒܰܝܢܳܬ ܫܶܦ̈ܥܶܐ ܥܰܪܛܶܠܳܐܺܝܬ܆ ܡܰܪܟܶܢ ܪܺܝܫܶܗ ܩܕܳܡ ܝܽܘܚܰܢܳܢ ܕܢܶܥܡܰܕ ܡܶܢܶܗ܆ ܘܶܐܬܚܰܙܝܰܬ ܗ̱ܘܳܬ ܬܠܺܝܬܳܝܽܘܬܳܐ ܚܰܕ ܐܰܠܳܗܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀