ܬܶܫܡܶܫܬܳܐ ܕܥܰܢܺܝ̈ܕܶܐ

ܚ

ܩܽܘܩܠܺܝܳܘܢ

ܐܰܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ ܗ̄ ܡܪܰܚܶܡ ܡܳܪܝܳܐ ܥܰܠ ܕܳܚ̈ܠܰܘܗܝ܀

ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘ̈ܡܰܘܗܝ ܗ̄ ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ܀

ܐ̱ܚܪܺܢܳܐ

ܡܶܛܽܠ ܕܗܽܘ ܝܳܕܰܥ ܓܒܺܝܠܬܰܢ ܗ̄ ܘܳܐܦܠܳܐ ܡܶܬܝܰܕܥܳܐ ܕܽܘܟܬܶܗ܀

ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܠܰܝܬܰܘܗܝ ܗ̄ ܘܶܐܬܕܟܰܪ ܕܥܰܦܪܳܐ ܚܢܰܢ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܥܰܒܕܰܝ̈ܟ ܕܰܫܟ̣ܶܒܘ̱ ܥܰܠ ܣܰܒܪܳܟ. ܘܥܰܠ ܬܽܘܟܠܳܢܶܗ ܕܰܚܢܳܢܳܟ ܩܳܠܳܟ ܚܰܝܳܐ ܢܥܺܝܪ ܐܶܢܽܘܢ ܡܶܢ ܩܰܒܪ̈ܶܐ ܠܓܰܘ ܦܰܪܕܰܝܣܳܐ܀

ܐ̱ܚܪܺܢܳܐ

ܥܰܢܺܝ̈ܕܶܐ ܡܳܪܝ ܕܝܰܘܡܳܢܳܐ܇ ܫܰܡܠܺܝܢܰܢ ܥܽܘܗܕܳܢܰܝ̈ܗܽܘܢ. ܟܬܽܘܒ ܐܶܢܽܘܢ ܠܰܫܡܳܗܰܝ̈ܗܽܘܢ܇ ܒܰܣܦܰܪ ܚܰܝ̈ܶܐ ܒܡܰܠܟܽܘܬܳܟ܀

ܐ̱ܚܪܺܢܳܐ

ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ܇ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ. ܝܰܡܺܝܢܳܟ ܬܰܠܒܶܫ ܐܶܢܽܘܢ܇ ܐܶܣܛܰܠ ܫܽܘܒܚܳܐ ܒܡܰܠܟܽܘܬܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ

ܡܰܠܟܳܐ ܡܢܰܚܡܳܢܳܐ. ܒܫܽܘܒܚܶܗ ܕܳܢܰܚ ܡܶܢ ܪܰܘܡܳܐ܇ ܘܡܰܚܶܐ ܡܺܝ̈ܬ̣ܶܐ܇ ܘܰܡܩܺܝܡ ܠܰܩܒܺܝܪ̈ܶܐ. ܘܩܳܝܡܺܝܢ ܫܰܘܝܳܐܺܝܬ̣. ܥܰܢܺܝ̈ܕܶܐ ܡܶܢ ܓ̣ܰܘ ܩܰܒܪ̈ܶܐ܇ ܘܡܰܣܩܺܝܢ ܫܽܘܒܚܳܐ܇ ܠܳܟ ܡܢܰܚܶܡ ܡܺܝ̈ܬ̣ܶܐ܀

ܫܽܘܒܚܳܐ: ܫܽܘܒܚܳܐ ܠܗܰܘ ܩܳܠܳܐ. ܕܶܐܡܰܪ ܡܳܪܰܢ ܒܰܣܒܰܪܬ̣ܶܗ܇ ܕܟܽܠ ܕܳܐܟ̣ܶܠ ܦܰܓ̣ܪܝ̱ ܘܫܳܬܶܐ ܕܶܡܝ̱ ܚܰܝܳܐ. ܠܳܐ ܐܰܪܦܺܝܘܗ̱ܝ ܒܰܫܝܽܘܠ. ܕܡܶܛܽܠܳܬ̣ܶܗ ܐܶܬ̣ܪܰܟܢܶܬ. ܘܛܶܥܡܶܬ̣ ܡܰܘܬܳܐ܇ ܕܗܽܘ ܢܺܚܶܐ ܠܥܳܠܰܡ܀

ܐ̱ܚܪܺܢܳܐ ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ. ܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܘܩܳܝܡܺܝܬܽܘܢ ܕܠܳܐ ܚܒܳܠܳܐ ܡܶܢ ܩܰܒܪ̈ܰܝܟܽܘܢ. ܘܢܳܦܩܺܝܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܘܠܳܒܫܺܝܬܽܘܢ ܐܶܤܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ ܫܽܘܒܚܳܐ ܙܳܡܪܺܝܬܽܘܢ. ܡܢܰܚܡܳܢܳܐ ܕܝܰܠܕܰܘ̈ܗ̱ܝ ܕܳܐܕܳܡ ܚܽܘܣ ܘܶܐܬܪܰܚܡܥܠܰܝܢ܀

ܫܽܘܒܚܳܐ: ܥܝܳܕܳܐ ܐܺܝܬ ܗ̱ܘܳܐ ܠܟܺܐܢ̈ܶܐ ܡܶܢ ܫܽܘܪܳܝܳܐ. ܕܠܰܬܠܳܬܳܐ ܝܰܘܡܺܝ̈ܢ ܢܤܺܝܡܽܘܢ ܒܶܤ̈ܡܶܐ ܠܥܰܢܺܝܕܳܐ. ܘܟܰܕ ܡܺܝܬ ܡܳܪܰܢ ܝܶܫܽܘܥ ܘܶܐܬܬܤܺܝܡ ܒܩܰܒܪܳܐ. ܘܶܐܬܥܰܦܺܝ ܒܪܽܘܚܳܐ ܕܩܽܘܕܫܳܐ ܡܶܢ ܥܺܝܪ̈ܶܐ ܘܐ̱ܢܳܫ̈ܳܐ. ܤܳܡܘ ܗ̱ܘܰܘ ܠܶܗ ܒܶܤ̈ܡܶܐ ܠܗܰܘ ܚܰܝܳܐ. ܕܗܽܘ ܓܰܒܠܶܗ ܠܳܐܕܳܡ ܡܶܢ ܥܰܦܪܳܐ. ܘܰܠܥܰܒ̈ܕܰܝܟ ܕܤܳܡܢܰܢ ܒܶܤ̈ܡܶܐ ܐܰܢܺܝܚ ܒܛܰܝܒܽܘܬܳܟ܀

ܐ̱ܚܪܺܢܳܐ ܩܳܠܳܐ ܒܩ̄: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ ܐܰܝܟ ܦܰܓܪܶܗ ܕܡܳܪܝܳܐ. ܠܳܐ ܡܰܘܬܰܪ ܠܺܝ ܒܶܟܝܳܐ ܘܬܶܢܚ̈ܳܬܳܐ. ܐܰܝܟ ܕܡܰܘܬܰܪ ܠܺܝ ܦܰܓܪܶܗ ܕܰܡܫܺܝܚܳܐ. ܘܡܳܐ ܕܩܳܝܡܺܝܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ. ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐ̱ܢܳܐ ܩܕܳܡ ܡܳܪܳܐ ܕܥܳܠ̈ܡܶܐ ܗ̄ ܩܕܳܡ ܒܺܐܡ ܕܰܡܫܺܝܚܳܐ܀

ܫܽܘܒܚܳܐ: ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ ܘܫܰܩܠܽܘܟ ܡܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ ܒܶܝܬ ܡܰܠܟܽܘܬܳܐ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܐ̱ܚܪܺܢܳܐ ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܥܰܡ ܐܶܡܪ̈ܶܐ ܒܢܰܝ̈ ܝܰܡܺܝܢܳܟ ܡܳܪܝ ܢܶܬܒܰܣܡܽܘܢ: ܐܰܒܳܗ̈ܶܐ ܘܰܐܚ̈ܶܐ ܕܺܝܠܰܢ ܐܳܦ ܪ̈ܰܒܳܢܰܝܢ. ܢܶܫܡܥܽܘܢ ܠܩܳܠܳܟ ܒܰܣܺܝܡܳܐ ܕܩܳܥܶܐ ܘܳܐܡܰܪ: ܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ: ܥܰܡ ܩܰܕܺܝ̈ܫܶܐ܀

ܫܽܘܒܚܳܐ: ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ ܐܰܡܠܶܟ ܡܰܘܬܳܐ. ܘܰܒܢܽܘܚܳܡܳܟ ܐܶܬܒܰܛܰܠ ‌ܐܳܦ ܚܰܪܡܳܢܳܐ. ܬܶܣܰܩܝ ܠܳܟ ܡܳܪܝ ܬܶܫܒܽܘܚܬܳܐ ܡ̣ܶܢ ܟܽܠ ܦܽܘܡܺܝ̈ܢ: ܘܡ̣ܶܢ ܟܽܠ ܕܽܘܟܳܐ ܡܟܰܢܶܫ ܐܰܢ̱ܬ: ܠܥܰܦܪܶܗ ܕܳܐܕܳܡ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܐ ܪܚܺܝܡܺܝܢ

ܡ̣ܶܢ ܐܳܕܳܡ ܫܰܪܺܝ ܡܰܘܬܳܐ: ܘܰܡܬܰܚ ܪܶܗܛܶܗ: ܥܕܰܡܳܐ ܠܰܡܫܺܝܚܳܐ. ܡܫܺܝܚܳܐ ܒܰܛܠܶܗ ܠܫܽܘܠܛܳܢܶܗ: ܘܬܰܒܪܶܗ ܠܥܽܘܩܣܳܗ̇ ܕܰܚܛܺܝܬܳܐ: ܘܗܳܐ ܡܶܬܟܰܪܙܳܐ ܒܟܽܠ ܕܳܪ̈ܺܝܢ: ܗܳܝ ܙܳܟܽܘܬܳܐ܇ ܕܰܗܘܳܬ ܒܰܙܩܺܝܦܳܐ܀

ܫܽܘܒܚܳܐ: ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ. ܕܗ̣ܽܘ ܒܨܶܒܝܳܢܶܗ: ܓܰܒܠܰܢ ܡ̣ܶܢ ܥܰܦܪܳܐ. ܘܠܰܒܪܶܗ ܝܶܫܽܘܥ ܬܰܘܕܺܝܬܳܐ. ܕܒܺܐܝ̈ܕܰܘܗ̱ܝ ܐܰܬܩܶܢ ܟܽܠܡܶܕܶܡ. ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ ܕܗ̣ܽܘ ܡܢܰܚܶܡ ܠܰܢ. ܡ̣ܶܢ ܓܰܘ ܕܰܚܺܝ̣ܚܳܐ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܪܶܗ ܕܪܰܡܫܳܐ

ܒܗܰܘ ܥܶܕܳܢܳܐ: ܕܢܳܚܬܺܝܢ ܡܰܠܰܐܟ̈ܶܐ܆ ܠܰܡܦܰܪܳܫܽܘ: ܠܛܳܒ̈ܶܐ ܡ̣ܶܢ ܒܺܝ̈ܫܶܐ. ܠܳܐ ܡܳܪܝ ܢܶܗܘܶܐ܆ ܙܺܝܙܳܢ̈ܶܐ ܠܢܽܘܪܳܐ܆ ܐܶܠܐ ܚ̈ܶܛܶܐ: ܠܰܐܘܨܰܪ ܚܰܕܘ̈ܳܬܳܐ܀

ܫܽܘܒܚܳܐ: ܫܽܘܒܚܳܐ ܘܙܺܝܘܳܐ. ܐܰ‌ܠܒܶܫ̣ܬ ܡ̣ܶܢ ܡܰܝ̈ܳܐ: ܠܥܰܒܕܰܝ̈ܟ ܡܳܪܰܢ: ܕܰܫܟܶܒܘ ܥܰܠ ܣܰܒܪܳܟ. ܢܰܚܶܡ ܐܶܢܽܘܢ: ܐܳܦ ܚܰܕܶܬ ܐܶܢܽܘܢ܆ ܘܰܐ‌ܠܒܶܫ ܐܶܢܽܘܢ: ܐܶܣ‍ܛܰܠ ܬܶܫܒܽܘܚܬܳܐ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܪ ܐܰܠܳܗܳܐ ܕܰܒܡܰܘܬܶܗ ܐܰܚܺܝ ܡܺܝܬܽܘܬܰܢ. ܢܰܚܶܡ ܠܰܢ ܡܶܢ ܓܰܘ ܕܰܚܺܝܚܳܐ ܕܢܶܩܥܶܐ ܘܢܺܐܡܰܪ. ܫܽܘܒܚܳܐ ܠܳܟ ܐܰܠܳܗܳܐ܀