ܬܶܫܡܶܫܬܳܐ ܕܟܳܗ̈ܢܶܐ

ܙ

ܩܽܘܩܠܺܝܳܘܢ

ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ ܘܙܰܕܺܝ̈ܩܰܝܟ ܫܽܘܒܚܳܐ ܗ̄ܘܗ̄ ܡܶܛܽܠ ܕܰܘܺܝܕ ܥܰܒܕܳܟ ܠܳܐ ܬܰܗܦܶܟ ܐܰܦܰܘ̈ܗ̱ܝ ܕܰܡܫܺܝܚܳܟ܀

ܐܶܢ ܢܶܛܪܽܘܢ ܒܢܰܝ̈ܟ ܩܝܳܡܝ ܗ̄ܘܗ̄ ܘܤܳܗܕܽܘܬܳܐ ܗܳܕܶܐ ܕܡܰܠܶܦ ܐ̱ܢܳܐ ܠܗܽܘܢ܀

ܐ̱ܚܪܺܢܳܐ

ܝܺܡܳܐ ܡܳܪܝܳܐ ܠܕܰܘܺܝܕ ܒܰܫܪܳܪܳܐ ܠܳܐ ܢܶܗܦܽܘܟ ܡܶܢܶܗ ܗ̄ܘܗ̄ ܕܡܶܢ ܦܺܐܪ̈ܰܝ ܟܰܪܣܳܟ ܐܰܘܬܶܒ ܥܰܠ ܟܽܘܪܣܝܳܟ܀

ܐܳܦ ܡܶܢ ܒܢܰܝ̈ܗܽܘܢ ܢܶܬܒܽܘܢ ܠܥܳܠܰܡ ܥܳܠܡܺܝܢ ܥܰܠ ܟܽܘܪܣܝܳܟ ܗ̄ܘܗ̄ ܡܶܛܽܠ ܕܰܨܒܳܐ ܡܳܪܝܳܐ ܒܨܶܗܝܽܘܢ ܘܰܓܒܳܗ̇ ܠܶܗ ܠܒܶܝܬ ܡܰܥܡܪܳܐ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܪ̈ܶܓ̣ܠܶܐ ܕܰܕܪ̈ܰܟܝ̱ ܒܒܶܝܬ ܩܽܘܕܫܳܐ ܒܕܰܟ̣ܝܽܘܬܳܐ ܘܩܰܕܺܝܫܽܘܬ̣ܳܐ ܢܕܽܘ̈ܫܳܢ ܬܰܪ̈ܥܰܝ ܦܰܪܕܰܝܣܳܐ ܘܰܢܕܰܝܪ̈ܳܢ ܥܰܡ ܡܰܠܰܐܟ̣̈ܶܐ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ

ܐܰܢ̱ܬ ܡܳܪܝܳܐ ܚܰܣܳܐ ܠܟܳܗܢܰܝ̈ܟ ܗ̄: ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܫܰܡܫܽܘܟ ܡܳܪܰܢ. ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܒܰܙܒܰܢ ܚܰܝܰܝ̈ܗܽܘܢ. ܡܰܕܒܰܚ ܩܽܘܕܫܳܐ ܕܒܶܗ ܙܰܝܰܚܘ ܥܰܠ ܐܺܝ̈ܕܰܝܗܽܘܢ. ܦܰܓܪܳܟ ܘܰܕܡܳܟ ܝܰܩܺܝܪܳܐ ܠܚܽܘܣܳܝܳܐ ܕܚܰܘ̈ܒܶܐ. ܚܰܘܒܰܝ̈ܗܽܘܢ ܒܦܰܓܪܳܟ ܢܶܬܚܰܣܽܘܢ: ܚܛܳܗܰܝ̈ܗܽܘܢ ܒܰܕܡܳܟ ܢܶܫܬܰܒܩܽܘܢ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ: ܠܳܟ ܫܽܘܒܚܳܐ ܡܳܪܝܳܐ܀

ܫܽܘܒܚܳܐ: ܪܓܺܝܓ ܗܘܳܐ ܩܳܠܶܗ ܕܡܳܪܰܢ ܟܰܕ ܐܳܡܰܪ ܗܘܳܐ. ܠܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܡܶܛܽܠ ܟܳܗܢܽܘܬܳܐ. ܕܗܳܐ ܥܒܰܕܬܳܟ ܠܺܝ ܪܰܒ ܒܰܝܬܳܐ ܘܝܶܗܒܶܬ ܒܺܐܝ̈ܕܰܝܟ. ܩܠܺܝ̈ܕܶܐ ܕܪܰܘܡܳܐ ܘܰܕܥܽܘܡܩܳܐ ܕܬܶܐܣܽܘܪ ܐܳܦ ܬܶܫܪܶܐ. ܐܶܢ ܬܶܐܣܽܘܪ ܐܶܢܳܐ ܐܳܣܰܪ ܐ̱ܢܳܐ. ܘܶܐܢ ܬܶܫܪܶܐ ܐܶܢܳܐ ܫܳܪܶܐ ܐ̱ܢܳܐ. ܘܶܐܢ ܬܰܦܺܝܣ ܚܠܳܦ ܚܰܛܳܝ̈ܶܐ ܫܡܺܝܥܳܐ ܗܝ ܒܳܥܽܘܬܳܟ܀

ܡܶܢ ܥܳܠܰܡ: ܡܰܠܟܽܘܬܳܐ ܘܟܳܗܢܽܘܬܳܐ ܬܰܪܬܶܝܢ ܐܶܢܶܝܢ. ܥܰܝ̈ܢܳܬܳܐ ܕܢܳܒܥܺܝܢ ܡܶܢܗܶܝܢ ܛܶܟ̈ܣܶܐ ܘܢܳܡܽܘ̈ܣܶܐ. ܡܶܢ ܡܰܠܟܽܘܬܳܐ ܢܳܡܽܘ̈ܣܶܐ ܐܰܪ̈ܥܳܢܳܝܶܐ. ܘܡܶܢ ܟܳܗܢܽܘܬܳܐ ܢܳܡܽܘ̈ܣܶܐ ܘܛܶܟ̈ܣܶܐ ܫܡܰܝܳܢ̈ܶܐ. ܡܰܠܟܽܘܬܳܐ ܫܰܠܺܝܛܳܐ ܒܰܐܪܥܳܐ. ܘܟܳܗܢܽܘܬܳܐ ܒܰܐܪܥܳܐ ܘܒܰܫܡܰܝܳܐ. ܒܪܺܝܟ ܗ̱ܽܘ ܕܝܰܩܰܪ ܠܡܰܠܟܽܘܬܳܐ ܘܪܰܡܪܶܡ ܠܟܳܗܢܽܘܬܳܐ܀

ܐ̱ܚܪܺܢܳܐ

ܟܰܟܪܳܐ ܕܩܰܒܠܶܬ ܡܶܢܳܟ ܒܰܪ ܐܰܠܳܗܳܐ. ܠܳܐ ܡܳܪܝ ܚܶܦܪܶܬ ܘܰܛܡܰܪܬܳܗ̇ ܐܰܝܟ ܥܰܒܕܳܐ ܒܺܝܫܳܐ. ܟܡܳܐ ܕܺܐܝܬ ܗܘܳܐ ܒܺܝ ܚܰܝܠܳܐ ܐܶܬܬܰܓܪܶܬ ܒܳܗ̇. ܘܗܳܐ ܢܛܺܝܪ ܨܶܐܕܰܝ ܓܽܘܥܠܳܢܳܐ ܒܰܐܥ̈ܦܶܐ ܣܰܓܺܝ̈ܐܶܐ. ܘܰܒܝܰܘܡܳܐ ܐ̱ܚܪܳܝܳܐ ܕܕܳܢܰܚ ܐܰܢ̱ܬ. ܐܶܬܶܠ ܠܳܟ ܟܰܟܪ̈ܶܐ ܘܪ̈ܶܒܝܳܬܗܶܝܢ ܘܶܐܩܥܶܐ ܠܳܟ ܒܓܰܠܝܽܘܬ ܐܰܦ̈ܶܐ ܠܳܟ ܫܽܘܒܚܳܐ ܡܳܪܝܳܐ܀

ܐ̱ܚܪܺܢܳܐ

ܡܳܐ ܦܐܶܐ ܠܳܗ̇ ܠܟܳܗܢܽܘܬܳܐ ܡܰܟܺܝܟܽܘܬܳܐ. ܘܕܰܟܝܽܘܬܳܐ ܘܩܰܕܺܝܫܽܘܬܳܐ ܘܝܽܘܠܦܳܢܳܐ ܓܡܺܝܪܳܐ. ܗܳܟܰܢܳܐ ܟܬܰܒ ܦܰܘܠܳܘܣ ܫܠܺܝܚܳܐ ܓܰܒܝܳܐ܇ ܠܛܺܡܳܬܶܐܳܘܣ ܬܰܠܡܺܝܕܶܗ ܘܛܺܛܳܘܣ ܚܰܒܺܝܒܶܗ. ܕܢܶܗܘܶܐ ܓܡܺܝܪ ܟܳܗܢܳܐ ܕܰܠܳܗܳܐ܇ ܘܰܡܫܰܡܠܰܝ ܒܰܥ̈ܒܳܕܶܐ ܛܳܒ̈ܶܐ܇ ܘܰܡܕܰܒܰܪ ܒܰܝܬܶܗ ܫܰܦܺܝܪ܇ ܘܥܺܕܬܶܗ ܕܰܟܝܳܐܺܝܬ܀

ܐ̱ܚܪܺܢܳܐ ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܓܰܒܠܶܗ ܐܰܠܳܗܳܐ ܠܰܐܕܳܡ ܘܝܳܬܶܒ ܗ̱ܘܳܐ ܘܡܶܬܒܰܩܶܐ ܒܶܗ. ܘܚܳܐܰܪ ܒܶܗ ܕܰܟܡܳܐ ܫܰܦܺܝܪ. ܘܕܳܡܶܐ ܓܒܺܝܠܳܐ ܠܓܳܒܽܘܠܶܗ. ܐܳܙܶܠ ܘܳܐܬܶܐ ܥܰܦܪܳܢܳܐ. ܒܶܝܬ ܐܺܝ̈ܠܳܢܶܐ ܕܦܰܪܕܰܝܣܳܐ. ܬܰܗܺܝܪ̈ܺܝܢ ܥܺܝܪ̈ܶܐ ܒܥܰܦܪܳܢܳܐ ܟܡܳܐ ܐܶܬܪܰܡܪܰܡ܀

ܫܽܘܒܚܳܐ: ܩܪܳܝܗܝ ܡܳܪܰܢ ܠܳܐܕܳܡ܇ ܐܳܕܳܡ ܠܡܳܢܳܐ ܒܰܫܝܽܘܠ ܕܰܡܺܝܟ ܐܰܢ̱ܬ ܩܽܘܡ. ܫܡܰܥ ܐܳܕܳܡ ܩܳܠܶܗ ܕܰܒܪܳܐ ܘܫܰܪܺܝ ܕܢܺܐܡܰܪ ܗܳܟܰܢܳܐ. ܟܡܳܐ ܒܰܣܺܝܡ ܩܳܠܳܐ ܗܳܢܳܐ. ܘܰܟܡܳܐ ܚܰܠ̈ܝܳܢ ܢܶܥ̈ܡܳܬܶܗ. ܘܕܳܡܶܐ ܗܳܢ ܩܳܠܳܐ ܠܗܰܘ ܕܰܩܪܳܢܝ̱ ܒܶܝܬ ܐܺܝ̈ܠܳܢܶܐ܀

ܡܶܢ ܥܳܠܰܡ: ܐܶܡܰܪ ܐܳܕܳܡ ܠܰܐܠܳܗܳܐ. ܒܒܳܥܽܘ ܡܶܢܳܟ ܡܳܪܳܐ ܕܥܳܠ̈ܡܶܐ. ܗܰܒܠܺܝ ܐܶܦܢܶܐ ܠܗܰܘ ܐܰܬ݂ܪܳܐ. ܕܚܶܘܝܳܐ ܘܚܰܘܳܐ ܡܶܢܶܗ ܐܰܦܩܽܘܢܝ. ܘܟܰܪܝܳܐ ܠܺܝ ܥܰܠ ܦܰܐܝܽܘܬ݂ܶܗ. ܕܠܰܝܬ ܐܰܟ݂ܘܳܬܶܗ ܒܰܒܪܺܝܬ݂ܳܐ. ܛܽܘܒܰܝܗܽܘܢ ܠܟܺܐܢ̈ܶܐ. ܕܫܳܪܶܝܢ ܒܶܗ ܥܕܰܡܳܐ ܠܥܳܠܰܡ܀

ܐ̱ܚܪܺܢܳܐ

ܟܰܕ ܐܶܬܝܰܒܠܰܬ ܟܳܗܢܽܘܬܳܐ. ܡܽܘܫܶܐ ܘܰܐܗܪܽܘܢ ܐܰܟܚܕܳܐ ܩܰܒܠܽܘܗ̇܇ ܡܽܘܫܶܐ ܝܰܗܒܳܗ̇ ܠܰܙܟܰܪܝܳܐ. ܙܟܰܪܝܳܐ ܝܰܗܒܳܗ̃ ܠܝܽܘܚܰܢܳܢ ܒܪܶܗ܇ ܘܝܽܘܚܰܢܳܢ ܝܰܗܒܳܗ̇ ܠܡܳܪܰܢ܇ ܡܳܪܰܢ ܝܰܗܒܳܗ̇ ܠܰܫܠܺܝ̈ܚܶܐ. ܘܰܫܠܺܝ̈ܚܶܐ ܝܰܗܒܽܘܗ̇ ܠܰܐܪܒܰܥ ܦܶܢܝ̈ܳܢ ܕܰܒܪܺܝܬܳܐ܀

ܐ̱ܚܪܺܢܳܐ

ܥܶܠܳܝ̈ܶܐ ܒܟ݂ܰܘ ܠܶܗ ܠܳܐܕܳܡ. ܟܰܕ ܢܳܦܶܩ ܡܶܢ ܦܰܪܕܰܝܤܳܐ. ܘܺܐܝ̈ܠܳܢܶܐ ܪܟܶܢܘ ܪ̈ܺܝܫܰܝܗܽܘܢ. ܟܰܕ ܡܰܪܟܰܢ ܪܺܝܫܶܗ ܘܒܳܟ݂ܶܐ. ܘܰܤܪ̈ܳܦܶܐ ܛܪܰܦܘ ܓܶܦܰܝ̈ܗܽܘܢ ܘܫܰܪܺܝܘ ܐܳܡܪܺܝܢ ܠܰܚ̈ܕܳܕܶܐ. ܐܳܘ ܠܪܳܡܳܐ ܕܰܢܦܰܠ. ܥܰܠ ܕܰܥܒܰܪ ܦܽܘܩܕܳܢ ܡܳܪܶܗ܀

ܐ̱ܚܪܺܢܳܐ

ܟܳܗ̈ܢܶܐ ܕܰܒܚܽܘܒܶܗ ܕܡܳܪܰܢ. ܫܰܡܶܫܘ̱ ܗ̱ܘܰܘ ܡܰܕܒܰܚ ܩܽܘܕܫܳܐ. ܥܺܝܪ̈ܶܐ ܢܶܦܩܽܘܢ ܘܰܢܠܰܘܽܘܢ܇ ܠܰܐܬܪܳܐ ܕܰܡܠܶܐ ܚܰܕ̈ܘܳܬܳܐ. ܒܰܪ ܐܰܠܳܗܳܐ ܠܳܐ ܬܶܛܥܶܐ܇ ܠܟܳܗ̈ܢܶܐ ܕܫܰܡܫܽܘܟ ܙܰܗܝܳܐܺܝܬ܇ ܫܰܟܶܢ ܠܗܽܘܢ ܓܰܠܝܽܘܬ ܐܰܦ̈ܶܐ܇ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܟܠܺܝ̈ܠܶܐ ܓܕܺܝ̈ܠܺܝܢ ܘܰܪ̈ܨܺܝܦܺܝܢ. ܘܥܰܠ ܡܰܕܒܰܚ ܩܽܘܕܫܳܐ ܣܺܝܡܺܝܢ. ܟܽܠ ܟܳܗܢܳܐ ܕܫܰܡܶܫ ܒܕܰܟܝܽܘ. ܟܠܺܝܠܳܐ ܒܪܺܝܫܶܗ ܠܶܗ ܣܳܝܡܺܝܢ܀

ܐ̱ܚܪܺܢܳܐ

ܐܰܚܰܝ̈ܢ ܕܰܗܘܰܘ ܟܶܢܳܪ̈ܶܐ. ܩܳܠܰܝ̈ ܫܽܘܒܚܳܐ ܙܰܡܰܪܘ ܗܘܰܘ. ܢܥܺܝܪ ܐܶܢܽܘܢ ܩܳܠܳܟ ܚܰܝܳܐ. ܡܶܢ ܩܰܒܪ̈ܶܐ ܠܓܰܘ ܦܰܪܕܰܝܣܳܐ܀

ܐ̱ܚܪܺܢܳܐ

ܐܺܝ̈ܕܰܝܳܐ ܕܦܰܠܶܓ̈ܝ ܦܰܓܪܳܟ. ܘܰܐܫܩܺܝ̈ܝ ܕܡܳܟ ܠܝܰܠ̈ܕܶܝܗ̇ ܕܥܺܕܬܳܐ. ܢܙܰܝ̈ܚܳܢܳܟ ܡܳܪܝ ܡܳܐ ܕܳܐܬܶܝܬ. ܒܗܽܘ̈ܠܳܠܶܐ ܘܒܰܙܡܺܝܪ̈ܳܬܳܐ܀