ܬܶܫܡܶܫܬܳܐ ܕܰܨܠܺܝܒܳܐ

ܙ

ܩܽܘܩܠܺܝܳܘܢ

ܒܳܟ ܢܕܰܩܰܪ ܠܰܒܥܶܠ̈ܕܒܳܒܰܝܢ ܗ̄ܘܗ̄ ܘܡܶܛܽܠ ܫܡܳܟ ܢܕܽܘܫ ܠܣܳܢܰܐܝ̈ܢ܀

ܐܰܢ̱ܬ ܗ̱ܽܘ ܦܪܰܩܬܳܢܝ ܡܶܢ ܣܳܢܰܐܝ̈ܢ ܗ̄ܘܗ̄ ܘܰܐܒܗܶܬܬ ܠܰܒܥܶܠ̈ܕܒܳܒܰܝܢ܀

ܐ̱ܚܪܺܢܳܐ

ܡܶܛܽܠ ܕܠܳܐ ܗ̱ܘܳܐ ܥܰܠ ܩܶܫ̈ܬܳܬܰܢ ܬܟ݂ܺܝܠܺܝܢܰܢ ܗ̄ܘܗ̄ ܐܳܦܠܳܐ ܥܰܠ ܙܰܝܢܰܢ ܕܢܶܦܪܩܰܢ܀

ܫܰܒܰܚܢܳܟ ܐܰܠܳܗܳܐ ܟܽܠܶܗ ܝܰܘܡܳܐ ܗ̄ܘܗ̄ ܘܠܰܫܡܳܟ݂ ܠܥܳܠܰܡ ܢܰܘܕܶܐ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܨܠܺܝܒܳܐ ܙܟ݂ܳܐ ܨܠܺܝܒܳܐ ܙܳܟ݂ܶܐ܇ ܨܠܺܝܒܳܐ ܙܟ݂ܳܝܗ̱ܝ ܠܰܒܥܶܠܕܰܪܳܐ. ܘܰܨܠܺܝܒܳܟ ܢܶܗܘܶܐ ܫܽܘܪܳܐ܇ ܠܟܽܠ ܡܰܢ ܕܰܐܘܕܺܝ ܒܰܨܠܺܝܒܳܟ܀

ܐ̱ܚܪܺܢܳܐ

ܨܠܺܝܒܳܐ ܐܰܡܠܶܟ ܒܰܫܡܰܝܳܐ܇ ܘܰܨܠܺܝܒܳܐ ܐܰܡܠܶܟ ܒܰܐܪܥܳܐ. ܘܰܨܠܺܝܒܳܐ ܢܶܗܘܶܐ ܫܽܘܪܳܐ܇ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ܀

ܐ̱ܚܪܺܢܳܐ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܐܳܚܕܺܝܢܰܢ ܓܰܘܣܳܐ ܟܽܠ ܝܽܘܡ. ܕܗܽܘ ܡܦܰܨܶܐ ܠܰܢ ܡܶܢ ܒܺܝܫܳܐ܇ ܘܡܰܘܪܶܬ ܠܰܢ ܡܰܠܟܽܘܬ ܪܰܘܡܳܐ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܣܳܗ̈ܕܰܘܗܝ ܐܰܢ̱ܬܽܘܢ

ܒܰܬܠܳܬܫܳܥܺܝ̈ܢ ܘܰܒܟܽܠܥܶܕܳܢ܇ ܣܳܓ݂ܕܺܝܢܰܢ ܠܶܗ ܠܰܨܠܺܝܒܳܐ ܚܰܝܳܐ. ܘܠܶܗ ܪܳܫܡܺܝܢܰܢ ܥܰܠ ܒܶܝܬ ܥܰܝ̈ܢܰܝܢ܇ ܕܗܽܘܝܽܘ ܣܰܒܪܰܢ ܘܗܽܘܝܽܘ ܬܽܘܟ݂ܠܳܢܰܢ܆ ܘܗܽܘ ܡܦܰܨܶܐ ܠܰܢ. ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ. ܐܺܝ̈ܡܳܡܶܐ ܘܠܰܝ̈ܠܰܘܳܬܳܐ܀

ܫܽܘܒܚܳܐ: ܡܽܘܫܶܐ ܒܚܽܘܛܪܶܗ ܦܰܠܓܶܗ ܠܝܰܡܳܐ܇ ܩܕܳܡ ܡܰܫܪܺܝܬܳܐ ܘܰܥܒܰܪ ܝܺܣܪܳܐܶܝܠ. ܘܡܳܪܰܢ ܝܶܫܽܘܥ ܒܰܨܠܺܝܒ ܢܽܘܗܪܳܐ܇ ܦܰܬܚܳܗ̇ ܠܰܫܝܽܘܠ ܘܰܐܩܺܝܡ ܠܥܰܢܺܝ̈ܕܶܐ. ܒܪܺܝܟ ܗ̱ܽܘ ܡܫܺܝܚܳܐ. ܕܰܕܪܰܫ ܠܰܢ ܐܽܘܪܚܳܐ ܕܚܰܝ̈ܶܐ. ܡܶܢ ܩܰܒܪ̈ܶܐ ܠܓ݂ܰܘ ܦܰܪܕܰܝܣܳܐ܀

ܡܶܢ ܥܳܠܰܡ: ܒܰܬܠܳܬܫܳܥܺܝ̈ܢ ܐܶܟܰܠ ܐܳܕܳܡ. ܦܺܐܪܳܐ ܒܰܥܕܶܝܢ ܘܰܥܒܰܪ ܦܽܘܩܕܳܢܳܐ. ܘܰܒܫܶܬܫܳܥܺܝ̈ܢ ܣܠܶܩ ܡܳܪܶܗ ܕܳܐܕܳܡ܇ ܡܶܛܽܠ ܦܳܘܪܩܳܢܶܗ. ܘܒܰܬܫܰܥܫܳܥܺܝ̈ܢ ܟܬܰܒ ܚܽܘܪܳܪܶܗ ܒܰܙܩܺܝܦܳܐ ܘܦܰܢܝܶܗ ܠܰܥܕܶܢ ܝܳܪܬܽܘܬܶܗ܀

ܐ̱ܚܪܺܢܳܐ

ܬܠܳܬܳܐ ܐܪ̈ܳܙܶܐ ܐܶܬܥܰܛܰܦ ܗ̱ܘܳܐ܇ ܕܰܘܺܝܕ ܡܰܠܟܳܐ ܘܰܢܦܰܩ ܥܰܠ ܓܽܘܠܝܰܕ. ܩܶܠܥܳܐ ܡܰܪܝܰܡ ܘܟܺܐܦܳܐ ܡܫܺܝܚܳܐ. ܘܚܽܘܛܪܳܐ ܕܒܺܐܝܕܶܗ ܐ̱ܪܳܙܶܗ ܕܰܨܠܺܝܒܳܐ. ܘܰܐܟܪܶܟ ܘܰܡܚܳܝܗܝ ܠܰܦܠܶܫܬܳܝܳܐ ܒܒܶܝܬ ܥܰܝ̈ܢܰܘܗܝ. ܘܡܶܢ ܫܶܠܝܳܐ ܗܘܳܬ ܡܰܦܽܘܠܬܶܗ܀

ܐ̱ܚܪܺܢܳܐ ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ

ܒܨܰܦܪܳܐ ܨܠܺܝܒܳܐ ܚܰܝܳܐ ܡܶܢܫܶܠܝ ܕܳܢܰܚ. ܘܡܶܢ ܤܰܘ̈ܦܶܐ ܠܤܰܘ̈ܦܶܐ ܕܰܐܪܥܳܐ ܡܚܰܘܶܐ ܙܳܟܽܘܬܳܐ. ܘܡܰܘܕܶܝܢ ܒܶܗ ܟܳܦܽܘܪ̈ܶܐ ܟܰܕ ܠܳܐ ܨܳܒܶܝܢ. ܘܚܳܕܶܝܢ ܒܶܗ ܤܳܗ̈ܕܶܐ ܒܪ̈ܺܝܟܶܐ ܘܫܳܩܠܺܝܢ ܟܠܺܝ̈ܠܰܝܗܽܘܢ. ܒܶܗ ܢܰܘܕܶܐ ܘܢܶܤܓܽܘܕ ܠܳܟ ܡܳܪܰܢ. ܕܰܒܩܶܛܠܳܟ ܘܢܽܘܚܳܡܳܟ ܚܝܰܝܢܰܢ. ܡܫܺܝܚܳܐ ܕܦܰܪܩܰܢ ܒܰܨܠܺܝܒܶܗ ܚܽܘܣ ܘܶܐܬܪܰܚܰܡܥܠܰܝܢ܀

ܫܽܘܒܚܳܐ: ܨܠܺܝܒܶܗ ܕܒܰܪ ܐܰܠܳܗܳܐ ܗܰܘ ܕܰܛܡܰܪ ܗ̱ܘܳܐ. ܥܰܡܳܐ ܠܺܝܛܳܐ ܕܝܽܘ̈ܕܳܝܶܐ ܛܳܠ̈ܡܰܝ ܛܰܝܒܽܘܬܳܐ. ܝܰܘܡܳܢܳܐ ܐܶܬܚܰܘܺܝ ܒܰܐܪ̈ܒܰܥܦܶܢܝܳܢ. ܘܤܶܘܚܰܬ ܠܶܗ ܥܺܕܰܬ ܩܽܘܕܫܳܐ ܘܤܶܓܕܰܬ ܠܺܐܝܩܳܪܶܗ. ܐܽܘܪܺܫܠܶܡ ܚܶܪܒܰܬ ܕܰܨܠܰܒܬܶܗ. ܘܗܳܐ ܪܽܘܡܺܝ ܘܤܽܘܪܺܝܰܐ ܘܡܶܨܪܶܝܢ. ܤܳܓ̈ܕܳܢ ܠܶܗ ܕܰܦܪܰܩ ܐܶܢܶܝܢ ܡܶܢ ܤܶܓܕܰܬ ܨܰܠ̈ܡܶܐ܀

ܡܶܢ ܥܳܠܰܡ: ܡܰܠܟܳܐ ܩܽܘܤܛܰܢܛܺܝܢܳܘܣ ܚܙܳܝܗ̱ܝ ܠܰܨܠܺܝܒܳܐ. ܘܰܐܪܟܶܢ ܪܺܝܫܶܗ ܘܰܤܓܶܕ ܠܶܗ ܘܗܳܟܰܢܳܐ ܐܶܡܰܪ. ܡܰܘܕܶܐ ܐ̱ܢܳܐ ܠܳܟ ܡܳܪܝ ܘܰܐܠܳܗܝ ܕܝܰܗ̱ܒܬ ܠܺܝ ܨܠܺܝܒܳܐ. ܕܒܶܗ ܐܶܬܟܰܬܰܫ ܥܰܡ ܒܺܝܫܳܐ ܘܶܐܙܟܶܐ ܠܨܶܢ̈ܥܳܬܶܗ. ܒܰܨܠܺܝܒܳܟ ܥܺܕܬܳܐ ܐܶܬܦܰܪܩܰܬ. ܘܒܰܨܠܺܝܒܳܟ ܝܰܠ̈ܕܶܝܗ̇ ܢܶܬܢܰܛܪܽܘܢ. ܨܠܺܝܒܳܟ ܢܶܗܘܶܐ ܢܳܛܽܘܪܰܢ ܒܠܺܠܝܳܐ ܘܒܺܐܝܡܳܡܳܐ܀

ܐ̱ܚܪܺܢܳܐ ܩܳܠܳܐ ܒܩ̄: ܩܽܘܩܳܝܳܐ

ܡܶܢ ܪܽܘܡܺܝ ܡܕܺܝܢܰܬ ܡܰܠ̈ܟܶܐ ܥܕܰܡܳܐ ܠܽܐܘܪܺܫܠܶܡ. ܢܶܚܬܰܬ ܗܶܠܶܢܺܝ ܡܰܠܟܬܳܐ ܕܠܰܨܠܺܝܒܳܐ ܬܶܤܓܽܘܕܝ. ܘܶܐܚܕܰܬ ܐܶܢܽܘܢ ܠܟܽܠܗܽܘܢ ܝܽܘ̈ܕܳܝܶܐ. ܕܬܰܘ ܚܰܘܰܘ ܠܺܝ ܕܽܘܟܬܶܗ ܕܰܨܠܺܝܒܳܐ. ܥܢܰܘ ܗܶܢܽܘܢ ܘܶܐܡܰܪܽܘܢ ܠܳܗ̇. ܕܪܰܒܳܐ ܐܺܝܬ ܠܰܢ. ܘܶܐܢ ܬܶܐܚܕܺܝܘܗ̱ܝ ܗܽܘ ܡܚܰܘܶܐ ܠܶܟܝ ܕܽܘܟܬܳܐ ܕܒܳܗ̇ ܐܶܬܬܤܺܝܡ ܗ̄ ܨܠܺܝܒܶܗ ܕܰܡܫܺܝܚܳܐ܀

ܫܽܘܒܚܳܐ: ܬܳܐ ܨܠܺܝܒܳܐ ܐܶܫܬܰܥܳܐ ܠܰܢ ܕܡܳܢܰܘ ܚܰܝܠܳܟ. ܕܡܶܢ ܤܰܘ̈ܦܶܐ ܠܤܰܘܦܶܝ̈ܗ̇ ܕܰܐܪܥܳܐ ܥܰܡ̱̈ܡܶܐ ܠܳܟ ܤܳܓܕܺܝܢ. ܡܰܕܒܚܳܐ ܥܒܺܝܕ ܗ̱ܘܺܝܬ ܥܰܠ ܪܺܝܫ ܓܳܓܽܘܠܬܳܐ. ܘܰܥܠܰܝ ܨܰܠܒܽܘܗ̱ܝ ܠܰܒܪܳܐ ܕܰܐܠܳܗܳܐ. ܥܰܨܪܽܘܗ̱ܝ ܝܽܘ̈ܕܳܝܶܐ ܒܪܽܘܡܚܳܐ ܘܡܶܢ ܚܰܡܪܶܗ ܠܳܐ ܛܥܶܡܘ. ܩܰܒܶܠܬܶܗ ܥܺܕܰܬ ܩܽܘܕܫܳܐ ܘܩܰܪܶܒܬܶܗ ܠܡܰܕܒܚܳܐ ܗ̄ ܘܡܶܢܶܗ ܡܶܬܒܰܤܡܳܐ܀

ܡܶܢ ܥܳܠܰܡ: ܒܬܰܪ̈ܥܶܐ ܪ̈ܳܡܶܐ ܕܰܫܡܰܝܳܐ ܩܳܝܡܳܐ ܡܰܪܝܰܡ. ܘܰܐܚܺܝܕܳܐ ܨܠܺܝܒܳܐ ܒܺܐܝܕܳܗ̇ ܘܠܺܝܚܺܝܕܳܗ̇ ܡܰܘܡܝܳܐ. ܒܗܳܢܳܐ ܩܰܝܤܳܐ ܕܛܰܥܢܳܟ ܒܽܐܘܪܺܫܠܶܡ. ܒܗܳܠܶܝܢ ܨܶܨ̈ܶܐ ܕܒܺܐܝ̈ܕܰܝܟ ܘܰܒܪ̈ܶܓܠܰܝܟ. ܒܠܽܘܟܳܝܬܳܐ ܕܬܶܪܥܰܬ ܕܰܦܢܳܟ ܥܰܠ ܪܺܝܫ ܩܰܝܤܳܐ. ܐܰܥܒܰܪܳܝܗ̱ܝ ܠܫܰܒܛܳܐ ܕܪܽܘܓܙܳܐ ܡܶܢ ܥܺܕܬܳܐ ܘܝܰܠ̈ܕܶܝܗ̇ ܗ̄ ܘܰܐܫܪܳܐ ܒܳܗ̇ ܫܰܝܢܳܟ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܗܰܘ ܕܰܨܠܺܝܒܶܗ ܥܰܠ ܟܰܬܦܶܗ܇ ܛܰܥܢܶܗ ܘܰܢܦܰܩ ܡܶܢ ܨܶܗܝܽܘܢ. ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ܇ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ܀

ܐ̱ܚܪܺܢܳܐ

ܠܳܐ ܕܳܚܠܺܝܢܰܢ ܡܶܢ ܒܺܝܫܳܐ܇ ܡܶܛܽܠ ܕܡܳܪܝܳܐ ܥܰܡܰܢ ܗ̱ܽܘ. ܙܰܝܢܶܗ ܕܰܡܫܺܝܚܳܐ ܥܰܡܰܢ܇ ܒܶܗ ܟܽܠܰܢ ܡܶܫܬܰܒܗܪܺܝܢܰܢ܀