ܬܶܫܡܶܫܬܳܐ ܕܣܳܗ̈ܕܶܐ

ܐ

ܩܽܘܩܠܺܝܳܘܢ

ܡܛܽܠܳܬܳܟ ܐܶܬܩܰܛܰܠܢ ܒܟܽܠܝܽܘܡ ܗ̄ ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟ݂ܣܬܳܐ܀

ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ ܗ̄ ܘܠܳܐ ܬܶܛܥܶܐ ܡܽܘܟܳܟ݂ܰܢ ܘܽܐܘܠ̈ܨܳܢܰܝܢ܀

ܐ̱ܚܪܺܢܳܐ

ܐܶܬܬܥܺܝܪ ܘܠܳܐ ܬܶܕܡܰܟ ܡܳܪܝܳܐ ܗ̄ ܥܶܗܰܕܶܝܢ ܘܠܳܐ ܬܶܛܥܶܝܢ܀

ܡܶܛܽܠ ܕܡܶܟ݂ܰܬ ܥܰܠ ܥܰܦܪܳܐ ܢܰܦܫܰܢ ܗ̄ ܘܕܶܒܩܰܬ ܟܰܪܣܰܢ ܠܰܐܪܥܳܐ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟ݂ܪܳܢܟ݂ܽܘܢ ܣܳܗ̈ܕܶܐ ܒܪ̈ܺܝܟ݂ܶܐ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ. ܘܰܐܝܠܶܝܢ ܕܝܰܩܰܪܘ ܕܽܘܟ݂ܪܳܢܟ݂ܽܘܢ܇ ܢܶܬܥܰܕܪܽܘܢ ܒܰܨ̈ܠܰܘܳܬܟ݂ܽܘܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܣܠܶܩ ܥܶܛܪܳܐ ܡܶܢ ܓܰܪ̈ܡܰܝܗܽܘܢ܇ ܕܣܳܗ̈ܕܶܐ ܒܪ̈ܺܝܟܶܐ. ܘܪܰܥܺܝ ܒܪ̈ܰܘܡܶܐ ܥܶܠܳܝ̈ܶܐ܇ ܠܰܡܠܶܟ ܡܰܠ̈ܟܶܐ. ܘܰܚܕܺܝܘ ܥܺܝܪ̈ܶܐ ܕܒܰܫܡܰܝܳܐ܇ ܒܟܽܘܠܳܠܰܝ̈ܗܽܘܢ. ܘܥܺܕܬܳܐ ܘܝܰܠ̈ܕܶܝܗ̇ ܗܳܐ ܡܙܰܝܚܳܐ܇ ܠܝܽܘܡ ܥܺܐܕܰܝ̈ܗܽܘܢ܀

ܫܽܘܒܚܳܐ: ܢܕܽܘܨܽܘܢ ܝܰܘܡܳܢ ܓܰܪ̈ܡܰܝܗܽܘܢ܇ ܕܣܳܗ̈ܕܶܐ ܒܪ̈ܺܝܟܶܐ. ܘܬܶܚܕܶܐ ܥܺܕܬܳܐ ܕܰܡܙܰܝܚܳܐ܇ ܠܝܽܘܡ ܥܺܐܕܰܝ̈ܗܽܘܢ. ܘܡܳܐ ܕܕܳܢܰܚ ܡܰܠܟܳܐ ܡܫܺܝܚܳܐ܇ ܒܫܽܘܒܚܶܗ ܪܰܒܳܐ. ܥܳܐܠܺܝܢ ܥܰܡܶܗ ܠܰܓ݂ܢܽܘܢܳܐ܆ ܡܠܶܐ ܚܰܕ̈ܘܳܬܳܐ܀

ܡܶܢ ܥܳܠܰܡ: ܛܳܣܘ ܓܽܘ̈ܕܶܐ ܕܥܺܝܪ̈ܶܐ ܘܰܢܚܶܬܘ܇ ܡܶܢ ܣܶܕܪ̈ܰܝܗܽܘܢ. ܕܰܚܙܰܘ ܠܣܳܗ̈ܕܶܐ ܩܰܕܺܝ̈ܫܶܐ܇ ܟܰܕ ܡܶܬܩܰܛܠܺܝܢ. ܛܽܘܒܳܐ ܪܰܒܳܐ ܝܰܗܒܘ ܗܘܰܘ ܠܳܗ̇܇ ܠܥܺܕܰܬ ܩܽܘܕܫܳܐ. ܥܰܠ ܕܶܒܚܳܐ ܕܰܣܠܶܩ ܡܶܢܳܗ̇܇ ܠܰܡܠܶܟ ܡܰܠ̈ܟܶܐ܀

ܐ̱ܚܪܺܢܳܐ

ܐܳܘ ܣܳܗ̈ܕܶܐ ܪ̈ܚܽܘܡܰܘܗ̱ܝ ܕܰܒܪܳܐ܇ ܡܰܢ ܐܰܪܘܺܝܟ݂ܽܘܢ. ܕܰܒܣܰܝܦܳܐ ܐܶܬ݂ܟܰܠܰܠܬܽܘܢ܇ ܘܠܳܐ ܚܰܫܬܽܘܢ ܒܶܗ. ܕܡܶܗ ܝܶܫܽܘܥ ܚܙܰܝܢ ܒܰܙܩܺܝܦܳܐ܇ ܘܗܽܘ ܐܰܪܘܺܝ ܠܰܢ. ܘܠܳܐ ܐܰܪܓ݂ܶܫܢܰܢ ܒܽܐܘܠ̈ܨܳܢܰܝܢ܇ ܡܶܛܽܠ ܚܽܘܒܶܗ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܪܶܗ ܕܪܰܡܫܳܐ

ܡܶܢ ܦܽܘܡ ܟܽܠܰܢ܇ ܫܠܳܡܳܐ ܠܓܰܪ̈ܡܰܝܟܽܘܢ܇ ܡܶܢ ܓܰܪ̈ܡܰܝܟܽܘܢ܇ ܥܽܘܕܪ̈ܳܢܶܐ ܠܟܽܠܰܢ. ܢܒܺܝ̈ܶܐ ܫܠܺܝ̈ܚܶܐ܇ ܘܣܳܗ̈ܕܶܐ ܩܰܕܺܝ̈ܫܶܐ܇ ܨܠܽܘܬܟܽܘܢ ܬܶܗܘܶܐ܇ ܣܶܬܳܪܳܐ ܠܟܽܠܰܢ܀

ܫܽܘܒܚܳܐ: ܠܳܐ ܡܶܬܬܙܺܝܥܳܐ܇ ܥܺܕܬܳܐ ܡܗܰܝܡܰܢܬܳܐ܇ ܡܶܢ ܡܰܚ̈ܫܽܘܠܶܐ܇ ܘܓܰܠ̈ܠܶܐ ܕܛܳܪܶܝܢ ܒܳܗ̇. ܕܣܺܝܡ ܒܫܶܬܶܐܣܶܝ̈ܗ̇܇ ܟܺܐܦܳܐ ܓܰܒ̈ܝܳܬܳܐ܇ ܢܒܺܝ̈ܶܐ ܫܠܺܝ̈ܚܶܐ܇ ܘܣܳܗ̈ܕܶܐ ܩܰܕܺܝ̈ܫܶܐ܀

ܐ̱ܚܪܺܢܳܐ ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ

ܣܳܗ̈ܕܰܘܗ̱ܝ ܐܰܢ̱ܬܽܘܢ ܕܺܝܚܺܝ̣ܕܳܝܳܐ. ܪ̈ܚܽܘ̣ܡܰܘܗ̱ܝ ܐܰܢ̱ܬܽܘܢ. ܕܒܽܘܟܪܶܗ ܕܥܶܠܳܝܳܐ. ܕܡܶܛܽܠܬܶܗ ܐܶܬܩܰܛܰܠܬܽܘܢ. ܘܡܶܛܽܠ ܚܽܘ̣ܒܶܗ. ܚܰܫ̈ܶܐ ܣܰܝܒܰܪܬܽܘܢ. ܘܡܶܛܽܠܳܬܶܗ ܠܕܶܒܚܬܳܐ ܐܶܬܩܰܪܰܒܬܽܘܢ. ܒܪܺܝܟ ܕܰܐܘܪܶܒ ܕܽܘܟܪ̈ܳܢܰܝܟܽܘܢ܀

ܫܽܘܒܚܳܐ: ܫܽܘܒܚܳܐ ܠܳܟ ܡܳܪܝ ܕܰܒܟܽܠ ܕܳܪ̈ܺܝܢ ܐܺܝܬ ܠܳܟ ܟܺܐܢ̈ܶܐ. ܕܰܡܪܰܥܶܝܢ ܠܰܫܡܳܟ. ܒܕܳܪ̈ܶܐ ܩܰܕ̈ܡܶܐ ܢܽܘܚ ܘܰܐܒܪܳܗܳܡ ܘܺܐܝܣܚܳܩ ܘܝܰܥܩܽܘܒ. ܡܽܘܫܶܐ ܘܶܐܠܺܝܳܐ. ܘܰܒܗܳܢ ܕܳܪܳܐ܇ ܢܦܺܝܣܽܘܢܳܟ ܣܳܗ̈ܕܶܐ ܒܪ̈ܺܝܟܶܐ ܒܰܕܡܳܐ ܕܰܐܪܕܺܝܘ ܨܰܘܪ̈ܰܝܗܽܘܢ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܐ ܪܚܺܝܡܺܝܢ

ܡܳܐ ܦܰܐܝܳܐ ܗܳܝ ܡܶܫܬܽܘܬܳܐ ܕܰܥܒܰܕ ܚܰܬܢܳܐ. ܡܫܺܝܚܳܐ ܠܫܰܡܳܫܰܘ̈ܗ̱ܝ. ܕܺܐܝܬ ܒܳܗ̇ ܢܒܺܝ̈ܶܐ ܘܰܫܠܺܝ̈ܚܶܐ. ܘܺܐܝܬ ܒܳܗ̇ ܤܳܗ̈ܕܶܐ ܩܰܕܺܝ̈ܫܶܐ. ܡܳܪܶܗ ܕܰܚܠܽܘܠܳܐ ܚܳܕܶܐ ܒܕܽܘܟܪܳܢ ܟܺܐܢ̈ܶܐ. ܕܰܢܨܰܚܘ ܘܶܐܬܟܰܠܰܠܘ܀

ܫܽܘܒܚܳܐ: ܐܳܤܰܘ̈ܳܬܳܐ ܐܺܝܬܰܝܟܽܘܢ ܤܳܗ̈ܕܶܐ ܒܪ̈ܺܝܟܶܐ. ܠܰܐܝܢܳܐ ܕܰܡܗܰܝܡܶܢ. ܛܽܘܒܰܘܗ̱ܝ ܠܰܐܝܢܳܐ ܕܝܰܩܰܪܟܽܘܢ. ܘܶܐܫܬܰܘܬܰܦ ܒܕܽܘܟܪ̈ܳܢܰܝܟܽܘܢ. ܘܗܳܘܶܐ ܙܡܺܝܢܳܐ ܒܟܶܢܫܰܝ̈ܟܽܘܢ ܘܥܰܡܟܽܘܢ ܝܳܪܶܬ. ܚܰܝ̈ܶܐ ܕܰܠܥܳܠܰܡ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܝܟܳܐ ܕܶܐܬܩܰܛܰܠܘ ܣܳܗ̈ܕܶܐ܇ ܘܶܐܬܦܰܣܰܩܘ ܗܰܕܳܡܰܝ̈ܗܽܘܢ. ܬܰܡܳܢ ܐܰܓ݂ܢܰܬ ܪܽܘܚܩܽܘܕܫܳܐ܇ ܘܰܒܚܽܘܪܒܳܐ ܫܰܝܢܳܐ ܥܶܒܕܰܬ܀