ܬܶܫܡܶܫܬܳܐ ܕܰܬܝܳܒܽܘܬܳܐ

ܗ

ܩܽܘܩܠܺܝܳܘܢ

ܡܳܪܝܳܐ ܫܡܰܥ ܨܠܽܘܬܝ ܗ̄ ܘܰܓܥܳܬܝ ܠܘܳܬܳܟ ܬܶܥܽܘܠ܀

ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ ܒܝܰܘܡܳܐ ܕܽܐܘܠܨܳܢܝ ܗ̄ ܐܶܠܳܐ ܐܰܪܟܶܢ ܠܺܝ ܐܶܕܢܳܟ ܒܝܰܘܡܳܐ ܕܶܐܩܪܶܝܟ ܘܒܰܥܓܰܠ ܥܢܺܝܢܝ܀

ܐ̱ܚܪܺܢܳܐ

ܡܶܛܽܠ ܕܰܓܡܰܪܘ ܒܬܽܘܢܳܢܳܐ ܝܰܘ̈ܡܰܝ ܗ̄ ܘܓܰܪ̈ܡܰܝ ܚܘܰܪܘ ܐܰܝܟ ܡܰܘ̈ܩܕܶܐ܀

ܚܡܳܐ ܠܶܒܝ ܐܰܝܟ ܥܶܣܒܳܐ ܘܺܝܒܶܫ ܗ̄ ܡܶܛܽܠ ܕܰܛܥܺܝܬ ܡܶܐܟ݂ܽܠܬܶܗ ܕܠܰܚܡܝ܀

ܐ̱ܚܪܺܢܳܐ

ܛܽܘܒܰܘܗܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ ܗ̄ ܘܶܐܬܟܰܣܺܝܘ ܠܶܗ ܚܛܳܗܰܘ̈ܗܝ܀

ܡܶܛܽܠ ܕܫܶܬ̣ܩܶܬ̣ ܒܠܺܝܘ ܓܰܪ̈ܡܰܝ ܗ̄ ܟܰܕ ܢܳܗܶܡ ܗ̱ܘܺܝܬ ܝܰܘܡܳܐ ܟܽܘܠܶܗ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܒܬܰܪܥܳܐ ܕܺܝܠܳܟ ܚܰܢܳܢܳܐ܇ ܢܳܩܶܫ ܩܳܠܳܐ ܕܒܳܥܽܘܬ݂ܰܢ. ܠܳܐ ܬܶܟܠܶܐ ܡܶܢ ܣܳܓ݂ܽܘ̈ܕܰܝܟ܆ ܫ̈ܶܐܠܳܬܳܐ ܕܣܽܘܢܩܳܢܰܝ̈ܗܽܘܢ܀

ܐ̱ܚܪܺܢܳܐ

ܩܰܒܶܠ ܡܳܪܰܢ ܬܶܫܡܶܫܬܰܢ ܘܰܨ̈ܠܰܘܳܬܰܢ܇ ܐܰܝܟ ܕܡܽܘܫܶܐ ܘܰܐܝܟ ܕܶܐܠܺܝܳܐ܇ ܕܰܐܗܪܽܘܢ ܟܳܗܢܳܐ ܙܰܗܝܳܐ܇ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܐ̱ܚܪܺܢܳܐ ܩܳܠܳܐ ܒܩ̄: ܩܽܘܩܳܝܳܐ

ܐܰܒܽܘܢ ܕܒܰܫܡܰܝܳܐ ܥܢܺܝ̣ ܠܰܢ. ܩܳܪܶܝܢܰܢ ܠܳܟ. ܕܠܳܐ ܐܺܝ̣ܬ ܠܰܢ ܐܰܒܳܐ ܐ̱ܚܪܺܢܳܐ. ܕܰܡܨܶܐ ܕܰܢܥܰܕܪܰܢ. ܟܰܕ ܠܳܐ ܐܺܝ̣ܬܰܝܢ: ܫܦܰܪ ܠܳܟ ܘܰܒܪܰܝܬܳܢ. ܗܳܫܳܐ ܕܰܗܘܰܝܢ: ܠܳܐ ܢܚܰܒܠܰܢ ܪܽܘܓ݂ܙܳܟ. ܐܰܠܶܦܰܝܢ ܡܳܪܝ̱ ܦܽܘܩܕܳܢܰܝ̈ܟ ܕܢܶܛܰܪ ܐܶܢܽܘܢ. ܘܒܰܥ̈ܒܳܕܶܐ ܕܙܰܕܺܝ̣ܩܽܘܬܳܐ. ܢܶܫܦܰܪ ܠܳܟ ܡܳܪܝܳܐ ܗ̄ ܒܪ̈ܰܚܡܰܝܟ ܚܽܘܣ ܥܠܰܝܢ܀

ܫܽܘܒܚܳܐ: ܛܽܘܒܰܝܗܽܘܢ ܠܥܰܒ̈ܕܶܐ ܛܳܒ̈ܶܐ ܡܳܐ ܕܳܐܬ݂ܶܐ ܡܳܪܗܽܘܢ. ܘܡܶܫܟܰܚ ܠܗܽܘܢ ܟܰܕ ܥܺܝܪܺܝܢ ܘܰܒܟܰܪܡܶܗ ܦܳܠܚܺܝܢ. ܐܳܣܰܪ ܚܰܨܰܘ̈ܗ̱ܝ ܘܰܡܫܰܡܶܫ ܠܗܽܘܢ. ܕܰܠܐܺܝܘ ܥܰܡܶܗ ܡܶܢ ܨܰܦܪܳܐ ܠܪܰܡܫܳܐ. ܐܰܒܳܐ ܡܰܣܡܶܟ݂ ܦܰܠܳܚܰܘ̈ܗ̱ܝ ܘܰܒܪܳܐ ܡܫܰܡܶܫ ܠܗܽܘܢ. ܘܪܽܘܚܩܽܘܕܫܳܐ ܦܰܪܰܩܠܺܝܛܳܐ ܟܠܺܝܠܰܝ̈ܗܽܘܢ ܓܳܕܠܳܐ ܗ̄ ܣܳܝܡܳܐ ܒܪ̈ܺܝܫܰܝܗܽܘܢ܀

ܡܶܢ ܥܳܠܰܡ: ܟܰܪܝܳܐ ܠܺܝ ܕܺܐܝܬܰܝ ܕܺܝܠܳܟ ܒܰܫܡܳܐ ܒܰܠܚܽܘܕ. ܒܰܥ̈ܒܳܕܰܝ ܘܰܒܣܽܘܪ̈ܚܳܢܰܝ ܡܶܢܳܟ ܪܰܚܺܝܩ ܐ̱ܢܳܐ. ܪܳܐܓܳܐ ܗ̱ܘܳܬ ܠܺܝ ܕܶܐܗܘܶܐ ܬܰܝܳܒܳܐ. ܘܠܳܐ ܫܳܒܶܩ ܠܺܝ ܨܶܒܝܳܢܝ ܡܰܪܳܚܳܐ. ܡܰܠܶܦ ܐ̱ܢܳܐ ܘܠܳܐ ܝܳܠܶܦ ܐ̱ܢܳܐ. ܐܰܫܩܺܝܬ ܘܶܐܢܳܐ ܨܗܺܝܬ. ܡܰܒܽܘܥܳܐ ܕܬܶܪܥܰܬ݂ ܪܽܘܡܚܳܐ ܠܨܰܗܝܽܘܬܝ ܦܰܝܶܓ ܠܺܝ ܗ̄ ܘܺܐܚܶܐ ܒܛܰܝܒܽܘܬ݂ܳܟ܀

ܐ̱ܚܪܺܢܳܐ

ܚܳܛܶܐ ܐ̱ܢܳܐ ܘܰܡܛܰܫܶܐ ܐ̱ܢܳܐ ܕܠܐܳ ܐ̱ܢܳܫ ܢܶܚܙܶܝܢܝ̱. ܘܡܳܐ ܕܣܳܥܰܪ ܐ̱ܢܳܐ ܒܺܝ̈ܫܳܬܳܐ ܚܳܙܶܐ ܠܺܝ ܡܳܪܝܳܐ. ܐܶܢ ܐ̱ܢܳܫ ܢܶܚܙܶܝܢܝ̱ ܒܳܗܶܬ ܐ̱ܢܳܐ ܡܶܢܶܗ. ܘܡܶܢ ܐܰܠܳܗܳܐ ܠܳܐ ܡܶܬܟܰܚܰܕ ܐ̱ܢܳܐ. ܕܰܝܳܢܳܐ ܘܪܰܒ ܕܰܝܳܢ̈ܶܐ ܚܽܘܣ ܥܰܠ ܫܰܦܠܽܘܬܝ̱. ܕܶܐܢ ܩܳܕܶܡ ܐ̱ܢܳܫ ܘܶܐܢ ܡܰܘܚܰܪ ܒܺܐܝ̈ܕܰܝܟ ܡܳܪܝ ܡܶܫܬܠܶܡ ܗ̄ ܒܪ̈ܰܚܡܰܝܟ ܚܽܘܣ ܥܠܰܝ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܐܰܝܢܳܐ ܕܳܐܬܶܐ ܠܰܨܠܽܘܬܳܐ ܠܗܰܝܟܰܠ ܩܽܘܕܫܳܐ. ܢܕܰܟܶܐ ܢܰܦܫܶܗ ܥܰܡ ܦܰܓܪܶܗ ܡܶܢ ܒܺܝ̈ܫܳܬܳܐ. ܕܫܳܡܰܥ ܡܳܪܝܳܐ ܨܠܰܘ̈ܳܬܶܗ ܐܳܦ ܒܳܥ̈ܘܳܬܶܗ. ܘܥܳܒܶܕ ܥܠܰܘܗ̱ܝ ܚܢܳܢܳܐ ܘܪ̈ܰܚܡܶܐ ܒܝܰܘܡܳܐ ܕܕܺܝܢܳܐ܀

ܫܽܘܒܚܳܐ: ܢܚܰܘܰܪ ܟܽܠܢܳܫ ܠܰܠܒܽܘܫܶܗ ܒܕܶܡ̈ܥܶܐ ܕܥܰܝ̈ܢܰܘܗ̱ܝ. ܕܗܳܐ ܩܶܪܒܰܬ ܠܳܗ̇ ܡܶܐܬܺܝܬܶܗ ܕܒܰܪ ܐܰܠܳܗܳܐ. ܚܰܪܬܶܗ ܕܥܳܠܡܳܐ ܥܰܠ ܬܰܪܥܳܐ ܗ̱ܝ ܫܠܺܝܚܳܐ ܤܳܗܶܕ. ܛܽܘܒܰܘܗ̱ܝ ܠܰܐܝܢܳܐ ܕܰܒܪ̈ܰܚܡܶܐ ܗܳܘܶܐ ܕܺܝܢܶܗ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܪܶܗ ܕܪܰܡܫܳܐ

ܒܪܰܡܫܳܐ ܘܨܰܦܪܳܐ ܒܠܺܠܝܳܐ ܘܒܺܐܝܡܳܡܳܐ ܢܶܦܠܽܘܚ ܐܰܚܰܝ̈ ܒܟܰܪܡܶܗ ܕܰܡܫܺܝܚܳܐ. ܕܰܒܥܺܝܪܽܘܬܳܐ ܢܺܐܬܶܐ ܘܢܶܫܟܰܚ ܠܰܢ. ܚܰܬܢܳܐ ܕܪܰܘܡܳܐ ܘܥܰܡܶܗ ܢܶܬܒܰܤܰܡ܀

ܫܽܘܒܚܳܐ: ܐܳܡܪܳܐ ܥܺܕܬܳܐ ܕܰܐܡܬܳܟ ܐ̱ܢܳܐ ܡܳܪܰܢ. ܘܺܐܝܬ ܠܺܝ ܒܢܰܝ̈ܳܐ ܟܺܐܢ̈ܶܐ ܘܥܰܘ̈ܳܠܶܐ. ܒܒܳܥܽܘ ܡܶܢܳܟ ܚܰܢܳܢܳܐ ܡܳܪܰܢ. ܡܶܛܽܠ ܟܺܐܢ̈ܶܐ ܚܽܘܣ ܥܰܠ ܥܰܘ̈ܳܠܶܐ܀

ܐ̱ܚܪܺܢܳܐ ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ

ܝܳܕܥܺܝܢܰܢ ܡܳܪܝ ܕܰܚܛܰܝܢܰܢ ܠܳܟ ܘܰܒܤܽܘܪ̈ܚܳܢܰܝܢ ܤܰܓܺܝ ܐܰܪܓܶܙܢܳܟ. ܘܶܐܢ ܟܺܐܢܽܘܬܳܐ ܫܶܡܛܰܬ ܤܰܝܦܳܐ ܚܢܳܢܳܟ ܡܳܪܰܢ ܗܽܘ ܢܶܩܽܘܡ ܒܰܐܦܰܝ̈ܢ. ܘܶܐܢܗܽܘ ܡܳܪܰܢ ܕܫܽܘܠܳܡܶܗ ܕܙܰܒܢܳܐ ܡܰܛܺܝ ܒܪ̈ܰܚܡܰܝܟ ܢܶܗܘܶܐ ܫܽܘܠܳܡܰܢ܀

ܫܽܘܒܚܳܐ: ܐܶܢܗܽܘ ܕܡܰܤܟܶܠ ܥܰܒܕܳܐ ܒܡܳܪܶܗ ܒܪ̈ܳܚܡܰܝ ܡܳܪܶܗ ܐܳܙܶܠ ܘܡܶܬܓܰܘܰܣ. ܘܰܒܒܳܥܽܘܬܳܐ ܘܰܒܬܰܟܫܶܦܬܳܐ ܫܳܒܶܩ ܡܳܪܳܐ ܤܰܟܠܽܘܬܳܐ ܕܥܰܒܕܶܗ. ܘܰܚܢܰܢ ܡܳܪܰܢ ܕܒܰܨܠܺܝܒܳܟ ܐܶܬܓܰܘܰܤܢܰܢ ܒܰܥܓܰܠ ܢܩܰܕܡܽܘܢܳܢ ܪ̈ܰܚܡܰܝܟ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܠܳܗܳܐ ܠܳܟ ܩܳܪܶܝܢܰܢ ܠܥܽܘܕܪܳܢܳܐ ܕܰܡܚܺܝܠܽܘܬ݂ܰܢ܇ ܫܡܰܥ ܛܳܒܳܐ ܩܳܠ ܒܳܥܽܘܬ݂ܰܢ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀