ܛܶܟܣܳܐ ܕܥܽܘܦܳܝܳܐ ܕܢܶܫ̈ܶܐ

ܢܽܘܗܳܪܳܐ: ܒܳܬܰܪ ܕܡܶܬܬܰܣܚܳܐ ܥܰܢܺܝܕܬܳܐ ܘܡܶܬܟܰܪܟܳܐ ܒܰܚܝܳܨܳܐ. ܡܶܬܬܰܝܬܝܳܐ ܠܥܺܕܬܳܐ܇ ܡܶܬܬܣܺܝܡܳܐ ܩܕܳܡ ܬܪܰܥ ܡܰܕܒܚܳܐ. ܣܳܝܡܺܝܢ ܨܠܺܝܒܳܐ ܘܡܰܕܠܩܺܝܢ ܩܶܪܝܽܘܢܳܐ ܩܕܳܡ ܪܺܝܫܳܗ̇. ܗܳܟܰܢܳܐ ܡܶܬܛܰܝܒܳܐ ܕܰܢܨܰܠܽܘܢ ܥܠܰܝܗ̇ ܘܰܢܠܰܘܽܘܢܳܗ̇ ܩܠܺܝܪܳܘܣ ܘܥܰܡܳܐ ܥܕܰܡܳܐ ܠܩܰܒܪܳܐ.

ܪܫܳܡ ܨܠܺܝܒܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ. ܐܰܡܺܝܢ܀

ܬܠܺܝܬܳܝ ܩܽܘܕ̈ܫܶܐ

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬܳܐ ܘܳܐܬܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܛܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ.

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ܀

ܨܠܽܘܬ݂ܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬ݂ܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܐܰܫܘܳܐ ܡܳܪܝ ܠܢܰܦܫܳܐ ܗܳܕܶܐ ܕܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܐܰܓܗܝܰܬ݀: ܘܡܶܢ ܥܳܠܡܳܐ ܗܳܢܳܐ ܕܥܳܩ̈ܳܬܳܐ ܫܰܢܝܰܬ. ܕܬܶܬܗܰܕܶܐ ܡܶܢ ܡܰܠܰܐܟ̈ܶܐ ܕܺܝܠܳܟ ܩܰܕܺܝ̈ܫܶܐ ܠܰܐܬܪ̈ܰܘܳܬܳܐ ܡܰܠܝܰܝ̈ ܢܝܳܚܳܐ ܘܒܽܘܣܳܡܳܐ: ܥܕܰܡܳܐ ܠܝܰܘܡܳܐ ܕܰܩܝܳܡܬܳܐ. ܘܬܰܡܳܢ ܒܓܰܠܝܽܘܬ ܐܰܦ̈ܶܐ ܬܶܦܓܰܥ ܒܳܟ. ܘܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ: ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܡܫܺܝܚܳܐ ܕܰܕܒܰܪ ܦܽܘܩܕܳܢܳܟ. ܠܰܐܡܬܳܟ ܡܶܢ ܚܰܝ̈ܶܐ ܕܙܰܒܢܳܐ. ܒܪ̈ܰܚܡܰܝܟ ܡܳܪܰܢ ܩܰܒܶܠܶܝܗ̇. ܘܥܰܡܳܗ̇ ܠܕܺܝܢܳܐ ܠܳܐ ܬܶܥܽܘܠ܀

ܡܫܺܝܚܳܐ ܥܒܶܕ ܠܳܗ̇ ܕܽܘܟܪܳܢܳܐ. ܠܰܐܡܬܳܟ ܕܫܶܟܰܒܬ ܥܰܠ ܣܰܒܪܳܟ. ܘܰܐܩܺܝܡܶܝܗ̇ ܡܶܢ ܝܰܡܺܝܢܳܟ. ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܒܦܽܘܩܕܳܢܳܟ ܘܰܒܨܶܒܝܳܢܳܟ: ܫܰܢܝܰܬ ܐܰܡܬܳܟ ܡܶܢ ܚܰܝ̈ܶܐ. ܒܛܰܝܒܽܘܬܳܟ ܡܳܪܝ ܐܰܢܺܝܚܶܝܗ̇: ܒܚܰܝ̈ܶܐ ܡܠܺܝ̈ܟܶܐ ܕܰܠܥܳܠܰܡ܀

ܥܰܠ ܣܰܒܪܳܟ ܡܳܪܝܳܐ ܫܶܟܒܰܬ: ܘܥܰܠ ܬܽܘܟܠܳܢܶܗ ܕܰܚܢܳܢܳܟ. ܛܰܝܒܽܘܬܳܟ ܬܶܩܽܘܡ ܒܰܐܦܶܝ̈ܗ̇: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܠܕܺܝܢܳܐ ܥܰܡܳܗ̇ ܠܳܐ ܬܶܥܽܘܠ: ܘܰܠܒܽܘܚܪܳܢܳܐ ܕܰܚܛܳܗܶܝ̈ܗ̇. ܘܠܳܐ ܬܶܗܘܶܐ ܡܢܳܬܳܐ ܠܢܽܘܪܳܐ: ܕܐܪ̈ܳܙܰܝܟ ܚܰܝ̈ܶܐ ܛܡܺܝܪܺܝܢ ܒܳܗ̇܀

ܡܙܡܘܪܐ܆ ܩܳܠܳܐ: ܩܽܘܩܰܠܝܽܘܢ ܫܒܺܝܥܳܝܳܐ

ܫܳܩܶܠ ܐܰܢ̱ܬ ܪܽܘܚܗܽܘܢ ܘܡܳܝܬܺܝܢ ܗ̄ܘܗ̄ ܘܰܠܥܰܦܪܽܗܘܢ ܗܳܦܟܺܝܢ܀

ܡܫܰܕܰܪ ܐܰܢ̱ܬ ܪܽܘܚܳܟ ܘܡܶܬܒܪܶܝܢ ܗ̄ܘܗ̄ ܘܰܡܚܰܕܶܬ ܐܰܢ̱ܬ ܐܰܦܶܝ̈ܗ̇ ܕܰܐܪܥܳܐ܀

ܢܶܗܘܶܐ ܫܡܶܗ ܕܡܳܪܝܳܐ ܠܥܳܠܰܡ ܗ̄ܘܗ̄ ܢܶܚܕܶܐ ܡܳܪܝܳܐ ܒܰܥܒܳܕܰܘ̈ܗܝ܀

ܕܚܳܐܰܪ ܒܰܐܪܥܳܐ ܘܙܳܝܥܳܐ ܗ̄ܘܗ̄ ܘܟܳܐܶܐ ܒܛܽܘܪ̈ܶܐ ܘܬܳܢܺܝܢ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܥܶܩܒܳܐ

ܠܟܽܘܢ ܛܽܘܒܰܝܟܽܘܢ ܥܰܢܺܝ̈ܕܶܐ. ܒܗܰܘ ܝܰܘܡܳܐ ܕܗܳܘܶܐ ܢܽܘܚܳܡܳܐ. ܕܦܰܓܪܳܐ ܚܰܝܳܐ ܗܰܘ ܕܶܐܟܰܠܬܽܘܢ. ܕܡܳܐ ܡܚܰܣܝܳܢܳܐ ܗܰܘ ܕܶܐܫܬܺܝܬܽܘܢ. ܡܩܺܝܡ ܠܟܽܘܢ ܒܓܰܒܳܐ ܕܝܰܡܺܝܢܳܐ܀

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳـܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܇ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܡܢܰܚܡܳܢܳܐ ܬܗܺܝܪܳܐ ܕܰܡܫܰܕܰܪ ܪܽܘܚܶܗ ܒܓܶܠܝܳܢܶܗ ܘܰܡܚܰܕܶܬ ܐܰܦܶܝ̈ܗ̇ ܕܰܐܪܥܳܐ ܒܡܶܐܬܺܝܬܶܗ. ܘܰܡܢܰܚܶܡ ܠܡܺܝ̈ܬܶܐ ܒܝܰܕ ܩܳܠܶܗ: ܘܰܡܩܺܝܡ ܠܰܩܒܺܝܪ̈ܶܐ ܒܦܽܘܩܕܳܢܶܗ. ܘܡܰܠܒܶܫ ܠܗܽܘܢ ܫܽܘܒܚܳܐ ܒܨܶܒܝܳܢܶܗ. ܘܡܰܥܛܶܦ ܠܗܽܘܢ ܠܳܐ ܡܳܝܽܘܬܽܘܬܳܐ ܒܛܰܝܒܽܘܬܶܗ. ܘܰܡܥܰܠܶܐ ܠܕܳܚ̈ܠܰܘܗܝ ܠܪܰܘܡܳܐ ܕܡܰܠܟܽܘܬܶܗ. ܘܡܰܥܶܠ ܠܗܽܘܢ ܠܰܓܢܽܘܢܳܐ ܕܓܰܐܝܽܘܬܶܗ. ܘܡܰܕܢܰܚ ܠܗܽܘܢ ܢܽܘܗܪܳܐ ܕܦܰܪܨܽܘܦܶܗ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܥܽܘܦܳܝܳܗ̇ ܕܚܳܬܰܢ (ܦܠܢܝܬ) ܕܥܶܢܕܰܬ ܡܫܰܡܠܶܝܢܰܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܣܶܕܪܳܐ

ܪܺܝܫܳܐ ܕܚܰܝ̈ܶܐ ܘܡܳܪܳܐ ܕܡܺܝ̈ܬܶܐ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܰܘ ܕܶܐܫܬܰܘܕܺܝܬ ܒܡܽܘܠ̈ܟܳܢܶܐ ܕܺܝܠܳܟ ܠܳܐ ܕܰܓ̈ܳܠܶܐ ܘܶܐܡܰܪܬ ܕܟܽܠ ܕܰܡܗܰܝܡܶܢ ܒܺܝ܇ ܐܳܦܶܢ ܢܡܽܘܬ ܢܺܚܶܐ: ܘܶܐܢܳܐ ܐܰܩܺܝܡܺܝܘܗܝ ܒܝܰܘܡܳܐ ܐ̱ܚܪܳܝܳܐ: ܕܶܐܢܳܐ ܐ̱ܢܳܐ ܢܽܘܚܳܡܳܐ ܘܚܰܝ̈ܶܐ ܘܦܳܪܽܘܩܳܐ ܕܟܽܠ ܢܰܦܫܳܐ ܕܒܺܝ ܛܳܦܣܳܐ ܡܶܬܓܰܘܣܳܐ ܘܛܳܦܣܳܐ: ܩܰܒܶܠ ܡܳܪܝ ܗܳܫܳܐ ܒܰܣܺܝܡܳܐܺܝܬ ܘܰܐܢܺܝܚ ܘܠܰܒܶܒ ܚܰܒܺܝܒܳܐܺܝܬ ܘܒܰܝܰܐ ܪܶܚܡܰܬ ܐ̱ܢܳܫܳܐܺܝܬ ܠܢܰܦܫܳܗ̇ ܕܰܐܡܬܳܟ ܗܳܕܶܐ (ܦܠܢܝܬ) ܕܫܶܟܒܰܬ ܘܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܐܰܓܗܝܰܬ: ܦܰܨܳܗ̇ ܒܽܐܘܪܚܳܐ ܕܰܠܘܳܬܳܟ ܐܳܬܝܳܐ: ܡܶܢ ܣܺܝܥܬܳܐ ܠܗܺܝܩܰܕ ܠܰܐܒܕܳܢܳܐ ܕܥܰܘ̈ܳܠܶܐ: ܗܳܠܶܝܢ ܕܰܒܡܰܥܒܪ̈ܳܬܳܐ ܕܚܺܝ̈ܠܳܬܳܐ ܕܒܳܐܐܰܪ ܠܢܰܦ̈ܫܳܬܰܢ ܟܰܡܺܝܢܺܝܢ ܕܰܢܨܽܘܕܽܘܢ: ܘܗܰܕܳܗ̇ ܒܝܰܕ ܡܰܠܰܐܟ̈ܶܐ ܡܫܰܝ̈ܢܶܐ ܠܘܳܬ ܐܰܘܳܢ̈ܶܐ ܛܽܘ̈ܒܬܳܢܶܐ ܕܩܰܕܺܝ̈ܫܰܝܟ. ܐܺܝܢ ܐܰܠܳܗܳܐ ܩܰܕܺܝܫܳܐ ܚܰܘܳܐ ܚܢܳܢܳܟ ܨܶܝܕ ܐܰܡܬܳܟ. ܦܳܪܽܘܩܶܝܗ̇ ܕܗܰܝܡܢܰܬ ܒܳܟ. ܘܠܳܐ ܬܶܟܦܽܘܪ ܒܳܗ̇ ܘܠܳܐ ܒܗܳܢܽܘܢ ܕܰܐܘܕܺܝܘ ܒܳܟ ܘܰܣܓܶܕܘ ܠܰܨܠܺܝܒܳܟ. ܘܰܫܩܰܠܘ ܦܰܓܪܳܟ ܘܰܕܡܳܟ ܪܰܗܒܽܘܢܳܐ ܕܚܰܝ̈ܶܐ ܚܰܕ̈ܬܶܐ. ܐܺܝܢ ܐܰܠܳܗܳܐ ܒܰܣܺܝܡܳܐ ܠܳܐ ܬܰܫܠܰܚ ܠܰܐܡܬܳܟ ܗܳܕܶܐ ܐܶܣܛܠܳܐ ܕܢܽܘܗܪܳܐ ܘܛܰܒܥܳܐ ܕܡܽܘܪܽܘܢ ܕܰܒܡܰܥܡܽܘܕܺܝܬܳܐ ܝܰܗܒܬ ܠܳܗ̇. ܠܳܐ ܬܰܫܡܰܥ ܠܳܗ̇ ܒܰܪ̱ܬ ܩܳܠܳܐ ܙܥܺܝܦܬܳܐ ܗܳܝ ܕܕܳܚܩܳܐ ܠܗܰܠ ܡܶܢ ܕܽܘܝܳܪܳܐ ܕܡܰܠܟܽܘܬܳܟ. ܠܳܐ ܬܡܺܝܬܶܝܗ̇ ܡܰܘܬܳܐ ܬܶܢܝܳܢܳܐ ܗܰܘ ܕܳܐܡܰܪ: ܕܙܶܠܝ ܠܶܟܝ ܠܳܐ ܝܳܕܰܥ ܐ̱ܢ̣ܳܐ ܠܶܟܝ. ܕܗܳܢܳܐ ܡܰܘܬܳܐ ܫܶܢܬܳܐ ܐܺܝܬܰܘܗܝ ܠܰܡܗܰܝ̈ܡܢܶܐ. ܐܶܠܳܐ ܗܳܫܳܐ ܡܳܪܝܳܐ. ܚܰܣܳܐ ܒܽܘܨܳܪ̈ܶܝܗ̇ ܨܶܒܝܳܢܳܝ̈ܶܐ ܘܠܳܐ ܨܶܒܝܳܢܳܝ̈ܶܐ ܛܰܟܶܣܶܝܗ̇ ܒܰܠܡܺܐܢܳܐ ܕܦܽܘܪܩܳܢܳܐ ܕܺܝܠܳܟ ܥܰܡ ܟܽܠܗܶܝܢ ܢܰܦ̈ܫܳܬܳܐ ܕܰܒܬܽܘ̈ܠܳܬܳܐ ܚܰܟܺܝ̈ܡܳܬܳܐ. ܘܠܰܢ ܚܰܛܳܝ̈ܶܐ ܕܰܗܘܰܝܢܰܢ ܠܳܟ ܡܦܺܝ̈ܣܳܢܶܐ ܚܠܳܦܶܝܗ̇: ܚܰܝܶܠ ܘܥܰܕܰܪ ܠܰܢ ܠܘܳܬ ܕܽܘܒܳܪ̈ܶܐ ܟܢܺܝ̈ܟܶܐ ܘܗܽܘ̈ܦܳܟܶܐ ܩܰܕܺܝ̈ܫܶܐ. ܘܛܰܝܶܒ ܘܥܰܬܶܕ ܠܰܢ ܠܡܰܦܩܳܢܳܐ ܠܳܐ ܥܕܺܝܠܳܐ. ܘܰܠܫܽܘܠܳܡܳܐ ܫܰܦܺܝܪܳܐ. ܘܫܰܘܙܶܒ ܠܰܢ ܡܶܢ ܦܶܓ̈ܥܶܐ ܡܰܟܝܳܢ̈ܶܐ ܘܳܐܐܰܪ̈ܳܝܶܐ. ܘܣܰܬܰܪ ܠܰܢ ܬܚܶܝܬ ܐܶܒܪ̈ܶܐ ܕܛܰܝܒܽܘܬܳܟ. ܘܡܰܢܰܥ ܠܰܢ ܠܰܐܘܨܪ̈ܶܐ ܕܚܰܕ̈ܘܳܬܳܐ ܗܳܠܶܝܢ ܕܪ̈ܰܚܺܝܩܺܝܢ ܡܶܢ ܥܳܩ̈ܳܬܳܐ ܘܬܶܢ̈ܚܳܬܳܐ. ܘܰܒܝܰܘܡܳܟ ܪܰܒܳܐ ܗܰܘ ܐ̱ܚܪܳܝܳܐ ܘܩܰܕܡܳܝܳܐ. ܡܳܐ ܕܫܽܘܠܳܡܳܐ ܠܥܳܠܡܳܐ ܗܳܢܳܐ ܥܒܶܕ ܐܰܢ̱ܬ. ܘܫܽܘܪܳܝܳܐ ܠܥܳܠܡܳܐ ܕܺܝܠܳܟ ܥܳܠܡܺܝܢܳܝܳܐ. ܐܰܦܓܰܥ ܒܟܽܠܰܢ ܦܽܘܪܩܳܢܳܟ. ܚܰܕܳܐ ܠܟܽܠܰܢ ܒܦܰܪܨܽܘܦܳܟ. ܐܰܣܡܶܟ ܠܟܽܠܰܢ ܒܓܰܒܳܐ ܕܝܰܡܺܝܢܳܟ. ܪܥܺܝ ܟܽܠܰܢ ܒܡܰܪ̈ܓܶܐ ܕܥܽܘܫܢܳܟ. ܦܰܛܶܡ ܠܟܽܠܰܢ ܡܶܢ ܕܰܗܺܝܢܽܘܬܶܗ ܕܒܰܝܬܳܟ. ܥܰܡ ܟܽܠܗܽܘܢ ܦܪ̈ܺܝܩܶܐ ܣܕܺܝܪ̈ܰܝ ܒܚܰܓܳܟ. ܒܛܰܝܒܽܘܬܳܟ ܘܰܒܪܶܚܡܰܬ ܐ̱ܢܳܫܽܘܬܶܗ ܕܰܐܒܽܘܟ ܣܰܓܺܝ ܪ̈ܰܚܡܶܐ. ܘܰܕܪܽܘܚܳܟ ܡܰܚܝܳܢܳܐ ܕܰܡܗܰܝ̈ܡܢܶܐ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠ̈ܡܺܝܢ ܐܰܡܺܝܢ܀

ܩܳܠܳܐ: ܩܽܘܩܳܝܳܐ
ܒܪܶܟܢܳܐ ܫܒܺܝܥܳܝܳܐ

ܡܺܝܬܰܬ ܣܰܪܳܐ ܐܰܝܟ ܕܰܟܬܺܝܒ ܒܰܐܪܥܳܐ ܕܰܟܢܰܥܢ. ܘܰܐܒܪܳܗܳܡ ܘܺܐܝܣܚܳܩ ܠܰܘܝܽܘܗ̇ ܒܣܰܝܒܽܘܬܳܐ ܛܳܒܬܳܐ. ܘܗܳܕܶܐ ܐܰܡܬܳܟ ܕܫܶܟܒܰܬ ܥܰܠ ܣܰܒܪܳܟ. ܗܳܐ ܡܶܬܠܰܘܝܳܐ: ܒܡ̈ܶܠܶܐ ܕܪܽܘܚ ܩܽܘܕܫܳܐ. ܕܰܒܝܰܘܡܳܐ ܕܗܳܘܶܐ ܕܺܝܢܳܐ ܕܦܳܣܺܝ̈ܩܳܬܳܐ: ܡܶܢ ܝܰܡܺܝܢܳܟ ܬܶܩܥܶܐ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܥܰܡ ܟܺܐܢ̈ܶܐ ܕܪܰܚܡܽܘܟ܀

ܫܽܘܒܚܳܐ: ܠܳܐ ܬܶܟܪܶܐ ܠܶܟܝ ܒܰܪ̱ܬ ܚܰܘܳܐ ܕܡܰܘܬܳܐ ܣܰܪܗܶܒ ܥܠܰܝܟܝ: ܕܗܳܢ ܟܳܣܳܐ ܛܳܒ̈ܶܐ ܘܒܺܝ̈ܫܶܐ ܫܳܬܶܝܢ ܠܶܗ ܘܥܳܒܪܺܝܢ. ܡܰܝ̈ܳܐ ܚܰܝ̈ܶܐ: ܘܰܕܡܳܐ ܡܚܰܣܝܳܢܳܐ. ܗܳܢܽܘܢ ܕܰܪܕܰܘ: ܡܶܢ ܕܰܦܢܶܗ ܕܡܳܪܰܢ. ܗܶܢܽܘܢ ܢܶܟܠܽܘܢ ܓܰܘܙܰܠܬܳܐ ܡܶܢ ܗܰܕܳܡܰܝ̈ܟܝ̱. ܘܬܶܣܒܺܝܢ ܫܽܘܒܩܳܢܳܐ ܘܬܶܩܥܶܝܢ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܡܢܰܚܡܳܢܳܐ ܕܡܺܝ̈ܬܶܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܟܳܗܢܳܐ: ܒܶܝܬ ܓܰܘܣܳܐ ܕܚܽܘܣܳܝܳܐ ܘܰܠܡܺܐܢܳܐ ܕܫܽܘܒܩܳܢܳܐ ܘܓܰܙܳܐ ܕܥܽܘܕܪ̈ܳܢܶܐ ܘܰܕܛܳܒ̈ܳܬܳܐ ܡܳܪܝܳܐ. ܐܰܢ̱ܬ ܒܪܶܚܡܰܬ ܐ̱ܢܳܫܽܘܬܳܟ ܩܰܒܶܠ ܠܥܶܛܪܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ. ܘܫܰܟܶܢ ܒܶܗ ܚܢܳܢܳܐ ܘܚܽܘܣܳܝܳܐ ܘܒܽܘܣܳܡܳܐ ܠܢܰܦ̈ܫܳܬܳܐ ܘܪ̈ܽܘܚܳܬܳܐ ܕܡܶܛܽܠܳܬܗܶܝܢ ܐܶܬܩܰܪܰܒ. ܘܒܽܘܝܳܐܳܐ ܘܥܽܘܕܪܳܢܳܐ ܠܰܐܝܠܶܝܢ ܕܰܚܠܳܦܰܝܗܽܘܢ ܦܪܰܫܘ ܘܫܰܡܠܺܝܘ. ܘܡܳܐ ܕܡܶܬܓܠܶܐ ܢܺܝܫܳܐ ܕܰܐܠܳܗܽܘܬܳܟ. ܐܰܡܬܳܟ ܘܣܳܓܽܘܕܬܳܟ (ܦܠܢܝܬ) ܕܫܶܟܒܰܬ ܥܰܠ ܣܰܒܪܳܟ ܬܩܽܘܡ ܡܶܢ ܝܰܡܺܝܢܳܟ ܘܬܶܚܙܶܐ ܚܢܳܢܳܟ ܘܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܰܕܪ̈ܳܫܶܐ ܒܩܳܠܳܐ: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܛܽܘܒܰܘܗܝ ܠܡܰܢ ܕܰܙܟ̣ܳܐ ܒܝܽܘܡ ܕܺܝܢܳܐ: ܝܶܫܽܘܥ ܕܰܝܳܢܳܐ ܕܕܰܝܳܢ̈ܶܐ܀

ܚܰܘܳܐ ܒܡܶܐܟܽܘܠܬܳܗ̇ ܕܡܶܢ ܦܺܐܪܳܐ: ܡܰܘܬܳܐ ܥܰܠ ܟܽܠ ܐ̱ܢܳܫ ܐܶܫܬܰܠܰܛ. ܟܽܠ ܕܳܪ̈ܺܝܢ ܡܰܥܒܰܪ ܠܰܚܒܳܠܳܐ: ܠܛܳܒ̈ܶܐ ܘܰܠܒܺܝ̈ܫܶܐ ܗܽܘ ܕܳܒܰܪ: ܒܪܺܝܟ ܕܡܰܥܒܰܪ ܬܳܓܶܗ ܘܫܽܘܠܛܳܢܶܗ܀

ܚܰܘܳܐ ܛܥܳܬ ܒܰܥܕܶܝܢ ܡܶܢ ܒܺܝܫܳܐ: ܘܰܐܛܥܝܰܬܶܗ ܠܳܐܕܳܡ ܒܝܰܕ ܡܶܠܟܳܗ̇. ܣܚܰܦܬܶܗ ܠܫܰܦܺܝܪܳܐ ܘܰܢܦܰܠ ܗ̱ܘܳܐ: ܘܥܺܝܪ̈ܶܐ ܛܪܰܦܘ ܓܶܦ̈ܶܐ ܥܰܠ ܙܰܘܥܶܗ: ܒܪܺܝܟ ܕܰܢܚܶܬ ܦܰܪܩܶܗ ܡܶܢ ܡܰܘܬܳܐ܀

ܐܚܪܺܢܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܒܪܺܝܟ ܗܽܘ ܡܫܺܝܚܳܐ: ܕܰܡܢܰܚܶܡ ܠܥܰܢܺܝ̈ܕܶܐ. ܘܡܰܠܒܶܫ ܫܽܘܒܚܳܐ. ܠܦܰܓܪ̈ܰܝܗܽܘܢ ܒܢܽܘܚܳܡܳܐ܀

ܒܰܪܬܳܗ̇ ܕܚܰܘܳܐ: ܗܳܐ ܒܶܟܝܳܐ ܡܙܰܡܢܳܐ ܠܰܢ. ܘܝܽܘܡ ܥܽܘܢܕܳܢܳܗ̇: ܗܳܐ ܚܰܫܳܐ ܡܰܠܒܶܫ ܠܰܢ. ܫܒܽܘܩ ܚܰܘ̈ܒܶܝܗ̇ ܘܚܰܣܳܐ ܒܽܘܨܳܪ̈ܶܝܗ̇: ܘܡܰܢܰܥܶܝܗ̇ ܠܰܓܢܽܘܢ ܚܰܕܘ̈ܳܬܳܐ. ܕܬܺܐܙܰܠ ܓܶܝܪ ܘܬܶܬܒܰܣܰܡ: ܥܰܡ ܟܺܐܢ̈ܶܐ ܘܙܰܕܺܝ̈ܩܶܐ܀

ܡܶܢ ܫܽܘܪܳܝܳܐ: ܥܰܠ ܡܰܘܬܳܐ ܥܰܠ ܓܶܢܣܰܢ. ܒܝܰܕ ܫܽܘܕܳܠܳܐ ܗܰܘ ܕܰܗܘܳܐ ܡܶܢ ܐܰܢ̱ܬܬܳܐ. ܘܰܒܚܰܪܰܬ ܙܰܒܢ̈ܶܐ ܐܶܫܬܪܺܝ ܗ̱ܘܳܐ. ܐܶܣܳܪܳܐ ܕܰܗܘܳܐ ܡܶܢ ܐܰܢ̱ܬܬܳܐ. ܒܝܰܕ ܡܰܪܝܰܡ ܒܰܪ̱ܬ ܕܰܘܺܝܕ: ܕܝܶܠܕܰܬ ܠܰܢ ܢܽܘܚܳܡܳܐ܀

ܐܚܪܺܢܳܐ ܒܩ̄: ܢܚܰܕܬܺܝܘܗܝ ܢܽܘܚܳܡܳܐ

ܥܽܘܢܺܝܬܳܐ: ܢܚܰܕܬܺܝܘܗܝ ܢܽܘܚܳܡܳܐ: ܡܫܺܝܚܳܐ ܐܰܠܳܗܳܐ. ܠܰܐܡܬܳܟ ܘܣܳܓܽܘܕܬܳܟ. ܕܫܶܟܒܰܬ ܥܰܠ ܣܰܒܪܳܟ. ܘܬܶܪܘܰܙ ܒܡܰܠܟܽܘܬܳܐ܀

ܝܰܘܡܳܐ ܕܥܽܘܢܕܳܢܳܐ. ܝܰܘܡܰܐ ܗ̱ܘ ܡܰܪܺܝܪܳܐ. ܝܰܘܡܰܐ ܗ̱ܘ ܡܒܰܟܶܐ ܟܽܠ. ܝܰܘܡܰܐ ܗ̱ܘ ܡܰܟܡܰܪ ܟܽܠ. ܢܶܙܟܶܝܘܗܝ ܡܳܪܝ ܝܰܘܡܳܟ܀

ܝܰܘܡܳܐ ܕܦܶܪܫܰܬ ܒܶܗ: ܐܰܢ̱ܬܬܳܐ ܡܶܢ ܒܰܝܬܳܗ̇. ܗܳܐ ܟܦܶܐ ܐܳܦ ܐܰܫܺܝܕ: ܕܶܐܒܰܕ ܛܽܘܟܳܣܶܗ: ܒܳܟ ܡܳܪܝ ܢܶܬܛܰܟܰܣ܀

ܒܒܰܝܬܳܗ̇ ܗܰܠ̈ܟܳܬܳܗ̇: ܪ̈ܳܗܛܳܢ ܕܠܳܐ ܫܶܠܝܳܐ. ܒܽܐܘܪܚܳܐ ܕܰܠܩܰܒܪܳܐ ܐ̱ܚܪ̈ܳܢܶܐ ܡܰܘܒܠܺܝܢ ܠܳܗ̇: ܢܒܰܝܐܺܝܗ̇ ܒܽܘܣܳܡܳܟ܀

ܐܚܪܺܢܳܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ

ܡܳܐ ܦܐܶܐ ܥܽܘܢܕܳܢܶܟܝ: ܘܰܡܠܶܐ ܫܽܘܦܪ̈ܶܐ ܪ̈ܽܘܚܳܢܶܐ. ܒܰܫܡܳܐ ܫܰܦܺܝܪܳܐ: ܒܥܳܠܡܳܐ ܗܳܢܳܐ ܐܶܨܛܰܒܰܬܬܝ. ܘܰܒܝܰܘܡܳܐ ܕܡܰܘܬܶܟܝ: ܚܳܕܶܝܢ ܥܺܝܪ̈ܶܐ ܒܢܰܝ̈ ܢܽܘܗܪܳܐ. ܕܥܰܡܗܽܘܢ ܡܶܬܚܰܠܛܰܬܝ: ܒܝܰܘܡܳܐ ܪܰܒܳܐ ܕܢܽܘܚܳܡܳܐ܀

ܒܰܥ̈ܒܳܕܶܐ ܛܳܒ̈ܶܐ: ܒܟܽܠܗܽܘܢ ܝܰܘܡܰܝ̈ܟܝ ܐܶܬܕܰܒܰܪܬܝ. ܘܶܐܠܦܶܟܝ ܐܶܬܡܰܢܥܰܬ: ܠܰܠܡܺܐܢܳܐ ܕܢܰܘܚܳܐ ܘܫܰܝܢܳܐ. ܘܢܰܦܫܶܟܝ ܗܳܐ ܪܳܘܙܳܐ: ܒܰܐܘܳܢܳܐ ܕܰܡܠܶܐ ܢܽܘܗܪܳܐ. ܕܒܶܗ ܢܳܣܒܰܬܝ ܐܰܓܪܳܐ: ܘܰܟܠܺܝܠ ܫܽܘܒܚܳܐ ܕܠܳܐ ܚܳܡܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ

ܠܰܐܡܬܳܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ: ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܰܝܟ܀

ܚܽܘܣ ܥܰܠ ܨܰܠܡܳܐ ܕܨܺܝܪ ܒܶܗ ܨܰܠܡܳܟ ܒܰܪ ܐܰܠܳܗܳܐ: ܘܰܐܚܕܰܪ ܗܰܒ ܠܶܗ ܫܽܘܦܪܶܗ ܩܰܕܡܳܐ ܐܰܝܟ ܕܰܒܪܰܝܬܳܝܗܝ. ܨܰܠܡܳܟ ܐܺܝܬܰܘܗܝ ܚܰܕܶܬ ܨܰܠܡܳܟ ܕܶܐܬܚܰܒܰܠ ܠܶܗ: ܘܰܩܪܺܝܘܗܝ ܣܳܠܶܩ ܠܰܐܬܪܳܐ ܕܚܰܝ̈ܶܐ ܕܗܽܘܝܽܘ ܐܰܬܪܶܗ܀

ܢܶܗܘܶܐ ܢܝܳܚܳܐ ܠܟܽܠ ܡܰܢ ܕܰܫܟܶܒ ܒܗܰܝܡܳܢܽܘܬܳܐ: ܘܢܶܬܒܰܣܡܽܘܢ ܡܳܪܝ ܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ. ܥܰܡ ܓܰܝܳܣܳܐ ܕܰܐܘܕܺܝ ܘܠܳܐ ܟܦܰܪ ܒܰܐܠܳܗܽܘܬܳܟ: ܢܶܥܠܽܘܢ ܐܰܟܚܰܕ ܠܰܓܢܽܘܢ ܢܽܘܗܪܳܐ ܡܠܶܐ ܚܰܕ̈ܘܳܬܳܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ: ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܙܽܘܡܳܪܳܐ:

ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܪܽܘܚܩܽܘܕܫܳܐ ܒܕܰܘܺܝܕ ܙܶܡܪܰܬ܀

ܩܶܪ̈ܝܳܢܶܐ
ܡܶܢ ܣܶܦܪܳܐ ܩܰܕܡܳܝܳܐ ܕܽܐܘܪܳܝܬܳܐ (ܕܰܒܪܺܝܬܳܐ)
ܟܓ: ܐ – ܟ Genesis 23:1-20

ܘܰܗܘܰܘ ܚܰܝܶܝ̈ܗ̇ ܕܣܰܪܳܐ ܡܳܐܐ ܘܥܶܣܪܺܝܢ ܘܰܫܒܰܥ ܫܢܺܝ̈ܢ: ܫܢܰܝ̈ܳܐ ܕܰܚܝܳܬ ܣܰܪܳܐ. ܘܡܺܝܬܰܬ ܣܰܪܳܐ ܒܩܽܘܪܝܰܬ ܓܰܢ̱ܒܳܖ̈ܶܐ: ܗܺܝ ܗܺܝ ܚܶܒܪܽܘܢ ܕܒܰܐܪܥܳܐ ܕܰܟܢܰܥܢ: ܘܶܐܬܳܐ ܐܰܒܪܳܗܳܡ ܠܡܰܪܩܳܕܽܘ ܥܰܠ ܣܰܪܳܐ ܘܰܠܡܶܒܟܝܳܗ̇. ܘܩܳܡ ܐܰܒܪܳܗܳܡ ܡܶܢ ܩܕܳܡ ܡܺܝܬܬܶܗ: ܘܡܰܠܶܠ ܥܰܡ ܒܢܰܝ̈ ܚܺܝܬ ܘܶܐܡܰܪ ܠܗܽܘܢ. ܥܳܡܽܘܪܳܐ ܐ̱ܢܳܐ ܘܬܰܘܬܳܒܳܐ ܥܰܡܟܽܘܢ. ܗܰܒܘ ܠܺܝ ܝܳܪܬܽܘܬܳܐ ܕܩܰܒܪܳܐ ܥܰܡܟܽܘܢ: ܘܶܐܩܒܽܘܪ ܡܺܝܬܰܬܝ ܡܶܢ ܩܕܳܡܰܝ. ܘܰܥܢܰܘ ܒܢܰܝ̈ ܚܺܝܬ ܘܶܐܡܰܪܘ ܠܰܐܒܪܳܗܳܡ. ܫܡܰܥܰܝܢ ܡܳܪܰܢ: ܪܰܒܳܐ ܐܰܢ̱ܬ ܕܰܐ‌ܠܳܗܳܐ ܒܰܝܢܳܬܰܢ: ܒܓܶܒܝܳܐ ܕܩܰܒܖ̈ܰܝܢ ܩܒܽܘܪ ܡܺܝܬܬܳܟ ܐ̱ܢܳܫ ܡܶܢܰܢ ܠܳܐ ܢܶܟܠܶܐ ܩܰܒܪܶܗ ܡܶܢܳܟ ܠܡܶܩܒܰܪ ܡܺܝܬܬܳܟ. ܘܩܳܡ ܐܰܒܪܳܗܳܡ ܘܰܣܓܶܕ ܠܥܰܡܳܐ ܕܰܐܪܥܳܐ ܠܰܒܢܰܝ̈ ܚܺܝܬ: ܘܡܰܠܶܠ ܥܰܡܗܽܘܢ ܘܶܐܡܰܪ ܠܗܽܘܢ. ܐܶܢ ܨܳܒ̈ܝܳܢ ܢܰܦ̈ܫܳܬܟܽܘܢ ܕܶܐܩܒܽܘܪ ܡܺܝܬܰܬܝ ܡܶܢ ܩܕܳܡܰܝ: ܫܽܘܡܥܽܘܢܝ: ܘܰܒܥܰܘ ܠܺܝ ܡܶܢ ܥܶܦܪܽܘܢ ܒܰܪ ܨܳܚܳܪ. ܘܢܶܬܶܠ ܠܺܝ ܡܥܰܪܬܳܐ ܐܰܥܺܝܦܬܳܐ ܕܺܝܠܶܗ ܕܒܰܣܛܰܪ ܚܰܩܠܶܗ ܒܟܶܣܦܳܐ ܫܰܠܡܳܐ ܢܶܬܠܺܝܗ̇ ܠܺܝ ܒܰܝܢܳܬܟܽܘܢ ܠܝܽܘܪܬܳܢܳܐ ܕܩܰܒܪܳܐ. ܘܥܶܦܪܽܘܢ ܝܳܬܶܒ ܒܓܰܘ ܒܢܰܝ̈ ܚܺܝܬ: ܘܰܥܢܳܐ ܥܶܦܪܽܘܢ ܚܺܝܬܳܝܳܐ ܘܶܐܡܰܪ ܠܰܐܒܪܳܗܳܡ ܩܕܳܡ ܒܢܰܝ̈ ܚܺܝܬ ܘܰܩܕܳܡ ܟܽܠ ܥܳܐܠܰܝ̈ ܬܰܪܥܳܐ ܕܰܩܪܺܝܬܶܗ. ܘܶܐܡܰܪ: ܠܳܐ ܡܳܪܝ: ܫܡܰܥܰܝܢܝ: ܚܰܩܠܳܐ ܝܶܗܒܶܬ ܠܳܟ: ܘܰܡܥܰܪܬܳܐ ܕܒܳܗ̇ ܠܳܟ ܝܰܗܒܬܳܗ̇: ܩܕܳܡ ܒܢܰܝ̈ ܥܰܡܝ ܝܰܗܒܬܳܗ̇ ܠܳܟ: ܩܒܽܘܪ ܡܺܝܬܬܳܟ. ܘܰܣܓܶܕ ܐܰܒܪܳܗܳܡ ܩܕܳܡ ܥܰܡܳܐ ܕܰܐܪܥܳܐ. ܘܶܐܡܰܪ ܠܥܶܦܪܽܘܢ ܩܕܳܡ ܥܰܡܳܐ ܕܰܐܪܥܳܐ: ܐܶܢ ܨܳܒܶܐ ܐܰܢ̱ܬ ܫܡܰܥܰܝܢܝ: ܐܶܬܶܠ ܠܳܟ ܟܶܣܦܳܐ ܕܡܰܝ̈ ܚܰܩܠܳܐ ܣܰܒ ܡܶܢܝ: ܘܶܐܩܒܽܘܪ ܡܺܝܬܰܬܝ ܬܰܡܳܢ. ܘܰܥܢܳܐ ܥܶܦܪܽܘܢ ܘܶܐܡܰܪ ܠܰܐܒܪܳܗܳܡ. ܡܳܪܝ ܫܡܰܥܰܝܢܝ: ܐܰܪܥܳܐ ܐܰܪܒܰܥܡܳܐܐ ܐܶܢܽܘܢ ܡܰܬܩ̈ܳܠܺܝܢ ܕܟܶܣܦܳܐ: ܒܰܝ̈ܢܰܝ ܘܠܳܟ ܡܳܢܳܐ ܗ̱ܝ: ܘܡܺܝܬܬܳܟ ܩܒܽܘܪ. ܘܰܫܡܰܥ ܐܰܒܪܳܗܳܡ ܠܥܶܦܪܽܘܢ: ܘܰܬܩܰܠ ܐܰܒܪܳܗܳܡ ܠܥܶܦܪܽܘܢ ܟܶܣܦܳܐ ܕܡܰܠܶܠ ܩܕܳܡ ܒܢܰܝ̈ ܚܺܝܬ: ܐܰܪܒܰܥܡܳܐܐ ܡܰܬܩ̈ܳܠܺܝܢ ܕܟܶܣܦܳܐ ܕܢܳܦܰܩ ܠܬܰܓܳܪܳܐ. ܘܩܳܡܰܬ ܚܰܩܠܳܐ ܕܥܶܦܪܽܘܢ ܕܒܰܐܥܺܝܦܬܳܐ ܕܰܩܕܳܡ ܡܰܡܪܶܐ: ܚܰܩܠܳܐ ܕܰܡܥܰܪܬܳܐ: ܘܰܡܥܰܪܬܳܐ ܕܒܳܗ̇: ܘܟܽܠܗܽܘܢ ܐܺܝ̈ܠܳܢܶܐ ܕܰܒܚܰܩܠܳܐ ܕܒܰܬܚܽܘܡܳܐ ܟܰܕ ܚܳܕܪܳܐ. ܠܰܐܒܪܳܗܳܡ ܐܶܙܕܰܒܰܢܘ ܩܕܳܡ ܒܢܰܝ̈ ܚܺܝܬ: ܘܰܩܕܳܡ ܟܽܠ ܥܳܐܠܰܝ̈ ܬܰܪܥܳܐ ܕܰܩܪܺܝܬܶܗ. ܡܶܢ ܒܳܬܰܪܟܶܢ ܩܒܰܪ ܐܰܒܪܳܗܳܡ ܠܣܰܪܳܐ ܐܰܢ̱ܬܬܶܗ: ܒܰܡܥܰܪܬܳܐ ܕܰܒܚܰܩܠܳܐ ܐܰܥܺܝܦܬܳܐ ܕܰܩܕܳܡ ܡܰܡܪܶܐ: ܗܺܝ ܗ̱ܝ ܚܶܒܪܽܘܢ ܕܒܰܐܪܥܳܐ ܕܰܟܢܰܥܢ. ܘܩܳܡܰܬ ܚܰܩܠܳܐ ܕܰܡܥܰܪܬܳܐ ܘܰܡܥܰܪܬܳܐ ܕܒܳܗ̇: ܠܰܐܒܪܳܗܳܡ ܠܝܽܘܪܬܳܢܳܐ ܕܩܰܒܪܳܐ ܡܶܢ ܠܘܳܬ ܒܢܰܝ̈ ܚܺܝܬ. ܒܰܪܶܟܡܳܪܝ܀

ܩܕܳܡ ܦܪܰܟܣܺܝܣ
ܒܩ̄: ܠܶܟܝ ܢܶܬܟܰܫܰܦ

ܫܠܺܝ̈ܚܶܐ ܓ̣ܒܰܝ̈ܳܐ. ܕܶܐܫܬܰܕܰܪܘ̱ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ. ܘܰܢܦܰܩܘ̱ ܐܰܟ̣ܪܶܙܘ̱. ܣܒܰܪܬ̣ܶܗ ܕܰܒܪܳܐ ܒܶܝܬ̣ ܥܰܡ̱̈ܡܶܐ ܘܥܶܒܪ̈ܶܝܗ̇ ܕܰܐܪܥܳܐ. ܣܰܒܰܪܘ̱ ܗ̱ܘܰܘ ܡܰܠܟܽܘܬ̣ܳܐ ܕܰܫܡܰܝܳܐ ܟܰܕ ܐܳܡܪܺܝܢ ܛܽܘܒܳܐ ܠܰܡܗܰܝܡ̈ܢܶܐ܀

ܡܶܢ ܦܰܪܟܣܺܝܣ ܕܰܫܠܺܝ̈ܚܶܐ ܩܰܕܺܝ̈ܫܶܐ
ܛ: ܠܛ – ܡܓ Acts 9: 36 – 43

ܐܺܝܬ ܗ̱ܘܳܐ ܕܶܝܢ ܬܰܠܡܺܝܕܬܳܐ ܚܕܳܐ ܒܝܳܘܦܺܐ ܡܕܺܝܢ̱ܬܳܐ ܕܰܫܡܳܗ̇ ܗ̱ܘܳܐ ܛܒܺܝܬܳܐ. ܗܳܕܶܐ ܥܰܬܺܝܪܳܐ ܗ̱ܘܳܬ ܒܰܥ̈ܒܳܕܶܐ ܛܳܒ̈ܶܐ܁ ܘܰܒܙܶܕ̈ܩܳܬܳܐ. ܕܥܳܒܕܳܐ ܗ̱ܘܳܬ. ܐܶܬܟܰܪܗܰܬ ܕܶܝܢ ܒܗܽܘܢ ܒܗܳܢܽܘܢ ܝܰܘ̈ܡܳܬܳܐ ܘܡܺܝܬܰܬ܆ ܘܰܐܣܚܝܽܘܗ̇ ܘܣܳܡܽܘܗ̇ ܒܥܶܠܺܝܬܳܐ. ܘܰܫܡܰܥܘ ܗ̱ܘܰܘ ܬܰܠܡܺܝ̈ܕܶܐ ܕܫܶܡܥܽܘܢ ܒܠܽܘܕ ܗ̱ܘ ܡܕܺܝܢ̱ܬܳܐ܆ ܗܳܝ ܕܺܐܝܬܶܝܗ̇ ܥܰܠ ܓܶܢ̱ܒ ܝܳܘܦܺܐ܆ ܘܫܰܕܰܪܘ ܗ̱ܘܰܘ ܠܘܳܬܶܗ ܓܰܒܪ̈ܶܐ ܬܪܶܝܢ ܕܢܶܒܥܽܘܢ ܡܶܢܶܗ܇ ܕܠܳܐ ܬܶܡܰܐܢ ܠܶܗ ܕܢܺܐܬܶܐ ܨܶܐܕ̈ܰܝܗܽܘܢ. ܩܳܡ ܫܶܡܥܽܘܢ ܘܶܐܙܰܠ ܥܰܡܗܽܘܢ. ܘܟܰܕ ܐܶܬܳܐ܁ ܐܰܣܩܽܘܗ̱ܝ ܠܥܶܠܺܝܬܳܐ. ܘܰܟܢܰܫ̈ܝ ܩܳܡ̈ܝ ܠܗܶܝܢ ܚܕܳܪ̈ܰܘܗ̱ܝ ܟܽܠܗܶܝܢ ܐܰܪ̈ܡܠܳܬܳܐ܁ ܟܰܕ ܒܳܟ̈ܝܳܢ ܘܰܡܚܰܘ̈ܝܳܢ ܗܘ̈ܰܝ ܠܶܗ܇ ܟܽܘܬܺܝ̈ܢܝܳܬܳܐ ܘܡܰܪ̈ܛܽܘܛܶܐ. ܗܳܠܶܝܢ ܕܝܳܗܒܳܐ ܗ̱ܘܳܬ ܠܗܶܝܢ ܛܒܺܝܬܳܐ. ܟܰܕ ܚܰܝܳܐ. ܫܶܡܥܽܘܢ ܕܶܝܢ ܐܰܦܶܩ ܠܟܽܠܗܽܘܢ ܐ̱ܢܳܫ̈ܳܐ ܠܒܰܪ܆ ܘܰܩܥܰܕ ܥܰܠ ܒܽܘܪ̈ܟܰܘܗ̱ܝ ܘܨܰܠܺܝ. ܘܶܐܬܦܢܺܝ ܠܘܳܬ ܫܠܰܕܳܐ ܘܶܐܡܰܪ. ܛܒܺܝܬܳܐ܆ ܩܽܘܡܝ. ܗܺܝ ܕܶܝܢ ܦܶܬܚܰܬ ܥܰܝ̈ܢܶܝܗ̇. ܘܟܰܕ ܚܙܳܬܶܗ ܠܫܶܡܥܽܘܢ ܝܶܬܒܰܬ. ܘܰܐܘܫܶܛ ܠܳܗ̇ ܐܺܝܕܶܗ ܘܰܐܩܺܝܡܳܗ̇. ܘܰܩܪܳܐ ܠܩܰܕܺܝ̈ܫܶܐ ܘܠܰܐܪ̈ܡܠܳܬܳܐ. ܘܝܰܗܒܳܗ̇ ܠܗܽܘܢ ܟܰܕ ܚܰܝܳܐ. ܘܶܐܬܝܰܕܥܰܬ ܗܳܕܶܐ ܒܟܽܠܳܗ̇ ܡܕܺܝܢ̱ܬܳܐ. ܘܣܰܓܺܝ̈ܶܐܐ ܗܰܝܡܶܢܘ ܒܡܳܪܰܢ. ܗܘܳܐ ܕܶܝܢ ܒܳܗ̇ ܒܝܳܘܦܺܐ ܝܰܘ̈ܡܳܬܳܐ ܠܳܐ ܙܥܽܘܪ̈ܺܝܢ܆ ܟܰܕ ܫܪܶܐ ܗ̱ܘܳܐ ܒܶܝܬ ܫܶܡܥܽܘܢ ܒܽܘܪܣܳܝܳܐ. ܒܰܪܶܟܡܳܪܝ܀

ܩܕܳܡ ܫܠܺܝܚܳܐ
ܒܩ̄: ܛܽܘܒܰܝܟܝ ܥܺܕܬܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ̣ ܕܳܐܡܰܪ: ܥܰܠ ܐܰܝܠܶܝܢ ܕܕܳܡܟܺܝܢ ܐܰܚܰܝ̈: ܨܳܒܶܐ ܐܢܳܐ ܕܠܳܐ ܬܶܟܪܶܐ ܠܟܽܘܢ: ܕܰܒܩܳܠ ܩܰܪܢܳܐ ܡܶܢ ܪܰܘܡܳܐ: ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ: ܠܳܒܶܫ ܗܳܢܳܐ ܕܡܶܬܚܰܒܰܠ: ܠܰܕܠܳܐ ܒܳܠܳܐ ܘܡܶܬܚܰܒܰܠ: ܕܪܰܗܒܽܘܢܳܐ ܕܚܰܝ̈ܶܐ ܩܰܒܶܠ: ܦܰܓܪܶܗ ܘܰܕܡܶܗ ܕܰܡܫܺܝܚܳܐ܀

ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܢܢ ـ ܢܚ 1Corinthians 15:50-58

ܗܳܕܶܐ ܕܶܝܢ ܐܳܡܰܪ ܐ̱ܢܳܐ ܐܰܚܰܝ̈܆ ܕܒܶܣܪܳܐ ܘܰܕܡܳܐ ܡܰܠܟܽܘܬܳܐ ܕܰܫܡܰܝܳܐ ܠܡܺܐܪܰܬ ܠܳܐ ܡܶܫܟܚܺܝܢ. ܘܠܳܐ ܚܒܳܠܳܐ ܝܳܪܶܬ ܠܳܐ ܡܶܬܚܰܒܠܳܢܽܘܬܳܐ܀ ܗܳܐ ܐܳܡܰܪ ܐ̱ܢܳܐ ܠܟܽܘܢ ܐ̱ܪܳܙܳܐ. ܠܰܘ ܟܽܠܰܢ ܢܶܕܡܰܟ܆ ܟܽܠܰܢ ܕܶܝܢ ܢܶܬܚܰܠܰܦ܇ ܚܰܪܺܝܦܳܐܺܝܬ ܐܰܝܟ ܪܦܳܦ ܥܰܝܢܳܐ ܒܩܰܪܢܳܐ ܐ̱ܚܪܳܝܬܳܐ ܟܰܕ ܬܶܩܪܶܐ܆ ܘܰܢܩܽܘܡܽܘܢ ܡܺܝ̈ܬܶܐ ܕܠܳܐ ܚܒܳܠܳܐ. ܘܰܚܢܰܢ ܢܶܬܚܰܠܰܦ .ܥܬܺܝܕ ܗ̱ܘ ܓܶܝܪ ܗܳܢܳܐ ܕܡܶܬܚܰܒܰܠ܁ ܕܢܶܠܒܰܫ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ܁ ܕܢܶܠܒܰܫ ܠܳܐ ܡܳܝܽܘܬܽܘܬܳܐ .ܡܳܐ ܕܠܳܒܶܫ ܕܶܝܢ ܗܳܢܳܐ ܕܡܶܬܚܰܒܰܠ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ ܠܳܐ ܡܳܝܽܘܬܽܘܬܳܐ܆ ܗܳܝܕܶܝܢ ܬܶܗܘܶܐ ܡܶܠܬܳܐ ܗܳܝ ܕܰܟܬܺܝܒܳܐ܇ ܕܶܐܬܒܠܰܥ ܡܰܘܬܳܐ ܒܙܳܟܽܘܬܳܐ .ܐܰܝܟܰܘ ܥܽܘܩܣܳܟ܁ ܡܰܘܬܳܐ؟ ܐܰܘ ܐܰܝܟܳܐ ܗ̱ܝ ܙܳܟܽܘܬܶܟܝ ܫܝܽܘܠ؟ ܥܽܘܩܣܶܗ ܕܶܝܢ ܕܡܰܘܬܳܐ ܚܛܺܝܬܳܐ ܗ̱ܝ. ܘܚܰܝܠܳܐ ܕܰܚܛܺܝܬܳܐ ܢܳܡܽܘܣܰܐ ܗ̱ܘ .ܛܰܝܒܽܘ ܕܶܝܢ ܠܰܐܠܳܗܳܐ܆ ܕܝܰܗ̱ܒ ܠܰܢ ܙܳܟܽܘܬܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ܀ ܡܶܟܺܝܠ ܐܰܚܰܝ̈ ܘܚܰܒܺܝ̈ܒܰܝ܆ ܗܘܰܘ ܡܫܰܪܪܺܝܢ. ܘܠܳܐ ܬܶܗܘܽܘܢ ܡܶܬܬܙܺܝܥܺܝܢ܇ ܐܶܠܳܐ ܗܘܰܘ ܡܶܬܝܰܬܪܺܝܢ ܒܟܽܠܙܒܰܢ ܒܰܥܒܳܕܶܗ ܕܡܳܪܝܳܐ. ܟܰܕ ܝܳܕܥܺܝܢ ܐܢ̱ܬܽܘܢ܆ ܕܥܰܡܠܟܽܘܢ ܠܳܐ ܗ̱ܘܳܐ ܣܪܺܝܩ ܒܡܳܪܝܳܐ. ܒܰܪܶܟܡܳܪܝ܀

ܗܽܘܠܳܠܳܐ:

ܐܰܢܗܰܪ ܐܰܦܰܝ̈ܟ ܥܰܠ ܐܰܡܬܳܟ. ܘܰܦܪܽܘܩܶܝܗ̇ ܒܝܰܕ ܛܰܝܒܽܘܬܳܟ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ. ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܽܘܬ ܘܢܶܫܡܰܥ ܠܰܣܒܰܪܬܳܐ ܕܡ̈ܶܠܶܐ ܚܰܝ̈ܳܬܳܐ ܕܶܐܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ (ܟܳܪܽܘܙܽܘܬܳܐ) ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ (ܡܰܬܰܝ ܫܠܺܝܚܳܐ ܕܡܰܟܪܶܙ) ܚܰܝ̈ܳܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ. ܬܶܫܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ. ܘܥܰܠ ܟܽܠܰܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܟ:ܟܙ - ܠܚ Luke 20:27-38

ܩܪܶܒܘ ܕܶܝܢ ܐ̱ܢܳܫܺܝ̈ܢ ܡܶܢ ܙܰܕܽܘ̈ܩܳܝܶܐ܇ ܗܳܢܽܘܢ ܕܳܐܡܪܺܝܢ ܕܰܩܝܳܡܬܳܐ ܠܰܝܬ. ܘܫܰܐܠܽܘܗ̱ܝ. ܘܳܐܡܪܺܝܢ ܠܶܗ. ܡܰܠܦܳܢܳܐ܆ ܡܽܘܫܶܐ ܟܬܰܒ ܠܰܢ܆ ܕܶܐܢ ܐ̱ܢܳܫ ܢܡܽܘܬ ܐܰܚܽܘܗ̱ܝ ܕܺܐܝܬ ܠܶܗ ܐܰܢ̱ܬܬܳܐ ܕܠܳܐ ܒܢܰܝ̈ܳܐ܆ ܢܶܣܰܒ ܐܰܚܽܘܗ̱ܝ ܐܰܢ̱ܬܬܶܗ. ܘܰܢܩܺܝܡ ܙܰܪܥܳܐ ܠܰܐܚܽܘܗ̱ܝ. ܫܰܒܥܳܐ ܕܶܝܢ ܐܰܚܺܝ̈ܢ ܐܺܝܬ ܗ̱ܘܰܘ. ܩܰܕܡܳܝܳܐ ܢܣܰܒ ܐܰܢ̱ܬܬܳܐ. ܘܡܺܝܬ ܕܠܳܐ ܒܢܰܝ̈ܳܐ. ܘܢܰܣܒܳܗ̇ ܕܰܬܪܶܝܢ ܠܰܐܢ̱ܬܬܶܗ. ܘܗܳܢܳܐ ܡܺܝܬ ܕܠܳܐ ܒܢܰܝ̈ܳܐ. ܘܕܰܬܠܳܬܳܐ ܬܽܘܒ ܢܰܣܒܳܗ̇. ܘܗܳܟܘܳܬ ܘܳܐܦ ܫܰܒ̈ܥܳܬܰܝܗܽܘܢ. ܘܡܺܝܬܘ. ܘܠܳܐ ܫܒܰܩܘ ܒܢܰܝ̈ܳܐ. ܘܡܺܝܬܰܬ ܒܚܰܪܬܳܐ ܐܳܦ ܐܰܢ̱ܬܬܳܐ. ܒܰܩܝܳܡܬܳܐ ܗܳܟܺܝܠ. ܕܰܐܝܢܳܐ ܡܶܢܗܽܘܢ ܬܶܗܘܶܐ ܐܰܢ̱ܬܬܳܐ؟ ܫܰܒ̈ܥܳܬܰܝܗܽܘܢ ܓܶܝܪ ܢܰܣܒܽܘܗ̇܀ ܐܳܡܰܪ ܠܗܽܘܢ ܝܶܫܽܘܥ. ܒܢ̈ܰܘܗ̱ܝ ܕܥܳܠܡܳܐ ܗܳܢܳܐ. ܢܳܣܒܺܝܢ ܢܶܫ̈ܶܐ. ܘܢܶܫ̈ܶܐ ܗܳܘ̈ܝܳܢ ܠܓܰܒܪ̈ܶܐ. ܗܳܢܽܘܢ ܕܶܝܢ ܕܰܠܗܰܘ ܥܳܠܡܳܐ ܫܘܰܘ܁ ܘܠܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ܆ ܠܳܐ ܢܳܣܒܺܝܢ ܢܶܫ̈ܶܐ. ܘܳܐܦ ܠܳܐ ܢܶܫ̈ܶܐ ܗܳܘ̈ܝܳܢ ܠܓܰܒܪ̈ܶܐ. ܐܳܦܠܳܐ ܓܶܝܪ ܬܽܘܒ ܠܰܡܡܳܬ ܡܶܫܟܚܺܝܢ. ܐܰܝܟ ܡ̈ܰܠܰܐܟܶܐ ܐܶܢܽܘܢ ܓܶܝܪ. ܘܰܒܢܰܝ̈ܳܐ ܐܺܝܬܰܝܗܽܘܢ ܕܰܐܠܳܗܳܐ. ܡܶܛܽܠ ܕܰܗܘܰܘ ܒܢܰܝ̈ܳܐ ܕܰܩܝܳܡܬܳܐ. ܕܩܳܝܡܺܝܢ ܕܶܝܢ ܡܺܝ̈ܬܶܐ܁ ܐܳܦ ܡܽܘܫܶܐ ܒܰܕܶܩ. ܐܶܬܕܟܰܪ ܓܶܝܪ ܒܣܰܢܝܳܐ ܟܰܕ ܐܶܡܰܪ. ܡܳܪܝܳܐ ܐܰܠܳܗܶܗ ܕܰܐܒܪܳܗܳܡ܁ ܘܰܐܠܳܗܶܗ ܕܺܐܝܣܚܳܩ. ܘܰܐܠܳܗܶܗ ܕܝܰܥܩܽܘܒ. ܐܰܠܳܗܳܐ ܕܶܝܢ ܠܳܐ ܗ̱ܘܳܐ ܕܡܺܝ̈ܬܶܐ܁ ܐܶܠܳܐ ܕܚܰܝ̈ܶܐ. ܟܽܠܗܽܘܢ ܓܶܝܪ ܚܰܝܺܝܢ ܐܶܢܽܘܢ ܠܶܗ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܝܙ:ܟܒ - ܠܙ Luke 17:22-37

ܘܶܐܡܰܪ ܠܬܰܠܡܺܝ̈ܕܰܘܗ̱ܝ. ܢܺܐܬܽܘܢ ܝܰܘ̈ܡܳܬܳܐ܆ ܕܬܶܬܪܰܓܪܓܽܘܢ ܠܡܶܚܙܳܐ ܚܰܕ ܡܶܢ ܝܰܘ̈ܡܳܬܳܐ ܕܰܒܪܶܗ ܕܐ̱ܢܳܫܳܐ. ܘܠܳܐ ܬܶܚܙܽܘܢ. ܘܶܐܢ ܢܺܐܡܪܽܘܢ ܠܟܽܘܢ. ܗܳܐ ܗܳܪܟܰܐ ܗ̱ܘ ܘܗܳܐ ܗܳܪ ܬܰܡܳܢܽ ܗ̱ܘ. ܠܳܐ ܬܺܐܙܽܠ̱ܘܢ. ܐܰܝܟܰܢܳܐ ܓܶܝܪ ܕܒܰܪܩܳܐ ܒܳܪܶܩ ܡܶܢ ܫܡܰܝܳܐ: ܘܟܽܠܶܗ ܬܚܶܝܬ ܫܡܰܝܳܐ ܡܰܢܗܰܪ܆ ܗܳܟܰܢܳܐ ܢܶܗܘܶܐ ܒܪܶܗ ܕܐ̱ܢܳܫܳܐ ܒܝܰܘܡܶܗ. ܠܽܘܩܕܰܡ ܕܶܝܢ ܥܬܺܝܕ ܗ̱ܘ ܕܢܶܚܰܫ ܣܰܓܺܝ̈ܳܐܬܳܐ܆ ܘܢܶܣܬܠܶܐ ܡܶܢ ܫܰܪܒܬܳܐ ܗܳܕܶܐ. ܘܰܐܝܟܰܢܳܐ ܕܰܗܘܳܐ ܒܝܰܘ̈ܡܳܬܶܗ ܕܢܽܘܚ܆ ܗܳܟܰܢܳܐ ܢܶܗܘܶܐ ܒܝܰܘ̈ܡܳܬܶܗ ܕܰܒܪܶܗ ܕܐ̱ܢܳܫܳܐ. ܕܳܐܟܠܺܝܢ ܗ̱ܘܰܘ ܘܫܳܬܶܝܢ܇ ܘܢܳܣܒܺܝܢ ܢܶܫ̈ܶܐ ܘܝܳܗܒܺܝܢ ܠܓܰܒܪ̈ܶܐ܇ ܥܕܰܡܳܐ ܠܝܰܘܡܳܐ ܕܥܰܠ ܢܽܘܚ ܠܟܶܐܘܶܠܳܐ܆ ܘܶܐܬܳܐ ܛܰܘܦܳܢܳܐ. ܘܰܐܘܒܶܕ ܠܟܽܠ ܐ̱ܢܳܫ. ܘܰܐܝܟܰܢܳܐ ܬܽܘܒ ܕܰܗܘܳܐ ܒܝܰܘ̈ܡܳܬܶܗ ܕܠܽܘܛ: ܕܳܐܟܠܺܝܢ ܗ̱ܘܰܘ ܘܫܳܬܶܝܢ: ܘܙܳܒܢܺܝܢ ܘܰܡܙܰܒܢܺܝܢ: ܘܢܳܨܒܺܝܢ ܗ̱ܘܰܘ ܘܒܳܢܶܝܢ: ܒܝܰܘܡܳܐ ܕܶܝܢ ܕܰܢܦܰܩ ܠܽܘܛ ܡܶܢ ܣܕܽܘܡ܆ ܐܰܡܛܰܪ ܡܳܪܝܳܐ ܢܽܘܪܳܐ ܘܟܶܒܪܺܝܬܳܐ ܡܶܢ ܫܡܰܝܳܐ܆ ܘܰܐܘܒܶܕ ܠܟܽܠܗܽܘܢ. ܗܳܟܰܢܳܐ ܢܶܗܘܶܐ ܒܝܰܘܡܳܐ ܕܡܶܬܓܠܶܐ ܒܪܶܗ ܕܐ̱ܢܳܫܳܐ. ܒܗܰܘ ܝܰܘܡܳܐ ܡܰܢ ܕܒܶܐܓܳܪܰܐ ܗ̱ܘ ܘܡܳܐܢ̈ܰܘܗ̱ܝ ܒܒܰܝܬܳܐ܆ ܠܳܐ ܢܶܚܽܘܬ ܕܢܶܫܩܽܘܠ ܐܶܢܽܘܢ. ܘܡܰܢ ܕܰܒܚܰܩܠܰܐ ܗ̱ܘ܆ ܠܳܐ ܢܶܬܗܦܶܟ ܠܒܶܣܬܪܶܗ. ܐܶܬܕܰܟِܪܘ ܠܰܐܢ̱ܬܬܶܗ ܕܠܽܘܛ. ܡܰܢ ܕܨܳܒܶܐ ܕܢܰܚܶܐ ܢܰܦܫܶܗ. ܢܰܘܒܕܺܝܗ̇. ܘܡܰܢ ܕܢܰܘܒܶܕ ܢܰܦܫܶܗ ܢܰܚܶܝܗ̇. ܐܳܡܰܪ ܐ̱ܢܳܐ ܠܟܽܘܢ ܕܰܒܗܰܘ ܠܺܠܝܳܐ܆ ܬܪܶܝܢ ܢܶܗܘܽܘܢ ܒܰܚܕܳܐ ܥܰܪܣܳܐ. ܚܰܕ ܢܶܬܕܒܰܪ. ܘܰܐ̱ܚܪܺܢܳܐ ܢܶܫܬܒܶܩ. ܬܰܪܬܶܝܢ ܢܶܗܘ̈ܝܳܢ ܛܳܚ̈ܢܳܢ ܐܰܟܚܕܳܐ. ܚܕܳܐ ܬܶܬܕܒܰܪ. ܘܰܐ̱ܚܪܺܬܳܐ ܬܶܫܬܒܶܩ. ܬܪܶܝܢ ܢܶܗܘܽܘܢ ܒܚܰܩܠܳܐ. ܚܰܕ ܢܶܬܕܒܰܪ. ܘܰܐ̱ܚܪܺܢܳܐ ܢܶܫܬܒܶܩ. ܥܢܰܘ. ܘܳܐܡܪܺܝܢ ܠܶܗ. ܠܰܐܝܟܳܐ ܡܳܪܰܢ؟ ܐܳܡܰܪ ܠܗܽܘܢ. ܐܰܝܟܳܐ ܕܦܰܓܪܳܐ. ܬܰܡܳܢ ܢܶܬܟܰܢܫܽܘܢ ܢܶܫܪ̈ܶܐ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܝܘ:ܝܛ - ܠܐ Luke 16:19-31

ܓܰܒܪܳܐ ܕܶܝܢ ܚܰܕ ܥܰܬܺܝܪܳܐ ܐܺܝܬ ܗ̱ܘܳܐ܆ ܘܠܳܒܶܫ ܗ̱ܘܳܐ ܒܽܘܨܳܐ ܘܰܐܪܓܘܳܢܳܐ. ܘܟܽܠܝܽܘܡ ܡܶܬܒܰܣܰܡ ܗ̱ܘܳܐ ܓܰܐܝܳܐܺܝܬ. ܘܡܶܣܟܺܢܳܐ ܚܰܕ ܐܺܝܬ ܗ̱ܘܳܐ ܕܰܫܡܶܗ ܠܳܥܳܙܳܪ. ܘܰܪܡܶܐ ܗ̱ܘܳܐ ܠܘܳܬ ܬܰܪܥܶܗ ܕܗܰܘ ܥܰܬܺܝܪܳܐ. ܟܰܕ ܡܡܰܚܰܝ ܒܫܽܘܚ̈ܢܶܐ. ܘܡܶܬܝܰܐܰܒ ܗ̱ܘܳܐ ܕܢܶܡܠܶܐ ܟܰܪܣܶܗ ܡܶܢ ܦܰܪ̈ܬܽܘܬܶܐ ܕܢܳܦܠܺܝܢ ܡܶܢ ܦܳܬܽܘܪܶܗ ܕܗܰܘ ܥܰܬܺܝܪܳܐ. ܐܶܠܳܐ ܐܳܦ ܟܰܠܒ̈ܶܐ ܐܳܬܶܝܢ ܗ̱ܘܰܘ ܡܠܰܚܟܺܝܢ ܫܽܘܚ̈ܢܰܘܗ̱ܝ܀ ܗܘܳܐ ܕܶܝܢ ܘܡܺܝܬ ܗܰܘ ܡܶܣܟܺܢܳܐ܆ ܘܰܐܘܒܠܽܘܗ̱ܝ ܡ̈ܰܠܰܐܟܶܐ ܠܥܽܘܒܶܗ ܕܰܐܒܪܳܗܳܡ. ܐܳܦ ܗܰܘ ܕܶܝܢ ܥܰܬܺܝܪܳܐ ܡܺܝܬ. ܘܶܐܬܩܒܰܪ. ܘܟܰܕ ܡܶܫܬܰܢܰܩ ܒܰܫܝܽܘܠ܆ ܐܰܪܺܝܡ ܥܰܝ̈ܢܰܘܗ̱ܝ ܡܶܢ ܪܽܘܚܩܳܐ܆ ܘܰܚܙܳܐ ܠܰܐܒܪܳܗܳܡ ܘܰܠܠܳܥܳܙܳܪ ܒܥܽܘܒܶܗ. ܘܰܩܪܳܐ ܒܩܳܠܳܐ ܪܳܡܳܐ ܘܶܐܡܰܪ. ܐܳܒܝ ܐܰܒܪܳܗܳܡ ܐܶܬܪܰܚܰܡ ܥܠܰܝ! ܘܫܰܕܰܪ ܠܠܳܥܳܙܳܪ. ܕܢܶܨܒܽܘܥ ܪܺܝܫ ܨܶܒܥܶܗ ܒܡܰܝ̈ܳܐ ܘܰܢܪܰܛܶܒ ܠܺܝ ܠܶܫܳܢܝ܇ ܕܗܳܐ ܡܶܫܬܰܢܰܩ ܐ̱ܢܳܐ ܒܫܰܠܗܶܒܺܝܬܳܐ ܗܳܕܶܐ. ܐܳܡܰܪ ܠܶܗ ܐܰܒܪܳܗܳܡ. ܒܶܪܝ܆ ܐܶܬܕܰܟِܪ ܕܩܰܒܶܠܬ ܛܳܒ̈ܳܬܳܟ ܒܚܰܝܰܝ̈ܟ. ܘܠܳܥܳܙܳܪ ܒܺܝ̈ܫܳܬܶܗ. ܘܗܳܫܳܐ ܗܳܐ ܡܶܬܬܢܺܝܚ ܗܳܪܟܳܐ. ܘܰܐܢ̱ܬ ܡܶܫܬܰܢܰܩ. ܘܥܰܡ ܗܳܠܶܝܢ ܟܽܠܗܶܝܢ܆ ܗܰܘܬܳܐ ܪܰܒܬܳܐ ܣܺܝܡܳܐ ܒܰܝ̈ܢܰܝܢ ܘܰܠܟܽܘܢ. ܕܰܐܝܠܶܝܢ ܕܨܳܒܶܝܢ ܡܶܟܳܐ ܕܢܶܥܒܪܽܘܢ ܠܘܳܬܟܽܘܢ. ܠܳܐ ܢܶܫܟܚܽܘܢ. ܘܳܐܦܠܳܐ ܕܡܶܢ ܬܰܡܳܢ ܢܶܥܒܪܽܘܢ ܠܘܳܬܰܢ܀ ܐܳܡܰܪ ܠܶܗ. ܡܳܕܶܝܢ ܒܳܥܶܐ ܐ̱ܢܳܐ ܡܶܢܳܟ ܐܳܒܝ܆ ܕܰܬܫܰܕܪܺܝܘܗ̱ܝ ܠܒܶܝܬ ܐܳܒܝ. ܚܰܡܫܳܐ ܓܶܝܪ ܐܰܚܺܝ̈ܢ ܐܺܝܬ ܠܺܝ. ܢܺܐܙܰܠ ܢܣܰܗܶܕ ܐܶܢܽܘܢ܆ ܕܠܳܐ ܐܳܦ ܗܶܢܽܘܢ ܢܺܐܬܽܘܢ ܠܕܽܘܟܬܳܐ ܗܳܕܶܐ ܕܬܰܫܢܺܝܩܳܐ. ܐܳܡܰܪ ܠܶܗ ܐܰܒܪܳܗܳܡ. ܐܺܝܬ ܠܗܽܘܢ ܡܽܘܫܶܐ ܘܰܢܒܺܝ̈ܶܐ܆ ܢܶܫܡܥܽܘܢ ܐܶܢܽܘܢ. ܗܽܘ ܕܶܝܢ ܐܶܡܰܪ ܠܶܗ. ܠܳܐ ܐܳܒܝ ܐܰܒܪܳܗܳܡ. ܐܶܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܺܐܙܰܠ ܠܘܳܬܗܽܘܢ. ܬܳܝܒܺܝܢ. ܐܳܡܰܪ ܠܶܗ ܐܰܒܪܳܗܳܡ. ܐܶܢ ܠܡܽܘܫܶܐ ܘܠܰܢܒܺܝ̈ܶܐ ܠܳܐ ܫܳܡܥܺܝܢ܆ ܐܳܦ ܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܩܽܘܡ. ܡܗܰܝܡܢܺܝܢ ܠܶܗ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܡܰܬܰܝ ܫܠܺܝܚܳܐ
ܟܗ:ܠܐ - ܡܘ Matthew 25:31-46

ܡܳܐ ܕܳܐܬܶܐ ܕܶܝܢ ܒܪܶܗ ܕܐ̱ܢܳܫܳܐ ܒܫܽܘܒܚܶܗ: ܘܟܽܠܗܽܘܢ ܡܰܠܰܐܟܰܘ̈ܗ̱ܝ ܩܰܕܺܝ̈ܫܶܐ ܥܰܡܶܗ܆ ܗܳܝܕܶܝܢ ܢܶܬܶܒ ܥܰܠ ܬܪܽܘܢܽܘܣ ܕܫܽܘܒܚܶܗ. ܘܢܶܬܟܰܢܫܽܘܢ ܩܕܳܡܰܘܗ̱ܝ ܟܽܠܗܽܘܢ ܥܰܡ̱̈ܡܶܐ. ܘܰܢܦܰܪܶܫ ܐܶܢܽܘܢ ܚܰܕ ܡܶܢ ܚܰܕ. ܐܰܝܟ ܪܳܥܝܳܐ ܕܰܡܦܰܪܶܫ ܥܶܪ̈ܒܶܐ ܡܶܢ ܓܕܰܝ̈ܳܐ. ܘܰܢܩܺܝܡ ܥܶܪ̈ܒܶܐ ܡܶܢ ܝܰܡܺܝܢܶܗ܆ ܘܰܓܕܰܝ̈ܳܐ ܡܶܢ ܣܶܡܳܠܶܗ܀ ܗܳܝܕܶܝܢ ܢܺܐܡܰܪ ܡܰܠܟܳܐ ܠܗܳܢܽܘܢ ܕܡܶܢ ܝܰܡܺܝܢܶܗ. ܬܰܘ ܒܪ̈ܺܝܟܰܘܗ̱ܝ ܕܳܐܒܝ. ܝܺܪܰܬܘ ܡܰܠܟܽܘܬܳܐ܇ ܕܰܥܬܺܝܕܳܐ ܗ̱ܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܟܶܦܢܶܬ ܓܶܝܪ. ܘܝܰܗ̱ܒܬܽܘܢ ܠܺܝ ܠܡܶܐܟܰܠ. ܘܰܨܗܺܝܬ. ܘܰܐܫܩܺܝܬܽܘܢܳܢܝ. ܐܰܟܣܢܳܝܳܐ ܗ̱ܘܺܝܬ ܘܟܰܢܶܫܬܽܘܢܳܢܝ. ܥܰܪܛܶܠܳܝܳܐ ܗ̱ܘܺܝܬ. ܘܟܰܣܺܝܬܽܘܢܳܢܝ. ܟܪܺܝܗ ܗ̱ܘܺܝܬ. ܘܰܣܥܰܪܬܽܘܢܳܢܝ. ܘܒܶܝܬ ܐܰܣܺܝܪ̈ܶܐ ܗ̱ܘܺܝܬ. ܘܶܐܬܰܝܬܽܘܢ ܠܘܳܬܝ܀ ܗܳܝܕܶܝܢ ܢܺܐܡܪܽܘܢ ܠܶܗ ܗܳܢܽܘܢ ܙܰܕܺܝ̈ܩܶܐ. ܡܳܪܰܢ ܐܶܡܰܬܝ ܚܙܰܝܢܳܟ ܕܰܟܦܶܢ ܐܰܢ̱ܬ. ܘܬܰܪܣܺܝܢܳܟ؟ ܐܰܘ ܕܰܨܗܶܐ ܐܰܢ̱ܬ. ܘܰܐܫܩܺܝܢܳܟ؟ ܘܶܐܡܰܬܝ ܚܙܰܝܢܳܟ ܕܰܐܟܣܢܳܝܳܐ ܐܰܢ̱ܬ ܘܟܰܢܶܫܢܳܟ؟ ܐܰܘ ܕܥܰܪܛܶܠܳܝ ܐܰܢ̱ܬ ܘܟܰܣܺܝܢܳܟ؟ ܘܶܐܡܰܬܝ ܚܙܰܝܢܳܟ ܟܪܺܝܗܳܐ. ܐܰܘ ܒܶܝܬ ܐܰܣܺܝܪ̈ܶܐ. ܘܶܐܬܰܝܢ ܠܘܳܬܳܟ؟ ܘܰܥܢܳܐ ܡܰܠܟܳܐ. ܘܶܐܡܰܪ ܠܗܽܘܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚܰܝ̈ ܙܥܽܘܪ̈ܶܐ ܠܺܝ ܗ̱ܘ ܥܒܰܕܬܽܘܢ! ܗܳܝܕܶܝܢ ܢܺܐܡܰܪ ܐܳܦ ܠܗܳܢܽܘܢ ܕܡܶܢ ܣܶܡܳܠܶܗ. ܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ. ܘܰܠܡܰܠܰܐܟܰܘ̈ܗ̱ܝ. ܟܶܦܢܶܬ ܓܶܝܪ ܘܠܳܐ ܝܰܗ̱ܒܬܽܘܢ ܠܺܝ ܠܡܶܐܟܰܠ. ܘܰܨܗܺܝܬ ܘܠܳܐ ܐܰܫܩܺܝܬܽܘܢܳܢܝ. ܘܰܐܟܣܢܳܝܳܐ ܗ̱ܘܺܝܬ ܘܠܳܐ ܟܰܢܶܫܬܽܘܢܳܢܝ. ܘܥܰܪܛܶܠܳܝܳܐ ܗ̱ܘܺܝܬ ܘܠܳܐ ܟܰܣܺܝܬܽܘܢܳܢܝ. ܘܰܟܪܺܝܗܳܐ ܗ̱ܘܺܝܬ ܘܒܶܝܬ ܐܰܣܺܝܪ̈ܶܐ ܗ̱ܘܺܝܬ ܘܠܳܐ ܣܥܰܪܬܽܘܢܳܢܝ. ܗܳܝܕܶܝܢ ܢܶܥܢܽܘܢ ܐܳܦ ܗܶܢܽܘܢ ܘܢܺܐܡܪܽܘܢ. ܡܳܪܰܢ ܐܶܡܰܬܝ ܚܙܰܝܢܳܟ ܟܰܦܢܳܐ ܐܰܘ ܨܰܗܝܳܐ܇ ܐܰܘ ܐܰܟܣܢܳܝܳܐ. ܐܰܘ ܥܰܪܛܶܠܳܝܳܐ܇ ܐܰܘ ܟܪܺܝܗܳܐ. ܐܰܘ ܒܶܝܬ ܐܰܣܺܝܪ̈ܶܐ܇ ܘܠܳܐ ܫܰܡܶܫܢܳܟ؟ ܗܳܝܕܶܝܢ ܢܶܥܢܶܐ. ܘܢܺܐܡܰܪ ܠܗܽܘܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ ܕܰܟܡܳܐ ܕܠܳܐ ܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܙܥܽܘܪ̈ܶܐ܆ ܐܳܦ ܠܳܐ ܠܺܝ ܥܒܰܕܬܽܘܢ. ܘܢܺܐܙܽܠ̱ܘܢ ܗܳܠܶܝܢ ܠܬܰܫܢܺܝܩܳܐ ܕܰܠܥܳܠܰܡ. ܘܙܰܕܺܝ̈ܩܶܐ ܠܚܰܝ̈ܶܐ ܕܰܠܥܳܠܰܡ. ܒܰܪܶܟܡܳܪܝ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܡܰܬܰܝ ܫܠܺܝܚܳܐ
ܟܗ:ܐ - ܝܓ Matthew 25:1-13

ܗܳܝܕܶܝܢ ܬܶܬܕܰܡܶܐ ܡܰܠܟܽܘܬܳܐ ܕܰܫܡܰܝܳܐ ܠܰܥܣܰܪ ܒܬܽܘ̈ܠܳܢ. ܗܳܢܶܝܢ ܕܰܢܣܰܒ̈ܝ ܠܰܡܦܺܝܕܰܝ̈ܗܶܝܢ ܘܰܢܦܰܩ̈ܝ ܠܽܐܘܪܰܥ ܚܰܬܢܳܐ ܘܟܰܠܬܳܐ. ܚܰܡܶܫ ܕܶܝܢ ܡܶܢܗܶܝܢ ܚܰܟܺܝ̈ܡܳܢ ܗ̱ܘܰܝ̈ ܘܚܰܡܶܫ ܣܰܟ̈ܠܳܢ. ܘܗܳܢܶܝܢ ܣܰܟ̈ܠܳܬܳܐ. ܢܣܰܒ̈ܝ ܠܰܡܦܺܝܕܰܝ̈ܗܶܝܢ܆ ܘܠܳܐ ܢܣܰܒ̈ܝ ܥܰܡܗܶܝܢ ܡܶܫܚܳܐ. ܗܳܢܶܝܢ ܕܶܝܢ ܚܰܟܺܝ̈ܡܳܬܳܐ܆ ܢܣܰܒ̈ܝ ܡܶܫܚܳܐ ܒܡܳܐܢ̈ܶܐ. ܥܰܡ ܠܰܡܦܺܝܕܰܝ̈ܗܶܝܢ. ܟܰܕ ܐܰܘܚܰܪ ܕܶܝܢ ܚܰܬܢܳܐ܆ ܢܳܡ̈ܝ ܟܽܠܗܶܝܢ. ܘܰܕܡܶܟ̈ܝ. ܘܰܒܦܶܠܓܶܗ ܕܠܺܠܝܳܐ ܗܘܳܬ ܩܥܳܬܳܐ. ܗܳܐ ܚܰܬܢܳܐ ܐܳܬܶܐ ܦܽܘܩ̈ܝ ܠܽܐܘܪܥܶܗ. ܗܳܝܕܶܝܢ ܩܳܡ̈ܝ ܟܽܠܗܶܝܢ ܒܬܽܘ̈ܠܳܬܳܐ ܗܳܠܶܝܢ. ܘܬܰܩܶܢ̈ܝ ܠܰܡܦܺܝܕܰܝ̈ܗܶܝܢ. ܐܳܡܪ̈ܳܢ ܕܶܝܢ ܗܳܢܶܝܢ ܣܰܟ̈ܠܳܬܳܐ ܠܚܰܟܺܝ̈ܡܳܬܳܐ. ܗܰܒܶܝ̈ܢ ܠܰܢ ܡܶܢ ܡܶܫܚܟܶܝܢ܆ ܕܗܳܐ ܕܥܶܟܘ ܠܗܽܘܢ ܠܰܡܦܺܝܕܰܝ̈ܢ. ܥܢ̈ܰܝ ܗܳܠܶܝܢ ܚܰܟܺܝ̈ܡܳܬܳܐ. ܘܳܐܡܪ̈ܳܢ. ܠܡܳܐ ܠܳܐ ܢܶܣܦܰܩ ܠܰܢ ܘܰܠܟܶܝܢ. ܐܶܠܳܐ ܙܶܠܶܝ̈ܢ ܠܘܳܬ ܐܰܝܠܶܝܢ ܕܰܡܙܰܒܢܺܝܢ. ܘܰܙܒܶܢܶܝ̈ܢ ܠܟܶܝܢ. ܘܟܰܕ ܐܶܙܰܠܝ̈ ܠܡܶܙܒܰܢ܆ ܐܶܬܳܐ ܚܰܬܢܳܐ. ܘܰܐܝܠܶܝܢ ܕܰܡܛܰܝ̈ܒܳܢ ܗ̱ܘ̈ܰܝ. ܥܰܠܝ̈ ܥܰܡܶܗ ܠܒܶܝܬ ܚܠܽܘܠܳܐ ܘܶܐܬܬܚܶܕ ܬܰܪܥܳܐ. ܒܚܰܪܬܳܐ ܕܶܝܢ ܐܶܬܰܝ̈ ܐܳܦ ܗܳܢܶܝܢ ܒܬܽܘ̈ܠܳܬܳܐ ܐ̱ܚܪ̈ܳܢܝܳܬܳܐ. ܘܳܐܡܪ̈ܳܢ: ܡܳܪܰܢ ܡܳܪܰܢ ܦܬܰܚ ܠܰܢ. ܗܽܘ ܕܶܝܢ ܥܢܳܐ ܘܶܐܡܰܪ ܠܗܶܝܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܶܝܢ܆ ܕܠܳܐ ܝܳܕܰܥ ܐ̱ܢܳܐ ܠܟܶܝܢ. ܐܶܬܬܥܺܝܪܘ ܗܳܟܺܝܠ. ܕܠܳܐ ܝܳܕܥܺܝܢ ܐܢ̱ܬܽܘܢ ܠܝܰܘܡܳܐ ܗܰܘ. ܘܠܳܐ ܠܫܳܥܬܳܐ. ܒܰܪܶܟܡܳܪܝ܀

ܘܝܳܗܒܺܝܢ ܫܠܳܡܳܐ ܠܥܰܢܺܝܕܳܐ ܘܳܐܡܪܺܝܢ ܩܳܠܳܐ ܗܳܢܳܐ:

ܩܳܠܳܐ: ܠܥܶܠ ܡܶܢ ܫܽܘܦܪ̈ܶܐ ܕܰܥܢܳܢ̈ܶܐ
(ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ)

ܠܡܳܢܳܐ ܒܪܽܘܚܩܳܐ ܩܳܝܡܺܝܢ ܐܢ̱ܬܽܘܢ ܚܰܒܺܝ̈ܒܰܝ: ܩܪܽܘܒܘ ܨܶܐܝܕܰܝ ܘܗܰܒܘ ܠܺܝ ܫܠܳܡܳܐ ܘܨܰܠܰܘ ܥܠܰܝ. ܘܪܰܟܶܒܘ ܥܠܰܝ ܐܽܘܠ̈ܝܳܬܳܐ ܒܰܚܢܰܓܬܳܐ: ܕܗܳܐ ܡܰܘܬܳܐ ܥܰܓܢܰܢܝ ܝܰܘܡܳܢ ܒܬܰܪܥܳܗ̇ ܕܰܫܝܽܘܠ܀

ܟܰܕ ܡܰܠܰܐܟܳܐ ܕܡܰܘܬܳܐ ܐܶܬܳܐ ܒܳܬܰܪܝ. ܠܟܽܠ ܓܰܒܺܝ̈ܢ ܚܳܪܶܬ ܘܰܚܙܺܝܬ ܘܠܰܝܬ ܕܰܡܥܰܕܰܪ. ܐܰܢ̱ܬ ܡܳܪܝ ܕܰܫܟܺܝܚ ܐܰܢ̱ܬ ܠܰܐܝܠܶܝܢ ܕܩܳܪܶܝܢ ܠܳܟ. ܐܰܩܺܝܡܰܝܢܝ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ܀

ܫܽܘܒܚܳܐ: ܦܽܘܫ ܒܰܫܠܳܡܳܐ ܐܳܘ ܥܳܠܡܳܐ ܘܥܳܡܽܘܪ̈ܰܘܗܝ: ܕܙܰܒܢܳܐ ܠܳܐ ܡܰܘܬܰܪ ܡܶܕܶܡ ܠܰܕܪܳܚܶܡ ܠܶܗ. ܗܳܐ ܕܳܒܪܺܝܢ ܠܺܝ ܡܶܢܳܟ ܐܺܙܰܠ ܐܶܥܒܶܕ: ܚܽܘܫܒܳܢܳܐ ܩܕܳܡ ܕܰܝܳܢܳܐ ܕܟܽܠ ܟܰܣ̈ܝܳܬܳܐ܀

ܡܶܢ ܥܳܠܰܡ: ܐܰܟܡܳܐ ܕܠܳܒ̈ܫܳܢ ܫܽܘ̈ܫܰܢܶܐ ܒܓܰܘ ܕܰܒܪܳܐ: ܠܒܽܘܫܳܐ ܕܠܳܐ ܙܩܺܝܪ ܒܺܐܝ̈ܕܰܝܳܐ ܕܰܒܢܰܝ̈ܢܳܫܳܐ. ܗܳܟܰܢ ܠܳܒܫܺܝܢ ܙܰܕܺܝ̈ܩܶܐ ܒܢܽܘܚܳܡܳܐ: ܠܒܽܘܫܳܐ ܕܙܶܩܪܰܬ݀ ܪܽܘܚ ܩܽܘܕܫܳܐ ܠܝܰܠܕܰܘ̈ܗܝ ܕܳܐܕܳܡ܀

ܘܢܳܣܶܒ ܟܳܗܢܳܐ ܡܶܫܚܳܐ ܒܺܐܝܕܶܗ ܘܳܐܡܰܪ ܨܠܽܘܬܳܐ ܗܳܕܶܐ:

ܡܳܪܝܳܐ ܐܰܠܳܗܳܐ ܗܰܘ ܕܰܕܒܰܪܬܳܗ̇ ܠܰܐܡܬܳܟ ܗܳܕܶܐ (ܦܠܢܝܬ) ܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܒܦܽܘܩܕܳܢܳܐ ܕܰܐܠܳܗܽܘܬܳܟ ܘܰܒܨܶܒܝܳܢܳܐ ܕܥܳܒܽܘܕܽܘܬܳܟ. ܫܰܕܰܪ ܠܳܗ̇ ܡܶܢ ܠܘܳܬܳܟ ܣܽܘܝܳܥܳܐ ܕܚܰܝܠܰܘ̈ܳܬܳܐ ܡܰܠܰܐܟܳܝ̈ܶܐ. ܘܗܰܒ ܠܳܗ̇ ܕܰܒܝܰܕ ܡܶܫܚܳܐ ܗܳܢܳܐ ܕܥܰܠ ܫܠܰܕܳܐ ܕܺܝܠܳܗ̇ ܡܶܬܪܡܶܐ: ܕܬܶܗܘܶܐ ܫܳܪܽܘܥܬܳܐ ܘܠܳܐ ܡܶܬܠܰܒܟܳܢܺܝܬܳܐ ܠܚܰܝܠܰܘ̈ܳܬܳܐ ܣܰܩܽܘ̈ܒܠܳܝܶܐ ܘܰܠܡܰܫܪ̈ܝܳܬܳܐ ܕܰܒܥܶܠ̈ܕܒܳܒܶܐ ܗܳܠܶܝܢ ܕܒܳܐܐܰܪ ܟܰܡܺܝܢܺܝܢ ܘܥܰܡ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ ܩܪܳܒܳܐ ܥܳܒܕܺܝܢ. ܘܡܰܢܰܥܶܝܗ̇ ܠܰܐܘ̈ܳܢܶܐ ܕܢܽܘܗܪܳܐ ܘܕܰܕܝܳܨܳܐ ܥܰܡ ܟܽܠܗܽܘܢ ܩܰܕܺܝ̈ܫܶܐ. ܘܟܰܕ ܚܳܕܝܳܐ ܘܪܳܘܙܳܐ: ܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܐܰܒܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܡܰܩܶܦ ܘܳܐܡܰܪ:

ܠܰܓܗܳܝܬܳܐ ܕܡܶܢ ܥܰܡ̈ܠܶܐ ܘܠܰܢܝܳܚܬܳܐ ܕܡܶܢ ܛܽܘܪ̈ܳܦܶܐ ܘܰܠܒܽܘܣܳܡܳܐ ܕܥܰܡ ܩܰܕܺܝ̈ܫܶܐ܀

ܘܪܳܡܶܐ ܡܶܫܚܳܐ ܥܰܠ ܐܰܦܶܝ̈ܗ̇ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ:

ܟܳܗܢܳܐ: ܒܰܫܡܳܐ ܕܰܐܒܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܚܰܕܝܳܗ̇ ܟܰܕ ܐܳܡܰܪ:

ܟܳܗܢܳܐ: ܘܕܰܒܪܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܒܽܘܪ̈ܟܶܝܗ̇ ܟܰܕ ܐܳܡܰܪ:

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܟܰܕ ܡܰܚܬܺܝܢ ܫܠܰܕܳܐ ܠܩܰܒܪܳܐ ܐܳܡܪܺܝܢ

ܩܳܠܳܐ: ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ

ܠܩܰܒܪܳܐ ܢܳܚܶܬ ܫܽܘܠܛܳܢܶܗ ܕܗܰܘ ܚܰܝܠܳܐ ܡܫܰܒܚܳܐ: ܘܣܳܥܰܪ ܬܰܡܳܢ ܬܶܕܡܽܘܪܬܳܐ ܘܬܳܗܪܺܝܢ ܡܰܠܰܐܟ̈ܶܐ: ܒܓܰܪ̈ܡܶܐ ܙܪ̈ܺܝܩܶܐ ܕܡܶܬܟܰܢܫܺܝܢ ܘܫܽܘܒܚܳܐ ܠܳܒܫܺܝܢ: ܢܰܦܫܳܐ ܘܦܰܓܪܳܐ ܫܰܘܝܳܐܺܝܬ ܘܩܳܝܡܺܝܢ ܕܠܳܐ ܚܒܳܠܳܐ܀

ܫܽܘܒܚܳܐ ܠܳܟ ܡܳܪܝ ܕܰܒܩܳܠܳܟ: ܩܳܡ ܠܳܥܳܙܳܪ ܐܰܚܽܘܗ̇ ܕܡܰܪܝܰܡ ܘܰܕܡܳܪܬܳܐ ܡܶܢ ܒܳܬܰܪ ܕܰܣܪܺܝ: ܘܰܒܡܶܠܬܳܟ ܬܽܘܒ ܐܶܬܬܥܺܝܪܰܬ ܒܰܪ̱ܬ ܝܽܘܐܳܪܳܫ: ܘܰܒܩܳܠܳܐ ܐܚܪܺܢܳܐ ܕܩܳܪܶܝܬ ܩܳܝܡܺܝܢ ܥܰܢܺܝ̈ܕܶܐ܀

ܫܽܘܒܚܳܐ ܠܚܰܝܠܳܐ ܥܶܠܝܳܐ: ܕܰܠܒܶܝܬ ܡܺܝ̈ܬܶܐ ܢܚܶܬ ܣܰܥܪܶܗ ܠܳܐܕܳܡ ܥܰܦܪܳܢܳܐ: ܘܗܳܟܰܢ ܐܶܡܰܪ ܠܶܗ: ܠܳܐ ܬܶܟܪܶܐ ܠܳܟ ܥܰܦܪܳܢܳܐ ܕܥܰܠ ܦܽܘܩܕܳܢܝ ܥܒܰܪܬ: ܕܶܐܢܳܐ ܐܢܳܐ ܒܪܳܐ ܕܰܐܠܳܗܳܐ ܕܰܡܡܺܝܬ ܐܳܦ ܡܰܚܶܐ܀

ܗܰܘ ܒܳܪܽܘܝܳܐ ܚܰܟܺܝܡܳܐ ܕܒܰܡܗܺܝܪܽܘܬܶܗ: ܟܰܕܢܳܗ̇ ܠܟܽܠܳܗ̇ ܥܳܡܰܪܬܳܐ ܬܚܶܝܬ ܢܺܝܪܶܗ ܕܡܰܘܬܳܐ: ܗܽܘ ܫܳܪܶܐ ܠܡܰܠ̈ܟܶܐ ܪ̈ܳܡܶܐ ܡܶܢ ܕܪ̈ܰܓܰܝܗܽܘܢ: ܘܰܠܕܰܝ̈ܳܢܶܐ ܥܰܙܺܝ̈ܙܶܐ ܡܶܢ ܐܽܘܚܕܳܢܰܝ̈ܗܽܘܢ܀

ܗܰܘ ܕܝܰܗܒ ܗ̱ܘܳܐ ܢܽܘܗܪܳܐ ܠܣܰܡܝܳܐ: ܘܫܶܡܥܳܐ ܠܕܽܘܓܳܐ: ܘܰܦܫܰܛ ܠܶܫܳܢܶܗ ܕܦܺܐܩܳܐ ܘܠܰܡܫܰܪܝܳܐ ܐܰܚܠܶܡ: ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ: ܥܰܠ ܓܰܪ̈ܡܰܝܗܽܘܢ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܶܗ܀

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢ̱ܬ ܗܽܘ ܡܢܰܚܡܳܢܗܽܘܢ܀

ܘܟܰܕ ܣܳܝܡܺܝܢ ܟܺܐܦܳܐ ܫܳܩܶܠ ܟܳܗܢܳܐ ܥܰܦܪܳܐ ܡܶܢ ܐܰܪܥܳܐ ܒܺܐܝܕܶܗ ܘܪܳܡܶܐ ܒܩܰܒܪܳܐ ܐܰܘ ܠܥܶܠ ܡܶܢ ܫܠܰܕܳܐ ܨܠܺܝܒܳܐܺܝܬ ܘܳܐܡܰܪ:

ܗܳܐ ܫܠܶܡ ܨܶܒܝܳܢܳܟ ܡܳܪܰܢ ܐܰܝܟ ܕܶܐܡܰܪܬ: ܕܡܶܢ ܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬܶܗܦܽܘܟ. ܘܬܽܘܒ ܡܶܢ ܕܪܺܝܫ ܬܶܬܚܰܕܰܬ܀

ܘܣܳܝܡܺܝܢ ܥܰܦܪܳܐ ܘܳܐܡܪܺܝܢ ܣܽܘܓܺܝܬܳܐ ܗܳܕܶܐ:

ܒܩ̄: : ܐ̱ܪܳܙ ܠܺܝ ܐ̱ܪܳܙ ܠܺܝ (ܕܰܚܛܳܐ ܠܳܐ ܢܶܚܛܶܐ)

ܦܶܬܓܳܡܳܐ: ܚܕܺܝܬ ܟܰܕ ܐܳܡܪܺܝܢ ܗܘܰܘ ܠܺܝ:

ܕܡܳܪܰܢ ܐܳܬܶܐ: ܘܰܡܢܰܚܶܡ ܡܺܝ̈ܬܶܐ. ܘܥܳܒܶܕ ܣܰܒܪܳܐ: ܠܟܽܠܗܽܘܢ ܥܰܢܺܝ̈ܕܶܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ:

ܒܪܺܝܟ ܗܽܘ ܕܥܰܒܕܶܗ: ܡܰܘܬܳܐ ܕܠܳܐ ܫܽܘܚܕܳܐ. ܠܛܳܒ̈ܶܐ ܘܒܺܝ̈ܫܶܐ: ܕܳܒܰܪ ܫܰܘܝܳܐܺܝܬ܀

ܓܒܰܠܬܳܢܝ ܘܣܳܡܬ ܥܠܰܝ ܐܺܝܕܳܟ:

ܥܰܕܠܳܐ ܐܺܝܬܰܝ: ܓܒܰܠܬܳܢܝ ܡܶܢ ܥܰܦܪܳܐ. ܘܗܳܫܳܐ ܕܫܶܟܒܶܬ: ܐܰܚܳܢܝ ܕܰܐܘܕܶܐ ܠܳܟ܀

ܢܰܦܫܝ ܕܶܝܢ ܬܶܪܘܰܙ ܒܰܐܠܳܗܳܐ:

ܢܰܦܫܳܐ ܕܶܐܚܕܰܬ: ܓܰܘܣܳܐ ܒܰܨܠܺܝܒܳܟ. ܬܶܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܐܶܬܦܰܢ ܥܠܰܝ ܘܪܰܚܶܡܥܠܰܝ:

ܚܽܘܢܰܝܢܝ ܘܰܐܚܳܢܝ: ܘܰܫܒܽܘܩ ܠܺܝ ܚܰܘ̈ܒܰܝ. ܕܶܐܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܓܠܺܝ ܠܺܝ ܥܰܝ̈ܢܰܝ: ܕܶܐܚܙܶܐ ܬܶܕܡܽܘܪܬܶܐ. ܡܳܐ ܕܰܡܢܰܚܡܰܬ: ܠܟܽܠܗܽܘܢ ܥܰܢܺܝ̈ܕܶܐ܀

ܚܽܘܢܰܝܢܝ ܡܳܪܰܢ. ܡܶܛܽܠ ܛܰܝܒܽܘܬܳܟ. ܘܥܰܡ ܩܰܕܺܝ̈ܫܰܝܟ ܐܰܫܘܳܢܝ ܠܰܓܢܽܘܢܳܟ܀

ܛܽܘܒܰܘܗܝ ܠܰܐܝܢܳܐ: ܕܚܰܢܬܳܝܗܝ. ܒܒܶܝܬ ܕܺܝܢܳܐ. ܐܰܝܟ ܓܰܝܳܣܳܐ. ܒܪܺܝܫܶܗ ܕܰܨܠܺܝܒܳܐ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ: ܬܰܘܕܺܝܬܳܐ ܠܰܒܪܳܐ. ܘܰܠܪܽܘܚ ܩܽܘܕܫܳܐ: ܣܶܓܕܬܳܐ ܘܪܽܘܡܪܳܡܳܐ܀

ܡܶܢ ܥܳܠܰܡ: ܠܳܟ ܬܶܫܒܽܘܚܬܳܐ. ܝܶܫܽܘܥ ܦܳܪܽܘܩܰܢ ܕܡܰܘܬܳܐ ܒܺܐܝ̈ܕܰܝܟ: ܘܚܰܝ̈ܶܐ ܒܨܶܒܝܳܢܳܟ܀

ܐܚܪܺܢܐ ܒܩ̄: ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܦܶܬܓܳܡܳܐ: ܠܘܳܬܳܟ ܡܳܪܝܳܐ ܢܰܦܫܝ ܐܰܪܺܝܡܶܬ:

ܡܰܠܟܳܐ ܡܫܺܝܚܳܐ ܦܳܪܽܘܩܰܢ ܒܝܽܘܡ ܡܶܐܬܺܝܬܳܟ ܢܰܚܶܡܰܝܢܝ. ܘܰܐܩܺܝܡܰܝܢܝ ܡܶܢ ܝܰܡܺܝܢܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐܰܠܳܗܝ ܒܳܟ ܣܰܒܪܶܬ ܠܳܐ ܐܶܒܗܰܬ:

ܣܳܓܕܺܝܢܰܢ ܡܳܪܝ ܠܰܨܠܺܝܒܳܟ. ܕܒܳܗ ܩܝܳܡܬܰܢ ܘܒܶܗ ܢܽܘܚܳܡܰܢ. ܘܒܶܗ ܡܶܬܢܰܚܡܺܝܢ ܥܰܢܺܝ̈ܕܶܐ. ܘܠܳܒܫܺܝܢ ܫܽܘܒܚܳܐ ܦܰܓܪ̈ܰܝܗܽܘܢ܀

ܕܺܝܠܳܟ ܐܶܢܽܘܢ ܫܡܰܝ̈ܳܐ ܘܰܐܪܥܳܐ:

ܬܪ̈ܰܝܗܽܘܢ ܥܳܠ̈ܡܶܐ ܕܺܝܠܳܟ ܡܳܪܝ. ܗܳܪܟܳܐ ܘܬܰܡܳܢ ܫܽܘܠܛܳܢܳܟ. ܠܚܰܝ̈ܶܐ ܢܰܛܰܪ ܒܰܨܠܺܝܒܳܟ ܠܥܰܢܝ̈ܕܶܐ ܚܰܣܳܐ ܒܪ̈ܰܚܡܰܝܟ܀

ܡܗܰܝܡܰܢ ܗܽܘ ܡܳܪܝܳܐ ܒܡܶܠܰܘ̈ܗܝ:

ܡܽܘܠܟܳܢܳܐ ܕܩܰܒܶܠ ܡܶܢܳܟ. ܓܰܝܳܣܳܐ ܥܰܠ ܪܺܝܫ ܩܰܝܣܳܐ. ܢܩܰܒܠܽܘܢܳܝܗܝ ܡܳܪܝ ܥܰܢܺܝ̈ܕܶܐ ܕܰܐܘܕܺܝܘ ܒܰܬܠܺܝܬܳܝܽܘܬܳܐ܀

ܪܽܘܣ ܥܠܰܝ ܒܙܽܘܦܳܐ ܘܶܐܬܕܰܟܶܐ:

ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ. ܝܰܡܺܝܢܳܟ ܬܰܠܒܶܫ ܐܶܢܽܘܢ ܐܶܣܛܰܠ ܫܽܘܒܚܳܐ ܒܡܰܠܟܽܘܬܳܟ܀

ܢܶܚܕܽܘܢ ܒܳܟ ܟܽܠ ܕܒܳܥܶܝܢ ܠܳܟ:

ܥܰܢܝ̈ܕܶܐ ܕܰܫܩܰܠܘ ܦܰܓܪܳܟ. ܘܒܰܕܡܳܟ ܚܰܝܳܐ ܐܶܬܚܰܣܺܝܘ. ܥܰܠ ܡܰܕܒܰܚ ܩܽܘܕܫܳܐ ܢܶܗܘܶܐ. ܕܽܘܟܪܳܢܗܽܘܢ ܥܕܰܡܳܐ ܠܥܳܠܰܡ܀

ܗܳܝܕܶܝܢ ܢܺܐܡܪܽܘܢ:

ܢܒܺܝ̈ܶܐ ܩܳܥܶܝܢ ܐܰܝܟ ܪ̈ܰܥܡܶܐ ܘܰܫܠܺܝ̈ܚܶܐ ܐܰܝܟ ܫܺܝܦܽܘܪ̈ܶܐ. ܕܥܳܠܡܳܐ ܗܳܢܳܐ ܥܳܒܰܪ ܠܶܗ. ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ܀

ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ:

ܗܳܐ ܒܰܢܒܺܝ̈ܶܐ ܢܽܘܚܳܡܰܢ. ܘܒܰܫܠܺܝ̈ܚܶܐ ܬܽܘܒ ܦܽܘܪܥܳܢܰܢ. ܘܒܰܣܒܰܪܬܶܗ ܕܡܳܪܰܢ ܐܽܘܪܚܳܐ. ܕܰܕܪܺܝܫܳܐ ܠܒܶܝܬ ܡܰܠܟܽܘܬܳܐ܀

ܣܰܟܝܰܬ ܢܰܦܫܝ ܠܦܽܘܪܩܳܢܳܟ:

ܥܰܝ̈ܢܰܝ ܣܰܟܺܝ̈ܝ ܠܦܽܘܪܩܳܢܳܟ. ܘܰܠܡܺܐܡܪܳܐ ܕܙܰܕܺܝܩܽܘܬܳܟ. ܒܰܣܶܡܰܝܢܝ ܥܰܡ ܩܰܕܺܝ̈ܫܰܝܟ. ܣܰܒܪܳܐ ܛܳܒܳܐ ܕܰܩܒܺܝܪ̈ܶܐ܀

ܢܰܘܥܶܐ ܡܶܢ ܡܕܺܝܢ̱ܬܶܗ ܐܰܝܟ ܥܶܣܒܳܐ ܕܰܐܪܥܳܐ:

ܠܳܐ ܫܳܒܶܩ ܡܶܛܪܳܐ ܒܰܐܪܥܳܐ. ܥܶܩܳܪܳܐ ܕܠܳܐ ܡܰܘܥܶܐ ܠܶܗ. ܘܠܳܐܴ ܡܫܺܝܚܳܐ ܫܳܒܶܩ ܒܰܫܝܽܘܠ. ܥܰܢܺܝܕܳܐ ܕܠܳܐ ܡܢܰܚܶܡ ܠܶܗ܀

ܫܽܘܒܚܳܐ: ܐܰܠܳܗܳܐ ܐܰܒܳܐ ܐܰܚܳܢܝ. ܒܪܳܐ ܡܫܺܝܚܳܐ ܢܰܚܶܡ ܡܺܝܬܽܘܬܝ. ܪܽܘܚ ܩܽܘܕܫܳܐ ܦܰܪܰܩܠܺܝܛܳܐ. ܡܰܢܰܥܰܝܢܝ ܠܰܐܬܪܳܐ ܕܚܰܝ̈ܶܐ܀

ܡܶܢ ܥܳܠܰܡ: ܠܳܟ ܬܶܒܪܽܘܟ ܘܬܶܣܓܽܘܕ ܬܺܒܶܝܠ. ܘܟܽܠ ܠܶܫܳܢ ܠܰܫܡܳܟ ܢܰܘܕܶܐ. ܕܰܐܢ̱ܬ ܗ̣ܽܘ ܡܢܰܚܡܳܢܳܐ ܕܡܺܝ̈ܬܶܐ. ܘܣܰܒܪܳܐ ܛܳܒܳܐ ܠܰܩܒܺܝܪ̈ܶܐ܀

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ...

ܡܫܰܡ̈ܫܳܢܶܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀
ܡܫܰܒܚܺܝܢܰܢ ܠܳܟ܇ ܡܒܰܪܟ̣ܺܝܢܰܢ ܠܳܟ܇ ܣܳܓ̣ܕܺܝܢܰܢ ܠܳܟ܇ ܡܡܰܠܽܠܘܬ̣ ܫܽܘܒܚܳܐ ܡܰܣܩܺܝܢܰܢ ܠܳܟ܀
ܡܰܘܕܶܝܢܰܢ ܠܳܟ ܡܶܛܽܠ ܪܰܒܽܘܬ̣ܳܐ ܕܫܽܘܒܚܳܐ ܕܺܝܠܳܟ܇ ܡܳܪܝܳܐ ܥܳܒܽܘܕܳܐ ܡܰܠܟܳܐ ܫܡܰܝܳܢܳܐ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀
ܡܳܪܝܳܐ ܐܰܠܳܗܳܐ ܒܪܳܐ ܝܺܚܺܝܕܳܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܡܳܪܝܳܐ ܐܰܠܳܗܳܐ ܐܶܡܪܶܗ ܕܰܐܳܠܳܗܳܐ ܒܪܳܐ ܘܡܶܠܬ̣ܶܗ ܕܰܐܒܳܐ܇ ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ ܐܶܬ̣ܪܰܚܰܡܥܠܰܝܢ܀
ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ܇ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬ̣ܰܢ܇ ܗܰܘ ܕܝܳܬ̣ܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܣ ܘܶܐܬ̣ܪܰܚܰܡܥܠܰܝܢ܀
ܡܶܛܽܠ ܕܰܐܢ̱ܬܽ ܗ̱ܘ ܠܚܽܘܕܰܝܟ ܩܰܕܺܝܫܰܬܽ ܗ̱ܘ ܠܚܽܘܕܰܝܟ܇ ܡܳܪܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܫܽܘܒܚܶܗ ܕܰܐܳܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬ̣ܳܐ ܕܚ̈ܰܝܰܝ ܐܶܒܰܪܟ̣ܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܇ ܡܒܰܪܟ̣ܳܐ ܠܥܳܠܰܡ ܗܰܘ ܕܺܐܝܬ̣ܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀
ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬ̣ܳܐ ܕܺܝܠܰܢ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒܚ̈ܳܬ̣ܳܐ ܠܥܳܠܰܡ ܥܳܠܡܺܝܢ܀
ܠܳܟ ܝܳܐܶܐ ܫܽܘܒܚܳܐ܇ ܠܳܟ ܦܰܐܝܳܐ ܬܶܫܒܽܘܚܬܳܐ ܘܠܳܟ ܦܐܶܐ ܩܽܘܠܳܣܳܐ܇ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܉ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܇ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬ̣ܪܰܚܰܡܥܠܰܝܢ܀
ܚܽܘܒܳܟ ܐܰܚܬ̣ܳܟ ܡܶܢ ܐܰܬ̣ܪܳܟ ܨܶܐܕܰܝܢ ܡܳܪܝ܇ ܕܰܒܝܰܕ ܡܰܘܬܳܟ ܐܶܬ̣ܒܰܛܰܠܬ ܡܺܝܬ̣ܽܘܬ̣ܰܢ ܐܶܬ̣ܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ:

ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܘܽܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠܡ̈ܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀
ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ܀

ܬܶܫܡܶܫܬܳܐ ܕܥܰܢܺܝ̈ܕܶܐ

ܩܽܘܩܰܠܝܽܘܢ

ܐܰܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ ܗ̄ ܡܪܰܚܶܡ ܡܳܪܝܳܐ ܥܰܠ ܕܳܚ̈ܠܰܘܗ̱ܝ܀

ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘܡܰܘ̈ܗ̱ܝ ܗ̄ ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ܀

ܥܶܩܒܳܐ

ܐܰܡܬܳܟ ܕܫܶܟܒܰܬ ܥܰܠ ܣܰܒܪܳܟ: ܘܥܰܠ ܬܽܘܟܠܳـܢܶܗ ܕܰܚܢܳܢܳܟ. ܩܳܠܳܟ ܚܰܝܳܐ ܢܰܥܺܝܪܺܝܗ̇. ܡܶܢ ܩܰܒܪ̈ܶܐ ܠܓ݂ܰܘ ܦܰܪܕܰܝܣܳܐ܀

ܣـܛܳܘܡܶܢ ܩܰܐܠܳܘܤ ܩܽܘܪܝܶܐܠܶܝܣܳܘܢ܀

ܩܳܠܳܐ: ܒܩ̄: ܗܰܒܠܳܗ̇ ܠܥܺܕܬܳܟ

ܡܰܠܟܳܐ ܡܢܰܚܡܳܢܳܐ. ܒܫܽܘܒܚܶܗ ܕܳܢܰܚ ܡܶܢ ܪܰܘܡܳܐ ܘܡܰܚܶܐ ܡܺܝ̈ܬܶܐ܆ ܘܰܡܩܺܝܡ ܠܰܩܒܺܝܪ̈ܶܐ. ܘܩܳܝܡܺܝܢ ܫܰܘܝܳܐܺܝܬ: ܥܰܢܺܝ̈ܕܶܐ ܡܶܢ ܓ݂ܰܘ ܩܰܒܪ̈ܶܐ: ܘܡܰܣܩܺܝܢ ܫܽܘܒܚܳܐ. ܠܳܟ ܡܢܰܚܶܡ ܡܺܝ̈ܬܶܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܩܳܠܳܐ. ܕܶܐܡܰܪ ܡܳܪܰܢ ܒܰܣܒܰܪܬܶܗ: ܕܟܽܠ ܕܳܐܟܶܠ ܦܰܓܪܝ̱: ܘܫܳܬܶܐ ܕܶܡܝ̱ ܚܰܝܳܐ. ܠܳܐ ܐܰܪܦܺܝܘܗ̱ܝ ܒܰܫܝܽܘܠ. ܕܡܶܛܽܠܳܬܶܗ ܐܶܬܪܰܟܢܶܬ. ܘܛܶܥܡܶܬ ܡܰܘܬܳܐ. ܕܗܽܘ ܢܺܚܶܐ ܠܥܳܠܰܡ܀

ܐ̱ܚܪܺܢܳܐ ܒܩ̄: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ ܐܰܝܟ ܦܰܓܪܶܗ ܕܡܳܪܝܳܐ. ܠܳܐ ܡܰܘܬܰܪ ܠܺܝ ܒܶܟܝܳܐ ܘܬܶܢܚ̈ܳܬܳܐ. ܐܰܝܟ ܕܡܰܘܬܰܪ ܠܺܝ ܦܰܓܪܶܗ ܕܰܡܫܺܝܚܳܐ. ܘܡܳܐ ܕܩܳܝܡܺܝܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ. ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐ̱ܢܳܐ ܩܕܳܡ ܡܳܪܳܐ ܕܥܳܠ̈ܡܶܐ ܗ̄ ܩܕܳܡ ܒܺܐܡ ܕܰܡܫܺܝܚܳܐ܀

ܫܽܘܒܚܳܐ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ ܘܫܰܩܠܽܘܟ ܡܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ ܒܶܝܬ ܡܰܠܟܽܘܬܳܐ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܒܳܥܽܘܬܳܐ ܩܦܺܝܣܬܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܒܰܪ ܐܰܠܳܗܳܐ ܕܰܒܡܰܘܬܶܗ ܐܰܚܺܝ ܡܺܝܬܽܘܬܰܢ. ܢܰܚܶܡ ܠܰܢ ܡܶܢ ܓܰܘ ܕܰܚܺܝܚܳܐ ܕܢܶܩܥܶܐ ܘܢܺܐܡܰܪ. ܫܽܘܒܚܳܐ ܠܳܟ ܐܰܠܳܗܳܐ܀

ܘܳܐܡܪܺܝܢ:

ܐܰܠܳܗܳܐ ܢܶܗܘܶܐ ܠܳܗ̇ ܡܚܰܣܝܳܢܳܐ ܘܰܡܩܺܝܡܳܢܳܐ ܡܶܢ ܓܰܒܳܐ ܕܺܝܠܶܗ ܕܝܰܡܺܝܢܳܐ܀

ܫܠܶܡ ܛܶܟܣܳܐ ܕܥܽܘܦܳܝܳܐ ܕܢܶܫ̈ܶܐ