ܛܶܟܣܳܐ ܕܥܽܘܦܳܝܳܐ ܕܰܥܠܰܝ̈ܡܶܐ

ܪܫܳܡ ܨܠܺܝܒܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ. ܐܰܡܺܝܢ܀

ܬܠܺܝܬܳܝ ܩܽܘܕ̈ܫܶܐ

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬܳܐ ܘܳܐܬܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܛܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ.

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ܀

ܨܠܽܘܬ݂ܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬ݂ܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܐܰܫܘܳܐ ܡܳܪܝ ܠܢܰܦܫܳܐ ܗܳܕܶܐ ܕܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܐܰܓܗܝܰܬ: ܘܡܶܢ ܥܳܠܡܳܐ ܗܳܢܳܐ ܕܥܳܩ̈ܳܬܳܐ ܫܰܢܝܰܬ. ܕܬܶܬܗܰܕܶܐ ܡܶܢ ܡܰܠܰܐܟ̈ܶܐ ܕܺܝܠܳܟ ܩܰܕܺܝ̈ܫܶܐ ܠܰܐܬܪ̈ܰܘܳܬܳܐ ܡܰܠܝܰܝ̈ ܢܝܳܚܳܐ ܘܒܽܘܣܳܡܳܐ: ܥܕܰܡܳܐ ܠܝܰܘܡܳܐ ܕܰܩܝܳܡܬܳܐ. ܘܬܰܡܳܢ ܒܓܰܠܝܽܘܬ ܐܰܦ̈ܶܐ ܬܶܦܓܰܥ ܒܳܟ. ܘܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ: ܥܰܕܠܳܐ ܢܺܐܙܠ̱ܽܘܢ ܚܰܘ̈ܒܰܝ

ܥܰܕܠܳܐ ܢܺܐܙܠ̱ܽܘܢ ܚܰܘ̈ܒܰܝ: ܩܽܘܕܡܰܝ ܠܓܰܘ ܒܶܝܬ ܕܺܝܢܳܐ. ܘܰܢܩܺܝܡܽܘܢܳܢܝ̱ ܩܕܳܡ ܕܰܝܳܢܳܐ ܟܰܕ ܒܰܗܺܝܬ ܐ̱ܢܳܐ. ܐܶܬܪܰܚܰܡܥܠܰܝ ܐܰܠܳܗܳܐ܀

ܥܰܕܠܳܐ ܬܶܪܗܰܛ ܓܺܝܓܰܠ ܙܰܒܢܳܐ: ܠܥܶܠ ܡܶܢ ܒܺܐܪܳܐ. ܘܬܶܬܒܰܪ ܩܽܘܠܬܳܐ ܥܰܠ ܡܰܒܽܘܥܳܐ: ܕܟܽܠ ܫܰܪ̈ܒܳܬܳܐ. ܐܶܬܪܰܚܰܡ ܥܰܠ ܢܰܦܫܶܗ ܕܥܰܒܕܳܟ܀

ܡܳܐ ܕܡܶܬܩܰܪܩܰܫ ܐܰܝܟ ܐܺܝܠܳܢܳܐ: ܪܩܺܝܥܳܐ ܕܰܠܥܶܠ. ܘܢܳܬܪܺܝܢ ܡܶܢܶܗ ܟܽܠ ܢܰܗܺܝܪ̈ܶܐ ܕܰܣܕܺܝܪ̈ܺܝܢ ܒܶܗ. ܐܶܬܪܰܚܰܡܥܠܰܝ ܐܰܠܳܗܳܐ܀

ܡܳܐ ܕܰܡܩܺܝܡܳܐ ܪܽܘܚ ܢܽܘܚܳܡܳܐ: ܠܝܰܠ̈ܕܰܘܗ̱ܝ ܕܐܳܕܳܡ. ܘܡܳܠܝܳܐ ܡܶܢܗܽܘܢ ܐܳܦ ܡܰܠܟܽܘܬܳܐ ܐܳܦ ܓܺܗܰܢܳܐ. ܐܶܬܪܰܚܰܡܥܠܰܝ ܐܰܠܳܗܳܐ܀

ܕܺܝܠܳܟ ܐ̱ܢܳܐ ܡܳܪܝ̱: ܐܳܦܶܢ ܐܶܡܽܘܬ ܐܳܦܶܢ ܐܺܚܶܐ. ܒܡܰܘܬܳܐ ܘܚܰܝ̈ܶܐ: ܐܰܢ̱ܬ ܗ̱ܘ ܦܳܪܽܘܩܝ̱ ܠܳܟ ܐܶܣܰܟܶܐ. ܐܶܬܪܰܚܰܡܥܠܰܝ ܐܰܠܳܗܳܐ܀

ܡܙܡܘܪܐ܆ ܩܳܠܳܐ: ܩܽܘܩܰܠܝܽܘܢ ܫܒܺܝܥܳܝܳܐ

ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ̱ ܗ̄ܘܗ̄ ܐܳܦ ܠܳܐ ܒܚܶܡܬܳܟ ܬܶܪܕܶܢܝ̱܀

ܪܰܚܶܡܥܠܰܝ ܡܶܛܽܠ ܕܰܟܪܺܝܗ ܐ̱ܢܳܐ ܗ̄ܘܗ̄ ܐܰܣܳܢܝ̱ ܡܳܪܝܳܐ ܡܶܛܽܠ ܕܙܳܟܘ ܓܰܪ̈ܡܰܝ܀

ܘܢܰܦܫܝ̱ ܐܶܬܬܙܺܝܥܰܬ ܛܳܒ ܗ̄ܘܗ̄ ܘܰܐܢ̱ܬ ܡܳܪܝܳܐ ܥܕܰܡܳܐ ܠܶܐܡܰܬܝ̱܀

ܐܶܬܦܰܢ ܡܳܪܝܳܐ ܘܦܰܨܳܗ̇ ܠܢܰܦܫܝ̱ ܗ̄ܘܗ̄ ܘܰܦܪܽܘܩܰܝܢܝ̱ ܡܶܛܽܠ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܥܶܩܒܳܐ

ܠܟܽܘܢ ܛܽܘܒܰܝܟܽܘܢ ܥܰܢܺܝ̈ܕܶܐ. ܒܗܰܘ ܝܰܘܡܳܐ ܕܗܳܘܶܐ ܢܽܘܚܳܡܳܐ. ܕܦܰܓܪܳܐ ܚܰܝܳܐ ܗܰܘ ܕܶܐܟܰܠܬܽܘܢ. ܕܡܳܐ ܡܚܰܣܝܳܢܳܐ ܗܰܘ ܕܶܐܫܬܺܝܬܽܘܢ. ܡܩܺܝܡ ܠܟܽܘܢ ܒܓܰܒܳܐ ܕܝܰܡܺܝܢܳܐ܀

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳـܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܇ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܡܫܰܡܠܝܳܐ ܒܰܟܝܳܢܳܐ ܘܒܽܐܘܣܺܝܰܐ: ܕܒܰܡܕܰܒܪܳܢܽܘܬܳܐ ܐܶܬܪܰܒܺܝ ܒܚܶܟܡܬܳܐ ܘܰܒܩܰܘܡܬܳܐ ܘܰܒܛܰܝܒܽܘܬܳܐ: ܟܰܕ ܒܰܕܡܽܘܬܳܐ ܕܰܒܢܰܝ̈ܳܐ ܐܶܫܬܰܘܬܰܦ ܠܒܶܣܪܳܐ ܘܰܕܡܳܐ ܐܰܝܟܰܢܳܐ ܕܰܢܒܰܛܶܠ ܠܳܐܟܶܠܩܰܪܨܳܐ ܕܺܐܝܬ ܠܶܗ ܐܽܘܚܕܳܢܶܗ ܕܡܰܘܬܳܐ: ܕܗܽܘ ܢܫܰܟܶܢ ܠܰܢ ܕܺܚܘܺܚܝܳܐܺܝܬ ܘܰܡܫܰܪܪܳܐܺܝܬ ܘܰܟܪܺܣܛܝܳܢܳܐܺܝܬ ܢܫܰܕܰܪ ܠܰܒܢܰܝ̈ܢ ܠܘܳܬܶܗ ܐܰܝܟ ܗܡܰܝܪ̈ܶܐ ܡܰܠ̈ܟܳܝܶܐ ܒܫܰܦܺܝܪܽܘܬ ܣܶܦ̈ܘܳܬܳܐ ܕܡܰܘܕܝܳܢ ܠܰܫܡܶܗ: ܘܰܠܗܽܘܢ ܢܰܫܘܶܐ ܕܰܐܝܟ ܐܶܡܪ̈ܶܐ ܒܢܺܝܣܳܢ ܢܕܰܝܨܽܘܢ ܥܰܡܶܗ ܒܡܰܪ̈ܓܶܐ ܫܡܰܝ̈ܳܢܶܐ ܣܰܓܺܝ̈ܰܐܝ ܒܽܘ̈ܣܳܡܶܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܥܽܘܦܳܝܶܗ ܕܰܐܚܽܘܢ ܗܳܢܳܐ ܕܰܥܢܰܕ ܡܫܰܡܠܶܝܢܰܢ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܰܘ ܛܳܒܳܐ ܘܛܽܘܒܬܳܢܳܐ: ܡܪܰܚܡܳܢܳܐ ܘܰܡܪܰܚܦܳܢܳܐ: ܡܶܠܬܳܐ ܡܬܽܘܡܳܝܳܐ ܘܥܳܠܡܺܝܢܳܝܳܐ: ܗܰܘ ܕܡܶܛܽܠ ܛܰܝܒܽܘܬܳܐ ܛܒܺܝܒܬܳܐ ܕܶܐܬܳܬ ܠܰܡܨܰܥܬܳܐ: ܐܰܒܪܩܰܬ ܠܰܒܢܰܝ̈ܢܳܫܳܐ ܒܬܽܘܠܽܘܬܳܐ ܢܰܨܺܝܚܬܳܐ: ܘܽܐܘܪܚܳܐ ܡܛܰܝܰܒܬܳܐ ܘܰܫܦܺܝܬܳܐ ܚܰܘܺܝܬܳܗ̇ ܠܫܰܪ̈ܒܳܬܳܐ ܘܠܶܐܡܘ̈ܳܬܳܐ: ܘܰܡܢܳܬܳܐ ܐܰܩܺܝܡܬܳܗ̇ ܒܥܳܠܡܳܐ: ܕܰܡܚܰܪܪܳܐ ܡܶܢ ܥܳܠܡܳܐ ܘܰܠܥܳܠܡܳܐ ܡܚܰܪܪܳܐ: ܘܰܐܟܪܶܙܬܳܗ̇ ܕܰܡܥܰܠܝܳܐ ܡܶܢ ܙܽܘܘܳܓܳܐ: ܐܰܟܡܳܐ ܕܰܡܥܰܠܝܳܐ ܢܰܦܫܳܐ ܡܶܢ ܦܰܓܪܳܐ ܘܰܫܡܰܝܳܐ ܡܶܢ ܐܰܪܥܳܐ: ܘܡܶܢ ܥܳܠܡܳܐ ܕܛܳܠܶܩ ܘܕܳܐܶܒ: ܥܳܠܡܳܐ ܕܰܡܩܰܘܶܐ: ܠܳܟ ܗܳܟܺܝܠ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܡܰܠܟܳܐ ܡܪܰܝܡܳܐ ܘܡܳܪܳܗ̇ ܕܬܶܫܒܽܘܚܬܳܐ: ܡܩܰܒܠܳܢܳܐ ܕܪ̈ܽܘܚܳܬܳܐ ܚܰܣ̈ܝܳܬܳܐ ܕܰܛܠܳܝ̈ܶܐ ܫܦܰܝ̈ܳܐ ܘܬܰܡܺܝ̈ܡܶܐ: ܡܶܬܟܰܫܦܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܫܳܐܠܺܝܢܰܢ ܡܶܢ ܛܰܝܒܽܘܬܳܟ ܣܰܓܺܝܰܐܬ ܥܽܘܕܪ̈ܳܢܶܐ: ܚܠܳܦ ܥܰܒܕܳܟ ܗܳܢܳܐ (ܦܠܢ) ܕܦܰܐܝܽܘܬ ܒܬܽܘܠܳܐܺܝܬ ܢܦܰܩ ܡܶܢ ܥܳܠܡܳܐ: ܘܪܰܒܽܘܬ ܢܰܟܦܳܐܺܝܬ ܕܰܒܪܶܗ ܦܽܘܩܕܳܢܳܟ: ܕܬܶܦܓܰܥ ܒܪܽܘܚܶܗ ܦܨܺܝܚܳܐܺܝܬ: ܐܰܢ̱ܬ ܡܳܪܝ ܩܰܒܶܠܳܝܗܝ ܪܶܚܡܰܬ ܐ̱ܢܳܫܳܐܺܝܬ: ܘܰܐܫܪܳܝܗܝ ܒܰܐܘ̈ܘܳܢܶܐ ܕܢܽܘܗܪܳܐ ܘܕܰܪܘܳܙܳܐ ܢܺܝܚܳܐܺܝܬ: ܚܠܽܘܛܳܝܗܝ ܥܰܡ ܐܶܡܪ̈ܶܐ ܒܢܰܝ̈ ܝܰܡܺܝܢܳܟ ܚܳܕܝܳܐܺܝܬ: ܐܰܫܪܳܝܗܝ ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ ܘܒܰܡܛܰܠ̱̈ـܠܶܐ ܢܰܗܺܝܪ̈ܳܬܳܐ ܒܰܣܺܝܡܳܐܺܝܬ: ܘܰܐܥܡܰܪܳܝܗܝ ܥܰܡ ܕܟܰܝ̈ܳܐ ܘܩܰܕܺܝ̈ܫܶܐ ܕܰܟܝܳܐܺܝܬ: ܐܰܣܡܶܟܳܝܗܝ ܥܰܡ ܡܛܰܝ̈ܒܶܐ ܕܡܶܫܬܽܘܬܳܟ ܪܽܘܚܳܢܳܝܬܳܐ ܡܛܰܝܒܳܐܺܝܬ: ܐܰܦܨܰܚܳܝܗܝ ܥܰܡ ܙܗܰܝ̈ܳܐ ܘܢܰܨܺܝ̈ܚܶܐ ܙܰܗܝܳܐܺܝܬ: ܘܰܚܠܳܦ ܕܰܓܠܰܙܬܳܝܗܝ ܡܶܢ ܚܠܽܘܠܳܐ ܗܳܢܳܐ ܥܳܒܽܘܪܳܐ: ܚܠܽܘܠܳܐ ܕܠܳܐ ܥܳܒܰܪ ܥܰܬܶܕ ܠܶܗ ܡܙܰܡܢܳܢܳܐܺܝܬ: ܘܰܚܠܳܦ ܟܠܺܝܠܳܐ ܕܥܳܒܰܪ: ܟܠܺܝܠܳܐ ܕܠܳܐ ܥܳܒܰܪ ܛܰܝܶܒ ܠܶܗ ܦܨܺܝܚܳܐܺܝܬ: ܘܰܚܠܳܦ ܥܒܳܕ̈ܶܐ ܚܶܫܽܘ̈ܟܳܝܶܐ ܕܰܐܣܠܺܝ: ܐܰܕܢܰܚ ܠܶܗ ܢܽܘܗܪܳܟ ܡܫܰܒܚܳܐ ܨܰܡܽܘܚܬܳܢܳܐܺܝܬ: ܘܰܚܠܳܦ ܒܰܝܬܳܐ ܡܫܰܘܚܕܳܐ ܕܰܨܕܳܐ ܥܠܰܘܝܗܝ: ܐܰܣܡܶܟܳܝܗܝ ܒܰܚܠܽܘܠܳܐ ܕܪܰܒܽܘܬܳܟ ܡܫܰܝܢܳܐܺܝܬ: ܘܰܒܝܰܘܡܳܐ ܗܰܘ ܕܒܶܗ ܕܳܢܰܚ ܐܰܢ̱ܬ ܒܬܶܫܒܽܘܚܬܳܐ ܐܰܒܳܗܳܝܬܳܐ: ܢܶܐܪܥܳܟ ܒܚܰܕܽܘܬܳܐ ܘܒܰܦܨܺܝܚܽܘܬܳܐ ܕܠܶܒܳܐ ܗܰܢܺܝܳܐܺܝܬ: ܐܰܢܗܰܪ ܠܰܡܦܺܝܕܶܗ ܐܰܝܟ ܫܶܡܫܳܐ: ܘܰܐܙܠܶܓ ܐܰܝܟ ܨܶܡܚܳܐ ܦܰܪܨܽܘܦܶܗ ܢܰܗܺܝܪܳܐܺܝܬ: ܘܠܰܢ ܕܶܝܢ ܐܰܫܘܳܐ ܐܳܘ ܡܳܪܝܳܐ ܕܰܒܗܰܝܡܳܢܽܘܬܳܐ ܫܰܪܺܝܪܬܳܐ ܘܰܒܕܽܘܒܳܪ̈ܶܐ ܕܢܰܟܦܽܘܬܳܐ ܢܩܽܘܡ ܕܰܟܝܳܐܺܝܬ: ܘܢܶܢܗܪܽܘܢ ܬܽܘܒ ܠܰܡܦܺܝ̈ܕܰܝܢ ܩܕܳܡܰܝܟ ܐܰܝܟ ܫܶܡܫܳܐ ܥܰܬܺܝܪ ܙܰܠܓ̈ܶܐ ܗܕܺܝܪܳܐܺܝܬ: ܐܰܝܟܰܢܳܐ ܕܰܒܥܺܐܕܳܐ ܗܰܘ ܕܠܳܐ ܥܳܒܰܪ ܘܠܳܐ ܡܶܫܬܪܶܐ ܘܠܳܐ ܦܳܛܪ̈ܳܢ ܚܰܕܘ̈ܳܬܶܗ ܘܳܠܝܳܐܺܝܬ ܥܰܡ ܐܶܡܪ̈ܶܐ ܒܢܰܝ̈ ܝܰܡܺܝܢܳܟ ܢܕܽܘܨ ܘܢܶܚܕܶܐ ܘܢܶܙܡܰܪ ܠܳܟ ܬܶܫ̈ܒܚܳܬܳܐ ܐܰܡܺܝ̈ܢܳܬܳܐ ܠܳܐ ܡܶܫܬܰܬܩܳܢܳܐܺܝܬ: ܘܠܰܐܒܽܘܟ ܡܒܰܪܟܳܐ ܘܛܽܘܒܬܳܢܳܐ ܘܰܠܪܽܘܚܳܟ ܩܰܕܺܝܫܳܐ ܫܰܘܝܳܐܺܝܬ ܠܥܳܠܰܡ ܥܳܠܡܺܝܢ ܒܰܪܶܟܡܳܪܝ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠ̈ܡܺܝܢ ܐܰܡܺܝܢ܀

ܩܳܠܳܐ: ܩܽܘܩܳܝܳܐ
ܒܪܶܟܢܳܐ ܫܒܺܝܥܳܝܳܐ

ܗܳܐ ܥܠܰܝ̈ܡܶܐ ܒܰܟܠܺܝ̈ܠܰܝܗܽܘܢ ܕܳܒܰܪ ܡܰܘܬܳܐ. ܘܠܳܐ ܚܳܐܶܣ ܥܰܠ ܨܶܒܬܰܝ̈ܗܽܘܢ ܕܒܰܐܪܥܳܐ ܫܳܕܶܐ ܠܗܽܘܢ. ܡܚܰܒܶܠ ܫܽܘܦܪܳܐ. ܦܰܐܝܳܐ ܕܨܽܘܪ̈ܳܬܗܽܘܢ. ܘܚܳܒܶܫ ܒܰܫܝܽܘܠ. ܥܽܘܫܢܳܐ ܕܦܰܐܝܽܘܬܗܽܘܢ. ܘܡܰܥܒܰܪ ܡܶܢܗܽܘܢ ܦܰܐܝܽܘܬܳܐ ܕܰܩܢܽܘܡܰܝ̈ܗܽܘܢ. ܦܳܪܶܩ ܥܳܠ̈ܡܶܐ ܘܒܶܪ̈ܝܳܬܳܐ ܢܚܰܕܶܬ ܨܽܘܪ̈ܳܬܗܽܘܢ ܗ̄ܘܗ̄܀

ܫܽܘܒܚܳܐ: ܢܦܰܩ ܚܰܬܢܳܐ ܡܶܢ ܩܰܝܛܽܘܢܶܗ ܒܶܐܒܠܳܐ ܪܰܒܳܐ. ܘܰܠܩܰܒܪܳܐ ܪܗܺܝܒ ܗ̱ܘܳܐ ܕܢܺܐܙܰܠ ܕܥܰܡ ܡܺܝ̈ܬܶܐ ܢܶܓܢܶܐ. ܫܒܰܩ ܠܰܓܢܽܘܢܳܐ. ܘܰܪܚܶܡ ܠܽܐܘܠ̈ܝܳܬܳܐ. ܫܒܰܩ ܩܰܝܛܽܘܢܳܐ. ܘܰܣܢܳܐ ܚܰܕ̈ܘܳܬܳܐ. ܚܕܽܘ̈ܓܶܐ ܐܳܠܶܝܢ ܠܰܟܠܺܝܠܶܗ ܕܰܢܦܰܠ ܡܶܢ ܪܺܝܫܶܗ. ܚܰܬܢܳܐ ܡܫܺܝܚܳܐ ܡܢܰܚܶܡ ܠܶܗ ܒܫܽܘܒܚܳܐ ܕܠܳܐ ܚܒܳܠܳܐ ܗ̄ܘܗ̄܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܟܳܗܢܳܐ: ܒܶܝܬ ܓܰܘܣܳܐ ܕܚܽܘܣܳܝܳܐ ܘܰܠܡܺܐܢܳܐ ܕܫܽܘܒܩܳܢܳܐ ܘܓܰܙܳܐ ܕܥܽܘܕܪ̈ܳܢܶܐ ܘܰܕܛܳܒ̈ܳܬܳܐ ܡܳܪܝܳܐ. ܐܰܢ̱ܬ ܒܪܶܚܡܰܬ ܐ̱ܢܳܫܽܘܬܳܟ ܩܰܒܶܠ ܠܥܶܛܪܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ. ܘܫܰܟܶܢ ܒܶܗ ܚܢܳܢܳܐ ܘܚܽܘܣܳܝܳܐ ܘܒܽܘܣܳܡܳܐ ܠܢܰܦ̈ܫܳܬܳܐ ܘܪ̈ܽܘܚܳܬܳܐ ܕܡܶܛܽܠܳܬܗܶܝܢ ܐܶܬܩܰܪܰܒ. ܘܒܽܘܝܳܐܳܐ ܘܥܽܘܕܪܳܢܳܐ ܠܰܐܝܠܶܝܢ ܕܰܚܠܳܦܰܝܗܽܘܢ ܦܪܰܫܘ ܘܫܰܡܠܺܝܘ. ܘܡܳܐ ܕܡܶܬܓܠܶܐ ܢܺܝܫܳܐ ܕܰܐܠܳܗܽܘܬܳܟ. ܥܰܒܕܳܟ ܘܣܳܓܽܘܕܳܟ (ܦܠܢ) ܕܰܫܟܶܒ ܥܰܠ ܣܰܒܪܳܟ ܢܩܽܘܡ ܡܶܢ ܝܰܡܺܝܢܳܟ ܘܢܶܚܙܶܐ ܚܢܳܢܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܰܕܪ̈ܳܫܶܐ ܒܩܳܠܳܐ: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܛܽܘܒܰܘܗ̱ܝ ܠܡܰܢ ܕܰܚܙܰܩ ܨܶܝܕ ܡܳܪܶܗ: ܘܠܳܐ ܚܰܝܒܶܗ ܥܳܠܡܳܐ ܒܰܚܛܺܝܬܳܐ܀

ܠܫܰܪܘܰܝܢܳܐ ܕܳܡܝܳܐ ܥܠܰܝܡܽܘܬܳܐ. ܕܡܶܬܟܰܦܦܳܐ ܒܰܫܝܽܘܠ ܘܡܶܬܬܫܺܝܛܳܐ. ܡܩܰܒܶܠ ܠܳܗ̇ ܡܰܘܬܳܐ ܘܚܳܕܶܐ ܒܳܗ̇. ܘܣܳܐܶܡ ܠܳܗ̇ ܒܰܐܘܨܪ̈ܰܘܗ̱ܝ ܠܰܚܒܳܠܳܐ. ܚܰܕܶܬ ܨܽܘܪ̈ܳܬܳܗ̇ ܒܰܚܢܳܢܳܟ܀

ܚܰܬܢܳܐ ܫܡܰܝܳܢܳܐ ܚܠܽܘܠܳܐ ܥܒܰܕ. ܘܙܰܡܶܢ ܩܪܳܐ ܥܠܰܝ̈ܡܶܐ ܕܰܢܚܰܓܽܘܢ. ܦܳܬܽܘܪܳܐ ܕܛܽܘ̈ܒܶܐ ܠܗܽܘܢ ܐܰܬܩܶܢ. ܕܰܥܠܰܘܗ̱ܝ ܢܶܣܬܰܡܟܽܘܢ ܟܰܕ ܚܳܕܶܝܢ. ܒܪܺܝܟ ܗ̱ܽܘ ܡܙܰܡܢܳܢܳܐ ܕܰܠܗܽܘܢ ܩܪܳܐ܀

ܐܚܪܺܢܳܐ ܒܩ̄: ܐܶܬܟܰܢܰܫܘ ܐܰܚܰܝ̈

ܥܽܘܢܺܝܬܳܐ: ܡܫܺܝܚܳܐ ܕܗܽܘ ܕܰܒܪܳܟ: ܢܡܰܢܥܳܟ ܠܰܓܢܽܘܢܶܗ܀

ܥܠܰܝ̈ܡܶܐ ܘܓܰܕܽܘ̈ܕܶܐ. ܡܶܬܚܰܒܠܺܝܢ ܒܰܫܝܽܘܠ. ܪ̈ܚܺܝܡܶܐ ܘܫܰܦܺܝܪ̈ܶܐ. ܗܳܘܶܝܢ ܠܣܽܘܪܳܕܳܐ. ܚܽܘܣ ܡܳܪܝ̱ ܘܪܽܘܣ ܠܗܽܘܢ. ܛܰܠܳܐ ܕܒܽܘܝܳܐܳܐ܀

ܢܰܢܗܰܪ ܠܺܝ ܡܳܪܰܢ. ܢܽܘܗܪܳܟ ܒܚܶܫܽܘܟܳܐ. ܕܶܐܬܟܰܪܺܝܘ ܚܰܝܰܝ̈. ܒܥܳܠܡܳܐ ܥܳܒܽܘܪܳܐ. ܒܚܰܝ̈ܶܐ ܕܠܳܐ ܫܽܘܠܳܡ. ܢܶܚܙܶܝܟ ܘܢܶܬܒܰܝܰܐ܀

ܥܰܡ ܝܰܘܣܶܦ ܢܰܟܦܳܐ. ܥܠܰܝܡܳܐ ܕܶܐܬܢܰܨܰܚ. ܬܶܫܬܘܶܐ ܠܦܽܘܪܥܳܢܳܐ. ܒܛܰܝܒܽܘ ܕܰܐܠܳܗܳܐ. ܘܬܰܘܕܶܐ ܠܶܗ ܬܰܡܳܢ. ܕܰܐܫܘܝܳܟ ܠܫܽܘܒܩܳܢܳܐ܀

ܐܚܪܺܢܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܒܪܺܝܟ ܗܽܘ ܡܫܺܝܚܳܐ: ܕܰܡܢܰܚܶܡ ܠܥܰܢܺܝ̈ܕܶܐ. ܘܡܰܠܒܶܫ ܫܽܘܒܚܳܐ. ܠܦܰܓܪ̈ܰܝܗܽܘܢ ܒܢܽܘܚܳܡܳܐ܀

ܒܰܕܡܽܘܬ ܘܰܪ̈ܕܶܐ. ܘܫܽܘ̈ܫܰܢܶܐ ܕܒܰܪ ܡܰܘܬܳܐ. ܥܠܰܝ̈ܡܶܐ ܪ̈ܚܺܝܡܶܐ. ܡܶܢ ܥܳܠܡܳܐ ܕܥܳܩ̈ܳܬܳܐ. ܕܡܶܢ ܗܳܪܟܳܐ ܒܟܰܪܝܽܘܬܳܐ ܫܰܢܺܝܘ. ܒܰܓܢܽܘܢܳܟ ܡܳܪܰܢ ܢܶܬܒܰܣܡܽܘܢ. ܘܥܰܡ ܟܺܐܢ̈ܶܐ ܕܰܫܦܰܪܘ ܠܳܟ. ܢܶܬܚܰܕܽܘܢ ܒܡܰܠܟܽܘܬܳܟ܀

ܩܳܠܳܐ ܕܰܩܪܳܝܗ̱ܝ ܠܓܰܝܳܣܳܐ ܒܰܙܩܺܝܦܳܐ. ܘܝܰܗ̱ܒ ܗ̱ܘܳܐ ܒܺܐܝܕܶܗ ܩܠܺܝ̈ܕܶܐ ܓܶܝܪ ܕܦܰܪܕܰܝܣܳܐ. ܗܰܘ ܩܳܠܳܐ ܕܰܩܪܳܝܗ̱ܝ ܠܠܳܥܳܙܳܪ. ܘܠܰܥܠܰܝܡܳܐ ܗܰܘ ܒܪܳܗ̇ ܕܰܐܪܡܰܠܬܳܐ. ܗܽܘ ܢܶܩܪܶܐ ܘܰܢܩܺܝܡܳܟ. ܡܶܢ ܓܰܒܳܐ ܕܝܰܡܺܝܢܳܐ܀

ܐܚܪܺܢܳܐ ܒܩ̄: ܥܺܕܬܳܐ ܦܽܘܫܝ ܠܶܟܝ ܒܰܫܠܳܡܳܐ

ܥܽܘܢܺܝܬܳܐ: ܟܳܣܳܐ ܕܰܡܙܰܓ ܒܰܪ ܐܰܠܳܗܳܐ ܠܝܰܠ̈ܕܰܘܗ̱ܝ ܕܳܐܕܳܡ. ܐܳܦ ܗ̱ܽܘ ܡܳܪܰܢ ܛܰܥܡܶܗ ܘܶܐܡܰܪ ܕܡܰܪܺܝܪ ܡܰܘܬܳܐ܀

ܩܳܝܡܳܐ ܢܰܦܫܳܐ ܒܚܰܫܳܐ ܪܰܒܳܐ ܘܰܒܟܰܪܝܽܘܬܳܐ. ܘܰܡܢܰܬܦܺܝܢ ܠܳܗ̇ ܡܶܟܳܐ ܘܡܶܟܳܐ ܕܠܰܐܝܟܳܐ ܬܺܐܙܰܠ. ܫܺܐܕ̈ܶܐ ܒܳܥܶܝܢ ܕܥܰܡܗܽܘܢ ܬܺܐܙܰܠ ܠܓܰܘ ܓܺܗܰܢܳܐ. ܐܳܦ ܡܰܠܰܐܟ̈ܶܐ ܕܥܰܡܗܽܘܢ ܬܶܪܕܶܐ ܠܒܶܝܬ ܡܰܠܟܽܘܬܳܐ܀

ܩܳܝܡܳܐ ܢܰܦܫܳܐ ܠܥܶܠ ܡܶܢ ܦܰܓܪܳܐ ܟܰܕ ܐܳܡܪܳܐ ܠܶܗ: ܕܰܫܒܳܢܝ̱ ܡܰܘܬܳܐ ܦܽܘܫ ܒܰܫܠܳܡܳܐ ܕܳܐܙܳܠ̱ܐ ܐ̱ܢܳܐ ܠܺܝ. ܐܳܡܰܪ ܦܰܓܪܳܐ ܙܶܠܝ ܒܰܫܠܳܡܳܐ ܢܰܦܫܳܐ ܪܚܺܝܡܬܳܐ. ܡܫܺܝܚܳܐ ܕܓܰܒܠܰܢ ܗܽܘ ܡܫܰܘܙܶܒ ܠܰܢ ܡܶܢ ܓܺܗܰܢܳܐ܀

ܦܽܘܫ ܒܰܫܠܳܡܳܐ ܫܒܳܒܳܐ ܪܚܺܝܡܳܐ ܕܦܰܪܫܶܗ ܡܰܘܬܳܐ. ܐܶܢ ܠܡܰܠܟܽܘܬܳܐ ܘܶܐܢ ܠܓܺܗܰܢܳܐ ܬܪ̈ܰܝܢ ܫܰܘܝܳܐܺܝܬ. ܐܳܡܰܪ ܦܰܓܪܳܐ ܙܶܠܝ ܒܰܫܠܳܡܳܐ ܢܰܦܫܳܐ ܪܚܺܝܡܬܳܐ. ܡܫܺܝܚܳܐ ܕܕܰܒܪܶܟܝ ܗܽܘ ܡܰܦܢܶܐ ܠܶܟܝ ܒܝܽܘܡ ܢܽܘܚܳܡܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ

ܠܥܰܒܕܳܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ: ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܰܝܟ܀

ܡܳܪܝ ܘܰܥܠܰܝ ܚܽܘܣ ܘܺܐܚܶܐ ܒܪ̈ܰܚܡܶܐ ܕܡܶܢ ܝܰܡܺܝܢܳܐ. ܘܠܳܐ ܐܶܫܬܰܢܰܩ ܐܰܝܟ ܥܰܬܺܝܪܳܐ ܒܓܰܘ ܓܺܗܰܢܳܐ. ܒܶܐܠܦܳܐ ܕܡܰܝ̈ܳܐ ܠܝܰܡܳܐ ܕܢܽܘܪܳܐ ܗܰܒ ܠܺܝ ܕܶܐܥܒܰܪ. ܘܠܳܐ ܢܟ̣ܽܘܡ ܥܠܰܝ ܐܰܬܪܳܐ ܥܰܣܩܳܐ ܕܫܰܠܗܶܒܺܝܬܳܐ܀

ܬܶܒܗܰܬ ܢܽܘܪܳܐ ܡܶܢ ܗܰܕܳܡܰܝ̈ ܡܳܐ ܕܰܡܚܳܐ ܡܶܢܝ. ܪܺܝܚܶܗ ܕܦܰܓܪܳܟ ܘܰܕܡܳܟ ܚܰܣܝܳܐ ܕܰܡܡܰܙܰܓ ܒܺܝ. ܛܳܒܳܐ ܕܫܰܠܺܝܛ ܥܰܠ ܡܰܠܟܽܘܬܳܐ ܘܥܰܠ ܓܺܗܰܢܳܐ. ܡܶܢ ܓܺܗܰܢܳܐ ܦܰܨܳܐ ܠܺܝ ܡܳܪܝ ܘܪܰܚܶܡܥܠܰܝ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ: ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܙܽܘܡܳܪܳܐ:

ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܪܽܘܚܩܽܘܕܫܳܐ ܒܕܰܘܺܝܕ ܙܶܡܪܰܬ܀

ܩܶܪ̈ܝܳܢܶܐ
ܡܶܢ ܣܶܦܪܳܐ ܩܰܕܡܳܝܳܐ ܕܽܐܘܪܳܝܬܳܐ (ܕܰܒܪܺܝܬܳܐ)
ܠܙ: ܟܛ – ܠܘ Genesis 37: 29 – 36

ܘܰܗܦܰܟ ܪܽܘܒܺܝܠ ܠܓܽܘܒܳܐ: ܘܗܳܐ ܠܰܝܬ ܒܶܗ ܝܰܘܣܶܦ: ܘܨܰܪܺܝ ܠܒܽܘܫܰܘ̈ܗܝ. ܘܰܗܦܰܟ ܠܘܳܬ ܐܰܚܰܘ̈ܗܝ: ܘܶܐܡܰܪ ܠܗܽܘܢ: ܛܰܠܝܳܐ ܐܰܝܟܰܐ ܗ̱ܘ: ܘܶܐܢܳܐ ܠܰܐܝܟܳܐ ܐܳܙܶܠ ܐ̱ܢܳܐ. ܘܢܰܣܒܽܘܗ̇ ܠܟܽܘܬܺܝܢܳܐ ܕܝܰܘܣܶܦ: ܘܰܢܟܰܣܘ ܨܺܦܪܳܝܳܐ ܕܥܶܙ̈ܶܐ: ܘܦܰܠܦܠܽܘܗ̇ ܠܟܽܘܬܺܝܢܳܐ ܒܰܕܡܶܗ. ܘܫܰܕܪܽܘܗ̇ ܠܟܽܘܬܺܝܢܳܐ ܕܦܶܕ̈ܝܳܬܳܐ ܘܰܐܝܬܝܽܘܗ̇ ܠܰܐܒܽܘܗܽܘܢ: ܘܶܐܡܰܪܘ: ܗܳܕܶܐ ܐܶܫܟܰܚܢ: ܐܶܫܬܰܘܕܰܥ ܟܽܘܬܺܝܢܳܐ: ܐܶܢ ܕܰܒܪܳܟ ܗ̱ܝ ܐܰܘ ܠܳܐ. ܘܶܐܫܬܰܘܕܥܳܗ̇ ܘܶܐܡܰܪ: ܟܽܘܬܺܝܢܳܐ ܕܒܶܪܝ ܗ̱ܝ: ܚܰܝܽܘܬܳܐ ܒܺܝܫܬܳܐ ܐܶܟܰܠܬܶܗ: ܡܶܬܒܰܪ ܬܒܺܝܪ ܝܰܘܣܶܦ ܒܶܪܝ. ܘܨܰܪܺܝ ܝܰܥܩܽܘܒ ܠܒܽܘܫܰܘ̈ܗܝ: ܘܶܐܣܰܪ ܣܰܩܳܐ ܒܚܰܨܰܘ̈ܗܝ: ܘܶܐܬܐܒܶܠ ܥܰܠ ܒܪܶܗ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܩܳܡܘ ܟܽܠܗܽܘܢ ܒܢܰܘ̈ܗܝ: ܘܟܽܠܗܶܝܢ ܒܢ̈ܳܬܶܗ ܠܰܡܒܰܝܳܐܽܘܬܶܗ: ܘܠܳܐ ܨܒܳܐ ܠܡܶܬܒܰܝܳܐܽܘ: ܘܶܐܡܰܪ: ܐܶܚܽܘܬ ܥܰܠ ܒܶܪܝ ܟܰܕ ܐܰܒܺܝܠ ܐ̱ܢܳܐ ܠܰܫܝܽܘܠ: ܘܰܒܟܳܝܗܝ ܐܰܒܽܘܗܝ. ܘܡܶܕܝܰܢܳܝ̈ܶܐ ܙܰܒܢܽܘܗܝ ܒܡܶܨܪܶܝܢ ܠܦܽܘܛܺܝܦܰܪ ܡܗܰܝܡܢܳܐ: ܪܰܒ ܕܰܚ̈ܫܶܐ ܕܦܶܪܥܽܘܢ. ܒܰܪܶܟܡܳܪܝ܀

ܩܕܳܡ ܦܪܰܟܣܺܝܣ
ܒܩ̄: ܠܶܟܝ ܢܶܬܟܰܫܰܦ

ܫܠܺܝ̈ܚܶܐ ܓ̣ܒܰܝ̈ܳܐ. ܕܶܐܫܬܰܕܰܪܘ̱ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ. ܘܰܢܦܰܩܘ̱ ܐܰܟ̣ܪܶܙܘ̱. ܣܒܰܪܬ̣ܶܗ ܕܰܒܪܳܐ ܒܶܝܬ̣ ܥܰܡ̱̈ܡܶܐ ܘܥܶܒܪ̈ܶܝܗ̇ ܕܰܐܪܥܳܐ. ܣܰܒܰܪܘ̱ ܗ̱ܘܰܘ ܡܰܠܟܽܘܬ̣ܳܐ ܕܰܫܡܰܝܳܐ ܟܰܕ ܐܳܡܪܺܝܢ ܛܽܘܒܳܐ ܠܰܡܗܰܝܡ̈ܢܶܐ܀

ܡܶܢ ܦܪܰܟܣܺܝܣ ܕܰܫܠܺܝ̈ܚܶܐ ܩܰܕܺܝ̈ܫܶܐ
ܟ: ܙ – ܝܒ Acts 20: 7 – 12

ܘܰܒܝܰܘܡܳܐ ܕܚܰܕ ܒܫܰܒܳܐ ܟܰܕ ܟܢܺܝܫܺܝܢܰܢ ܕܢܶܩܨܶܐ ܐܶܘܟܰܪܺܣܛܺܝܰܐ܆ ܡܡܰܠܶܠ ܗ̱ܘܳܐ ܥܰܡܗܽܘܢ ܦܰܘܠܳܘܣ܆ ܡܶܛܽܠ ܕܰܠܝܰܘܡܳܐ ܐ̱ܚܪܺܢܳܐ ܥܬܺܝܕ ܗ̱ܘܳܐ ܕܢܶܦܽܘܩ ܠܶܗ. ܘܰܐܓܰܪ ܗ̱ܘܳܐ ܠܰܡܡܰܠܳܠܽܘ܆ ܥܕܰܡܳܐ ܠܦܶܠܓܶܗ ܕܠܺܠܝܳܐ. ܘܺܐܝܬ ܗ̱ܘܳܐ ܬܰܡܳܢ ܠܰܡܦܺܝ̈ܕܶܐ ܕܢܽܘܪܳܐ ܣܰܓܺܝ̈ܶܐܐ܆ ܒܥܶܠܺܝܬܳܐ ܗܳܝ ܕܰܟܢܺܝܫܺܝܢ ܗ̱ܘܰܝܢ ܒܳܗ̇. ܘܝܳܬܶܒ ܗ̱ܘܳܐ ܥܠܰܝܡܳܐ ܚܰܕ ܕܰܫܡܶܗ ܗ̱ܘܳܐ ܐܶܘܛܽܟܳܘܣ ܒܟܰܘܬܳܐ ܘܫܳܡܰܥ. ܘܰܛܒܰܥ ܒܫܶܢܬܳܐ ܝܰܩܺܝܪܬܳܐ܆ ܟܰܕ ܐܰܓܰܪ ܗ̱ܘܳܐ ܒܡܶܠܬܳܐ ܦܰܘܠܳܘܣ. ܘܰܒܫܶܢܬܶܗ ܢܦܰܠ ܗ̱ܘܳܐ ܡܶܢ ܬܠܳܬܳܐ ܡܶܕܝܳܪ̈ܺܝܢ܆ ܘܶܐܫܬܩܶܠ ܟܰܕ ܡܺܝܬ. ܘܰܢܚܶܬ ܦܰܘܠܳܘܣ ܢܦܰܠ ܠܥܶܠ ܡܶܢܶܗ܆ ܘܥܰܦܩܶܗ ܘܶܐܡܰܪ. ܠܳܐ ܬܶܬܙܺܝܥܽܘܢ ܡܶܛܽܠ ܕܢܰܦܫܶܗ ܒܶܗ ܗ̱ܝ. ܟܰܕ ܣܠܶܩ ܕܶܝܢ ܩܨܳܐ ܠܰܚܡܳܐ ܘܰܛܥܶܡ. ܘܰܗܘܳܐ ܡܡܰܠܶܠ ܥܕܰܡܳܐ ܕܰܣܠܶܩ ܨܰܦܪܳܐ. ܘܗܳܝܕܶܝܢ ܢܦܰܩ܆ ܕܢܺܐܙܰܠ ܒܝܰܒܫܳܐ .ܘܕܰܒܪܽܘܗ̱ܝ ܠܰܥܠܰܝܡܳܐ ܟܰܕ ܚܰܝ. ܘܰܚܕܺܝܘ ܒܶܗ ܪܰܘܪܒܳܐܺܝܬ. ܒܰܪܶܟܡܳܪܝ܀

ܩܕܳܡ ܫܠܺܝܚܳܐ
ܒܩ̄: ܛܽܘܒܰܝܟܝ ܥܺܕܬܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ̣ ܕܳܐܡܰܪ: ܥܰܠ ܐܰܝܠܶܝܢ ܕܕܳܡܟܺܝܢ ܐܰܚܰܝ̈: ܨܳܒܶܐ ܐܢܳܐ ܕܠܳܐ ܬܶܟܪܶܐ ܠܟܽܘܢ: ܕܰܒܩܳܠ ܩܰܪܢܳܐ ܡܶܢ ܪܰܘܡܳܐ: ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ: ܠܳܒܶܫ ܗܳܢܳܐ ܕܡܶܬܚܰܒܰܠ: ܠܰܕܠܳܐ ܒܳܠܳܐ ܘܡܶܬܚܰܒܰܠ: ܕܪܰܗܒܽܘܢܳܐ ܕܚܰܝ̈ܶܐ ܩܰܒܶܠ: ܦܰܓܪܶܗ ܘܰܕܡܶܗ ܕܰܡܫܺܝܚܳܐ܀

ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܕ: ܙ ـ ܝܕ 2Corinthians 4:7-14

ܐܺܝܬ ܠܰܢ ܕܶܝܢ ܣܺܝܡܬܳܐ ܗܳܕܶܐ ܒܡܳܐܢܳܐ ܕܚܶܨܦܳܐ܆ ܕܪܰܒܽܘܬܳܐ ܕܚܰܝܠܳܐ ܡܶܢ ܐܰܠܳܗܳܐ ܬܶܗܘܶܐ. ܘܠܳܐ ܡܶܢܰܢ. ܒܟܽܠܡܶܕܶܡ ܓܶܝܪ ܡܶܬܰܐܠܨܺܝܢܰܢ܁ ܐܶܠܳܐ ܠܳܐ ܡܶܬܚܰܢܩܺܝܢܰܢ. ܡܶܬܛܰܪܦܺܝܢܰܢ܁ ܐܶܠܳܐ ܠܳܐ ܚܰܝܳܒܺܝܢ ܚ̱ܢܰܢ. ܡܶܬܪܰܕܦܺܝܢܰܢ܁ ܐܶܠܳܐ ܠܳܐ ܡܶܫܬܰܒܩܺܝܢܰܢ. ܡܶܣܬܰܚܦܺܝܢܰܢ ܐܶܠܳܐ ܠܳܐ ܐܳܒܕܺܝܢܰܢ. ܒܟܽܠܙܒܰܢ ܡܺܝܬܽܘܬܶܗ ܕܝܶܫܽܘܥ ܒܦܰܓܪ̈ܰܝܢ ܫܩܺܝܠܺܝܢܰܢ܆ ܕܳܐܦ ܚܰܝܰܘ̈ܗ̱ܝ ܕܝܶܫܽܘܥ ܒܦܰܓܪ̈ܰܝܢ ܢܶܬܓܠܽܘܢ. ܐܶܢ ܚܢܰܢ ܓܶܝܪ ܚܰܝ̈ܶܐ ܠܡܰܘܬܳܐ ܡܶܫܬܰܠܡܺܝܢܰܢ. ܡܶܛܽܠ ܝܶܫܽܘܥ܆ ܗܳܟܰܢܳܐ ܐܳܦ ܚܰܝܰܘ̈ܗ̱ܝ ܕܝܶܫܽܘܥ ܢܶܬܓܠܽܘܢ ܒܦܰܓܪܰܢ ܗܳܢܳܐ ܕܡܳܐܶܬ. ܗܳܫܳܐ ܡܰܘܬܳܐ ܒܰܢ ܡܶܬܚܰܦܰܛ܆ ܘܚܰܝ̈ܶܐ ܒܟܽܘܢ. ܐܳܦ ܚܢܰܢ ܗܳܟܺܝܠ ܕܰܚܕܳܐ ܗ̱ܝ ܪܽܘܚܳܐ ܕܗܰܝܡܳܢܽܘܬܳܐ ܐܺܝܬ ܠܰܢ. ܐܰܝܟ ܕܰܟܬܺܝܒ܇ ܕܗܰܝܡܢܶܬ. ܡܶܛܽܠ ܗܳܢܳܐ ܐܳܦ ܡܰܠܠܶܬ. ܡܗܰܝܡܢܺܝܢܰܢ܆ ܡܶܛܽܠ ܗܳܢܳܐ ܐܳܦ ܡܡܰܠܠܺܝܢܰܢ. ܘܝܳܕܥܺܝܢܰܢ ܕܗܰܘ ܡܰܢ ܕܰܐܩܺܝܡ ܠܡܳܪܰܢ ܝܶܫܽܘܥ܆ ܐܳܦ ܠܰܢ ܒܝܰܕ ܝܶܫܽܘܥ ܢܩܺܝܡ܇ ܘܰܢܩܰܪܒܰܢ ܥܰܡܟܽܘܢ ܠܘܳܬܶܗ. ܒܰܪܶܟܡܳܪܝ܀

ܗܽܘܠܳܠܳܐ:

ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ. ܘܰܦܪܽܘܩܳܝܗܝ ܒܝܰܕ ܛܰܝܒܽܘܬܳܟ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ. ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܽܘܬ ܘܢܶܫܡܰܥ ܠܰܣܒܰܪܬܳܐ ܕܡ̈ܶܠܶܐ ܚܰܝ̈ܳܬܳܐ ܕܶܐܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ ܚܰܝ̈ܳܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ. ܬܶܫܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ. ܘܥܰܠ ܟܽܠܰܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܙ:ܝܐ - ܝܙ Luke 7:11-17

ܘܰܗܘܳܐ ܠܝܰܘܡܳܐ ܕܒܳܬܪܶܗ܆ ܐܳܙܶܠ ܗ̱ܘܳܐ ܠܰܡܕܺܝܢ̱ܬܳܐ ܕܰܫܡܳܗ̇. ܢܰܐܺܝܢ. ܘܬܰܠܡܺܝ̈ܕܰܘܗ̱ܝ ܥܰܡܶܗ ܘܟܶܢܫܳܐ ܣܰܓܺܝܳܐܐ. ܘܟܰܕ ܩܪܶܒ ܠܬܰܪܥܳܐ ܕܰܡܕܺܝܢ̱ܬܳܐ܆ ܚܙܳܐ ܟܰܕ ܡܠܰܘܶܝܢ ܡܺܝܬܳܐ ܕܺܝܚܺܝܕܳܝܳܐ ܗ̱ܘܳܐ ܠܶܐܡܶܗ. ܘܗܺܝ ܐܶܡܶܗ. ܐܰܪܡܰܠܬܳܐ ܗ̱ܘܳܬ. ܘܟܶܢܫܳܐ ܣܰܓܺܝܳܐܐ ܕܰܒܢ̈ܰܝ ܡܕܺܝܢ̱ܬܳܐ ܥܰܡܳܗ̇. ܚܙܳܗ̇ ܕܶܝܢ ܝܶܫܽܘܥ. ܘܶܐܬܪܰܚܰܡ ܥܠܶܝܗ̇. ܘܶܐܡܰܪ ܠܳܗ̇. ”ܠܳܐ ܬܶܒܟܶܝܢ!“ ܘܶܐܙܰܠ ܩܪܶܒ ܠܥܰܪܣܳܐ. ܘܗܳܢܽܘܢ ܕܰܫܩܺܝܠܺܝܢ ܗ̱ܘܰܘ ܠܳܗ̇ ܩܳܡܘ. ܘܶܐܡܰܪ. ”ܥܠܰܝܡܳܐ ܠܳܟ ܐܳܡܰܪ ܐ̱ܢܳܐ ܩܽܘܡ!“ ܘܺܝܬܶܒ ܗܰܘ ܡܺܝܬܳܐ ܘܫܰܪܺܝ ܠܰܡܡܰܠܳܠܽܘ. ܘܝܰܗܒܶܗ ܠܶܐܡܶܗ. ܘܶܐܚܕܰܬ ܕܶܚܠܬܳܐ ܠܐ̱ܢܳܫ̈ܳܐ ܟܽܠܗܽܘܢ. ܘܰܡܫܰܒܚܺܝܢ ܗ̱ܘܰܘ ܠܰܐܠܳܗܳܐ. ܘܳܐܡܪܺܝܢ. ܕܰܢܒܺܝܳܐ ܪܰܒܳܐ ܩܳܡ ܒܰܢ: ܘܰܣܥܰܪ ܐܰܠܳܗܳܐ ܠܥܰܡܶܗ. ܘܢܶܦܩܰܬ ܥܠܰܘܗ̱ܝ ܡܶܠܬܳܐ ܗܳܕܶܐ ܒܟܽܠܳܗ̇ ܝܺܗܽܘܕ. ܘܰܒܟܽܠܶܗ ܐܰܬܪܳܐ ܕܰܚܕܳܪ̈ܰܝܗܽܘܢ܀

ܘܝܳܗܒܺܝܢ ܫܠܳܡܳܐ ܠܥܰܢܺܝܕܳܐ ܘܳܐܡܪܺܝܢ ܩܳܠܳܐ ܗܳܢܳܐ:

ܩܳܠܳܐ: ܠܥܶܠ ܡܶܢ ܫܽܘܦܪ̈ܶܐ ܕܰܥܢܳܢ̈ܶܐ
(ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ)

ܠܡܳܢܳܐ ܒܪܽܘܚܩܳܐ ܩܳܝܡܺܝܢ ܐܢ̱ܬܽܘܢ ܚܰܒܺܝ̈ܒܰܝ: ܩܪܽܘܒܘ ܨܶܐܝܕܰܝ ܘܗܰܒܘ ܠܺܝ ܫܠܳܡܳܐ ܘܨܰܠܰܘ ܥܠܰܝ. ܘܪܰܟܶܒܘ ܥܠܰܝ ܐܽܘܠ̈ܝܳܬܳܐ ܒܰܚܢܰܓܬܳܐ: ܕܗܳܐ ܡܰܘܬܳܐ ܥܰܓܢܰܢܝ ܝܰܘܡܳܢ ܒܬܰܪܥܳܗ̇ ܕܰܫܝܽܘܠ܀

ܟܰܕ ܡܰܠܰܐܟܳܐ ܕܡܰܘܬܳܐ ܐܶܬܳܐ ܒܳܬܰܪܝ. ܠܟܽܠ ܓܰܒܺܝ̈ܢ ܚܳܪܶܬ ܘܰܚܙܺܝܬ ܘܠܰܝܬ ܕܰܡܥܰܕܰܪ. ܐܰܢ̱ܬ ܡܳܪܝ ܕܰܫܟܺܝܚ ܐܰܢ̱ܬ ܠܰܐܝܠܶܝܢ ܕܩܳܪܶܝܢ ܠܳܟ. ܐܰܩܺܝܡܰܝܢܝ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ܀

ܫܽܘܒܚܳܐ: ܦܽܘܫ ܒܰܫܠܳܡܳܐ ܐܳܘ ܥܳܠܡܳܐ ܘܥܳܡܽܘܪ̈ܰܘܗܝ: ܕܙܰܒܢܳܐ ܠܳܐ ܡܰܘܬܰܪ ܡܶܕܶܡ ܠܰܕܪܳܚܶܡ ܠܶܗ. ܗܳܐ ܕܳܒܪܺܝܢ ܠܺܝ ܡܶܢܳܟ ܐܺܙܰܠ ܐܶܥܒܶܕ: ܚܽܘܫܒܳܢܳܐ ܩܕܳܡ ܕܰܝܳܢܳܐ ܕܟܽܠ ܟܰܣ̈ܝܳܬܳܐ܀

ܡܶܢ ܥܳܠܰܡ: ܐܰܟܡܳܐ ܕܠܳܒ̈ܫܳܢ ܫܽܘ̈ܫܰܢܶܐ ܒܓܰܘ ܕܰܒܪܳܐ: ܠܒܽܘܫܳܐ ܕܠܳܐ ܙܩܺܝܪ ܒܺܐܝ̈ܕܰܝܳܐ ܕܰܒܢܰܝ̈ܢܳܫܳܐ. ܗܳܟܰܢ ܠܳܒܫܺܝܢ ܙܰܕܺܝ̈ܩܶܐ ܒܢܽܘܚܳܡܳܐ: ܠܒܽܘܫܳܐ ܕܙܶܩܪܰܬ݀ ܪܽܘܚ ܩܽܘܕܫܳܐ ܠܝܰܠܕܰܘ̈ܗܝ ܕܳܐܕܳܡ܀

ܘܢܳܣܶܒ ܟܳܗܢܳܐ ܡܶܫܚܳܐ ܒܺܐܝܕܶܗ ܘܳܐܡܰܪ ܨܠܽܘܬܳܐ ܗܳܕܶܐ:

ܡܳܪܝܳܐ ܐܰܠܳܗܳܐ ܗܰܘ ܕܰܕܒܰܪܬܳܝܗܝ ܠܥܰܒܕܳܟ ܗܳܢܳܐ (ܦܠܢ) ܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܒܦܽܘܩܕܳܢܳܐ ܕܰܐܠܳܗܽܘܬܳܟ ܘܰܒܨܶܒܝܳܢܳܐ ܕܡܳܪܽܘܬܳܟ. ܫܰܕܰܪ ܠܶܗ ܡܶܢ ܠܘܳܬܳܟ ܣܽܘܝܳܥܳܐ ܕܚܰܝܠܰܘ̈ܳܬܳܐ ܡܰܠܰܐܟܳܝ̈ܶܐ. ܘܗܰܒ ܠܶܗ ܕܰܒܝܰܕ ܡܶܫܚܳܐ ܗܳܢܳܐ ܕܥܰܠ ܫܠܰܕܳܐ ܕܺܝܠܶܗ ܡܶܬܪܡܶܐ: ܕܢܶܗܘܶܐ ܫܳܪܽܘܥܳܐ ܘܠܳܐ ܡܶܬܠܰܒܟܳܢܳܐ ܠܚܰܝܠܰܘ̈ܳܬܳܐ ܣܰܩܽܘ̈ܒܠܳܝܶܐ ܘܰܠܡܰܫܪ̈ܝܳܬܳܐ ܕܰܒܥܶܠ̈ܕܒܳܒܶܐ ܗܳܠܶܝܢ ܕܒܳܐܐܰܪ ܟܰܡܺܝܢܺܝܢ ܘܥܰܡ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ ܩܪܳܒܳܐ ܥܳܒܕܺܝܢ. ܘܡܰܢܰܥܳܝܗܝ ܠܰܐܘ̈ܳܢܶܐ ܕܢܽܘܗܪܳܐ ܘܕܰܕܝܳܨܳܐ ܥܰܡ ܟܽܠܗܽܘܢ ܩܰܕܺܝ̈ܫܶܐ. ܘܟܰܕ ܚܳܕܶܐ ܘܪܳܘܶܙ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܐܰܒܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܡܰܩܶܦ ܘܳܐܡܰܪ:

ܠܰܓܗܳܝܬܳܐ ܕܡܶܢ ܥܰܡ̈ܠܶܐ ܘܠܰܢܝܳܚܬܳܐ ܕܡܶܢ ܛܽܘܪ̈ܳܦܶܐ ܘܰܠܒܽܘܣܳܡܳܐ ܕܥܰܡ ܩܰܕܺܝ̈ܫܶܐ܀

ܘܪܳܡܶܐ ܡܶܫܚܳܐ ܥܰܠ ܐܰܦܰܘ̈ܗܝ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ:

ܟܳܗܢܳܐ: ܒܰܫܡܳܐ ܕܰܐܒܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܚܰܕܝܶܗ ܟܰܕ ܐܳܡܰܪ:

ܟܳܗܢܳܐ: ܘܕܰܒܪܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܒܽܘܪ̈ܟܰܘܗܝ ܟܰܕ ܐܳܡܰܪ:

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܟܰܕ ܡܰܚܬܺܝܢ ܫܠܰܕܳܐ ܠܩܰܒܪܳܐ ܐܳܡܪܺܝܢ

ܩܳܠܳܐ: ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ

ܠܩܰܒܪܳܐ ܢܳܚܶܬ ܫܽܘܠܛܳܢܶܗ ܕܗܰܘ ܚܰܝܠܳܐ ܡܫܰܒܚܳܐ: ܘܣܳܥܰܪ ܬܰܡܳܢ ܬܶܕܡܽܘܪܬܳܐ ܘܬܳܗܪܺܝܢ ܡܰܠܰܐܟ̈ܶܐ: ܒܓܰܪ̈ܡܶܐ ܙܪ̈ܺܝܩܶܐ ܕܡܶܬܟܰܢܫܺܝܢ ܘܫܽܘܒܚܳܐ ܠܳܒܫܺܝܢ: ܢܰܦܫܳܐ ܘܦܰܓܪܳܐ ܫܰܘܝܳܐܺܝܬ ܘܩܳܝܡܺܝܢ ܕܠܳܐ ܚܒܳܠܳܐ܀

ܫܽܘܒܚܳܐ ܠܳܟ ܡܳܪܝ ܕܰܒܩܳܠܳܟ: ܩܳܡ ܠܳܥܳܙܳܪ ܐܰܚܽܘܗ̇ ܕܡܰܪܝܰܡ ܘܰܕܡܳܪܬܳܐ ܡܶܢ ܒܳܬܰܪ ܕܰܣܪܺܝ: ܘܰܒܡܶܠܬܳܟ ܬܽܘܒ ܐܶܬܬܥܺܝܪܰܬ ܒܰܪ̱ܬ ܝܽܘܐܳܪܳܫ: ܘܰܒܩܳܠܳܐ ܐܚܪܺܢܳܐ ܕܩܳܪܶܝܬ ܩܳܝܡܺܝܢ ܥܰܢܺܝ̈ܕܶܐ܀

ܫܽܘܒܚܳܐ ܠܚܰܝܠܳܐ ܥܶܠܝܳܐ: ܕܰܠܒܶܝܬ ܡܺܝ̈ܬܶܐ ܢܚܶܬ ܣܰܥܪܶܗ ܠܳܐܕܳܡ ܥܰܦܪܳܢܳܐ: ܘܗܳܟܰܢ ܐܶܡܰܪ ܠܶܗ: ܠܳܐ ܬܶܟܪܶܐ ܠܳܟ ܥܰܦܪܳܢܳܐ ܕܥܰܠ ܦܽܘܩܕܳܢܝ ܥܒܰܪܬ: ܕܶܐܢܳܐ ܐܢܳܐ ܒܪܳܐ ܕܰܐܠܳܗܳܐ ܕܰܡܡܺܝܬ ܐܳܦ ܡܰܚܶܐ܀

ܗܰܘ ܒܳܪܽܘܝܳܐ ܚܰܟܺܝܡܳܐ ܕܒܰܡܗܺܝܪܽܘܬܶܗ: ܟܰܕܢܳܗ̇ ܠܟܽܠܳܗ̇ ܥܳܡܰܪܬܳܐ ܬܚܶܝܬ ܢܺܝܪܶܗ ܕܡܰܘܬܳܐ: ܗܽܘ ܫܳܪܶܐ ܠܡܰܠ̈ܟܶܐ ܪ̈ܳܡܶܐ ܡܶܢ ܕܪ̈ܰܓܰܝܗܽܘܢ: ܘܰܠܕܰܝ̈ܳܢܶܐ ܥܰܙܺܝ̈ܙܶܐ ܡܶܢ ܐܽܘܚܕܳܢܰܝ̈ܗܽܘܢ܀

ܗܰܘ ܕܝܰܗܒ ܗ̱ܘܳܐ ܢܽܘܗܪܳܐ ܠܣܰܡܝܳܐ: ܘܫܶܡܥܳܐ ܠܕܽܘܓܳܐ: ܘܰܦܫܰܛ ܠܶܫܳܢܶܗ ܕܦܺܐܩܳܐ ܘܠܰܡܫܰܪܝܳܐ ܐܰܚܠܶܡ: ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ: ܥܰܠ ܓܰܪ̈ܡܰܝܗܽܘܢ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܶܗ܀

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢ̱ܬ ܗܽܘ ܡܢܰܚܡܳܢܗܽܘܢ܀

ܘܟܰܕ ܣܳܝܡܺܝܢ ܟܺܐܦܳܐ ܫܳܩܶܠ ܟܳܗܢܳܐ ܥܰܦܪܳܐ ܡܶܢ ܐܰܪܥܳܐ ܒܺܐܝܕܶܗ ܘܪܳܡܶܐ ܒܩܰܒܪܳܐ ܐܰܘ ܠܥܶܠ ܡܶܢ ܫܠܰܕܳܐ ܨܠܺܝܒܳܐܺܝܬ ܘܳܐܡܰܪ:

ܗܳܐ ܫܠܶܡ ܨܶܒܝܳܢܳܟ ܡܳܪܰܢ ܐܰܝܟ ܕܶܐܡܰܪܬ: ܕܡܶܢ ܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬܶܗܦܽܘܟ. ܘܬܽܘܒ ܡܶܢ ܕܪܺܝܫ ܬܶܬܚܰܕܰܬ܀

ܘܣܳܝܡܺܝܢ ܥܰܦܪܳܐ ܘܳܐܡܪܺܝܢ ܣܽܘܓܺܝܬܳܐ ܗܳܕܶܐ:

ܒܩ̄: : ܐ̱ܪܳܙ ܠܺܝ ܐ̱ܪܳܙ ܠܺܝ (ܕܰܚܛܳܐ ܠܳܐ ܢܶܚܛܶܐ)

ܦܶܬܓܳܡܳܐ: ܚܕܺܝܬ ܟܰܕ ܐܳܡܪܺܝܢ ܗܘܰܘ ܠܺܝ:

ܕܡܳܪܰܢ ܐܳܬܶܐ: ܘܰܡܢܰܚܶܡ ܡܺܝ̈ܬܶܐ. ܘܥܳܒܶܕ ܣܰܒܪܳܐ: ܠܟܽܠܗܽܘܢ ܥܰܢܺܝ̈ܕܶܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ:

ܒܪܺܝܟ ܗܽܘ ܕܥܰܒܕܶܗ: ܡܰܘܬܳܐ ܕܠܳܐ ܫܽܘܚܕܳܐ. ܠܛܳܒ̈ܶܐ ܘܒܺܝ̈ܫܶܐ: ܕܳܒܰܪ ܫܰܘܝܳܐܺܝܬ܀

ܓܒܰܠܬܳܢܝ ܘܣܳܡܬ ܥܠܰܝ ܐܺܝܕܳܟ:

ܥܰܕܠܳܐ ܐܺܝܬܰܝ: ܓܒܰܠܬܳܢܝ ܡܶܢ ܥܰܦܪܳܐ. ܘܗܳܫܳܐ ܕܫܶܟܒܶܬ: ܐܰܚܳܢܝ ܕܰܐܘܕܶܐ ܠܳܟ܀

ܢܰܦܫܝ ܕܶܝܢ ܬܶܪܘܰܙ ܒܰܐܠܳܗܳܐ:

ܢܰܦܫܳܐ ܕܶܐܚܕܰܬ: ܓܰܘܣܳܐ ܒܰܨܠܺܝܒܳܟ. ܬܶܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܐܶܬܦܰܢ ܥܠܰܝ ܘܪܰܚܶܡܥܠܰܝ:

ܚܽܘܢܰܝܢܝ ܘܰܐܚܳܢܝ: ܘܰܫܒܽܘܩ ܠܺܝ ܚܰܘ̈ܒܰܝ. ܕܶܐܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܓܠܺܝ ܠܺܝ ܥܰܝ̈ܢܰܝ: ܕܶܐܚܙܶܐ ܬܶܕܡܽܘܪܬܶܐ. ܡܳܐ ܕܰܡܢܰܚܡܰܬ: ܠܟܽܠܗܽܘܢ ܥܰܢܺܝ̈ܕܶܐ܀

ܚܽܘܢܰܝܢܝ ܡܳܪܰܢ. ܡܶܛܽܠ ܛܰܝܒܽܘܬܳܟ. ܘܥܰܡ ܩܰܕܺܝ̈ܫܰܝܟ ܐܰܫܘܳܢܝ ܠܰܓܢܽܘܢܳܟ܀

ܛܽܘܒܰܘܗܝ ܠܰܐܝܢܳܐ: ܕܚܰܢܬܳܝܗܝ. ܒܒܶܝܬ ܕܺܝܢܳܐ. ܐܰܝܟ ܓܰܝܳܣܳܐ. ܒܪܺܝܫܶܗ ܕܰܨܠܺܝܒܳܐ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ: ܬܰܘܕܺܝܬܳܐ ܠܰܒܪܳܐ. ܘܰܠܪܽܘܚ ܩܽܘܕܫܳܐ: ܣܶܓܕܬܳܐ ܘܪܽܘܡܪܳܡܳܐ܀

ܡܶܢ ܥܳܠܰܡ: ܠܳܟ ܬܶܫܒܽܘܚܬܳܐ. ܝܶܫܽܘܥ ܦܳܪܽܘܩܰܢ ܕܡܰܘܬܳܐ ܒܺܐܝ̈ܕܰܝܟ: ܘܚܰܝ̈ܶܐ ܒܨܶܒܝܳܢܳܟ܀

ܐܚܪܺܢܐ ܒܩ̄: ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܦܶܬܓܳܡܳܐ: ܠܘܳܬܳܟ ܡܳܪܝܳܐ ܢܰܦܫܝ ܐܰܪܺܝܡܶܬ:

ܡܰܠܟܳܐ ܡܫܺܝܚܳܐ ܦܳܪܽܘܩܰܢ ܒܝܽܘܡ ܡܶܐܬܺܝܬܳܟ ܢܰܚܶܡܰܝܢܝ. ܘܰܐܩܺܝܡܰܝܢܝ ܡܶܢ ܝܰܡܺܝܢܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐܰܠܳܗܝ ܒܳܟ ܣܰܒܪܶܬ ܠܳܐ ܐܶܒܗܰܬ:

ܣܳܓܕܺܝܢܰܢ ܡܳܪܝ ܠܰܨܠܺܝܒܳܟ. ܕܒܳܗ ܩܝܳܡܬܰܢ ܘܒܶܗ ܢܽܘܚܳܡܰܢ. ܘܒܶܗ ܡܶܬܢܰܚܡܺܝܢ ܥܰܢܺܝ̈ܕܶܐ. ܘܠܳܒܫܺܝܢ ܫܽܘܒܚܳܐ ܦܰܓܪ̈ܰܝܗܽܘܢ܀

ܕܺܝܠܳܟ ܐܶܢܽܘܢ ܫܡܰܝ̈ܳܐ ܘܰܐܪܥܳܐ:

ܬܪ̈ܰܝܗܽܘܢ ܥܳܠ̈ܡܶܐ ܕܺܝܠܳܟ ܡܳܪܝ. ܗܳܪܟܳܐ ܘܬܰܡܳܢ ܫܽܘܠܛܳܢܳܟ. ܠܚܰܝ̈ܶܐ ܢܰܛܰܪ ܒܰܨܠܺܝܒܳܟ ܠܥܰܢܝ̈ܕܶܐ ܚܰܣܳܐ ܒܪ̈ܰܚܡܰܝܟ܀

ܡܗܰܝܡܰܢ ܗܽܘ ܡܳܪܝܳܐ ܒܡܶܠܰܘ̈ܗܝ:

ܡܽܘܠܟܳܢܳܐ ܕܩܰܒܶܠ ܡܶܢܳܟ. ܓܰܝܳܣܳܐ ܥܰܠ ܪܺܝܫ ܩܰܝܣܳܐ. ܢܩܰܒܠܽܘܢܳܝܗܝ ܡܳܪܝ ܥܰܢܺܝ̈ܕܶܐ ܕܰܐܘܕܺܝܘ ܒܰܬܠܺܝܬܳܝܽܘܬܳܐ܀

ܪܽܘܣ ܥܠܰܝ ܒܙܽܘܦܳܐ ܘܶܐܬܕܰܟܶܐ:

ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ. ܝܰܡܺܝܢܳܟ ܬܰܠܒܶܫ ܐܶܢܽܘܢ ܐܶܣܛܰܠ ܫܽܘܒܚܳܐ ܒܡܰܠܟܽܘܬܳܟ܀

ܢܶܚܕܽܘܢ ܒܳܟ ܟܽܠ ܕܒܳܥܶܝܢ ܠܳܟ:

ܥܰܢܝ̈ܕܶܐ ܕܰܫܩܰܠܘ ܦܰܓܪܳܟ. ܘܒܰܕܡܳܟ ܚܰܝܳܐ ܐܶܬܚܰܣܺܝܘ. ܥܰܠ ܡܰܕܒܰܚ ܩܽܘܕܫܳܐ ܢܶܗܘܶܐ. ܕܽܘܟܪܳܢܗܽܘܢ ܥܕܰܡܳܐ ܠܥܳܠܰܡ܀

ܗܳܝܕܶܝܢ ܢܺܐܡܪܽܘܢ:

ܢܒܺܝ̈ܶܐ ܩܳܥܶܝܢ ܐܰܝܟ ܪ̈ܰܥܡܶܐ ܘܰܫܠܺܝ̈ܚܶܐ ܐܰܝܟ ܫܺܝܦܽܘܪ̈ܶܐ. ܕܥܳܠܡܳܐ ܗܳܢܳܐ ܥܳܒܰܪ ܠܶܗ. ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ܀

ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ:

ܗܳܐ ܒܰܢܒܺܝ̈ܶܐ ܢܽܘܚܳܡܰܢ. ܘܒܰܫܠܺܝ̈ܚܶܐ ܬܽܘܒ ܦܽܘܪܥܳܢܰܢ. ܘܒܰܣܒܰܪܬܶܗ ܕܡܳܪܰܢ ܐܽܘܪܚܳܐ. ܕܰܕܪܺܝܫܳܐ ܠܒܶܝܬ ܡܰܠܟܽܘܬܳܐ܀

ܣܰܟܝܰܬ ܢܰܦܫܝ ܠܦܽܘܪܩܳܢܳܟ:

ܥܰܝ̈ܢܰܝ ܣܰܟܺܝ̈ܝ ܠܦܽܘܪܩܳܢܳܟ. ܘܰܠܡܺܐܡܪܳܐ ܕܙܰܕܺܝܩܽܘܬܳܟ. ܒܰܣܶܡܰܝܢܝ ܥܰܡ ܩܰܕܺܝ̈ܫܰܝܟ. ܣܰܒܪܳܐ ܛܳܒܳܐ ܕܰܩܒܺܝܪ̈ܶܐ܀

ܢܰܘܥܶܐ ܡܶܢ ܡܕܺܝܢ̱ܬܶܗ ܐܰܝܟ ܥܶܣܒܳܐ ܕܰܐܪܥܳܐ:

ܠܳܐ ܫܳܒܶܩ ܡܶܛܪܳܐ ܒܰܐܪܥܳܐ. ܥܶܩܳܪܳܐ ܕܠܳܐ ܡܰܘܥܶܐ ܠܶܗ. ܘܠܳܐܴ ܡܫܺܝܚܳܐ ܫܳܒܶܩ ܒܰܫܝܽܘܠ. ܥܰܢܺܝܕܳܐ ܕܠܳܐ ܡܢܰܚܶܡ ܠܶܗ܀

ܫܽܘܒܚܳܐ: ܐܰܠܳܗܳܐ ܐܰܒܳܐ ܐܰܚܳܢܝ. ܒܪܳܐ ܡܫܺܝܚܳܐ ܢܰܚܶܡ ܡܺܝܬܽܘܬܝ. ܪܽܘܚ ܩܽܘܕܫܳܐ ܦܰܪܰܩܠܺܝܛܳܐ. ܡܰܢܰܥܰܝܢܝ ܠܰܐܬܪܳܐ ܕܚܰܝ̈ܶܐ܀

ܡܶܢ ܥܳܠܰܡ: ܠܳܟ ܬܶܒܪܽܘܟ ܘܬܶܣܓܽܘܕ ܬܺܒܶܝܠ. ܘܟܽܠ ܠܶܫܳܢ ܠܰܫܡܳܟ ܢܰܘܕܶܐ. ܕܰܐܢ̱ܬ ܗ̣ܽܘ ܡܢܰܚܡܳܢܳܐ ܕܡܺܝ̈ܬܶܐ. ܘܣܰܒܪܳܐ ܛܳܒܳܐ ܠܰܩܒܺܝܪ̈ܶܐ܀

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ...

ܡܫܰܡ̈ܫܳܢܶܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀
ܡܫܰܒܚܺܝܢܰܢ ܠܳܟ܇ ܡܒܰܪܟ̣ܺܝܢܰܢ ܠܳܟ܇ ܣܳܓ̣ܕܺܝܢܰܢ ܠܳܟ܇ ܡܡܰܠܽܠܘܬ̣ ܫܽܘܒܚܳܐ ܡܰܣܩܺܝܢܰܢ ܠܳܟ܀
ܡܰܘܕܶܝܢܰܢ ܠܳܟ ܡܶܛܽܠ ܪܰܒܽܘܬ̣ܳܐ ܕܫܽܘܒܚܳܐ ܕܺܝܠܳܟ܇ ܡܳܪܝܳܐ ܥܳܒܽܘܕܳܐ ܡܰܠܟܳܐ ܫܡܰܝܳܢܳܐ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀
ܡܳܪܝܳܐ ܐܰܠܳܗܳܐ ܒܪܳܐ ܝܺܚܺܝܕܳܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܡܳܪܝܳܐ ܐܰܠܳܗܳܐ ܐܶܡܪܶܗ ܕܰܐܳܠܳܗܳܐ ܒܪܳܐ ܘܡܶܠܬ̣ܶܗ ܕܰܐܒܳܐ܇ ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ ܐܶܬ̣ܪܰܚܰܡܥܠܰܝܢ܀
ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ܇ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬ̣ܰܢ܇ ܗܰܘ ܕܝܳܬ̣ܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܣ ܘܶܐܬ̣ܪܰܚܰܡܥܠܰܝܢ܀
ܡܶܛܽܠ ܕܰܐܢ̱ܬܽ ܗ̱ܘ ܠܚܽܘܕܰܝܟ ܩܰܕܺܝܫܰܬܽ ܗ̱ܘ ܠܚܽܘܕܰܝܟ܇ ܡܳܪܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܫܽܘܒܚܶܗ ܕܰܐܳܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬ̣ܳܐ ܕܚ̈ܰܝܰܝ ܐܶܒܰܪܟ̣ܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܇ ܡܒܰܪܟ̣ܳܐ ܠܥܳܠܰܡ ܗܰܘ ܕܺܐܝܬ̣ܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀
ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬ̣ܳܐ ܕܺܝܠܰܢ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒܚ̈ܳܬ̣ܳܐ ܠܥܳܠܰܡ ܥܳܠܡܺܝܢ܀
ܠܳܟ ܝܳܐܶܐ ܫܽܘܒܚܳܐ܇ ܠܳܟ ܦܰܐܝܳܐ ܬܶܫܒܽܘܚܬܳܐ ܘܠܳܟ ܦܐܶܐ ܩܽܘܠܳܣܳܐ܇ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܉ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܇ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬ̣ܪܰܚܰܡܥܠܰܝܢ܀
ܚܽܘܒܳܟ ܐܰܚܬ̣ܳܟ ܡܶܢ ܐܰܬ̣ܪܳܟ ܨܶܐܕܰܝܢ ܡܳܪܝ܇ ܕܰܒܝܰܕ ܡܰܘܬܳܟ ܐܶܬ̣ܒܰܛܰܠܬ ܡܺܝܬ̣ܽܘܬ̣ܰܢ ܐܶܬ̣ܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ:

ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܘܽܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠܡ̈ܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀
ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ܀

ܬܶܫܡܶܫܬܳܐ ܕܥܰܢܺܝ̈ܕܶܐ

ܩܽܘܩܰܠܝܽܘܢ

ܐܰܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ ܗ̄ ܡܪܰܚܶܡ ܡܳܪܝܳܐ ܥܰܠ ܕܳܚ̈ܠܰܘܗ̱ܝ܀

ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘܡܰܘ̈ܗ̱ܝ ܗ̄ ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ܀

ܥܶܩܒܳܐ

ܥܰܒܕܳܟ ܕܰܫܟܶܒ ܥܰܠ ܣܰܒܪܳܟ: ܘܥܰܠ ܬܽܘܟܠܳـܢܶܗ ܕܰܚܢܳܢܳܟ. ܩܳܠܳܟ ܚܰܝܳܐ ܢܰܥܺܝܪܺܝܘܗ̱ܝ. ܡܶܢ ܩܰܒܪ̈ܶܐ ܠܓ݂ܰܘ ܦܰܪܕܰܝܣܳܐ܀

ܣـܛܳܘܡܶܢ ܩܰܐܠܳܘܤ ܩܽܘܪܝܶܐܠܶܝܣܳܘܢ܀

ܩܳܠܳܐ: ܒܩ̄: ܗܰܒܠܳܗ̇ ܠܥܺܕܬܳܟ

ܡܰܠܟܳܐ ܡܢܰܚܡܳܢܳܐ. ܒܫܽܘܒܚܶܗ ܕܳܢܰܚ ܡܶܢ ܪܰܘܡܳܐ ܘܡܰܚܶܐ ܡܺܝ̈ܬܶܐ܆ ܘܰܡܩܺܝܡ ܠܰܩܒܺܝܪ̈ܶܐ. ܘܩܳܝܡܺܝܢ ܫܰܘܝܳܐܺܝܬ: ܥܰܢܺܝ̈ܕܶܐ ܡܶܢ ܓ݂ܰܘ ܩܰܒܪ̈ܶܐ: ܘܡܰܣܩܺܝܢ ܫܽܘܒܚܳܐ. ܠܳܟ ܡܢܰܚܶܡ ܡܺܝ̈ܬܶܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܩܳܠܳܐ. ܕܶܐܡܰܪ ܡܳܪܰܢ ܒܰܣܒܰܪܬܶܗ: ܕܟܽܠ ܕܳܐܟܶܠ ܦܰܓܪܝ̱: ܘܫܳܬܶܐ ܕܶܡܝ̱ ܚܰܝܳܐ. ܠܳܐ ܐܰܪܦܺܝܘܗ̱ܝ ܒܰܫܝܽܘܠ. ܕܡܶܛܽܠܳܬܶܗ ܐܶܬܪܰܟܢܶܬ. ܘܛܶܥܡܶܬ ܡܰܘܬܳܐ. ܕܗܽܘ ܢܺܚܶܐ ܠܥܳܠܰܡ܀

ܐ̱ܚܪܺܢܳܐ ܒܩ̄: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ ܐܰܝܟ ܦܰܓܪܶܗ ܕܡܳܪܝܳܐ. ܠܳܐ ܡܰܘܬܰܪ ܠܺܝ ܒܶܟܝܳܐ ܘܬܶܢܚ̈ܳܬܳܐ. ܐܰܝܟ ܕܡܰܘܬܰܪ ܠܺܝ ܦܰܓܪܶܗ ܕܰܡܫܺܝܚܳܐ. ܘܡܳܐ ܕܩܳܝܡܺܝܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ. ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐ̱ܢܳܐ ܩܕܳܡ ܡܳܪܳܐ ܕܥܳܠ̈ܡܶܐ ܗ̄ ܩܕܳܡ ܒܺܐܡ ܕܰܡܫܺܝܚܳܐ܀

ܫܽܘܒܚܳܐ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ ܘܫܰܩܠܽܘܟ ܡܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ ܒܶܝܬ ܡܰܠܟܽܘܬܳܐ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܒܳܥܽܘܬܳܐ ܩܦܺܝܣܬܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܒܰܪ ܐܰܠܳܗܳܐ ܕܰܒܡܰܘܬܶܗ ܐܰܚܺܝ ܡܺܝܬܽܘܬܰܢ. ܢܰܚܶܡ ܠܰܢ ܡܶܢ ܓܰܘ ܕܰܚܺܝܚܳܐ ܕܢܶܩܥܶܐ ܘܢܺܐܡܰܪ. ܫܽܘܒܚܳܐ ܠܳܟ ܐܰܠܳܗܳܐ܀

ܘܳܐܡܪܺܝܢ:

ܐܰܠܳܗܳܐ ܢܶܗܘܶܐ ܠܶܗ ܡܚܰܣܝܳܢܳܐ ܘܰܡܩܺܝܡܳܢܳܐ ܡܶܢ ܓܰܒܳܐ ܕܺܝܠܶܗ ܕܝܰܡܺܝܢܳܐ܀

ܫܠܶܡ ܛܶܟܣܳܐ ܕܥܽܘܦܳܝܳܐ ܕܰܥܠܰܝ̈ܡܶܐ