ܛܶܟܣܳܐ ܕܥܽܘܦܳܝܳܐ ܕܓܰܒܪ̈ܶܐ

ܢܽܘܗܳܪܳܐ: ܒܳܬܰܪ ܕܡܶܬܬܰܣܚܶܐ ܥܰܢܺܝܕܳܐ ܘܡܶܬܟܪܶܟ ܒܰܚܝܳܨܳܐ. ܡܶܬܬܰܝܬܶܐ ܠܥܺܕܬܳܐ܇ ܡܶܬܬܣܺܝܡ ܩܕܳܡ ܬܪܰܥ ܡܰܕܒܚܳܐ. ܣܳܝܡܺܝܢ ܨܠܺܝܒܳܐ ܘܡܰܕܠܩܺܝܢ ܩܶܪܝܽܘܢܳܐ ܩܕܳܡ ܪܺܝܫܶܗ. ܗܳܟܰܢܳܐ ܡܶܬܛܰܝܰܒ ܕܰܢܨܰܠܽܘܢ ܥܠܰܘܗܝ ܘܰܢܠܰܘܽܘܢܳܝܗܝ ܩܠܺܝܪܳܘܣ ܘܥܰܡܳܐ ܥܕܰܡܳܐ ܠܩܰܒܪܳܐ.

ܪܫܳܡ ܨܠܺܝܒܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ. ܐܰܡܺܝܢ܀

ܬܠܺܝܬܳܝ ܩܽܘܕ̈ܫܶܐ

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬܳܐ ܘܳܐܬܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܛܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ.

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ܀

ܨܠܽܘܬ݂ܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬ݂ܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܐܰܫܘܳܐ ܡܳܪܝ ܠܢܰܦܫܳܐ ܗܳܕܶܐ ܕܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܐܰܓܗܝܰܬ: ܘܡܶܢ ܥܳܠܡܳܐ ܗܳܢܳܐ ܕܥܳܩ̈ܳܬܳܐ ܫܰܢܝܰܬ. ܕܬܶܬܗܰܕܶܐ ܡܶܢ ܡܰܠܰܐܟ̈ܶܐ ܕܺܝܠܳܟ ܩܰܕܺܝ̈ܫܶܐ ܠܰܐܬܪ̈ܰܘܳܬܳܐ ܡܰܠܝܰܝ̈ ܢܝܳܚܳܐ ܘܒܽܘܣܳܡܳܐ: ܥܕܰܡܳܐ ܠܝܰܘܡܳܐ ܕܰܩܝܳܡܬܳܐ. ܘܬܰܡܳܢ ܒܓܰܠܝܽܘܬ ܐܰܦ̈ܶܐ ܬܶܦܓܰܥ ܒܳܟ. ܘܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ: ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܡܫܺܝܚܳܐ ܕܰܡܠܰܟ ܢܽܘܚܳܡܳܐ: ܠܝܰܠܕܰܘ̈ܗܝ ܕܳܐܕܳܡ ܥܰܦܪܳܢܳܐ. ܢܰܚܶܡ ܘܰܐܚܳܐ ܠܣܳܓܽܘ̈ܕܰܝܟ: ܕܰܫܟܶܒܘ̱ ܘܶܐܬܬܢܺܝܚܘ̱ ܥܰܠ ܣܰܒܪܳܟ܀

ܡܫܺܝܚܳܐ ܕܰܕܒܰܪ ܦܽܘܩܕܳܢܳܟ. ܠܥܰܒܕܳܟ ܡܶܢ ܚܰܝ̈ܶܐ ܕܙܰܒܢܳܐ. ܒܪ̈ܰܚܡܰܝܟ ܡܳܪܰܢ ܩܰܒܶܠܳܝܗܝ. ܘܥܰܡܶܗ ܠܕܺܝܢܳܐ ܠܳܐ ܬܶܥܽܘܠ܀

ܡܫܺܝܚܳܐ ܥܒܶܕ ܠܶܗ ܕܽܘܟܪܳܢܳܐ. ܠܥܰܒܕܳܟ ܕܰܫܟܶܒ ܥܰܠ ܣܰܒܪܳܟ. ܘܰܐܩܺܝܡܳܝܗ̱ܝ ܡܶܢ ܝܰܡܺܝܢܳܟ. ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܡܫܺܝܚܳܐ ܩܠܺܝܕܳܐ ܕܦܰܪܕܰܝܣܳܐ: ܕܦܳܬܰܚ ܬܰܪ̈ܥܶܐ ܕܰܫܡܰܝܳܐ. ܦܬܰܚ ܠܶܗ ܡܳܪܝ ܬܰܪܥܳܐ ܕܪ̈ܰܚܡܰܝܟ: ܠܥܰܒܕܳܟ ܕܰܫܟܶܒ ܥܰܠ ܣܰܒܪܳܟ܀

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ: ܕܓܰܠ̈ܝܳܢ ܩܽܘܕܡܰܘܗܝ ܟܰܣ̈ܝܳܬܳܐ. ܠܳܐ ܬܶܓܠܶܐ ܡܽܘ̈ܡܰܘܗܝ ܕܰܩܢܽܘܡܝ: ܡܳܐ ܕܟܰܣ̈ܝܳܬܳܐ ܡܶܬܓܰܠ̈ܝܳܢ܀

ܙܶܠ ܐܰܚܽܘܢ ܠܳܐ ܬܶܟܪܶܐ ܠܳܟ: ܕܡܳܪܝܳܐ ܒܢܽܘܗܪܶܗ ܡܰܫܪܶܐ ܠܳܟ. ܟܪܽܘܒܳܐ ܕܢܳܛܰܪ ܦܰܪܕܰܝܣܳܐ: ܗܽܘ ܢܶܕܪܽܘܫ ܐܽܘܪܚܳܐ ܩܕܳܡܰܝܟ܀

ܡܽܘܠܟܳܢܳܐ ܕܩܰܒܶܠ ܡܶܢܳܟ: ܓܰܝܳܣܳܐ ܥܰܠ ܪܺܝܫ ܩܰܝܣܳܐ. ܢܩܰܒܠܽܘܢܳܝܗܝ ܡܳܪܝ ܥܰܢܺܝ̈ܕܶܐ: ܕܰܐܘܕܺܝܘ ܒܰܬܠܺܝܬܳܝܽܘܬܳܐ܀

ܥܰܒܕܳܟ ܕܰܫܟܶܒ ܥܰܠ ܣܰܒܪܳܟ: ܘܥܰܠ ܬܽܘܟܠܳܢܳܐ ܕܰܚܢܳܢܳܟ. ܐܰܩܺܝܡܳܝܗܝ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܫܽܘܒܚܳܐ: ܫܽܘܒܚܳܐ ܘܣܶܓܕܳܬܳܐ ܬܩܰܪܶܒ ܠܳܟ: ܢܰܦܫܳܐ ܕܰܕܒܰܪ ܦܽܘܩܕܳܢܳܟ. ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ: ܚܰܕ ܐܰܠܳܗܳܐ ܫܰܪܺܝܪܳܐ܀

ܡܶܢ ܥܳܠܰܡ: ܩܳܠܳܐ ܕܰܩܪܳܐ ܠܠܳܥܳܙܳܪ: ܘܰܐܩܺܝܡܶܗ ܡܶܢ ܒܶܝܬ ܡܺܝ̈ܬܶܐ. ܗܽܘ ܩܳܪܶܐ ܘܰܡܢܰܚܶܡ ܠܳܟ: ܡܶܢ ܩܰܒܪܳܐ ܠܓܰܘ ܦܰܪܕܰܝܣܳܐ܀

ܡܙܡܘܪܐ܆ ܩܳܠܳܐ: ܩܽܘܩܰܠܝܽܘܢ ܫܒܺܝܥܳܝܳܐ

ܡܳܪܝܳܐ ܐܰܠܳܗܳܐ ܕܦܽܘܪܩܳܢܝ ܗ̄ܘܗ̄ ܒܺܐܝܡܳܡܳܐ ܓܥܺܝܬ ܘܰܒܠܺܠܝܳܐ ܩܕܳܡܰܝܟ܀

ܬܶܥܽܘܠ ܩܕܳܡܰܝܟ ܨܠܽܘܬܝ ܗ̄ܘܗ̄ ܘܰܐܪܟܶܢ ܐܶܕܢܳܟ ܠܒܳܥܽܘܬܝ܀

ܡܶܛܽܠ ܕܣܶܒܥܰܬ݀ ܢܰܦܫܝ ܒܺܝ̈ܫܳܬܳܐ ܗ̄ܘܗ̄ ܘܚܰܝܰܝ̈ ܠܰܫܝܽܘܠ ܡܰܛܺܝܘ܀

ܐܶܬܚܰܫܒܶܬ ܥܰܡ ܢܳܚ̈ܬܰܝ ܓܽܘܒܳܐ ܗ̄ܘܗ̄ ܘܰܗܘܺܝܬ ܐܰܝܟ ܓܰܒܪܳܐ ܕܠܰܝܬ ܠܶܗ ܐܺܝܳܠܳܐ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܥܶܩܒܳܐ

ܠܟܽܘܢ ܛܽܘܒܰܝܟܽܘܢ ܥܰܢܺܝ̈ܕܶܐ. ܒܗܰܘ ܝܰܘܡܳܐ ܕܗܳܘܶܐ ܢܽܘܚܳܡܳܐ. ܕܦܰܓܪܳܐ ܚܰܝܳܐ ܗܰܘ ܕܶܐܟܰܠܬܽܘܢ. ܕܡܳܐ ܡܚܰܣܝܳܢܳܐ ܗܰܘ ܕܶܐܫܬܺܝܬܽܘܢ. ܡܩܺܝܡ ܠܟܽܘܢ ܒܓܰܒܳܐ ܕܝܰܡܺܝܢܳܐ܀

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳـܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܇ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܒܳܪܽܘܝܳܐ ܚܰܟܺܝܡܳܐ ܘܰܡܚܰܕܬܳܢܳܐ ܚܰܬܺܝܬܳܐ ܕܰܠܡܺܝ̈ܬܶܐ ܕܡܶܙܕܰܪܥܺܝܢ ܒܰܚܒܳܠܳܐ ܡܩܺܝܡ ܕܠܳܐ ܚܒܳܠܳܐ. ܘܠܰܐܝܠܶܝܢ ܕܰܒܨܰܥܪܳܐ ܡܢܰܚܶܡ ܒܫܽܘܒܚܳܐ. ܘܰܠܓܰܪ̈ܡܶܐ ܙܪ̈ܺܝܩܶܐ ܘܰܡܚܺܝ̈ܠܶܐ ܡܰܠܒܶܫ ܚܰܝܠܬܳܢܽܘܬܳܐ. ܘܰܠܦܰܓܪ̈ܶܐ ܢܰܦܫܳܢܳܝ̈ܶܐ ܡܰܩܢܶܐ ܪܽܘܚܳܢܳܝܽܘܬܳܐ. ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ ܕܥܽܘܦܳܝܶܗ ܕܰܐܚܽܘܢ (ܦܠܢ) ܕܰܥܢܰܕ ܡܫܰܡܠܶܝܢܰܢ. ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܕܺܐܝܬܰܘܗܝ ܠܳܐ ܡܳܝܽܘܬܳܐ ܘܠܳܐ ܡܶܫܬܰܪܝܳܢܳܐ. ܘܡܳܪܳܐ ܘܥܳܒܽܘܕܳܐ ܕܰܟܝܳܢܳܐ ܕܺܝܠܰܢ ܡܳܝܽܘܬܳܐ ܘܡܶܫܬܰܪܝܳܢܳܐ ܬܽܘܟܠܳܢܳܐ ܕܟܺܐܢ̈ܶܐ. ܘܣܰܒܪܳܐ ܕܙܰܕܺܝ̈ܩܶܐ. ܕܒܺܐܝ̈ܕܰܝܟ ܐܺܝܬܰܝܗܶܝܢ ܢܰܦ̈ܫܳܬܳܐ ܘܪ̈ܽܘܚܳܬܳܐ ܕܟܽܠ. ܗܳܠܶܝܢ ܕܰܒܦܰܓܪ̈ܶܐ. ܘܗܳܠܶܝܢ ܕܚܳܙ̈ܩܳܢ ܡܶܢ ܦܰܓܪ̈ܶܐ. ܘܟܰܕ ܒܥܽܘܕܪܳܢܳܐ ܘܦܽܘܪܩܳܢܳܐ ܕܟܽܠ ܩܳܕܶܡ ܐܰܢ̱ܬ ܚܳܐܰܪ ܐܰܢ̱ܬ. ܘܰܠܟܽܠ ܚܰܕ ܒܚܰܝ̈ܶܐ ܕܗܳܪܟܳܐ: ܗܳܠܶܝܢ ܕܦܳܩ̈ܚܳܢ: ܘܒܰܚܙܽܘܩܳܝܳܐ ܕܬܰܡܳܢ ܡܦܰܪܢܶܣ ܐܰܢ̱ܬ. ܘܰܐܝܟ ܕܺܝ̈ܢܶܐ ܠܳܐ ܡܶܬܥܰܩܒܳܢ̈ܶܐ ܕܦܽܘܪܢܳܣܳܟ. ܘܰܐܝܟ ܬܗܽܘܡܳܐ ܠܳܐ ܡܶܬܡܰܫܚܳܢܳܐ ܕܟܺܐܢܽܘܬܳܟ. ܠܢܰܦܫܳܐ ܗܳܕܶܐ ܐܰܥܒܰܪܬ ܡܶܢ ܚܰܝ̈ܶܐ ܗܳܠܶܝܢ ܒܰܡܩܰܕܡܽܘܬ ܝܺܕܰܥܬܳܟ ܗܳܝ ܕܰܠܟܽܠ ܥܳܒܪܳܐ. ܩܰܒܶܠܶܝܗ̇ ܐܰܝܟ ܥܽܘܬܪܳܐ ܕܪ̈ܰܚܡܰܝܟ. ܘܰܚܢܳܢܳܐ ܕܒܰܣܺܝܡܽܘܬܳܟ ܒܝܰܕ ܡܰܠܰܐܟ̈ܶܐ ܡܫܰܝ̈ܢܶܐ ܕܠܳܗ̇ ܢܳܩܦܺܝܢ ܘܰܡܫܰܘܙܒܺܝܢ ܠܳܗ̇ ܡܶܢ ܦܶܓ̈ܥܶܐ ܣܰܩܽܘܒ̈ܠܳܝܶܐ ܕܳܐܪܥܺܝܢ ܒܳܗ̇ ܒܡܰܥܒܪ̈ܳܬܳܐ ܕܚܺܝ̈ܠܳܬܳܐ ܕܰܠܗܰܠ. ܘܟܽܠ ܡܶܕܶܡ ܕܰܚܛܳܐ ܘܶܐܫܬܪܰܥ ܒܶܗ ܗܳܢܳܐ ܥܰܒܕܳܟ (ܦܠܢ) ܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ. ܒܺܝܕܰܥܬܳܐ ܘܰܕܠܳܐ ܒܺܝܕܰܥܬܳܐ: ܚܰܣܳܐ ܘܰܫܪܺܝ ܘܰܫܒܽܘܩ ܐܰܝܟ ܣܽܘܓܳܐܐ ܗܰܘ ܠܳܐ ܡܶܬܬܟܺܝܠܳܢܳܐ ܕܪ̈ܰܚܡܰܝܟ. ܟܰܕ ܡܶܬܕܟܰܪ ܐܰܢ̱ܬ ܕܥܰܦܪܳܐ ܟܽܠܰܢ ܐܺܝܬܰܝܢ ܘܒܰܚ̈ܛܳܗܶܐ ܡܥܰܪܙܠܺܝܢ. ܘܠܰܝܬ ܙܰܟܳܝܳܐ ܝܺܠܺܝܕ ܐܰܢ̱ܬܬܳܐ ܩܕܳܡܰܝܟ ܐܳܦܶܢ ܚܕܳܐ ܫܳܥܬܳܐ ܒܰܠܚܽܘܕ ܢܺܚܶܐ ܘܰܢܕܰܝܰܪ ܥܰܠ ܐܰܪܥܳܐ. ܐܶܠܳܐ ܐܰܝܟ ܡܪܰܚܡܳܢܳܐ ܘܚܳܐܶܢ ܟܽܠ ܡܳܪܝܳܐ. ܚܰܘܳܐ ܠܘܳܬܶܗ ܛܰܝܒܽܘܬܳܟ ܘܪܶܚܡܰܬ ܐ̱ܢܳܫܽܘܬܳܐ ܕܺܝܠܳܟ. ܕܰܚܢܺܝܓܳܐܺܝܬ ܓܳܥܶܝܢܰܢ ܒܠܶܒܳܐ ܠܘܳܬܳܟ. ܘܰܐܫܪܳܝܗܝ ܒܰܐܘ̈ܳܢܶܐ ܕܢܽܘܗܪܳܐ ܘܰܒܢܰܘ̈ܚܶܐ ܫܡܰܝܳܢ̈ܶܐ. ܒܥܺܕܬܳܐ ܗܳܝ ܐܽܘܪܺܫܠܶܝܡܳܝܬܳܐ ܕܒܽܘܟܪ̈ܶܐ ܕܰܟܬܺܝܒܺܝܢ ܒܰܫܡܰܝܳܐ. ܘܶܐܡܰܬܝ ܕܰܐܝܟ ܡܺܐܡܪܳܐ ܕܺܝܠܳܟ ܐܳܬܶܐ ܐܰܢ̱ܬ ܥܰܠ ܥܢܳܢܰܝ̈ ܫܡܰܝܳܐ ܥܰܡ ܚܰܝܠܳܐ ܘܫܽܘܒܚܳܐ ܣܰܓܺܝܳܐܐ ܘܰܡܟܰܢܶܫ ܐܰܢ̱ܬ ܒܝܰܕ ܡܰܠܰܐܟ̈ܶܐ ܕܺܝܠܳܟ ܩܰܕܺܝ̈ܫܶܐ ܠܰܓ̈ܒܰܝܳܐ ܕܺܝܠܳܟ ܡܶܢ ܐܰܪܒܰܥ ܪ̈ܽܘܚܰܝ ܫܡܰܝܳܐ ܘܰܐܝܠܶܝܢ ܕܰܒܩܰܒܪ̈ܶܐ ܐܶܢܽܘܢ ܩܳܝܡܺܝܢ ܒܩܳܠܳܟ ܡܰܚܶܐ ܟܽܠ. ܐܶܬܕܰܟܪ ܡܳܪܝܳܐ ܒܥܽܘܗܕܳܢܳܐ ܕܪ̈ܰܚܡܶܐ ܠܥܰܒܕܳܟ ܗܳܢܳܐ (ܦܠܢ) ܕܰܦܪܰܫ ܘܫܰܢܺܝ ܡܶܢ ܒܰܝܢܳܬܰܢ ܝܰܘܡܳܢܳܐ ܘܚܰܦܳܐ ܠܰܥ̈ܒܳܕܶܐ ܕܒܶܗܬܬܳܐ ܕܺܝܠܶܗ ܘܕܺܝܠܰܢ ܩܕܳܡ ܗܳܝ ܒܺܐܡܰܐ ܕܺܝܠܳܟ ܙܺܝܥܬܳܐ ܘܰܕܚܺܝܠܬܳܐ. ܒܨܰܠܡܳܟ ܘܒܰܕܡܽܘܬܳܟ ܒܪܰܝܬܳܢ ܡܳܪܝܳܐ. ܘܒܺܐܝ̈ܕܰܝܳܐ ܕܺܝܠܳܟ ܩܰܕܺܝ̈ܫܬܳܐ ܓܒܰܠܬܳܢ. ܘܡܶܢ ܕܶܐܒܰܕܢܰܢ ܒܚܰܫܰܝ̈ܟ ܩܰܕܺܝ̈ܫܶܐ ܦܪܰܩܬܳܢ. ܘܰܒܦܰܓܪܳܟ ܘܰܕܡܳܟ ܡܙܰܓܬܳܢ. ܘܶܐܢ ܚܽܘ̈ܫܳܒܶܐ ܘܡ̈ܶܠܶܐ ܣܽܘܥܪ̈ܳܢܶܐ ܕܺܝܠܰܢ ܕܳܐܶܢ ܐܰܢ̱ܬ ܘܳܝ ܠܰܢ ܠܟܽܠܗܽܘܢ ܝܺܠܺܝ̈ܕܶܐ. ܐܶܠܳܐ ܚܽܘܣ ܛܳܒܳܐ ܘܰܫܒܽܘܩ ܡܪܰܚܡܳܢܳܐ. ܘܶܐܬܪܰܚܰܡ ܚܰܢܳܢܳܐ. ܘܰܦܪܽܘܩ ܘܦܰܨܳܐ ܠܰܢ ܡܶܢ ܒܶܗܬܬܳܐ ܘܟܽܘܐܳܪܳܐ ܕܰܩܕܳܡܰܝܟ. ܘܡܶܢ ܬܰܫܢܺܝ̈ܩܶܐ ܗܳܠܶܝܢ ܕܰܥܬܺܝܕܺܝܢ. ܘܠܰܐܝܠܶܝܢ ܕܰܐܒܺܝܠܺܝܢ ܒܰܝܰܐ. ܘܠܰܐܝܠܶܝܢ ܕܰܡܥܳܩܺܝܢ ܠܰܒܶܒ. ܘܠܰܐܝܠܶܝܢ ܕܒܰܚ̈ܛܳܗܶܐ ܘܒܺܝ̈ܫܳܬܳܐ ܡܟܰܬܡܺܝܢ: ܐܰܫܘܳܐ ܠܫܽܘܠܳܡܳܐ ܕܠܳܐ ܒܣܺܝܪ. ܘܰܠܓܰܠܝܽܘܬ ܐܰܦ̈ܶܐ ܕܰܩܕܳܡܰܝܟ ܒܝܰܘܡܳܐ ܐ̱ܚܪܳܝܳܐ ܕܡܶܐܬܺܝܬܳܟ. ܡܶܛܽܠ ܕܰܐܠܳܗܳܐ ܚܳܐܶܢ ܟܽܠ ܘܪܳܚܶܡ ܐ̱ܢܳܫ̈ܳܐ ܐܺܝܬܰܝܟ. ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܩܽܘܒܳܠ ܛܰܝܒܽܘܬܳܐ ܘܠܰܐܒܽܘܟ ܡܒܰܪܟܳܐ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠ̈ܡܺܝܢ ܐܰܡܺܝܢ܀

ܩܳܠܳܐ: ܩܽܘܩܳܝܳܐ
ܒܪܶܟܢܳܐ ܫܒܺܝܥܳܝܳܐ

ܒܒܳܥܽܘ ܡܶܢܳܟ ܚܰܢܳܢܳܐ ܘܰܡܠܶܐ ܪ̈ܰܚܡܶܐ. ܚܽܘܢܰܝܢܝ ܒܪ̈ܰܚܡܰܝܟ ܣܰܓܺܝ̈ܶܐܐ ܡܳܐ ܕܫܽܘܒܚܳܟ ܡܶܬܓܠܶܐ. ܬܶܕܥܰܟ ܢܽܘܪܳܐ: ܡܳܪܝ ܡܶܢ ܗܰܕܳܡܰܝ̈. ܡܳܐ ܕܰܡܚܳܐ ܡܶܢܝ: ܪܺܝܚ ܦܰܓܪܳܟ ܘܰܕܡܳܟ. ܡܰܥܡܽܘܕܺܝܬܳܐ ܕܺܝܠܶܕܬ̣ܰܢܝ ܪܽܘܚܳܢܳܐܺܝ̣ܬ. ܗܺܝ ܬܶܗܘܶܐ ܓܺܫܪܳܐ ܩܕܳܡܰܝ ܠܰܐܬܪܳܐ ܕܚܰܝ̈ܶܐ ܡܠܶܐ ܗ̄ ܘܶܐܙܡܰܪ ܠܳܟ ܫܽܘܒܚܳܐ܀

ܫܽܘܒܚܳܐ: ܣܰܪܗܶܒܘ ܘܶܐܬܰܘ ܕܳܒܽܘܪ̈ܰܝ ܘܶܐܢܳܐ ܠܳܐ ܝܶܕܥܶܬ. ܗܳܐ ܩܳܐܶܡ ܗܰܘ ܕܶܐܫܬܰܕܰܪ ܘܶܐܢܳܐ ܠܳܐ ܪܶܓܫܶܬ. ܡܳܪܰܢ ܡܳܪܰܢ: ܦܰܨܳܢܝ ܡܶܢ ܐܺܝ̈ܕܰܘܗܝ. ܕܳܐܟܶܠܩܰܪܨܳܐ: ܣܳܢܶܐ ܒܢܰܝ̈ܢܳܫܳܐ. ܥܰܡ ܩܰܕܺܝ̈ܫܰܝܟ ܡܰܢܰܥܰܝܢܝ ܠܒܶܝܬ ܡܰܠܟܽܘܬܳܐ. ܘܡܳܐ ܕܳܐܬܶܝܬ ܐܶܦܽܘܩ ܠܽܐܘܪܥܳܟ ܘܥܰܡܗܽܘܢ ܐܶܫܰܒܚܳܟ ܗ̄ܘܗ̄܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܟܳܗܢܳܐ: ܒܶܝܬ ܓܰܘܣܳܐ ܕܚܽܘܣܳܝܳܐ ܘܰܠܡܺܐܢܳܐ ܕܫܽܘܒܩܳܢܳܐ ܘܓܰܙܳܐ ܕܥܽܘܕܪ̈ܳܢܶܐ ܘܰܕܛܳܒ̈ܳܬܳܐ ܡܳܪܝܳܐ. ܐܰܢ̱ܬ ܒܪܶܚܡܰܬ ܐ̱ܢܳܫܽܘܬܳܟ ܩܰܒܶܠ ܠܥܶܛܪܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ. ܘܫܰܟܶܢ ܒܶܗ ܚܢܳܢܳܐ ܘܚܽܘܣܳܝܳܐ ܘܒܽܘܣܳܡܳܐ ܠܢܰܦ̈ܫܳܬܳܐ ܘܪ̈ܽܘܚܳܬܳܐ ܕܡܶܛܽܠܳܬܗܶܝܢ ܐܶܬܩܰܪܰܒ. ܘܒܽܘܝܳܐܳܐ ܘܥܽܘܕܪܳܢܳܐ ܠܰܐܝܠܶܝܢ ܕܰܚܠܳܦܰܝܗܽܘܢ ܦܪܰܫܘ ܘܫܰܡܠܺܝܘ. ܘܡܳܐ ܕܡܶܬܓܠܶܐ ܢܺܝܫܳܐ ܕܰܐܠܳܗܽܘܬܳܟ. ܥܰܒܕܳܟ ܘܣܳܓܽܘܕܳܟ (ܦܠܢ) ܕܰܫܟܶܒ ܥܰܠ ܣܰܒܪܳܟ ܢܩܽܘܡ ܡܶܢ ܝܰܡܺܝܢܳܟ ܘܢܶܚܙܶܐ ܚܢܳܢܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܰܕܪ̈ܳܫܶܐ ܒܩܳܠܳܐ: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܛܽܘܒܰܘܗܝ ܠܡܰܢ ܕܰܙܟ̣ܳܐ ܒܝܽܘܡ ܕܺܝܢܳܐ: ܝܶܫܽܘܥ ܕܰܝܳܢܳܐ ܕܕܰܝܳܢ̈ܶܐ܀

ܐܶܬܕܟܰܪܘ ܐܳܘ ܐܰܚܰܝ̈ ܕܰܐܝܟܳܐ ܚܢܰܢ: ܘܠܰܡܚܳܪ ܬܽܘܒ ܐܰܝܟܳܐ ܗܳܘܶܝܢܰܢ. ܝܰܘܡܳܢ ܡܰܠܳــ̈ـܠܶܐ ܒܓܰܘ ܥܽܘܡܪ̈ܶܐ: ܘܠܰܡܚܳܪ ܫܰܬܺܝ̈ܩܶܐ ܒܓܰܘ ܩܰܒܪ̈ܶܐ: ܛܽܘܒܰܘܗܝ ܠܡܰܢ ܕܶܥܗܰܕ ܥܽܘܢܕܳܢܶܗ܀

ܥܶܠܶܬ ܠܺܝ ܠܰܐܬܪܳܐ ܕܥܰܢܺܝ̈ܕܶܐ. ܘܠܰܝܬ ܢܽܘܗܪܳܐ ܕܡܰܦܨܰܚ ܠܰܩܒܺܝܪ̈ܶܐ. ܗܘܺܝ ܠܺܝ ܡܳܪܝ ܢܽܘܗܪܳܐ ܘܒܳܟ ܐܶܚܙܶܐ. ܘܶܐܪܕܶܐ ܒܳܟ ܢܽܘܗܪܳܐ ܕܠܳܐ ܦܳܛܰܪ. ܘܶܐܗܰܠܶܟ ܠܰܐܬܪܳܐ ܕܚܰܕ̈ܘܳܬܳܐ܀

ܐܚܪܺܢܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܒܪܺܝܟ ܗܽܘ ܡܫܺܝܚܳܐ: ܕܰܡܢܰܚܶܡ ܠܥܰܢܺܝ̈ܕܶܐ. ܘܡܰܠܒܶܫ ܫܽܘܒܚܳܐ. ܠܦܰܓܪ̈ܰܝܗܽܘܢ ܒܢܽܘܚܳܡܳܐ܀

ܐܳܘ ܥܰܢܺܝ̈ܕܶܐ. ܢܽܘܚܳܡܳܐ ܡܰܛܺܝ ܠܶܗ. ܠܳܐ ܬܶܟܪܶܐ ܠܟܽܘܢ. ܒܚܽܘܒܳܠܳܐ ܕܦܰܓܪ̈ܰܝܟܽܘܢ. ܗܰܘ ܕܰܒܪܳܐ ܘܨܰܒܶܬ ܩܢܽܘܡܰܝ̈ܟܽܘܢ. ܗܽܘ ܡܢܰܚܶܡ ܘܰܡܩܺܝܡ ܦܰܓܪ̈ܰܝܟܽܘܢ. ܘܰܠܟܽܠ ܐ̱ܢܳܫ ܐܰܝܟ ܥܰܡܠܶܗ. ܦܳܪܰܥ ܠܶܗ ܒܟܺܐܢܽܘܬܳܐ܀

ܐܳܘ ܕܶܐܬܬܰܚܬܺܝ. ܒܛܰܝܒܽܘܬܶܗ ܠܒܶܝܬ ܡܺܝ̈ܬܶܐ. ܘܰܗܘܳܐ ܐܳܪܚܳܐ. ܠܰܩܒܺܝܪ̈ܶܐ ܕܺܐܝܬ ܒܰܫܝܽܘܠ. ܡܳܐ ܕܳܐܬܶܝܬ ܒܚܰܪܬܳܐ ܕܝܰܘ̈ܡܳܬܳܐ. ܕܰܬܢܰܚܶܡ ܠܓܶܢܣܳܐ ܕܒܶܝܬ ܐܳܕܳܡ. ܢܰܚܶܡܳܝܗܝ ܒܛܰܝܒܽܘܬܳܟ. ܥܰܒܕܳܟ ܗܳܢ ܕܰܫܟܶܒ ܒܳܟ܀

ܐܚܪܺܢܳܐ ܒܩ̄: ܢܚܰܕܬܺܝܘܗܝ ܢܽܘܚܳܡܳܐ

ܥܽܘܢܺܝܬܳܐ: ܢܚܰܕܬܺܝܘܗܝ ܢܽܘܚܳܡܳܐ: ܡܫܺܝܚܳܐ ܡܠܶܐ ܪ̈ܰܚܡܶܐ. ܠܥܰܒܕܳܟ ܘܣܳܓܽܘܕܳܟ. ܕܰܫܟܶܒ ܥܰܠ ܣܰܒܪܳܟ. ܘܢܶܪܘܰܙ ܒܡܰܠܟܽܘܬܳܟ܀

ܝܰܘܡܳܐ ܕܥܽܘܢܕܳܢܳܐ. ܝܰܘܡܰܐ ܗ̱ܘ ܡܰܪܺܝܪܳܐ. ܝܰܘܡܰܐ ܗ̱ܘ ܕܰܒܟܳܬܳܐ. ܝܰܘܡܰܐ ܗ̱ܘ ܕܰܚܢܰܓܬܳܐ. ܐܰܢ̱ܬ ܡܳܪܝ ܒܰܝܰܐ ܠܰܢ܀

ܡܶܢ ܫܶܠܝܳܐ ܨܰܦܚܶܗ: ܡܰܘܬܳܐ ܫܳܒܶܐ ܟܽܠ. ܘܠܳܐ ܝܰܗ̱ܒ ܠܶܗ ܐܰܦܬܳܐ. ܕܢܰܘܕܰܥ ܥܰܠ ܩܶܨܶܗ. ܢܒܰܝܐܺܝܘܗ̱ܝ ܢܽܘܚܳܡܳܟ܀

ܫܶܠܡܰܬ ܒܰܥܒܳܕܳܐ. ܡܶܠܬܶܗ ܕܰܢܒܺܝܳܐ. ܕܰܐܚܳܐ ܠܳܐ ܦܳܪܶܩ. ܘܪܳܚܡܳܐ ܠܳܐ ܡܥܰܕܰܪ. ܐܰܢ̱ܬ ܡܳܪܝ ܥܰܕܰܪܳܝܗܝ܀

ܐܚܪܺܢܳܐ ܒܩ̄: ܝܰܘܡܳܟ ܠܳܟ ܕܳܡܶܐ
(ܗܳܐ ܩܛܺܝܠ ܗ̱ܘ ܒܡܶܨܪܶܝܢ)

ܥܽܘܢܺܝܬܳܐ: ܒܪܺܝܟ ܚܰܝܳܐ ܕܰܨܒܳܐ: ܘܰܛܥܶܡ ܡܰܘܬܳܐ. ܘܰܙܪܰܥ ܒܰܢ ܣܰܒܪܳܐ. ܕܚܰܝܰܬ ܡܺܝ̈ܬܶܐ܀

ܚܰܣܳܐ ܡܳܪܝ ܘܰܫܒܽܘܩ. ܠܥܰܒܕܳܐ ܕܺܝܠܳܟ. ܚ̈ܛܳܗܶܐ ܘܒܽܘܨܳܪ̈ܶܐ ܕܰܣܥܰܪ ܩܽܘܕܡܰܝܟ. ܘܰܒܦܰܓܪܳܟ ܘܰܕܡܳܟ. ܡܳܪܝ ܢܶܫܬܰܘܙܰܒ. ܡܶܢ ܢܽܘܪܳܐ ܘܕܺܝܢܳܐ ܕܚܺܝܠܳܐ ܕܬܰܡܳܢ܀

ܒܰܨܠܺܝܒܳܟ ܡܳܪܰܢ. ܐܶܚܰܕ ܓܰܘܣܳܐ. ܥܰܒܕܳܟ ܕܰܫܟܶܒ ܒܳܟ. ܘܗܰܝܡܶܢ ܒܰܫܡܳܟ. ܒܶܗ ܡܳܪܝ ܢܶܫܬܰܘܙܰܒ. ܡܶܢ ܓܺܗܰܢܳܐ. ܘܡܶܢ ܕܺܝܢܳܐ ܕܚܺܝܠܳܐ: ܘܡܶܢ ܫܽܘܢܳܩܳܐ܀

ܐܰܫܪܳܐ ܡܳܪܝ ܠܥܰܒܕܳܟ. ܒܰܓܢܽܘܢ ܢܽܘܗܪܳܐ. ܒܰܐܬܪܳܐ ܕܒܽܘ̈ܣܳܡܶܐ ܥܰܡ ܩܰܕܺܝ̈ܫܰܝܟ. ܘܢܰܣܶܩ ܠܳܟ ܫܽܘܒܚܳܐ. ܒܶܝܬ ܟܶܢܫܰܝ̈ܗܽܘܢ. ܕܰܐܢ̱ܬܽܗ̱ܘ ܢܽܘܚܳܡܳܐ. ܘܚܰܝܰܬ ܡܺܝ̈ܬܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ

ܠܥܰܒܕܳܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ: ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܰܝܟ܀

ܡܳܪܝ ܘܰܥܠܰܝ ܚܽܘܣ ܘܺܐܚܶܐ ܒܪ̈ܰܚܡܶܐ ܕܡܶܢ ܝܰܡܺܝܢܳܐ. ܘܠܳܐ ܐܶܫܬܰܢܰܩ ܐܰܝܟ ܥܰܬܺܝܪܳܐ ܒܓܰܘ ܓܺܗܰܢܳܐ. ܒܶܐܠܦܳܐ ܕܡܰܝ̈ܳܐ ܠܝܰܡܳܐ ܕܢܽܘܪܳܐ ܗܰܒ ܠܺܝ ܕܶܐܥܒܰܪ. ܘܠܳܐ ܢܟ̣ܽܘܡ ܥܠܰܝ ܐܰܬܪܳܐ ܥܰܣܩܳܐ ܕܫܰܠܗܶܒܺܝܬܳܐ܀

ܬܶܒܗܰܬ ܢܽܘܪܳܐ ܡܶܢ ܗܰܕܳܡܰܝ̈ ܡܳܐ ܕܰܡܚܳܐ ܡܶܢܝ. ܪܺܝܚܶܗ ܕܦܰܓܪܳܟ ܘܰܕܡܳܟ ܚܰܣܝܳܐ ܕܰܡܡܰܙܰܓ ܒܺܝ. ܛܳܒܳܐ ܕܫܰܠܺܝܛ ܥܰܠ ܡܰܠܟܽܘܬܳܐ ܘܥܰܠ ܓܺܗܰܢܳܐ. ܡܶܢ ܓܺܗܰܢܳܐ ܦܰܨܳܐ ܠܺܝ ܡܳܪܝ ܘܪܰܚܶܡܥܠܰܝ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ: ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܙܽܘܡܳܪܳܐ:

ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܪܽܘܚܩܽܘܕܫܳܐ ܒܕܰܘܺܝܕ ܙܶܡܪܰܬ܀

ܩܶܪ̈ܝܳܢܶܐ
ܡܶܢ ܣܶܦܪܳܐ ܩܰܕܡܳܝܳܐ ܕܽܐܘܪܳܝܬܳܐ (ܕܰܒܪܺܝܬܳܐ)
ܟܗ: ܙ – ܝܐ Genesis 25: 7 – 11

ܘܗܳܠܶܝܢ ܝܰܘ̈ܡܰܝ ܫܢܰܝ̈ ܚܰܝܰܘ̈ܗܝ ܕܰܐܒܪܳܗܳܡ ܕܰܚܝܳܐ: ܡܳܐܐ ܘܫܰܒܥܺܝܢ ܘܚܰܡܶܫ ܫܢܺܝ̈ܢ. ܘܶܐܬܟܪܰܗ ܘܡܺܝܬ ܐܰܒܪܳܗܳܡ ܒܣܰܝܒܽܘܬܳܐ ܛܳܒܬܳܐ: ܣܐܶܒ ܘܰܣܒܰܥ ܝܰܘ̈ܡܳܬܶܗ: ܘܶܐܬܟܰܢܰܫ ܠܘܳܬ ܥܰܡܶܗ. ܘܩܰܒܪܽܘܗܝ ܐܺܝܣܚܳܩ ܘܺܐܝܫܡܳܥܺܝܠ ܒܢܰܘ̈ܗܝ: ܒܰܡܥܰܪܬܳܐ ܐܰܥܺܝܦܬܳܐ ܕܰܒܚܰܩܠܳܐ ܕܥܶܦܪܽܘܢ ܒܰܪ ܨܳܚܳܪ ܚܺܝܬܳܝܳܐ ܕܰܩܕܳܡ ܡܰܡܪܶܐ. ܚܰܩܠܳܐ ܕܰܙܒܰܢ ܐܰܒܪܳܗܳܡ ܡܶܢ ܒܢܰܝ̈ ܚܺܝܬ ܠܝܽܘܪܬܳܢܳܐ ܕܩܰܒܪܳܐ: ܬܰܡܳܢ ܐܶܬܩܒܰܪ ܐܰܒܪܳܗܳܡ ܘܣܰܪܳܐ ܐܰܢ̱ܬܬܶܗ. ܘܰܗܘܳܐ ܡܶܢ ܒܳܬܰܪ ܕܡܺܝܬ ܐܰܒܪܳܗܳܡ: ܒܰܪܶܟ ܐܰ‌ܠܳܗܳܐ ܠܺܐܝܣܚܳܩ ܒܪܶܗ: ܘܺܝܬܶܒ ܐܺܝܣܚܳܩ ܥܰܠ ܓܶܢ̱ܒ ܒܺܪܳܐ ܕܚܰܝܳܐ ܚܙܳܢܝ. ܒܰܪܶܟܡܳܪܝ܀

ܐܚܪܺܢܳܐ: ܡܶܢ ܣܶܦܪܳܐ ܩܰܕܡܳܝܳܐ ܕܽܐܘܪܳܝܬܳܐ (ܕܰܒܪܺܝܬܳܐ)
ܡܛ: ܠܓ܆ ܢܢ: ܐ – ܝܓ Genesis 49: 33, 50: 1 – 13

ܘܟܰܕ ܫܰܠܶܡ ܝܰܥܩܽܘܒ ܠܰܡܦܰܩܳܕܽܘ ܠܰܒܢܰܘ̈ܗܝ: ܦܫܰܛ ܖ̈ܶܓܠܰܘ̈ܗܝ ܒܥܰܪܣܳܐ: ܘܶܐܬܟܪܰܗ ܘܡܺܝܬ: ܘܶܐܬܟܢܶܫ ܠܘܳܬ ܥܰܡܶܗ. ܘܰܢܦܰܠ ܝܰܘܣܶܦ ܥܰܠ ܐܰܦܰܘ̈ܗܝ ܕܰܐܒܽܘܗܝ: ܘܰܒܟܳܐ ܥܠܰܘܗ̱ܝ ܘܢܰܫܩܶܗ. ܘܦܰܩܶܕ ܝܰܘܣܶܦ ܠܥܰܒܕܰܘ̈ܗܝ ܐܳܣܰܘ̈ܳܬܳܐ ܠܡܶܚܢܰܛ ܠܰܐܒܽܘܗܝ: ܘܚܰܢܛܽܘܗܝ ܐܳܣܰܘ̈ܳܬܳܐ ܠܺܝܣܪܳܐܶܝܠ. ܘܰܡܠܰܘ ܠܶܗ ܐܰܪܒܥܺܝܢ ܝܰܘܡܺܝ̈ܢ: ܡܶܛܽܠ ܕܗܳܟܰܢܳܐ ܫܳܠܡܺܝܢ ܝܰܘ̈ܡܳܬܳܐ ܕܰܚܢܺܝ̈ܛܶܐ: ܘܰܒܟܰܐܗܝ ܡܶܨܖ̈ܳܝܶܐ ܫܰܒܥܺܝܢ ܝܰܘ̈ܡܳܬܳܐ. ܘܰܥܒܰܪܘ ܝܰܘ̈ܡܰܝ ܒܟܳܬܶܗ: ܘܶܐܡܰܪ ܝܰܘܣܶܦ ܠܰܕܒܶܝܬ ܦܶܪܥܽܘܢ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟܽܘܢ: ܐܶܡܰܪܘ ܩܕܳܡ ܦܶܪܥܽܘܢ. ܐܳܒܝ ܐܰܘܡܝܰܢܝ ܘܶܐܡܰܪ ܠܺܝ: ܗܳܐ ܐܶܢܳܐ ܡܳܐܶܬ ܐ̱ܢܳܐ: ܒܩܰܒܪܝ ܕܙܶܒܢܶܬ ܠܺܝ ܒܰܐܪܥܳܐ ܕܰܟܢܰܥܢ: ܬܰܡܳܢ ܬܶܩܒܪܰܢܝ: ܗܳܫܳܐ ܐܶܣܰܩ ܐܶܩܒܽܘܪ ܠܳܐܒܝ ܘܶܐܗܦܽܘܟ. ܘܶܐܡܰܪ ܦܶܪܥܽܘܢ: ܣܰܩ ܘܰܩܒܽܘܪ ܠܰܐܒܽܘܟ ܐܰܝܟ ܕܰܐܘܡܝܳܟ. ܘܰܣܠܶܩ ܝܰܘܣܶܦ ܠܡܶܩܒܰܪ ܠܰܐܒܽܘܗܝ: ܘܰܣܠܶܩܘ ܥܰܡܶܗ ܟܽܠܗܽܘܢ ܥܰܒܕܰܘ̈ܗܝ ܕܦܶܪܥܽܘܢ: ܘܣܳܒ̈ܶܐ ܕܒܰܝܬܶܗ: ܘܟܽܠܗܽܘܢ ܣܳܒ̈ܶܐ ܕܰܐܪܥܳܐ ܕܡܶܨܪܶܝܢ. ܘܟܽܠܶܗ ܒܶܝܬ ܝܰܘܣܶܦ: ܘܰܐܚܰܘ̈ܗܝ ܘܒܶܝܬ ܐܰܒܽܘܗܝ ܣܠܶܩܘ ܥܰܡܶܗ: ܒܰܠܚܽܘܕ ܝܺܩܰܪܬܗܽܘܢ ܘܥܳܢ̈ܗܽܘܢ ܘܬܰܘܖ̈ܰܝܗܽܘܢ: ܫܒܰܩܘ ܒܰܐܪܥܳܐ ܕܓܶܫܳܢ. ܘܰܣܠܶܩܘ ܥܰܡܶܗ ܐܳܦ ܡܰܖ̈ܟܒܳܬܳܐ ܘܦܰܖ̈ܳܫܶܐ: ܘܰܗܘܳܬ ܡܰܫܪܺܝܬܳܐ ܕܥܰܫܺܝܢܳܐ ܛܳܒ. ܘܶܐܬܰܘ ܥܕܰܡܳܐ ܠܶܐܕܪܳܐ ܕܳܐܛܳܪ ܕܰܒܥܶܒܪܳܐ ܕܝܽܘܪܕܢܳܢ: ܘܰܐܪܩܶܕܘ ܬܰܡܳܢ ܡܰܪܩܽܘܕܬܳܐ ܪܰܒܬܳܐ ܘܥܰܫܺܝܢܬܳܐ: ܘܰܥܒܰܕ ܠܰܐܒܽܘܗܝ ܒܶܝܬ ܒܳܟܶܐ ܫܰܒܥܳܐ ܝܰܘܡܺܝ̈ܢ. ܘܰܚܙܰܘ ܝܳܬܒܰܝ̈ ܐܰܪܥܳܐ ܟܢܰܥܢܳܝ̈ܶܐ ܠܶܐܒܠܳܐ ܒܶܐܕܪܳܐ ܕܳܐܛܳܪ: ܘܶܐܡܰܪܘ: ܐܶܒܠܰܐ ܗ̱ܘ ܪܰܒܳܐ ܗܳܢܳܐ ܠܡܶܨܖ̈ܳܝܶܐ: ܡܶܛܽܠ ܗܳܢܳܐ ܩܪܰܘ ܫܡܶܗ: ܐܶܒܰܠ ܡܶܨܪܶܝܢ ܕܰܒܥܶܒܪܳܐ ܕܝܽܘܪܕܢܳܢ. ܘܰܥܒܰܕܘ ܠܶܗ ܒܢܰܘ̈ܗܝ ܗܳܟܰܢܳܐ ܐܰܝܟ ܕܦܰܩܶܕ ܐܶܢܽܘܢ. ܘܫܰܩܠܽܘܗܝ ܘܰܐܘܒܠܽܘܗܝ ܠܰܐܪܥܳܐ ܕܰܟܢܰܥܢ: ܘܩܰܒܪܽܘܗܝ ܒܰܡܥܰܪܬܳܐ ܕܰܒܚܰܩܠܳܐ ܐܰܥܺܝܦܬܳܐ: ܕܰܙܒܰܢ ܐܰܒܪܳܗܳܡ ܚܰܩܠܳܐ ܠܝܽܘܪܬܳܢܳܐ ܕܩܰܒܪܳܐ: ܡܶܢ ܥܶܦܪܽܘܢ ܚܺܝܬܳܝܳܐ ܕܰܩܕܳܡ ܡܰܡܪܶܐ. ܒܰܪܶܟܡܳܪܝ܀

ܐܚܪܺܢܳܐ: ܡܶܢ ܢܒܺܝܽܘܬܶܗ ܕܚܰܙܩܺܝܶܠ ܢܒܺܝܳܐ
ܠܙ: ܐ – ܝܕ Ezekiel 37: 1 – 14

ܥܰܠ ܚܰܝܰܬ ܡܺܝ̈ܬܶܐ. ܘܰܗܘܳܬ ܥܠܰܝ ܐܺܝܕܶܗ ܕܡܳܪܝܳܐ: ܘܰܐܦܩܰܢܝ ܒܪܽܘܚܶܗ ܡܳܪܝܳܐ: ܘܰܐܫܪܝܰܢܝ ܒܰܦܩܰܥܬܳܐ: ܘܡܰܠܝܳܐ ܗܘܳܬ ܓܰܖ̈ܡܶܐ. ܘܰܐܥܒܪܰܢܝ ܥܠܰܝܗܽܘܢ ܚܕܳܖ̈ܳܝܗܽܘܢ: ܘܰܚܙܺܝܬ ܕܣܰܓܺܝܐܺܝܢ ܛܳܒ ܒܰܦܩܰܥܬܳܐ: ܘܛܳܒ ܝܰܒܺܝܫܺܝܢ. ܘܶܐܡܰܪ ܠܺܝ: ܒܰܪܢܳܫܳܐ: ܚܳܐܶܝܢ ܓܰܖ̈ܡܶܐ ܗܳܠܶܝܢ: ܘܶܐܡܪܶܬ ܐܰܢ̱ܬ ܗܽܘ ܝܳܕܰܥ ܡܳܪܶܐ ܡܳܖ̈ܰܘܳܬܳܐ. ܘܶܐܡܰܪ ܠܺܝ ܐܶܬܢܰܒܳܐ ܥܰܠ ܓܰܖ̈ܡܶܐ ܗܳܠܶܝܢ ܘܶܐܡܰܪ ܠܗܽܘܢ ܓܰܖ̈ܡܶܐ ܝܰܒܺܝ̈ܫܶܐ: ܫܡܰܥܘ ܦܶܬܓܳܡܶܗ ܕܡܳܪܝܳܐ. ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܓܰܖ̈ܡܶܐ ܗܳܠܶܝܢ: ܗܳܐ ܐܶܢܳܐ ܡܰܥܶܠ ܐ̱ܢܳܐ ܒܟܽܘܢ ܪܽܘܚܳܐ ܘܬܺܚܽܘܢ. ܘܶܐܬܶܠ ܥܠܰܝܟܽܘܢ ܓܝܳܕ̈ܶܐ: ܘܰܐܣܶܩ ܥܠܰܝܟܽܘܢ ܒܶܣܪܳܐ: ܘܶܐܩܪܽܘܡ ܥܠܰܝܟܽܘܢ ܡܶܫܟܳܐ: ܘܶܐܬܶܠ ܒܟܽܘܢ ܪܽܘܚܳܐ ܘܬܺܚܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ. ܘܶܐܬܢܰܒܺܝܬ ܐܰܝܟ ܕܦܰܩܕܰܢܝ: ܘܟܰܕ ܐܶܬܢܰܒܺܝܬ: ܗܘܳܐ ܩܳܠܳܐ ܘܙܰܘܥܳܐ: ܘܰܩ̣ܪܶܒܘ ܓܰܖ̈ܡܶܐ ܓܰܪܡܳܐ ܠܘܳܬ ܫܳܪܺܝܬܶܗ. ܘܰܚܙܺܝܬ ܕܰܣܠܶܩܘ ܥܠܰܝܗܽܘܢ ܓܝܳܕ̈ܶܐ ܘܒܶܣܪܳܐ: ܘܶܐܬܩܪܶܡ ܥܠܰܝܗܽܘܢ ܡܶܫܟܳܐ ܡܶܢ ܠܥܶܠ: ܘܪܽܘܚܳܐ ܠܰܝܬ ܗܘܳܬ ܒܗܽܘܢ. ܘܶܐܡܰܪ ܠܺܝ: ܐܶܬܢܰܒܳܐ ܥܰܠ ܪܽܘܚܳܐ: ܐܶܬܢܰܒܳܐ ܒܰܪܢܳܫܳܐ: ܘܶܐܡܰܪ ܠܪܽܘܚܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܳܝ ܪܽܘܚܳܐ ܡܶܢ ܐܰܪܒܰܥ ܖ̈ܽܘܚܶܐ: ܘܦܽܘܚܝ ܒܗܳܠܶܝܢ ܩܛܺܝ̈ܠܶܐ ܘܢܺܚܽܘܢ. ܘܶܐܬܢܰܒܺܝܬ ܐܰܝܟ ܕܦܰܩܕܰܢܝ: ܘܥܶܠܰܬ ܒܗܽܘܢ ܪܽܘܚܳܐ ܘܰܚܝܰܘ: ܘܩܳܡܘ ܥܰܠ ܖ̈ܶܓܠܰܝܗܽܘܢ: ܚܰܝܠܳܐ ܕܛܳܒ ܣܰܓܺܝ. ܘܶܐܡܰܪ ܠܺܝ: ܒܰܪܢܳܫܳܐ: ܗܳܠܶܝܢ ܓܰܖ̈ܡܶܐ ܟܽܠܗܽܘܢ ܕܰܒܢܰܝ̈ ܝܺܣܪܳܐܶܝܠ ܐܶܢܽܘܢ: ܕܳܐܡܪܺܝܢ ܗܘܰܘ ܝܺܒܶܫܘ ܓܰܖ̈ܡܰܝܢ: ܘܶܐܒܰܕ ܣܰܒܪܰܢ: ܘܰܒܛܶܠܢ ܠܰܢ. ܡܶܛܽܠ ܗܳܢܳܐ ܐܶܬܢܰܒܳܐ ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܦܳܬܰܚ ܐ̱ܢܳܐ ܩܰܒܖ̈ܰܝܟܽܘܢ: ܘܡܰܝܬܶܐ ܐ̱ܢܳܐ ܠܟܽܘܢ ܠܰܐܪܥܳܐ ܕܺܝܣܪܳܐܶܝܠ. ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܦܶܬܚܶܬ ܩܰܒܖ̈ܰܝܟܽܘܢ: ܘܡܳܐ ܕܰܐܣܶܩܬܟܽܘܢ ܡܶܢ ܩܰܒܖ̈ܰܝܟܽܘܢ. ܐܶܬܶܠ ܪܽܘܚܝ ܒܟܽܘܢ ܘܬܺܚܽܘܢ: ܘܶܐܫܒܽܘܩܟܽܘܢ ܒܰܐܪܥܟܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܐܶܡܪܶܬ ܘܥܳܒܶܕ ܐ̱ܢܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܥܰܠ ܕܣܳܠܩܺܝܢ ܘܗܳܘܶܝܢ ܚܰܕ ܥܰܡܳܐ ܘܰܚܕܳܐ ܡܰܠܟܽܘܬܳܐ. ܒܰܪܶܟܡܳܪܝ܀

ܩܕܳܡ ܦܪܰܟܣܺܝܣ
ܒܩ̄: ܠܶܟܝ ܢܶܬܟܰܫܰܦ

ܫܠܺܝ̈ܚܶܐ ܓ̣ܒܰܝ̈ܳܐ. ܕܶܐܫܬܰܕܰܪܘ̱ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ. ܘܰܢܦܰܩܘ̱ ܐܰܟ̣ܪܶܙܘ̱. ܣܒܰܪܬ̣ܶܗ ܕܰܒܪܳܐ ܒܶܝܬ̣ ܥܰܡ̱̈ܡܶܐ ܘܥܶܒܪ̈ܶܝܗ̇ ܕܰܐܪܥܳܐ. ܣܰܒܰܪܘ̱ ܗ̱ܘܰܘ ܡܰܠܟܽܘܬ̣ܳܐ ܕܰܫܡܰܝܳܐ ܟܰܕ ܐܳܡܪܺܝܢ ܛܽܘܒܳܐ ܠܰܡܗܰܝܡ̈ܢܶܐ܀

ܡܶܢ ܐܶܓܰܪܬܳܐ ܩܰܕܡܳܝܬܳܐ ܕܦܶܛܪܳܘܣ ܫܠܺܝܚܳܐ
ܓ: ܝܚ – ܟܒ܇ ܕ: ܐ - ܒ 1 Peter 3: 18 – 22, 4:1-2

ܡܶܛܽܠ ܕܳܐܦ ܡܫܺܝܚܳܐ ܚܕܳܐ ܙܒܰܢ ܡܺܝܬ ܚܠܳܦ ܚܛܳܗܰܝ̈ܢ܇ ܙܰܕܺܝܩܳܐ ܚܠܳܦ ܚܰܛܳܝ̈ܶܐ܆ ܕܰܢܩܰܪܶܒܟܽܘܢ ܠܰܐܠܳܗܳܐ. ܘܡܺܝܬ ܒܰܦܓܰܪ ܘܰܚܝܳܐ ܒܪܽܘܚ. ܘܰܐܟܪܶܙ ܠܢܰܦ̈ܫܳܬܳܐ ܐܰܝܠܶܝܢ ܕܰܐܚܺܝ̈ܕܳܢ ܗ̱ܘ̈ܰܝ ܒܰܫܝܽܘܠ. ܗܳܠܶܝܢ ܕܡܶܢ ܩܕܺܝܡ ܠܳܐ ܐܶܬܛܦܺܝ̈ܣܝ ܗ̱ܘ̈ܰܝ ܒܝܰܘ̈ܡܳܬܶܗ ܕܢܽܘܚ܆ ܟܰܕ ܡܰܓܪܰܬ ܪܽܘܚܶܗ ܕܰܐܠܳܗܳܐ ܦܶܩܕܰܬ ܕܬܶܗܘܶܐ ܩܺܒܽܘܬܳܐ܁ ܥܰܠ ܣܰܒܪܳܐ ܕܰܬܝܳܒܽܘܬܗܽܘܢ܇ ܘܰܬܡܳܢܶܐ ܒܰܠܚܽܘܕ ܢܰܦ̈ܫܳܢ ܥܰܠܶܝ̈ܢ ܠܳܗ̇ ܘܰܚ̈ܝܰܝ ܒܡܰܝ̈ܳܐ. ܕܳܐܦ ܐܰܢ̱ܬܽܘܢ ܒܶܗ ܒܗܰܘ ܛܽܘܦܣܳܐ ܚܳܐܶܝܢ ܐܢ̱ܬܽܘܢ ܒܡܰܥܡܽܘܕܺܝܬܳܐ܆ ܠܰܘ ܟܰܕ ܦܰܓܪܳܐ ܡܫܺܝܓܺܝܢ ܐܢ̱ܬܽܘܢ ܡܶܢ ܨܳܐܬܳܐ܇ ܐܶܠܳܐ ܟܰܕ ܡܰܘܕܶܝܢ ܐܢ̱ܬܽܘܢ ܒܰܐܠܳܗܳܐ ܒܬܺܐܪܬܳܐ ܕܟܺܝܬܳܐ. ܘܒܰܩܝܳܡܬܶܗ ܕܝܶܫܽܘܥ ܡܫܺܝܚܳܐ. ܗܰܘ ܕܶܐܬܥܰܠܺܝ ܠܰܫܡܰܝܳܐ. ܘܺܐܝܬܰܘܗ̱ܝ ܥܰܠ ܝܰܡܺܝܢܳܐ ܕܰܐܠܳܗܳܐ. ܘܶܐܫܬܰܥܒܰܕܘ ܠܶܗ ܡ̈ܰܠܰܐܟܶܐ ܘܫܰܠܺܝ̈ܛܳܢܶܐ ܘܚܰܝ̈ܠܰܘܳܬܳܐ܀ ܐܶܢ ܡܫܺܝܚܳܐ ܗܳܟܺܝܠ ܚܰܫ ܚܠܳܦܰܝܟܽܘܢ ܒܰܒܣܰܪ܆ ܘܳܐܦ ܐܰܢ̱ܬܽܘܢ ܒܶܗ ܒܗܳܢܳܐ ܪܶܥܝܳܢܳܐ ܐܶܙܕܰܝܰܢܘ. ܟܽܠ ܡܰܢ ܕܡܳܐܶܬ ܓܶܝܪ ܒܦܰܓܪܶܗ܆ ܫܠܺܝ ܠܶܗ ܡܶܢ ܟܽܠܗܽܘܢ ܚܛܳܗ̈ܶܐ܆ ܕܠܳܐ ܡܶܟܺܝܠ ܠܰܪ̈ܓܺܝܓܳܬܳܐ ܕܰܒܢܰܝ̈ܢܳܫܳܐ ܢܺܚܶܐ܇ ܟܡܳܐ ܙܰܒܢܳܐ ܕܺܐܝܬܰܘܗ̱ܝ ܒܦܰܓܪܳܐ܇ ܐܶܠܳܐ ܠܨܶܒܝܳܢܳܐ ܕܰܐܠܳܗܳܐ. ܒܰܪܶܟܡܳܪܝ܀

ܩܕܳܡ ܫܠܺܝܚܳܐ
ܒܩ̄: ܛܽܘܒܰܝܟܝ ܥܺܕܬܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ̣ ܕܳܐܡܰܪ: ܥܰܠ ܐܰܝܠܶܝܢ ܕܕܳܡܟܺܝܢ ܐܰܚܰܝ̈: ܨܳܒܶܐ ܐܢܳܐ ܕܠܳܐ ܬܶܟܪܶܐ ܠܟܽܘܢ: ܕܰܒܩܳܠ ܩܰܪܢܳܐ ܡܶܢ ܪܰܘܡܳܐ: ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ: ܠܳܒܶܫ ܗܳܢܳܐ ܕܡܶܬܚܰܒܰܠ: ܠܰܕܠܳܐ ܒܳܠܳܐ ܘܡܶܬܚܰܒܰܠ: ܕܪܰܗܒܽܘܢܳܐ ܕܚܰܝ̈ܶܐ ܩܰܒܶܠ: ܦܰܓܪܶܗ ܘܰܕܡܶܗ ܕܰܡܫܺܝܚܳܐ܀

ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܠܕ ـ ܡܛ 1Corinthians 15:34-49

ܐܰܥܺܝܪܘ ܠܶܒܟܽܘܢ ܙܰܕܺܝܩܳܐܺܝܬ ܘܠܳܐ ܬܶܚܛܽܘܢ. ܐܺܝܬ ܓܶܝܪ ܐ̱ܢܳܫ̈ܳܐ ܕܺܝܕܰܥܬܳܐ ܕܰܐܠܳܗܳܐ ܠܰܝܬ ܒܗܽܘܢ. ܠܒܶܗܬܰܬܟܽܘܢܽ ܗ̱ܘ ܐܳܡܰܪ ܐ̱ܢܳܐ. ܢܺܐܡܰܪ ܐ̱ܢܳܫ ܡܶܢܟܽܘܢ܆ ܕܰܐܝܟܰܢܳܐ ܩܳܝܡܺܝܢ ܡܺܝ̈ܬܶܐ܇ ܘܒܰܐܝܢܳܐ ܦܰܓܪܳܐ ܐܳܬܶܝܢ؟ ܣܰܟܠܳܐ! ܙܰܪܥܳܐ ܕܙܳܪܰܥ ܐܰܢ̱ܬ܆ ܐܶܢ ܠܳܐ ܡܳܐܶܬ. ܠܳܐ ܚܳܝܶܐ. ܘܗܰܘ ܡܶܕܶܡ ܕܙܳܪܰܥ ܐܰܢ̱ܬ܆ ܠܳܐ ܗ̱ܘ ܗܰܘ ܦܰܓܪܳܐ ܕܰܥܬܺܝܕ ܠܡܶܗܘܳܐ. ܙܳܪܰܥ ܐܰܢ̱ܬ܇ ܐܶܠܳܐ ܦܪܶܕܬܳܐ ܥܰܪܛܶܠܳܝܬܳܐ ܕܚ̈ܶܛܶܐ. ܐܰܘ ܕܰܣܥܳܪ̈ܶܐ. ܐܰܘ ܕܫܰܪܟܳܐ ܕܙܰܪ̈ܥܽܘܢܶܐ. ܐܰܠܳܗܳܐ ܕܶܝܢ ܝܳܗܶܒ ܠܶܗ ܦܰܓܪܳܐ. ܐܰܝܟܰܢܳܐ ܕܨܳܒܶܐ. ܘܰܠܚܰܕ ܚܰܕ ܡܶܢ ܙܰܪ̈ܥܽܘܢܶܐ ܦܰܓܪܳܐ ܕܰܟܝܳܢܶܗ܀ ܠܳܐ ܗ̱ܘܳܐ ܕܶܝܢ ܟܽܠ ܦܓܰܪ ܫܘܶܐ. ܐ̱ܚܪܺܝܢܽ ܗ̱ܘ ܓܶܝܪ ܦܰܓܪܳܐ ܕܒܰܪܢܳܫܳܐ. ܘܰܐ̱ܚܪܺܝܢ ܕܰܒܥܺܝܪܳܐ. ܘܰܐ̱ܚܪܺܝܢ ܕܦܳܪܰܚܬܳܐ. ܘܰܐ̱ܚܪܺܝܢ ܕܢܽܘ̈ܢܶܐ. ܘܺܐܝܬ ܦܰܓܪ̈ܶܐ ܫܡܰܝ̈ܳܢܶܐ. ܘܺܐܝܬ ܦܰܓܪ̈ܶܐ ܐܰܪ̈ܥܳܢܳܝܶܐ. ܐܶܠܳܐ ܐ̱ܚܪܺܝܢܽ ܗ̱ܘ ܫܽܘܒܚܳܐ ܕܰܫܡܰܝ̈ܳܢܶܐ܆ ܘܰܐ̱ܚܪܺܝܢ ܕܰܐܪ̈ܥܳܢܳܝܶܐ. ܘܰܐ̱ܚܪܺܝܢܽ ܗ̱ܘ ܫܽܘܒܚܳܐ ܕܫܶܡܫܳܐ. ܘܰܐ̱ܚܪܺܝܢ ܫܽܘܒܚܳܐ ܕܣܰܗܪܳܐ. ܘܰܐ̱ܚܪܺܝܢ ܫܽܘܒܚܳܐ ܕܟܰܘ̈ܟܒܶܐ. ܘܟܰܘܟܒܳܐ ܡܶܢ ܟܰܘܟܒܳܐ ܡܝܰܬܰܪ ܗ̱ܘ ܒܫܽܘܒܚܳܐ. ܗܳܟܰܢܳܐ ܐܳܦ ܚܰܝܰܬ ܡܺܝ̈ܬܶܐ. ܡܶܙܕܰܪܥܺܝܢ ܒܰܚܒܳܠܳܐ܆ ܩܳܝܡܺܝܢ ܕܠܳܐ ܚܒܳܠܳܐ. ܡܶܙܕܰܪܥܺܝܢ ܒܨܰܥܪܳܐ܆ ܩܳܝܡܺܝܢ ܒܫܽܘܒܚܳܐ. ܡܶܙܕܰܪܥܺܝܢ ܒܰܟܪܺܝܗܽܘܬܳܐ܆ ܩܳܝܡܺܝܢ ܒܚܰܝܠܳܐ. ܡܶܙܕܪܰܥ ܦܰܓܪܳܐ ܢܰܦܫܳܢܳܝܳܐ܆ ܩܳܐܶܡ ܦܰܓܪܳܐ ܪܽܘܚܳܢܳܝܳܐ. ܐܺܝܬ ܓܶܝܪ ܦܰܓܪܳܐ ܕܰܢܦܶܫ܆ ܘܺܐܝܬ ܦܰܓܪܳܐ ܕܪܽܘܚ. ܗܳܟܰܢܳܐ ܐܳܦ ܟܬܺܝܒ. ܗܘܳܐ ܐܳܕܳܡ ܒܰܪܢܳܫܳܐ ܩܰܕܡܳܝܳܐ ܠܰܢܦܶܫ ܚܰܝܳܐ܆ ܘܳܐܕܳܡ ܐ̱ܚܪܳܝܳܐ ܠܪܽܘܚܳܐ ܡܰܚܝܳܢܺܝܬܳܐ. ܐܶܠܳܐ ܠܳܐ ܗ̱ܘܳܐ ܠܽܘܩܕܰܡ ܪܽܘܚܳܢܳܝܳܐ܆ ܐܶܠܳܐ ܢܰܦܫܳܢܳܝܳܐ. ܘܗܳܝܕܶܝܢ ܪܽܘܚܳܢܳܝܳܐ. ܒܰܪܢܳܫܳܐ ܩܰܕܡܳܝܳܐ ܥܰܦܪܳܢܳܐ ܕܡܶܢ ܐܰܪܥܳܐ܆ ܒܰܪܢܳܫܳܐ ܕܰܬܪܶܝܢ ܡܳܪܝܳܐ ܡܶܢ ܫܡܰܝܳܐ. ܐܰܝܟܰܢܳܐ ܕܺܐܝܬܰܘܗ̱ܝ ܗܰܘ ܥܰܦܪܳܢܳܐ܆ ܗܳܟܰܢܳܐ ܐܳܦ ܥܰܦܪ̈ܳܢܶܐ. ܘܰܐܝܟܰܢܳܐ ܕܺܐܝܬܰܘܗ̱ܝ ܗܰܘ ܕܡܶܢ ܫܡܰܝܳܐ܆ ܗܳܟܰܢܳܐ ܐܳܦ ܫܡܰܝ̈ܳܢܶܐ. ܘܰܐܝܟ ܕܰܠܒܶܫܢ ܕܡܽܘܬܳܐ ܕܗܰܘ ܕܡܶܢ ܥܰܦܪܳܐ܆ ܗܳܟܰܢܳܐ ܢܶܠܒܰܫ ܕܡܽܘܬܳܐ ܕܗܰܘ ܕܡܶܢ ܫܡܰܝܳܐ. ܒܰܪܶܟܡܳܪܝ܀

ܐܚܪܺܢܳܐ: ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܬܶܣܰܠܽܘܢܺܝ̈ܩܳܝܶܐ ܐ
ܕ: ܝܓ ـ ܝܚ 1Thessalonians 4:13-18

ܨܳܒܶܐ ܐ̱ܢܳܐ ܕܬܶܕܥܽܘܢ ܐܰܚܰܝ̈܆ ܕܥܰܠ ܐܰܝܠܶܝܢ ܕܕܳܡܟܺܝܢ ܠܳܐ ܬܶܗܘܶܐ ܟܳܪܝܳܐ ܠܟܽܘܢ܇ ܐܰܝܟ ܫܰܪܟܳܐ ܕܐ̱ܢܳܫ̈ܳܐ ܕܣܰܒܪܳܐ ܠܰܝܬ ܠܗܽܘܢ. ܐܶܢ ܓܶܝܪ ܡܗܰܝܡܢܺܝܢܰܢ ܕܝܶܫܽܘܥ ܡܺܝܬ ܘܩܳܡ܆ ܗܳܟܰܢܳܐ ܐܳܦ ܐܰܠܳܗܳܐ ܠܰܐܝܠܶܝܢ ܕܰܕܡܶܟܘ ܒܝܶܫܽܘܥ ܡܰܝܬܶܐ ܥܰܡܶܗ. ܗܳܕܶܐ ܕܶܝܢ ܐܳܡܪܺܝܢܰܢ ܠܟܽܘܢ ܒܡܶܠܬܶܗ ܕܡܳܪܰܢ܆ ܕܰܚܢܰܢ ܐܰܝܠܶܝܢ ܕܡܶܫܬܰܚܪܺܝܢܰܢ ܒܡܶܐܬܺܝܬܶܗ ܕܡܳܪܰܢ ܕܚܰܝܺܝܢܰܢ܇ ܠܳܐ ܢܰܕܪܶܟ ܠܰܐܝܠܶܝܢ ܕܰܕܡܶܟܘ. ܡܶܛܽܠ ܕܗܽܘ ܡܳܪܰܢ ܒܦܽܘܩܕܳܢܳܐ. ܘܰܒܩܳܠܳܐ ܕܪܺܝܫ ܡ̈ܰܠܰܐܟܶܐ. ܘܰܒܩܰܪܢܳܐ ܕܰܐܠܳܗܳܐ܆ ܢܳܚܶܬ ܡܶܢ ܫܡܰܝܳܐ. ܘܡܺܝ̈ܬܶܐ ܕܒܰܡܫܺܝܚܳܐ ܢܩܽܘܡܽܘܢ ܠܽܘܩܕܰܡ. ܘܗܳܝܕܶܝܢ ܚܢܰܢ ܐܰܝܠܶܝܢ ܕܡܶܫܬܰܚܪܺܝܢܰܢ ܕܚܰܝܺܝܢܰܢ܆ ܢܶܬܚܛܶܦ ܥܰܡܗܽܘܢ ܐܰܟܚܕܳܐ ܒܰܥܢ̈ܳܢܶܐ ܠܽܐܘܪܥܶܗ ܕܡܳܪܰܢ ܒܳܐܐܰܪ. ܘܗܳܟܰܢܳܐ ܒܟܽܠܙܒܰܢ ܥܰܡ ܡܳܪܰܢ ܢܶܗܘܶܐ. ܗܘܰܘ ܗܳܟܺܝܠ ܡܒܰܝܐܺܝܢ ܚܰܕ ܠܚܰܕ. ܒܡ̈ܶܠܶܐ ܗܳܠܶܝܢ܀

ܗܽܘܠܳܠܳܐ:

ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ. ܘܰܦܪܽܘܩܳܝܗܝ ܒܝܰܕ ܛܰܝܒܽܘܬܳܟ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ. ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܽܘܬ ܘܢܶܫܡܰܥ ܠܰܣܒܰܪܬܳܐ ܕܡ̈ܶܠܶܐ ܚܰܝ̈ܳܬܳܐ ܕܶܐܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܟܳܪܽܘܙܽܘܬܳܐ ܡܰܚܝܳܢܺܝܬܳܐ ܡܶܢ ܝܽܘܚܰܢܳܢ ܫܠܺܝܚܳܐ ܕܡܰܟܪܶܙ ܚܰܝ̈ܳܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ. ܬܶܫܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ. ܘܥܰܠ ܟܽܠܰܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܐܶܘܰܢܓܶܠܺـܝܳܘܢ ܡܶܢ ܝܽܘܚܰܢܳܢ ܫܠܺܝܚܳܐ
ܗ:ܝܛ - ܟܛ John 5:19-29

ܥܢܳܐ ܕܶܝܢ ܝܶܫܽܘܥ ܘܶܐܡܰܪ ܠܗܽܘܢ. ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܠܳܐ ܡܶܫܟܰܚ ܒܪܳܐ ܥܳܒܶܕ ܡܶܕܶܡ ܡܶܢ ܨܒܽܘܬ ܢܰܦܫܶܗ. ܐܶܠܳܐ ܡܶܕܶܡ ܕܚܳܙܶܐ ܠܰܐܒܳܐ ܕܥܳܒܶܕ. ܐܰܝܠܶܝܢ ܓܶܝܪ ܕܰܐܒܳܐ ܥܳܒܶܕ܆ ܗܳܠܶܝܢ ܐܳܦ ܒܪܳܐ ܐܰܟܘܳܬܶܗ ܥܳܒܶܕ. ܐܰܒܳܐ ܓܶܝܪ ܪܳܚܶܡ ܠܰܒܪܶܗ. ܘܟܽܠܡܶܕܶܡ ܕܥܳܒܶܕ ܡܚܰܘܶܐ ܠܶܗ. ܘܰܕܝܰܬܺܝܪܺܝܢ ܡܶܢ ܗܳܠܶܝܢ ܥ̈ܒܳܕܶܐ ܡܚܰܘܶܐ ܠܶܗ. ܕܰܐܢ̱ܬܽܘܢ ܬܶܬܕܰܡܪܽܘܢ. ܐܰܝܟܰܢܳܐ ܓܶܝܪ ܕܰܐܒܳܐ ܡܩܺܝܡ ܡܺܝ̈ܬܶܐ ܘܡܰܚܶܐ ܠܗܽܘܢ܆ ܗܳܟܰܢܳܐ ܐܳܦ ܒܪܳܐ ܠܰܐܝܠܶܝܢ ܕܨܳܒܶܐ ܡܰܚܶܐ. ܠܳܐ ܗ̱ܘܳܐ ܓܶܝܪ ܐܰܒܳܐ ܕܳܐܶܢ ܠܐ̱ܢܳܫ. ܐܶܠܳܐ ܟܽܠܶܗ ܕܺܝܢܳܐ ܝܰܗܒܶܗ ܠܰܒܪܳܐ. ܕܟܽܠܢܳܫ ܢܝܰܩܰܪ ܠܰܒܪܳܐ܆ ܐܰܝܟ ܕܰܡܝܰܩܰܪ ܠܰܐܒܳܐ. ܗܰܘ ܕܠܳܐ ܡܝܰܩܰܪ ܠܰܒܪܳܐ܆ ܠܳܐ ܡܝܰܩܰܪ ܠܰܐܒܳܐ ܕܫܰܕܪܶܗ. ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܡܰܢ ܕܫܳܡܰܥ ܡܶܠܰܬܝ ܘܰܡܗܰܝܡܶܢ ܠܡܰܢ ܕܫܰܕܪܰܢܝ. ܐܺܝܬ ܠܶܗ ܚܰܝ̈ܶܐ ܕܰܠܥܳܠܰܡ. ܘܰܠܕܺܝܢܳܐ ܠܳܐ ܐܳܬܶܐ. ܐܶܠܳܐ ܫܰܢܺܝ ܠܶܗ ܡܶܢ ܡܰܘܬܳܐ ܠܚܰܝ̈ܶܐ. ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܳܐܬܝܳܐ ܫܳܥܬܳܐ. ܐܳܦ ܗܳܫܳܐ ܐܺܝܬܶܝܗ̇. ܐܶܡܰܬܝ ܕܡܺܝ̈ܬܶܐ ܢܶܫܡܥܽܘܢ ܩܳܠܶܗ ܕܰܒܪܶܗ ܕܰܐܠܳܗܳܐ. ܘܗܳܢܽܘܢ ܕܫܳܡܥܺܝܢ ܢܺܚܽܘܢ. ܐܰܝܟܰܢܳܐ ܓܶܝܪ ܕܠܰܐܒܳܐ ܐܺܝܬ ܚܰܝ̈ܶܐ ܒܰܩܢܽܘܡܶܗ܆ ܗܳܟܰܢܳܐ ܝܰܗ̱ܒ ܐܳܦ ܠܰܒܪܳܐ. ܕܢܶܗܘܽܘܢ ܚܰܝ̈ܶܐ ܒܰܩܢܽܘܡܶܗ. ܘܰܐܫܠܛܶܗ ܕܢܶܗܘܶܐ ܥܳܒܶܕ ܐܳܦ ܕܺܝܢܳܐ. ܕܰܒܪܶܗ ܗ̱ܘ ܕܶܝܢ ܕܐ̱ܢܳܫܳܐ܆ ܠܳܐ ܬܶܬܕܰܡܪܽܘܢ ܒܗܳܕܶܐ ܕܳܐܬܝܳܐ ܫܳܥܬܳܐ܇ ܐܶܡܰܬܝ ܕܟܽܠܗܽܘܢ ܐܰܝܠܶܝܢ ܕܰܒܩܰܒܪ̈ܶܐ ܐܶܢܽܘܢ ܢܶܫܡܥܽܘܢ ܩܳܠܶܗ. ܘܢܶܦܩܽܘܢ܆ ܐܰܝܠܶܝܢ ܕܰܥܒܰܕܘ ܛܳܒ̈ܳܬܳܐ ܠܰܩܝܳܡܬܳܐ ܕܚܰܝ̈ܶܐ܇ ܘܰܐܝܠܶܝܢ ܕܰܥܒܰܕܘ ܒܺܝ̈ܫܳܬܳܐ ܠܰܩܝܳܡܬܳܐ ܕܕܺܝܢܳܐ܀

ܘܝܳܗܒܺܝܢ ܫܠܳܡܳܐ ܠܥܰܢܺܝܕܳܐ ܘܳܐܡܪܺܝܢ ܩܳܠܳܐ ܗܳܢܳܐ:

ܩܳܠܳܐ: ܠܥܶܠ ܡܶܢ ܫܽܘܦܪ̈ܶܐ ܕܰܥܢܳܢ̈ܶܐ
(ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ)

ܠܡܳܢܳܐ ܒܪܽܘܚܩܳܐ ܩܳܝܡܺܝܢ ܐܢ̱ܬܽܘܢ ܚܰܒܺܝ̈ܒܰܝ: ܩܪܽܘܒܘ ܨܶܐܝܕܰܝ ܘܗܰܒܘ ܠܺܝ ܫܠܳܡܳܐ ܘܨܰܠܰܘ ܥܠܰܝ. ܘܪܰܟܶܒܘ ܥܠܰܝ ܐܽܘܠ̈ܝܳܬܳܐ ܒܰܚܢܰܓܬܳܐ: ܕܗܳܐ ܡܰܘܬܳܐ ܥܰܓܢܰܢܝ ܝܰܘܡܳܢ ܒܬܰܪܥܳܗ̇ ܕܰܫܝܽܘܠ܀

ܟܰܕ ܡܰܠܰܐܟܳܐ ܕܡܰܘܬܳܐ ܐܶܬܳܐ ܒܳܬܰܪܝ. ܠܟܽܠ ܓܰܒܺܝ̈ܢ ܚܳܪܶܬ ܘܰܚܙܺܝܬ ܘܠܰܝܬ ܕܰܡܥܰܕܰܪ. ܐܰܢ̱ܬ ܡܳܪܝ ܕܰܫܟܺܝܚ ܐܰܢ̱ܬ ܠܰܐܝܠܶܝܢ ܕܩܳܪܶܝܢ ܠܳܟ. ܐܰܩܺܝܡܰܝܢܝ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ܀

ܫܽܘܒܚܳܐ: ܦܽܘܫ ܒܰܫܠܳܡܳܐ ܐܳܘ ܥܳܠܡܳܐ ܘܥܳܡܽܘܪ̈ܰܘܗܝ: ܕܙܰܒܢܳܐ ܠܳܐ ܡܰܘܬܰܪ ܡܶܕܶܡ ܠܰܕܪܳܚܶܡ ܠܶܗ. ܗܳܐ ܕܳܒܪܺܝܢ ܠܺܝ ܡܶܢܳܟ ܐܺܙܰܠ ܐܶܥܒܶܕ: ܚܽܘܫܒܳܢܳܐ ܩܕܳܡ ܕܰܝܳܢܳܐ ܕܟܽܠ ܟܰܣ̈ܝܳܬܳܐ܀

ܡܶܢ ܥܳܠܰܡ: ܐܰܟܡܳܐ ܕܠܳܒ̈ܫܳܢ ܫܽܘ̈ܫܰܢܶܐ ܒܓܰܘ ܕܰܒܪܳܐ: ܠܒܽܘܫܳܐ ܕܠܳܐ ܙܩܺܝܪ ܒܺܐܝ̈ܕܰܝܳܐ ܕܰܒܢܰܝ̈ܢܳܫܳܐ. ܗܳܟܰܢ ܠܳܒܫܺܝܢ ܙܰܕܺܝ̈ܩܶܐ ܒܢܽܘܚܳܡܳܐ: ܠܒܽܘܫܳܐ ܕܙܶܩܪܰܬ݀ ܪܽܘܚ ܩܽܘܕܫܳܐ ܠܝܰܠܕܰܘ̈ܗܝ ܕܳܐܕܳܡ܀

ܘܢܳܣܶܒ ܟܳܗܢܳܐ ܡܶܫܚܳܐ ܒܺܐܝܕܶܗ ܘܳܐܡܰܪ ܨܠܽܘܬܳܐ ܗܳܕܶܐ:

ܡܳܪܝܳܐ ܐܰܠܳܗܳܐ ܗܰܘ ܕܰܕܒܰܪܬܳܝܗܝ ܠܥܰܒܕܳܟ ܗܳܢܳܐ (ܦܠܢ) ܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܒܦܽܘܩܕܳܢܳܐ ܕܰܐܠܳܗܽܘܬܳܟ ܘܰܒܨܶܒܝܳܢܳܐ ܕܡܳܪܽܘܬܳܟ. ܫܰܕܰܪ ܠܶܗ ܡܶܢ ܠܘܳܬܳܟ ܣܽܘܝܳܥܳܐ ܕܚܰܝܠܰܘ̈ܳܬܳܐ ܡܰܠܰܐܟܳܝ̈ܶܐ. ܘܗܰܒ ܠܶܗ ܕܰܒܝܰܕ ܡܶܫܚܳܐ ܗܳܢܳܐ ܕܥܰܠ ܫܠܰܕܳܐ ܕܺܝܠܶܗ ܡܶܬܪܡܶܐ: ܕܢܶܗܘܶܐ ܫܳܪܽܘܥܳܐ ܘܠܳܐ ܡܶܬܠܰܒܟܳܢܳܐ ܠܚܰܝܠܰܘ̈ܳܬܳܐ ܣܰܩܽܘ̈ܒܠܳܝܶܐ ܘܰܠܡܰܫܪ̈ܝܳܬܳܐ ܕܰܒܥܶܠ̈ܕܒܳܒܶܐ ܗܳܠܶܝܢ ܕܒܳܐܐܰܪ ܟܰܡܺܝܢܺܝܢ ܘܥܰܡ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ ܩܪܳܒܳܐ ܥܳܒܕܺܝܢ. ܘܡܰܢܰܥܳܝܗܝ ܠܰܐܘ̈ܳܢܶܐ ܕܢܽܘܗܪܳܐ ܘܕܰܕܝܳܨܳܐ ܥܰܡ ܟܽܠܗܽܘܢ ܩܰܕܺܝ̈ܫܶܐ. ܘܟܰܕ ܚܳܕܶܐ ܘܪܳܘܶܙ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܐܰܒܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܡܰܩܶܦ ܘܳܐܡܰܪ:

ܠܰܓܗܳܝܬܳܐ ܕܡܶܢ ܥܰܡ̈ܠܶܐ ܘܠܰܢܝܳܚܬܳܐ ܕܡܶܢ ܛܽܘܪ̈ܳܦܶܐ ܘܰܠܒܽܘܣܳܡܳܐ ܕܥܰܡ ܩܰܕܺܝ̈ܫܶܐ܀

ܘܪܳܡܶܐ ܡܶܫܚܳܐ ܥܰܠ ܐܰܦܰܘ̈ܗܝ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ:

ܟܳܗܢܳܐ: ܒܰܫܡܳܐ ܕܰܐܒܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܚܰܕܝܶܗ ܟܰܕ ܐܳܡܰܪ:

ܟܳܗܢܳܐ: ܘܕܰܒܪܳܐ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܶܢ ܥܰܠ ܒܽܘܪ̈ܟܰܘܗܝ ܟܰܕ ܐܳܡܰܪ:

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܟܰܕ ܡܰܚܬܺܝܢ ܫܠܰܕܳܐ ܠܩܰܒܪܳܐ ܐܳܡܪܺܝܢ

ܩܳܠܳܐ: ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ

ܠܩܰܒܪܳܐ ܢܳܚܶܬ ܫܽܘܠܛܳܢܶܗ ܕܗܰܘ ܚܰܝܠܳܐ ܡܫܰܒܚܳܐ: ܘܣܳܥܰܪ ܬܰܡܳܢ ܬܶܕܡܽܘܪܬܳܐ ܘܬܳܗܪܺܝܢ ܡܰܠܰܐܟ̈ܶܐ: ܒܓܰܪ̈ܡܶܐ ܙܪ̈ܺܝܩܶܐ ܕܡܶܬܟܰܢܫܺܝܢ ܘܫܽܘܒܚܳܐ ܠܳܒܫܺܝܢ: ܢܰܦܫܳܐ ܘܦܰܓܪܳܐ ܫܰܘܝܳܐܺܝܬ ܘܩܳܝܡܺܝܢ ܕܠܳܐ ܚܒܳܠܳܐ܀

ܫܽܘܒܚܳܐ ܠܳܟ ܡܳܪܝ ܕܰܒܩܳܠܳܟ: ܩܳܡ ܠܳܥܳܙܳܪ ܐܰܚܽܘܗ̇ ܕܡܰܪܝܰܡ ܘܰܕܡܳܪܬܳܐ ܡܶܢ ܒܳܬܰܪ ܕܰܣܪܺܝ: ܘܰܒܡܶܠܬܳܟ ܬܽܘܒ ܐܶܬܬܥܺܝܪܰܬ ܒܰܪ̱ܬ ܝܽܘܐܳܪܳܫ: ܘܰܒܩܳܠܳܐ ܐܚܪܺܢܳܐ ܕܩܳܪܶܝܬ ܩܳܝܡܺܝܢ ܥܰܢܺܝ̈ܕܶܐ܀

ܫܽܘܒܚܳܐ ܠܚܰܝܠܳܐ ܥܶܠܝܳܐ: ܕܰܠܒܶܝܬ ܡܺܝ̈ܬܶܐ ܢܚܶܬ ܣܰܥܪܶܗ ܠܳܐܕܳܡ ܥܰܦܪܳܢܳܐ: ܘܗܳܟܰܢ ܐܶܡܰܪ ܠܶܗ: ܠܳܐ ܬܶܟܪܶܐ ܠܳܟ ܥܰܦܪܳܢܳܐ ܕܥܰܠ ܦܽܘܩܕܳܢܝ ܥܒܰܪܬ: ܕܶܐܢܳܐ ܐܢܳܐ ܒܪܳܐ ܕܰܐܠܳܗܳܐ ܕܰܡܡܺܝܬ ܐܳܦ ܡܰܚܶܐ܀

ܗܰܘ ܒܳܪܽܘܝܳܐ ܚܰܟܺܝܡܳܐ ܕܒܰܡܗܺܝܪܽܘܬܶܗ: ܟܰܕܢܳܗ̇ ܠܟܽܠܳܗ̇ ܥܳܡܰܪܬܳܐ ܬܚܶܝܬ ܢܺܝܪܶܗ ܕܡܰܘܬܳܐ: ܗܽܘ ܫܳܪܶܐ ܠܡܰܠ̈ܟܶܐ ܪ̈ܳܡܶܐ ܡܶܢ ܕܪ̈ܰܓܰܝܗܽܘܢ: ܘܰܠܕܰܝ̈ܳܢܶܐ ܥܰܙܺܝ̈ܙܶܐ ܡܶܢ ܐܽܘܚܕܳܢܰܝ̈ܗܽܘܢ܀

ܗܰܘ ܕܝܰܗܒ ܗ̱ܘܳܐ ܢܽܘܗܪܳܐ ܠܣܰܡܝܳܐ: ܘܫܶܡܥܳܐ ܠܕܽܘܓܳܐ: ܘܰܦܫܰܛ ܠܶܫܳܢܶܗ ܕܦܺܐܩܳܐ ܘܠܰܡܫܰܪܝܳܐ ܐܰܚܠܶܡ: ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ: ܥܰܠ ܓܰܪ̈ܡܰܝܗܽܘܢ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܶܗ܀

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢ̱ܬ ܗܽܘ ܡܢܰܚܡܳܢܗܽܘܢ܀

ܘܟܰܕ ܣܳܝܡܺܝܢ ܟܺܐܦܳܐ ܫܳܩܶܠ ܟܳܗܢܳܐ ܥܰܦܪܳܐ ܡܶܢ ܐܰܪܥܳܐ ܒܺܐܝܕܶܗ ܘܪܳܡܶܐ ܒܩܰܒܪܳܐ ܐܰܘ ܠܥܶܠ ܡܶܢ ܫܠܰܕܳܐ ܨܠܺܝܒܳܐܺܝܬ ܘܳܐܡܰܪ:

ܗܳܐ ܫܠܶܡ ܨܶܒܝܳܢܳܟ ܡܳܪܰܢ ܐܰܝܟ ܕܶܐܡܰܪܬ: ܕܡܶܢ ܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬܶܗܦܽܘܟ. ܘܬܽܘܒ ܡܶܢ ܕܪܺܝܫ ܬܶܬܚܰܕܰܬ܀

ܘܣܳܝܡܺܝܢ ܥܰܦܪܳܐ ܘܳܐܡܪܺܝܢ ܣܽܘܓܺܝܬܳܐ ܗܳܕܶܐ:

ܒܩ̄: : ܐ̱ܪܳܙ ܠܺܝ ܐ̱ܪܳܙ ܠܺܝ (ܕܰܚܛܳܐ ܠܳܐ ܢܶܚܛܶܐ)

ܦܶܬܓܳܡܳܐ: ܚܕܺܝܬ ܟܰܕ ܐܳܡܪܺܝܢ ܗܘܰܘ ܠܺܝ:

ܕܡܳܪܰܢ ܐܳܬܶܐ: ܘܰܡܢܰܚܶܡ ܡܺܝ̈ܬܶܐ. ܘܥܳܒܶܕ ܣܰܒܪܳܐ: ܠܟܽܠܗܽܘܢ ܥܰܢܺܝ̈ܕܶܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ:

ܒܪܺܝܟ ܗܽܘ ܕܥܰܒܕܶܗ: ܡܰܘܬܳܐ ܕܠܳܐ ܫܽܘܚܕܳܐ. ܠܛܳܒ̈ܶܐ ܘܒܺܝ̈ܫܶܐ: ܕܳܒܰܪ ܫܰܘܝܳܐܺܝܬ܀

ܓܒܰܠܬܳܢܝ ܘܣܳܡܬ ܥܠܰܝ ܐܺܝܕܳܟ:

ܥܰܕܠܳܐ ܐܺܝܬܰܝ: ܓܒܰܠܬܳܢܝ ܡܶܢ ܥܰܦܪܳܐ. ܘܗܳܫܳܐ ܕܫܶܟܒܶܬ: ܐܰܚܳܢܝ ܕܰܐܘܕܶܐ ܠܳܟ܀

ܢܰܦܫܝ ܕܶܝܢ ܬܶܪܘܰܙ ܒܰܐܠܳܗܳܐ:

ܢܰܦܫܳܐ ܕܶܐܚܕܰܬ: ܓܰܘܣܳܐ ܒܰܨܠܺܝܒܳܟ. ܬܶܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܐܶܬܦܰܢ ܥܠܰܝ ܘܪܰܚܶܡܥܠܰܝ:

ܚܽܘܢܰܝܢܝ ܘܰܐܚܳܢܝ: ܘܰܫܒܽܘܩ ܠܺܝ ܚܰܘ̈ܒܰܝ. ܕܶܐܚܙܶܐ ܚܢܳܢܳܟ: ܒܝܰܘܡܳܐ ܕܡܶܐܬܺܝܬܳܟ܀

ܓܠܺܝ ܠܺܝ ܥܰܝ̈ܢܰܝ: ܕܶܐܚܙܶܐ ܬܶܕܡܽܘܪܬܶܐ. ܡܳܐ ܕܰܡܢܰܚܡܰܬ: ܠܟܽܠܗܽܘܢ ܥܰܢܺܝ̈ܕܶܐ܀

ܚܽܘܢܰܝܢܝ ܡܳܪܰܢ. ܡܶܛܽܠ ܛܰܝܒܽܘܬܳܟ. ܘܥܰܡ ܩܰܕܺܝ̈ܫܰܝܟ ܐܰܫܘܳܢܝ ܠܰܓܢܽܘܢܳܟ܀

ܛܽܘܒܰܘܗܝ ܠܰܐܝܢܳܐ: ܕܚܰܢܬܳܝܗܝ. ܒܒܶܝܬ ܕܺܝܢܳܐ. ܐܰܝܟ ܓܰܝܳܣܳܐ. ܒܪܺܝܫܶܗ ܕܰܨܠܺܝܒܳܐ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ: ܬܰܘܕܺܝܬܳܐ ܠܰܒܪܳܐ. ܘܰܠܪܽܘܚ ܩܽܘܕܫܳܐ: ܣܶܓܕܬܳܐ ܘܪܽܘܡܪܳܡܳܐ܀

ܡܶܢ ܥܳܠܰܡ: ܠܳܟ ܬܶܫܒܽܘܚܬܳܐ. ܝܶܫܽܘܥ ܦܳܪܽܘܩܰܢ ܕܡܰܘܬܳܐ ܒܺܐܝ̈ܕܰܝܟ: ܘܚܰܝ̈ܶܐ ܒܨܶܒܝܳܢܳܟ܀

ܐܚܪܺܢܐ ܒܩ̄: ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܦܶܬܓܳܡܳܐ: ܠܘܳܬܳܟ ܡܳܪܝܳܐ ܢܰܦܫܝ ܐܰܪܺܝܡܶܬ:

ܡܰܠܟܳܐ ܡܫܺܝܚܳܐ ܦܳܪܽܘܩܰܢ ܒܝܽܘܡ ܡܶܐܬܺܝܬܳܟ ܢܰܚܶܡܰܝܢܝ. ܘܰܐܩܺܝܡܰܝܢܝ ܡܶܢ ܝܰܡܺܝܢܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐܰܠܳܗܝ ܒܳܟ ܣܰܒܪܶܬ ܠܳܐ ܐܶܒܗܰܬ:

ܣܳܓܕܺܝܢܰܢ ܡܳܪܝ ܠܰܨܠܺܝܒܳܟ. ܕܒܳܗ ܩܝܳܡܬܰܢ ܘܒܶܗ ܢܽܘܚܳܡܰܢ. ܘܒܶܗ ܡܶܬܢܰܚܡܺܝܢ ܥܰܢܺܝ̈ܕܶܐ. ܘܠܳܒܫܺܝܢ ܫܽܘܒܚܳܐ ܦܰܓܪ̈ܰܝܗܽܘܢ܀

ܕܺܝܠܳܟ ܐܶܢܽܘܢ ܫܡܰܝ̈ܳܐ ܘܰܐܪܥܳܐ:

ܬܪ̈ܰܝܗܽܘܢ ܥܳܠ̈ܡܶܐ ܕܺܝܠܳܟ ܡܳܪܝ. ܗܳܪܟܳܐ ܘܬܰܡܳܢ ܫܽܘܠܛܳܢܳܟ. ܠܚܰܝ̈ܶܐ ܢܰܛܰܪ ܒܰܨܠܺܝܒܳܟ ܠܥܰܢܝ̈ܕܶܐ ܚܰܣܳܐ ܒܪ̈ܰܚܡܰܝܟ܀

ܡܗܰܝܡܰܢ ܗܽܘ ܡܳܪܝܳܐ ܒܡܶܠܰܘ̈ܗܝ:

ܡܽܘܠܟܳܢܳܐ ܕܩܰܒܶܠ ܡܶܢܳܟ. ܓܰܝܳܣܳܐ ܥܰܠ ܪܺܝܫ ܩܰܝܣܳܐ. ܢܩܰܒܠܽܘܢܳܝܗܝ ܡܳܪܝ ܥܰܢܺܝ̈ܕܶܐ ܕܰܐܘܕܺܝܘ ܒܰܬܠܺܝܬܳܝܽܘܬܳܐ܀

ܪܽܘܣ ܥܠܰܝ ܒܙܽܘܦܳܐ ܘܶܐܬܕܰܟܶܐ:

ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ. ܝܰܡܺܝܢܳܟ ܬܰܠܒܶܫ ܐܶܢܽܘܢ ܐܶܣܛܰܠ ܫܽܘܒܚܳܐ ܒܡܰܠܟܽܘܬܳܟ܀

ܢܶܚܕܽܘܢ ܒܳܟ ܟܽܠ ܕܒܳܥܶܝܢ ܠܳܟ:

ܥܰܢܝ̈ܕܶܐ ܕܰܫܩܰܠܘ ܦܰܓܪܳܟ. ܘܒܰܕܡܳܟ ܚܰܝܳܐ ܐܶܬܚܰܣܺܝܘ. ܥܰܠ ܡܰܕܒܰܚ ܩܽܘܕܫܳܐ ܢܶܗܘܶܐ. ܕܽܘܟܪܳܢܗܽܘܢ ܥܕܰܡܳܐ ܠܥܳܠܰܡ܀

ܗܳܝܕܶܝܢ ܢܺܐܡܪܽܘܢ:

ܢܒܺܝ̈ܶܐ ܩܳܥܶܝܢ ܐܰܝܟ ܪ̈ܰܥܡܶܐ ܘܰܫܠܺܝ̈ܚܶܐ ܐܰܝܟ ܫܺܝܦܽܘܪ̈ܶܐ. ܕܥܳܠܡܳܐ ܗܳܢܳܐ ܥܳܒܰܪ ܠܶܗ. ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ܀

ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ:

ܗܳܐ ܒܰܢܒܺܝ̈ܶܐ ܢܽܘܚܳܡܰܢ. ܘܒܰܫܠܺܝ̈ܚܶܐ ܬܽܘܒ ܦܽܘܪܥܳܢܰܢ. ܘܒܰܣܒܰܪܬܶܗ ܕܡܳܪܰܢ ܐܽܘܪܚܳܐ. ܕܰܕܪܺܝܫܳܐ ܠܒܶܝܬ ܡܰܠܟܽܘܬܳܐ܀

ܣܰܟܝܰܬ ܢܰܦܫܝ ܠܦܽܘܪܩܳܢܳܟ:

ܥܰܝ̈ܢܰܝ ܣܰܟܺܝ̈ܝ ܠܦܽܘܪܩܳܢܳܟ. ܘܰܠܡܺܐܡܪܳܐ ܕܙܰܕܺܝܩܽܘܬܳܟ. ܒܰܣܶܡܰܝܢܝ ܥܰܡ ܩܰܕܺܝ̈ܫܰܝܟ. ܣܰܒܪܳܐ ܛܳܒܳܐ ܕܰܩܒܺܝܪ̈ܶܐ܀

ܢܰܘܥܶܐ ܡܶܢ ܡܕܺܝܢ̱ܬܶܗ ܐܰܝܟ ܥܶܣܒܳܐ ܕܰܐܪܥܳܐ:

ܠܳܐ ܫܳܒܶܩ ܡܶܛܪܳܐ ܒܰܐܪܥܳܐ. ܥܶܩܳܪܳܐ ܕܠܳܐ ܡܰܘܥܶܐ ܠܶܗ. ܘܠܳܐܴ ܡܫܺܝܚܳܐ ܫܳܒܶܩ ܒܰܫܝܽܘܠ. ܥܰܢܺܝܕܳܐ ܕܠܳܐ ܡܢܰܚܶܡ ܠܶܗ܀

ܫܽܘܒܚܳܐ: ܐܰܠܳܗܳܐ ܐܰܒܳܐ ܐܰܚܳܢܝ. ܒܪܳܐ ܡܫܺܝܚܳܐ ܢܰܚܶܡ ܡܺܝܬܽܘܬܝ. ܪܽܘܚ ܩܽܘܕܫܳܐ ܦܰܪܰܩܠܺܝܛܳܐ. ܡܰܢܰܥܰܝܢܝ ܠܰܐܬܪܳܐ ܕܚܰܝ̈ܶܐ܀

ܡܶܢ ܥܳܠܰܡ: ܠܳܟ ܬܶܒܪܽܘܟ ܘܬܶܣܓܽܘܕ ܬܺܒܶܝܠ. ܘܟܽܠ ܠܶܫܳܢ ܠܰܫܡܳܟ ܢܰܘܕܶܐ. ܕܰܐܢ̱ܬ ܗ̣ܽܘ ܡܢܰܚܡܳܢܳܐ ܕܡܺܝ̈ܬܶܐ. ܘܣܰܒܪܳܐ ܛܳܒܳܐ ܠܰܩܒܺܝܪ̈ܶܐ܀

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ...

ܡܫܰܡ̈ܫܳܢܶܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀
ܡܫܰܒܚܺܝܢܰܢ ܠܳܟ܇ ܡܒܰܪܟ̣ܺܝܢܰܢ ܠܳܟ܇ ܣܳܓ̣ܕܺܝܢܰܢ ܠܳܟ܇ ܡܡܰܠܽܠܘܬ̣ ܫܽܘܒܚܳܐ ܡܰܣܩܺܝܢܰܢ ܠܳܟ܀
ܡܰܘܕܶܝܢܰܢ ܠܳܟ ܡܶܛܽܠ ܪܰܒܽܘܬ̣ܳܐ ܕܫܽܘܒܚܳܐ ܕܺܝܠܳܟ܇ ܡܳܪܝܳܐ ܥܳܒܽܘܕܳܐ ܡܰܠܟܳܐ ܫܡܰܝܳܢܳܐ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀
ܡܳܪܝܳܐ ܐܰܠܳܗܳܐ ܒܪܳܐ ܝܺܚܺܝܕܳܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܡܳܪܝܳܐ ܐܰܠܳܗܳܐ ܐܶܡܪܶܗ ܕܰܐܳܠܳܗܳܐ ܒܪܳܐ ܘܡܶܠܬ̣ܶܗ ܕܰܐܒܳܐ܇ ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ ܐܶܬ̣ܪܰܚܰܡܥܠܰܝܢ܀
ܗܰܘ ܕܫܳܩܶܠ ܐܰܘܟܺܝܬ̣ ܫܩܰܠ ܚܛܺܝܬ̣ܶܗ ܕܥܳܠܡܳܐ܇ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬ̣ܰܢ܇ ܗܰܘ ܕܝܳܬ̣ܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܣ ܘܶܐܬ̣ܪܰܚܰܡܥܠܰܝܢ܀
ܡܶܛܽܠ ܕܰܐܢ̱ܬܽ ܗ̱ܘ ܠܚܽܘܕܰܝܟ ܩܰܕܺܝܫܰܬܽ ܗ̱ܘ ܠܚܽܘܕܰܝܟ܇ ܡܳܪܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܫܽܘܒܚܶܗ ܕܰܐܳܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬ̣ܳܐ ܕܚ̈ܰܝܰܝ ܐܶܒܰܪܟ̣ܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܇ ܡܒܰܪܟ̣ܳܐ ܠܥܳܠܰܡ ܗܰܘ ܕܺܐܝܬ̣ܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀
ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬ̣ܳܐ ܕܺܝܠܰܢ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒܚ̈ܳܬ̣ܳܐ ܠܥܳܠܰܡ ܥܳܠܡܺܝܢ܀
ܠܳܟ ܝܳܐܶܐ ܫܽܘܒܚܳܐ܇ ܠܳܟ ܦܰܐܝܳܐ ܬܶܫܒܽܘܚܬܳܐ ܘܠܳܟ ܦܐܶܐ ܩܽܘܠܳܣܳܐ܇ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܉ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܇ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬ̣ܪܰܚܰܡܥܠܰܝܢ܀
ܚܽܘܒܳܟ ܐܰܚܬ̣ܳܟ ܡܶܢ ܐܰܬ̣ܪܳܟ ܨܶܐܕܰܝܢ ܡܳܪܝ܇ ܕܰܒܝܰܕ ܡܰܘܬܳܟ ܐܶܬ̣ܒܰܛܰܠܬ ܡܺܝܬ̣ܽܘܬ̣ܰܢ ܐܶܬ̣ܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ.
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ:

ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܘܽܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠܡ̈ܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀
ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ܀

ܬܶܫܡܶܫܬܳܐ ܕܥܰܢܺܝ̈ܕܶܐ

ܩܽܘܩܰܠܝܽܘܢ

ܐܰܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ ܗ̄ ܡܪܰܚܶܡ ܡܳܪܝܳܐ ܥܰܠ ܕܳܚ̈ܠܰܘܗ̱ܝ܀

ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘܡܰܘ̈ܗ̱ܝ ܗ̄ ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ܀

ܥܶܩܒܳܐ

ܥܰܒܕܳܟ ܕܰܫܟܶܒ ܥܰܠ ܣܰܒܪܳܟ: ܘܥܰܠ ܬܽܘܟܠܳـܢܶܗ ܕܰܚܢܳܢܳܟ. ܩܳܠܳܟ ܚܰܝܳܐ ܢܰܥܺܝܪܺܝܘܗ̱ܝ. ܡܶܢ ܩܰܒܪ̈ܶܐ ܠܓ݂ܰܘ ܦܰܪܕܰܝܣܳܐ܀

ܣـܛܳܘܡܶܢ ܩܰܐܠܳܘܤ ܩܽܘܪܝܶܐܠܶܝܣܳܘܢ܀

ܩܳܠܳܐ: ܒܩ̄: ܗܰܒܠܳܗ̇ ܠܥܺܕܬܳܟ

ܡܰܠܟܳܐ ܡܢܰܚܡܳܢܳܐ. ܒܫܽܘܒܚܶܗ ܕܳܢܰܚ ܡܶܢ ܪܰܘܡܳܐ ܘܡܰܚܶܐ ܡܺܝ̈ܬܶܐ܆ ܘܰܡܩܺܝܡ ܠܰܩܒܺܝܪ̈ܶܐ. ܘܩܳܝܡܺܝܢ ܫܰܘܝܳܐܺܝܬ: ܥܰܢܺܝ̈ܕܶܐ ܡܶܢ ܓ݂ܰܘ ܩܰܒܪ̈ܶܐ: ܘܡܰܣܩܺܝܢ ܫܽܘܒܚܳܐ. ܠܳܟ ܡܢܰܚܶܡ ܡܺܝ̈ܬܶܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܩܳܠܳܐ. ܕܶܐܡܰܪ ܡܳܪܰܢ ܒܰܣܒܰܪܬܶܗ: ܕܟܽܠ ܕܳܐܟܶܠ ܦܰܓܪܝ̱: ܘܫܳܬܶܐ ܕܶܡܝ̱ ܚܰܝܳܐ. ܠܳܐ ܐܰܪܦܺܝܘܗ̱ܝ ܒܰܫܝܽܘܠ. ܕܡܶܛܽܠܳܬܶܗ ܐܶܬܪܰܟܢܶܬ. ܘܛܶܥܡܶܬ ܡܰܘܬܳܐ. ܕܗܽܘ ܢܺܚܶܐ ܠܥܳܠܰܡ܀

ܐ̱ܚܪܺܢܳܐ ܒܩ̄: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ ܐܰܝܟ ܦܰܓܪܶܗ ܕܡܳܪܝܳܐ. ܠܳܐ ܡܰܘܬܰܪ ܠܺܝ ܒܶܟܝܳܐ ܘܬܶܢܚ̈ܳܬܳܐ. ܐܰܝܟ ܕܡܰܘܬܰܪ ܠܺܝ ܦܰܓܪܶܗ ܕܰܡܫܺܝܚܳܐ. ܘܡܳܐ ܕܩܳܝܡܺܝܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ. ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐ̱ܢܳܐ ܩܕܳܡ ܡܳܪܳܐ ܕܥܳܠ̈ܡܶܐ ܗ̄ ܩܕܳܡ ܒܺܐܡ ܕܰܡܫܺܝܚܳܐ܀

ܫܽܘܒܚܳܐ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ ܘܫܰܩܠܽܘܟ ܡܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ ܒܶܝܬ ܡܰܠܟܽܘܬܳܐ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܒܳܥܽܘܬܳܐ ܩܦܺܝܣܬܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܒܰܪ ܐܰܠܳܗܳܐ ܕܰܒܡܰܘܬܶܗ ܐܰܚܺܝ ܡܺܝܬܽܘܬܰܢ. ܢܰܚܶܡ ܠܰܢ ܡܶܢ ܓܰܘ ܕܰܚܺܝܚܳܐ ܕܢܶܩܥܶܐ ܘܢܺܐܡܰܪ. ܫܽܘܒܚܳܐ ܠܳܟ ܐܰܠܳܗܳܐ܀

ܘܳܐܡܪܺܝܢ:

ܐܰܠܳܗܳܐ ܢܶܗܘܶܐ ܠܶܗ ܡܚܰܣܝܳܢܳܐ ܘܰܡܩܺܝܡܳܢܳܐ ܡܶܢ ܓܰܒܳܐ ܕܺܝܠܶܗ ܕܝܰܡܺܝܢܳܐ܀

ܫܠܶܡ ܛܶܟܣܳܐ ܕܥܽܘܦܳܝܳܐ ܕܓܰܒܪ̈ܶܐ