ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܰܣܪ̈ܳܦܶܐ. ܒܕܶܚܠܳܐ ܡܩܰܕܫܺܝܢ ܠܶܗ܆ ܥܺܝܪܳܐ ܣܰܒܰܪ ܒܰܛܢܶܗ ܠܰܒܬܽܘܠܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܥܺܝܪܳܐ ܕܢܽܘܪܳܐ ܠܓܰܘ ܗܰܝܟܰܠ ܩܽܘܕܫܳܐ. ܡܛܳܐ ܠܘܳܬ ܡܰܪܝܰܡ ܘܰܫܠܳܡܳܐ ܝܰܗ̱ܒ ܠܳܗ̇ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܦܳܪܶܩ ܗ̱ܘܳܐ. ܡܶܢ ܐܳܟܶܠܩܰܪܨܳܐ܆ ܠܓܶܢܣܳܐ ܕܺܝܠܰܢ ܒܝܰܕ ܣܒܰܪܬܳܐ ܕܥܺܝܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܠܳܡ ܠܶܟܝ ܡܰܪܝܰܡ. ܡܰܠܝܰܬ ܛܰܝܒܽܘܬܳܐ܆ ܡܶܢܶܟܝ ܕܳܢܰܚ ܦܳܪܽܘܩܶܗ ܕܥܳܠܡܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܪܺܝܟܽ ܗ̱ܘ ܕܫܰܕܰܪ. ܪܺܝܫܳܐ ܕܡܰܠܰܐܟ̈ܶܐ܆ ܘܣܰܒܪܳܗ̇ ܠܡܰܪܝܰܡ ܡܶܛܽܠ ܡܰܘܠܳܕܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܳܢܰܘ ܬܶܗܪܳܐ. ܕܒܰܪ ܥܶܠܳܝܳܐ ܢܚܶܬ܆ ܘܰܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ ܡܰܪܝܰܡ܆ ܪܰܚܶܡ ܥܠܰܝܢ ܐܰܠܳܗܳܐ܀

ܓܳܠܘ ܗ̱ܘܰܘ ܪ̈ܰܚܡܰܘܗ̱ܝ. ܕܢܶܦܪܽܘܩ ܠܰܓܒܺܝܠܬܶܗ܆ ܣܰܒܰܪ ܥܺܝܪܳܐ ܒܰܛܢܶܗ ܠܰܒܬܽܘܠܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܒܪܺܝܟܽ ܗ̱ܘ ܕܫܰܕܰܪ: ܪܺܝܫܳܐ ܕܡܰܠܰܐܟ̈ܶܐ. ܠܘܳܬ ܡܰܪܝܰܡ ܛܽܘܒܳܢܺܝܬܳܐ. ܘܣܰܒ̣ܪܳܗ̇ ܡܶܛܽܠ ܡܰܘܠܳܕܶܗ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܒܪܺܝܟܽ ܗ̱ܘ ܕܫܰܕܰܪ ܥܺܝܪܳܐ ܡܶܢ ܪܰܘܡܳܐ܆ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܕܰܢܣܰܒܰܪ ܡܶܛܽܠ ܒܰܛܢܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܢܚܶܬ ܗ̱ܘܳܐ ܥܺܝܪܳܐ ܡܶܢ ܪܰܘܡܳܐ ܠܥܽܘܡܩܳܐ܆ ܠܘܳܬ ܒܬܽܘܠܬܳܐ ܕܟܺܝܬܳܐ ܡܰܪܝܰܡ܆ ܘܝܰܗ̱ܒܠܳܗ̇ ܫܠܳܡܳܐ ܘܶܐܡܰܪ ܠܳܗ̇܆ ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ܀

ܐܳܡܪܳܐ ܒܬܽܘܠܬܳܐ ܠܪܺܝܫܳܐ ܕܡܰܠܰܐܟ̈ܶܐ܆ ܕܰܐܝܟܰܢܳܐ ܬܶܗܘܶܐ ܗܳܕܶܐ܆ ܕܰܒܬܽܘܠܬܳܐ ܬܶܒܛܰܢ ܘܬܺܐܠܰܕ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝܢ܀

ܐܳܡܪܳܐ ܒܬܽܘܠܬܳܐ ܠܡܰܠܰܐܟܳܐ ܕܢܽܘܗܪܳܐ܆ ܗܳܐ ܐܶܢܳܐ ܐܰܡܬܶܗ ܕܡܳܪܳܟ܆ ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ܆ ܢܺܐܬܶܐ ܘܢܶܫܪܶܐ ܐܰܝܟ ܕܰܨܒܳܐ܀

ܥܺܝܪܳܐ ܕܢܽܘܪܳܐ: ܠܓܰܘ ܗܰܝܟܰܠ ܩܽܘܕܫܳܐ: ܡܛܳܐ ܠܘܳܬ ܡܰܪܝܰܡ ܘܶܐܡܰܪ ܠܳܗ̇: ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ: ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܡܫܺܝܚܳܐ ܐܰܠܳܗܳܐ ܗܰܘ ܕܶܐܬܺܝܠܶܕ܆ ܡܶܢ ܐܰܒܳܐ ܕܠܳܐ ܫܽܘܪܳܝܳܐ܆ ܘܝܰܘܡܳܢܳܐ ܨܒܳܐ ܒܛܰܝܒܽܘܬܶܗ܆ ܕܢܶܫܪܶܐ ܒܟܰܪܣܳܐ ܕܒܰܪ̱ܬ ܕܰܘܺܝܕ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܝܰܡܳܐ ܕܶܐܬܦܰܠܰܓ

ܡܶܢ ܒܶܝܬ ܣܶܕܪ̈ܶܐ ܕܓܰܘܙܰܠܬܳܐ ܦܪܰܚ ܢܽܘܪܳܢܳܐ܆ ܘܛܳܣ ܘܰܢܚܶܬ ܩܰܠܺܝܠܳܐܺܝܬ ܨܶܝܕ ܒܰܪ̱ܬ ܕܰܘܺܝܕ܆ ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ܆ ܘܡܶܢܶܟܝ ܕܳܢܰܚ ܦܳܪܽܘܩܳܐ܆ ܪܽܘܚ ܩܽܘܕܫܳܐ ܘܚܺܝܠ ܥܶܠܳܝܳܐ ܢܰܓܶܢ ܥܠܰܝܟܝ܆ ܘܬܺܐܠܕܺܝܢ ܝܰܠܕܳܐ ܕܕܽܘܡܳܪܳܐ܆ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐܳܡܪܳܐ ܡܰܪܝܰܡ ܠܡܰܠܰܐܟܳܐ ܕܰܐܝܟܰܢ ܡܰܨܝܳܐ܆ ܕܬܶܗܘܶܐ ܗܳܕܶܐ ܕܳܐܡܰܪ ܐܰܢ̱ܬ ܕܒܰܛܢܳܐ ܬܩܰܒܠܺܝܢ܆ ܕܓܰܒܪܳܐ ܡܶܡܬܽܘܡ ܠܳܐ ܚܟܺܝܡ ܠܺܝ܆ ܘܰܒܙܽܘܘܳܓܳܐ ܠܳܐ ܪܓܺܝܫܳܐ ܐ̱ܢܳܐ܆ ܘܶܐܡܰܪ ܠܳܗ̇ ܪܽܘܚܳܐ ܕܩܽܘܕܫܳܐ ܢܺܐܬܶܐ ܨܶܝܕܰܝܟܝ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ܆ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܫܽܘܒܚܳܐ ܠܛܳܒܳܐ ܕܓܳܠܘ ܪ̈ܰܚܡܰܘܗ̱ܝ ܕܢܶܦܪܽܘܩ ܨܰܠܡܶܗ܆ ܡܶܢ ܫܽܘܥܒܳܕܳܐ ܕܰܚܛܺܝܬܳܐ ܘܰܕܣܳܛܳܢܳܐ܆ ܘܰܠܓܰܒܪܺܐܶܝܠ ܫܰܕܰܪ ܗ̱ܘܳܐ܆ ܕܢܰܟܪܶܙ ܒܰܛܢܶܗ ܠܝܳܠܶܕܬܶܗ܆ ܘܰܢܚܶܬ ܘܰܫܪܳܐ ܘܰܐܓܶܢ ܒܳܗ̇ ܩܰܕܺܝܫܳܐܺܝܬ܆ ܘܶܐܬܓܰܫܰܡ ܡܶܢ ܓܰܘ ܥܽܘܒܳܗ̇܆ ܡܶܛܽܠ ܕܰܨܒܳܐ ܕܢܶܦܪܽܘܩ ܠܰܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܫܠܳܡܶܗ ܕܰܐܒܳܐ ܡܶܢ ܪܰܘܡܳܐ܆ ܠܘܳܬ ܡܰܪܝܰܡ ܛܽܘܒܳܢܺܝܬܳܐ܆ ܒܝܰܕ ܓܰܒܪܺܐܶܝܠ ܐܶܫܬܰܕܰܪ܆ ܕܰܢܣܰܒܪܺܝܗ̇ ܡܶܛܽܠ ܒܰܛܢܳܐ܀

ܐܳܡܰܪ ܥܺܝܪܳܐ ܠܰܒܬܽܘܠܬܳܐ܆ ܕܪܽܘܚ ܩܽܘܕܫܳܐ ܢܺܐܬܶܐ ܠܘܳܬܶܟܝ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ܆ ܘܬܺܐܠܕܺܝܢ ܝܰܠܕܳܐ ܕܕܽܘܡܳܪܳܐ܀

ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ܆ ܐܳܡܰܪ ܗ̱ܘܳܐ ܠܳܗ̇ ܡܰܠܰܐܟܳܐ܆ ܡܳܪܝ ܥܰܡܶܟܝ ܒܪܺܝܟܰܬ ܒܢܶܫ̈ܶܐ܆ ܘܡܶܢܶܟܝ ܕܳܢܰܚ ܦܳܪܽܘܩܳܐ܀

ܣܰܒܪܳܐ ܕܚܰܝ̈ܶܐ ܕܶܐܫܬܰܕܰܪ܆ ܡܶܢ ܐܰܒܳܐ ܕܰܢܚܰܪܰܪ ܟܽܠ܆ ܠܳܟ ܫܽܘܒܚܳܐ ܡܶܢܟܽܠ ܦܽܘ̈ܡܺܝܢ܆ ܕܰܐܘܕܺܝܘ ܒܰܫܡܳܟ ܩܰܕܺܝܫܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܓܰܒܪܺܝܐܶܝܠ ܪܺܝܫ ܡܰܠܰܐܟ̈ܶܐ: ܪܶܡܙܳܐ ܩܰܒܶܠ ܟܰܣܝܳܐܺܝܬ: ܘܰܦܪܰܚ ܒܶܐܒܪ̈ܶܐ ܩܰܠܺܝ̈ܠܶܐ: ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ܀

ܫܠܳܡܳܐ ܥܰܡܶܟܝ ܒܰܪ̱ܬ ܕܰܘܺܝܕ: ܐܰܠܳܗܳܐ ܫܰܕܪܰܢܝ ܨܶܝܕܰܝܟܝ: ܕܡܶܢܶܟܝ ܫܦܰܪ ܠܶܗ ܕܢܶܬܓܰܫܰܡ: ܕܢܶܦܪܽܘܩ ܥܰܡ̱̈ܡܶܐ ܡܶܢ ܛܽܘܥܝܰܝ܀

ܥܺܝܪܳܐ ܣܰܒܰܪ ܠܰܒܬܽܘܠܬܳܐ: ܪܽܘܚܳܐ ܩܰܕܺܝܫܳܐ ܢܺܐܬܶܐ: ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ: ܘܬܺܐܠܕܺܝܢ ܝܰܠܕܳܐ ܕܕܽܘܡܳܪܳܐ܀

ܠܥܶܠ ܒܰܬܪܽܘܢܽܘܣ ܐܰܪܦܺܝܬܶܗ: ܗܳܪܟܳܐ ܨܶܝܕܰܝܟܝ ܐܶܫܟܰܚܬܶܗ: ܒܶܝܬ ܟܶܢ̈ܫܶܐ ܕܰܐܪ̈ܥܳܢܳܝܶܐ: ܡܰܪܗܶܒ ܙܺܝܘܶܗ ܠܰܟܪ̈ܽܘܒܶܐ܀

ܩܰܕܺܝܫ ܩܰܕܺܝܫ ܩܳܥܶܝܢ ܠܶܗ: ܒܶܝܬ ܟܶܢ̈ܫܶܐ ܕܰܫ̈ܡܰܝܳܢܶܐ: ܒܪܺܝܟ ܐܺܝܩܳܪܳܟ ܡܶܢ ܐܰܬܪܳܟ: ܒܶܝܬ ܟܶܢ̈ܫܶܐ ܕܰܐܪ̈ܥܳܢܳܝܶܐ܀

ܫܠܳܡܳܐ ܥܰܡܶܟܝ ܒܰܪ̱ܬ ܕܰܘܺܝܕ: ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ: ܬܩܰܒܠܺܝܢ ܒܰܛܢܳܐ ܕܕܽܘܡܳܪܳܐ: ܕܺܐܝܬܰܘܗܝ ܡܳܪܳܐ ܕܒܶܪ̈ܝܳܬܳܐ܀

ܐܳܡܰܪ ܥܺܝܪܳܐ ܠܰܒܬܽܘܠܬܳܐ: ܕܪܽܘܚ ܩܽܘܕܫܳܐ ܢܺܐܬܶܐ ܠܘܳܬܶܟܝ: ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ: ܘܕܳܢܰܚ ܥܽܘܬܪܳܐ ܡܶܢ ܥܽܘܒܶܟܝ܀

ܥܶܠܳܝ̈ܶܐ ܙܳܝܥܺܝܢ ܡܶܢܶܗ: ܘܰܒܥܽܘܒܶܟܝ ܨܒܳܐ ܕܢܶܙܕܰܝܰܚ: ܢܽܘܪ̈ܳܢܶܐ ܟܳܘܙܺܝܢ ܡܶܢܶܗ: ܘܰܒܫܰܝܢܳܐ ܐܳܬܶܐ ܨܶܝܕܰܝܟܝ܀

ܫܡܰܝܳܐ ܘܰܐܪܥܳܐ ܠܳܟ ܢܰܘܕܽܘܢ: ܡܳܪܳܐ ܕܣܰܘ̈ܦܶܐ ܘܦܶܢ̈ܝܳܬܳܐ: ܥܺܝܪ̈ܶܐ ܘܐ̱ܢܳܫ̈ܳܐ ܢܰܣܩܽܘܢ ܠܳܟ: ܬܶܫܒܽܘܚܬܳܐ ܒܟܽܠ ܥܶܕܳܢܺܝ̈ܢ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܫܠܳܡܳܐ܆ ܕܝܰܗ̱ܒ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܠܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ ܘܗܳܟܰܢ ܐܶܡܰܪ܆ ܫܠܳܡܳܐ ܥܰܡܶܟܝ܆ ܘܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ܆ ܗܰܘ ܥܶܢܝܳܢܳܐ ܕܥܺܝܪܳܐ ܘܡܰܪܝܰܡ܆ ܕܗܽܘ ܒܰܛܠܳܗ̇ ܠܰܪܓܺܝܙܽܘܬܳܐ ܕܡܶܢ ܫܽܘܪܳܝܳܐ܆ ܘܰܙܪܰܥ ܫܰܝܢܳܐ܆ ܒܶܝܬ ܥܶܠܳܝ̈ܶܐ ܠܬܰܚ̈ܬܳܝܶܐ܀

ܡܳܐ ܬܡܺܝܗܳܐ ܗ̱ܘܳܬ ܐܽܘܪܚܶܗ܆ ܕܒܰܪ ܐܰܠܳܗܳܐ ܟܰܕ ܐܶܬܒܰܣܰܪ܆ ܕܥܰܠ ܡܶܢ ܐܶܕܢܳܗ̇ ܕܰܒܬܽܘܠܬܳܐ ܘܰܫܪܳܐ ܒܥܽܘܒܳܗ̇܆ ܘܠܳܐ ܫܪܳܐ ܛܰܒ̈ܥܶܐ܆ ܕܰܒܬܽܘܠܶܝ̈ܗ̇ ܟܰܕ ܐܶܬܺܝܠܶܕ܀

ܫܽܘܒܚܳܐ

ܡܳܐ ܪܓܺܝܓܳܐ ܗ̱ܘܳܬ ܫܳܥܬܳܐ܆ ܕܰܢܚܶܬ ܥܺܝܪܳܐ ܣܰܒܪܳܗ̇ ܠܡܰܪܝܰܡ܆ ܥܰܠ ܒܰܛܢܶܗ ܕܦܳܪܶܩ ܥܳܠ̈ܡܶܐ ܕܰܨܒܳܐ ܕܢܶܗܘܶܐ܆ ܥܽܘܠܳܐ ܒܟܰܪܣܳܐ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܫܠܳܡܠܶܟܝ ܡܰܪܝܰܡ܆ ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ ܐܶܡܳܐ ܩܰܕܺܝܫܬܳܐ܆ ܐܶܬܕܰܟܪܰܝܢܝ ܡܳܪܝܳܐ܀

ܐܶܡܪܰܬ ܡܰܪܝܰܡ܆ ܕܰܐܝܟܰܢܳܐ ܬܶܗܘܶܐ ܗܳܕܶܐ܆ ܕܓܰܒܪܳܐ ܡܶܡܬܽܘܡ ܠܳܐ ܚܟܺܝܡ ܠܺܝ ܘܒܰܛܢܳܐ ܣܰܒܰܪܬܳܢܝ܆ ܐܶܬܕܰܟܪܰܝܢܝ ܡܳܪܝܳܐ܀

ܐܳܡܰܪ ܥܺܝܪܳܐ܆ ܕܪܽܘܚܳܐ ܩܰܕܺܝܫܳܐ ܢܺܐܬܶܐ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ ܡܰܠܝܰܬ ܟܽܠ ܫܽܘܦܪ̈ܺܝܢ܆ ܐܶܬܕܰܟܪܰܝܢܝ ܡܳܪܝܳܐ܀

ܐܶܡܪܰܬ ܡܰܪܝܰܡ܆ ܕܗܳܐ ܐܶܢܳܐ ܐܰܡܬܶܗ ܕܡܳܪܳܟ܆ ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ ܐܺܝܙܓܰܕܳܐ ܕܫܰܝܢܳܐ܆ ܐܶܬܕܰܟܪܰܝܢܝ ܡܳܪܝܳܐ܀

ܫܽܘܒܚܳܐ

ܒܬܽܘܠܬܳܐ ܡܰܠܝܰܬ: ܟܽܠ ܫܽܘܦܪ̈ܺܝܢ ܐܰܦܺܝܣܝ ܥܰܡܰܢ: ܠܰܒܪܳܐ ܕܰܕܢܰܚ ܡܶܢ ܥܽܘܒܶܟܝ: ܕܪ̈ܰܚܡܶܐ ܢܶܥܒܶܕ ܥܠܰܝܢ܆ ܐܶܬܕܰܟܪܰܝܢܝ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܠܳܟ ܝܳܗܒܳܐ ܥܺܕܬܳܐ ܛܽܘܒܳܐ ܐܳܘ ܡܳܪܝ ܐܰܦܪܶܝܡ

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ ܒܚܰܕܽܘܬܳܐ ܣܰܒܪܳܗ̇: ܥܰܠ ܒܰܛܢܳܟ ܐܰܠܳܗܳܝܳܐ ܦܳܪܽܘܩܶܗ ܕܥܳܠܡܳܐ: ܫܠܳܡܳܐ ܝܰܗ̱ܒ ܠܳܗ̇ ܠܡܰܪܝܰܡ ܘܶܐܡܰܪ ܠܳܗ̇: ܕܗܳܐ ܡܳܪܝ ܥܰܡܶܟܝ ܘܫܰܕܪܰܢܝ ܕܺܐܡܰܪ ܠܶܟܝ: ܗܰܘ ܠܳܐ ܓܫܺܝܡܳܐ ܡܶܬܓܰܫܰܡ ܒܰܒܬܽܘܠܽܘܬܶܟܝ: ܘܕܳܢܰܚ ܡܶܢܶܟܝ ܐܰܝܟ ܫܰܒܪܳܐ ܘܗܽܘ ܦܳܪܶܩ ܥܳܠ̈ܡܶܐ: ܗ̄ ܒܝܰܘܡܳܐ ܕܡܰܘܠܳܕܶܗ܀

ܫܽܘܒܚܳܐ

ܐܶܡܰܪܝ ܠܺܝ ܛܽܘܒܳܢܺܝܬܳܐ ܒܬܽܘܠܬܳܐ ܡܰܪܝܰܡ: ܡܳܢܳܐ ܚܙܰܝܬܝ ܕܰܪܗܺܝܒܳܐ ܐܰܢ̱ܬ ܘܗܳܟܰܢ ܪܰܬܺܝܬܰܬܝ: ܐܳܡܪܳܐ ܡܰܪܝܰܡ ܚܙܺܝܬ ܥܺܝܪܳܐ ܕܢܽܘܪܳܐ: ܘܚܶܙܘܶܗ ܡܰܒܪܶܩ ܒܰܕܡܽܘܬ ܓܰܘܙܰܠܬܳܐ: ܘܰܚܙܺܝܬ ܬܽܘܒ ܕܰܐܪܟܶܢ ܪܺܝܫܶܗ ܘܰܣܓܶܕ ܩܽܘܕܡܰܝ: ܘܶܐܡܰܪ ܠܺܝ ܫܠܳܡ ܠܶܟܝ ܡܰܪܝܰܡ ܗܳܐ ܡܳܪܰܢ ܥܰܡܶܟܝ ܗ̄: ܘܡܶܢܶܟܝ ܡܶܬܺܝܠܶܕ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܐܰܝܟ ܬܰܓܳܪܳܐ ܟܰܫܺܝܪܳܐ ܕܰܓܒܳܐ

ܓܰܒܪܺܐܶܝܠ ܡܰܠܰܐܟܳܐ ܗܘܳܐ ܐܺܝܙܓܰܕܳܐ܆ ܘܛܳܣ ܘܰܢܚܶܬ ܩܰܠܺܝܠܳܐܺܝܬ ܠܘܳܬ ܒܬܽܘܠܬܳܐ ܡܰܪܝܰܡ܆ ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ ܒܪܺܝܟܰܬ ܒܢܶܫ̈ܶܐ܆ ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ ܘܦܳܪܶܩ ܒܶܪ̈ܝܳܬܳܐ܆ ܘܶܐܡܪܰܬ ܠܶܗ ܒܬܽܘܠܬܳܐ ܠܡܰܠܰܐܟܳܐ܆ ܕܗܳܐ ܐܶܢܳܐ ܐܰܡܬܶܗ ܕܰܐܠܳܗܳܐ܆ ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ ܘܰܐܘܕܶܐ ܠܛܰܝܒܽܘܬܶܗ܀

ܫܽܘܒܚܳܐ

ܡܽܘܫܶܐ ܒܣܰܢܝܳܐ ܡܰܬܠܶܟܝ ܗ̱ܘܳܐ ܒܬܽܘܠܬܳܐ ܡܰܪܝܰܡ܆ ܘܚܰܙܩܺܝܐܶܝܠ ܒܬܰܪܥܳܐ ܕܰܐܚܺܝܕ ܕܡܳܪܝܳܐ ܥܳܐܶܠ ܒܶܗ܆ ܓܰܒܪܺܐܶܝܠ ܒܚܰܪܰܬ ܙܰܒ̈ܢܶܐ܆ ܫܠܳܡܳܐ ܝܰܗ̱ܒܠܶܟܝ܆ ܘܰܐܠܳܗܳܐ ܡܶܠܬܳܐ ܡܶܢܶܟܝ ܐܶܨܛܒܺܝ ܕܢܶܬܓܰܫܰܡ܆ ܒܰܕܪ̈ܳܥܰܝܟܝ ܥܰܦܶܩܬܝ ܓܰܘܙܰܠܬܳܐ܆ ܘܚܰܠܒܳܐ ܝܰܗ̱ܒܬܝ ܠܢܽܘܪܳܐ ܐܳܟܶܠܬܳܐ܆ ܒܪܺܝܟܽ ܗ̱ܘ ܠܳܐ ܡܶܣܬܰܝܟܳܢܳܐ ܕܡܶܢܶܟܝ ܐܶܬܓܰܫܰܡ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢܬܽܘܢ. ܡܢܰܚܡܳܢܳܐ ܕܝܰܠܕ̈ܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܡܰܢ ܣܳܦܶܩ ܕܢܶܬܢܶܐ ܩܽܘܠܳܣܰܘ̈ܗ̱ܝ

ܟܰܕ ܩܰܒܶܠ ܥܺܝܪܳܐ ܦܽܘܩܕܳܢܳܐ܆ ܡܶܢ ܐܰܒܳܐ ܗܰܘ ܡܬܽܘܡܳܝܳܐ܆ ܛܳܣ ܘܰܢܚܶܬ ܠܢܳܨܪܰܬ ܨܶܝܕ ܡܰܪܝܰܡ܆ ܟܰܕ ܒܰܨܠܽܘܬܳܐ ܩܳܝܡܳܐ ܗ̱ܘܳܬ܆ ܘܰܣܓܶܕ ܩܽܘܕܡܶܝܗ̇ ܘܶܐܡܰܪ ܠܳܗ̇܆ ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ܆ ܡܳܪܝ ܥܰܡܶܟܝ ܒܪܺܝܟܰܬ ܒܢܶܫ̈ܶܐ܆ ܡܶܢܶܟܝ ܕܳܢܰܚ ܦܳܪܽܘܩܳܐ܆ ܘܗܽܘ ܦܳܪܶܩ ܠܳܗ̇ ܠܰܫܒܺܝܬܳܐ܀

ܫܽܘܒܚܳܐ

ܐܶܡܪܰܬ ܠܶܗ ܡܰܪܝܰܡ ܠܓܰܒܪܺܐܶܝܠ܆ ܟܰܕ ܐܰܝܬܺܝ ܗ̱ܘܳܐ ܠܳܗ̇ ܣܒܰܪܬܳܐ܆ ܕܰܐܝܟܰܢܳܐ ܬܶܗܘܶܐ ܐܰܝܟ ܕܶܐܡܰܪܬ܆ ܕܡܶܢܶܟܝ ܕܳܢܰܚ ܦܳܪܽܘܩܳܐ܆ ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ܆ ܪܽܘܚܳܐ ܩܰܕܺܝܫܳܐ ܢܺܐܬܶܐ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ܆ ܕܡܶܬܺܝܠܶܕ ܒܶܟܝ ܩܰܕܺܝܫܰܐ ܗ̱ܘ܆ ܘܰܒܪܶܗ ܕܰܐܠܳܗܳܐ ܢܶܬܩܪܶܐ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܦܶܬܓܳܡܳܐ: ܢܶܚܘܽܬ ܐܰܝܟ ܡܶܛܪܳܐ ܥܰܠ ܓܶܙܬܳܐ: ܘܰܐܝܟ ܪ̈ܣܺܝܣܶܐ ܕܢܳܚܬܺܝܢ ܥܰܠ ܐܰܪܥܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܙܽܘܪ ܕܰܗܒܳܐ ܕܰܚܫܺܝܠ ܘܰܩܪܺܝܡ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܕܳܠ ܓܶܠܝܳܢܳܐ ܡܶܢ ܐܰܠܳܗܳܐ ܥܠܶܝܗ̇ ܕܰܕܟܺܝܬܳܐ܆ ܒܝܰܕ ܓܰܒܪܺܐܶܝܠ ܣܳܦܪܳܐ ܕܡܰܠܶܦ ܫܰܪܺܝܪ̈ܳܬܳܐ܆ ܐܶܫܬܰܕܰܪ ܗ̱ܘܳܐ ܡܶܢ ܒܶܝܬ ܐܰܒܳܐ ܕܢܰܝܬܶܐ ܣܒܰܪܬܳܐ܆ ܕܡܰܠܝܳܐ ܫܠܳܡܳܐ ܘܰܒܬܽܘܠܽܘܬܳܐ ܘܩܰܕܺܝܫܽܘܬܳܐ܀

ܫܠܳܡ ܠܶܟܝ ܡܰܪܝܰܡ ܐܶܡܶܗ ܕܫܶܡܫܳܐ ܕܙܰܕܺܝܩܽܘܬܳܐ܆ ܫܠܳܡܳܐ ܥܰܡܶܟܝ ܒܺܝܪܰܬ ܩܽܘ̈ܕܫܶܐ ܘܡܰܠܝܰܬ ܐ̱ܪ̈ܳܙܶܐ܆ ܫܠܳܡܳܐ ܥܰܡܶܟܝ ܐܶܠܦܳܐ ܛܥܺܝܢܰܬ ܥܽܘܬܪܳܐ ܪܰܒܳܐ܆ ܡܒܰܪܰܟܬܳܐ ܐܰܢ̱ܬܝ ܘܰܒܪܺܝܟ ܦܺܐܪܳܐ ܕܰܒܬܽܘܠܽܘܬܶܟܝ܀

ܒܰܨ̈ܠܰܘܳܬܳܗ̇ ܕܗܳܝ ܕܰܛܥܶܢܬܳܟ ܝܰܪ̈ܚܶܐ ܬܶܫܥܳܐ܆

ܒܰܪ ܐܰܠܳܗܳܐ ܐܰܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܀