ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ
ܢܶܗܘܶܐ ܕܽܘܟܪܳܢܳܟ ܡܳܪܝ ܐܶܫܰܥܝܳܐ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‍ܠܳܗܳܐ)

ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ ܘܰܛܥܺܝܢ ܣܰܩܪܳܐ: ܠܘܳܬ ܛܽܘܒܳܢܺܝܬܳܐ ܡܰܪܝܰܡ: ܘܦܰܬܚܳܗ̇ ܗܳܟܰܢ ܐܶܡܰܪ ܠܳܗ̇ ܫܠܳܡܳܐ ܥܰܡܶܟܝ: ܡܳܪܝ ܥܰܡܶܟܝ ܒܪܺܝܟܰܬܝ ܒܢܶܫ̈ܶܐ ܗ̄ ܒܬܽܘܠܬܳܐ ܡܰܪܝܰܡ܀

ܫܽܘܒܚܳܐ

ܦܰܢܺܝ ܥܺܝܪܳܐ ܘܶܐܡܰܪ ܠܳܗ̇ ܠܛܽܘܒܳܢܺܝܬܳܐ: ܕܪܽܘܚ ܩܽܘܕܫܳܐ ܢܺܐܬܶܐ ܠܘܳܬܶܟܝ: ܘܚܺܝܠ ܥܶܠܳܝܳܐ ܢܰܓܶܢ ܥܠܰܝܟܝ ܘܡܶܢܶܟܝ ܕܳܢܰܚ: ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ ܗ̄ ܠܶܗ ܬܶܫܒܽܘܚܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܘܺܝ ܠܳܗ̇ ܠܢܰܦܫܝ
ܥܺܕܰܬ݀ ܩܽܘܕܫܳܐ ܕܰܡܙܰܝܚܳܐ ܠܶܗ ܠܝܰܘܡܶܗ ܕܕܽܘܟܪܳܢܳܟ (ܣܳܠܶܩ: ܒܣܳܗ̈ܕܰܘܗ̱ܝ ܐܰܢ̱ܬܽܘܢ)

ܥܢܳܬ ܗ̱ܘܳܬ ܒܬܽܘܠܬܳܐ ܠܥܺܝܪܳܐ ܕܢܽܘܪܳܐ ܘܗܳܟܰܢ ܐܶܡܪܰܬ ܠܶܗ܆ ܡܶܟܺܝܠ ܕܰܨܒܳܐ ܡܳܪܳܟ ܕܢܺܐܬܶܐ ܘܢܶܣܥܽܘܪ ܠܰܓܒܺܝܠܬܶܗ܆ ܗܳܐ ܐܶܢܳܐ ܐܰܡܬܶܗ ܐܺܝܬܰܝ܆ ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ܆ ܐܺܝܙܓܰܕܳܐ ܕܫܰܝܢܳܐ܀

ܫܽܘܒܚܳܐ

ܒܟܰܪܣܳܐ ܕܒܶܣܪܳܐ ܢܚܶܬ ܗ̱ܘܳܐ ܘܰܫܪܳܐ ܒܽܘܟܪܳܐ ܡܕܰܒܰܪ ܟܽܠ܆ ܗܰܘ ܕܰܣܪ̈ܳܦܶܐ ܘܥܺܝܪ̈ܰܝ ܪܰܘܡܳܐ ܡܶܬܪܰܗܒܺܝܢ ܡܶܢܶܗ܆ ܐܶܬܳܐ ܕܢܰܦܢܶܐ ܠܛܳܥܰܝ̈ܳܐ܆ ܘܢܰܥܶܠ ܐܶܢܽܘܢ ܠܰܛܝܳܪܶܗ܆ ܟܰܕ ܙܳܡܪܺܝܢ ܫܽܘܒܚܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܰܠܰܐܟܳܐ ܕܒܶܣܪܳܐ ܐܺܝܬܰܘܗ̱ܝ ܝܰܕܽܘܥܬܳܢܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐܳܡܪܳܐ ܒܬܳܘܠܬܳܐ ܠܡܰܠܰܐܟܳܐ: ܕܰܐܟܰܢܳܐ ܬܶܗܘܶܐ ܗܳܕܶܐ: ܕܗܳܐ ܐܶܢܳܐ ܠܰܡ ܒܬܳܘܠܬܳܐ ܐ̱ܢܳܐ: ܘܓܰܒܪܳܐ ܡܶܡܬܽܘܡ ܠܳܐ ܚܟܺܝܡ ܠܺܝ܀

ܫܽܘܒܚܳܐ ܠܚܰܝܠܶܗ ܕܥܶܠܳܝܳܐ: ܕܰܨܒܳܐ ܕܢܶܗܘܶܐ ܒܰܪܢܳܫܳܐ: ܫܽܘܒܚܳܐ ܠܗܰܘ ܕܰܟܣܳܐ ܡܶܢ ܟܽܠ: ܘܰܗܘܳܐ ܒܶܣܪܳܐ ܘܰܐܓܶܢ ܒܰܢ܀

ܐ̱ܚܪܺܢܳܐ

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܪܶܡܙܳܐ ܩܰܒܶܠ ܟܰܣܝܳܐܺܝܬ܆ ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ܆ ܘܰܦܪܰܚ ܒܶܐܒܪ̈ܶܐ ܩܰܠܺܝ̈ܠܶܐ܆ ܘܚܰܘܺܝ ܢܰܦܫܶܗ ܠܰܕܟܺܝܬܳܐ܆ ܒܣܰܝܒܽܘܬܳܐ ܟܢܺܝܟܰܬ ܚܶܙܘܳܐ܆ ܕܠܳܐ ܬܶܕܚܰܠ ܡܰܠܝܰܬ ܫܽܘܦܪ̈ܶܐ܆ ܘܢܶܫܪܶܐ ܙܰܘܥܳܐ ܒܗܰܕܳܡܶܝ̈ܗ̇܆ ܡܳܐ ܕܥܺܝܪܳܐ ܡܡܰܠܶܠ ܥܰܡܳܗ̇܆ ܡ̈ܶܠܶܐ ܕܡܰܠ̈ܝܳܢ ܕܽܘܡܳܪܳܐ܀

ܐܳܡܰܪ ܥܺܝܪܳܐ ܠܰܒܬܽܘܠܬܳܐ: ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ: ܐܶܫܟܰܚܬ ܓܶܝܪ ܠܘܳܬ ܐܰܠܳܗܳܐ: ܛܰܝܒܽܘܬܳܐ ܕܪܳܡܳܐ ܡܶܢ ܟܽܠ: ܡܶܢ ܗܳܫܳܐ ܬܩܰܒܠܺܝܢ ܒܰܛܢܳܐ: ܘܬܺܐܠܕܺܝܢ ܦܺܐܪܳܐ ܡܰܚܶܐ ܟܽܠ: ܪܽܘܚܩܽܘܕܫܳܐ ܢܺܐܬܶܐ ܠܘܳܬܶܟܝ: ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ: ܘܡܶܢܶܟܝ ܕܳܢܰܚ ܒܰܒܪܺܝܬܳܐ: ܐܰܠܳܗܳܐ ܓܰܢ̱ܒܳܪ ܥܳܠ̈ܡܶܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܣܽܘܒܳܪܳܗ̇ ܕܝܳܠܕܰܬ ܐܰܠܳܗܳܐ ܡܰܪܝܰܡ