ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܠܺܐܝܙܓܰܕܳܐ. ܝܽܘܚܰܢܳܢ ܕܰܐܥܡܕܶܗ܆ ܡܶܢ ܟܰܪܣܳܐ ܕܶܐܡܶܗ܆ ܩܰܕܶܫ ܗ̱ܘܳܐ ܘܦܰܪܫܶܗ. ܪܰܚܶܡ ܥܠܰܝܢ ܐܰܠܳܗܳܐ܀

ܫܶܐܠܰܬ ܡܰܪܝܰܡ. ܫܠܳܡܳܗ̇ ܕܶܐܠܺܝܫܒܰܥ܆ ܘܕܳܨ ܝܽܘܚܰܢܳܢ ܒܓܰܘ ܟܰܪܣܳܗ̇ ܘܶܐܬܦܨܰܚ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܒܰܪܰܟܬܳܐ ܐܰܢ̱ܬܝ. ܒܬܽܘܠܬܳܐ ܩܰܕܺܝܫܬܳܐ܆ ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟܝ܆ ܪܰܚܶܡܥܠܰܝܢ ܐܰܠܳܗܳܐ܀

ܐܶܡܪܰܬ ܡܰܪܝܰܡ. ܕܛܽܘܒܳܐ ܢܶܬ܀ܠܳــ̈ـܢ ܠܺܝ܆ ܟܽܠ ܫܰܪ̈ܒܳܬܳܐ ܠܡܰܢܽܘ ܛܥܺܝܢܳܐ ܐ̱ܢܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܛܥܺܝܢܳܐ ܗ̱ܘܳܬ ܠܶܗ. ܡܰܪܝܰܡ ܠܰܡܫܺܝܚܳܐ܆ ܘܣܶܠܩܰܬ ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ܆ ܪܰܚܶܡ ܥܠܰܝܢ ܐܰܠܳܗܳܐ܀

ܠܳܟ ܬܶܫܒܽܘܚܬܳܐ܆ ܕܰܣܥܰܪܬ ܟܳܪܽܘܙܳܟ܆ ܘܠܰܐܒܽܘܟ ܘܪܽܘܚ ܩܽܘܕܫܳܐ ܣܶܓܕܬܳܐ ܘܪܽܘܡܪܳܡܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܣܶܠܩܰܬ ܡܰܪܝܰܡ ܒܚܰܕܽܘܬܳܐ܆ ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ܆ ܕܳܨ ܝܽܘܚܰܢܳܢ ܒܓܰܘ ܟܰܪܣܳܐ܆ ܠܽܘܩܒܰܠ ܡܳܪܶܗ ܟܰܕ ܚܳܕܶܐ܀

ܡܰܢ ܢܶܬܶܠ ܠܺܝ ܕܶܐܡܶܗ ܕܡܳܪܝ܆ ܟܰܕ ܛܥܺܝܢܳܐ ܠܶܗ ܬܺܐܬܶܐ ܠܘܳܬܝ܆ ܡܒܰܪܰܟܬܳܐ ܐܰܢ̱ܬܝ ܐܳܘ ܒܬܽܘܠܬܳܐ܆ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ܀

ܫܶܡܥܰܬ ܡܰܪܝܰܡ ܘܶܐܬ܀ܕܰܡܪܰܬ܆ ܒܡ̈ܶܠܶܐ ܕܡܰܠܠܰܬ ܗ̱ܘܳܬ ܥܩܰܪܬܳܐ܆ ܟܰܕ ܕܳܨ ܗ̱ܘܳܐ ܥܽܘܠܳܗ̇ ܒܟܰܪܣܳܗ̇܆ ܠܰܫܡܶܗ ܕܗܰܘ ܕܰܫܪܳܐ ܒܳܗ̇܀

ܒܪܳܐ ܕܶܐܬܳܐ ܠܒܰܛܢܳܐ ܘܝܰܠܕܳܐ܆ ܘܠܰܫܠܳܡܳܐ ܕܒܰܪ ܠܶܘܳܝ̈ܶܐ܆ ܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܫܰܠܺܝܛ ܗ̱ܽܘ ܪܶܡܙܶܗ ܕܰܒܪܶܟܝ܆ ܥܰܠ ܥܽܘ̈ܠܶܐ ܕܰܒܟܰܪ̈ܣܳܬܳܐ܆ ܕܟܰܕ ܚܙܳܝܗ̱ܝ ܗ̱ܘܳܐ ܥܽܘܠܳܐ ܕܰܒܥܽܘܒܶܟܝ܆ ܕܳܨ ܠܽܐܘܪܥܶܗ ܘܰܣܓܶܕ ܩܽܘܕܡܰܘܗ̱ܝ܀

ܫܽܘܒܚܳܐ

ܫܽܘܒܚܳܐ ܠܶܗ ܠܺܝܚܺܝܕܳܝܳܐ܆ ܕܕܳܨ ܗ̱ܘܳܐ ܠܽܐܘܪܥܶܗ ܝܽܘܚܰܢܳܢ܆ ܘܶܐܡܰܪ ܠܶܗ ܬܳܐ ܒܰܫܠܳܡܳܐ܆ ܫܰܝܢܳܟ ܢܫܰܝܶܢ ܒܶܪ̈ܝܳܬܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܒܡ̈ܰܬܠܶܐ ܡܰܠܶܠ ܦܳܪܽܘܩܰܢ

ܡܰܪܝܰܡ ܒܬܽܘܠܬܳܐ ܘܶܐܠܺܝܫܒܰܥ܆ ܣܰܓܺܝ ܫܒܺܝܚܺܝܢ ܒܰܛܢܰܝܗܶܝ̈ܢ܆ ܚܕܳܐ ܛܥܺܝܢܳܐ ܒܰܒܬܽܘܠܽܘܬܳܗ̇܆ ܘܰܐ̱ܚܪܺܬܳܐ ܛܥܺܝܢܳܐ ܒܣܰܝܒܽܘܬܳܗ̇܆ ܥܰܬܺܝܩܬܳܐ ܛܥܺܝܢܳܐ ܚܰܕ̱ܬܳܐ. ܚܕܰܬܳܐ ܛܥܺܝܢܳܐ ܠܥܰܬܺܝܩ ܝܰܘ̈ܡܳܬܳܐ܆ ܐܶܠܺܝܫܒܰܥ ܝܶܠܕܰܬ ܢܒܺܝܳܐ܆ ܘܡܰܪܝܰܡ ܡܳܪܳܐ ܕܰܢܒܺܝ̈ܶܐ܆ ܓܰܒ݉ܝܳܐ ܝܽܘܚܰܢܳܢ܆ ܕܶܐܬܳܐ ܘܣܰܒܰܪ ܩܕܳܡ ܡܳܪܶܗ܆ ܕܗܳܐ ܒܳܬܰܪܝ ܐܳܬܶܐ ܡܶܠܬܳܐ܆ ܘܰܒܡܰܘܠܳܕܶܗ ܦܳܪܶܩ ܒܶܪ̈ܝܳܬܳܐ܀

ܫܽܘܒܚܳܐ

ܐܰܝܟ ܥܢܳܢܳܐ ܣܶܠܩܰܬ ܡܰܪܝܰܡ܆ ܘܰܛܥܺܝܢܳܐ ܠܶܗ ܠܰܛܥܺܝܢ ܟܽܠ܆ ܕܠܰܐܪܥܳܐ ܨܗܺܝܬܳܐ ܬܰܫܩܶܐ ܗ̱ܘܳܬ܆ ܕܝܶܗܒܰܬ ܦܺܐܪܳܐ ܒܥܰܩܪܽܘܬܳܗ̇܆ ܕܬܶܫܠܰܡ ܡܶܠܬܶܗ ܕܒܰܪ ܐܺܝܫܰܝ܆ ܕܶܐܬܢܰܒܺܝ ܗ̱ܘܳܐ ܒܪܽܘܚܳܐ ܟܰܕ ܐܳܡܰܪ܆ ܕܡܶܢ ܛܰܪܳܢܳܐ ܪܕܰܘ ܡܰܝ̈ܳܐ܆ ܘܫܰܒܛܳܐ ܐܰܦܪܰܥ ܕܺܝܒܶܫ ܗ̱ܘܳܐ܆ ܒܪܺܝ݉ܟ ܗ̱ܽܘ ܡܰܚܶܐ ܟܽܠ܆ ܕܝܰܗ̱ܒ ܪܽܘܚܳܐ ܒܰܢܒܺܝܽܘܬܳܐ܆ ܘܰܐܝܟ ܐܺܝ̈ܙܓܰܕܶܐ ܫܰܪܺܝܪ̈ܶܐ ܢܦܰܩܘ ܗ̱ܘܰܘ ܘܰܐܟܪܶܙܘ܆ ܣܒܰܪܬܶܗ ܒܰܐܪܒܰܥ ܦܶܢ̈ܝܳܬܳܐ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܐܰܒܽܘܢ ܕܒܰܫܡܰܝܳܐ ܥܢܺܝ ܠܰܢ

ܟܰܕ ܫܶܡܥܰܬ ܗ̱ܘܳܬ ܐܶܠܺܝܫܒܰܥ ܠܰܫܠܳܡܳܗ̇ ܕܡܰܪܝܰܡ܆ ܐܶܬܡܰܠܝܰܬ ܪܽܘܚܳܐ ܕܩܽܘܕܫܳܐ ܘܶܐܬܢܰܒܝܰܬ ܘܶܐܡܪܰܬ܆ ܒܪܺܝܟܽ ܗ̱ܘ ܦܺܐܪܳܐ܆ ܕܰܒܟܰܪܣܳܐ ܕܺܝܠܶܟܝ܆ ܡܒܰܪܰܟܬܳܐ ܐܰܢ̱ܬܝ܆ ܒܟܽܠܗܶܝܢ ܢܶܩ̈ܒܳܬܳܐ܆ ܠܶܟܝ ܛܽܘܒܰܝܟܝ ܕܰܗܘܰܝܬܝ ܐܶܡܳܐ ܠܡܳܪܳܐ ܕܥܳܠ̈ܡܶܐ܆ ܘܰܒܥܽܘܒܶܟܝ ܗܳܐ ܡܶܙܕܰܝܰܚ ܡܶܠܬܳܐ ܐܰܠܳܗܳܐ܆ ܗ̄ܘܗ̄܀

ܫܽܘܒܚܳܐ

ܗܰܘ ܕܰܫܡܰܝܳܐ ܡܠܶܝܢ ܡܶܢܶܗ ܘܠܳܐ ܚܳܙܶܝܢ ܠܶܗ܆ ܘܰܣܪ̈ܳܦܶܐ ܕܶܫܬܳܐ ܓܶܦܺܝ̈ܢ ܐܰܦܰܝ̈ܗܽܘܢ ܡܚܰܦܶܝܢ܆ ܫܪܳܐ ܒܰܒܬܽܘܠܬܳܐ܆ ܘܡܶܢܶܗ ܠܳܐ ܝܶܩܕܰܬ܆ ܘܰܠܒܶܝܬ ܥܰܒܕܶܗ܆ ܣܠܶܩ ܐܰܝܟ ܒܰܪܢܳܫܳܐ܆ ܘܟܰܕ ܫܶܡܥܰܬ ܣܳܒܬܳܐ ܫܠܳܡܳܗ̇ ܕܛܽܘܒܳܢܺܝܬܳܐ܆ ܕܳܨ ܗ̱ܘܳܐ ܥܽܘܠܳܐ ܒܓܰܘ ܟܰܪܣܳܐ ܠܰܫܠܳܡܳܐ ܕܡܳܪܶܗ܆ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܦܶܬܓܳܡܳܐ: ܢܶܚܕܶܐ ܛܽܘܪܳܐ ܕܺܝܗܽܘܕ܆ ܘܰܢ̈ܕܽܘܨܳܢ ܒ̈ܢܳܬ ܝܺܗܽܘܕܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܨܠܽܘܬܟܶܝܢ ܥܰܡܰܢ ܐܳܘ ܡܒܰܪ̈ܟܳܬܳܐ ܨܠܽܘܬܟܶܝܢ ܥܰܡܰܢ܆

ܠܰܨ̈ܠܰܘܳܬܟܶܝܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܛܥܶܢܬܶܗ ܛܠܺܝܬܳܐ ܠܡܳܪܶܐ ܥܳܢ̈ܳܐ ܘܣܶܠܩܰܬ ܕܬܶܚܙܶܐ܆ ܠܢܶܩܝܳܐ ܥܩܰܪܬܳܐ ܕܶܐܬܚܰܘܺܝ ܒܳܗ̇ ܐܶܡܪܳܐ ܠܢܽܘܓܪܳܐ܆ ܦܶܪܚܰܬ ܝܰܘܢܳܐ ܒܶܐܒܪ̈ܰܝ ܥܽܘܫܢܳܐ ܘܰܡܛܳܬ ܠܨܶܗܝܽܘܢ܆ ܕܬܶܚܙܶܐ ܘܬܶܚܕܶܐ ܒܗܰܘ ܦܰܪܽܘܓܳܐ ܕܢܶܫܪܳܐ ܣܳܒܳܐ܀

ܝܺܬܶܒ ܡܰܠܟܳܐ ܥܰܠ ܡܰܪܟܰܒܬܳܐ ܡܰܠܝܰܬ ܥܽܘܫܢܳܐ܆ ܕܢܶܣܰܩ ܢܶܣܥܽܘܪ ܒܰܝܬܳܐ ܕܥܰܒ̈ܕܰܘܗ̱ܝ ܒܰܒܛܺܝܠܽܘܬܳܐ܆ ܐܶܙܰܠ̱ܬ ܡܰܪܝܰܡ ܝܰܘܢܳܐ ܪܚܺܝܡܬܳܐ ܨܶܝܕ ܐܶܠܺܝܫܒܰܥ܆ ܘܕܳܨ ܝܽܘܚܰܢܳܢ ܒܟܰܪܣܳܐ ܕܶܐܡܶܗ ܠܽܘܩܒܰܠ ܡܳܪܶܗ܀

ܒܰܨ̈ܠܰܘܳܬܟܶܝܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܶܝܢ ܒܗܰܝܡܳܢܽܘܬܳܐ܀