ܣܳܠܶܩ: ܒܣܳܗ̈ܕܰܘܗ̱ܝ ܐܰܢ̱ܬܽܘܢ

ܩܕܡܝܐ - H

ܗܘܺܝ ܠܳܗ̇ ܠܢܰܦܫܝ ܡܢܰܛܪܳܢܳܐ. ܡܳܪܝܳܐ ܐܰ‌ܠܳܗܳܐ. ܕܒܰܝܢܳܬ ܦܰܚ̈ܶܐ ܕܰܪ̈ܓܺܝܓܳܬܳܐ܆ ܡܗܰܠܶܟ ܐ̱ܢܳܐ ܟܽܠܝܽܘܡ. ܦܰܨܳܗ̇ ܠܢܰܦܫܝ ܡܶܢ ܫܳܪ̈ܥܳܬܳܐ. ܘܰܦܪܽܘܩܰܝܢܝ ܒܝܰܕ ܛܰܝܒܽܘܬܳܟ ܐܰܢ̱ܬ ܪܳܚܶܡ ܐ̱ܢܳܫܳܐ܀

ܬܪܝܢܐ - H

ܛܳܣ ܓܰܒܪܺܐܶܝܠ: ܒܶܐܒܪ̈ܶܐ ܕܪܽܘܚܳܐ ܘܰܡܛܳܐ ܨܶܝܕ ܡܰܪܝܰܡ. ܘܝܰܗܒ ܠܳܗ̇ ܫܠܳܡܳܐ: ܕܶܐܫܬܰܕܰܪ ܠܳܗ̇: ܘܗܳܟܰܢ ܐܶܡܰܪ ܠܳܗ̇. ܫܠܳܡܳܐ ܥܰܡܶܟܝ: ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ ܦܳܪܽܘܩܳܐ: ܕܟܽܠܗܶܝܢ ܒܶܪ̈ܝܳܬܳܐ܀

ܬܠܝܬܝܐ - H

ܒܪܺܝܟܽ ܗ̱ܘ ܕܰܒܢܳܗ̇ ܠܥܺܕܰܬ ܩܽܘܕܫܳܐ ܥܰܠ ܦܰܣܰܬ ܐܺܝܕܰܘ̈ܗ̱ܝ. ܘܣܳܡ ܫܶܬܶܐܣܶܝ̈ܗ̇ ܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ ܩܰܕܺܝ̈ܫܶܐ. ܘܟܰܢܶܫ ܘܰܡܠܳܗ̇ ܟܽܠ ܥܰܡ̱̈ܡܺܝܢ. ܘܗܳܐ ܡܰܣܩܺܝܢ ܒܳܗ̇ ܬܶܫܒܽܘܚܬܳܐ. ܒܠܺܠܝܳܐ ܘܒܺܐܝܡܳܡܳܐ܀

ܪܒܝܥܝܐ - H

ܥܺܕܰܬ ܩܽܘܕܫܳܐ ܕܰܡܙܰܝܚܳܐ ܠܶܗ ܠܝܰܘܡܶܗ ܕܕܽܘܟܪܳܢܳܟ. ܐܳܘ ܢܰܨܺܝܚܳܐ ܘܰܡܠܶܐ ܫܽܘܦܪ̈ܶܐ: ܓܰܒܝܳܐ ܡܳܪܝ ܝܰܥܩܽܘܒ. ܒܥܺܝ ܘܶܐܬܟܰܫܰܦ: ܠܰܡܫܺܝܚܳܐ ܕܢܰܫܪܶܐ ܫܰܝܢܶܗ ܘܰܫܠܳܡܶܗ: ܒܰܐܪܒܰܥ ܦܶܢ̈ܝܳܬܳܐ܀

ܚܡܝܫܝܐ - H

ܒܬܰܪܥܳܐ ܕܪ̈ܰܚܡܰܝܟ ܗܳܐ ܢܳܩܶܫ ܐ̱ܢܳܐ ܕܶܐܣܰܒ ܫܽܘܒܩܳܢܳܐ. ܘܰܟܠܳܢܝ ܒܺܝܫܳܐ: ܒܰܨܢܺܝܥܽܘܬܶܗ ܡܶܢ ܐܽܘܪܚܳܐ ܕܚܰܝ̈ܶܐ. ܘܰܟܠܳܐ ܠܦܽܘܡܝ ܡܶܢ ܬܶܫܒܽܘܚܬܳܐ: ܘܪ̈ܶܓܠܰܝ ܡܶܢ ܗܰܝܟܰܠ ܩܽܘܕܫܳܐ. ܚܽܘܣ ܪܳܚܶܡ ܐ̱ܢܳܫ̈ܳܐ܀

ܫܬܝܬܝܐ - H

ܬܠܳܬ ܗܘܰܝ̈ ܩܽܘܪ̈ܝܳܐ ܕܰܦܪܰܫ ܡܽܘܫܶܐ ܕܢܶܗ̈ܘܝܳܢ ܠܫܽܘܘܙܳܒܳܐ. ܕܰܐܝܢܳܐ ܕܩܳܛܶܠ ܦܰܓܪܳܐ ܕܐ̱ܢܳܫܳܐ ܒܶܠܥܳܕ ܢܳܡܽܘܣܳܐ. ܗܳܐ ܬܝܳܒܽܘܬܳܐ: ܠܓܰܘ ܡܶܢܳܟ ܥܽܘܠ ‌ܐܶܣܬܰܬܰܪ ܚܰܛܳܝܳܐ. ܘܰܒܥܺܝ ܫܽܘܒܩܳܢܳܐ܀

ܫܒܝܥܝܐ - H

ܡܳܪܶܗ ܕܳܐܕܳܡ ܘܰܒܪܶܗ ܕܳܐܕܳܡ: ܘܓܳܒܽܘܠܶܗ ܕܳܐܕܳܡ. ܬܰܚܬܺܝ ܝܳܬܶܗ. ܘܰܢܚܶܬ ܣܰܥܪܶܗ: ܒܰܝܢܳܬ ܥܰܢܺܝ̈ܕܶܐ. ܘܶܐܫܬܰܘܕܺܝ ܠܶܗ: ܕܳܐܬܶܐ ܐ̱ܢܳܐ ܘܰܡܢܰܚܶܡ ܐ̱ܢܳܐ ܡܺܝܬܽܘܬܳܟ: ܘܦܳܢܶܝܬ ܠܝܳܪܬܽܘܬܳܟ܀

ܬܡܝܢܝܐ - H

ܟܽܠ ܥܰܢܺܝ̈ܕܶܐ ܕܰܢܚܶܬܘ ܠܰܒܫܽܘܟ ܡܶܢ ܡܰܥܡܽܘܕܺܝܬܳܐ. ܘܶܐܟܰܠܘ ܦܰܓܪܳܟ. ܘܶܐܫܬܺܝܘ ܠܰܕܡܳܟ ܘܰܫܟܶܒܘ ܥܰܠ ܣܰܒܪܳܟ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ ܗܳܪܟܳܐ ܘܰܠܥܶܠ ܒܰܫܡܰܝܳܐ. ܘܰܐܢܺܝܚ ܪ̈ܽܘܚܳܬܗܽܘܢ܀