ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܰܐܘܪܶܒܬ ܐܳܦ ܝܰܩܰܪܬ܆ ܕܽܘܟܪܳܢܶܗ ܕܡܳܪܝ ܐ̱ܶܣܛܶܦܰܢܳܘܣ܆ ܣܳܗܕܳܐ ܓܰܒܝܳܐ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐܰܢ̱ܬ ܕܰܐܪܶܒܬܳܝܗ̱ܝ ܠܓܶܢܣܰܢ܆ ܘܰܢܓܰܕܬܳܝܗ̱ܝ ܕܢܶܬܕܰܡܶܐ ܒܳܟ܆ ܘܗܳܕܶܐ ܫܶܠܡܰܬ܆ ܒܪܺܝܫܳܐ ܕܣܳܗ̈ܕܶܐ ܐܶܣܛܶܦܰܢܳܘܣ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܫܘܳܐ ܠܰܢ ܡܳܪܶܐ ܟܽܠ܆ ܠܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ. ܒܝܽܘܡ ܕܽܘܟܪܳܢܶܗ܆ ܕܣܳܗܕܳܐ ܓܰܒܝܳܐ ܐ̱ܶܣܛܶܦܰܢܳܘܣ܆ ܐܰܠܳܗܳܐ ܐܶܬܪܰܚܰܡ܀

ܐܰܢ̱ܬ ܕܰܠܣܳܗܕܳܐ ܓܰܒܝܳܐ܆ ܐ̱ܶܣܛܶܦܰܢܳܘܣ ܕܡܺܝܬ ܥܰܠ ܣܰܒܪܳܟ܆ ܝܰܩܰܪܬ ܘܰܐܘܪܶܒܬ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܘܶܐܢܳܐ ܨܒܺܝܬ ܕܶܐܩܰܠܶܣ܆ ܠܣܳܗܕܳܐ ܓܰܒܝܳܐ ܐ̱ܶܣܛܶܦܰܢܳܘܣ܆ ܥܰܡܶܗ ܐܶܚܕܶܐ܆ ܒܰܐܓܢܽܘܢܳܐ ܡܠܶܐ ܚܰܕ̈ܘܳܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥ̱ܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܕܠܶܐܣܛܶܦܰܢܳܘܣ܆ ܚܰܘܺܝ ܩܰܕܡܳܝܳܐ ܕܣܳܗ̈ܕܶܐ܆ ܘܚܰܝܠܶܗ ܘܢܰܨܚܶܗ ܒܰܐܓܢܽܘܢܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܒܰܨ̈ܠܰܘܳܬܶܗ܆ ܕܣܳܗܕܳܐ ܚܠܺܝܨܳܐ ܘܢܰܨܺܝܚܳܐ܆ ܫܰܝܶܢ ܘܪܰܡܪܶܡ ܥܺܕ̈ܳܬܳܐ܆ ܕܰܡܙܰܝ̈ܚܳܢ ܠܝܽܘܡ ܕܽܘܟܪܳܢܶܗ܀

ܡܫܺܝܚܳܐ ܐܰܠܳܗܳܐ ܕܚܰܝܶܠ ܠܥܰܒܕܶܗ܆ ܒܰܓܢܽܘܢܳܐ ܕܠܽܘܩܒܰܠ ܒܺܝܫܳܐ܆ ܚܰܝܶܠ ܠܰܢ ܕܰܢܙܰܡܰܪ ܠܳܟ܆ ܫܽܘܒܚܳܐ ܒܠܺܠܝܳܐ ܘܒܺܐܝܡܳܡܳܐ܀

ܐܰܠܳܗܳܐ ܕܢܰܨܚܶܗ ܠܶܐܣܛܶܦܰܢܳܘܣ܆ ܒܰܐܬܠܺܝܛܽܘܬܳܐ ܕܣܳܗܕܽܘܬܳܐ܆ ܐܰܫܘܳܐ ܠܟܽܠܰܢ ܕܰܢܫܰܒܚܳܟ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܐܰܠܳܗܳܐ ܕܰܓܒܳܝܗ̱ܝ ܠܶܐܣܛܶܦܰܢܳܘܣ܆ ܘܰܡܠܳܝܗ̱ܝ ܫܽܘܦܪ̈ܶܐ ܪ̈ܽܘܚܳܢܶܐ܆ ܡܠܺܝ ܠܟܽܠܰܢ ܡܶܢ ܝܺܕܰܥܬܳܟ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܗܰܘ ܕܰܒܚܽܘܒܶܗ܆ ܚܰܫ̈ܶܐ ܘܰܪܓܽܘܡܝܳܐ ܣܰܝܒܰܪ܆ ܣܛܶܦܰܢܳܘܣ ܪܺܝܫܳܐ ܕܣܳܗ̈ܕܶܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܐܳܘ ܐܰܬܠܺܝܛܳܐ ܢܨܺܝܚܳܐ܆ ܕܰܬܗܰܪܘ ܥܺܝܪ̈ܶܐ ܒܚܽܘܡܣܳܢܶܗ܆ ܘܳܐܦ ܡܳܪܶܗ ܩܳܡ ܠܺܐܝܩܳܪܶܗ܆ ܫܽܘܒܚܶܗ ܪܰܒܳܐ ܘܚܰܘܺܝ ܠܶܗ܀

ܢܫܰܒܚܽܘܢܳܟ ܡܳܪܝ ܥܶܠܳܝ̈ܶܐ܆ ܕܰܬܗܰܪܘ ܒܕܰܪܶܗ ܕܰܐܬܠܺܝܛܳܐ܆ ܘܥܰܡܗܽܘܢ ܢܫܰܒܚܽܘܢ ܬܰܚ̈ܬܳܝܶܐ܆ ܠܳܟ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

ܩܽܘܡܝ ܥܺܕܬܳܐ ܘܰܙܡܰܪܝ ܫܽܘܒܚܳܐ܆ ܒܗܳܢܳܐ ܝܰܘܡܳܐ ܕܕܽܘܟܪܳܢܶܗ܆ ܕܣܳܗܕܳܐ ܓܰܒܝܳܐ ܘܩܰܕܺܝܫܳܐ܆ ܐ̱ܶܣܛܶܦܰܢܳܘܣ ܡܠܶܐ ܢܶܨ̈ܚܳܢܶܐ܀

ܫܰܦܺܝܪ ܗ̱ܘܳܐ ܠܶܗ ܠܢܰܨܺܝܚܳܐ܆ ܕܰܒܡܳܪܶܗ ܕܰܡܺܝ ܗܽܘ ܠܶܗ܆ ܘܗܽܘ ܥܰܠ ܩܰܕܡܳܐ ܠܰܐܓܽܘܢܳܐ܆ ܘܗܽܘ ܕܪܰܫ ܐܽܘܪܚܳܐ ܠܢܰܨܺܝ̈ܚܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܚܳܪ ܗ̱ܘܳܐ ܒܰܫܡܰܝܳܐ: ܘܰܚܙܳܐ ܠܝܶܫܽܘܥ ܟܰܕ ܩܳܐܶܡ: ܡܶܢ ܝܰܡܺܝܢܳܐ ܕܫܳܠܽܘܚܶܗ: ܘܶܐܬܚܰܝܰܠ ܗ̱ܘܳܐ ܒܰܐܓܽܘܢܳܐ: ܬܰܘ ܟܽܠ ܥܰܡ̱̈ܡܺܝܢ: ܢܶܒܪܽܘܟ ܘܢܶܣܓܽܘܕ ܠܶܗ܀

ܡܫܺܝܚܳܐ ܕܚܰܝܠܶܗ ܗ̱ܘܳܐ: ܒܰܐܓܽܘܢܳܐ ܐܶܬܚܰܘܺܝ ܠܶܗ: ܗܽܘ ܢܢܰܛܰܪ ܠܥܺܕܬܳܐ ܘܝܰܠ̈ܕܶܝܗ̇: ܒܰܨܠܽܘܬܶܗ ܕܣܳܗܕܳܐ ܓܰܒܝܳܐ: ܬܰܘ ܟܽܠ ܥܰܡ̱̈ܡܺܝܢ: ܢܶܒܪܽܘܟ ܘܢܶܣܓܽܘܕ ܠܶܗ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܒܕܽܘܟܪܳܢ ܓܰܒܝܳܐ ܐ̱ܶܣܛܶܦܰܢܳܘܣ ܗܳܐ ܚܳܕܝܳܐ ܥܺܕܬܳܐ܆ ܘܝܰܠ̈ܕܶܝܗ̇ ܒܓܰܘܳܗ̇ ܙܳܡܪܺܝܢ ܫܽܘܒܚܳܐ ܒܟܶܢܳܪ̈ܰܝܗܽܘܢ܆ ܠܡܳܪܝܳܐ ܕܰܐܘܪܶܒ ܕܽܘܟܪܳܢܶܗ. ܒܰܫܡܰܝܳܐ ܘܒܰܐܪܥܳܐ܀

ܝܰܘܡܳܢܳܐ܆ ܟܶܢܫܳܐ ܦܰܩܪܳܐ ܕܝܗ̱ܽܘ̈ܕܳܝܶܐ ܚܛܰܦܘ ܠܶܐܣܛܶܦܰܢܳܘܣ܆ ܘܣܳܗ̈ܕܶܐ ܕܫܽܘܩܪܳܐ ܐܰܩܺܝܡܘ ܥܠܰܘܗ̱ܝ ܡܰܪܳܚܳܐܺܝܬ܆ ܘܫܰܪܺܝܘ ܕܢܺܐܡܪܽܘܢ ܥܰܘ̈ܳܠܶܐ. ܕܥܰܠ ܡܽܘܫܶܐ ܓܰܕܶܦ܀

ܝܰܘܡܳܢܳܐ܆ ܨܰܗܝܰܝ̈ ܠܰܕܡܳܐ ܝܗ̱ܽܘ̈ܕܳܝܶܐ ܪܰܓܡܽܘܗ̱ܝ ܠܢܰܨܺܝܚܳܐ܆ ܗܽܘ ܕܶܝܢ ܣܳܗܕܳܐ ܟܰܕ ܪܳܓܡܺܝܢ ܠܶܗ ܡܶܬܟܰܫܰܦ ܗ̱ܘܳܐ܆ ܕܡܳܪܰܢ ܝܶܫܽܘܥ ܫܒܽܘܩ ܠܗܽܘܢ܆ ܗܳܕܶܐ ܣܰܟܠܽܘܬܳܐ܀

ܝܰܘܡܳܢܳܐ܆ ܟܶܢ̈ܫܶܐ ܕܥܺܕܬܳܐ ܡܗܰܝܡܰܢܬܳܐ ܢܶܪܘܙܽܘܢ ܘܰܢܫܰܒܚܽܘܢ܆ ܘܢܰܣܩܽܘܢ ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚ ܩܽܘܕܫܳܐ܆ ܐܰܠܳܗܽܘܬܳܐ ܡܪܰܝܰܡܬܳܐ܆ ܕܠܳܗ̇ ܬܶܫܒ̈ܚܳܢ ܡܶܢ ܟܽܠ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ

ܚܙܳܐ ܠܰܫܡܰܝܳܐ ܕܰܦܬܺܝܚܺܝܢ: ܘܠܰܒܪܳܐ ܡܫܺܝܚܳܐ ܟܰܕ ܝܳܬܶܒ: ܡܶܢ ܝܰܡܺܝܢܳܐ ܕܫܳܠܽܘܚܶܗ: ܘܰܡܚܰܝܶܠ ܠܶܗ ܒܰܐܓܽܘܢܳܐ܀

ܕܽܘܡܳܪܰܐ ܗ̱ܘ ܠܰܕܡܶܬܒܰܩܶܐ: ܒܫܰܪܒܶܗ ܕܣܳܗܕܳܐ ܐ̱ܶܣܛܶܦܰܢܳܘܣ: ܕܡܶܢ ܛܳܠܽܘ̈ܡܶܐ ܐܶܬܩܰܛܪܰܓ: ܚܙܳܐ ܠܰܫܡܰܝܳܐ ܕܰܦܬܺܝܚܺܝܢ܀

ܬܰܘܕܺܝܬܳܐ ܡܩܰܪܒܳܐ ܥܺܕܬܳܐ: ܠܰܐܠܳܗܳܐ ܡܳܪܝܳܐ ܡܫܺܝܚܳܐ: ܒܕܽܘܟܪܳܢܶܗ ܕܶܐܣܛܶܦܰܢܳܘܣ: ܣܳܗܕܳܐ ܒܚܺܝܪܳܐ ܘܢܰܨܺܝܚܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܡܫܰܒܚܺܝܢ ܠܳܟ ܡܳܪܝܳܐ

ܕܽܘܟܪܳܢܶܗ ܕܣܳܗܕܳܐ܆ ܓܰܒܝܳܐ ܐܶܣܛܶܦܰܢܳܘܣ܆ ܢܳܨܰܚ ܒܓܰܘ ܥܺܕܬܳܐ܆ ܨܠܽܘܬܶܗ ܬܥܰܕܰܪ ܠܰܢ܀

ܪܰܓܡܶܗ ܗ̱ܘܳܐ ܥܰܡܳܐ: ܘܰܫܓܰܫܘ ܥܰܠ ܡܰܘܬܶܗ: ܘܗܳܐ ܪܳܥܡܳܐ ܥܺܕܬܳܐ: ܒܝܰܘܡܳܐ ܕܕܽܘܟܪܳܢܶܗ܀

ܡܕܰܡܝܳܢܳܐ ܕܡܳܪܶܗ܆ ܘܬܰܠܡܺܝܕܳܐ ܕܚܽܘܒܶܗ܆ ܐܶܬܟܰܫܰܦ ܘܰܒܥܺܝ. ܪ̈ܰܚܡܶܐ ܚܠܳܦ ܟܽܠܰܢ܀

ܠܳܟ ܫܽܘܒܚܳܐ ܡܫܺܝܚܳܐ܆ ܡܚܰܝܶܠ ܠܰܪ̈ܚܽܘܡܰܘܗ̱ܝ܆ ܒܰܨܠܽܘܬܗܽܘܢ ܡܳܪܰܢ. ܚܰܝܶܠ ܡܚܺܝܠܽܘܬܰܢ܀

ܝܰܘܡܳܢ ܥܺܕ̈ܳܬܳܐ. ܙܳܡܪ̈ܳܢ ܬܶܫܒܽܘܚܬܳܐ܆ ܘܚܳܕܶܝܢ ܥܶܠܳܝ̈ܶܐ ܘܪܳܘܙܺܝܢ ܬܰܚ̈ܬܳܝܶܐ܀

ܓܰܒܝܳܐ ܐ̱ܶܣܛܶܦܰܢܳܘܣ. ܕܪܰܓܡܽܘܗ̱ܝ ܝܗ̱ܽܘ̈ܕܳܝܶܐ܆ ܘܰܗܘܳܐ ܠܳܗ̇ ܟܠܺܝܠܳܐ܆ ܠܥܺܕܬܳܐ ܒܰܪܓܽܘܡܶܝܗ܀

ܟܶܢܫܰܢ ܢܶܬܒܰܪܰܟ܆ ܒܝܰܘܡܳܐ ܕܥܰܕܥܺܐܕܳܟ܆ ܘܢܶܣܰܒ ܒܽܘܪ̈ܟܳܬܳܐ. ܡܶܢ ܣܺܝܡܰܬ ܓܰܪ̈ܡܰܝܟ܀

ܠܡܳܪܶܗ ܕܳܡܶܝܬ ܗ̱ܘܰܝܬ. ܓܰܒܝܳܐ ܐ̱ܶܣܛܶܦܰܢܳܘܣ܆ ܕܪ̈ܰܚܡܶܐ ܒܳܥܶܐ ܗ̱ܘܳܐ. ܡܶܛܽܠ ܙܳܩܽܘܦܰܘ̈ܗ̱ܝ܀

ܫܽܘܒܚܳܐ ܠܛܰܝܒܽܘܬܶܗ܆ ܕܢܶܚܬܰܬ ܡܶܢ ܪܰܘܡܳܐ܆ ܘܰܒܓܰܘ ܐܰܓܽܘܢܳܐ. ܐܳܬܶܬ ܠܥܽܘܕܪܳܢܳܟ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܪܰܓܡܶܗ ܥܰܡܳܐ. ܡܶܛܽܠ ܫܽܘܦܪܳܐ ܕܕܽܘܒܳܪ̈ܰܘܗ̱ܝ܆ ܘܫܰܢܺܝ ܠܰܓܢܽܘܢ ܚܰܕ̈ܘܳܬܳܐ ܘܠܰܐܬܪܳܐ ܕܚܰܝ̈ܶܐ ܡܠܶܐ܆ ܐܶܬܕܰܟܪܰܝܢ ܡܳܪܝܳܐ܀

ܐܰܒܽܘܢ ܓܰܒܝܳܐ܆ ܐܰܬܠܺܝܛܳܐ ܕܫܰܠܶܡ ܪܶܗܛܶܗ܆ ܨܠܽܘܬܳܟ ܬܥܰܕܰܪ ܠܰܢ ܐܺܝܡܳܡܳܐ ܘܠܺܠܝܳܐ܆ ܐܶܬܕܰܟܪܰܝܢ ܡܳܪܝܳܐ܀

ܚܠܳܦ ܡܰܚ̈ܘܳܬܳܐ܆ ܘܽܐܘܠ̈ܨܳܢܶܐ ܕܣܰܝܒܰܪ ܦܰܓܪܳܟ܆ ܗܳܐ ܢܛܺܝܪ ܠܳܟ ܟܠܺܝܠ ܩܽܘ̈ܠܳܣܶܐ ܒܡܰܠܟܽܘܬܳܐ ܕܪܰܘܡܳܐ܆ ܐܶܬܕܰܟܪܰܝܢ ܡܳܪܝܳܐ܀

ܐܶܣܛܶܦܰܢܳܘܣ܆ ܩܰܕܡܳܝܳܐ ܘܒܽܘܟܪܳܐ ܕܣܳܗ̈ܕܶܐ܆ ܫܽܘܒܚܳܐ ܠܗܰܘ ܕܰܐܣܓܺܝ ܝܰܩܪܳܟ ܘܢܰܨܚܳܟ ܒܰܐܓܽܘܢܳܐ܀

ܫܽܘܒܚܳܐ

ܒܰܨ̈ܠܰܘܳܬܶܗ܆ ܕܣܳܗܕܳܐ ܓܰܒܝܳܐ ܐ̱ܶܣܛܶܦܰܢܳܘܣ܆ ܐܰܥܒܰܪ ܡܳܪܰܢ ܡܶܢ ܐܰܪܥܳܐ ܡܰܚ̈ܘܳܬܳܐ ܕܪܽܘܓܙܳܐ܆ ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܡܳܐ ܦܐܶܐ ܘܫܰܦܺܝܪ: ܝܰܘܡܳܐ ܗܳܢܳܐ ܕܥܰܕܥܺܐܕܳܟ: ܐܶܣܛܶܦܰܢܳܘܣ ܩܰܕܡܳܝܳܐ ܘܒܽܘܟܪܳܐ ܕܣܳܗ̈ܕܶܐ: ܫܽܘܒܚܳܐ ܠܗܰܘ ܕܰܐܣܓܺܝ ܝܰܩܪܳܟ: ܘܢܰܨܰܚ ܙܰܟܝܳܟ ܒܰܐܓܽܘܢܳܐ: ܐܶܬܕܰܟܪܰܝܢ ܡܳܪܝܳܐ܀

ܛܽܘܒܰܝܟ ܣܳܗܕܳܐ: ܐ̱ܶܣܛܶܦܰܢܳܘܣ ܦܳܠܚܳܐ ܙܪܺܝܙܳܐ: ܕܰܚܠܳܦ ܡܰܚ̈ܘܳܬܳܐ ܘܢܶܓ̈ܕܶܐ ܕܣܰܝܒܰܪ ܦܰܓܪܳܟ: ܗܳܐ ܢܛܺܝܪ ܠܳܟ ܟܠܺܝܠ ܙܳܟܽܘܬܳܐ: ܘܰܒܡܰܠܟܽܘܬܳܐ ܡܶܬܒܰܣܡܰܬ: ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ

ܐܶܣܛܶܦܰܢܳܘܣ ܢܰܨܺܝܚܳܐ ܘܒܽܘܟܪܳܐ ܕܣܳܗ̈ܕܶܐ܆ ܘܰܡܫܰܡܫܳܢܳܐ ܩܰܕܡܳܝܳܐ ܘܰܐܬܠܺܝܛܳܐ ܓܰܒܝܳܐ܆ ܕܰܚܙܳܝܗ̱ܝ ܥܰܡܳܐ. ܠܺܝܛܳܐ ܕܝܗ̱ܽܘܕܳܝ̈ܶܐ܆ ܕܡܰܪܬܶܐ ܠܥܰܡ̱̈ܡܶܐ܆ ܕܺܝ̈ܢܶܐ ܘܢܳܡܽܘ̈ܣܶܐ܆ ܘܰܚܣܰܡܘ ܒܶܗ ܒܢܰܝ̈ ܐܳܟܶܕܢ̈ܶܐ ܨܰܗܝܰܝ̈ ܠܰܕܡܳܐ܆ ܘܰܒ̈ܟܺܐܦܶܐ ܪܰܓܡܽܘܗ̱ܝ ܘܫܰܢܺܝ ܠܰܓܢܽܘܢ ܚܰܕ̈ܘܳܬܳܐ ܗ̄ ܨܠܽܘܬܶܗ ܬܥܰܕܰܪ ܠܰܢ܀

ܫܽܘܒܚܳܐ

ܠܰܚܠܽܘܠܶܗ ܕܶܐܣܛܶܦܰܢܳܘܣ ܩܳܪܢܝ ܐܰܠܳܗܳܐ: ܐܶܢ ܐܺܙܰܠ ܩܶܢܛܰܐ ܗ̱ܘ ܪܰܒܳܐ: ܘܶܐܢ ܐܶܦܽܘܫ ܕܶܚܠܬܳܐ ܗ̱ܝ: ܐܶܢ ܐܳܙܶܠ ܐ̱ܢܳܐ ܚܰܘ̈ܒܰܝ ܥ̱ܳܗܶܕ ܐ̱ܢܳܐ: ܘܶܐܢ ܦܳܐܶܫ ܐ̱ܢܳܐ ܗܘܺܝܬ ܠܺܝ ܢܽܘܟܪܳܝܳܐ: ܒܰܕܡܳܐ ܕܰܪܕܳܐ ܡܶܢ ܕܰܦܢܶܗ ܕܒܰܪ ܐܰܠܳܗܳܐ: ܢܶܬܚܰܣܽܘܢ ܚܰܘ̈ܒܰܝ ܘܶܐܩܥܶܐ ܕܠܳܟ ܫܽܘܒܚܳܐ ܡܳܪܝܳܐ: ܗ̄ ܨܠܽܘܬܶܗ ܬܥܰܕܰܪ ܠܰܢ܀

ܒܦܳܬܽܘܪܶܗ ܕܒܰܪ ܐܰܠܳܗܳܐ ܣܰܓܺܝ ܐܶܬܕܰܡܪܶܬ܆ ܕܰܓܢܶܝܢ ܒܶܗ ܥܰܒ̈ܕܰܝ ܡܰܠܟܳܐ ܘܡܳܪܝܳܐ ܡܫܰܡܶܫ ܠܗܽܘܢ܆ ܓܢܶܐ ܒܶܗ ܡܽܘܫܶܐ܆ ܪܺܝܫܳܐ ܕܰܢܒܺܝ̈ܶܐ܆ ܓܢܶܐ ܒܶܗ ܫܶܡܥܽܘܢ܆ ܪܺܝܫܳܐ ܕܰܫܠܺܝ̈ܚܶܐ܆ ܘܰܓܢܶܐ ܒܶܗ ܐܶܣܛܶܦܰܢܳܘܣ ܩܰܕܡܳܝܳܐ ܕܣܳܗ̈ܕܶܐ܆ ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܒܰܬܪ̈ܰܝܗܽܘܢ ܥܳܠ̈ܡܶܐ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܳܐ

ܒܩܶܛܠܶܗ ܕܶܐܣܛܶܦܰܢܳܘܣ ܡܶܬܒܰܩܶܐ ܗ̱ܘܺܝܬ܆ ܘܰܐܚܕܰܢܝ ܬܶܗܪܳܐ ܘܕܽܘܡܳܪܳܐ ܕܰܟܡܳܐ ܡܣܰܝܒܰܪ ܗ̱ܘܳܐ܆ ܒ̈ܟܺܐܦܶܐ ܪܳܓܡܺܝܢ ܗ̱ܘܰܘ ܠܶܗ ܘܗܽܘ ܡܨܰܠܶܐ ܗ̱ܘܳܐ܆ ܕܡܳܪܰܢ ܝܶܫܽܘܥ ܫܒܽܘܩ ܠܗܽܘܢ ܡܶܛܽܠ ܕܠܳܐ ܝܳܕܥܺܝܢ܆ ܐܳܘ ܠܥܰܒܕܳܐ ܕܰܠܡܳܪܶܗ ܕܳܡܶܐ܆ ܕܟܰܕ ܡܳܐܶܬ ܥܠܰܝܗܽܘܢ ܡܨܰܠܶܐ ܗ̱ܘܳܐ܆ ܫܰܘܬܶܦ ܠܰܢ ܒܰܨ̈ܠܰܘܳܬܶܗ ܝܶܫܽܘܥ ܡܠܶܐ ܪ̈ܰܚܡܶܐ܀

ܫܽܘܒܚܳܐ

ܥܺܝܪ̈ܰܝ ܪܰܘܡܳܐ ܬܗܰܪܘ ܒܶܗ ܒܶܐܣܛܶܦܰܢܳܘܣ܆ ܒܗܰܘ ܥܶܕܳܢܳܐ ܕܩܳܐܶܡ ܗ̱ܘܳܐ ܩܽܘܕܡܰܬ ܝܽܗ̱ܘ̈ܕܳܝܶܐ܆ ܒܕܰܪܶܗ ܩܰܒܠܶܗ ܡܳܪܶܗ ܘܩܳܡ ܗ̱ܘܳܐ ܘܝܰܩܪܶܗ܆ ܘܫܰܪܺܝ ܡܡܰܠܶܠ ܓܶܠܝܳܢܶܗ ܩܽܘܕܡܰܬ ܕܰܝܳܢ̈ܶܐ܆ ܕܚܳܙܶܐ ܐ̱ܢܳܐ ܫܡܰܝ̈ܳܐ ܕܰܦܬܺܝܚܺܝܢ܆ ܘܰܠܝܶܫܽܘܥ ܡܫܺܝܚܳܐ ܟܰܕ ܩܳܐܶܡ܆ ܡܶܢ ܝܰܡܺܝܢܳܐ ܕܫܳܠܽܘܚܶܗ ܐܰܒܳܐ ܡܪܰܚܡܳܢܳܐ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢܬܽܘܢ. ܡܢܰܚܡܳܢܳܐ ܕܝܰܠܕ̈ܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܦܶܬܓܳܡܳܐ: ܡܶܛܽܠܳܬܳܟ ܐܶܬܩܛܰܠܢ ܒܟܽܠܝܽܘܡ܆ ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܒܽܘܟܪܳܐ ܕܣܳܗ̈ܕܶܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܡܳܪܰܢ ܝܶܫܽܘܥ ܚܰܣܳܐ ܘܰܫܒܽܘܩ ܐܰܝܟ ܚܰܢܳܢܳܐ܆ ܠܟܽܠ ܕܶܐܫܬܰܘܬܰܦ ܒܩܶܛܠܶܗ ܕܥܰܒܕܳܟ ܐܶܣܛܶܦܰܢܳܘܣ܆ ܚܛܺܝܬܳܐ ܗܳܕܶܐ ܠܳܐ ܬܩܺܝܡ ܠܗܽܘܢ ܕܰܣܥܰܪܘ ܨܶܐܕܰܝ܆ ܐܶܠܳܐ ܒܪ̈ܰܚܡܶܐ ܢܰܛܰܪ ܐܶܢܽܘܢ ܘܰܒܫܽܘܒܩܳܢܳܐ܀

ܫܽܘܒܚܳܐ ܠܰܐܒܳܐ ܕܒܶܗ ܐܶܬܚܰܝܰܠ ܪܺܝܫܳܐ ܕܣܳܗ̈ܕܶܐ܆ ܘܰܗܘܳܐ ܒܽܘܟܪܳܐ ܠܟܽܠ ܐܰܬܠܺܝ̈ܛܶܐ ܕܢܶܬܕܰܡܽܘܢ ܒܶܗ܆ ܡܫܺܝܚܳܐ ܕܰܐܪܘܺܝ ܠܣܳܗܕܳܐ ܓܰܒܝܳܐ ܘܕܳܫ ܥܰܠ ܡܰܘܬܳܐ܆ ܢܰܛܰܪ ܟܶܢܫܰܢ ܕܙܳܡܰܪ ܫܽܘܒܚܳܐ ܒܝܽܘܡ ܕܽܘܟܪܳܢܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀