ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܡܰܠܟܽܘܬ ܪܰܘܡܳܐ
ܐܰܝܠܶܝܢ ܕܰܪܫܺܝܡܺܝܢ ܒܪܽܘܫܡܶܗ

ܝܺܕܰܥܬܳܐ ܘܚܰܝܠܳܐ܆ ܕܪܽܘܚܳܐ ܩܰܕܺܝܫܳܐ ܩܢܶܐ ܗ̱ܘܳܐ ܐ̱ܶܣܛܶܦܰܢܳܘܣ܆ ܘܒܽܘܝܳܐܳܐ ܪܰܒܳܐ ܐܰܩܢܺܝ܆ ܠܥܺܕܬܳܐ ܒܰܐܝܠܶܝܢ ܕܰܣܥܰܪ ܗ̱ܘܳܐ܆ ܘܰܐܙܺܝܥ ܡܰܠ̈ܟܶܐ ܒܝܽܘܠܦܳܢܶܗ܆ ܘܰܬܟܰܣ ܐܶܢܽܘܢ ܠܰܫܪܳܪܶܗ܆ ܚܙܳܐ ܫܽܘܒܚܶܗ ܕܝܶܫܽܘܥ ܘܰܚܕܺܝ ܒܶܗ܀

ܫܽܘܒܚܳܐ

ܡܰܢ ܠܳܐ ܢܶܬܡܰܗ܆ ܒܓܰܒܝܳܐ ܐ̱ܶܣܛܶܦܰܢܳܘܣ ܒܝܰܘܡܳܐ ܕܟܽܘܠܳܠܶܗ܆ ܕܰܒ̈ܟܺܐܦܶܐ ܪܳܓܡܺܝܢ ܗ̱ܘܰܘ ܠܶܗ܆ ܘܗܽܘ ܡܨܰܠܶܐ ܥܰܠ ܪ̈ܳܓܽܘܡܰܘܗ̱ܝ܆ ܘܡܶܬܕܰܡܶܐ ܗ̱ܘܳܐ ܠܦܳܪܽܘܩܰܢ܆ ܟܰܕ ܨܰܠܺܝ ܥܰܠ ܙܳܩܽܘܦܰܘ̈ܗ̱ܝ܆ ܕܰܐܒܳܐ ܕܺܝܠܝ܆ ܫܒܽܘܩ ܠܗܽܘܢ ܚܛܳܗܰܝ̈ܗܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܗܘܳܐ ܪܺܝܫܳܐ ܐܳܦ ܩܰܕܡܳܝܳܐ: ܒܗܳܝ ܐܽܘܪܚܳܐ ܕܡܰܠܝܳܐ ܚܰܫ̈ܶܐ: ܘܰܕܪܰܫ ܩܽܘܕܡܰܬ ܢܰܨ̈ܺܝܚܶܐ: ܘܰܐܥܕܺܝ ܟܠܺܝܠܳܐ ܕܙܳܟܽܘܬܳܐ܀

ܫܽܘܒܚܳܐ ܠܰܐܒܳܐ ܡܚܰܝܠܳܢܳܟ: ܘܣܶܓܕܬܳܐ ܠܰܒܪܳܐ ܡܢܰܨܚܳܢܳܟ: ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ: ܕܰܓܕܰܠ ܠܳܟ ܟܠܺܝܠ ܩܽܘ̈ܠܳܣܶܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐܰܘ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܒܽܘܟܪܳܐ ܕܣܳܗ̈ܕܶܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܠܦܺܐܪܳܐ ܚܰܠܝܳܐ ܒܶܝܬ ܣܰܘ̈ܟܳܬܶܗ ܕܰܨܠܺܝܒ ܢܽܘܗܪܳܐ܆ ܚܙܰܘ ܡܰܪ̈ܳܚܶܐ ܘܰܫܕܰܘ ܟܺܐܦ̈ܶܐ ܕܢܶܬܰܪ ܒܰܐܪܥܳܐ܆ ܒܠܰܥ ܗ̱ܘܳܐ ܣܳܗܕܳܐ ܘܚܰܕܪܽܘܗ̱ܝ ܚܰܫ̈ܶܐ ܡܶܢ ܟܽܠ ܓܰܒܺܝ̈ܢ܆ ܘܫܰܪܺܝ ܢܨܰܠܶܐ ܥܰܠ ܩܳܛܽܘ̈ܠܰܘܗ̱ܝ ܦܳܪܽܘܫܳܐܺܝܬ܀

ܫܽܘܒܚܳܐ ܫܰܦܝܳܐ ܒܩܳܠܳܐ ܕܰܟܝܳܐ ܢܰܣܶܩ ܠܰܐܒܳܐ܆ ܘܠܰܒܪܳܐ ܕܡܶܢܶܗ ܕܝܰܗ̱ܒ ܕܶܡܘ̈ܳܬܶܗ ܠܶܐܣܛܶܦܰܢܳܘܣ܆ ܘܰܠܪܽܘܚ ܩܽܘܕܫܳܐ ܕܙܰܝܰܚ ܘܪܰܡܪܶܡ ܝܽܘܡ ܕܽܘܟܪܳܢܶܗ܆ ܘܰܥܠܰܝܢ ܪ̈ܰܚܡܶܐ ܒܰܨܠܰܘ̈ܳܬܶܗ ܒܟܽܠ ܥܶܕܳܢܺܝ̈ܢ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܫܠܶܡ ܛܶܟܣܳܐ ܕܡܳܪܝ ܐܶܣܛܶܦܰܢܳܘܣ ܪܺܝܫܳܐ ܕܰܡܫܰܡ̈ܫܳܢܶܐ ܘܩܰܕܡܳܝܳܐ ܕܣܳܗ̈ܕܶܐ