ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܶܙܰܠ̱ܬ ܡܰܪܝܰܡ ܕܬܶܫܰܐܠ܆ ܒܰܫܠܳܡܳܗ̇ ܕܒܰܪ̱ܬ ܠܶܘܳܝ̈ܶܐ܆ ܟܰܕ ܛܥܺܝܢܳܐ ܠܶܗ܆ ܠܡܳܪܳܐ ܕܟܽܠܳܗ̇ ܟܽܘܡܪܽܘܬܳܐ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܟܰܕ ܫܶܡܥܰܬ ܐܶܠܺܝܫܒܰܥ܆ ܠܰܫܠܳܡܳܗ̇ ܕܗܳܝ ܒܰܪ̱ܬ ܕܰܘܺܝܕ܆ ܕܳܨ ܗ̱ܘܳܐ ܥܽܘܠܳܐ܆ ܕܰܒܟܪܣܳܗ̇ ܩܕܳܡ ܒܳܪܽܘܝܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܝܡܶܟܳܐ ܠܺܝ ܗܳܕܶܐ܆ ܕܶܐܡܶܗ ܕܡܳܪܝ ܬܺܐܬܶܐ ܬܶܣܥܪܰܢܝ܆ ܕܗܳܐ ܐܳܦ ܥܽܘܠܳܐ܆ ܪܦܰܬ ܒܥܽܘܒܝ ܕܢܶܦܽܘܩ ܢܶܣܓܽܘܕ ܠܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟܽ ܗ̱ܘ ܡܫܺܝܚܳܐ ܕܰܣܥܰܪ܆ ܒܰܚܢܳܢܶܗ ܠܟܳܪܽܘܙ ܩܽܘܫܬܳܐ܆ ܟܰܕ ܛܥܺܝܢܳܐ ܠܶܗ܆ ܒܬܽܘܠܬܳܐ ܕܟܺܝܬܳܐ ܒܰܪ̱ܬ ܕܰܘܺܝܕ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܬܳܝ ܒܰܫܠܳܡܳܐ ܐܳܘ ܒܬܽܘܠܬܳܐ܆ ܐܶܡܶܗ ܕܡܰܠܟܳܐ ܫܡܰܝܳܢܳܐ܆ ܬܳܝ ܒܰܫܠܳܡܳܐ܆ ܐܶܠܦܳܐ ܛܥܺܝܢܰܬ ܚܰܕܘ̈ܳܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܳܢܰܘ ܬܶܗܪܳܐ. ܕܒܰܪ ܥܶܠܳܝܳܐ ܢܚܶܬ܆ ܘܰܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ ܡܰܪܝܰܡ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܽܘܒܚܳܐ ܠܳܟ ܡܶܢ ܟܽܠ ܦܽܘ̈ܡܺܝܢ܆ ܒܰܪ ܐܰܠܳܗܳܐ ܕܶܐܬܒܰܣܰܪܬ܆ ܘܰܠܒܶܫܬ ܦܰܓܪܳܐ܆ ܡܶܢ ܥܽܘܒܳܗ̇ ܕܗܳܝ ܒܰܪ̱ܬ ܕܰܘܺܝܕ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܗܰܘ ܕܰܣܥܰܪ ܗ̱ܘܳܐ ܠܝܽܘܚܰܢܳܢ ܥܰܒܕܶܗ܆ ܟܰܕ ܛܥܺܝܢܳܐ ܠܶܗ ܒܰܪ̱ܬ ܕܰܘܺܝܕ܆ ܘܗܽܘ ܛܥܺܝܢ ܠܰܐܪܥܳܐ ܘܠܰܫܡܰܝܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܐܶܙܰܠ̱ܬ ܡܰܪܝܰܡ ܕܬܶܫܰܐܠ ܒܰܫܠܳܡܳܗ̇܆ ܕܣܳܒܬܳܐ ܥܩܰܪܬܳܐ ܒܰܪ̱ܬ ܐܰܗܪܽܘܢ܆ ܟܰܕ ܛܥܺܝܢܳܐ ܠܶܗ ܠܰܛܥܺܝܢ ܟܽܠ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܕܰܗܘܳܐ ܥܽܘܠܳܐ܆ ܘܕܳܨ ܗ̱ܘܳܐ ܠܽܐܘܪܥܶܗ ܝܽܘܚܰܢܳܢ܆ ܟܰܕ ܛܥܺܝܢܳܐ ܠܶܗ ܒܰܪ̱ܬ ܕܰܘܺܝܕ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܕܶܐܬܳܐ ܠܒܰܛܢܳܐ܆ ܘܰܗܘܳܐ ܥܽܘܠܳܐ ܒܨܶܒܝܳܢܶܗ܆ ܘܥܽܘܠܳܐ ܣܶܓܕܬܳܐ ܩܰܪܶܒ ܠܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܰܝܢܳܟ ܡܳܪܰܢ ܘܰܫܠܳܡܳܐ ܕܡܶܢܳܟ܆ ܢܰܡܠܶܟ ܒܳܗ̇ ܒܥܺܕܰܬ ܩܽܘܕܫܳܐ܆ ܕܰܬܫܰܒܚܳܟ ܒܗܳܢܳܐ ܥܺܐܕܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܶܐܬܳܐ ܗ̱ܘܳܐ ܘܣܰܥܪܰܢ ܒܰܚܢܳܢܶܗ܆ ܘܶܐܬܕܟܰܪ ܩܝܳܡܶܗ ܕܥܰܡ ܓܶܢܣܰܢ܆ ܐܰܫܘܳܐ ܠܰܢ ܕܢܶܚܕܶܐ ܥܰܡܳܟ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܣܶܠܩܰܬ ܗ̱ܘܳܬ ܡܰܪܝܰܡ܇ ܒܬܽܘܠܬܳܐ ܕܟܺܝܬܳܐ ܩܰܕܺܝܫܬܳܐ܆ ܒܚܰܕܽܘܬܳܐ ܠܛܽܘܪܳܐ ܕܺܝܗܽܘܕ. ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ܆ ܕܒܶܛܢܰܬ ܗ̱ܘܳܬ ܩܳܠܳܐ܆ ܕܡܰܟܪܶܙ ܩܽܘܕܡܰܬ ܒܰܪ ܡܰܠܟܳܐ܀

ܥܢܳܬ ܗ̱ܘܳܬ ܐܶܠܺܝܫܒܰܥ܆ ܘܶܐܡܪܰܬ ܠܳܗ̇ ܠܗܳܝ ܒܰܪ̱ܬ ܕܰܘܺܝܕ܆ ܕܗܳܐ ܟܰܕ ܢܦܰܠ ܩܳܠܶܟܝ ܒܶܐܕܢܰܝ̈܆ ܕܳܨ ܗ̱ܘܳܐ ܥܽܘܠܳܐ ܕܰܒܓܰܘ ܟܰܪܣܝ܆ ܘܫܰܪܺܝ ܟܰܕ ܡܕܰܝܶܨ܆ ܢܶܦܽܘܩ ܠܰܫܠܳܡܳܐ ܕܡܳܪܶܗ܀

ܡܰܢܽܘ ܢܶܬܶܠ ܠܺܝ܆ ܕܶܐܡܶܗ ܕܡܳܪܝ ܬܺܐܬܶܐ ܨܶܐܕܰܝ܆ ܐܰܙܥܩܰܬ ܐܶܠܺܝܫܒܰܥ ܣܳܒܬܳܐ܆ ܠܘܳܬ ܡܰܪܝܰܡ ܒܬܽܘܠܬܳܐ ܕܟܺܝܬܳܐ܆ ܕܦܺܐܪܳܐ ܕܰܒܟܰܪܣܶܟܝ܆ ܡܠܶܟ ܡܰܠ̈ܟܶܐ ܘܩܳܛܰܪ ܬܳܓ̈ܶܐ܀

ܙܟܰܪܝܳܐ ܐܶܣܬܰܒܰܪ܆ ܡܶܢ ܥܺܝܪܳܐ ܡܶܛܽܠ ܒܰܛܢܳܐ܆ ܘܪܶܗܛܰܬ ܐܰܢ̱ܬܬܳܐ ܕܬܶܕܡܽܘܪܬܳܐ܆ ܩܕܳܡ ܝܰܠܕܳܐ ܕܰܡܠܶܐ ܬܶܗܪܳܐ܆ ܐܳܦ ܟܰܘܟܰܒ ܢܽܘܓܗܳܐ܆ ܩܕܳܡ ܫܶܡܫܳܐ ܕܙܰܕܺܝܩܽܘܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܫܽܘܒܚܳܐ ܠܶܗ ܠܗܰܘ ܕܰܒܚܽܘܒܶܗ: ܨܒܳܐ ܕܢܶܗܘܶܐ ܥܽܘܠܳܐ ܒܟܰܪܣܳܐ: ܘܥܽܘܠܳܐ ܕܳܨ ܠܽܐܘܪܥܶܗ ܘܫܰܒܚܶܗ: ܘܣܳܗܶܕ ܥܠܰܘܗ̱ܝ ܕܒܰܪ ܐܰܠܳܗܰܐ ܗ̱ܘ܀

ܐܶܡܪܰܬ ܥܩܰܪܬܳܐ ܠܰܒܬܽܘܠܬܳܐ: ܟܰܕ ܩܳܥܝܳܐ ܒܪܽܘܚܳܐ ܕܩܽܘܕܫܳܐ: ܕܰܡܒܰܪܰܟܬܳܐ ܐܰܢ̱ܬ ܒܢܶܫ̈ܶܐ: ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ܀

ܟܰܕ ܫܶܡܥܰܬ ܗ̱ܘܳܬ ܐܶܠܺܝܫܒܰܥ: ܠܰܫܠܳܡܳܗ̇ ܕܰܡܒܰܪܰܟܬܳܐ: ܕܳܨ ܝܽܘܚܰܢܳܢ ܕܰܢܫܰܦܶܐ: ܐܽܘܪܚܳܐ ܩܕܳܡ ܡܳܪܶܗ ܕܶܐܬܳܐ܀

ܫܽܘܒܚܳܐ ܠܶܗ ܠܪܳܡܳܐ ܕܰܢܚܶܬ: ܡܶܢ ܡܶܕܝܳܪ̈ܰܘܗܝ ܥܶܠܳܝܳܐ: ܘܰܐܓܶܢ ܘܰܫܪܳܐ ܒܰܒܬܽܘܠܬܳܐ: ܘܕܳܨܗ̱ܘܳܐ ܠܽܐܘܪܥܶܗ ܝܽܘܚܰܢܳܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܣܶܠܩܰܬ ܥܢܳܢܳܐ ܩܰܠܺܝܠܬܳܐ܆ ܘܰܡܒܰܪܟܳܐ ܒܓܰܘܳܗ̇܆ ܕܬܺܐܙܰܠ ܬܶܣܥܽܘܪ ܠܒܰܪ ܡܶܣ̈ܟܺܢܶܐ ܒܒܰܝܬܳܐ ܕܰܐܒܽܘܗܝ܆ ܕܢܶܫܬܰܡܠܶܐ ܗ̱ܘܳܐ ܟܽܠܡܶܕܶܡ܆ ܕܶܐܡܰܪ ܡܰܠܰܐܟܳܐ܀

ܝܰܘܡܳܢܳܐ܆ ܐܶܙܰܠ̱ܬ ܡܰܪܝܰܡ ܒܰܪ̱ܬ ܕܰܘܺܝܕ ܠܒܰܝܬܶܗ ܕܰܙܟܰܪܝܳܐ܆ ܘܫܶܐܠܰܬ ܫܠܳܡܳܗ̇ ܕܣܳܒܬܳܐ ܥܩܰܪܬܳܐ ܒܰܪ̱ܬ ܠܶܘܳܝ̈ܶܐ܆ ܘܕܳܨ ܝܽܘܚܰܢܳܢ ܒܓܰܘ ܟܰܪܣܳܐ܆ ܠܰܫܠܳܡܳܐ ܕܡܳܪܶܗ܀

ܝܰܘܡܳܢܳܐ܆ ܐܶܡܪܰܬ ܗ̱ܘܳܬ ܐܶܠܺܝܫܒܰܥ ܐܶܡܶܗ ܕܝܽܘܚܰܢܳܢ܆ ܕܡܰܢ ܢܶܬܶܠ ܠܺܝ ܕܡܳܪܝ ܥܰܡ ܐܶܡܶܗ ܢܺܐܬܶܐ ܢܶܣܥܪܰܢܝ܆ ܕܗܳܐ ܒܚܰܕܽܘܬܳܐ ܕܪܽܘܚ ܩܽܘܕܫܳܐ܆ ܕܳܨ ܥܽܘܠܳܐ ܒܓܰܘ ܟܰܪܣܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܝܳܡܬܳܐ ܕܶܢܚܰܬ ܒܰܒܪܺܝܬܳܐ

ܝܰܘܡܳܢܳܐ ܣܶܠܩܰܬ ܡܰܪܝܰܡ: ܠܛܽܘܪܳܐ ܕܺܝܗܽܘܕ ܒܛܺܝܠܳܐܺܝܬ: ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ: ܥܩܰܪܬܳܐ ܕܝܶܠܕܰܬ ܒܣܰܝܒܽܘܬܳܗ̇: ܘܶܐܫܬܰܪܪܰܬ ܒܐ̱ܪܳܙܳܐ ܕܬܶܗܪܳܐ: ܕܶܐܡܰܪ ܠܳܗ̇ ܪܺܝܫ ܡܰܠܰܐܟ̈ܶܐ܀

ܡܒܰܪܰܟܬܳܐ ܕܢܶܫ̈ܶܐ ܐܺܝܬܰܝܟܝ: ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ: ܕܰܐܠܳܗܰܐ ܗ̱ܘ ܕܶܐܬܳܐ ܒܚܽܘܒܶܗ: ܕܢܶܣܥܽܘܪ ܠܓܶܢܣܳܐ ܕܒܶܝܬ ܐܳܕܳܡ: ܛܽܘܒܰܝܟܝ ܕܰܗܘܰܝܬܝ ܡܰܪܟܰܒܬܳܐ: ܘܙܰܝܚܰܝܬܺܝܘܗ̱ܝ ܠܡܳܪܶܐ ܪ̈ܰܘܡܶܐ܀

ܗܳܐ ܡܶܢ ܗܳܫܳܐ ܘܰܠܥܳܠܰܡ: ܝܰܠܕܶܟܝ ܟܰܣܝܳܐ ܡܶܬܓܠܶܐ: ܘܟܽܠ ܥܰܡ̱̈ܡܺܝܢ ܣܳܓܕܺܝܢ ܠܰܒܪܶܝܟܝ: ܘܟܽܠ ܠܶܫܳܢܺܝ̈ܢ ܠܶܗ ܢܰܘܕܽܘܢ: ܕܡܰܠܟܽܘܬܶܗ ܠܳܐ ܡܶܫܬܰܪܝܳܐ: ܘܺܐܝܬܰܘܗ̱ܝ ܡܳܪܝܳܐ ܐܰܠܳܗܳܐ܀

ܒܪܺܝܟܳܐ ܗ̱ܝ ܡܰܪܝܰܡ ܕܺܝܠܶܕܬܳܟ: ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܶܐܬܒܰܪܟܰܬ ܒܳܟ ܐܶܠܺܝܫܒܰܥ: ܕܰܒܥܽܘܡܪܳܗ̇ ܫܪܳܐ ܪܰܒܽܘܬܳܟ: ܒܪܺܝܟ ܐܰܒܳܐ ܕܫܰܠܚܳܟ ܨܶܝܕܰܝܢ: ܫܽܘܒܚܳܐ ܠܳܟ ܘܰܠܫܳܠܽܘܚܳܟ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܝܰܘܡܳܢܳܐ ܚܙܰܝ̈: ܠܰܚ̈ܕܳܕܶܐ ܛܠܺܝܬܳܐ ܐܳܦ ܣܳܒܬܳܐ: ܘܕܳܨ ܗ̱ܘܳܐ ܝܽܘܚܰܢܳܢ ܒܓܰܘ ܟܰܪܣܳܐ ܘܰܩܥܳܐ ܘܶܐܡܰܪ: ܫܽܘܒܚܳܐ ܠܳܟ ܐܰܠܳܗܳܐ܀

ܥܰܠ ܕܠܳܐ ܡܨܶܐ ܗ̱ܘܳܐ: ܝܰܘܡܳܢܳܐ ܕܢܶܦܽܘܩ ܡܶܢ ܟܰܪܣܳܐ: ܐܶܬ̣ܬܙܺܝܥ ܗ̱ܘܳܐ ܒܕܰܘܨܳܐ ܘܚܰܕܽܘܬܳܐ ܘܰܩܥܳܐ ܘܶܐܡܰܪ: ܫܽܘܒܚܳܐ ܠܳܟ ܐܰܠܳܗܳܐ܀

ܛܠܺܝܬܳܐ ܡܰܪܝܰܡ: ܚܰܟܺܝܡܳܐ ܗ̱ܘܳܬ ܐܰܦ ܡܰܟܺܝܟܳܐ: ܘܰܐܝܟ ܕܠܶܐܡܳܐ ܣܳܒܬܳܐ ܣܶܓܕܰܬ ܗ̱ܘܳܬ ܟܰܕ ܐܰܩܒܶܠܬܳܗ̇: ܘܫܶܐܠܰܬ ܗ̱ܘܳܬ ܒܰܫܠܳܡܳܗ̇܀

ܓܰܒܪܺܐܶܝܠ ܕܶܝܢ: ܡܳܪܝ ܥܰܡܶܟܝ ܐܶܡܰܪ ܗ̱ܘܳܐ ܠܳܗ̇ ܓܶܝܪ: ܘܶܐܡܶܗ ܕܡܳܪܝ ܡܶܢ ܐܶܠܺܝܫܒܰܥ ܡܶܬܩܰܪܝܳܐ ܗ̱ܘܳܬ: ܡܒܰܪܰܟܬܳܐ ܐܰܢ̱ܬ ܕܢܶܫ̈ܶܐ܀

ܫܠܳܡܳܗ̇ ܕܡܰܪܝܰܡ: ܒܶܐܕ̈ܢܰܝ ܣܳܒܬܳܐ ܐܶܡܰܠܰܠ: ܘܪܽܘܚ ܩܽܘܕܫܳܐ ܐܶܬܡܠܺܝ ܗ̱ܘܳܐ ܙܟܰܪܝܳܐ ܘܰܩܥܳܐ ܘܶܐܡܰܪ: ܫܽܘܒܚܳܐ ܠܳܟ ܐܰܠܳܗܳܐ܀

ܣܶܠܩܰܬ ܡܰܪܝܰܡ: ܠܛܽܘܪܳܐ ܕܺܝܗܽܘܕ ܒܛܺܝܠܳܐܺܝܬ: ܕܬܶܚܙܶܐ ܠܐ̱ܪܳܙܳܐ ܕܶܐܬܡܰܠܰܠ ܡܶܢ ܡܰܠܰܐܟܳܐ: ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܰܒܚܺܝ݂ܢ ܠܳܟ ܡܳܪܝܳܐ

ܠܰܥܩܰܪܬܳܐ ܣܳܒܬܳܐ܆ ܕܬܶܣܥܽܘܪ ܡܒܰܪܰܟܬܳܐ܆ ܘܦܺܐܪܳܐ ܕܰܒܟܰܪܣܳܗ̇܆ ܒܚܰܕܘܳܐ ܕܳܨ ܠܽܐܘܪܥܶܗ܀

ܝܰܘܡܳܢ ܚܙܰܝ̈ ܚܕܳܕܶܐ܆ ܛܠܺܝܬܳܐ ܐܳܦ ܣܳܒܬܳܐ܆ ܘܕܳܨ ܗ̱ܘܳܐ ܝܽܘܚܰܢܳܢ܆ ܒܓܰܘ ܟܰܪܣܳܐ ܕܶܐܡܶܗ܀

ܥܰܠ ܕܠܳܐ ܡܨܶܐ ܗ̱ܘܳܐ ܠܶܗ܆ ܕܢܶܦܽܘܩ ܡܶܢ ܟܰܪܣܳܐ܆ ܐܶܬܬܙܺܝܥ ܗ̱ܘܳܐ ܒܕܰܘܨܳܐ܆ ܘܚܰܕܽܘܬܳܐ ܪܰܒܬܳܐ܀

ܬܳܐ ܒܰܫܠܳܡ ܪܳܥܝܳܐ܆ ܘܚܽܘܛܪܳܐ ܕܡܰܟܺܝ̈ܟܶܐ܆ ܒܳܟ ܢܶܬܬܒܰܪ ܒܺܝܫܳܐ܆ ܘܢܶܚܕܽܘܢ ܐܰܒܺܝ̈ܕܶܐ܀

ܥܳܐܶܠ ܟܰܕ ܕܰܚܺܝ݂ܠ܆ ܣܳܓܶܕ ܘܰܡܫܰܒܰܚ܆ ܩܕܳܡ ܗܳܝ ܒܰܪ̱ܬ ܕܰܘܺܝܕ܆ ܕܡܳܪܝܳܐ ܫܪܶܐ ܒܥܽܘܒܳܗ̇܀

ܚܳܕܶܐ ܗ̱ܘܳܐ ܙܟܰܪܝܳܐ܆ ܒܡܰܪܝܰܡ ܒܰܪ̱ܬ ܕܰܘܺܝܕ܆ ܘܰܡܢܰܨܪܳܐ ܥܩܰܪܬܳܐ܆ ܒܕܰܘܨܳܐ ܠܰܒܬܽܘܠܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܫܠܳܡܳܐ܆ ܕܝܶܗܒܰܬ ܡܰܪܝܰܡ ܠܒܰܪ̱ܬ ܠܶܘܳܝ̈ܶܐ܆ ܘܕܳܨ ܥܽܘܠܳܐ ܒܟܰܪܣܳܗ̇ ܕܶܐܡܶܗ ܘܰܥܢܳܬ ܘܶܐܡܪܰܬ܆ ܡܒܰܪܰܟܬܳܐ ܐܰܢ̱ܬܝ܆ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ܀

ܒܚܰܕܘܳܐ ܪܰܒܳܐ ܕܳܨ ܗ̱ܘܳܐ܆ ܟܳܪܽܘܙ ܩܽܘܫܬܳܐ ܒܟܰܪܣܳܗ̇ ܕܶܐܡܶܗ܆ ܠܽܘܩܒܰܠ ܡܳܪܶܗ ܕܶܐܬܳܐ ܗ̱ܘܳܐ ܕܢܶܣܥܽܘܪ ܥܰܒܕܶܗ܆ ܫܽܘܒܚܳܐ ܠܪ̈ܰܚܡܰܘܗ̱ܝ܆ ܕܶܐܬܬܰܚܬܺܝ ܡܶܛܽܠܳܬܰܢ܀

ܡܳܐ ܫܰܦܺܝܪ ܗ̱ܘܳܐ ܠܡܰܪܝܰܡ܆ ܟܰܕ ܣܶܠܩܰܬ ܗ̱ܘܳܬ ܠܛܽܘܪܳܐ ܕܺܝܗܽܘܕ܆ ܘܫܶܐܠܰܬ ܫܠܳܡܳܗ̇ ܕܶܐܠܺܝܫܒܰܥ ܒܰܪ̱ܬ ܠܶܘܳܝ̈ܶܐ܆ ܘܰܒܪܽܘܚ ܩܽܘܕܫܳܐ܆ ܕܳܨ ܥܽܘܠܳܐ ܠܽܘܩܒܰܠ ܡܳܪܶܗ܀

ܡܰܢ ܢܶܬܶܠ ܠܺܝ ܕܶܐܡܶܗ܆ ܕܡܳܪܝ ܬܺܐܬܶܐ ܠܘܳܬܝ ܐܶܡܪܰܬ ܥܩܰܪܬܳܐ܆ ܘܡܳܪܳܐ ܠܥܰܒܕܶܗ ܒܓܰܘ ܒܰܝܬܶܗ ܢܺܐܬܶܐ ܢܶܣܥܽܘܪ܆ ܣܳܓܕܳܐ ܐ̱ܢܳܐ ܠܶܗ܆ ܠܝܰܠܕܳܐ ܕܰܫܪܳܐ ܒܓܰܘ ܥܽܘܒܶܟܝ܀

ܫܽܘܒܚܳܐ

ܛܽܘܒܳܐ ܪܰܒܳܐ ܢܶܬܠܳــ̈ـܢ܆ ܟܽܠ ܫܰܪ̈ܒܳܬܳܐ ܕܺܐܝܬ ܥܰܠ ܐܰܪܥܳܐ܆ ܠܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ ܕܰܕܢܰܚ ܡܶܢܳܗ̇܆ ܡܳܪܝܳܐ ܡܫܺܝܚܳܐ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܳܐ ܢܚܰܦܽܘܢ ܡܳܪܝ ܡܽܘ̈ܡܰܝ

ܚܰܕܽܘܬܳܐ ܪܰܒܬܳܐ ܗܘܳܬ ܒܺܝܗܽܘܕ܆ ܒܒܰܝܬܶܗ ܕܰܙܟܰܪܝܳܐ ܟܳܗܢܳܐ܆ ܟܰܕ ܥܶܠܰܬ ܡܰܪܝܰܡ ܒܰܪ̱ܬ ܕܰܘܺܝܕ܆ ܘܫܶܐܠܰܬ ܫܠܳܡܳܗ̇ ܕܶܐܠܺܝܫܒܰܥ܆ ܕܳܨ ܝܽܘܚܰܢܳܢ ܒܓܰܘ ܟܰܪܣܳܐ܆ ܕܶܐܬܳܐ ܠܶܗ ܡܳܪܶܗ ܨܶܐܕܰܘܗ̱ܝ܆ ܫܶܐܠ ܒܰܫܠܳܡܶܗ ܘܶܐܡܰܪ ܠܶܗ܆ ܬܳܐ ܒܰܫܠܳܡ ܕܳܡܶܐ ܠܰܐܒܽܘܗ̱ܝ܆ ܡܳܪܳܐ ܕܪܰܘܡܳܐ ܘܰܕܥܽܘܡܩܳܐ܀

ܫܽܘܒܚܳܐ

ܛܥܶܢܬܶܗ ܡܰܪܝܰܡ ܠܰܛܥܺܝܢ ܟܽܠ܆ ܘܶܐܙܰܠ̱ܬ ܕܬܶܫܰܐܠ ܒܰܫܠܳܡܳܗ̇܆ ܕܶܐܠܺܝܫܒܰܥ ܐܶܡܶܗ ܕܝܽܘܚܰܢܳܢ܆ ܦܺܐܪܳܐ ܕܰܗܘܳܐ ܠܰܥܩܰܪܬܳܐ܆ ܥܶܠܰܬ ܠܒܰܝܬܶܗ ܕܰܙܟܰܪܝܳܐ܆ ܘܫܶܐܠܰܬ ܫܠܳܡܳܗ̇ ܕܶܐܠܺܝܫܒܰܥ܆ ܘܶܐܬܡܰܠܝܰܬ ܪܽܘܚܳܐ ܕܩܽܘܕܫܳܐ܆ ܘܶܐܡܪܰܬ ܕܰܒܪܺܝܟܽ ܗ̱ܘ ܡܳܪܝܳܐ܆ ܕܶܐܬܳܐ ܕܢܶܣܥܽܘܪ ܝܳܪܬܽܘܬܶܗ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܥܺܝ ܚܰܛܳܝܳܐ ܫܽܘܒܩܳܢܳܐ ܡܶܢ ܐܰܠܳܗܳܐ

ܐܶܙܰܠ̱ܬ ܡܰܪܝܰܡ܆ ܛܽܘܒܳܢܺܝܬܳܐ ܒܰܪ̱ܬ ܕܰܘܺܝܕ܆ ܝܰܘܡܳܢܳܐ ܠܛܽܘܪܳܐ ܕܺܝܗܽܘܕ܆ ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ܆ ܘܰܛܥܺܝܢܳܐ ܒܥܽܘܒܳܗ̇ ܕܰܟܝܳܐ܆ ܠܶܐܡܪܶܗ ܚܰܝ݂ܳܐ ܕܰܐܠܳܗܳܐ܆ ܗܰܘ ܕܰܒܪܶܡܙܶܗ ܡܕܰܒܰܪ ܟܽܠ܆ ܘܰܛܥܺܝܢ ܠܰܐܪܥܳܐ ܘܠܰܫܡܰܝܳܐ܆ ܫܽܘܒܚܳܐ ܠܶܗ ܕܰܒܝܰܕ ܪ̈ܰܚܡܰܘܗ̱ܝ܆ ܐܶܬܳܐ ܕܢܶܣܥܽܘܪ ܟܳܪܽܘܙܶܗ܀

ܫܽܘܒܚܳܐ

ܪܽܘܚܳܐ ܕܩܽܘܕܫܳܐ܆ ܐܶܬܡܰܠܝܰܬ ܗ̱ܘܳܬ ܐܶܠܺܝܫܒܰܥ܆ ܘܰܒܩܳܠܳܐ ܪܳܡܳܐ ܐܶܡܪܰܬ܆ ܠܰܒܬܽܘܠܬܳܐ ܕܟܺܝܬܳܐ ܡܰܪܝܰܡ܆ ܕܰܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ܆ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ܆ ܡܶܢ ܐܰܝܡܶܟܳܐ ܠܺܝ ܗܳܕܶܐ܆ ܕܡܳܪܝ ܘܶܐܡܶܗ ܐܶܬܰܘ ܨܶܐܕܰܝ܆ ܫܽܘܒܚܳܐ ܠܶܗ ܠܒܰܪ ܥܰܬܺܝܪܳܐ܆ ܕܶܐܬܳܐ ܕܢܶܣܥܽܘܪ ܟܳܪܽܘܙܶܗ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܢܶܚܕܶܐ ܛܽܘܪܳܐ ܕܨܶܗܝܽܘܢ: ܘܰܢܕܽܘ̈ܨܳܢ ܒܢ̈ܳܬ ܝܺܗܽܘܕܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܨܠܽܘܬܟܶܝܢ ܥܰܡܰܢ ܐܳܘ ܡܒܰܪ̈ܟܳܬܳܐ ܨܠܽܘܬܟܶܝܢ ܥܰܡܰܢ܆

ܠܰܨ̈ܠܰܘܳܬܟܶܝܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܝܶܠܦܰܬ ܡܰܪܝܰܡ ܐ̱ܪܳܙܳܐ ܟܰܣܝܳܐ ܗܺܝ ܒܰܠܚܽܘܕܶܝܗ̇܆ ܘܰܠܐ̱ܢܳܫ ܠܳܐ ܓܠܳܬ ܡܽܘܢ ܕܶܐܬܡܰܠܰܠܝ̈ ܡܶܢ ܡܰܠܰܐܟܳܐ܆ ܟܰܕ ܥܶܠܰܬ ܗ̱ܘܳܬ ܨܶܝܕ ܐܶܠܺܝܫܒܰܥ ܒܰܪ̱ܬ ܠܶܘܳܝ̈ܶܐ܆ ܫܡܰܥܬܶܗ ܠܐ̱ܪܳܙܳܐ ܕܰܓܠܶܐ ܘܰܒܓܺܝܠ ܒܒܰܝܬܶܗ ܕܟܳܗܢܳܐ܀

ܠܳܟ ܬܶܫܒܽܘܚܬܳܐ ܒܰܪ ܐܰܠܳܗܳܐ ܕܰܗܘܰܝܬ ܐ̱ܢܳܫܳܐ܆ ܘܰܠܒܰܪ ܥܰܩܪ̈ܶܐ ܐܶܙܰܠ̱ܬ ܕܬܶܣܥܽܘܪ ܒܟܰܪܣܳܐ ܕܶܐܡܶܗ܆ ܢܶܩܥܽܘܢ ܟܳܗ̈ܢܶܐ ܥܰܡ ܠܶܘܳܝ̈ܶܐ ܒܪܺܝܟ ܐܺܝܩܳܪܳܟ܆ ܘܥܺܕܰܬ ܩܽܘܕܫܳܐ ܥܰܡ ܐܶܠܺܝܫܒܰܥ ܫܽܘܒܚܳܐ ܬܶܙܡܰܪ܀

ܒܰܨ̈ܠܰܘܳܬܟܶܝܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܶܝܢ ܒܗܰܝܡܳܢܽܘܬܳܐ܀