ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܠܥܳܠܰܡ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܡܰܪܟܰܒܬܳܐ ܕܰܓܒܳܐ ܡܳܪܝܳܐ܆ ܕܢܶܚܽܘܬ ܢܶܫܪܶܐ ܒܥܽܘܒܳܗ̇ ܕܰܟܝܳܐ܆ ܗܰܠܟܰܬ ܗ̱ܘܳܬ ܒܰܒܛܺܝܠܽܘܬܳܐ܆ ܕܬܶܚܙܶܐ ܠܗܳܝ ܥܩܰܪܬܳܐ ܐ̱ܚܝܳܢܬܳܗ̇܆ ܕܬܶܗܘܶܐ ܣܳܗܕܳܐ ܥܰܩܪܽܘܬܳܐ܆ ܠܰܒܬܽܘܠܽܘܬܳܐ ܡܨܰܒܰܬܬܳܐ܆ ܕܰܕܠܳܐ ܙܽܘܘܳܓܳܐ܆ ܛܥܺܝܢܳܐ ܠܶܗ ܠܒܰܪ ܐܰܠܳܗܳܐ܀

ܫܽܘܒܚܳܐ

ܐܶܡܪܰܬ ܡܰܪܝܰܡ ܒܚܰܕܽܘܬܳܐ܆ ܕܢܰܦܫܳܐ ܕܺܝܠܝ ܡܰܘܪܒܳܐ ܠܡܳܪܶܐ ܟܽܠ܆ ܕܰܨܒܳܐ ܕܰܒܡܽܘܟܳܟܝ ܢܶܫܪܶܐ܆ ܕܥܶܠܳܝ̈ܶܐ ܪܳܬܺܝܢ ܡܶܢܶܗ܆ ܥܒܰܕ ܛܰܝܒܽܘܬܳܐ ܥܰܡ ܐܳܕܳܡ܆ ܘܰܢܚܶܬ ܠܰܒܫܶܗ ܡܶܢ ܟܰܪܣܳܐ܆ ܫܽܘܒܚܳܐ ܠܪܰܒܽܘܬܶܗ܆ ܘܛܽܘܒܰܝ ܠܺܝ ܕܰܗܘܺܝܬ ܐܶܡܶܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܰܨܶܕ ܗܰܘܢܳܟ ܚܰܟܺܝܡܳܐ ܕܠܳܐ ܢܶܦܗܶܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܘܶܐܠܺܝܫܒܰܥ܆

ܒܰܨܠܽܘܬܗܶܝܢ ܘܰܒܒܳܥ̈ܘܳܬܗܶܝܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܟܰܕ ܕܶܝܢ ܫܶܡܥܰܬ ܐܶܠܺܝܫܒܰܥ܆ ܠܰܫܠܳܡܳܗ̇ ܕܡܰܠܝܰܬ ܩܽܘܕܫܳܐ܆ ܕܳܨ ܗ̱ܘܳܐ ܥܽܘܠܳܐ ܒܓܰܘ ܟܰܪܣܳܗ̇܆ ܕܢܶܦܽܘܩ ܠܰܫܠܳܡܳܐ ܕܡܳܪܶܗ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܰܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ܆ ܘܰܠܥܰܒܕܶܗ ܒܰܪ ܥܰܩܪܽܘܬܳܐ܆ ܣܰܥܪܶܗ ܒܟܰܪܣܳܐ ܕܝܳܠܶܕܬܶܗ܆ ܘܠܰܐܒܳܐ ܕܫܰܠܚܶܗ ܬܰܘܕܺܝܬܳܐ܆ ܘܰܠܪܽܘܚ ܩܽܘܕܫܳܐ ܗܽܘܠܳܠܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܘܶܐܠܺܝܫܒܰܥ܆

ܒܰܨܠܽܘܬܗܶܝܢ ܘܰܒܒܳܥ̈ܘܳܬܗܶܝܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܡܶܙܰܠܬܳܗ̇ ܕܰܒܬܽܘܠܬܳܐ ܡܰܪܝܰܡ ܨܶܝܕ ܐܶܠܺܝܫܒܰܥ