ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܐܶܬܺܝܠܶܕ ܩܳܠܳܐ ܠܡܶܠܬܳܐ ܫܡܰܝܳܢܳܐ܆ ܘܰܨܡܰܚ ܟܰܘܟܒܳܐ ܠܕܶܢܚܳܐ ܕܡܶܢ ܪܰܘܡܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܝܽܘܚܰܢܳܢ ܫܪܳܐ ܠܫܶܬܩܶܗ ܕܰܙܟܰܪܝܳܐ܆ ܘܰܐܘܕܺܝ ܒܪܽܘܚܳܐ ܠܡܳܪܶܗ ܕܝܽܘܚܰܢܳܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܠܡܳܪܶܗ ܒܟܰܪܣܳܐ ܕܶܐܡܶܗ ܚܙܳܐ܆ ܘܰܠܠܶܫܳܢܶܗ ܕܰܐܒܽܘܗ̱ܝ ܒܝܰܠܕܶܗ ܫܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܝܽܘܡ ܡܰܘܠܳܕܳܟ ܟܳܪܽܘܙܳܐ ܕܩܽܘܫܬܳܐ܆ ܟܽܠܰܢ ܢܶܫܬܪܶܐ ܡܶܢ ܦܟܳܪ̈ܶܐ ܕܚܰܘ̈ܒܰܝܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܝܽܘܡ ܡܰܘܠܳܕܶܗ ܕܓܰܒܝܳܐ ܝܽܘܚܰܢܳܢ܆ ܕܢܰܘܕܶܐ ܠܛܰܝܒܽܘܬܳܟ ܝܰܠܕܳܐ ܕܡܶܢ ܡܰܪܝܰܡ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܫܺܝܚܳܐ ܕܝܰܗ̱ܒ ܠܳܗ̇ ܦܺܐܪܳܐ ܠܥܰܩܪܽܘܬܳܐ܆ ܗܰܒܠܰܢ ܫܰܝܢܳܐ ܕܢܰܘܕܶܐ ܠܛܰܝܒܽܘܬܳܟ܆ ܪܰܚܶܡܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܥܩܰܪܬܳܐ ܝܶܠܕܰܬ ܟܳܪܽܘܙܳܐ܆ ܕܢܰܬܩܶܢ ܐܽܘܪܚܳܐ ܩܕܳܡ ܡܳܪܶܗ܆ ܘܰܐܒܽܘܗ̱ܝ ܟܳܗܢܳܐ ܕܶܐܫܬܰܬܰܩ܆ ܐܶܫܬܪܺܝ ܐܶܣܳܪ ܠܶܫܳܢܶܗ܀

ܥܩܰܪܬܳܐ ܚܕܳܬ ܒܦܺܐܪܳܐ ܕܝܶܠܕܰܬ܆ ܙܟܰܪܝܳܐ ܡܰܘܕܶܐ ܘܰܡܫܰܒܰܚ܆ ܘܰܒܪܽܘܚܳܐ ܡܢܰܨܰܪ ܗ̱ܘܳܐ ܠܶܗ܆ ܕܰܢܒܺܝܶܗ ܐܰܢ̱ܬ ܕܥܶܠܳܝܳܐ܀

ܐܰܢ̱ܬ ܗ̱ܽܘ ܛܰܠܝܳܐ ܐܺܝܙܓܰܕܶܗ. ܕܥܶܠܳܝܳܐ ܘܰܡܣܰܒܪܳܢܶܗ܆ ܘܡܰܬܩܶܢ ܫܒܺܝܠܳܐ ܠܰܐܠܳܗܳܐ܆ ܐܰܟܡܳܐ ܕܶܐܡܰܪ ܐܶܫܰܥܝܳܐ܀

ܒܪܳܐ ܕܶܐܬܳܐ ܠܒܰܛܢܳܐ ܘܝܰܠܕܳܐ܆ ܘܠܰܫܠܳܡܳܐ ܕܒܰܪ ܠܶܘܳܝ̈ܶܐ܆ ܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܫܰܠܺܝܛ ܗ̱ܽܘ ܪܶܡܙܶܗ ܕܰܒܪܶܟܝ܆ ܥܰܠ ܥܽܘ̈ܠܶܐ ܕܰܒܟܰܪ̈ܣܳܬܳܐ܆ ܕܟܰܕ ܚܙܳܝܗ̱ܝ ܗ̱ܘܳܐ ܥܽܘܠܳܐ ܕܰܒܥܽܘܒܶܟܝ܆ ܕܳܨ ܠܽܐܘܪܥܶܗ ܘܰܣܓܶܕ ܩܽܘܕܡܰܘܗ̱ܝ܀

ܫܽܘܒܚܳܐ

ܡܶܢ ܟܽܠ ܠܳܟ ܡܳܪܝ ܬܶܫܒܽܘܚܬܳܐ܆ ܡܶܠܬܳܐ ܕܰܕܢܰܚ ܡܶܢ ܐܰܒܳܐ܆ ܘܰܐܦܢܺܝ ܗ̱ܘܳܐ ܠܥܰܡ̱̈ܡܶܐ ܕܰܛܥܶܝܢ܆ ܡܶܢ ܬܰܘܫܳܐ ܕܰܦܬܰܟܪܽܘܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܥܺܕܬܳܐ ܩܰܕܺܝܫܬܳܐ܆ ܡܟܺܝܪܬܶܗ ܕܰܡܫܺܝܚܳܐ܆ ܕܶܐܬܡܰܟܪܰܬ ܒܺܐܝ̈ܕܰܝ܆ ܝܰܠܕܳܗ̇ ܕܥܰܩܪܽܘܬܳܐ. ܐܰܘܕܳܝ ܐܳܦ ܫܰܒܰܚܝ܆ ܠܝܶܫܽܘܥ ܦܳܪܽܘܩܰܢ܆ ܕܚܰܕܺܝ ܠܰܙܟܰܪܝܳܐ܆ ܘܰܐܦܨܰܚ ܠܶܐܠܺܝܫܒܰܥ܀

ܚܰܕ ܦܺܐܪܳܐ ܕܝܶܠܕܰܬ܆ ܥܩܰܪܬܳܐ ܐܶܠܺܝܫܒܰܥ܆ ܡܶܢ ܙܟܰܪܝܳܐ ܟܳܗܢܳܐ܆ ܒܪܶܡܙܶܗ ܕܡܳܪܶܗ ܟܽܠ. ܗ̣ܘܳܐ ܗ̱ܘܳܐ ܠܳܗ̇ ܠܥܺܕܬܳܐ܆ ܟܳܪܽܘܙܳܐ ܡܫܰܒܚܳܐ܆ ܘܚܰܝ̈ܶܐ ܙܪܰܥ ܒܶܐܕܢܶܝ̈ܗ̇܆ ܘܡܰܟܪܳܗ̇ ܠܰܡܫܺܝܚܳܐ܀

ܙܟܰܪܝܳܐ ܕܶܐܫܬܰܬܰܩ܆ ܝܰܒܶܒ ܬܶܫܒܽܘܚܬܳܐ܆ ܠܡܳܪܝܳܐ ܗܰܘ ܕܶܐܬܳܐ܆ ܘܫܰܡܠܺܝ ܣܽܘܟܳܝܶܗ. ܘܥܰܒܕܶܗ ܠܝܽܘܚܰܢܳܢ܆ ܟܳܪܽܘܙܳܐ ܕܩܽܘܫܬܳܐ. ܒܪܺܝܟܽ ܗ̱ܘ ܕܰܓܒܳܝܗ̱ܝ܆ ܡܶܢ ܟܰܪܣܳܐ ܕܶܐܡܶܗ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܬܕܰܡܝܰܬ ܡܰܠܟܽܘܬ ܪܰܘܡܳܐ

ܒܪܺܝܟܽ ܗ̱ܘ ܝܰܠܕܳܐ ܕܕܽܘܡܳܪܳܐ܆ ܕܚܰܕ̱̈ܬܳܬܳܐ ܣܥܰܪ ܒܰܒܪܺܝܬܳܐ܆ ܘܰܢܣܰܟ ܘܰܡܠܳܝܗ̱ܝ ܪܽܘܚܩܽܘܕܫܳܐ܆ ܠܝܽܘܚܰܢܳܢ ܒܟܰܪܣܳܐ ܕܶܐܡܶܗ܆ ܘܰܦܬܰܚ ܦܽܘܡܶܗ ܕܰܙܟܰܪܝܳܐ܆ ܕܶܐܫܬܰܬܰܩ ܗ̱ܘܳܐ ܡܶܛܽܠ ܦܽܘܠܳܓܳܐ܆ ܘܶܐܫܬܰܠܰܛ ܥܰܠ ܟܰܣ̈ܝܳܬܳܐ܆ ܘܶܐܬܢܰܒܺܝ ܒܪܽܘܚܳܐ ܕܩܽܘܕܫܳܐ܆ ܫܽܘ݉ܒܚܳܐ ܠܺܝܚܺܝܕܳܐ܆ ܕܰܣܥܰܪ ܠܰܐܪܥܳܐ ܒܥܽܘܕܪ̈ܳܢܰܘܗ̱ܝ܆ ܘܡܶܢ ܥܽܘܒܳܐ ܒܬܽܘܠܳܐ ܕܢܰܚ ܠܰܢ܆ ܟܰܕ ܐܰܠܳܗܰܐ ܗ̱ܘ ܘܪܰܘܡܳܐ ܘܥܽܘܡܩܳܐ ܡܠܶܝܢ ܡܶܢܶܗ܀

ܫܽܘܒܚܳܐ

ܥܩܰܪܬܳܐ ܝܶܠܕܰܬ ܐܺܝܙܓܰܕܳܐ܆ ܡܰܬܩܶܢ ܐܽܘܪܚܳܐ ܩܕܳܡ ܡܳܪܶܗ܆ ܘܰܐܒܽܘܗ̱ܝ ܟܳܗܢܳܐ ܕܶܐܫܬܰܬܰܩ܆ ܡܪܺܝܡ ܩܳܠܶܗ ܥܰܠ ܬܰܘܕܺܝܬܳܐ܆ ܘܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܒܶܗ ܐܶܬܦܰܢܝܰܬ ܠܽܐܘܪܚܳܐ ܕܰܫܪܳܪܳܐ܆ ܕܰܐܟܪܶܙ ܠܳܗ̇ ܥܰܠ ܝܺܚܺܝܕܳܐ܆ ܡܶܠܬܶܗ ܕܰܐܒܳܐ ܫܡܰܝܳܢܳܐ܆ ܘ݉ܥܶܠܰܬ ܒܰܩܝܳܡܳܐ܆ ܕܬܶܛܰܪ ܢܰܦܫܳܗ̇ ܕܰܟܝܳܐܺܝܬ܆ ܘܡܶܢ ܓܰܘ ܡܰܝ̈ܳܐ ܐܶܬܡܰܟܪܰܬ ܕܠܳܐ ܬܶܫܬܛܶܐ ܒܕܶܚ̈ܠܳܬܳܐ ܢܽܘܟܪ̈ܳܝܳܬܳܐ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܗܳܐ ܡܰܠܟܽܘܬܳܐ ܠܓܰܘ ܡܶܢܳܟ

ܕܳܨ ܛܳܒ ܘܰܚܕܺܝ܆ ܙܟܰܪܝܳܐ ܟܳܗܢܳܐ ܒܝܽܘܡ ܝܰܠܕܶܗ܆ ܕܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܘܰܡܠܶܐ ܦܽܘܡܶܗ ܬܰܘܕܺܝܬܳܐ܆ ܕܶܐܫܬܪܺܝ ܐܶܣܳܪ ܠܶܫܳܢܶܗ܆ ܕܰܐܣܪܶܗ ܥܺܝܪܳܐ ܒܦܽܘܩܕܳܢܶܗ܆ ܕܗܰܘ ܕܶܐܬܺܝܠܶܕ ܟܳܪܽܘܙܰܐ ܗ̱ܘ܆ ܕܡܶܠܬܶܗ ܕܰܐܒܳܐ ܫܡܰܝܳܢܳܐ܆ ܕܰܡܚܰܘܶܐ ܐܽܘܪܚܳܐ ܕܚܰܝ̈ܶܐ܆ ܠܥܰܡ̱̈ܡܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ܀

ܫܽܘܒܚܳܐ

ܒܛܽܘܪܳܐ ܕܺܝܗܽܘܕ܆ ܚܰܕ̱̈ܬܳܬܳܐ ܒܶܗ ܐܶܣܬܥܰܪ̈ܝ ܗ̱ܘܰܝ̈܆ ܟܰܕ ܐܶܬܺܝܠܶܕ ܝܽܘܚܰܢܳܢ܆ ܠܰܙܟܰܪܝܳܐ ܟܳܗܢܳܐ ܙܰܗܝܳܐ܆ ܘܣܶܠܩܰܬ ܬܰܡܳܢ ܬܶܫܒܽܘܚܬܳܐ܆ ܘܚܰܕܽܘܬܳܐ ܘܰܦܨܺܝܚܽܘܬܳܐ܆ ܘܚܶܕܝܰܬ ܥܩܰܪܬܳܐ ܒܰܪ̱ܬ ܐܰܗܪܽܘܢ܆ ܕܶܐܫܬܰܡܠܺܝ ܗ̱ܘܳܐ ܣܽܘܟܳܝܳܗ̇܆ ܒܪܺܝܟܽ ܗ̱ܘ ܕܚܰܕܺܝ ܠܰܥܩܰܪܬܳܐ܆ ܒܡܰܘܠܳܕܶܗ ܕܟܳܪܽܘܙ ܩܽܘܫܬܳܐ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܥܩܰܪܬܳܐ ܝܶܠܕܰܬ ܘܣܶܒܥܰܬ܆ ܘܣܰܓܺܝܰܐܬ ܒܢܰܝ̈ܳܐ ܨܶܕܝܰܬ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ ܕܠܺܠܝܳܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܫܡܰܥܘ ܗ̱ܘܰܘ ܫܒܳܒܶܝ̈ܗ̇ ܘܰܒ̈ܢܰܝ ܓܶܢܣܳܗ̇ ܐܳܦ ܩܰܪ̈ܺܝܒܶܝܗ̇܆ ܘܰܐܣܓܺܝܘ ܘܫܰܒܰܚܘ ܕܰܣܥܰܪ ܡܳܪܝܳܐ ܚܢܳܢܶܗ ܥܰܡܗܽܘܢ܆ ܚܶܕܝܰܬ ܝܺܗܽܘܕ ܕܳܨܰܬ ܥܩܰܪܬܳܐ ܐܰܘܕܺܝ ܙܟܰܪܝܳܐ܆ ܘܶܐܬܦܬܰܚ ܦܽܘܡܶܗ ܘܫܰܪܺܝ ܙܳܡܰܪ ܩܳܠܰܝ̈ ܫܽܘܒܚܳܐ܀

ܫܽܘܒܚܳܐ ܠܰܐܒܳܐ ܕܚܰܕܺܝ ܠܥܰܩܪ̈ܶܐ ܒܝܰܕ ܝܽܘܚܰܢܳܢ܆ ܣܶܓܕܬܳܐ ܠܰܒܪܳܐ ܕܫܰܕܪܶܗ ܩܳܠܳܐ ܕܢܰܟܪܶܙ ܩܽܘܕܡܰܘܗ̱ܝ܆ ܬܰܘܕܺܝ ܠܪܽܘܚܳܐ ܕܡܶܢ ܓܰܘ ܟܰܪܣܳܐ ܕܶܐܡܶܗ ܩܰܕܫܶܗ܆ ܒܪܺܝܟܽ ܗ̱ܘ ܕܢܰܨܚܶܗ ܘܰܥܠܰܝܢ ܪ̈ܰܚܡܶܐ ܒܰܨܠܰܘ̈ܳܬܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀