ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܰܘ ܕܶܐܬܬܰܚܬܺܝ ܒܚܽܘܒܶܗ܆ ܘܶܐܬܳܐ ܕܢܶܦܪܽܘܩ ܒܶܪ̈ܝܳܬܳܐ܆ ܫܰܝܶܢ ܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܨܠܺܝܒܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟܽ ܗ̱ܘ ܡܳܪܝܳܐ ܕܫܰܕܰܪ܆ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܘܫܰܪܪܶܗ ܠܝܰܘܣܶܦ܆ ܥܰܠ ܒܰܛܢܳܗ̇ ܕܡܰܪܝܰܡ ܒܬܽܘܠܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܥܢܳܐ ܓܰܒܪܺܐܶܝܠ ܘܶܐܡܰܪ܆ ܐܳܘ ܠܳܟ ܝܰܘܣܶܦ ܒܰܪ ܕܰܘܺܝܕ܆ ܠܳܐ ܓܶܝܪ ܬܶܕܚܰܠ܆ ܕܰܠܡܰܪܝܰܡ ܡܟܺܝܪܬܳܟ ܬܶܣܰܒ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟܽ ܗ̱ܘ ܡܳܪܝܳܐ ܕܰܓܒܳܟܝ܆ ܘܩܰܕܫܶܟܝ ܘܰܐܘܪܶܒ ܕܽܘܟܪܳܢܶܟܝ܆ ܒܬܽܘܠܬܳܐ ܡܰܪܝܰܡ܆ ܐܶܡܳܐ ܕܟܺܝܬܳܐ ܕܠܳܐ ܛܽܘܠܫܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܰܡܫܳܐ ܐܶܬܚܰܫܰܒ ܝܰܘܣܶܦ܆ ܕܢܶܫܪܶܝܗ̇ ܗ̱ܘܳܐ ܠܰܡܒܰܪܰܟܬܳܐ܆ ܥܺܝܪܳܐ ܒܠܺܠܝܳܐ܆ ܥܒܰܕ ܬܰܢܘܰܝ ܥܰܠ ܬܰܪܥܽܘܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܶܝܢ ܕܰܫܪܳܐ ܒܥܽܘܒܳܗ̇܆ ܡܶܢ ܪܽܘܚܳܐ ܕܩܽܘܕܫܳܐ ܐܺܝܬܰܘܗ̱ܝ܆ ܬܺܐܠܰܕ ܕܶܝܢ ܒܪܳܐ܆ ܘܳܐܦ ܬܶܩܪܶܐ ܠܰܫܡܶܗ ܝܶܫܽܘܥ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܒܪܳܐ ܕܰܒܚܽܘܒܶܗ ܐܶܬܬܰܚܬܺܝ܆ ܘܰܠܒܶܫ ܦܰܓܪܳܐ ܕܐ̱ܢܳܫܽܘܬܰܢ܆ ܘܶܐܣܬܰܒܰܪ ܗ̱ܘܳܐ ܡܶܢ ܥܺܝܪܳܐ܆ ܒܰܛܢܶܗ ܠܰܒܬܽܘܠܬܳܐ ܡܰܪܝܰܡ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܒܪܳܐ ܕܨܳܪܽܘܗ̱ܝ ܢܒܺܝ̈ܶܐ ܟܽܠܗܽܘܢ܆ ܒܐ̱ܪ̈ܳܙܰܝܗܽܘܢ ܡܰܠ̈ܝܰܝ ܬܶܗܪܳܐ܆ ܘܶܐܬܳܐ ܘܫܰܡܠܺܝ ܡܶܠܰܝ̈ܗܽܘܢ܆ ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܐܰܠܳܗܳܐ ܣܰܓܺܝ ܪ̈ܰܚܡܶܐ܆ ܕܫܰܪܪܶܗ ܠܝܰܘܣܶܦ ܥܰܠ ܒܰܛܢܶܗ܆ ܫܰܪܰܪ ܠܰܢ ܒܗܰܝܡܳܢܽܘܬܳܐ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܗܰܘ ܕܺܝܠܺܝܕ ܕܠܳܐ ܫܽܘܪܳܝܳܐ܆ ܡܶܢ ܐܰܒܳܐ ܓܢܺܝܙܳܐ ܕܰܠܥܶܠ܆ ܨܒܳܐ ܘܶܐܬܺܝܠܶܕ ܡܶܢ ܡܰܪܝܰܡ܆ ܘܪܰܡܪܶܡ ܘܰܐܘܪܶܒ ܕܽܘܟܪܳܢܳܗ̇܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܢܚܶܬ ܗ̱ܘܳܐ ܥܺܝܪܳܐ ܡܶܢ ܪܰܘܡܳܐ܆ ܘܫܰܪܪܶܗ ܗ̱ܘܳܐ ܠܝܰܘܣܶܦ ܘܗܳܟܰܢ ܐܶܡܰܪ ܠܶܗ܆ ܠܳܐ ܬܶܬܦܰܠܰܓ ܐܳܘ ܟܺܐܢܳܐ܆ ܥܰܠ ܒܰܛܢܳܗ̇ ܕܰܡܒܰܪܰܟܬܳܐ܆ ܕܗܰܘ ܕܰܫܪܶܐ ܒܳܗ̇ ܩܰܕܺܝܫܰܐ ܗ̱ܘ܆ ܘܦܳܪܽܘܩܳܐ ܕܟܽܠܶܗ ܥܳܠܡܳܐ܀

ܬܶܗܪܳܐ ܪܰܒܳܐ ܚܙܺܝܬ ܐܰܚ̈ܰܝ܆ ܒܓܰܘ ܢܳܨܪܰܬ ܕܰܓܠܺܝܠܳܐ ܘܣܰܓܺܝ ܐܶܬܕܰܡܪܶܬ܆ ܒܬܽܘܠܬܳܐ ܕܠܳܐ ܚܰܟܡܳܗ̇ ܓܰܒܪܳܐ܆ ܘܒܰܛܢܳܐ ܘܰܢܛܺܝܪܺܝܢ ܒܬܽܘ̈ܠܶܝܗ̇܆ ܘܝܰܘܣܶܦ ܓܰܒܪܳܗ̇ ܟܰܕ ܫܰܬܺܝܩ܆ ܘܡܶܬܦܰܠܰܓ ܡܶܛܽܠ ܒܰܛܢܳܗ̇܀

ܐܳܡܪܳܐ ܠܶܗ ܡܰܪܝܰܡ ܠܝܰܘܣܶܦ܆ ܫܡܰܥܰܝܢܝ ܐܳܘ ܟܺܐܢܳܐ ܘܰܐܫܰܪ ܡܽܘܢ ܕܳܐܡܪܳܢ܆ ܕܠܳܐ ܪܓܺܝܫܳܐ ܐ̱ܢܳܐ ܒܙܽܘܘܳܓܳܐ܆ ܠܳܐ ܐܰܠܳܗܳܐ ܕܰܐܒܳܗܰܝ̈ܢ܆ ܘܢܶܩܦܳܐ ܕܓܰܒܪܳܐ ܠܳܐ ܚܟܺܝܡ ܠܺܝ܆ ܘܣܳܗܶܕ ܠܺܝ ܥܺܝܪܳܐ ܕܣܰܒܪܰܢܝ܀

ܫܰܦܺܝܪ ܗ̱ܘܳܐ ܠܶܗ ܠܡܰܠܰܐܟܳܐ܆ ܟܰܕ ܢܚܶܬ ܗ̱ܘܳܐ ܒܠܺܠܝܳܐ ܘܩܳܡ ܠܶܗ ܥܰܠ ܥܰܪܣܶܗ܆ ܕܝܰܘܣܶܦ ܟܺܐܢܳܐ ܘܶܐܡܰܪ ܠܶܗ܆ ܡܶܛܽܠ ܒܰܛܢܳܗ̇ ܕܰܒܬܽܘܠܬܳܐ܆ ܕܰܒܪܶܗ ܕܥܶܠܳܝܳܐ ܐܺܝܬܰܘܗ̱ܝ܆ ܕܰܒܚܽܘܒܶܗ ܨܒܳܐ ܕܢܶܦܪܽܘܩ ܥܳܠ̈ܡܶܐ܀

ܐܳܘ ܕܰܦܠܺܝܓܺܝܢ ܥܰܠ ܝܰܠܕܳܐ܆ ܗܰܘ ܝܺܚܺܝܕܳܝܳܐ ܕܡܶܢ ܒܬܽܘܠܬܳܐ ܡܰܪܝܰܡ܆ ܐܶܫܬܰܪܰܪܘ ܒܗܰܝܡܳܢܽܘܬܳܐ܆ ܕܨܶܡܚܰܐ ܗ̱ܘ ܡܬܽܘܡܳܝܶܗ ܕܰܐܒܳܐ܆ ܐܰܝܟ ܝܰܘܣܶܦ ܕܶܐܫܬܰܪܰܪ܆ ܥܰܠ ܒܰܛܢܶܗ ܕܡܶܢ ܪܽܘܚܳܐ ܕܩܽܘܕܫܰܐ ܗ̱ܘ܀

ܓܥܳܬ ܗ̱ܘܳܬ ܡܰܪܝܰܡ ܒܰܚܢܰܓܬܳܐ܆ ܘܰܠܘܳܬ ܝܺܚܺܝܕܳܗ̇ ܗܳܟܰܢ ܐܶܡܪܰܬ ܗ̱ܘܳܬ܆ ܬܳܐ ܠܺܐܝܳܠܝ ܥܰܡܰܢܽܘܐܶܝܠ܆ ܥܰܕܰܪܶܝܗ̇ ܡܳܪܝ ܠܰܡܚܺܝܠܽܘܬܝ܆ ܕܗܳܐ ܝܽܘܕܳܝ̈ܶܐ ܥܳܫܩܺܝܢ ܠܺܝ܆ ܘܳܐܡܪܺܝܢ ܕܡܶܢ ܓܰܘܪܳܐ ܐܺܝܬܰܘܗ̱ܝ ܒܰܛܢܶܟܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ

ܒܨܰܦܪܳܐ ܐܶܬܬܥܺܝܪ ܡܶܢ ܫܶܢܬܶܗ: ܝܰܘܣܶܦ ܟܺܐܢܳܐ ܘܶܐܬܕܰܡܰܪ: ܒܚܶܙܘܳܐ ܕܬܶܕܡܽܘܪܬܳܐ ܕܚܰܘܝܶܗ: ܡܰܠܰܐܟܳܐ ܒܚܶܠܡܳܐ ܕܠܺܠܝܳܐ܀

ܓܠܳܐ ܗ̱ܘܳܐ ܠܶܗ ܡܳܪܝܳܐ ܒܚܶܠܡܳܐ: ܕܰܚܬܺܝܡ ܥܽܘܒܳܗ̇ ܕܰܒܬܽܘܠܬܳܐ: ܘܰܢܛܺܝܪܳܐ ܗ̱ܝ ܒܰܒܬܽܘܠܽܘܬܳܗ̇: ܐܳܘ ܒܰܪ ܕܰܘܺܝܕ ܠܳܐ ܬܶܕܚܰܠ܀

ܫܽܘܒܚܳܐ ܠܗܰܘ ܕܰܫܪܳܐ ܒܟܰܪܣܳܗ̇: ܕܡܰܪܝܰܡ ܒܬܽܘܠܬܳܐ ܒܰܪ̱ܬ ܕܰܘܺܝܕ: ܘܶܐܬܓܰܫܰܡ ܒܳܗ̇ ܕܰܟܝܳܐܺܝܬ: ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܢܚܶܬ ܗ̱ܘܳܐ ܥܺܝܪܳܐ܆ ܨܶܝܕ ܝܰܘܣܶܦ ܕܶܐܬܦܰܠܰܓ ܥܰܠ ܒܰܛܢܳܗ̇ ܕܡܰܪܝܰܡ܆ ܘܡܰܠܶܠ ܥܰܡܶܗ ܪܶܡܙܳܢܳܐܺܝܬ ܟܰܕ ܐܳܡܰܪ ܠܶܗ܆ ܕܗܰܘ ܓܶܝܪ ܕܡܶܢܳܗ̇ ܡܶܬܺܝܠܶܕ܆ ܦܳܪܶܩ ܒܶܪ̈ܝܳܬܳܐ܀

ܐܰܒܳܐ ܓܠܳܐ ܗ̱ܘܳܐ܆ ܚܰܝܠܶܗ ܟܰܣܝܳܐ ܘܩܰܕܺܝܫܳܐ ܒܰܒܬܽܘܠܬܳܐ ܡܰܪܝܰܡ܆ ܘܫܰܕܰܪ ܥܺܝܪܳܐ ܘܫܰܪܪܶܗ ܠܟܺܐܢܳܐ ܟܰܕ ܐܳܡܰܪ ܠܶܗ܆ ܡܶܛܽܠ ܒܰܛܢܳܗ̇ ܕܩܰܕܺܝܫܬܳܐ܆ ܕܒܽܘܟܪܰܐ ܗ̱ܘ ܕܥܶܠܳܝܳܐ܀

ܝܰܘܡܳܢܳܐ܆ ܐܶܫܬܰܕܰܪ ܓܰܒܪܺܐܶܝܠ ܪܺܝܫ ܚܰܝ̈ܠܰܘܳܬܳܐ܆ ܘܝܰܗ̱ܒ ܠܶܗ ܫܠܳܡܳܐ ܠܝܰܘܣܶܦ ܟܺܐܢܳܐ ܟܰܕ ܐܳܡܰܪ ܠܶܗ܆ ܠܳܐ ܬܶܬܦܰܠܰܓ ܐܳܘ ܝܰܘܣܶܦ܆ ܥܰܠ ܒܰܛܢܳܗ̇ ܕܡܰܪܝܰܡ܀

ܚܙܳܗ̇ ܗ̱ܘܳܐ ܝܰܘܣܶܦ܆ ܠܰܒܬܽܘܠܬܳܐ ܟܰܕ ܒܰܛܢܳܐ ܘܰܐܚܕܶܗ ܕܽܘܡܳܪܳܐ܆ ܘܰܩܪܳܗ̇ ܠܡܰܪܝܰܡ ܘܶܐܬܪܰܥܺܝ ܗ̱ܘܳܐ ܕܢܶܫܪܶܝܗ̇ ܡܶܢܶܗ܆ ܘܰܢܚܶܬ ܥܺܝܪܳܐ ܘܫܰܪܪܶܗ ܗ̱ܘܳܐ܆ ܡܶܛܽܠ ܕܶܐܬܦܰܠܰܓ܀

ܡܫܺܝܚܳܐ ܡܳܪܰܢ܆ ܕܶܐܬܬܰܚܬܺܝ ܒܛܰܝܒܽܘܬܶܗ ܡܶܛܽܠ ܦܽܘܪܩܳܢܰܢ܆ ܘܚܰܠܛܰܢ ܥܰܡܶܗ ܒܫܽܘܒܚܶܗ ܪܰܒܳܐ ܡܶܛܽܠ ܪ̈ܰܚܡܰܘܗ̱ܝ܆ ܐܰܫܘܳܢ ܠܫܽܘܒܩܳܢܳܐ ܕܚܰܘ̈ܒܶܐ܆ ܕܢܰܘܕܶܐ ܠܛܰܝܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܢܳܨܪܰܬ ܡܕܺܝܢ̱ܬܳܐ

ܚܰܝܠܶܗ ܕܰܐܒܳܐ ܥܶܠܳܝܳܐ ܐܰܓܶܢ ܒܟܰܪܣܳܗ̇ ܕܰܒܬܽܘܠܬܳܐ: ܘܰܗܘܳܐ ܥܽܘܠܳܐ: ܘܝܰܘܣܶܦ ܟܺܐܢܳܐ ܕܶܐܬܦܰܠܰܓ ܡܶܛܽܠ ܒܰܛܢܳܗ̇ ܕܗܳܝ ܒܰܪ̱ܬ ܕܰܘܺܝܕ: ܘܶܐܡܰܪ ܠܶܗ ܪܺܝܫ ܡܰܠܰܐܟ̈ܶܐ: ܕܗܰܘ ܕܰܒܟܰܪܣܳܗ̇ ܐܰܠܳܗܰܐ ܗ̱ܘ ܘܒܰܪ ܐܰܠܳܗܳܐ܀

ܐܶܬܬܥܺܝܪ ܝܰܘܣܶܦ ܡܶܢ ܫܶܢܬܶܗ: ܘܩܳܡ ܘܰܣܓܶܕ ܠܳܗ̇: ܠܒܰܪ̱ܬ ܕܰܘܺܝܕ ܘܗܳܟܰܢ ܐܶܡܰܪ: ܕܗܰܘ ܕܰܫܪܶܐ ܒܥܽܘܒܶܟܝ ܕܰܟܝܳܐ: ܥܰܒܕܶܗ ܫܰܕܰܪ ܘܰܢܚܶܬ ܨܶܝܕܰܝ: ܣܳܓܶܕ ܐ̱ܢܳܐ ܠܰܒܬܽܘܠܽܘܬܶܟܝ: ܐܶܡܳܐ ܕܟܺܝܬܳܐ ܘܠܳܐ ܡܙܰܘܰܓܬܳܐ܀

ܛܽܘܒܳܐ ܪܰܒܳܐ ܢܶܬܠܽܘܢ ܠܶܟܝ ܟܽܠܗܽܘܢ ܕܳܪ̈ܶܐ: ܘܫܰܪ̈ܒܳܬܳܐ ܕܺܐܝܬ ܥܰܠ ܐܰܪܥܳܐ: ܐܳܡܰܪ ܗ̱ܘܳܐ ܟܺܐܢܳܐ ܝܰܘܣܶܦ ܠܡܰܪܝܰܡ ܒܬܽܘܠܬܳܐ ܡܰܠܝܰܬ ܫܽܘܦܪ̈ܶܐ: ܣܳܓܶܕ ܐ̱ܢܳܐ ܠܳܗ̇ ܠܕܰܟܝܽܘܬܶܟܝ: ܒܺܐܪܬܳܐ ܕܒܰܪ ܡܰܠܟܳܐ ܫܪܶܐ ܒܓܰܘܳܗ̇܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܐܶܬܬܥܺܝܪ ܕܰܡ̈ܟܶܐ ܘܩܽܘܡܘ

ܢܚܶܬ ܗ̱ܘܳܐ ܥܺܝܪܳܐ ܡܶܢ ܪܰܘܡܳܐ ܕܰܢܚܰܘܶܐ ܗ̱ܘܳܐ: ܠܝܰܘܣܶܦ ܟܺܐܢܳܐ ܕܶܐܬܦܰܠܰܓ: ܡܶܛܽܠ ܒܰܛܢܳܟ ܩܰܕܺܝܫܳܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܠܳܐ ܬܶܕܚܰܠ ܐܳܘ ܒܰܪ ܕܰܘܺܝܕ ܐܳܡܰܪ ܗ̱ܘܳܐ ܠܶܗ: ܕܰܒܬܽܘܠܬܳܐ ܐܺܝܬܶܝܗ̇ ܡܰܪܝܰܡ: ܗܰܘ ܕܰܛܥܺܝܢܳܐ ܐܰܠܳܗܰܐ ܗ̱ܘ: ܕܰܒܚܽܘܒܶܗ ܦܳܪܶܩ ܒܶܪ̈ܝܳܬܳܐ܀

ܛܥܺܝܢܳܐ ܗ̱ܘܳܬ ܒܬܽܘܠܬܳܐ ܡܰܪܝܰܡ ܠܗܰܘ ܕܰܟܪ̈ܽܘܒܶܐ: ܘܰܣܪ̈ܳܦܶܐ ܪܳܐܬܺܝܢ ܡܶܢܶܗ: ܘܡܰܠܰܐܟ̈ܶܐ ܠܶܗ ܗ̱ܽܘ ܡܫܰܒܚܺܝܢ: ܟܰܕ ܩܳܥܶܝܢ ܩܰܕܺܝܫ ܩܰܕܺܝܫܰܬ܀

ܕܟܺܝܬܳܐ ܡܰܪܝܰܡ ܩܰܒܠܰܬ ܗ̱ܘܳܬ ܒܰܛܢܳܐ ܕܰܟܝܳܐ: ܝܰܘܣܶܦ ܟܺܐܢܳܐ ܡܶܬܕܰܡܰܪ: ܕܠܳܐ ܪܓܺܝܫ ܗ̱ܘܳܐ ܒܗܳܢܳܐ ܐ̱ܪܳܙܳܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܠܥܶܠ ܒܰܡܪ̈ܰܘܡܶܐ ܟܰܕ ܥܺܝܪ̈ܶܐ ܒܙܰܘܥܳܐ ܘܪܶܥܠܳܐ: ܚܳܝܪܺܝܢ ܠܰܐܬܪܳܐ ܕܰܫܟܺܝܢܬܶܗ: ܘܰܠܬܰܚܬ ܡܰܪܝܰܡ ܛܥܺܝܢܳܐ ܠܶܗ: ܘܰܛܥܺܝܢ ܗ̱ܽܘ ܠܰܐܪܥܳܐ ܘܠܰܫܡܰܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܓܠܳܝ ܠܺܝ ܐ̱ܪܳܙܳܐ ܡܽܘܢ ܓܰܕܫܶܟܝ܆ ܝܰܘܣܶܦ ܠܡܰܪܝܰܡ ܐܳܡܰܪ ܗ̱ܘܳܐ܆ ܡܰܢ ܐܰܛܥܺܝ ܒܰܒܬܽܘܠܽܘܬܶܟܝ܆ ܘܚܰܠܶܨ ܗ̱ܘܳܐ ܠܡܰܪܓܳܢܺܝܬܶܟܝ܀

ܐܳܡܰܪ ܠܳܗ̇ ܝܰܘܣܶܦ ܠܡܰܪܝܰܡ܆ ܠܺܝ ܡܶܟܺܝܠ ܠܡܶܥܪܰܩ ܡܶܢܶܟܝ܆ ܕܗܳܐ ܟܰܪܣܶܟܝ ܥܰܘܠܳܐ ܡܰܠܝܳܐ܆ ܘܣܳܪܒܰܬܝ ܘܝܳܡܝܰܬܝ ܘܰܡܕܰܓܠܰܬܝ܀

ܚܙܳܗ̇ ܝܰܘܣܶܦ ܠܡܰܪܝܰܡ ܕܒܰܛܢܳܐ܆ ܟܶܪܝܰܬ ܠܶܗ ܡܶܛܽܠܳܬܳܗ̇܆ ܘܶܐܡܰܪ ܠܳܗ̇ ܕܰܐܝܟܰܢ ܐܶܬܓܢܶܒܬܝ܆ ܡܟܺܝܪܬܳܐ ܕܢܶܟܠܰܬ ܠܰܡܟܺܝܪܳܗ̇܀

ܗܳܝܕܶܝܢ ܥܺܝܪܳܐ ܢܚܶܬ ܨܶܐܕܰܘܗ̱ܝ܆ ܘܦܰܟܪܶܗ ܒܫܶܢܬܳܐ ܘܶܐܡܰܪ ܠܶܗ܆ ܐܳܘ ܝܰܘܣܶܦ ܠܳܐ ܬܶܬܦܰܠܰܓ܆ ܥܰܠ ܒܰܛܢܳܐ ܪܓܺܝܓܳܐ ܕܡܰܪܝܰܡ܀

ܒܨܰܦܪܳܐ ܐܶܬܬܥܺܝܪ ܗ̱ܘܳܐ ܝܰܘܣܶܦ܆ ܘܕܰܒܪܳܗ̇ ܠܡܰܪܝܰܡ ܟܰܕ ܐܳܡܰܪ܆ ܣܳܓܶܕ ܐ̱ܢܳܐ ܠܥܽܘܒܶܟܝ ܕܰܟܝܳܐ܆ ܕܒܰܪ ܐܰܠܳܗܳܐ ܡܕܰܝܰܪ ܒܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܓܶܕ ܠܳܟ ܡܳܪܝܳܐ

ܝܰܘܣܶܦ ܕܰܚܙܳܐ ܠܰܒܬܽܘܠܬܳܐ: ܕܰܛܥܺܝܢܳܐ ܥܽܘܠܳܐ ܒܟܰܪܣܳܗ̇: ܐܶܡܰܪ ܠܳܗ̇ ܕܡܳܢܳܐ ܓܰܕܫܶܟܝ: ܘܡܰܢܽܘ ܚܰܠܶܨ ܦܰܐܝܽܘܬܶܟܝ܀

ܒܪܳܐ ܕܰܢܚܶܬ ܠܰܙܥܽܘܪܽܘܬܳܐ: ܡܶܛܽܠ ܪ̈ܰܚܡܰܘܗ̱ܝ ܣܰܓܺܝ̈ܶܐܐ: ܐܰܫܺܝܓ ܘܰܡܪܽܘܩ ܟܽܘ̈ܬܡܳܬܰܢ: ܒܝܰܡܳܐ ܫܦܺܝܥܳܐ ܕܰܚܢܳܢܳܟ܀

ܟܰܕ ܐܶܬܚܰܫܰܒ ܗ̱ܘܳܐ ܝܰܘܣܶܦ: ܕܢܶܫܪܶܝܗ̇ ܠܡܰܪܝܰܡ ܡܰܛܫܝܳܐܺܝܬ: ܕܣܳܒܰܪ ܗ̱ܘܳܐ ܠܶܗ ܕܡܶܢ ܓܰܘܪܳܐ: ܐܺܝܬܰܘܗ̱ܝ ܒܰܛܢܳܐ ܕܰܫܪܶܐ ܒܳܗ̇܀

ܐܰܫܰܪ ܝܰܘܣܶܦ ܡܽܘܢ ܕܶܐܡܪܶܬ: ܘܠܳܐ ܬܶܬܦܰܠܰܓ ܥܰܠ ܡܶܠܰܝ̈: ܕܰܒܪܶܗ ܕܰܐܠܳܗܳܐ ܐܺܝܬܰܘܗ̱ܝ: ܗܰܘ ܕܰܫܪܶܐ ܒܟܰܪܣܳܗ̇ ܕܡܰܪܝܰܡ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܫܠܳܡܳܐ܆ ܕܝܰܗ̱ܒ ܗ̱ܘܳܐ ܥܺܝܪܳܐ ܠܝܰܘܣܶܦ ܟܺܐܢܳܐ܆ ܟܰܕ ܫܰܪܪܶܗ ܗ̱ܘܳܐ ܥܰܠ ܒܰܛܢܳܗ̇ ܕܰܡܒܰܪܰܟܬܳܐ܆ ܕܗܰܘ ܕܰܫܪܶܐ ܒܳܗ̇܆ ܒܰܪ ܥܶܠܳܝܳܐ ܐܺܝܬܰܘܗ̱ܝ ܗ̱ܘܳܐ܀

ܡܳܐ ܫܰܦܺܝܪ ܗ̱ܘܳܐ ܩܳܠܳܗ̇܆ ܕܗܳܝ ܒܰܪ̱ܬ ܕܰܘܺܝܕ ܟܰܕ ܐܳܡܪܳܐ ܠܶܗ܆ ܠܝܰܘܣܶܦ ܟܺܐܢܳܐ ܘܰܡܦܺܝܣܳܐ ܕܠܳܐ ܬܶܟܪܶܐ ܠܳܟ܆ ܕܠܳܐ ܗܰܘ ܕܰܒܪܳܢܝ܆ ܠܳܐ ܚܟܺܝܡ ܠܺܝ ܓܰܒܪܳܐ ܡܶܡܬܽܘܡ܀

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ܆ ܠܝܰܘܣܶܦ ܟܺܐܢܳܐ ܟܰܕ ܐܰܪܟܶܢ ܗ̱ܘܳܐ܆ ܪܺܝܫܶܗ ܘܰܣܓܶܕ ܠܰܒܬܽܘܠܬܳܐ ܘܗܳܟܰܢ ܐܶܡܰܪ܆ ܣܳܓܶܕ ܐ̱ܢܳܐ ܠܶܗ܆ ܠܓܰܢ̱ܒܳܪ ܥܳܠ̈ܡܶܐ ܕܰܫܪܶܐ ܒܶܟܝ܀

ܠܶܟܝ ܛܽܘܒܰܝܟܝ ܩܰܕܺܝܫܬܳܐ܆ ܘܡܰܠܝܰܬ ܫܽܘܦܪ̈ܶܐ ܒܬܽܘܠܬܳܐ ܡܰܪܝܰܡ܆ ܕܰܫܪܳܐ ܒܶܟܝ ܚܺܝܠ ܥܶܠܳܝܳܐ ܘܰܕܢܰܚ ܡܶܢܶܟܝ܆ ܒܚܰܪܰܬ ܙܰܒ̈ܢܶܐ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܡܳܐ ܦܐܶܐ ܗ̱ܘܳܐ ܘܫܰܦܺܝܪ ܗ̱ܘܳܐ: ܠܗܳܝ ܒܰܪ̱ܬ ܕܰܘܺܝܕ ܟܰܕ ܣܶܠܩܰܬ ܗ̱ܘܳܬ: ܗܺܝ ܘܝܰܘܣܶܦ ܠܓܰܘ ܒܶܝܬ ܠܚܶܡ ܐܰܝܟ ܕܰܒܐ̱ܪܳܙܳܐ: ܕܢܶܬܟܰܬܒܽܘܢ ܗ̱ܘܰܘ: ܐܰܝܟ ܢܳܡܽܘܣܳܐ ܕܺܐܝܣܪܳܐܶܝܠ܀

ܫܽܘܒܚܳܐ

ܒܪܳܐ ܒܽܘܟܪܳܐ ܕܰܒܚܽܘܒܶܗ܆ ܗܘܳܐ ܐܰܟܘܳܬܰܢ ܡܶܛܽܠܳܬܰܢ܆ ܘܶܐܬܕܰܒܰܪ ܒܗܳܠܶܝܢ ܕܺܝܠܰܢ ܕܰܢܚܰܪܰܪ ܠܰܢ܆ ܗܰܒܠܰܢ ܫܰܝܢܳܐ܆ ܕܰܢܫܰܒܚܳܟ ܒܟܽܠܗܽܘܢ ܥܺܐܕ̈ܶܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܛܽܘܒܳܢܳܐ ܦܰܘܠܳܘܣ ܒܰܕܶܩ ܠܰܢ

ܚܙܳܗ̇ ܝܰܘܣܶܦ ܠܡܰܪܝܰܡ ܟܰܕ ܒܰܛܢܳܐ܆ ܘܟܶܪܝܰܬ ܠܶܗ ܡܶܛܽܠܳܬܳܗ̇܆ ܘܶܐܡܰܪ ܠܳܗ̇ ܕܡܰܪܝܰܡ ܐܰܝܟܰܢܳܐ܆ ܐܶܬܚܰܠܨܰܬ ܡܰܪܓܳܢܺܝܬܶܟܝ܆ ܒܢܰܟܦܽܘܬܶܟܝ ܗܳܐ ܚܳܐܰܪ ܐ̱ܢܳܐ܆ ܘܡܽܘܢ ܐܺܡܰܪ ܠܳܐ ܝܳܕܰܥ ܐ̱ܢܳܐ܆ ܫܰܢܳܝ ܠܶܟܝ ܠܰܐܬܪܳܐ ܐ̱ܚܪܺܢܳܐ܆ ܕܠܳܐ ܢܶܩܪܽܘܢ ܠܶܟܝ ܓܰܝܳܪܬܳܐ܆ ܘܠܺܝ ܢܚܰܣܕܽܘܢ ܡܶܛܽܠܳܬܶܟܝ܀

ܫܽܘܒܚܳܐ

ܚܙܳܬ ܡܰܪܝܰܡ ܠܝܰܘܣܶܦ ܕܶܐܬܦܰܠܰܓ܆ ܡܶܛܽܠ ܒܰܛܢܳܗ̇ ܩܰܕܺܝܫܳܐ܆ ܘܰܒ̈ܩܳܠܶܐ ܡܰܠ̈ܝܰܝ ܚܶܢ̈ܓܳܬܳܐ܆ ܠܶܥܙܰܬ ܠܰܒܪܳܗ̇ ܟܰܣܝܳܐܺܝܬ܆ ܠܳܐ ܢܶܬܕܰܠܰܚ ܐܶܣܟܺܝܡܶܗ܆ ܕܗܳܢܳܐ ܣܳܒܳܐ ܝܰܩܺܝܪܳܐ܆ ܚܰܘܳܝܗ̱ܝ ܫܪܳܪܳܟ ܘܰܢܗܰܝܡܶܢ܆ ܘܢܶܕܥܳܟ ܕܰܐܢ̱ܬ ܗ̱ܽܘ ܒܰܫܪܳܪܳܐ܆ ܥܳܒܽܘܕܳܐ ܕܪܰܘܡܳܐ ܘܥܽܘܡܩܳܐ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܡܰܠܟܳܐ ܡܢܰܚܡܳܢܳܐ

ܢܚܶܬ ܗ̱ܘܳܐ ܓܰܒܪܺܐܶܝܠ܆ ܨܶܝܕ ܝܰܘܣܶܦ ܕܶܐܬܦܰܠܰܓ ܗ̱ܘܳܐ܆ ܡܶܛܽܠ ܒܰܛܢܳܐ ܫܒܺܝܚܳܐ ܕܰܒܬܽܘܠܬܳܐ܆ ܘܰܥܢܳܐ ܘܶܐܡܰܪ ܠܶܗ܆ ܠܳܐ ܬܶܕܚܰܠ ܐܳܘ ܒܰܪ ܕܰܘܺܝܕ܆ ܕܗܰܘ ܕܰܛܥܺܝܢܳܐ ܒܽܘܟܪܳܐ ܕܥܶܠܳܝܰܐ ܗ̱ܘ܀

ܫܽܘܒܚܳܐ

ܫܽܘܒܚܳܐ ܘܬܰܘܕܺܝܬܳܐ܆ ܙܡܰܪ ܗ̱ܘܳܐ ܝܰܘܣܶܦ ܒܰܪ ܕܰܘܺܝܕ܆ ܒܚܰܕܘܳܐ ܪܰܒܳܐ ܠܶܐܡܪܶܗ ܕܰܐܠܳܗܳܐ܆ ܕܰܐܪܟܶܢ ܪܰܒܽܘܬܶܗ܆ ܘܰܫܪܳܐ ܒܥܽܘܒܳܗ̇ ܕܰܕܟܺܝܬܳܐ܆ ܕܢܰܚܶܐ ܠܓܶܢܣܰܢ ܕܰܒܠܺܝ ܒܰܚܒܳܠܳܐ܀

ܡܶܢ ܥܳܠܰܡ

ܫܽܘܒܚܳܐ ܠܗܰܘ ܩܳܠܳܐ. ܕܶܐܡ̣ܰܪ ܡܳܪܰܢ ܒܰܣܒܰܪܬܶܗ: ܕܟܽܠ ܕܳܐܟܶܠ ܦܰܓܪܝ: ܘܫܳܬܶܐ ܕܶܡܝ ܚܰܝܳܐ. ܠܳܐ ܐܰܪܦܺܝܘܗ̱ܝ ܒܰܫܝܽܘܠ. ܕܡܶܛܽܠܳܬܶܗ ܐܶܬܪܰܟܢܶܬ. ܘܛܶܥܡܶܬ ܡܰܘܬܳܐ. ܕܗܽܘ ܢܺܚܶܐ ܠܥܳܠܰܡ܀

ܦܶܬܓܳܡܳܐ: ܗܳܝܕܶܝܢ ܡܡܰܠܶܠ ܒܚܶܙ̈ܘܳܢܶܐ ܥܰܡ ܙܰܕܺܝܩܰܘ̈ܗ̱ܝ: ܘܶܐܡܰܪ ܕܣܳܡܶܬ ܥ̱ܽܘܗܕܳܢܳܐ ܠܓܰܒܪܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܨܠܽܘܬܳܟ ܥܰܡܰܢ ܝܰܘܣܶܦ ܟܺܐܢܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܗܳܢܳܐ ܪܶܢܝܳܐ ܫܰܩܠܶܗ ܠܟܺܐܢܳܐ ܕܢܶܫܪܶܝܗ̇ ܠܡܰܪܝܰܡ܆ ܘܰܡܓܰܙܰܝܬܳܐ ܚܰܫܳܐ ܠܶܒܫܰܬ ܥܰܠ ܦܽܘܪܫܳܢܶܗ܆ ܒܩ̈ܳܠܶܐ ܚܢܺܝ̈ܓܶܐ ܠܰܒܪܳܗ̇ ܠܶܚܫܰܬ ܚܰܫܺܝܫܳܐܺܝܬ܆ ܘܒܰܨ̈ܠܰܘܳܬܳܐ ܡܰܠܠܰܬ ܥܰܡܶܗ ܪܰܟܺܝܟܳܐܺܝܬ܀

ܕܢܰܚ ܓܰܒܪܺܐܶܝܠ ܒܰܕܡܽܘܬ ܫܶܡܫܳܐ ܕܫܰܠܗܶܒܺܝܬܳܐ܆ ܘܰܒܪܰܩ ܙܺܝܘܶܗ ܘܰܡܠܳܐ ܠܒܰܝܬܳܐ ܥܢܳܢܳܐ ܕܢܽܘܗܪܳܐ܆ ܦܬܰܚ ܗ̱ܘܳܐ ܦܽܘܡܶܗ ܘܰܐܡܛܰܪ ܓܽܘܡܪ̈ܶܐ ܡܶܢ ܦܶܬܓܳܡܰܘ̈ܗ̱ܝ܆ ܛܪܰܦ ܗ̱ܘܳܐ ܓܶܦܳܐ ܘܰܪܥܶܠ ܝܰܘܣܶܦ ܥܰܠ ܬܰܫܘܺܝܬܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀