ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܒܚܰܕ ܒܫܰܒܳܐ ܚܙܳܬܳܟ ܥܺܕܬܳܐ
ܣܳܠܶܩ܆ ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܐܳܡܰܪ ܗ̱ܘܳܐ ܝܰܘܣܶܦ ܠܰܛܠܺܝܬܳܐ܆ ܐܳܘ ܒܬܽܘܠܬܳܐ ܡܰܢ ܐܰܗܶܠ ܒܶܟܝ܆ ܘܡܰܢ ܚܰܠܶܨ ܡܰܪܓܳܢܺܝܬܶܟܝ܆ ܘܰܫܩܰܠ ܫܪܳܪܳܐ ܕܢܰܟܦܽܘܬܶܟܝ܆ ܡܰܢ ܩܰܨܶܨ ܓܶܦܰܝ̈ ܫܽܘܦܪܶܟܝ܆ ܘܥܰܒܕܶܟܝ ܚܶܣܕܳܐ ܠܝܳܕܽܘܥܰܝ̈ܟܝ܀

ܫܽܘܒܚܳܐ

ܒܦܶܠܓܶܗ ܕܠܺܠܝܳܐ ܫܰܕܰܪ ܗ̱ܘܳܐ܆ ܡܳܪܳܐ ܕܥܺܝܪ̈ܶܐ ܠܓܰܒܪܺܐܶܝܠ܆ ܘܰܢܚܶܬ ܩܳܡ ܥܰܠ ܬܰܫܘܺܝܬܶܗ܆ ܕܝܰܘܣܶܦ ܟܺܐܢܳܐ ܟܰܕ ܕܰܡܺܝܟ܆ ܘܚܰܘܺܝ ܠܶܗ ܕܡܶܢ ܪܽܘܚ ܩܽܘܕܫܳܐ܆ ܐܺܝܬܰܘܗ̱ܝ ܒܰܛܢܳܗ̇ ܕܰܕܟܺܝܬܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܳܘ ܪܳܚܡܶܗ ܕܡܺܝܬܳܐ ܕܰܥܢܰܕ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܝܰܘܣܶܦ ܟܺܐܢܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܕܢܰܚ ܓܰܒܪܺܐܶܝܠ ܡܰܠܰܐܟܳܐ܆ ܥܰܠ ܝܰܘܣܶܦ ܥܰܠ ܬܰܫܘܺܝܬܶܗ܆ ܘܰܥܢܳܐ ܘܗܳܟܰܢ ܐܶܡܰܪ ܠܶܗ܆ ܠܳܐ ܬܶܕܚܰܠ ܡܟܺܝܪܳܐ ܟܺܐܢܳܐ܆ ܠܡܳܢܳܐ ܦܠܺܝܓ ܐܰܢ̱ܬ ܒܰܪ ܕܰܘܺܝܕ܆ ܥܰܠ ܒܰܛܢܳܗ̇ ܕܰܡܒܰܪܰܟܬܳܐ܆ ܕܗܰܘ ܕܰܫܪܶܐ ܒܳܗ̇ ܐܰܠܳܗܰܐ ܗ̱ܘ܆ ܩܽܘܡ ܣܓܽܘܕ ܠܳܗ̇ ܟܰܕ ܚܳܕܶܐ ܐܰܢ̱ܬ܆ ܩܽܘܡ ܫܰܦܺܝܪ ܫܰܡܶܫ ܩܽܘܕܡܶܝܗ̇܆ ܘܠܳܐ ܬܶܬܦܰܠܰܓ ܥܰܠ ܒܰܛܢܳܗ̇܀

ܚܙܳܗ̇ ܗ̱ܘܳܐ ܟܺܐܢܳܐ ܠܰܕܟܺܝܬܳܐ܆ ܕܰܡܠܶܐ ܥܽܘܒܳܗ̇ ܩܰܕܺܝܫܳܐ܆ ܘܰܒܚܰܫܳܐ ܘܰܒܟܰܪܝܽܘܬܳܐ܆ ܐܶܬܚܰܫܰܒ ܗ̱ܘܳܐ ܕܰܢܫܰܡܪܶܝܗ̇܆ ܒܦܶܠܓܶܗ ܕܠܺܠܝܳܐ ܕܢܰܚ ܥܺܝܪܳܐ܆ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܘܫܰܪܰܪ ܠܝܰܘܣܶܦ ܥܰܠ ܒܰܛܢܳܗ̇܆ ܕܡܶܢ ܪܽܘܚܳܐ ܕܩܽܘܕܫܳܐ ܐܺܝܬܰܘܗ̱ܝ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܝܰܘܣܶܦ ܟܺܐܢܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܓܶܠܝܳܢܶܗ ܕܝܰܘܣܶܦ