ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܠܰܫܡܰܝܳܐ܆ ܘܠܰܐܪܥܳܐ ܒܪܶܡܙܶܗ ܛܥܺܝܢ܆ ܒܽܘܪ̈ܟܶܐ ܕܡܰܪܝܰܡ ܛܰܥܢܳܝ̈ ܐܰܝܟ ܫܰܒܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܡܓܽܘ̈ܫܶܐ܆ ܒܩܽܘܪ̈ܒܳܢܶܐ ܝܰܩܪܽܘܗ̱ܝ܆ ܘܪ̈ܳܥܰܘܳܬܳܐ ܩܰܪܶܒܘ ܠܶܗ ܣܶܓܕܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܶܐܬܺܝܠܶܕ܆ ܡܶܢ ܐܶܡܳܐ ܒܬܽܘܠܬܳܐ܆ ܘܠܳܐ ܫܪܳܐ ܛܰܒ̈ܥܶܐ ܚܬܺܝ̈ܡܶܐ ܒܡܰܘܠܳܕܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܚܠܳܦܰܝܢ܆ ܥܽܘܠܳܐ ܗܘܳܐ ܒܪ̈ܰܚܡܰܘܗ̱ܝ܆ ܘܥܰܡܰܢ ܫܰܦܶܦ ܒܰܩܪܺܝܬܶܗ ܕܕܰܘܺܝܕ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܡܶܢ ܐܰܒܳܐ܆ ܡܬܽܘܡܳܝܳܐ ܝܺܠܺܝܕ܆ ܒܚܰܪܰܬ ܙܰܒ̈ܢܶܐ ܡܶܢ ܒܰܪ̱ܬ ܕܰܘܺܝܕ ܕܢܰܚ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܠܢܳܨܪܰܬ ܡܕܺܝܢ̱ܬܳܐ

ܥܰܡܰܢܽܘܐܶܝܠ܆ ܥܰܡܰܢ ܐܰܢ̱ܬ ܚܰܕ ܐܰܠܳܗܳܐ܆ ܘܒܰܫܪܳܪܳܐ ܗܘܰܝܬ ܒܰܪܢܳܫܳܐ܆ ܘܶܐܬܺܝܠܶܕܬ ܒܓܰܘ ܒܶܝܬ ܠܚܶܡ܆ ܡܶܢ ܓܰܘ ܥܽܘܒܳܗ̇ ܕܡܰܠܝܰܬ ܫܽܘܦܪ̈ܶܐ܆ ܫܽܘܒܚܳܐ ܠܪ̈ܰܚܡܶܐ ܕܛܰܝܒܽܘܬܳܟ܆ ܝܺܚܺܝܕܳܝܳܐ ܝܶܫܽܘܥ ܢܽܘܗܪܳܐ ܕܰܫܪܳܪܳܐ܀

ܡܰܢ ܠܳܐ ܢܶܬܗܰܪ܆ ܟܰܕ ܚܳܙܶܐ ܠܪ̈ܺܝܫܰܝ ܦܳܪܶܣ܆ ܟܰܕ ܛܥܺܝܢܺܝܢ ܩܽܘܪ̈ܒܳܢܰܝܗܽܘܢ܆ ܘܥܰܠܘ ܘܰܣܓܶܕܘ ܠܶܗ ܒܰܡܥܰܪܬܳܐ܆ ܠܗܰܘ ܕܰܣܪ̈ܳܦܶܐ ܣܳܓܕܺܝܢ ܠܰܫܡܶܗ܆ ܘܐ̱ܢܳܫ̈ܳܐ ܒܰܐܪܥܳܐ ܡܒܰܪܟܺܝܢ ܠܶܗ܆ ܠܶܗ ܬܶܫܒܽܘܚܬܳܐ ܕܶܐܬܳܐ ܘܦܰܪܩܰܢ ܡܶܢ ܛܽܘܥܝܰܝ܀

ܕܳܫ̈ܢܶܐ ܦܪ̈ܺܝܫܶܐ܆ ܩܰܪܶܒܘ ܠܶܗ ܪ̈ܺܝܫܰܝ ܦܳܪܶܣ܆ ܠܡܰܠܟܳܐ ܕܰܕܢܰܚ ܒܚܰܕܽܘܬܳܐ܆ ܘܟܰܘܟܰܒ ܢܽܘܗܪܳܐ ܐܶܬܳܐ ܩܕܳܡܰܝܗܽܘܢ܆ ܘܥܰܠܘ ܘܰܣܓܶܕܘ ܠܶܗ܆ ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ܆ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܩܽܘܪ̈ܒܳܢܶܐ ܟܣܰܝ̈ܳܐ ܕܰܐܠܳܗܽܘܬܳܐ ܡܪܰܝܡܬܳܐ܀

ܛܥܶܢܘ ܘܰܐܝܬܺܝܘ ܠܶܗ ܩܽܘܪ̈ܒܳܢܶܐ: ܥܰܡܳܐ ܪܰܒܳܐ ܘܟܰܗܺܝܢܳܐ ܕܰܒܢܰܝ̈ ܦܳܪܶܣ: ܘܥܰܠܘ ܘܰܣܓܶܕܘ ܠܶܗ ܒܰܡܥܰܪܬܳܐ: ܠܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ: ܠܗܰܘ ܕܰܣܪ̈ܳܦܶܐ ܣܳܓܕܺܝܢ ܠܰܫܡܶܗ: ܟܰܣܝܳܐ ܕܶܐܬܳܐ ܠܡܰܘܠܳܕܳܐ ܘܰܒܝܰܠܕܶܗ ܦܰܪܩܶܗ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܫܽܘܒܚܳܐ ܠܳܟ ܡܳܪܝ܆ ܕܰܫܦܰܪ ܠܳܟ ܕܬܶܗܘܶܐ ܥܽܘܠܳܐ܆ ܡܶܢ ܡܰܪܝܰܡ ܡܰܠܝܰܬ ܫܽܘܦܪ̈ܶܐ܆ ܕܰܬܚܰܪܰܪ ܡܶܢ ܛܳܥܝܽܘܬܳܐ܆ ܠܓܶܢܣܳܐ ܕܐ̱ܢܳܫ̈ܳܐ ܘܬܶܦܪܽܘܩ ܐܶܢܽܘܢ܆ ܛܳܒܳܐ ܕܣܰܥܪܳܗ̇ ܠܰܓܒܺܝܠܬܶܗ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܫܽܘܒܚܳܐ

ܥܰܡܰܢ ܚܳܕܝܳܐ܆ ܒܶܝܬ ܠܚܶܡ ܡܕܺܝܢ̱ܬܳܐ ܒܨܺܝܪܬܳܐ܆ ܕܡܰܠܟܽܘܬܳܐ ܕܒܶܝܬ ܝܺܗܽܘܕܳܐ܆ ܕܫܶܠܡܰܬ ܡܶܠܬܶܗ ܕܰܢܒܺܝܳܐ܆ ܘܰܢܦܰܩ ܡܶܢܳܗ̇ ܪܳܥܝܳܐ ܪܰܒܳܐ܆ ܕܗܽܘܝܽܘ ܡܰܠܟܳܐ ܕܺܝܣܪܳܐܶܝܠ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ

ܚܙܳܐ ܗ̱ܘܳܐ ܕܰܘܺܝܕ ܒܰܪ ܐܺܝܫܰܝ܆ ܕܰܠܡܰܘܠܳܕܳܐ ܐܶܬܢܰܚܰܬ܆ ܘܶܐܬܢܰܒܺܝ ܒܪܽܘܚܳܐ ܕܩܽܘܕܫܳܐ܆ ܕܡܳܪܝܳܐ ܐܶܡܰܪ ܠܺܝ ܕܒܶܪܝ ܐܰܢ̱ܬ܆ ܘܶܐܢܳܐ ܝܰܘܡܳܢ ܝܺܠܶܕܬܳܟ܆ ܕܬܶܗܘܶܐ ܪܺܝܫܳܐ ܠܥܰܡ̱̈ܡܶܐ ܕܗܰܝܡܶܢܘ ܒܳܟ܆ ܒܪܺܝܟܽ ܗ̱ܘ ܕܟܰܐܰܪ ܒܡܰܘܠܳܕܶܗ܆ ܠܟܳܦܽܘܪ̈ܶܐ ܕܰܥܫܰܩܘ ܒܰܛܢܶܗ܆ ܕܶܐܬܒ݉ܛܶܢ ܕܠܳܐ ܙܽܘܘܳܓ܆ ܘܶܐܬܺܝܠܶܕ ܐܰܝܟ ܒܰܪܢܳܫܳܐ܆ ܘܰܒܡܰܘܠܳܕܶܗ ܐܶܬܦܰܪܩܰܬ ܥܺܕܰܬ ܩܽܘܕܫܳܐ. ܘܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܀

ܫܽܘܒܚܳܐ

ܒܪܺܝܟ ܕܰܐܪܦܺܝ ܥܺܝܪ̈ܶܐ ܒܪܰܘܡܳܐ܆ ܘܰܢܚܶܬ ܘܰܫܪܳܐ ܒܓܰܘ ܟܰܪܣܳܐ܆ ܘܰܗܘܳܐ ܒܛܺܝܢܳܐ ܡܶܢ ܩܳܠܳܐ܆ ܘܝܰܠܽܘܕܳܐ ܡܶܢ ܪܽܘܚ ܩܽܘܕܫܳܐ܆ ܘܡܶܢ ܡܰܪܝܰܡ ܡܶܙܕܰܝܰܚ ܗ̱ܘܳܐ܆ ܗܰܘ ܕܰܟܪ̈ܽܘܒܶܐ ܒܕܶܚܠܳܐ ܡܙܰܝܚܺܝܢ ܠܶܗ܆ ܛܽܘܪܳܐ ܕܣܺܝܢܰܝ ܠܳܐ ܣܰܝܒܪܶܗ. ܘܕܰܨܒܳܐ ܒܬܽܘܠܬܳܐ ܩܰܒܶܠܬܶܗ܆ ܫܽܘ݉ܒܚܳܐ ܠܗܰܘ ܬܽܘܩܦܳܐ܆ ܕܰܒܪܺܝܬܳܐ ܬܰܠܝܳܐ ܒܪܶܡܙܶܗ܆ ܘܰܐܓܶܣ ܒܽܐܘܪܝܳܐ ܐܰܝܟ ܫܺܝܛܳܐ܆ ܟܰܕ ܕܺܝܠܶܗ ܗ̱ܺܝ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ

ܒܗܳܢܳܐ ܝܰܘܡܳܐ. ܕܡܰܘܠܳܕܳܟ ܡܰܠܟܳܐ ܡܫܺܝܚܳܐ܆ ܩܪ̈ܳܒܶܐ ܘܩܺܐܪ̈ܣܶܐ ܢܶܫܬܰܗܽܘܢ܆ ܘܚܶܪ̈ܝܳܢܶܐ ܬܽܘܒ ܢܶܬܒܰܛܠܽܘܢ܆ ܘܛܽܘ̈ܦܣܶܐ ܘܐ̱ܪ̈ܳܙܶܐ ܢܶܬܓܰܡܪܽܘܢ܆ ܘܟܺܐܢ̈ܶܐ ܠܘܳܬܳܟ ܢܶܬܟܰܢܫܽܘܢ܆ ܙܰܕܺܝ̈ܩܶܐ ܒܳܟ ܢܶܬܦܰܨܚܽܘܢ܆ ܘܰܐܒܳܗ̈ܳܬܳܐ ܒܳܟ ܢܶܚܕܽܘܢ܆ ܕܶܐܫܬܰܡܠܺܝ ܠܶܗ ܣܽܘܟܳܝܗܽܘܢ. ܒܡܰܘܠܳܕܳܟ ܗܰܘ ܐ̱ܢܳܫܳܝܳܐ܀

ܫܽܘܒܚܳܐ

ܢܒܺܝ̈ܶܐ ܕܰܐܝܬܺܝܘ܆ ܫܽܘܚܠܳܦܰܝ̈ܟ ܠܥܶܠ ܡܶܢ ܐܽܘܪܚܳܟ܆ ܟܰܕ ܣܳܓܕܺܝܢ ܒܗܰܝܡܳܢܽܘܬܳܐ܆ ܢܶܬܛܰܝܒܽܘܢ ܒܰܦܨܺܝܚܽܘܬܳܐ܆ ܘܒܰܙܡܺܝܪ̈ܳܬܳܐ ܢܫܰܒܚܽܘܢܳܟ܆ ܢܚܽܘܪܽܘܢ ܒܳܟ ܒܽܐܘܪܝܳܐ ܫܺܝܛܳܐ܆ ܢܶܚܙܽܘܢܳܟ ܘܢܶܩܢܽܘܢ ܚܰܝܠܳܐ܆ ܒܡܶܠܰܝ̈ ܪܽܘܚܳܐ ܕܣܽܘܥܪ̈ܳܢܰܝܟ܆ ܕܰܒܠܶܫܳܢܰܝ̈ܗܽܘܢ ܢܶܩܥܽܘܢ܆ ܕܗܳܢܰܘ ܕܰܥܠܰܘܗ̱ܝ ܐܶܬܢܰܒܺܝܢ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܡܳܪܝܳܐ ܐܶܡܰܪ ܠܺܝ ܕܒܶܪܝ ܐܰܢ̱ܬ܆ ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܕܰܒܪܳܗ̇ ܝܰܘܣܶܦ ܠܡܰܠܝܰܬ ܩܽܘ̈ܕܫܶܐ ܒܬܽܘܠܬܳܐ ܡܰܪܝܰܡ܆ ܘܰܣܠܶܩ ܢܺܐܙܰܠ ܢܶܟܬܽܘܒ ܠܰܫܡܶܗ ܐܰܝܟ ܦܽܘܩܕܳܢܳܐ܆ ܐܶܙܰܠ ܡܰܠܟܳܐ ܠܩܽܘܪܝܰܬ ܡܰܠ̈ܟܶܐ ܕܢܶܕܢܰܚ ܬܰܡܳܢ܆ ܘܢܶܟܬܽܘܒ ܐ̱ܢܳܫ̈ܳܐ ܒܰܣܦܰܪ ܚܰܝ̈ܶܐ ܕܺܝܠܺܝܕܽܘܬܶܗ܀

ܫܽܘܒܚܳܐ ܠܰܐܒܳܐ ܕܰܨܒܳܐ ܕܢܶܟܬܽܘܒ ܐ̱ܢܳܫ̈ܳܐ ܒܰܐܪܥܳܐ܆ ܘܣܶܓܕܬܳܐ ܠܰܒܪܳܐ ܕܟܰܬܒܽܘܗ̱ܝ ܒܰܐܪܥܳܐ ܟܰܕ ܒܰܫܡܰܝܰܐ ܗ̱ܘ܆ ܬܰܘܕܺܝ ܠܪܽܘܚܳܐ ܕܰܐܙܺܝܥ ܐܶܢܽܘܢ ܥܰܠ ܣܽܘܥܪ̈ܳܢܶܐ܆ ܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀