ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܨܠܺܝܒܳܐ ܐܳܬܳܐ ܕܫܰܝܢܳܐ

ܐܶܡܰܪ ܡܳܪܰܢ ܠܝܽܘܚܰܢܳܢ܆ ܐܺܝܕܳܟ ܒܰܠܚܽܘܕ ܣܺܝܡ ܥܰܠܪܺܝܫ܆ ܘܶܐܢܳܐ ܠܡܰܝ̈ܳܐ ܡܩܰܕܶܫ ܐ̱ܢܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܩܪܶܒ ܥܰܒܕܳܐ ܘܰܐܪܺܝܡ ܐܺܝܕܶܗ܆ ܘܣܳܡܳܗ̇ ܥܰܠ ܪܺܝܫ ܓܳܒܽܘܠܶܗ܆ ܘܩܳܠܳܐ ܐܶܬܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܀

ܚܳܪ ܒܶܗ ܘܰܩܥܳܐ ܝܽܘܚܰܢܳܢ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ܆ ܫܡܰܢ ܗ̱ܘܳܐ ܐܶܡܪܳܐ ܘܶܐܬܪܰܒܺܝ܆ ܘܶܐܬܳܐ ܕܢܶܗܘܶܐ ܩܽܘܪܒܳܢܳܐ܀

ܫܽܘܒܚܳܐ ܠܶܗ ܠܗܰܘ ܕܒܰܥܡܳܕܶܗ܆ ܩܰܕܶܫ ܡܰܝ̈ܳܐ ܠܚܽܘܣܳܝܰܢ܆ ܫܽܘܒܚܳܐ ܠܶܗ ܠܗܰܘ ܕܰܒܕܶܢܚܶܗ܆ ܐܰܕܢܰܚ ܢܽܘܗܪܶܗ ܥܰܠ ܟܽܠܰܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܚܙܳܐ ܝܽܘܚܰܢܳܢ ܓܰܒܝܳܐ ܥܰܠ ܢܰܗܪܳܐ ܝܽܘܪܕܢܳܢ܆ ܠܰܒܪܳܐ ܡܫܺܝܚܳܐ ܟܰܕ ܥܳܡܶܕ܆ ܘܪܽܘܚܳܐ ܕܩܽܘܕܫܳܐ ܕܰܡܪܰܚܶܦ܆ ܘܰܐܒܳܐ ܕܩܳܥܶܐ ܘܳܐܡܰܪ܆ ܗܳܢܰܘ ܒܶܪܝ ܚܰܒܺܝܒܳܐ ܕܒܶܗܽ ܗ̱ܘ ܨܒܺܝܬ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܟܰܕ ܩܳܐܶܡ ܒܶܝܬ ܫܶܦ̈ܥܶܐ ܒܳܪܽܘܝܳܐ ܕܥܳܠ̈ܡܶܐ܆ ܘܫܳܐܶܠ ܕܢܶܥܡܰܕ ܡܶܢ ܥܰܒܕܶܗ܆ ܕܠܰܢ ܢܚܰܪܰܪ ܡܶܢ ܥܰܒܕܽܘܬܳܐ܆ ܬܰܘ ܟܽܠܰܢ ܢܰܘܕܶܐ ܠܶܗ ܘܰܢܫܰܒܚܺܝܘܗ̱ܝ ܠܥܳܠܰܡ ܥܳܠܡܺܝܢ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܐܶܚܰܕ ܗ̱ܘܳܐ ܠܥܺܝܪ̈ܰܝ ܪܰܘܡܳܐ ܘܟܶܢ̈ܫܶܐ ܫܡܰܝܳܢ̈ܶܐ܆ ܟܰܕ ܚܳܙܶܝܢ ܗ̱ܘܰܘ ܠܒܳܪܽܘܝܗܽܘܢ܆ ܕܥܰܪܛܶܠܳܐܺܝܬ ܩܳܐܶܡ ܗ̱ܘܳܐ܆ ܘܫܳܐܶܠ ܡܶܢ ܟܳܪܽܘܙܶܗ܆ ܕܢܶܥܡܰܕ ܡܶܛܽܠ ܦܽܘܪܩܳܢܰܢ܀

ܚܙܳܬܶܗ ܥܺܕܬܳܐ ܟܰܕ ܥܳܡܶܕ܆ ܒܶܪܟܰܬ ܣܶܓܕܰܬ ܠܶܗ ܘܶܐܡܪܰܬ ܒܪܺܝܟ ܫܳܠܽܘܚܳܟ܆ ܕܩܰܕܶܫܬܳܢܝ ܒܡܰܥܡܽܘܕܺܝܬܳܟ ܘܰܐܦܢܺܝܬ ܝܰܠ̈ܕܰܝ ܡܶܢ ܛܽܘܥܝܰܝ܆ ܕܰܢܫܰܒܚܽܘܢ ܠܰܫܡܳܟ܆ ܘܰܢܪܰܡܪܡܽܘܢ ܠܥܳܠܰܡ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܠܶܟܝ ܢܶܬܟܰܫܰܦ

ܐܰܘܕܳܝ ܥܺܕܬܳܐ. ܠܒܰܪ ܐܰܠܳܗܳܐ ܕܒܰܥܡܳܕܶܗ ܩܰܕܶܫ ܝܰܠ̈ܕܰܝܟܝ܆ ܘܰܐܣܚܺܝ ܐܶܢܽܘܢ܆ ܘܚܰܘܰܪ ܐܶܢܽܘܢ ܡܶܢ ܫܽܘܚܬܳܐ ܕܟܳܦܽܘܪܽܘܬܳܐ܆ ܘܰܥܒܰܕ ܐܶܢܽܘܢ ܒܪ̈ܰܚܡܰܘܗ̱ܝ܆ ܒܢܰܝ̈ܳܐ ܠܰܐܒܳܐ ܫܡܰܝܳܢܳܐ܆ ܘܫܰܘ̈ܬܳܦܶܐ ܠܪܽܘܚܳܐ܀

ܩܽܘܡܝ ܒܰܪ̱ܬ ܢܽܘܗܪܳܐ܆ ܙܡܰܪܝ ܫܽܘܒܚܳܐ ܠܺܝܚܺܝܕܳܝܳܐ ܒܗܳܢܳܐ ܝܰܘܡܳܐ܆ ܕܰܐܫܺܝܓ ܘܡܰܪܩܶܟܝ܆ ܘܥܰܒܕܶܟܝ ܟܰܠܬܳܐ ܡܫܰܒܰܚܬܳܐ ܘܡܰܠܝܰܬ ܫܽܘܦܪ̈ܶܐ܆ ܘܡܶܢ ܡܰܝ̈ܳܐ ܕܰܥܡܳܕܳܐ܆ ܐܶܣܛܰܠ ܫܽܘܒܚܳܐ ܐܰܠܒܫܶܟܝ܆ ܐܳܦ ܦܰܓܪܶܗ ܝܰܗ̱ܒ ܠܶܟܝ܀

ܒܗܳܢܳܐ ܝܰܘܡܳܐ܆ ܐܶܬܳܐ ܗ̱ܘܳܐ ܠܡܰܥܡܽܘܕܺܝܬܳܐ ܒܪܳܐ ܕܰܐܠܳܗܳܐ܆ ܕܰܠܣܳܗܕܽܘܬܶܗ܆ ܕܝܽܘܚܰܢܳܢ ܢܫܰܪܰܪ ܗ̱ܘܳܐ ܥܠܰܘܗ̱ܝ ܒܰܝܢܳܬ ܟܶܢ̈ܫܶܐ܆ ܕܠܰܚܛܺܝܬܶܗ ܕܥܳܠܡܳܐ ܫܳܩܶܠ܆ ܘܦܳܪܶܩ ܠܶܗ ܡܶܢ ܛܽܘܥܝܰܝ܀

ܙܳܥ ܝܽܘܚܰܢܳܢ܆ ܕܰܚܙܳܝܗ̱ܝ ܠܰܒܪܳܐ ܟܰܕ ܩܳܐܶܡ ܒܰܝܢܳܬ ܟܶܢ̈ܫܶܐ܆ ܘܰܩܥܳܐ ܘܶܐܡܰܪ܆ ܕܒܰܝܢܳܬܟܽܘܢ ܩܳܐܶܡ ܓܰܒܪܳܐ ܕܶܐܫܬܰܠܚܶܬ ܩܽܘܕܡܰܘܗ̱ܝ܆ ܗܰܘ ܕܶܐܢܳܐ ܠܳܐ ܫܳܘܶܐ ܐ̱ܢܳܐ܆ ܕܶܐܬܓܗܰܢ ܐܶܫܪܶܐ ܥܰܪ̈ܩܶܐ܆ ܗܳܢܽܘܢ ܕܰܡܣܳܐܢܰܘ̈ܗ̱ܝ܀

ܩܥܳܐ ܝܽܘܚܰܢܳܢ܆ ܕܶܐܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ ܠܰܬܝܳܒܽܘܬܳܐ܆ ܗܽܘ ܕܶܝܢ ܢܰܥܡܶܕ܆ ܒܪܽܘܚܳܐ ܕܩܽܘܕܫܳܐ ܘܰܒܢܽܘܪܳܐ ܡܕܰܟܝܳܢܺܝܬܳܐ܆ ܘܢܶܥܒܶܕܟܽܘܢ ܠܶܗ ܐܰܚ̈ܶܐ܆ ܘܢܰܘܪܶܬܟܽܘܢ ܡܰܠܟܽܘܬܳܐ܆ ܒܰܡܪܰܚܡܳܢܽܘܬܶܗ܀

ܢܚܶܬ ܦܳܪܽܘܩܰܢ܆ ܠܝܽܘܪܕܢܳܢ ܢܰܗܪܳܐ ܕܢܶܥܡܰܕ ܗ̱ܘܳܐ ܡܶܢ ܝܽܘܚܰܢܳܢ܆ ܘܪܽܘܚܳܐ ܕܩܽܘܕܫܳܐ܆ ܢܶܚܬܰܬ ܩܳܡܰܬ ܥܰܠ ܪܺܝܫܶܗ ܒܰܕܡܽܘܬ ܝܰܘܢܳܐ܆ ܘܰܐܒܳܐ ܕܩܳܥܶܐ ܡܶܢ ܠܥܶܠ܆ ܕܗܳܢܰܘ ܒܶܪܝ ܚܰܒܺܝܒܳܐ܆ ܘܗܽܘ ܦܳܪܶܩ ܥܳܠܡܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ. ܐܶܡܰܪ ܡܳܪܰܢ ܠܝܽܘܚܰܢܳܢ ܕܰܩܪܽܘܒ ܐܰܥܡܶܕܰܝܢܝ܆ ܐܺܝܕܳܟ ܒܰܠܚܽܘܕ ܬܳܐ ܣܺܝܡ ܥܰܠ ܪܺܝܫܝ ܕܰܨܒܺܝܬ ܐܶܥܡܰܕ܆ ܘܠܳܐ ܬܶܕܚܰܠ ܘܠܳܐ ܬܶܬܩܰܢܰܛ ܡܶܢܳܗ̇ ܕܓܰܘܙܰܠܬܳܐ܀

ܝܰܘܡܳܢܳܐ. ܐܶܬܥܡܶܕ ܦܳܪܽܘܩܰܢ܆ ܒܓܰܘ ܝܽܘܪܕܢܳܢ ܢܰܗܪܳܐ܆ ܡܶܢ ܝܽܘܚܰܢܳܢ ܒܰܪ ܥܰܩܪܽܘܬܳܐ ܟܰܕ ܐܳܡܰܪ ܠܶܗ܆ ܕܺܐܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ ܘܶܐܢܳܐ ܥܳܡܶܕ ܐ̱ܢܳܐ܀

ܐܰܙܥܶܩ ܐܰܒܳܐ܆ ܡܶܢ ܪܰܘܡܳܐ ܟܰܕ ܐܳܡܰܪ܆ ܕܗܳܢܰܘ ܒܶܪܝ ܚܰܒܺܝܒܝ܆ ܘܪܽܘܚܳܐ ܢܚܶܬ ܗ̱ܘܳܐ܆ ܙܳܥ ܝܽܘܚܰܢܳܢ ܘܰܪܥܶܠܘ ܟܶܢ̈ܫܶܐ܆ ܘܰܩܥܰܘ ܕܰܠܥܶܠ ܥܰܡ ܕܰܠܬܰܚܬ ܒܪܺܝܟ ܕܶܢܚܳܟ ܡܳܪܰܢ܀

ܝܰܘܡܳܢܳܐ܆ ܬܶܗܪܳܐ ܪܰܒܳܐ ܚܙܺܝܬ ܐܰܚܰܝ̈܆ ܥܰܠ ܢܰܗܪܳܐ ܝܽܘܪܕܢܳܢ܆ ܥܰܒܕܳܐ ܕܡܰܥܡܶܕ܆ ܘܡܳܪܳܐ ܕܥܳܡܶܕ ܘܪܽܘܚܳܐ ܕܢܳܚܶܬ܆ ܘܰܐܒܳܐ ܕܩܳܥܶܐ ܡܶܢ ܪܰܘܡܳܐ ܕܗܳܢܰܘ ܒܶܪܝ ܚܰܒܺܝܒܝ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܢܰܝ̈ ܢܽܘܗܪܳܐ ܩܽܘܡܘ

ܒܰܝܢܳܬ ܟܶܢ̈ܫܶܐ. ܩܳܐܶܡ ܗ̱ܘܳܐ ܒܪܳܐ ܕܶܐܬܳܐ ܠܡܰܥܡܽܘܕܺܝܬܳܐ܆ ܘܰܐܙܥܶܩ ܐܰܒܳܐ ܕܗܳܢܰܘ ܒܶܪܝ ܚܰܒܺܝܒܝ܀

ܒܗܳܢܳܐ ܝܰܘܡܳܐ. ܥܡܰܕ ܡܳܪܰܢ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܐܶܡܳܐ ܕܝܳܠܕܳܐ ܒܢܰܝ̈ܳܐ ܪ̈ܽܘܚܳܢܶܐ܀

ܐܰܪܥܳܐ ܢܶܗܪܰܬ. ܒܰܥܡܳܕܳܟ ܘܰܫܡܰܝܳܐ ܐܶܬܦܰܨܚܰܬ ܗ̱ܘܳܬ܆ ܕܰܚܙܳܬ ܝܰܘܡܳܐ ܕܕܶܢܚܳܟ ܦܳܪܽܘܩܰܢ܀

ܕܽܘܨܝ ܘܰܚܕܳܝ. ܥܺܕܰܬ ܩܽܘܕܫܳܐ ܒܰܚܠܽܘܠܶܗ ܕܺܝܚܺܝܕܳܝܳܐ܆ ܘܙܰܡܶܢܝ ܝܰܠ̈ܕܰܝܟܝ ܕܢܶܚܕܽܘܢ ܒܰܥܡܳܕܶܗ܀

ܥܡܰܕܬ ܒܪ̈ܰܚܡܰܝܟ. ܒܝܽܘܪܕܢܳܢ ܢܰܗܪܳܐ ܡܚܰܣܝܳܢܳܐ ܕܝܰܠ̈ܕܰܘܗ̱ܝ ܕܳܐܕܳܡ܆ ܕܰܠܗܽܘܢ ܬܶܬܶܠ ܚܰܝ̈ܶܐ ܘܡܰܠܟܽܘܬܳܐ܀

ܒܗܳܢܳܐ ܝܰܘܡܳܐ܆ ܐܶܬܪܰܫܡܰܬ ܡܰܥܡܽܘܕܺܝܬܳܐ ܥܰܠ ܢܰܗܪܳܐ܆ ܘܗܳܐ ܣܳܘܚܺܝܢ ܥܰܡ̱̈ܡܶܐ ܠܚܽܘܣܳܝܳܗ̇܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܣܠܶܩܬ ܠܰܨܠܺܝܒܳܐ

ܢܚܶܬ ܠܓܰܘ ܝܽܘܪܕܢܳܢ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܡܶܛܽܠ ܐܳܕܳܡ ܚܰܝܳܒܳܐ܆ ܕܰܢܚܰܕܬܺܝܘܗ̱ܝ ܡܶܢ ܓܰܘ ܡܰܝ̈ܳܐ܆ ܘܢܶܬܶܠ ܠܶܗ ܚܰܝ̈ܶܐ ܚܰܕ̱̈ܬܶܐ܀

ܥܡܰܕܬ ܒܓܰܘ ܝܽܘܪܕܢܳܢ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܡܶܢ ܝܽܘܚܰܢܳܢ ܟܳܪܽܘܙܳܟ܆ ܘܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܘܫܰܟܶܢܬ ܠܰܢ ܣܺܝܡܰܬ ܒܢܰܝ̈ܳܐ܀

ܐܶܬܰܝܬ ܠܝܽܘܪܕܢܳܢ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܘܰܛܒܰܥܬ ܪܺܝܫܳܟ ܒܓܰܘ ܡܰܝ̈ܳܐ܆ ܘܕܰܠܺܝܬܳܝܗ̱ܝ ܠܓܶܢܣܳܐ ܕܺܝܠܰܢ܆ ܡܶܢ ܛܽܘܒܳܥܳܐ ܕܰܚܛܺܝܬܳܐ܀

ܚܙܰܐܽܘܟ ܡܰܝ̈ܳܐ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܘܝܰܗ̱ܒܘ ܐܰܬܪܳܐ ܘܙܳܥܘ ܡܶܢ ܩܽܘܕܡܰܝܟ܆ ܕܰܚܙܰܐܽܘܟ ܕܰܐܝܟ ܒܰܪܢܳܫܳܐ܆ ܐܶܬܰܝܬ ܥܡܰܕܬ ܡܶܢ ܟܳܪܽܘܙܳܟ܀

ܫܽܘܒܚܳܐ

ܐܰܒܳܐ ܐܰܙܥܶܩ܆ ܡܶܢ ܫܡܰܝ ܫܡܰܝ̈ܳܐ ܥܶܠܳܝ̈ܶܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܘܪܽܘܚܳܐ ܢܶܚܬܰܬ ܐܰܝܟ ܝܰܘܢܳܐ܆ ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܠܳܟ ܝܳܗܒܳܐ ܥܺܕܬܳܐ ܛܽܘܒܳܐ ܐܳܘ ܡܳܪܝ ܐܰܦܪܶܝܡ

ܝܽܘܚܰܢܳܢ ܡܰܙܶܓ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܡܫܺܝܚܳܐ ܩܰܕܶܫ ܐܶܢܽܘܢ ܘܰܢܚܶܬ ܘܰܥܡܰܕ ܒܗܽܘܢ܆ ܒܗܰܘ ܥܶܕܳܢܳܐ܆ ܕܰܣܠܶܩ ܡܶܢ ܡܰܝ̈ܳܐ܆ ܫܡܰܝܳܐ ܘܰܐܪܥܳܐ. ܦܠܰܓܘ ܠܶܗ ܐܺܝܩܳܪܳܐ܆ ܫܶܡܫܳܐ ܐܰܪܟܶܢ ܙܰܠܺܝܩܰܘ̈ܗ̱ܝ ܘܟܰܘ̈ܟܒܶܐ ܣܓܶܕܘ ܠܶܗ܆ ܠܗܰܘ ܕܩܰܕܶܫ ܢܰܗܪ̈ܰܘܳܬܳܐ ܘܡܰܒܽܘ̈ܥܶܐ ܟܽܠܗܽܘܢ܆ ܗ̄ ܠܚܽܘܣܳܝ ܚܰܘ̈ܒܳܬܳܐ܀

ܫܽܘܒܚܳܐ

ܚܰܕ ܝܰܠܕܳܐ ܝܺܚܺܝܕܳܝܳܐ ܕܢܰܚ ܡܶܢ ܐܰܒܳܐ܆ ܐܳܡܪܳܐ ܥܺܕܬܳܐ ܠܕܳܪ̈ܽܘܫܶܐ ܘܠܰܬܪܶܝܢ ܠܳܐ ܡܶܬܦܠܰܓ܆ ܕܰܨܒܳܐ ܒܚܽܘܒܶܗ. ܘܰܗܘܳܐ ܒܰܪܢܳܫܳܐ܆ ܘܚܰܕܽ ܗ̱ܘ ܝܺܚܺܝܕܳܐ܆ ܒܰܐܒܳܐ ܘܰܒܡܰܪܝܰܡ܆ ܘܠܳܐ ܡܚܰܠܦܳܐ ܐ̱ܢܳܐ ܗܰܝܡܳܢܽܘܬܝ ܒܰܕܪ̈ܳܫܰܝܟܽܘܢ܆ ܕܰܐܒܳܐ ܣܳܗܶܕ ܥܰܠ ܝܰܠܕܶܗ ܠܰܬܪܶܝܢ ܠܳܐ ܡܶܬܦܠܰܓ܆ ܗ̄ ܚܪܶܡܽ ܗ̱ܘ ܕܒܳܨܶܐ ܠܶܗ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܺܝܢ ܣܳܗ̈ܕܶܐ ܡܶܛܽܠܡܳܢܳܐ
(ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܩܪܶܒ ܥܰܒܕܳܐ ܘܣܳܡ ܝܰܡܺܝܢܶܗ ܘܗܳܟܰܢ ܐܳܡܰܪ܆ ܕܡܽܘܢ ܐܺܡܰܪ ܠܳܐ ܝܳܕܰܥ ܐ̱ܢܳܐ ܘܰܐܝܟܰܢ ܐܶܡܰܠܶܠ܆ ܕܰܐܢ̱ܬܽ ܗ̱ܘ ܐܺܝܬܰܝܟ ܕܰܡܚܰܣܶܐ ܠܟܽܠ ܚܰܛܳܝ̈ܶܐ܆ ܘܰܒܛܰܝܒܽܘܬܳܟ ܐܶܬܬܰܚܬܺܝܬ ܡܶܛܽܠ ܦܽܘܪܩܳܢܰܢ܀

ܫܽܘܒܚܳܐ

ܠܳܟ ܛܽܘܒܰܝܟ ܐܳܘ ܝܽܘܚܰܢܳܢ ܟܳܗܢܳܐ ܙܰܗܝܳܐ܆ ܕܰܫܘܰܝܬ ܕܰܬܣܺܝܡ ܝܰܡܺܝܢܳܟ ܥܰܠ ܪܺܝܫܶܗ ܕܡܳܪܳܟ܆ ܛܽܘܒ ܠܶܐܕܢܰܝ̈ܟ ܕܰܫ̈ܡܰܥܝ ܡܶܢ ܠܥܶܠ ܠܩܳܠܶܗ ܕܰܐܒܳܐ܆ ܘܰܠܥܰܝ̈ܢܰܝܟ ܕܰܚ̈ܙܰܝ ܠܪܽܘܚܳܐ ܕܢܳܚܬܳܐ ܐܰܝܟ ܝܰܘܢܳܐ܀

ܡܶܢ ܥܳܠܰܡ

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢܬܽ ܗ̱ܘ ܡܢܰܚܡܳܢܗܽܘܢ܀

ܦܶܬܓܳܡܳܐ: ܡܶܛܽܠ ܕܡܰܒܽܘܥܳܐ ܕܚܰܝ̈ܶܐ ܥܰܡܳܟܽ ܗ̱ܘ: ܘܰܒܢܽܘܗܪܳܟ ܚܳܙܶܝܢܰܢ ܢܽܘܗܪܳܐ܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܙܽܘܪ ܕܰܗܒܳܐ ܕܰܚܫܺܝܠ ܘܰܩܪܺܝܡ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܪܳܐ ܠܫܰܪܺܝܪܶܗ ܒܰܪ ܥܰܩܪܽܘܬܳܐ ܘܫܰܠܚܶܗ ܩܽܘܕܡܰܘܗ̱ܝ܆ ܢܺܐܙܰܠ ܢܰܘܒܶܠ ܨܶܒܬܳܐ ܠܟܰܠܬܳܐ ܥܰܕ ܐܳܬܶܐ ܗܽܘ܆ ܢܦܰܩ ܝܽܘܚܰܢܳܢ ܘܰܛܥܺܝܢ ܓܰܙ̈ܶܐ ܘܥܽܘܬܪܳܐ ܪܰܒܳܐ܆ ܕܰܢܨܰܒܶܬ ܗ̱ܘܳܐ ܠܒܰܪ̱ܬ ܡܶܣ̈ܟܺܢܶܐ ܐܰܝܟ ܕܶܐܬܦܰܩܰܕ܀

ܩܶܪܒܰܬ ܥܺܕܬܳܐ ܟܰܠܰܬ ܡܰܠܟܳܐ ܨܶܝܕ ܝܽܘܚܰܢܳܢ܆ ܘܫܰܪܺܝ ܡܚܰܣܶܐ ܡܚܰܝܶܠ ܡܳܪܶܩ ܘܰܡܩܰܕܶܫ ܠܳܗ̇܆ ܫܶܡܥܰܬ ܩܳܠܶܗ ܘܶܐܬܪܰܡܝܰܬ ܗ̱ܘܳܬ ܒܳܬܰܪ ܡܶܠܰܘ̈ܗ̱ܝ܆ ܒܝܰܕ ܝܽܘܠܦܳܢܶܗ ܕܟܳܪܽܘܙ ܩܽܘܫܬܳܐ ܘܒܶܗ ܢܳܗܪܳܐ ܗ̱ܘܳܬ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀