ܛܟܣܐ ܕܚܕ ܒܫܒܐ ܕܦܢܛܝܩܘܣܛܝ
ܢܽܘ̣ܗܳܪܳܐ
ܡ̣ܶܢ ܒܳܬܰܪ ܫܽܘ̣ܠܳܡ ܩܽܘ̣ܪܳܒܳܐ ܒܥܶܕܳܢܳܐ ܕܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܢܛܰܝܒܽܘ̇ܢ ܠܰܩܢܳܐ ܘܰܢܣܺܝ̣ܡܽܘ̇ܢ ܒܶܗ ܡܰܝ̈ܳܐ ܘܡܶܐܣܰܪܬܳܐ ܕܛܰܪ̈ܦܶܐ ܕܓܰܘܙܳܐ ܢܣܺܝ̣ܡܽܘ̇ܢ ܒܓܰܘ ܡܰܝ̈ܳܐ ܘܰܢܣܺܝ̣ܡܽܘ̇ܢ ܠܰܩܢܳܐ ܥܰܠ ܕܰܪܓܳܐ ܕܡܰܕܒܚܳܐ. ܡܫܰܪܶܐ ܪ̈ܺܝ̣ܫܟܳܗܢܶܐ ܐܰܘ ܟܳܗܢܳܐ ܨܠܽܘ̣ܬܳܐ ܗܳܕܶܐ ܕܫܽܘ̣ܪܳܝܳܐ.
ܬܶܫܡܶܫܬܳܐ ܩܰܕܡܳܝܬܳܐ. ܒܩܺܝܢܬܳܐ ܬܠܺܝܬܳܝܬܳܐ. ܘܰܬܪܰܝܳܢܺܝܬܳܐ ܒܩܺܝܢܬܳܐ ܪܒܺܝܥܳܝܬܳܐ. ܘܰܬܠܺܝܬܳܝܬܳܐ ܒܩܺܝܢܬܳܐ ܫܒܺܝܥܳܝܬܳܐ
ܬܶܫܡܶܫܬܳܐ ܩܰܕܡܳܝܬܳܐ
ܒܩܺܝ̣ܢܬܳܐ ܬܠܺܝܬܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܐܰܫܘܳܐ ܠܰܢ ܡܳܪܝܳܐ ܪܳܚܶܡ ܐ̱ܢܳܫ̈ܳܐ ܕܰܢܣܰܒܰܥ ܠܢܰܦ̈ܫܳܬܰܢ ܘܢܶܡܠܶܐ ܠܶܒ̈ܰܘܳܬܰܢ ܡ̣ܶܢ ܫܶܩܝܳܐ ܡܶܬܗܰܘܢܳܢܳܐ ܕܚܰܡܪܳܐ ܚܰܕܬܳܐ ܕܪܽܘܚܳܐ ܦܰܪܰܩܠܺܝ̣ܛܳܐ. ܐܰܝܟܰܢܳܐ ܕܟܰܕ ܒܶܗ ܡܶܬܕܰܟܶܝܢܰܢ ܘܡܶܬܩܰܕܫܺܝ̣ܢܰܢ܆ ܒܝܰܕ ܠܶܫܳܢ̈ܶܐ ܕܟܰܝ̈ܳܐ ܘܩܰܕܺܝ̣̈ܫܶܐ. ܢܙܰܡܰܪ ܬܶܫܒ̈ܚܳܬܳܐ ܩܰܕܺܝ̣̈ܫܳܬܳܐ ܠܳܟ ܐܰܒܳܐ ܩܰܕܺܝܫܳܐ ܘܠܰܒܪܳܟ ܝܺܚ̣ܺܝܳܕܝܳܐ ܘܰܠܪܽܘܚܳܐ ܕܺܝ̣ܠܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܢܝܳܢܳܐ ܕܪܰܚܶܡܥܠܰܝ
ܗܰܘ ܕܰܒܫܽܘܒܚܳܐ ܐܰܘ ܐܶܡܳܐ ܕܟܺܝܬܳܐ
ܗܰܘ ܕܫܽܘ̣ܘܕܳܝܳܐ ܫܰܪܺܝ̣ܪܳܐ ܕܰܡܠ̣ܰܟ܆ ܝܰܘܡܳܢ ܫܰܕܰܪ ܠܰܫܠܺܝ̣̈ܚܶܐ ܕܰܓܒ̣ܳܐ܆ ܪܰܚܶܡܥܠܰܝܢ ܐܰܠܳܗܳܐ܀
ܪܽܘܚܳܐ ܕܩܽܘ̣ܕܫܳܐ ܢܚ̣ܶܬ ܗ̱ܘܳܐ ܥܰܠ ܫܠܺܝ̣̈ܚܶܐ. ܘܟܽܠ ܫܽܘ̣̈ܟܳܢܶܐ ܫܒܺܝ̈ܚܶܐ ܡܠܳܐ ܐܶܢܽܘ̇ܢ܆ ܪܰܚܶܡܥܠܰܝܢ ܐܰܠܳܗܳܐ܀
ܕܰܟܳܐ ܘܩܰܕܶܫ ܠܟܽܠܰܢ ܦܳܪܽܘ̣ܩܰܢ. ܒܪܽܘܚܳܐ ܕܺܝܠܳܟ ܗܰܘ ܡܰܥܒܶܕ ܚܰܝ̈ܶܐ܆ ܪܰܚܶܡܥܠܰܝܢ ܐܰܠܳܗܳܐ܀
ܪܽܘܚܳܐ ܕܩܽܘ̣ܕܫܳܐ ܒܰܕܡܽܘ̣ܬ ܠܶܫܳܢ̈ܶܐ܆ ܦܰܠܶܓ ܡܳܪܰܢ ܠܰܫܠܺܝ̣̈ܚܰܘܗ̱ܝ ܓܒܰܝ̈ܳܐ܆ ܪܰܚܶܡܥܠܰܝܢ ܐܰܠܳܗܳܐ܀
ܫܽܘܒܚܳܐ
ܢܶܣܓܽܘ̣ܕ ܟܽܠܰܢ ܠܪܽܘܚܳܐ ܩܰܕܺܝܫܳܐ܆ ܗܰܘ ܕܥܰܠ ܫܠܺܝ̣̈ܚܶܐ ܝܰܘܡܳܢܳܐ ܐܰܓܶܢ. ܪܰܚܶܡܥܠܰܝܢ ܐܰܠܳܗܳܐ܀
ܨܠܽܘ̣ܬܳܐ
ܐܰܥܺܝ̣ܪ ܡܳܪܝ̱ ܠܠܶܒܰܘ̈ܳܬܰܢ܆ ܒܢܽܘ̣ܗܪܳܐ ܕܛܰܝܒܽܘ̣ܬܳܟ ܡ̣ܶܢ ܛܽܘ̣ܒܳܥܳܐ ܕܰܚܛܺܝ̣ܬܳܐ܆ ܘܰܐܢܗܰܪ ܠܡܰܕ̈ܥܰܝܢ ܒܨܶܡ̈ܚܶܐ ܡܶܬܝܰܕ̈ܥܳܢܶܐ ܕܪܽܘ̣ܚܳܟ ܩܰܕܺܝܫܳܐ܆ ܘܩܰܕܶܫ ܢܰܦ̈ܫܳܬܰܢ ܒܝܰܕ ܫܽܘ̣̈ܟܳܢܶܐ ܕܺܝ̣ܠܶܗ ܫܒܺܝ̣̈ܚܶܐ ܘܰܐܠܳܗܳܝ̈ܶܐ܆ ܘܚܰܟܶܡ ܪ̈ܶܥܝܳܢܰܝܢ ܠܡܶܫܬܰܘܕܳܥܽܘ̣ ܣܶܓܕܬܳܐ ܫܰܪܺܝ̣ܪܬܳܐ ܘܡܳܪܳܢܳܝܬܳܐ ܕܰܬܠܳܬܳܐ ܩܢܽܘ̈ܡܶܐ ܫܰܘ̈ܝ݂ܰܝ݂ ܒܐܽܘ̣ܣܺܝܰܐ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܩܳܢܘ̣ܢܳܐ ܝܰܘܢܳܝܳܐ
ܢܫܰܒܰܚ ܠܡܳܪܝܐ ܓܰܐܝܳܐ ܕܶܐܬܓܰܐܺܝ̣ ܥܰܠ ܪ̈ܰܟܫܳܐ ܘܪ̈ܳܟܒܰܝܗܽܘ̇ܢ ܐܰܪܡܺܝ̣ ܒܝܰܡܳܐ.
(ܡܰܦܩܳܢܳܐ: ܝܗ܆ܒܐ)ܟܰܕ ܚܰܠܶܕ ܘܶܐܬܚܰܦܺܝ̣ ܒܥܰܪܦܶܠܐ܆ ܗܰܘ ܠܥܶܓ ܠܶܫܳܢܳܐ ܪܗܺܝ̣ܛܪܺܐܺܝܬ܆ ܠܶܥܙܶܗ ܠܢܳܡܽܘ̣ܣܳܐ ܣܪܺܝܛ ܠܰܐܠܳܗܳܐ܆ ܟܰܕ ܢܰܦܨܶܗ ܠܰܫܥܺܝ̣ܢܳܐ ܕܦܰܓܪܳܐ ܡܶܢ ܗܰܘܢܳܐ܆ ܬܽܘ̣ܒ ܐܶܬܝܰܬܰܪ ܘܶܐܬܶܐܪܶܙ ܒܺܝ̣ܕܰܥܬܳܐ ܕܪܽܘ̣ܚܩܽܘ̣ܕܫܳܐ ܘܫܰܘܫܶܛ ܐܰܠܳܗܳܐܝܬ ܬܶܫܒ̈ܚܳܬܳܐ܀
ܬܰܩܺܝܦܳܐ ܘܰܡܫܰܒܚܳܐ ܝܰܗ ܡܳܪܝܳܐ ܘܰܗܘܳܐ ܠܰܢ ܦܳܪܘ̣ܩܳܐ.
(ܡܰܦܩܳܢܳܐ :ܝܗ. ܒ)ܐܶܡ̣ܰܪ ܗܰܘ ܦܽܘ̣ܡܳܐ ܕܚܺܝ̣ܠܳܐ ܘܩܰܕܺܝܫܳܐ ܘܰܡܫܰܒܚܳܐ܆ ܕܠܳܐ ܢܶܗܘܶܐ ܒܟܽܘ̇ܢ ܕܦܳܪܶܫ ܘܓܳܠܶܙ ܠܪ̈ܳܚܡܰܝ ܘܚܰܒܪ̈ܰܝ܆ ܕܗܳܐ ܐܶܢܳܐ ܠܥܶܠ ܡܶܢ ܬܪܽܘܢܳܘܣ ܡܫܰܒܚܳܐ ܗܰܘ ܕܰܐܒܳܐ ܥܰܡܶܗ ܝܳܬܶܒ ܐ̱ܢܳܐ܆ ܘܳܐܫܶܕ ܐ̱ܢܳܐ ܠܳܗ̇ ܠܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ. ܥܰܠ ܐܰܝܠܶܝܢ ܕܣܳܘܚܺܝ̣ܢ ܕܢܶܨܡܚܽܘ̇ܢ ܒܶܗ܀
ܡܫܰܡܫܳܢܳܐ: ܣܛܳܘܡܶܢ ܩܰܐܠܳܘ̣ܣ ܩܽܘܪܝܶܐܠܰܝܣܳܘܢ܀
ܦܪܽܘ̣ܡܝܽܘܢ
ܬܶܫܒܽܘܚܬܳܐ ܠܗܰܘ ܓܢܺܝ̣ܙܳܐ ܕܰܟܣܶܐ ܘܡܰܒܥܰܕ ܡܶܢ ܟܽܠܗܽܘܢ ܙܰܘ̈ܥܶܐ ܘܚܽܘ̈ܫܳܒܶܐ ܘܗܰܘ̈ܢܶܐ ܐ̱ܢܳܫܳܝ̈ܳܐ܆ ܗܰܘ ܕܗܽܘ̣ ܡܶܢܶܗ ܐܺܝ̣ܬܰܘܗ̱ܝ ܘܗܽܘ̣ ܠܶܗ ܣܳܦܶܩ܆ ܐܺܝ̣ܬܰܘܗ̱ܝ ܕܶܝܢ ܥܳܒܽܘ̣ܕܳܐ ܘܰܡܛܰܟܣܳܢܳܐ ܕܟܽܠܗܶܝܢ ܡܶܬܚܰܙ̈ܝܳܢܝܳܬܳܐ ܟܺܝ̣ܬ ܘܠܳܐ ܡܶܬܚܰܙܝܳܢܝ̈ܳܬܳܐ܆ ܐܺܝ̣ܬܰܘܗ̱ܝ ܬܽܘ̣ܒ ܕܠܳܐ ܫܽܘ̣ܪܳܝܳܐ ܘܰܡܩܰܘܶܐ ܕܠܳܐ ܫܽܘ̣ܠܳܡܳܐ܆ ܐܺܝ̣ܬܝܳܐ ܡܬܽܘ̣ܡܳܝܳܐ ܘܠܳܐ ܡܶܬܕܰܪܟܳܢܳܐ܆ ܚܰܕ ܐܰܠܳܗܳܐ ܫܰܪܺܝ̣ܪܳܐ܆ ܚܰܕ ܟܝܳܢܳܐ܆ ܚܰܕ ܫܽܘ̣ܠܛܳܢܳܐ܆ ܚܰܕ ܨܶܒܝܳܢܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܕܠܰܝܬ ܒܶܗ ܫܡܳܐ ܕܠܳܐ ܩܢܽܘ̣ܡܳܐ܆ ܘܠܳܐ ܩܢܽܘ̣ܡܳܐ ܕܰܛܠܶܐ ܐܰܘ̇ ܕܩܰܫܺܝ̣ܫ ܡ̣ܶܢ ܩܢܽܘ̣ܡܳܐ܆ ܘܠܳܐ ܫܽܘ̣ܚܠܳܦܳܐ ܐܰܘ̇ ܫܽܘ̣ܓܢܳܝܳܐ ܕܰܩܢܽܘ̣ܡܳܐ ܒܪܰܒܽܘ̣ܬܳܐ ܐܰܘ ܒܰܙܥܽܘ̣ܪܽܘ̣ܬܳܐ܆ ܘܠܳܐ ܫܡܳܐ ܐܰܘ̇ ܩܢܽܘ̣ܡܳܐ ܕܰܛܠܶܐ ܐܰܘ̇ ܡܫܰܘ̣ܚܰܕ ܠܒܰܪ ܡ̣ܶܢ ܐܺܝ̣ܬܽܘ̣ܬܶܗ܆ ܐܶܠܳܐ ܐܶܢ ܐܰܒܳܐ ܡܶܬܶܐܡܰܪ ܒܪܳܐ ܘܪܽܘܚܳܐ ܡܶܢܶܗ ܐܶܢܽܘ̇ܢ܆ ܘܶܐܢ ܒܪܳܐ ܡܶܬܶܐܡܰܪ ܐܰܒܳܐ ܘܪܽܘܚܳܐ ܒܶܗ ܡܶܬܝܰܕܥܺܝ̣ܢ܆ ܘܶܐܢ ܪܽܘܚܳܐ ܡܶܬܶܐܡܰܪ ܐܰܒܳܐ ܘܰܒܪܳܐ ܒܶܗ ܡܫܰܡܠܶܝܢ܆ ܐܰܒܳܐ ܡܰܢ ܝܳܠܽܘ̣ܕܳܐ ܘܠܳܐ ܝ̣ܺܠܺܝ̣ܕܳܐ܆ ܒܪܳܐ ܕܶܝܢ ܝ̣ܺܠܺܝ̣ܕܳܐ ܘܠܳܐ ܝܳܠܽܘ̣ܕܳܐ܆ ܪܽܘܚܳܐ ܩܰܕܺܝܫܳܐ ܕܢܳܦܶܩ ܡ̣ܶܢ ܐܰܒܳܐ ܘܢܳܣܶܒ ܡ̣ܶܢ ܒܪܳܐ ܘܺܐܝܬܰܘܗ̱ܝ ܒܰܪ ܟܝܳܢܳܐ ܘܒܰܪ ܐܺܝ̣ܬܽܘ̣ܬܶܗ ܕܰܐܒܳܐ ܕܠܶܗ ܝܳܐܶܐ ܫܽܘܒܚܳܐ ܘܐܺܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܡܰܐܓܢܳܢܽܘ̣ܬܳܐ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫ̈ܳܥܶܐ ܘܙܰܒܢ̈ܶܐ ܘܰܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܐܰܠܳܗܳܐ ܓܢܺܝ̣ܙܳܐ ܘܠܳܐ ܡܶܬܥܰܩܒܳܢܳܐ܆ ܡܬܽܘ̣ܡܳܝܳܐ ܟܺܝ̣ܬ ܘܠܳܐ ܡܶܬܡܰܫܚܳܢܳܐ܆ ܗܰܘ ܕܒܰܠܚܽܘ̣ܕܳܝܽܘ̣ܬ ܐܽܘ̣ܣܺܝܰܐ ܡܶܬܺܝ̣ܕܰܥ ܐܰܢ̱ܬ܆ ܘܒܰܬܠܳܬܳܐ ܩܢܽܘ̣̈ܡܶܐ ܩܰܕܺܝ̣̈ܫܶܐ ܡܶܣܬܰܟܰܠ ܐܰܢ̱ܬ܆ ܗܰܘ ܕܒܰܬܠܳܬ ܕܺܝ̣ܠܳܝ̈ܳܬܳܐ ܡܝܰܩܢܳܢ̈ܝܳܬܳܐ (ܝܽܘܩܢܳܐ܆ ܨܰܠܡܳܐ܆ ܨܽܘܪܬܳܐ) ܡܶܬܗܰܘܢܰܢ ܐܰܢ̱ܬ ܡ̣ܶܢ ܟܽܠܗܽܘܢ ܟܝ̈ܳܢܶܐ ܡܠܺܝ̣̈ܠܶܐ܆ ܕܚܰܕ ܓܶܝܪ ܐܰܠܳܗܳܐ ܐܺܝ̣ܬܰܝܟ ܕܡܶܬܺܝ̣ܕܰܥ ܒܰܬܠܳܬܳܐ ܩܢܽܘ̣̈ܡܶܐ ܣܓܺܝ̈ܕܶܐ܆ ܬܠܺܝ̣ܬܳܝܽܘܬܳܐ ܡܫܰܡܠܰܝܬܳܐ ܡ̣ܶܢ ܬܠܳܬܳܐ ܩܢܽܘ̣̈ܡܶܐ ܡܫܰܡ̈ܠܰܝܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܚܕܳܐ ܐܽܘ̣ܣܺܝܰܐ ܡܥܰܠܰܝܬܳܐ܆ ܚܰܕ ܟܝܳܢܳܐ ܡܬܽܘ̣ܡܳܝܳܐ܆ ܚܰܕ ܐܰܠܳܗܳܐ ܫܰܪܺܝ̣ܪܳܐ܆ ܡܶܛܽܠ ܕܰܨܒܰܝܬ ܐܳܘ ܐܰܠܳܗܳܐ ܐܰܒܳܐ ܕܰܬܚܰܕܶܬ ܠܒܰܪܢܳܫܳܐ ܗܰܘ ܕܰܒܨܰܠܡܳܟ ܐܶܬܒܪܺܝ̣ ܘܰܒܚܺܐܪܽܘ̣ܬܶܗ ܐܶܫܬܰܪܓܰܠ ܠܘܳܬ ܣܶܓܕܰܬ݂ ܫܺܐܕ̈ܶܐ܆ ܠܡܶܠܬܳܐ ܘܰܒܪܳܐ ܕܺܝ̣ܠܳܟ ܫܰܕܰܪܬ ܠܬܘܪܳܨܰܢ܆ ܘܟܰܕ ܗ̣ܘܳܐ ܕܠܳܐ ܫܘ̣ܚܠܳܦܳܐ ܒܰܪܢܳܫܳܐ ܐܶܫܬܰܥܝ̣ ܠܰܢ ܢܰܗܺܝ̣ܪܳܐܺܝܬ ܘܦܰܫܶܩ ܠܰܢ ܠܠܳܐ ܡܶܬܦܰܫܩܳܢܽܘ̣ܬܳܐ ܕܰܐܠܳܗܽܘ̣ܬܳܐ܆ ܘܰܐܘܕܰܥ ܠܰܢ ܠܠܳܐ ܝ̣ܺܕܺܝ̣̈ܥܳܬܳܐ ܘܟܰܣ̈ܝܳܬܳܐ ܕܚܶܟܡܬܳܐ ܕܺܝ̣ܠܳܟ܆ ܒܗܳܝ ܕܢܶܕܥܳܟ ܠܳܟ ܘܰܕܡܶܢܳܟ ܐܺܝ̣ܬܰܘܗ̱ܝ. ܐܰܠܶܦ ܠܰܢ ܬܽܘ̣ܒ ܥܰܠ ܢܽܘ̣ܗܪܳܐ ܬܠܺܝ̣ܬܳܝܳܐ ܕܰܐܠܳܗܽܘ̣ܬܳܐ܆ ܗܰܘ ܕܺܐܝܬܰܘܗ̱ܝ ܩܢܽܘ̣ܡܶܗ ܪܽܘܚܳܐ ܩܰܕܺܝܫܳܐ ܗܰܘ ܕܡܶܢܳܟ ܐܰܒܳܐ ܢܳܦܶܩ ܠܳܐ ܡܶܬܦܰܫܩܳܢܳܐܺܝܬ܆ ܪܽܘܚܳܐ ܕܰܫܪܳܪܳܐ܆ ܪܽܘܚܳܐ ܕܚܶܟܡܬܳܐ܆ ܪܽܘܚܳܐ ܕܓܰܢ̱ܒܳܪܘ̣ܬܳܐ܆ ܪܽܘܚܳܐ ܕܺܝ̣ܕܰܥܬܳܐ܆ ܪܽܘܚܳܐ ܡܫܰܡܠܝܳܢܳܐ܆ ܪܽܘܚܳܐ ܓܳܡܽܘ̣ܪܳܐ܆ ܪܽܘܚܳܐ ܠܳܐ ܐܰܝܢܳܝܳܐ܆ ܪܽܘܚܳܐ ܠܳܐ ܟܡܳܢܳܝܳܐ܆ ܪܽܘܚܳܐ ܪܳܚܶܡ ܒܢܰܝ̈ܢܳܫܳܐ܆ ܪܽܘܚܳܐ ܡܰܬܩܶܢ ܢܒܺܝ̈ܶܐ܆ ܪܽܘܚܳܐ ܡܚܰܟܶܡ ܫܠܺܝ̈ܚܶܐ܆ ܪܽܘܚܳܐ ܡܙܰܝܶܢ ܣܳܗ̈ܕܶܐ܆ ܪܽܘܚܳܐ ܡܗܰܕܶܐ ܡܰܠܦܳܢ̈ܶܐ܆ ܪܽܘܚܳܐ ܣܳܥܰܪ ܛܳܒ̈ܳܬܳܐ܆ ܪܽܘܚܳܐ ܚܰܝܠܬܳܢܳܐ܆ ܪܽܘܚܳܐ ܡܨܶܐ ܚܺܝ̣ܠ ܟܽܠ܆ ܗܰܘ ܦܫܝ̣ܛܳܐ ܒܰܟܝܳܢܶܗ܆ ܗܰܘ ܣܰܓܝ̣ ܡܢܰܘ̈ܳܬܳܐ ܒܡܰܥܒܕܳܢܘ̣ܬܶܗ܆ ܗܰܘ ܡܰܒܽܘ̣ܥܳܐ ܕܫܽܘ̣̈ܟܳܢܶܐ ܐܰܠܳܗܳܝ̈ܶܐ܆ ܗܰܘ ܫ̇ܘܶܐ̣ ܠܳܟ ܒܐܽܘ̣ܣܺܝܰܐ ܘܠܺܝ̣ܚܺܝ̣ܕܳܝܳܐ ܒܪܳܟ܆ ܗܰܘ ܕܡܰܠܶܠ ܒܢܳܡܽܘ̣ܣܳܐ ܘܒܰܢܒܺܝ̈ܶܐ ܘܒܰܫܠܺܝ̣̈ܚܶܐ܆ ܗܰܘ ܕܰܠܟܽܠ ܩܰܪܺܝ̣ܒ ܘܰܠܟܽܠ ܡܳܠܶܐ܆ ܡܰܥܒܶܕ ܕܶܝܢ ܩܽܘ̣̈ܕܳܫܶܐ ܡܫܰܠܛܳܐܺܝܬ ܘܠܰܘ ܥܰܒܕܳܢܳܐܺܝܬ ܥܰܠ ܗܳܢܽܘ̇ܢ ܕܨܳܒܶܐ܆ ܕܒܺܐܝ̈ܕܰܘܗ̱ܝ ܠܳܟ ܡܶܬܟܰܫܦܝ̣ܢܰܢ ܒܝܰܘܡܳܐ ܗܳܢܳܐ ܕܥܺܐܕܳܐ ܢܰܨܺܝ̣ܚܳܐ ܕܦܰܢܛܺܝ̣ܩܳܘܣܛܺܝ ܕܒܶܗ ܐܰܓܶܢ ܥܰܠ ܫܠܺܝ̣̈ܚܶܐ ܩܰܕܺܝ̣̈ܫܶܐ ܕܳܐܦ ܥܠܰܝܢ ܣܳܓܽܘ̣̈ܕܶܐ ܥܰܒܕܰܝ̈ܟ ܢܰܐܓܶܢ܆ ܟܰܕ ܡܳܠܶܐ ܐܰܢ̱ܬ ܠܰܢ ܡ̣ܶܢ ܫܽܘ̣ܟܳܢܰܘ̈ܗ̱ܝ ܩܰܕܺܝ̣̈ܫܶܐ܆ ܘܬܳܠܶܫ ܐܰܢ̱ܬ ܡܶܢܰܢ ܠܟܽܠܳܗ̇ ܢܰܫܺܝ̣ܫܽܘ̣ܬܳܐ ܕܰܚܛܝ̣ܬܳܐ܆ ܘܰܡܩܺܝܡ ܐܰܢ̱ܬ ܠܰܢ ܗܰܝܟ̈ܠܶܐ ܕܟܰܝ̈ܳܐ ܘܰܐܘ̈ܳܢܶܐ ܠܡܰܥܡܪܳܐ ܕܺܝ̣ܠܳܟ܆ ܘܰܡܚܰܘܶܐ ܐܰܢ̱ܬ ܠܰܢ ܠܳܐ ܡܶܫܬܰܥܒܕ̈ܳܢܶܐ ܠܚܺܐܦ̈ܶܐ ܕܰܒܥܶܠܕ̈ܒܳܒܶܐ܆ ܘܥܳܒܶܕ ܐܰܢ̱ܬ ܥܽܘ̣ܗܕܳܢܳܐ ܛܳܒܳܐ ܘܢܰܘܚܳܐ ܡܚܰܕܝܳܢܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡܢ̈ܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝ̣ܫܬܳܐ܆ ܡܰܐܠܽܘ̇ܢ ܕܶܝܢ ܠܰܐܒܳܗܰܝ̈ܢ ܘܪ̈ܰܒܳܢܰܝܢ ܘܰܐܚܰܝ̈ܢ ܕܒܰܬܪܺܝ̣ܨܽܘ̣ܬ ܫܽܘܒܚܳܐ ܫܰܠܶܡܘ̱ ܚܰܝܰܝ̈ܗܽܘ̇ܢ܆ ܡܶܛܽܠ ܕܰܐܢ̱ܬ ܡܰܡܠܶܟ ܐܰܢ̱ܬ ܥܠܰܝܢ ܐܰܠܳܗܳܐ ܐܰܒܳܐ ܡܳܪܳܐ ܕܟܽܠ ܘܺܝ̣ܚܺܝ̣ܕܳܝܳܐ ܒܪܳܟ ܡܰܚܝܳܢܳܐ ܕܟܽܠ܆ ܘܪܽܘܚܳܐ ܕܺܝܠܳܟ ܛܽܘ̣ܒܬܳܢ ܒܟܽܠ ܘܰܣܓܺܝ̣ܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܐܽܘ̣ܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ: ܒܩ̄ ܐܶܢܳܐ ܐ̱ܢܳܐ ܢܽܘ̣ܗܪܳܐ ܫܰܪܺܝ̣ܪܳܐ
ܪܽܘ̣ܚ ܩܽܘ̣ܕܫܳܐ ܡ̣ܶܢ ܪܰܘܡܳܐ ܢܶܚܬܰܬ݂. ܒܗܳܢܳܐ ܝܰܘܡܳܐ ܩܰܕܺܝܫܳܐ. ܘܰܒܓܶܢܣܳܐ ܕܐ̱ܢܳܫ̈ܳܐ ܐܶܬܚܰܠܛܰܬ݂. ܕܢܶܗܘܽܘ̇ܢ ܠܳܗ̇ ܒܢܰܝ̈ ܡܰܠܟܽܘ̣ܬܳܐ. ܒܪܺܝܟ ܗ̱ܘ̣ ܕܫܰܕܰܪ ܡܽܘ̣ܠܟܳܢܰܘ̈ܗ̱ܝ܆ ܘܒܰܝܰܐ ܐܶܢܽܘ̇ܢ ܠܰܫܠܺܝ̣̈ܚܰܘܗ̱ܝ܆ ܘܦܰܠܶܓ ܠܗܽܘܢ ܠܶܫܳܢ̈ܶܐ܆ ܕܢܰܟܪܙܽܘܢ ܒܥܰܡ̱̈ܡܶܐ ܘܶܐܡܘ̈ܳܬܳܐ. ܬܠܺܝ̣ܬܳܝܽܘܬܳܐ ܩܰܕܺܝ̣ܫܬܳܐ܀
ܫܽܘܒܚܳܐ
ܟܰܕ ܩܰܒܶܠܘ̱ ܫܠܺܝ̣̈ܚܶܐ ܩܰܕܺܝ̣̈ܫܶܐ. ܦܰܪܰܩܠܺܝ̣ܛܳܐ ܡܶܢ ܪܰܘܡܳܐ܆ ܒܠܶܫ̈ܳܢܶܐ ܚܰܕ̈ܬܶܐ ܡܰܠܶܠܘ̱ ܗ̱ܘܰܘ܆ ܘܚܰܝܠܳܐ ܟܰܣܝܳܐ ܐܶܬܥܰܛܰܦܘ̱܆ ܘܰܢܦܰܩܘ̱ ܐܰܟܪܶܙܘ̱ ܒܰܒܪܺܝ̣ܬܳܐ܆ ܣܒܰܪܬܳܐ ܕܡܰܠܝܳܐ ܒܽܘ̣ܝܳܐܳܐ܆ ܘܬܰܠܡܶܕܘ̱ ܥܰܡ̱̈ܡܶܐ ܣܰܓܺܝ̈ܶܐܐ܆ ܘܰܒܡܰܝ̈ܳܐ ܐܰܥܡܶܕܘ̱ ܐܶܢܽܘܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ܀
ܥܶܛܪܳܐ
ܩܰܕܺܝܫܳܐ ܘܰܡܩܰܕܫܳܢܳܐ ܕܟܽܠ ܡܳܪܝܳܐ ܕܰܫܪܳܪܳܐ܆ ܗܰܘ ܕܩܰܕܶܫ ܠܰܫܠܺܝ̣̈ܚܶܐ ܩܰܕܺܝ̣̈ܫܶܐ ܒܝܰܕ ܪܽܘ̣ܚܶܗ ܩܰܕܺܝܫܳܐ܆ ܟܰܕ ܒܠܶܫܳܢ̈ܶܐ ܕܢܽܘܪܳܐ ܐܰܓܶܢ ܥܠܰܝܗܽܘ̇ܢ܆ ܩܰܕܶܫܳܝܗ̱ܝ ܠܦܺܝܪܡܳܐ ܗܳܢܳܐ ܕܰܩܕܳܡܰܝܟ ܡܩܰܪܒܺܝ̣ܢܰܢ ܒܝܰܕ ܪܽܘ̣ܚܳܟ ܩܰܕܺܝܫܳܐ܆ ܘܫܰܟܶܢ ܠܰܢ ܒܶܗ ܚܽܘ̣ܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ. ܘܕܰܟܳܐ ܠܠܶܒܰܘ̈ܳܬܰܢ ܡ̣ܶܢ ܟܽܠܶܗ ܝܰܥܪܳܐ ܕܥܰܘܠܳܐ ܘܟܽܘ̣̈ܒܶܐ ܕܰܚܛܺܝ̣ܬܳܐ. ܟܰܕ ܒܟܽܠܫܳܥ ܡ̣ܶܢ ܪ̈ܰܚܡܰܝܟ ܡܶܣܬܰܥܪܺܝ̣ܢܰܢ. ܕܢܰܘܕܶܐ ܘܢܶܣܓܽܘ̣ܕ ܘܰܢܫܰܒܰܚ ܠܳܟ ܘܠܺܝ̣ܚܺܝܕܳܝܳܐ ܒܪܳܐ ܕܺܝ̣ܠܳܟ ܘܰܠܪܽܘܚܳܐ ܕܺܝ̣ܠܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܘܳܐܡܪܺܝ̣ܢ ܙܘ̣ܡܳܪܳܐ (ܪܒܺܝ̣ܥܳܝܳܐ)
ܫܡܰܥܘ̱ ܠܰܢܒܺܝ̈ܶܐ ܕܰܐܝܟ ܣܺܝ̣̈ܠܽܘ̣ܢܶܐ ܕܕܰܗܒܳܐ ܓܰܒܝܳܐ ܢܳܣ̇ܟܺܝܢ ܚܰܝ̈ܶܐ ܡ̣ܶܢ ܦܽܘ̣ܡܰܝ̈ܗܽܘ̇ܢ ܒܶܐܕ̈ܢܶܐ ܕܫܳܡܽܘ̣̈ܥܶܐ܆ ܘܨܽܘܬܘ̱ ܠܰܫܠܺܝ̣̈ܚܶܐ ܕܰܐܝܟ ܫܺܝ̣ܦܽܘ̣ܪ̈ܶܐ ܩܳܥܶܝܢ ܒܰܒܪܺܝ̣ܬܳܐ܆ ܢܽܘ̣ܗܪܳܐ ܘܚܰܝ̈ܶܐ ܘܡܰܠܟܽܘ̣ܬܳܐ ܫܡܰܝܳܢܺܝ̣ܬܳܐ܆ ܡܛܰܝܰܒ ܘܰܢܛܺܝ̣ܪ ܠܟܽܠܗܽܘܢ ܐܰܝܠܶܝܢ ܕܠܰܣܒܰܪܬܶܗ ܕܶܐܘܰܢܓܶܠܝܽܘܢ ܩܰܕܺܝܫܳܐ ܫܳܡܥܺܝܢ܀
ܩܶܪ̈ܝܳܢܶܐ:
ܒܪܺܝܬܳܐ. ܝܐ: ܐ ـ ܛ Genesis 11:1-9
ܕܰܝܳܢ̈ܶܐ. ܝܓ: ܟܕ ـ ܐ ܕܩܦ̄ ܕܝܕ Judges 13:24-14:7
ܦܪܰܟܣܺܝܣ. ܝܛ: ܐ ـــܘ Acts 19:1-6
ܐܶܓܰܪܬܶܗ ܕܦܰܘܠܽܘ̣ܣ ܫܠܺܝ̣ܚܳܐ ܕܰܠܘܳܬ ܩܽܘ̣ܪ̈ܺܝ̣ܢܬܳܝܶܐ ܩܰܕܡܳܝܬܳܐ
ܝܕ: ܟܟ ـ ܟܗ I Corinthians 14:20-25
ܐܰܚܰܝ̈ ܠܳܐ ܗܘܰܝܬ݁ܽܘܢ ܛܠܶܝܢ ܒ݁ܪ̈ܶܥܝܳܢܰܝܟ݁ܽܘܢ ܐܶܠܳܐ ܠܒ݂ܺܝ̈ܫܳܬ݂ܳܐ ܗܘܰܘ ܝܰܠܽܘ̈ܕ݂ܶܐ ܘܰܒ݂ܪ̈ܶܥܝܳܢܰܝܟ݁ܽܘܢ ܗܘܰܘ ܓ݁ܡܺܝܪܺܝܢ܂ ܒ݁ܢܳܡܽܘܣܳܐ ܟ݁ܬ݂ܺܝܒ݂ ܕ݁ܰܒ݂ܡܰܡܠ݈ܠܳܐ ܢܽܘܟ݂ܪܳܝܳܐ ܘܰܒ݂ܠܶܫܳܢܳܐ ܐ݈ܚܪܺܢܳܐ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ ܐܳܦ݂ܠܳܐ ܗܳܟ݂ܰܢܳܐ ܢܶܫܡܥܽܘܢܳܢܝ ܐܳܡܰܪ ܡܳܪܝܳܐ܂ ܡܳܕ݂ܶܝܢ ܠܶܫܳܢ̈ܶܐ ܠܳܐܬ݂ܳܐ ܗܽܘ ܣܺܝܡܺܝܢ ܠܳܐ ܠܰܡܗܰܝܡ̈ܢܶܐ ܐܶܠܳܐ ܠܰܐܝܠܶܝܢ ܕ݁ܠܳܐ ܡܗܰܝܡܢܺܝܢ ܢܒ݂ܺܝܰܘ̈ܳܬ݂ܳܐ ܕ݁ܶܝܢ ܠܳܐ ܗ݈ܘܳܐ ܠܰܐܝܠܶܝܢ ܕ݁ܠܳܐ ܡܗܰܝܡܢܺܝܢ ܐܶܠܳܐ ܠܰܐܝܠܶܝܢ ܕ݁ܰܡܗܰܝܡܢܺܝܢ܂ ܐܶܢ ܗܽܘ ܗܳܟ݂ܺܝܠ ܕ݁ܬ݂ܶܬ݂ܟ݁ܰܢܰܫ ܟ݁ܽܠܳܗ̇ ܥܺܕ݈݁ܬ݁ܳܐ ܘܟ݂ܽܠܗܽܘܢ ܒ݁ܠܶܫܳܢ̈ܶܐ ܢܡܰܠܠܽܘܢ ܘܢܶܥܠܽܘܢ ܗܶܕ݂ܝܽܘ̈ܛܶܐ ܐܰܘ ܐܰܝܠܶܝܢ ܕ݁ܠܳܐ ܡܗܰܝܡܢܺܝܢ ܠܳܐ ܐܳܡܪܺܝܢ ܕ݁ܗܳܠܶܝܢ ܫܢܰܘ ܠܗܽܘܢ܂ ܘܶܐܢ ܟ݁ܽܠܟ݂ܽܘܢ ܬ݁ܶܗܘܽܘܢ ܡܶܬ݂ܢܰܒ݁ܶܝܢ ܘܢܶܥܽܘܠ ܠܘܳܬ݂ܟ݂ܽܘܢ ܗܶܕ݂ܝܽܘܛܳܐ ܐܰܘ ܡܰܢ ܕ݁ܠܳܐ ܡܗܰܝܡܶܢ ܡܶܬ݂ܒ݁ܨܶܐ ܡܶܢ ܟ݁ܽܠܟ݂ܽܘܢ ܘܡܶܬ݂ܟ݁ܰܘܰܢ ܡܶܢ ܟ݁ܽܠܟ݂ܽܘܢ܂ ܘܟ݂ܰܣ̈ܝܳܬ݂ܳܐ ܕ݁ܠܶܒ݁ܶܗ ܡܶܬ݂ܓ݁ܰܠܝ̈ܳܢ ܘܗܳܝܕ݁ܶܝܢ ܢܶܦ݁ܶܠ ܥܰܠ ܐܰܦ݁ܰܘ̈ܗ݈ܝ ܘܢܶܣܓ݁ܽܘܕ݂ ܠܰܐܠܳܗܳܐ ܘܢܺܐܡܰܪ ܫܰܪܺܝܪܳܐܺܝܬ ܐܰܠܳܗܳܐ ܐܺܝܬ݂ ܒ݁ܟ݂ܽܘܢ܀
ܗܽܘ̣ܠܳܠܳܐ ܘܦܶܬܓܳܡܳܐ
ܪܽܘ̣ܚܳܟ ܡܒܰܣܡܬܳܐ ܬܕܰܒܪܰܢܝ̱ ܒܽܐܘ̣ܪܚܳܟ ܕܚܰܝ̈ܶܐ ܗ̄ܘܗ̄ ܀
ܐܶܘܰܢܓܶܠܝܽܘܢ ܕܝܽܘܚܰܢܳܢ
(ܝܕ: ܐ ـ ܝܙ John 14:1-17)
ܠܳܐ ܢܶܬ݁ܕ݁ܰܘܰܕ݂ ܠܶܒ݁ܟ݂ܽܘܢ ܗܰܝܡܶܢܘ ܒ݁ܰܐܠܳܗܳܐ ܘܒ݂ܺܝ ܗܰܝܡܶܢܘ܂ ܣܰܓ݁ܺܝ̈ܐܝܺܢ ܐܶܢܽܘܢ ܐܰܘܳܢ̈ܶܐ ܒ݁ܶܝܬ݂ ܐܳܒ݂ܝ ܘܶܐܠܳܐ ܐܳܡܰܪ ܗ݈ܘܺܝܬ݂ ܠܟ݂ܽܘܢ ܕ݁ܳܐܙܶܠ ܐ݈ܢܳܐ ܕ݁ܶܐܛܰܝܶܒ݂ ܠܟ݂ܽܘܢ ܐܰܬ݂ܪܳܐ܂ ܘܶܐܢ ܐܺܙܰܠ ܐܶܛܰܝܶܒ݂ ܠܟ݂ܽܘܢ ܐܰܬ݂ܪܳܐ ܬ݁ܽܘܒ݂ ܐܺܬ݂ܶܐ ܘܶܐܕ݂ܒ݁ܰܪܟ݂ܽܘܢ ܠܘܳܬ݂ܝ ܕ݁ܰܐܝܟ݁ܳܐ ܕ݁ܶܐܢܳܐ ܐܺܝܬ݂ܰܝ ܐܳܦ݂ ܐܰܢ݈ܬ݁ܽܘܢ ܬ݁ܶܗܘܽܘܢ܂ ܘܠܰܐܝܟ݁ܳܐ ܕ݁ܳܐܙܶܠ ܐ݈ܢܳܐ ܝܳܕ݂ܥܺܝܢ ܐܢ݈ܬ݁ܽܘܢ ܘܽܐܘܪܚܳܐ ܝܳܕ݂ܥܺܝܢ ܐܢ݈ܬ݁ܽܘܢ܂ ܐܳܡܰܪ ܠܶܗ ܬ݁ܳܐܘܡܰܐ ܡܳܪܰܢ ܠܳܐ ܝܳܕ݂ܥܺܝܢܰܢ ܠܰܐܝܟ݁ܳܐ ܐܳܙܶܠ ܐܰܢ݈ܬ݁ ܘܰܐܝܟ݁ܰܢܳܐ ܡܶܫܟ݁ܚܺܝܢ ܚ݈ܢܰܢ ܐܽܘܪܚܳܐ ܠܡܶܕ݁ܰܥ܂ ܐܳܡܰܪ ܠܶܗ ܝܶܫܽܘܥ ܐܶܢܳܐ ܐ݈ܢܳܐ ܐܽܘܪܚܳܐ ܘܰܫܪܳܪܳܐ ܘܚܰܝܶܐ ܠܳܐ ܐ݈ܢܳܫ ܐܳܬ݂ܶܐ ܠܘܳܬ݂ ܐܳܒ݂ܝ ܐܶܠܳܐ ܐܶܢ ܒ݁ܺܝ܂ ܐܶܠܽܘ ܠܺܝ ܝܳܕ݂ܥܺܝܢ ܗ݈ܘܰܝܬ݁ܽܘܢ ܐܳܦ݂ ܠܳܐܒ݂ܝ ܝܳܕ݂ܥܺܝܢ ܗ݈ܘܰܝܬ݁ܽܘܢ ܘܡܶܢ ܗܳܫܳܐ ܝܳܕ݂ܥܺܝܢ ܐܢ݈ܬ݁ܽܘܢ ܠܶܗ ܘܰܚܙܰܝܬ݁ܽܘܢܳܝܗ݈ܝ܂ ܐܳܡܰܪ ܠܶܗ ܦ݂ܺܝܠܺܝܦ݁ܳܘܣ ܡܳܪܰܢ ܚܰܘܳܢ ܐܰܒ݂ܳܐ ܘܟ݂ܰܕ݁ܽܘ ܠܰܢ܂ ܐܳܡܰܪ ܠܶܗ ܝܶܫܽܘܥ ܗܳܢܳܐ ܟ݁ܽܠܶܗ ܙܰܒ݂ܢܳܐ ܥܰܡܟ݂ܽܘܢ ܐ݈ܢܳܐ ܘܠܳܐ ܝܺܕ݂ܰܥܬ݁ܳܢܝ ܦ݁ܺܝܠܺܝܦ݁ܶܐ ܡܰܢ ܕ݁ܠܺܝ ܚܳܙܶܐ ܚܙܳܐ ܠܰܐܒ݂ܳܐ ܘܰܐܝܟ݁ܰܢܳܐ ܐܰܢ݈ܬ݁ ܐܳܡܰܪ ܐܰܢ݈ܬ݁ ܚܰܘܳܢ ܐܰܒ݂ܳܐ܂ ܠܳܐ ܡܗܰܝܡܶܢ ܐܰܢ݈ܬ݁ ܕ݁ܶܐܢܳܐ ܒ݁ܳܐܒ݂ܝ ܘܳܐܒ݂ܝ ܒ݁ܺܝ ܡ̈ܶܠܶܐ ܐܰܝܠܶܝܢ ܕ݁ܶܐܢܳܐ ܡܡܰܠܶܠ ܐ݈ܢܳܐ ܡܶܢ ܢܰܦ݂ܫܝ ܠܳܐ ܡܡܰܠܶܠ ܐ݈ܢܳܐ ܐܳܒ݂ܝ ܕ݁ܶܝܢ ܕ݁ܒ݂ܺܝ ܥܳܡܰܪ ܗܽܘ ܥܳܒ݂ܶܕ݂ ܥܒ݂̈ܳܕ݂ܶܐ ܗܳܠܶܝܢ܂ ܗܰܝܡܶܢܘ ܕ݁ܶܐܢܳܐ ܒ݁ܳܐܒ݂ܝ ܘܳܐܒ݂ܝ ܒ݁ܺܝ ܘܶܐܠܳܐ ܐܳܦ݂ܶܢ ܡܶܛܽܠ ܥܒ݂̈ܳܕ݂ܶܐ ܗܰܝܡܶܢܘ܂ ܐܰܡܺܝܢ ܐܰܡܺܝܢ ܐܳܡܰܪ ܐ݈ܢܳܐ ܠܟ݂ܽܘܢ ܕ݁ܡܰܢ ܕ݁ܰܡܗܰܝܡܶܢ ܒ݁ܺܝ ܥܒ݂̈ܳܕ݂ܶܐ ܐܰܝܠܶܝܢ ܕ݁ܶܐܢܳܐ ܥܳܒ݂ܶܕ݂ ܐ݈ܢܳܐ ܐܳܦ݂ ܗܽܘ ܢܶܥܒ݁ܶܕ݂ ܘܰܕ݂ܝܰܬ݁ܺܝܪܺܝܢ ܡܶܢ ܗܳܠܶܝܢ ܢܶܥܒ݁ܶܕ݂ ܕ݁ܶܐܢܳܐ ܠܘܳܬ݂ ܐܰܒ݂ܳܐ ܐܳܙܶܠ ܐ݈ܢܳܐ܂ ܘܡܶܕ݁ܶܡ ܕ݁ܬ݂ܶܫܶܐܠܽܘܢ ܒ݁ܫܶܡܝ ܐܶܥܒ݁ܶܕ݂ ܠܟ݂ܽܘܢ ܕ݁ܢܶܫܬ݁ܰܒ݁ܰܚ ܐܰܒ݂ܳܐ ܒ݁ܰܒ݂ܪܶܗ܂ ܘܶܐܢ ܬ݁ܶܫܶܐܠܽܘܢܳܢܝ ܒ݁ܫܶܡܝ ܐܶܢܳܐ ܥܳܒ݂ܶܕ݂ܢܳܐ܂ ܐܶܢ ܪܳܚܡܺܝܢ ܐܢ݈ܬ݁ܽܘܢ ܠܺܝ ܦ݁ܽܘ̈ܩܕ݁ܳܢܰܝ ܛܰܪܘ܂ ܘܶܐܢܳܐ ܐܶܒ݂ܥܶܐ ܡܶܢ ܐܳܒ݂ܝ ܘܰܐ݈ܚܪܺܢܳܐ ܦ݁ܰܪܰܩܠܺܛܳܐ ܢܶܬ݁ܶܠ ܠܟ݂ܽܘܢ ܕ݁ܢܶܗܘܶܐ ܥܰܡܟ݂ܽܘܢ ܠܥܳܠܰܡ܂ ܪܽܘܚܳܐ ܕ݁ܰܫܪܳܪܳܐ ܗܰܘ ܕ݁ܥܳܠܡܳܐ ܠܳܐ ܡܶܫܟ݁ܰܚ ܠܰܡܩܰܒ݁ܳܠܽܘܬ݂ܶܗ ܡܶܛܽܠ ܕ݁ܠܳܐ ܚܙܳܝܗ݈ܝ ܘܠܳܐ ܝܰܕ݂ܥܶܗ ܐܰܢ݈ܬ݁ܽܘܢ ܕ݁ܶܝܢ ܝܳܕ݂ܥܺܝܢ ܐܢ݈ܬ݁ܽܘܢ ܠܶܗ ܕ݁ܰܠܘܳܬ݂ܟ݂ܽܘܢ ܥܳܡܰܪ ܘܰܒ݂ܟ݂ܽܘܢ ܗ݈ܽܘ܀
ܡܰܟܪܶܙ ܡܫܰܡܫܳܢܳܐ ܠܽܘ̣ܛܰܢܺܝܰܐ
ܢܩܽܘ̣ܡ ܫܰܦܺܝ̣ܪ ܟܽܠܰܢ ܒܰܚܦܺܝ̣ܛܽܘ̣ܬܳܐ ܘܰܒܩ̈ܳܠܶܐ ܕܰܡܪܰܥܶܝܢ ܠܰܐܠܳܗܳܐ ܢܶܥܢܶܐ ܘܢܺܐܡܰܪ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܰܘ ܕܫܰܟܶܢ ܠܰܢ ܕܟܰܕ ܦܫܺܝ̣ܛܺܝ̣ܢܰܢ ܢܨܰܠܶܐ ܒܝܰܘ̈ܡܳܬܳܐ ܩܰܕܺܝ̣̈ܫܶܐ ܕܦܰܢܛܺܝ̣ܩܳܘܣܛܺܝ̣ ܘܰܕܚܰܕ ܒܫ̈ܰܒܶܐ܆ ܐܰܝܟܰܢܳܐ ܕܰܒܢܽܘ̣ܗܪܳܐ ܘܚܰܝ̈ܶܐ ܕܠܳܐ ܫܽܘ̣ܠܳܡ ܢܶܬܒܰܣܰܡ ܒܕܽܘ̣ܒܳܪ̈ܶܐ ܪ̈ܽܘ̣ܚܳܢܳܝܶܐ ܒܳܥܶܝܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܰܘ ܕܰܒܝܰܕ ܥܒܳܪ ܦܽܘ̣ܩܕܳܢܳܐ ܕܰܐܒܽܘ̇ܢ ܐܳܕܳܡ ܪܺܝ̣ܫ ܓܒܺܝ̣ܠܬܰܢ ܟܰܕ ܥܰܠ ܐܰܪܥܳܐ ܢܦܰܠ̣ܢܰܢ. ܒܝܰܕ ܩܝܳܡܬܳܟ ܦܰܐܝܰܬ݂ ܠܰܐܠܳܗܳܐ ܠܟܽܠܰܢ ܐܰܟܚܕܳܐ ܐܰܩܺܝ̣ܡܬ܆ ܒܳܥܶܝܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܰܘ ܕܠܰܢ ܗܳܠܶܝܢ ܕܰܒܝܰܕ ܦܽܘ̣ܠܚܳܢ ܦܬܰܟܪ̈ܶܐ ܣܳܓܽܘ̣̈ܕܶܐ ܗܘܰܝܢܰܢ ܕܳܐܟܶܠܩܰܪܨܳܐ܆ ܒܝܰܕ ܡܶܫܬܰܘܕܥܳܢܽܘ̣ܬܳܐ ܕܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ ܣܳܓܽܘ̣̈ܕܶܐ ܕܺܝ̣ܠܳܗ̇ ܥܰܬܶܕܬ ܠܰܢ܆ ܟܰܕ ܚܰܕ ܡܶܢܳܗ̇ ܕܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ ܐܺܝ̣ܬܰܝܟ ܒܳܥܶܝܢܰܢ ܡܶܢܳܟ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܡܫܰܡܫܳܢܳܐ ܢܰܙܥܶܩ ܘܢܺܐܡܰܪ:
ܡ̣ܶܢ ܡܳܪܝܳܐ ܢܶܒܥܶܐ ܘܰܢܣܺܝ̣ܡ ܒܽܘ̣ܪ̈ܟܶܐ ܥܰܠ ܐܰܪܥܳܐ܀
ܟܳܗܢܳܐ ܣܳܐܶܡ ܒܽܘ̣ܪ̈ܟܶܐ ܩܕܳܡ ܕܰܪܓܳܐ ܕܡܰܕܒܚܳܐ ܘܟܽܠܶܗ ܩܠܝ̣ܪܳܘܣ ܘܟܽܠܶܗ ܥܰܡܳܐ ܓܰܒܪ̈ܶܐ ܘܢܶܫ̈ܶܐ ܒܳܪܟܺܝ̣ܢ ܚܰܕ ܒܳܬܰܪ ܚܰܕ ܡܳܚܶܐ ܥܰܠ ܚܰܨܶܗ ܘܰܢܥܺܝܪܺܝܘܗ̱ܝ ܐܰܟܡܳܐ ܕܰܫܠܺܝ̣̈ܚܶܐ ܐܰܥܺܝ̣ܪܘ̱ ܠܰܚܕ̈ܳܕܶܐ ܒܥܶܕܳܢܳܐ ܕܡܰܐܓܢܳܢܽܘ̣ܬܳܐ ܕܪܽܘܚܳܐ ܩܰܕܺܝܫܳܐ ܥܠܰܝܗܽܘܢ. ܘܰܚܢܰܢ ܢܥ̣ܺܝܪ ܠܰܚܕ̈ܳܕܶܐ ܕܢܶܬܛܰܝܒܽܘ̇ܢ ܠܡܶܐܬܝܳܐ ܕܪܽܘܚܳܐ ܩܰܕܺܝܫܳܐ. ܗܳܕܶܐ ܕܡܽܘ̣ܬܳܐ ܕܰܫܠܺܝ̣̈ܚܶܐ ܥܳܒܕܺܝ̣ܢܰܢ. ܘܟܳܗܢܳܐ ܢܺܐܡܰܪ ܨܠܽܘ̣ܬܳܐ ܗܳܕܶܐ ܟܰܕ ܓܗܺܝܢ. ܘܰܡܫ̈ܰܡܫܳܢܶܐ ܘܟܽܠܶܗ ܥܰܡܳܐ ܢܺܐܡܪܽܘ̇ܢ (ܩܽܘܪܝܶܐܠܰܝܣܳܘܢ) ܥܕܰܡܳܐ ܠܫܽܘ̣ܠܳܡ ܨܠܽܘ̣ܬܳܐ ܗܳܕܶܐ.
ܟܳܗܢܳܐ ܟܰܕ ܓܗܺܝ̣ܢ ܡܨܰܠܶܐ
ܐܰܒܳܐ ܕܪ̈ܰܚܡܶܐ ܡܳܪܝܳܐ ܐܰܠܳܗܳܐ ܡܰܘܕܶܝܢܰܢ ܠܳܟ ܡܶܛܽܠ ܕܟܰܕ ܡܶܬܡܰܠܶܝܢ ܝܰܘ̈ܡܳܬܳܐ ܕܦܰܢܛܺܝ̣ܩܳܘܣܛܺܝ̣ ܡ̣ܶܢ ܝܰܘܡܳܐ ܩܰܕܺܝܫܳܐ ܕܰܩܝܳܡܬܳܐ ܡܰܚܝܳܢܺܝ̣ܬܳܐ ܕܰܒܪܳܐ ܕܺܝܠܳܟ ܡܬܽܘ̣ܡܳܝܳܐ܆ ܟܰܕ ܬܰܠܡܺܝ̣̈ܕܶܐ ܒܐܽܘܪܺܫܠܶܡ ܡܣܰܟܶܝܢ ܗ̱ܘܰܘ ܠܫܽܘ̣ܘܕܳܝܶܗ܆ ܡܠ̣ܰܝܬ ܐܶܢܽܘܢ ܪܽܘܚܳܐ ܩܰܕܺܝܫܳܐ܆ ܒܝܰܕ ܩܳܠܳܐ ܥܰܙܺܝ̣ܙܳܐ ܕܰܗ̣ܘܳܐ ܡ̣ܶܢ ܫܶܠܝܳܐ܆ ܘܠܶܫ̈ܳܢܶܐ ܕܢܽܘ̣ܪܳܐ ܕܺܝ̣ܬܶܒܘ̱ ܥܰܠ ܚܰܕ ܚܰܕ ܡܶܢܗܽܘ̇ܢ܆ ܐܰܝܟܰܢܳܐ ܕܟܽܠܗܽܘܢ ܐܰܝܠܶܝܢ ܕܰܬܚܶܝܬ ܫܡܰܝܳܐ ܘܰܕܥܳܡܪܺܝ̣ܢ ܗ̱ܘܰܘ ܒܐܽܘܪܺܫܠܶܡ ܢܶܬܡܗܽܘ̇ܢ ܘܢܶܬܕܰܡܪܽܘ̇ܢ ܘܰܢܫܰܒܚܽܘ̇ܢ ܠܳܟ ܝܳܗܽܘ̣ܒܳܐ ܕܟܽܠܗܶܝܢ ܛܳܒ̈ܳܬܳܐ܆ ܕܗܳܟܰܢܳܐ ܩܰܕܶܫܬ ܘܙܰܝܰܚ̣ܬ ܘܫܰܕܰܪܬ ܠܰܫܠܺܝ̣̈ܚܶܐ ܩܰܕܺܝ̣̈ܫܶܐ ܠܡܰܝܬܳܝܽܘ̣ ܠܓܶܢܣܳܐ ܕܰܒܢܰܝ̈ܢܳܫܳܐ ܠܘܳܬ ܝܺܕܰܥܬܳܐ ܕܰܬܠܺܝ̣ܬܳܝܽܘ̣ܬܳܐ ܚܕܳܐ ܐܰܠܳܗܽܘ̣ܬܳܐ܆ ܟܰܕ ܡܰܥܡܕܺܝ̣ܢ ܠܗܽܘܢ ܒܰܫܡܳܐ ܕܺܝܠܳܟ ܩܰܕܺܝܫܳܐ. ܐܰܒܳܐ ܩܰܕܺܝܫܳܐ ܘܕܰܒܪܳܟ ܝ̣ܺܚܺܝ̣ܕܳܝܳܐ܆ ܘܰܕܪܽܘ̣ܚܳܟ ܩܰܕܺܝܫܳܐ܆ ܗܰܘ ܕܒܶܗ ܘܥܰܡܶܗ ܐܳܦ ܚܢܰܢ ܠܳܗ̇ ܠܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ ܚܰܕ ܐܰܠܳܗܳܐ ܣܳܓܕܺܝ̣ܢܰܢ ܘܡܰܘܕܶܝܢܰܢ ܘܰܡܫܰܒܚܺܝ̣ܢܢ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܘܟܶܢ ܟܳܗܢܳܐ ܢܰܙܥܶܩ ܘܢܺܐܡܰܪ:
ܩܽܘ̣ܡܘ̱ ܒܚܰܝܠܶܗ ܕܰܐܠܳܗܳܐ܀
ܟܳܗܢܳܐ ܐܳܚܶܕ ܒܺܐܝ̈ܕܰܘܗ̱ܝ ܡܶܐܣܰܪܬܳܐ ܕܛܰܪ̈ܦܶܐ ܕܓܰܘܙܳܐ ܘܨܳܒܰܥ ܠܶܗ ܒܡܰܝ̈ܳܐ ܘܪܳܐܶܣ ܥܰܠ ܬܪܽܘ̣ܢܳܘܣ ܨܠܺܝܒܳܐܺܝܬ ܘܥܰܠ ܩܠܺܝ̣ܪܳܘܣ ܒܡܰܕܒܚܳܐ ܘܟܶܢ ܢܳܦܶܩ ܡܶܢ ܡܰܕܒܚܳܐ ܘܪܳܐܶܣ ܥܰܠ ܟܽܠܶܗ ܥܰܡܳܐ ܘܟܳܪܶܟ ܒܥܺܕܬܳܐ ܘܢܶܗܦܽܘ̣ܟ ܠܡܰܕܒܚܳܐ܀
ܘܰܡܫ̈ܰܡܫܳܢܶܐ ܢܺܐܡܪܽܘ̇ܢ ܡܰܥܢܺܝ̣ܬܳܐ ܗܳܕܶܐ
ܡܫܺܝ̣ܚܳܐ ܐܰܠܳܗܳܐ܆ ܟܰܕ ܚܰܫ ܚܰܫܳܐ ܨܶܒܝܳܢܳܝܳܐ ܚܠܳܦܰܝܢ ܒܰܒܣܰܪ܆ ܘܩܳܡ ܒܫܽܘܒܚܳܐ ܡ̣ܶܢ ܒܶܝܬ ܡܺܝ̣̈ܬܶܐ܆ ܢܰܚܶܡ ܘܰܐܩܺܝ̣ܡ ܐܳܦ ܠܰܢ ܥܰܡܶܗ܆ ܠܗܳܢܽܘ̇ܢ ܕܰܐܒܺܝ̣ܕܺܝ̣ܢ ܗ̱ܘܰܝܢ ܐܳܦ ܡܺܝ̣ܬܺܝܢ ܒܰܚܛܺܝ̣ܬܳܐ܆ ܘܠܐܽܘ̣ܚܕܳܢܳܐ ܕܰܛܪܽܘ̣ܢܽܘ̣ܬܳܐ ܕܳܐܟܶܠܩܰܪܨܳܐ ܘܰܕܫܺܐܕ̈ܶܐ ܒܰܛܶܠ ܘܰܫܪܳܐ܀
ܬܶܫܡܶܫܬܳܐ ܕܬܰܪܬܶܝܢ
ܒܩܺܝ̣ܢܬܳܐ ܪܒܺܝ̣ܥܳܝܬܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܡܳܪܰܢ ܘܰܐܠܳܗܰܢ ܘܦܳܪܽܘ̣ܩܰܢ ܝܶܫܽܘܥ ܡܫܺܝܚܳܐ܆ ܚܰܕܶܬ ܪܽܘܚܳܐ ܕܺܝ̣ܠܳܟ ܒܗܰܘ̈ܢܶܐ ܘܡܰܕ̈ܥܶܐ ܘܠܶܒܰܘ̈ܳܬܳܐ ܕܟܽܠܰܢ ܘܰܐܡܺܝ̣ܢܳܐܺܝܬ ܐܰܡܺܝ̣ܬ ܘܛܰܠܶܩ ܡܶܢܰܢ ܠܟܽܠܳܗ̇ ܗܰܢܺܝܐܽܘ̣ܬܳܐ ܕܒܰܪܢܳܫܳܐ ܥܰܬܺܝ̣ܩܳܐ܆ ܘܰܒܪܺܝ ܠܰܢ ܚܰܕ̈ܬܶܐ ܕܚܰܕܳܬܳܐܺܝܬ ܡܶܬܚܰܕܬܺܝ̣ܢ ܟܽܠܝܽܘ̣ܡ܆ ܕܰܢܫܰܒܚܳܟ ܠܳܟ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܳܢܘ̣ܢܳܐ ܝܰܘܢܳܝܳܐ
ܪܰܒ ܐܰܢ̱ܬ ܡܳܪܝܳܐ ܐܠܳܗܳܐ ܕܰܐܒܳܗ̈ܳܬܳܐ ܕܺܝ̣ܠܰܢ. ܡܫܰܒܰܚ ܐܰܢ̱ܬ ܘܰܡܪܰܡܪܰܡ ܐܰܢ̱ܬ ܠܥܳܠܰܡ.
(ܡܰܦܩܳܢܳܐ ܝܗ܆ܒ)
ܪܰܒ ܪܶܟܢܳܐ ܕܫܰܘܝܽܘܬ ܩܳܠܳܐ ܕܟܽܠ ܙܢܰܝ̈ ܙܡܳܪܳܐ܆ ܕܢܶܣܬܓܶܕ ܗ̱ܘܳܐ ܓܠܺܝ̣ܦܳܐ ܠܳܐ ܡܢܰܦܫܳܐ܆ ܕܶܐܬܚܫܶܠ ܡ̣ܶܢ ܕܰܗܒܳܐ܆ ܗܳܫܳܐ ܕܶܝܢ ܛܰܝܒܽܘܬܳܐ ܕܪܽܘܚܳܐ ܦܰܪܰܩܠܺܝ̣ܛܳܐ ܡܚܰܦܛܳܐ ܠܰܢ ܕܢܶܣܓܽܘ̣ܕ ܘܢܰܘܕܶܐ ܠܚܰܕ ܬܠܺܝ̣ܬܳܝܳܐ܆ ܫܘܶܐ ܒܚܰܝܠܳܐ ܘܰܕܠܳܐ ܫܽܘ̣ܪܳܝܳܐ܆ ܡܒܰܪܰܟ ܐܰܢ̱ܬ ܗ̱ܘ̣ ܠܥܳܠܡܺܝܢ܀
ܒܰܪܶܟܘ̱ ܟܽܠܗܽܘܢ ܥܰܒܕ̈ܰܘܗ̱ܝ ܠܡܳܪܝܳܐ ܫܰܒܚܰܘ̣ܗ̱ܝ ܘܪܰܡܪܡܽܘ̣ܗ̱ܝ ܠܥܳܠܰܡ
(ܡܙܡ̄ ܩܠܕ:ܐ)
ܥܶܗܰܕ ܗ̱ܘܳܐ ܒܡܶܠܰܘ̈ܗ̱ܝ ܦܳܪ̈ܽܘ̣ܩܳܝܳܬܳܐ ܡܫܺܝܚܳܐ܆ ܟܰܕ ܐܶܡ̣ܰܪ ܠܰܫܠܺܝ̣̈ܚܰܘܗ̱ܝ ܓܒܰܝ̈ܳܐ ܘܠܳܐ ܡܛܰܘ̈ܫܶܐ܆ ܕܢܺܐܬܶܐ ܠܟܽܘ̇ܢ ܪܽܘܚܳܐ ܒܰܕܡܽܘ̣ܬ ܠܶܫܳܢ̈ܶܐ ܕܢܽܘ̣ܪܳܐ܆ ܘܢܰܐܓܶܢ ܘܢܶܬܶܒ ܗܰܘ ܡܒܰܪܟܳܐ. ܥܰܠ ܟܽܠ ܚܰܕ ܚܰܕ ܡܶܢܟܽܘ̇ܢ. ܕܒܐܺܝ̣̈ܕܰܘܗ̱ܝ ܒܪܺܝ̣ܬܳܐ ܡܰܥܒܰܕܬܳܐ ܬܰܙܥܶܩܝ̱ ܠܳܟ ܬܶܫܒܽܘܚܬܳܐ܀
ܫܽܘܒܚܳܐ ܘܡܶܢ ܥܳܠܰܡ
ܫܒܺܝ̣ܚܽ ܗ̱ܘ ܦܽܘ̣ܡܳܐ ܢܦܺܝ̣ܚ ܒܪܽܘܚܳܐ ܗܰܘ ܕܰܢܒܺܝ̈ܶܐ܆ ܕܥܰܠ ܡܶܐܬܺܝ̣ܬܳܟ ܕܒܰܒܣܰܪ ܣܰܒ̣ܰܪܘ̱ ܗ̱ܘܰܘ ܐܳܘ ܡܰܠܟܳܐ܆ ܘܰܕܪܽܘ̣ܚܳܟ ܢܳܦܶܩ ܡ̣ܶܢ ܥܽܘ̣ܒܳܐ ܐܰܒܳܗܳܝܳܐ܆ ܠܳܐ ܒܰܪܝܳܐ ܫ̇ܘܶܐ̣ ܠܳܟ ܒܡܰܘܬܒܳܐ ܘܰܒܒܳܪܽܘ̣ܝܽܘ̣ܬܳܐ܆ ܕܥܰܡܗܽܘ̇ܢ ܠܳܟ ܟܽܠܰܢ ܡܗܰܝ̈ܡܢܶܐ ܒܕܶܚܠܳܐ ܣܳܓܕܺܝ̣ܢܰܢ܀
ܡܫܰܡܫܳܢܳܐ: ܣܛܰܘܡܶܢܩܰܐܠܘ̣ܣ ܩܽܘܪܝܶܐܠܰܝܣܳܘܢ܀
ܦܪܽܘ̣ܡܝܽܘ̇ܢ
ܬܶܫܒܽܘܚܬܳܐ ܐܰܡܺܝܢܬܳܐ ܘܣܶܓܕܬܳܐ ܪܟܺܝ̣ܢܬܳܐ ܘܬܰܘܕܺܝ̣ܬܳܐ ܥܦ̣ܺܝܦܬܳܐ ܢܩܰܪܶܒ܆ ܠܗܰܘ ܫܶܡܫܳܐ ܕܙܰܕܺܝ̣ܩܽܘ̣ܬܳܐ ܘܨܶܡܚܳܐ ܠܳܐ ܡܶܬܕܰܪܟܳܢܳܐ ܕܰܐܨܡܰܚ ܙܰܠܺܝ̣̈ܩܰܘܗ̱ܝ ܒܓܰܘ ܥܶܠܺܝ̣ܬܳܐ܆ ܘܫܰܪܰܪ ܠܚܽܘ̣̈ܫܳܒܶܐ ܕܰܬܪܶܥܣܰܪ ܫܠܺܝ̈ܚܶܐ ܕܗܶܕܝܽܘ̣ܛܽܘ̣ܬܳܐ܆ ܘܦܰܠܶܓ ܠܶܫܳܢ̈ܶܐ ܠܰܬܪܶܥܣܰܪ ܒܽܘ̣ܪ̈ܶܐ ܕܰܡܡܰܠܠܺܝ̣ܢ ܒܰܚܕܳܐ ܡܠܰܚܡܽܘ̣ܬܳܐ܆ ܘܰܢܦ̣ܰܚ ܒܗܽܘܢ ܘܩܰܒܶܠܘ̱ ܪܽܘܚܳܐ ܦܰܪܰܩܠܺܝ̣ܛܳܐ. ܘܚܰܟܶܡ ܐܶܢܽܘ̇ܢ ܘܶܐܡ̣ܰܪ ܠܗܽܘܢ ܕܦܽܘ̣ܩܘ̱ ܠܰܐܪ̈ܒܰܥܦܶܢܝܳܬܳܐ܆ ܘܰܐܟܪܶܙܘ̱ ܠܥܰܡ̱̈ܡܶܐ ܬܰܘܕܺܝ̣ܬܳܐ ܬܪܺܝ̣ܨܬܳܐ܆ ܘܰܐܗܦܶܟܘ̱ ܠܰܒܪܺܝ̣ܬܳܐ ܡ̣ܶܢ ܛܳܥܝܽܘ̣ܬܳܐ ܠܰܚܕܳܐ ܐܰܘܝܽܘ̣ܬܳܐ ܕܗܰܝܡܳܢܽܘ̣ܬܳܐ ܫܰܪܺܝ̣ܪܬܳܐ܆ ܕܠܶܗ ܝܳܐܶܐ ܫܽܘܒܚܳܐ ܘܐܺܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܡܰܐܓܢܳܢܽܘ̣ܬܳܐ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫ̈ܳܥܶܐ ܘܙܰܒܢ̈ܶܐ ܘܰܒܟܽܠܗܽܘܢ ܝܰܘܡ̈ܳܬܳܐ ܕܚܰܝ݂ܰܝ݂̈ܢ ܠܥܳܠܡܺܝܢ܀
ܣܶܕܪܳܐ
ܡܫܺܝ̣ܚܳܐ ܐܰܠܳܗܳܐ ܕܺܝ̣ܠܰܢ ܗܰܘ ܨܶܡܚܳܐ ܡܰܢܗܪܳܢܳܐ ܕܢܽܘ̣ܗܪܳܐ ܡܶܬܝܰܕܥܳܢܳܐ ܗܰܘ ܕܡܶܢܗܽܘ̇ܢ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܦܰܐܝܳܐܺܝܬ ܡܶܬܒܰܪܰܟ܆ ܘܡܶܬܩܰܕܰܫ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܡܶܛܽܠ ܕܰܨܒ̣ܳܐ ܕܰܠܘܳܬܰܢ ܢܶܬܬܰܚܬܶܐ ܘܢܶܬܚܰܠܰܛ ܒܝܳܬܶܗ ܥܰܡܰܢ܆ ܡ̣ܶܢ ܒܬܽܘ̣ܠܬܳܐ ܩܰܕܺܝ̣ܫܬܳܐ ܩܰܒܶܠ ܕܢܶܬܺܝ̣ܠܶܕ ܒܶܣܪܳܢܳܐܺܝܬ ܕܢܶܓܡܽܘ̣ܪ ܗܳܠܶܝܢ ܕܰܒܗܽܘܢ ܐܶܬܦܪܶܩܢܰܢ܆ ܝܰܠܕܳܐ ܘܰܥܡܳܕܳܐ ܘܰܙܩܺܝ̣ܦܳܐ ܘܡܰܘܬܳܐ ܘܰܩܝܳܡܬܳܐ. ܟܰܕ ܕܶܝܢ ܨܒ̣ܳܐ ܕܰܠܘܳܬ ܐܰܒܽܘ̣ܗ̱ܝ ܢܶܣܬܰܠܰܩ ܟܰܢܶܫ ܐܶܢܽܘ̇ܢ ܠܰܫܠܺܝ̣̈ܚܰܘܗ̱ܝ ܠܛܽܘ̣ܪܳܐ ܕܒܶܝܬ ܙܰܝ̈ܬܶܐ܆ ܘܒܰܣܝܳܡ ܐܺܝ̣̈ܕܰܘܗ̱ܝ ܩܰܕܺܝ̣̈ܫܳܬܳܐ ܒܰܪܶܟ ܐܶܢܽܘ̇ܢ܆ ܘܡܰܘܗ̈ܒܳܬܳܐ ܕܺܝ̣ܠܶܗ ܫܦܺܝ̣̈ܥܳܬܳܐ ܟܳܗ̈ܢܳܝܳܬܳܐ ܫܰܟܶܢ ܠܗܽܘܢ. ܘܰܢܦ̣ܰܚ ܒܗܽܘܢ ܪܽܘܚܳܐ ܩܰܕܺܝܫܳܐ܆ ܘܶܐܡܰܪ ܕܩܰܘܰܘ ܒܐܽܘܪܺܫܠܶܡ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܟܽܘ̇ܢ ܪܽܘܚܳܐ ܩܰܕܺܝܫܳܐ ܡ̣ܶܢ ܠܘܳܬ ܐܰܒܳܐ܆ ܘܗܽܘ̣ ܢܰܢܗܰܪܟܽܘ̇ܢ ܘܰܢܚܰܟܶܡܟܽܘ̇ܢ ܒܡܰܘܗ̈ܒܳܬܳܐ ܕܺܝ̣ܠܶܗ ܫܦܺܝ̣̈ܥܳܬܳܐ܆ ܘܕܶܐܢ ܐܶܢܳܐ ܠܳܐ ܐܳܙܶܠ ܐ̱ܢܳܐ ܦܰܪܰܩܠܺܝ̣ܛܳܐ ܠܳܐ ܐܳܬܶܐ ܠܘܳܬܟܽܘ̇ܢ܆ ܘܟܰܕ ܒܗܳܠܶܝܢ ܫܰܪܰܪ ܠܰܫܠܺܝ̣̈ܚܰܘܗ̱ܝ܆ ܣܠ̣ܶܩ ܠܰܫܡܰܝܳܐ ܒܝܽܘ̣ܒܳܒܳܐ ܘܺܝ̣ܬܶܒ ܒܫܽܘܒܚܳܐ ܥܰܠ ܬܪܽܘ̣ܢܳܘܣ ܡ̣ܶܢ ܝܰܡܺܝ̣ܢܳܐ ܕܰܐܒܽܘ̣ܗ̱ܝ܆ ܘܟܰܕ ܒܥܺܐܕܳܐ ܗܳܢܳܐ ܕܦܰܢܛܺܝ̣ܩܳܘܣܛܺܝ̣ ܡ̣ܶܢ ܫܶܠܝܳܐ ܪܽܘܚܳܐ ܩܰܕܺܝܫܳܐ ܐܰܓܶܢ ܥܠܰܝܗܽܘ̇ܢ ܘܡܰܘ̈ܗܒܳܬܳܐ ܐܰܠܳܗܳܝ̈ܳܬܳܐ ܫܰܟܶܢ ܠܗܽܘܢ ܘܰܒܚܶܟ̈ܡܳܬܳܐ ܐܰܠܳܗܳܝ̈ܳܬܳܐ ܨܰܒܶܬ ܐܶܢܽܘ̇ܢ ܘܰܒܝܽܘ̣̈ܠܦܳܢܶܐ ܪ̈ܽܘ̣ܚܳܢܳܝܶܐ ܐܰܢܗܰܪ ܐܶܢܘ̇ܢ ܘܰܒܠܶܫܳܢ̈ܶܐ ܕܟܽܠܗܽܘܢ ܥܰܡ̱̈ܡܶܐ ܐܰܥܬܰܪ ܐܶܢܽܘ̇ܢ܆ ܝܰܘܡܳܢܳܐ ܝܽܘ̣̈ܕܳܝܶܐ ܪ̈ܰܫܺܝ̣ܥܶܐ ܒܶܐܒܠܳܐ ܩܳܝܡܺܝ̣ܢ ܗ̱ܘܰܘ܆ ܟܰܕ ܚܳܙܶܝܢ ܠܗܽܘܢ ܕܺܐܝ̣ܬܰܝܗܽܘ̇ܢ ܗ̱ܘܰܘ ܗܶܕܝܽܘ̣̈ܛܶܐ܆ ܡܚܰܟ̈ܡܳܢܶܐ ܘܓܳܡܽܘ̣ܪ̈ܶܐ ܕܐ̱ܪ̈ܳܙܶܐ ܩܰܕܺܝ̣̈ܫܶܐ ܘܰܐܠܳܗܳܝ̈ܶܐ ܘܶܐܬܚܙܺܝ̣ܘ܆ ܝܰܘܡܳܢܳܐ ܐܶܫܬܺܝ̣ܘ ܫܠܺܝ̣̈ܚܶܐ ܩܰܕܺܝ̣̈ܫܶܐ ܚܰܡܪܳܐ ܚܰܕܬܳܐ ܘܰܐܠܳܗܳܝܳܐ ܡ̣ܶܢ ܡܰܘܗܰܒܬܳܐ ܕܪܽܘܚܳܐ ܗܰܘ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ܆ ܘܒܰܕܓܽܘ̇ܢ ܒܰܚܣܳܡܳܐ ܡ̣ܶܢ ܝܘ̣ܕ̈ܳܝܶܐ ܡܶܬܡܰܠܠܳܐ ܗ̱ܘܳܬ܆ ܗܳܝ̇ ܕܡܶܐܪܺܝ̣ܬܳܐ ܐܶܫܬܺܝ̣ܘ ܘܰܪܘܺܝ̣ܘ. ܝܰܘܡܳܢܳܐ ܫܶܡܥܽܘܢ ܟܺܐܦܳܐ ܕܳܐܶܨ܆ ܘܰܐܢܕܪܶܐܘܳܣ ܘܰܒܢܰܝ̈ ܙܰܒܕܰܝ ܘܫܰܪܟܳܐ ܕܰܫܠܺܝ̣̈ܚܶܐ ܩܰܕܺܝ̣̈ܫܶܐ ܒܚܰܕܽܘ̣ܬܳܐ ܪܰܒܬܳܐ ܘܒܰܪܘܳܙܳܐ ܩܳܝܡܺܝ̣ܢ ܗ̱ܘܰܘ ܟܰܕ ܚܳܙܶܝܢ ܕܗܰܘ ܡܶܕܶܡ ܕܶܐܫܬܰܘܕܺܝ ܠܗܽܘܢ ܝ̣ܺܚܺܝ̣ܕܳܝܳܐ ܐܶܫܬܰܡܠܺܝ̣ ܠܘܳܬܗܽܘ̇ܢ ܒܰܥܒܳܕܳܐ܆ ܝܰܘܡܳܢܳܐ ܒܡܶܐܬܝܶܗ ܕܦܰܪܰܩܠܺܝ̣ܛܳܐ ܥܶܠܺܝ̣ܬܳܐ ܗ̣ܘܳܬ ܒܳܒܶܝܠ ܕܬܰܪܬܶܝܢ܆ ܠܰܘ ܓܶܝܪ ܒܰܡܣܳܡ ܒܪܺܝ̣ܫܳܐ ܕܶܐܬܦܰܠܰܓܘ̱ ܒܳܗ̇ ܠܶܫܳܢ̈ܶܐ ܐܰܝܟ ܩܰܕܡܳܝ̇ܬܳܐ܆ ܐܶܠܳܐ ܒܚܰܝܠܶܗ ܕܪܽܘܚܳܐ ܩܰܕܺܝܫܳܐ ܐܶܬܢܰܗܪܰܬ݂ ܒܢܽܘ̣ܗܪܳܐ ܕܛܰܝܒܽܘ̣ܬܳܐ ܐܰܝܟ ܕܢܶܬܚܰܟܡܽܘ̇ܢ ܒܳܗ̇ ܫܠܺܝ̣̈ܚܶܐ ܡܶܛܽܠ ܟܳܪܽܘ̣ܙܽܘ̣ܬܳܐ ܕܰܫܪܳܪܳܐ܆ ܝܰܘܡܳܢܳܐ ܣܟܰܪܝܽܘ̣ܛܳܐ ܒܒܶܗܬܬܳܐ ܩܳܐܶܡ܆ ܟܰܕ ܚܳܙܶܐ ܠܰܫܠܺܝ̣̈ܚܶܐ ܩܰܕܺܝ̣̈ܫܶܐ ܚܰܒܪ̈ܰܘܗ̱ܝ ܕܡܶܫܬܰܚܠܦܺܝ̣ܢ ܘܡܶܬܢܰܗܪܺܝ̣ܢ ܘܗܰܘܢܰܝ̈ܗܽܘ̇ܢ ܘܡܰܕܥܰܝ̈ܗܽܘ̇ܢ ܒܢܽܘ̣ܗܪܳܐ ܐܰܠܳܗܳܝܳܐ ܕܐ̱ܪ̈ܳܙܶܐ ܫܡܰܝ̈ܳܢܶܐ܆ ܘܗܳܫܳܐ ܡܦܺܝ̣ܣܺܝ̣ܢܰܢ ܠܪܶܚܡܰܬ݂ ܐ̱ܢܳܫܽܘ̣ܬܳܟ ܠܳܐ ܡܶܬܡܰܠܠܳܢܺܝ̣ܬܳܐ ܡܳܪܝܳܐ. ܒܶܗ ܒܝܰܘܡܳܐ ܗܳܢܳܐ ܕܦܰܢܛܺܝ̣ܩܳܘܣܛܺܝ̣ ܕܬܶܐܫܽܘܕ ܥܠܰܝܢ ܛܰܝܒܽܘ̣ܬܳܐ ܕܪܽܘ̣ܚܳܟ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ܆ ܐܰܝܟܰܢܳܐ ܕܒܶܗ ܢܶܬܕܰܟܶܐ ܡ̣ܶܢ ܟܽܠܳܗ̇ ܝܰܥܪܳܐ ܕܰܚܛܺܝ̣ܬܳܐ܆ ܘܢܶܫܬܘܶܐ ܕܰܢܩܰܪܶܒ ܠܳܟ ܦܺܐܪ̈ܶܐ ܪ̈ܽܘ̣ܚܳܢܳܝܶܐ ܕܰܡܝܰܬܪܽܘ̣ܬܳܐ ܘܗܰܝܡܳܢܽܘ̣ܬܳܐ ܘܣܰܒܪܳܐ ܘܚܽܘ̣ܒܳܐ ܫܰܪܺܝ̣ܪܳܐ܆ ܘܟܰܕ ܡܫܰܟܶܢ ܐܰܢ̱ܬ ܠܥܺܕܬܳܐ ܩܰܕܺܝ̣ܫܬܳܐ ܫܰܝܢܳܐ ܘܰܫܠܳܡܳܐ ܕܡ̣ܶܢ ܠܘܳܬܳܟ܆ ܣܥܽܘ̣ܪ ܒܪ̈ܰܚܡܰܝܟ ܠܰܟܪ̈ܺܝ̣ܗܶܐ ܘܠܐܰܠܺܝ̣̈ܨܶܐ ܘܠܰܐܝܠܶܝܢ ܕܫܶܐܠܘ̱ ܘܫܳܐܠܺܝ̣ܢ ܨܠܰܘ̈ܳܬܳܐ ܕܰܒܨܺܝ̣ܪܽܘ̣ܬܰܢ܆ ܘܰܥܒܶܕ ܒܪܶܚܡܰܬ݂ ܐ̱ܢܳܫܽܘ̣ܬܳܟ ܢܝܳܚܳܐ ܘܕܽܘ̣ܟܪܳܢܳܐ ܛܳܒܳܐ ܠܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̣̈ܕܶܐ ܡܗܰܝ̈ܡܢܶܐ܆ ܐܰܝܟܰܢܳܐ ܕܰܚܢܰܢ ܘܗ̣ܶܢܽܘ̇ܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝ̣ܬܳܐ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ: ܒܩ̄ ܡܳܪܝܳܐ ܡܳܪܰܢ
ܡܳܪܝܳܐ ܡܳܪܰܢ܆ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܦܰܢܛܺܝ̣ܩܳܘܣܛܺܝ̣ ܥܺܐܕܳܐ ܕܫܰܒܽܘ̣̈ܥܶܐ. ܒܰܕܡܽܘ̣ܬ ܢܽܘ̣ܪܳܐ܆ ܢܚ̣ܶܬ ܪܽܘܚܳܐ ܦܰܪܰܩܠܺܝ̣ܛܳܐ ܒܓܰܘ ܥܶܠܺܝ̣ܬܳܐ ܠܰܫܠܺܝ̣̈ܚܶܐ ܒܪ̈ܺܝ̣ܟܶܐ. ܘܰܓܡܰܪ ܐܶܢܽܘ̇ܢ܆ ܒܗܰܝܡܳܢܽܘ̣ܬܳܐ ܫܰܪܺܝ̣ܪܬܳܐ ܘܣܰܒܪܳܐ ܘܚܽܘ̣ܒܳܐ ܘܰܢܦܰܩ̣ܘ̱ ܠܰܣܒܰܪܬܳܐ ܗ̄ ܘܰܐܦܢܺܝ̣ܘ ܥܰܡ̱̈ܡܶܐ ܛܳܥܰܝ̈ܳܐ ܘܰܐܠܶܦ̣ܘ̱ ܐܶܢܽܘ̇ܢ ܐܽܘ̣ܪܚܳܐ ܕܰܫܪܳܪܳܐ܀
ܫܽܘܒܚܳܐ ܘܡܶܢ ܥܳܠܰܡ
ܡܳܪܝܳܐ ܡܳܪܰܢ܆ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܦܰܢܛܺܝ̣ܩܳܘܣܛܺܝ̣ ܒܳܥܶܝܢܰܢ ܡܶܢܳܟ. ܕܬܶܐܫܽܘ̣ܕ ܥܠܰܝܢ܆ ܡܰܘܗܰܒܬܳܐ ܕܪܽܘܚܳܐ ܕܩܽܘ̣ܕܫܳܐ ܘܒܶܗ ܢܶܬܚܰܝܰܠ ܥܰܠ ܒܺܝ̣ܫܳܐ ܣܳܐܢܰܢ. ܗ̄ ܢܰܘܕܶܐ ܘܢܶܣܓܽܘ̣ܕ ܘܰܢܫܰܒܰܚ ܠܐ̰ܪܳܙܳܐ ܪܰܒܳܐ ܕܰܬܠܺܝ̣ܬܳܝܽܘ̣ܬܳܐ܀
ܥܶܛܪܳܐ
ܛܰܝܒܽܘ̣ܬܳܐ ܡܫܰܡܠܰܝܬܳܐ ܕܪܽܘܚܳܐ ܩܰܕܺܝܫܳܐ ܡܠ̣ܰܝܬ ܠܠܶܒܰܘ̈ܳܬܳܐ ܕܰܫܠܺܝ̈ܚܰܝܟ ܒܗܳܢܐ ܝܰܘܡܳܐ ܕܦܰܢܛܺܝ̣ܩܳܘܣܛܺܝ̣ ܡܫܺܝܚܳܐ ܐܠܰܗܰܢ܆ ܘܫܽܘ̣ܘܕܳܝܳܐ ܕܰܠܘܳܬܗܽܘ̇ܢ ܫܰܡܠܺܝ̣ܬ ܒܝܰܕ ܡܰܐܓܢܳܢܽܘ̣ܬܳܐ ܕܪܽܘܚܳܐ ܩܰܕܺܝܫܳܐ܆ ܐܰܫܘܳܐ ܐܳܦ ܠܰܢ ܕܢܶܬܩܰܒܰܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ܆ ܘܢܶܬܚܰܠܰܠ ܘܢܶܬܚܰܘܰܪ ܡ̣ܶܢ ܒܺܝ̣̈ܫܳܬܰܢ܆ ܘܰܒܙܽܘ̣ܦܳܐ ܕܛܰܝܒܽܘ̣ܬܳܟ ܢܶܬܡܪܶܩ܆ ܐܰܝܟܰܢܳܐ ܕܠܰܬܠܳܬܳܐ ܩܢܽܘ̣̈ܡܶܐ ܩܰܕܺܝ̣̈ܫܶܐ ܕܰܟܝܳܐܺܝܬ ܢܶܣܓܽܘ̣ܕ ܘܰܢܫܰܒܰܚ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܙܘ̣ܡܳܪܳܐ
ܡܰܠܟܽܘ̣ܬܳܟ ܡܳܪܝܳܐ ܡܰܠܟܽܘ̣ܬܳܐ ܕܟܽܠ ܥܳܠܡܺܝ̣̈ܢ܆ ܐܳܦ ܫܽܘ̣ܠܛܳܢܳܐ ܕܺܝ̣ܠܳܟ ܥܕܰܡܳܐ ܠܥܶܒܪ̈ܶܝܗ̇ ܕܰܐܪܥܳܐ܆ ܘܶܐܢܳܐ ܒܣܽܘ̣ܓܳܐܐ ܕܛܰܝܒܽܘ̣ܬܳܟ ܐܶܥܽܘ̣ܠ ܠܒܰܝܬܳܟ܆ ܘܶܐܣܓܽܘ̣ܕ ܒܗܰܝܟܠܳܐ ܕܩܽܘ̣ܕܫܳܐ ܕܺܝ̣ܠܳܟ ܗ̄܀
ܩܶܪ̈ܝܳܢܶܐ:
ܒ ܡܰܠܟ̈ܶܐ ܒ: ܝܕ ـ ܝܙ Kings 2:14-17
ܝܽܘܐܶܝܠ. ܒ: ܟܗ ـ ܠܒ Joel 2:25-32
ܦܪܰܟܣܺܝ̣ܣ. ܝܛ: ܚ ـ ܝܒ Acts 19:8-12
ܐܶܓܰܪܬܶܗ ܕܦܰܘܠܽܘ̣ܣ ܫܠܺܝ̣ܚܳܐ ܕܰܠܘܳܬ ܩܽܘ̣ܪ̈ܺܝ̣ܢܬܳܝܶܐ ܩܰܕܡܳܝܬܳܐ
ܝܕ: ܟܘ ـ ܠܓ I Corinthians 14:26-33
ܐܳܡܰܪ ܐ݈ܢܳܐ ܗܳܟ݂ܺܝܠ ܐܰܚܰܝ̈ ܕ݁ܶܐܡܰܬ݂ܝ ܕ݁ܡܶܬ݂ܟ݁ܰܢܫܺܝܢ ܐܢ݈ܬ݁ܽܘܢ ܠܰܐܝܢܳܐ ܡܶܢܟ݂ܽܘܢ ܕ݁ܺܐܝܬ݂ ܠܶܗ ܡܰܙܡܽܘܪܳܐ ܢܺܐܡܰܪ ܘܰܐܝܢܳܐ ܕ݁ܺܐܝܬ݂ ܠܶܗ ܝܽܘܠܦ݁ܳܢܳܐ ܘܰܐܝܢܳܐ ܕ݁ܺܐܝܬ݂ ܠܶܗ ܓ݁ܶܠܝܳܢܳܐ ܘܰܐܝܢܳܐ ܕ݁ܺܐܝܬ݂ ܠܶܗ ܠܶܫܳܢܳܐ ܘܰܐܝܢܳܐ ܕ݁ܺܐܝܬ݂ ܠܶܗ ܦ݁ܽܘܫܳܩܳܐ ܟ݁ܽܠܗܶܝܢ ܠܒ݂ܶܢܝܳܢܳܐ ܢܶܗܘ̈ܝܳܢ܂ ܘܶܐܢ ܒ݁ܠܶܫܳܢܳܐ ܐ݈ܢܳܫ ܢܡܰܠܶܠ ܬ݁ܪܶܝܢ ܢܡܰܠܠܽܘܢ ܘܟ݂ܰܕ݂ ܣܰܓ݁ܺܝ ܬ݁ܠܳܬ݂ܳܐ ܘܚܰܕ݂ ܚܰܕ݂ ܢܡܰܠܠܽܘܢ ܘܚܰܕ݂ ܢܦ݂ܰܫܶܩ܂ ܘܶܐܢ ܠܰܝܬ݁ ܕ݁ܰܡܦ݂ܰܫܶܩ ܢܶܫܬ݁ܽܘܩ ܠܶܗ ܒ݁ܥܺܕ݈݁ܬ݁ܳܐ ܗܰܘ ܕ݁ܰܡܡܰܠܶܠ ܒ݁ܠܶܫܳܢܳܐ ܘܒ݂ܰܝܢܰܘܗ݈ܝ ܠܢܰܦ݂ܫܶܗ ܘܠܰܐܠܳܗܳܐ ܢܡܰܠܶܠ܂ ܢܒ݂ܺܝ̈ܶܐ ܕ݁ܶܝܢ ܬ݁ܪܶܝܢ ܐܰܘ ܬ݁ܠܳܬ݂ܳܐ ܢܡܰܠܠܽܘܢ ܘܫܰܪܟ݁ܳܐ ܢܦ݂ܰܪܫܽܘܢ܂ ܘܶܐܢ ܠܰܐ݈ܚܪܺܢܳܐ ܢܶܬ݂ܓ݁ܠܶܐ ܟ݁ܰܕ݂ ܝܳܬ݂ܶܒ݂ ܩܰܕ݂ܡܳܝܳܐ ܢܶܫܬ݁ܽܘܩ ܠܶܗ܂ ܡܶܫܟ݁ܚܺܝܢ ܐܢ݈ܬ݁ܽܘܢ ܓ݁ܶܝܪ ܟ݁ܽܠܟ݂ܽܘܢ ܕ݁ܚܰܕ݂ ܚܰܕ݂ ܬ݁ܶܬ݂ܢܰܒ݁ܽܘܢ ܕ݁ܟ݂ܽܠܢܳܫ ܢܺܐܠܰܦ݂ ܘܟ݂ܽܠܢܳܫ ܢܶܬ݂ܒ݁ܰܝܰܐ܂ ܪܽܘܚܳܐ ܓ݁ܶܝܪ ܕ݁ܰܢܒ݂ܺܝ̈ܶܐ ܠܰܢܒ݂ܺܝ̈ܶܐ ܡܶܫܬ݁ܰܥܒ݁ܕ݂ܳܐ܂ ܡܶܛܽܠ ܕ݁ܰܐܠܳܗܳܐ ܠܳܐ ܗ݈ܘܳܐ ܕ݁ܰܫܓ݂ܽܘܫܝܳܐ ܐܶܠܳܐ ܕ݁ܰܫܠܳܡܳܐ ܐܰܝܟ݂ ܕ݁ܰܒ݂ܟ݂ܽܠܗܶܝܢ ܥܺܕ݂̈ܳܬ݂ܳܐ ܕ݁ܩܰܕ݁ܺܝ̈ܫܶܐ. ܒܰܪܶܟܡܳܪܝ̱܀
ܗܽܘ̣ܠܳܠܳܐ ܘܦܶܬܓܳܡܳܐ
ܠܶܒܳܐ ܕܰܟܝܳܐ ܒܪܺܝ̣ ܐܰܠܳܗܳܐ. ܘܪܽܘ̣ܚܳܟ ܬܩܰܢܬܳܐ ܚܰܕܶܬ ܒܓܰܘܝ̱ ܗ̄܀
ܐܶܘܰܢܓܶܠܝܽܘܢ ܕܝܽܘܚܰܢܳܢ
(ܕ: ܝܓ ـ ܟܕ. John 4:13-24)
ܥܢܳܐ ܝܶܫܽܘܥ ܘܶܐܡܰܪ ܠܳܗ̇ ܟ݁ܽܠ ܕ݁ܢܶܫܬ݁ܶܐ ܡܶܢ ܗܳܠܶܝܢ ܡܰܝ̈ܳܐ ܬ݁ܽܘܒ݂ ܢܶܨܗܶܐ܂ ܟ݁ܽܠ ܕ݁ܶܝܢ ܕ݁ܢܶܫܬ݁ܶܐ ܡܶܢ ܡܰܝ̈ܳܐ ܕ݁ܶܐܢܳܐ ܐܶܬ݁ܶܠ ܠܶܗ ܠܳܐ ܢܶܨܗܶܐ ܠܥܳܠܰܡ ܐܶܠܳܐ ܡܰܝ̈ܳܐ ܗܳܢܽܘܢ ܕ݁ܝܳܗܶܒ݂ ܐ݈ܢܳܐ ܠܶܗ ܢܶܗܘܽܘܢ ܒ݁ܶܗ ܡܥܺܝܢܳܐ ܕ݁ܡܰܝ̈ܳܐ ܕ݁ܢܳܒ݂ܥܺܝܢ ܠܚܰܝ̈ܶܐ ܕ݁ܰܠܥܳܠܰܡ܂ ܐܳܡܪܳܐ ܠܶܗ ܐܰܢ݈ܬ݁ܬ݂ܳܐ ܗܳܝ ܡܳܪܝ ܗܰܒ݂ ܠܺܝ ܡܶܢ ܗܳܠܶܝܢ ܡܰܝ̈ܳܐ ܕ݁ܠܳܐ ܬ݁ܽܘܒ݂ ܐܶܨܗܶܐ ܘܠܳܐ ܗܘܺܝܬ݂ ܐܳܬ݂ܝܳܐ ܕ݁ܳܠܝܳܐ ܡܶܢ ܗܳܪܟ݁ܳܐ܂ ܐܳܡܰܪ ܠܳܗ̇ ܝܶܫܽܘܥ ܙܶܠܝ ܩܪܳܝ ܠܒ݂ܰܥܠܶܟ݂ܝ ܘܬ݂ܳܝ ܠܗܳܪܟ݁ܳܐ܂ ܐܳܡܪܳܐ ܠܶܗ ܠܰܝܬ݁ ܠܺܝ ܒ݁ܰܥܠܳܐ ܐܳܡܰܪ ܠܳܗ̇ ܝܶܫܽܘܥ ܫܰܦ݁ܺܝܪ ܐܶܡܰܪܬ݁ܝ ܕ݁ܠܰܝܬ݁ ܠܺܝ ܒ݁ܰܥܠܳܐ܂ ܚܰܡܫܳܐ ܓ݁ܶܝܪ ܒ݁ܰܥ̈ܠܺܝܢ ܗܘܰܘ ܠܶܟ݂ܝ ܘܗܳܢܳܐ ܕ݁ܺܐܝܬ݂ ܠܶܟ݂ܝ ܗܳܫܳܐ ܠܳܐ ܗܘܳܐ ܒ݁ܰܥܠܶܟ݂ܝ ܗܳܕ݂ܶܐ ܫܰܪܺܝܪܬ݁ܳܐ ܐܶܡܰܪܬ݁ܝ܂ ܐܳܡܪܳܐ ܠܶܗ ܗܳܝ ܐܰܢ݈ܬ݁ܬ݂ܳܐ ܡܳܪܝ ܚܳܙܝܳܐ ܐ݈ܢܳܐ ܕ݁ܰܢܒ݂ܺܝܳܐ ܐܰܢ݈ܬ݁܂ ܐܰܒ݂ܳܗܰܝ̈ܢ ܒ݁ܗܳܢܳܐ ܛܽܘܪܳܐ ܣܓ݂ܶܕ݂ܘ ܘܰܐܢ݈ܬ݁ܽܘܢ ܐܳܡܪܺܝܢ ܐܢ݈ܬ݁ܽܘܢ ܕ݁ܒ݂ܽܐܽܘܪܺܫܠܶܡ ܗ݈ܽܘ ܐܰܬ݂ܰܪ ܕ݁ܘܳܠܶܐ ܠܡܶܣܓ݁ܰܕ݂܂ ܐܳܡܰܪ ܠܳܗ ܝܶܫܽܘܥ ܐܰܢ݈ܬ݁ܬ݂ܳܐ ܗܰܝܡܶܢܺܝܢܝ ܕ݁ܳܐܬ݂ܝܳܐ ܫܳܥܬ݂ܳܐ ܕ݁ܠܳܐ ܒ݁ܗܳܢܳܐ ܛܽܘܪܳܐ ܘܳܐܦ݂ ܠܳܐ ܒ݁ܽܐܽܘܪܺܫܠܶܡ ܬ݁ܶܣܓ݁ܕ݂ܽܘܢ ܠܰܐܒ݂ܳܐ܂ ܐܰܢ݈ܬ݁ܽܘܢ ܣܳܓ݂ܕ݁ܺܝܢ ܐܢ݈ܬ݁ܽܘܢ ܠܡܶܕ݁ܶܡ ܕ݁ܠܳܐ ܝܳܕ݂ܥܺܝܢ ܐܢ݈ܬ݁ܽܘܢ ܚܢܰܢ ܕ݁ܶܝܢ ܣܳܓ݂ܕ݁ܺܝܢ ܚ݈ܢܰܢ ܠܡܳܐ ܕ݁ܝܳܕ݂ܥܺܝܢ ܚ݈ܢܰܢ ܕ݁ܚܰܝ̈ܶܐ ܡܶܢ ܝܺܗܽܘ̈ܕ݂ܳܝܶܐ ܐܶܢܽܘܢ܂ ܐܶܠܳܐ ܐܳܬ݂ܝܳܐ ܫܳܥܬ݂ܳܐ ܘܗܳܫܳܐ ܐܺܝܬ݂ܶܝܗ̇ ܐܶܡܰܬ݂ܝ ܕ݁ܣܳܓ݂ܽܘ̈ܕ݂ܶܐ ܫܰܪܺܝܪ̈ܶܐ ܢܶܣܓ݁ܕ݂ܽܘܢ ܠܰܐܒ݂ܳܐ ܒ݁ܪܽܘܚܳܐ ܘܒ݂ܰܫܪܳܪܳܐ ܐܳܦ݂ ܐܰܒ݂ܳܐ ܓ݁ܶܝܪ ܕ݁ܰܐܝܟ݂ ܗܳܠܶܝܢ ܗ݈ܽܘ ܣܳܓ݂ܽܘ̈ܕ݂ܶܐ ܒ݁ܳܥܶܐ܂ ܪܽܘܚܳܐ ܗܽܘ ܓ݁ܶܝܪ ܐܰܠܳܗܳܐ ܘܰܐܝܠܶܝܢ ܕ݁ܣܳܓ݂ܕ݁ܺܝܢ ܠܶܗ ܒ݁ܪܽܘܚܳܐ ܘܒ݂ܰܫܪܳܪܳܐ ܘܳܠܶܐ ܕ݁ܢܶܣܓ݁ܕ݂ܽܘܢ܀
ܡܰܟܪܶܙ ܡܫܰܡܫܳܢܳܐ ܠܽܘ̣ܛܰܢܺܝܰܐ
ܢܩܽܘ̣ܡ ܫܰܦܺܝ̣ܪ ܟܽܠܰܢ ܒܰܚܦܺܝ̣ܛܽܘ̣ܬܳܐ ܘܰܒܩ̈ܳܠܶܐ ܕܰܡܪܰܥܶܝܢ ܠܰܐܠܳܗܳܐ ܢܶܥܢܶܐ ܘܢܺܐܡܰܪ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܺܝ̣ܚܳܐ ܐܠܳܗܳܐ ܕܺܝ̣ܠܰܢ܆ ܕܠܰܐܒܳܗ̈ܳܬܳܐ ܕܡ̣ܶܢ ܩܕܺܝ̣ܡ ܘܠܰܢܒܺܝ̈ܶܐ ܐ̱ܪܳܙܳܢܳܐܺܝܬ ܐܳܦ ܥܰܡܽܘ̣ܛܳܐܺܝܬ ܩܰܕܶܡ̣ܬ ܐܶܬܺܝ̣ܕܰܥܬ܆ ܘܠܰܫܠܺܝ̣̈ܚܶܐ ܕܶܝܢ ܢܰܗܺܝ̣ܪܳܐܺܝܬ ܘܠܳܐ ܡܶܬܦܰܫܩܳܢܳܐܺܝܬ ܐܶܬܓܠܰܝܬ܆ ܒܳܥܶܝܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܰܘ ܕܡ̣ܶܢ ܥܽܘ̣ܒܳܐ ܠܳܐ ܡܶܣܬܰܝܟܳܢܳܐ ܕܰܐܒܳܐ܆ ܕܠܳܐ ܙܰܒ̈ܢܶܐ ܟܺܝ̣ܬ ܘܥܶܕ̈ܳܢܶܐ ܠܳܐ ܡܶܬܡܰܠܠܳܢܳܐܺܝܬ ܐܶܬܺܝ̣ܠܶܕܬ܆ ܘܝܰܘܡܳܢܳܐ ܕܶܝܢ ܠܰܫܠܺܝ̣̈ܚܶܐ ܕܺܝ̣ܠܳܟ ܩܰܕܺܝ̣̈ܫܶܐ ܒܝܰܕ ܡܰܐܓܢܳܢܽܘ̣ܬܶܗ ܕܪܽܘܚܳܐ ܕܡܶܢܶܗ ܕܰܐܒܳܐ ܢܳܦܶܩ ܘܡܶܢܳܟ ܢܳܣܶܒ܆ ܐܰܨܡܰܚ̣ܬ ܒܡܰܘܗܰܒܬܳܐ ܕܺܝ̣ܠܳܟ ܐܰܠܳܗܳܐܝܬ܆ ܐܰܫܘܳܐ ܐܳܦ ܠܰܢ ܥܰܒܕܰܝ̈ܟ ܠܥܽܘ̣ܬܪܳܐ ܕܫܽܘ̣̈ܟܳܢܶܐ ܐܰܠܳܗܳܝ̈ܶܐ܆ ܒܳܥܶܝܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܰܘ ܕܶܐܫܬܰܘܕܺܝ̣ܬ ܠܬܰܠܡܺܝ̣̈ܕܶܐ ܕܺܝ̣ܠܳܟ ܩܰܕܺܝ̣̈ܫܶܐ ܕܰܬܫܰܕܰܪ ܠܗܽܘܢ ܪܽܘܚܳܐ ܦܰܪܰܩܠܺܝ̣ܛܳܐ܆ ܘܫܰܡܠܺܝ̣ܬ ܠܫܽܘ̣ܘ̈ܕܳܝܰܝܟ ܒܗܳܢܳܐ ܝܰܘܡܳܐ ܘܰܒܫܳܥܬܳܐ ܗܳܕܶܐ ܕܒܳܗ̇ ܡܚܰܓܶܝܢܰܢ ܠܥܺܐܕܳܐ ܕܦܰܢܛܺܝ̣ܩܳܘܣܛܺܝ̣܆ ܐܰܫܘܳܐ ܠܰܢ ܠܰܡܩܰܒܠܳܢܽܘ̣ܬܳܐ ܕܪܽܘܚܳܐ ܕܺܝ̣ܠܳܟ ܩܰܕܺܝܫܳܐ܆ ܒܳܥܶܝܢܰܢ ܡܶܢܳܟ܀
ܥܡܐ: ܩܽܘܪܝܶܐܠܰܝܣܳܘܢ܀
ܗ̇ܰܘ ܕܰܐܠܶܦ̣ܬ ܠܰܢ ܕܰܒܝܰܘ̈ܡܳܬܳܐ ܕܦܰܢܛܺܝ̣ܩܳܘܣܛܺܝ̣ ܘܰܕܚܰܕ ܒܫܰܒܳܐ ܩܰܕܺܝܫܳܐ ܟܰܕ ܟܢܺܝ̣ܫܺܝ̣ܢܰܢ ܒܩܰܘܡܳܐ ܫܰܦܺܝ̣ܪܳܐ ܨܠܽܘ̣ܬܳܐ ܢܫܰܡܠܶܐ܆ ܠܰܘ ܒܰܠܚܽܘ̣ܕ ܡܶܛܽܠ ܗܳܝ̇ ܕܡ̣ܶܢ ܡܰܦܽܘ̣ܠܬܳܐ ܕܰܚܛܺܝ̣ܬܳܐ ܒܝܰܕ ܩܝܳܡܬܳܟ ܦܰܐܝܰܬ݂ ܠܰܐܠܳܗܳܐ ܐܰܩܺܝ̣ܡܬ ܠܰܢ. ܐܶܠܳܐ ܡܶܛܽܠ ܕܝܽܘ̣ܩܢܳܐ ܕܥܳܠܡܳܐ ܕܰܥܬܺܝ̣ܕ ܐܺܝ̣ܬܰܘܗ̱ܝ ܝܰܘܡܳܐ ܕܚܰܕ ܒܫܰܒܳܐ ܘܰܕܦܰܢܛܺܝ̣ܩܳܘܣܛܺܝ̣܆ ܐܰܫܘܳܐ ܠܰܢ ܕܰܒܣܶܓܕܬܳܐ ܕܝܰܘܡܳܐ ܗܳܢܳܐ ܩܰܕܺܝܫܳܐ ܕܒܶܗ ܠܰܫܠܺܝ̣̈ܚܶܐ ܩܰܕܺܝ̣̈ܫܶܐ ܒܡܰܘܗܰܒܬܳܐ ܕܪܽܘܚܳܟ ܩܰܕܺܝܫܳܐ ܫܰܡܠܺܝ̣ܬ܆ ܒܗܽܘܢ ܒܫܽܘ̣̈ܟܳܢܶܐ ܕܺܝ̣ܠܶܗ ܐܰܠܳܗܳܝ̈ܶܐ ܢܶܥ̣ܬܰܪ ܘܠܰܒܥܶܠܕ̈ܒܳܒܶܐ ܕܺܝ̣ܠܰܢ ܡܶܬܝܰܕ̈ܥܳܢܶܐ ܟܺܝ̣ܬ ܘܡܶܬܪ̈ܰܓܫܳܢܶܐ ܢܶܙܟܶܐ. ܒܳܥܶܝܢܰܢ ܡܶܢܳܟ܇ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܡܫܰܡܫܳܢܳܐ ܢܰܙܥܶܩ ܘܢܺܐܡܰܪ:
ܡ̣ܶܢ ܡܳܪܝܳܐ ܢܶܒܥܶܐ ܘܰܢܣܺܝ̣ܡ ܒܽܘ̣ܪ̈ܟܶܐ ܥܰܠ ܐܰܪܥܳܐ܀
ܟܳܗܢܳܐ ܢܶܬܓܗܶܢ ܥܰܠ ܕܰܪܓܳܐ ܕܡܰܕܒܚܳܐ ܐܰܟܡܳܐ ܕܚܰܘܝ̣ܢܰܢ ܒܣܶܓܕܬܳܐ ܩܰܕܡܳܝܬܳܐ.
ܘܰܡܫ̈ܰܡܫܳܢܶܐ ܢܺܐܡܪܽܘ̇ܢ ܡܰܥܢܺܝ̣ܬܳܐ ܗܳܕܶܐ
ܩܽܘܪܝܶܐܠܰܝܣܳܘܢ܀
ܟܳܗܢܳܐ ܓܗܳܢܬܳܐ
ܡܫܺܝ̣ܚܳܐ ܐܰܠܳܗܳܐ ܕܺܝ̣ܠܰܢ ܗܰܘ ܕܠܰܢ ܗܳܢܽܘ̇ܢ ܕܰܒܝܰܕ ܦܽܘ̣ܠܚܳܢ ܦܬܰܟܪ̈ܶܐ ܣܳܓܽܘ̣̈ܕܶܐ ܗ̣ܘܰܝܢܰܢ ܕܳܐܟܶܠܩܰܪܨܳܐ. ܘܰܕܫܺܐܕ̈ܶܐ ܡܳܪ̈ܘ̣ܕܶܐ܆ ܘܰܒܝܰܕ ܡܰܚܬܬܳܐ ܕܪܶܚܡܰܬ݂ ܐ̱ܢܳܫܽܘ̣ܬܳܐ ܕܺܝ̣ܠܳܟ ܡܰܠܝܰܬ݂ ܪ̈ܰܚܡܶܐ ܘܰܚܢܳܢܳܐ ܕܰܠܘܳܬܰܢ ܣܳܓܘ̣̈ܕܶܐ ܫܰܪܺܝ̣ܪ̈ܶܐ ܕܺܝ̣ܠܳܗ̇ ܕܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ ܓܡ̣ܰܪܬ ܘܫܰܡܠܺܝ̣ܬ ܘܒܰܩܝܳܡܬܳܐ ܕܺܝ̣ܠܳܟ ܦܰܐܝܰܬ݂ ܠܰܐܠܳܗܳܐ ܠܰܢ ܡ̣ܶܢ ܡܰܦܽܘ̣ܠܬܳܐ ܕܰܚܛܺܝ̣ܬܳܐ ܬܰܪܶܨܬ ܘܰܐܩܺܝ̣ܡܬ܆ ܘܠܰܒܥܶܠܕ̈ܒܳܒܶܐ ܕܺܝ̣ܠܰܢ ܡܶܬܝܰܕ̈ܥܳܢܶܐ ܬܚܶܝܬ ܪ̈ܶܓܠܶܐ ܕܺܝ̣ܠܰܢ ܣܰܚ̣ܶܦܬ ܘܰܫ̣ܕܰܝܬ܆ ܘܝܰܗ̣ܒܬ ܠܰܢ ܚܰܝܠܳܐ ܕܰܒܦܰܪܶܗܣܺܝܰܐ ܢܙܰܡܰܪ ܘܢܺܐܡܰܪ܆ ܕܗ̣ܶܢܽܘ̇ܢ ܒܪܰܟܘ̱ ܘܰܢܦܰܠܘ̱ ܘܰܚܢܰܢ ܩܳܡܢ ܘܶܐܬܛܰܝܰܒܢܰܢ܆ ܘܟܰܕ ܠܰܫܠܺܝ̣̈ܚܶܐ ܕܺܝ̣ܠܳܟ ܩܰܕܺܝ̣̈ܫܶܐ ܦܩ̣ܰܕܬ ܕܡ̣ܶܢ ܐܽܘܪܺܫܠܶܡ ܠܳܐ ܢܶܪܚܩܽܘܢ ܥܕܰܡܳܐ ܕܚܰܝܠܳܐ ܐܰܠܳܗܳܝܳܐ ܡ̣ܶܢ ܪܰܘܡܳܐ ܢܩܰܒܠܽܘ̇ܢ܆ ܠܗܳܕܶܐ ܣܥܰܪܘ̱ ܘܫܰܡܠܺܝ̣ܘ. ܟܰܕ ܡܣܰܟܶܝܢ ܗ̱ܘܰܘ ܠܫܽܘ̣ܘܕܳܝܳܐ ܕܺܝ̣ܠܳܟ ܫܰܪܺܝ̣ܪܳܐ ܗܰܘ ܕܝܰܘܡܳܢܳܐ ܓܡܰܪܬ ܘܫܰܡܠܺܝ̣ܬ܆ ܟܰܕ ܒܰܕܡܽܘ̣ܬ ܠܶܫ̈ܳܢܶܐ ܕܢܽܘ̣ܪܳܐ ܐܰܓܶܢ ܥܠܰܝܗܽܘ̇ܢ ܪܽܘܚܳܐ ܩܰܕܺܝܫܳܐ ܗܰܘ ܕܫܰܕܰܪܬ ܘܒܶܗ ܐܶܙܕܰܝܰܢܘ̱ ܘܶܐܬܚܰܝܰܠܘ̱܆ ܕܰܠܒܺܝ̣ܒܳܐܺܝܬ ܘܓܰܠܝܳܐܺܝܬ ܢܰܟܪܙܽܘ̇ܢ ܠܐ̱ܪܳܙܳܐ ܕܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ ܠܟܽܠܗܽܘܢ ܥܰܡ̱̈ܡܶܐ ܘܶܐܡܘ̈ܳܬܳܐ ܒܠܶܫ̈ܳܢܶܐ ܕܰܬܚܶܝܬ ܫܡܰܝܳܐ܆ ܘܢܶܣܥܪܽܘ̇ܢ ܐܳܬܘ̈ܳܬܳܐ ܫܒܺܝ̣̈ܚܳܬܳܐ ܘܬܶܕܡܪ̈ܳܬܳܐ ܬܡܺܝ̣̈ܗܳܬܳܐ. ܘܥܰܠ ܗܳܕܶܐ ܣܳܓܕܺܝ̣ܢܰܢ ܠܳܟ ܘܡܰܘܕܶܝܢܰܢ ܠܳܟ܇ ܘܒܽܘ̣ܪ̈ܟܶܐ ܥܰܠ ܐܰܪܥܳܐ ܣܳܝܡܺܝ̣ܢܰܢ܆ ܟܰܕ ܡܚܰܘܶܝܢܰܢ ܒܝܰܕ ܗܳܕܶܐ ܕܶܐܫܬܰܘܕܰܥܢܰܢ ܡ̣ܶܢ ܟܰܕܽܘ ܕܢܶܣܓܽܘ̣ܕ ܠܳܟ ܣܶܓܕܬܳܐ ܗܳܝ ܕܰܒܪܽܘܚܳܐ ܘܒܰܫܪܳܪܳܐ ܘܠܳܐܒܽܘ̣ܟ ܡܒܰܪܟܳܐ ܘܛܽܘ̣ܒܬܳܢܳܐ ܕܫܰܠܚܳܟ ܠܦܽܘ̣ܪܩܳܢܰܢ ܘܰܠܪܽܘܚܳܐ ܕܺܝ̣ܠܳܟ ܦܰܪܰܩܠܺܝ̣ܛܳܐ ܗܰܘ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘ̣ܣܺܝܰܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܟܳܗܢܳܐ ܢܰܙܥܶܩ ܘܢܺܐܡܰܪ:
ܩܽܘ̣ܡܘ̱ ܒܚܰܝܠܶܗ ܕܰܐܠܳܗܳܐ܀
ܟܳܗܢܳܐ ܐܳܚܶܕ ܒܐܺܝ̣̈ܕܰܘܗ̱ܝ ܡܶܐܣܰܪܬܳܐ ܕܓܰܘܙܳܐ ܐܰܟܡܳܐ ܕܚܰܘܺܝ̣ܢܰܢ ܒܣܶܓܕܬܳܐ ܩܰܕܡܳܝܬܳܐ ܘܢܶܪܽܘ̣ܣ ܒܶܗ ܡ̣ܶܢ ܡܰܝ̈ܳܐ ܥܰܠ ܡܰܕܒܚܳܐ ܘܥܰܠ ܥܰܡܳܐ. ܗܳܝܕܶܝܢ ܐܳܡܪܺܝ̣ܢ ܡܰܥܢܺܝ̣ܬܳܐ ܗܳܕܶܐ.
ܘܡܶܛܽܠ ܗܳܕܶܐ ܥܕܰܡܳܐ ܠܝܽܘ̣ܡ ܦܰܢܛܺܝ̣ܩܳܘܣܛܺܝ̣܆ ܠܳܐ ܒܳܪܟܺܝ̣ܢܰܢ ܥܰܠ ܐܰܪܥܳܐ ܡܳܐ ܕܰܡܨܰܠܶܝܢܰܢ. ܘܠܽܘ̣ܩܒܰܠ ܒܥܶܠܕ̈ܒܳܒܰܝܢ ܡܙܰܡܪܺܝ̣ܢܰܢ ܘܳܐܡܪܺܝ̣ܢܰܢ ܥܰܡ ܡܙܰܡܪܳܢܳܐ ܐܰܠܳܗܳܝܳܐ ܘܰܢܒܺܝܳܐ ܕܰܘܺܝ̣ܕ܆ ܕܗ̣ܶܢܽܘ̇ܢ ܐܶܬܦܰܪܟܰܠܘ̱ ܘܰܢܦܰܠܘ̱܆ ܚܢܰܢ ܕܶܝܢ ܩܳܡܢܰܢ ܘܶܐܬܦܫܶܛܢܰܢ܆ ܟܰܕ ܕܶܝܢ ܒܠܶܫ̈ܳܢܶܐ ܕܢܽܘ̣ܪܳܐ ܕܢܰܚ ܘܶܐܬܓܠܺܝ̣ ܠܰܢ ܪܽܘܚܳܐ ܩܰܕܺܝܫܳܐ ܦܰܐܝܽܘ̣ܬ ܐܰܠܳܗܳܐܝܬ ܒܽܘ̣ܪܟܳܐ܆ ܩܳܥܶܝܢܰܢ܆ ܒܗܳܝ̇ ܕܠܳܐ ܡܣܰܝܒܪܺܝ̣ܢܰܢ ܚܙܳܬܶܗ܀
ܬܶܫܡܶܫܬܳܐ ܬܠܺܝ̣ܬܳܝܬܳܐ
ܒܩܺܝ̣ܢܬܳܐ ܫܒܺܝ̣ܥܳܝܬܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܦܰܪܰܩܠܺܝ̣ܛܳܐ ܪܽܘܚܳܐ ܩܰܕܺܝܫܳܐ ܗܰܘ ܕܒܰܕܡܽܘ̣ܬ ܠܶܫܳܢ̈ܶܐ ܢܽܘ̣ܪ̈ܳܢܳܝܶܐ ܢܚܶܬ ܥܰܠ ܫܠܺܝ̣̈ܚܶܐ ܩܰܕܺܝ̣̈ܫܶܐ ܒܥܶܠܺܝ̣ܬܳܐ܆ ܘܰܐܨܡܰܚ ܠܬܰܪ̈ܥܝܳܬܗܽܘ̇ܢ ܒܣܽܘ̣̈ܟܳܠܶܐ ܐܰܠܳܗܳܝ̈ܶܐ܆ ܐܰܢܗܰܪ ܠܰܢ ܒܙ̈ܰܠܓܶܐ ܛܽܘ̣ܒ̈ܬܳܢܶܐ ܕܡܰܘܗ̈ܒܳܬܳܟ܆ ܕܚܰܕܬܳܐܺܝܬ ܘܰܒܟܽܠܙܒܰܢ ܢܫܰܒܚܳܟ܆ ܘܠܰܐܒܳܐ ܗܰܘ ܕܡܶܢܶܗ ܢܳܦܶܩ ܐܰܢ̱ܬ܆ ܘܠܰܒܪܳܐ ܗܰܘ ܕܡܶܢܶܗ ܢܳܣܶܒ ܐܰܢ̱ܬ܆ ܗܳܫܳܐ ܘܰܒܟܽܠ ܙܒܰܢ ܠܥܳܠܡܺܝܢ܀
ܡܰܘܪܒܳܐ: ܐܶܡܪܰܬ݂ ܡܰܪܝܰܡ
ܫܠܳܡܠܶܟܝ̱ ܡܰܠܟܬܳܐ ܘܶܐܡܳܐ. ܗܶܕܪܳܐ ܕܟܽܠ ܒܬܽܘ̣̈ܠܳܢ܆ ܟܽܠ ܓܶܝܪ ܠܶܫܳܢܳܐ ܡܰܠܳܠܳܐ ܘܦܽܘ̣ܡܳܐ ܠܳܥܽܘ̣ܙܳܐ ܕܢܶܗܘܶܐ ܣܢܺܐܓܪܳܐ ܡܶܬܡܚܶܠ܆ ܒܗܳܝ̇ ܕܙܳܕܩܳܐܺܝܬ ܢܩܰܠܣܶܟܝ̱. ܘܓܳܗܪܝ̣ܢ ܕܶܝܢ ܗܰܘ̈ܢܶܐ ܟܽܠܗܽܘܢ܆ ܡ̣ܶܢ ܗܳܝ̇ ܕܢܶܣܬܰܟܠܽܘ̇ܢ ܠܒܰܛܢܶܟܝ̱ ܪܳܡ ܡ̣ܶܢ ܡܶܠܬܳܐ ܘܥܰܠ ܗܳܕܶܐ ܠܗܺܝ̣ܩܳܐܺܝܬ ܠܶܟܝ̱ ܒܙܶܕܩܳܐ ܟܽܠܰܢ ܡܰܘܪܒܺܝ̣ܢܰܢ܀
ܫܽܘܒܚܳܐ ܘܡܶܢ ܥܳܠܰܡ
ܟܽܠܰܢ ܐܰܝܠܶܝܢ ܕܶܐܬܢܦܰܚܢܰܢ ܡܶܢ ܛܰܝܒܽܘ̣ܬܳܐ ܐܰܠܳܗܳܝܬܳܐ܆ ܟܰܕ ܡܰܨܡܚܺܝ̣ܢܰܢ ܘܡܰܒܪܩܺܝ̣ܢܰܢ ܒܰܕܡܽܘ̣ܬܳܐ ܕܫܶܡܫܳܐ܆ ܢܩܰܒܠܺܝ̣ܗ̇ ܠܦܰܐܝܽܘ̣ܬܳܐ ܐܰܝܟ ܢܰܚܬܳܐ ܡܶܬܡܰܪܩܳܢܳܐ܆ ܘܰܠܗܰܘ ܫܘܶܐ ܒܚܰܝܠܳܐ ܘܚܶܟܡܬܳܐ܆ ܟܝܳܢܳܐ ܠܳܐ ܣܕܺܝ̣ܩܳܐ ܬܠܺܝ̣ܬܳܝ ܨܶܡܚ̈ܶܐ܆ ܟܰܕ ܚܳܕܶܝܢܰܢ ܡܗܰܝܡ̈ܢܶܐ ܟܽܠܰܢ ܢܫܰܒܰܚ܀
ܡܫܰܡܫܳܢܳܐ: ܣܛܰܘܡܶܢܩܰܐܠܘ̣ܣ ܩܽܘܪܝܶܐܠܰܝܣܳܘܢ܀
ܦܪܽܘ̣ܡܝܽܘܢ
ܬܶܫܒܽܘܚܬܳܐ ܠܗܰܘ ܡܳܪܝܳܐ ܪܽܘܚܳܐ ܩܰܕܺܝܫܳܐ܆ ܗܰܘ ܕܢܳܦܶܩ ܡܶܢ ܐܰܒܳܐ ܓܢܺܝ̣ܙܳܐ ܘܢܳܣܶܒ ܡ̣ܶܢ ܒܪܳܐ ܣܓܺܝ̣ܕܳܐ܆ ܗܰܘ ܕܟܽܠ ܕܨܳܒܶܐ ܥܳܒܶܕ ܘܡܰܥܒܶܕ ܒܚܰܝܠܶܗ ܬܰܩܺܝ̣ܦܳܐ܆ ܗܰܘ ܕܡܰܠܶܠ ܡܶܢ ܩܕܺܝ̣ܡ ܒܰܢܒܺܝ̈ܶܐ ܥܬ̣ܺܝ̈ܕܳܬܳܐ ܘܰܣܬܺܝ̣ܪ̈ܳܬܳܐ ܘܒܰܕܶܩ ܒܚܰܪܬܳܐ ܒܝܰܕ ܫܠܺܝ̣̈ܚܶܐ ܟܰܣ̈ܝܳܬܳܐ ܘܰܓܢܺܝ̣̈ܙܳܬܳܐ܆ ܟܰܕ ܒܰܕܡܽܘ̣ܬ ܠܶܫܳܢ̈ܶܐ ܕܢܽܘ̣ܪܳܐ ܐܰܓܶܢ ܥܠܰܝܗܽܘ̇ܢ ܒܩܰܕܺܝ̣ܫܽܘ̣ܬܳܐ ܘܰܡܠܳܐ ܐܶܢܽܘ̇ܢ ܓܡܺܝ̣ܪܳܐܺܝܬ ܚܶܟܡܬܳܐ ܘܺܝ̣ܕܰܥܬܳܐ܆ ܕܠܶܗ ܝܳܐܶܐ ܫܽܘܒܚܳܐ ܘܐܺܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܡܰܐܓܢܳܢܽܘ̣ܬܳܐ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫ̈ܳܥܶܐ ܘܙܰܒ̈ܢܶܐ. ܘܰܒܟܽܠܗܽܘܢ ܝܰܘܡ̈ܳܬܳܐ ܕܚܰܝ݂ܰܝ݂̈ܢ ܠܥܳܠܡܺܝܢ܀
ܣܶܕܪܳܐ
ܐܰܠܳܗܳܐ ܗܰܘ ܦܰܪܰܩܠܺܝܛܳܐ܆ ܡܩܰܕܫܳܢܳܐ ܕܥܺܕ̈ܳܬܳܐ ܘܓܳܡܽܘ̣ܪܳܐ ܕܟܽܠܗܶܝܢ ܬܶܫܡ̈ܫܳܬܳܐ ܐܰܠܳܗܳܝ̈ܳܬܳܐ܆ ܝܳܗܽܘ̣ܒܳܐ ܕܟܳܗܢܽܘ̣ܬܳܐ ܘܰܡܫܰܡܠܝܳܢܳܐ ܕܡܰܥܡܽܘ̣ܕܺܝ̣ܬܳܐ܆ ܡܩܰܕܫܳܢܳܐ ܕܐ̱ܪ̈ܳܙܶܐ ܘܰܡܚܰܣܝܳܢܳܐ ܕܰܚܛܳܗ̈ܶܐ܆ ܪܽܘܚܳܐ ܒܳܨܽܘ̣ܝܳܐ ܕܥܰܡܺܝ̣̈ܩܳܬܳܐ ܘܰܡܡܰܠܠܳܢܳܐ ܕܟܰܣ̈ܝܳܬܳܐ ܘܰܡܒܰܕܩܳܢܳܐ ܕܰܥܬܺܝ̣̈ܕܳܬܳܐ܆ ܘܣܳܥܽܘ̣ܪܳܐ ܕܬܶܕܡܪ̈ܳܬܳܐ܆ ܪܽܘܚܳܐ ܩܰܕܺܝܫܳܐ ܢܳܣܽܘ̣ܒܰܐ ܗ̱ܘ ܘܠܳܐ ܡܶܬܢܰܣܒܳܢܰܐ ܗ̱ܘ܆ ܓܳܡܽܘ̣ܪܰܐ ܗ̱ܘ ܘܠܰܘ ܡܶܬܓܰܡܪܳܢܰܐ ܗ̱ܘ܆ ܡܡܰܠܠܳܢܰܐ ܗ̱ܘ ܘܠܰܘ ܡܶܬܡܰܠܠܳܢܰܐ ܗ̱ܘ܆ ܡܩܰܕܫܳܢܰܐ ܗ̱ܘ ܘܠܳܐ ܡܶܬܩܰܕܫܳܢܰܐ ܗ̱ܘ܆ ܡܰܐܠܗܳܢܰܐ ܗ̱ܘ ܘܠܰܘ ܡܶܬܰܐܠܗܳܢܰܐ ܗ̱ܘ܆ ܪܽܘܚܳܐ ܕܡܶܬܬܙܺܝ̣ܥ ܡ̣ܶܢ ܝܳܬܶܗ܆ ܪܽܘܚܳܐ ܕܫܰܠܺܝ̣ܛ ܒܝܳܬܶܗ܆ ܪܽܘܚܳܐ ܚܰܝܠܬܳܢ ܒܚܰܝܠܶܗ܆ ܪܽܘܚܳܐ ܕܡܶܫܬܰܒܰܚ ܒܫܽܘ̣ܒܚܶܗ܆ ܪܽܘܚܳܐ ܕܰܡܪܰܡܪܶܡ ܒܪܽܘܡܪܳܡܶܗ܆ ܪܽܘܚܳܐ ܢܽܘ̣ܗܪܳܐ ܘܝܳܗܽܘ̣ܒܳܐ ܕܢܽܘ̣ܗܪܳܐ܆ ܪܽܘܚܳܐ ܕܛܰܝܒܽܘ̣ܬܳܐ ܘܰܡܥܺܝ̣ܢܳܐ ܕܛܳܒܽܘ̣ܬܳܐ܆ ܪܽܘܚܳܐ ܬܪܺܝ̣ܨܬܳܐ܆ ܪܽܘܚܳܐ ܪܺܝ̣ܫܳܢܳܐ܆ ܪܽܘܚܳܐ ܡܳܪܝܳܐ܆ ܪܽܘܚܳܐ ܕܣܺܝ̣ܡܰܬ݂ ܒܢܰܝ̈ܳܐ܆ ܪܽܘܚܳܐ ܕܰܫܪܳܪܳܐ܆ ܪܽܘܚܳܐ ܕܚܶܟܡܬܳܐ܆ ܪܽܘܚܳܐ ܕܣܽܘ̣ܟܳܠܳܐ܆ ܪܽܘܚܳܐ ܕܺܝ̣ܕܰܥܬܳܐ܆ ܪܽܘܚܳܐ ܕܫܰܦܺܝ̣ܪܽܘ̣ܬ ܕܶܚܠܬܳܐ܆ ܪܽܘܚܳܐ ܕܥܳܒܶܕ ܗܽܘ̣ ܠܶܗ ܗܰܝ̈ܟܠܶܐ܆ ܪܽܘܚܳܐ ܕܰܡܗܰܕܶܐ܆ ܪܽܘܚܳܐ ܕܡܰܥܒܶܕ ܐܰܝܟ ܕܨܳܒܶܐ. ܘܨܳܒܶܐ ܕܶܝܢ ܐܰܝܟ ܕܘܳܠܶܐ܆ ܪܽܘܚܳܐ ܕܰܡܦܰܠܶܓ ܠܟܽܠܢܳܫ ܫܽܘ̣̈ܟܳܢܶܐ܆ ܪܽܘܚܳܐ ܡܒܰܝܳܐܢܳܐ܆ ܪܽܘܚܳܐ ܡܰܠܟܳܝܳܐ܆ ܪܽܘܚܳܐ ܕܓܰܢ̱ܒܳܪܽܘ̣ܬܳܐ܆ ܪܽܘܚܳܐ ܡܫܰܡܠܝܳܢܳܐ܆ ܪܽܘܚܳܐ ܓܳܡܽܘ̣ܪܳܐ܆ ܪܽܘܚܳܐ ܠܳܐ ܐܰܝܢܳܝܳܐ܆ ܪܽܘܚܳܐ ܠܳܐ ܟܡܳܢܳܝܳܐ܆ ܪܽܘܚܳܐ ܪܳܚܶܡ ܒܢܰܝ̈ܢܳܫܳܐ܆ ܪܽܘܚܳܐ ܡܫܰܠܶܡ ܢܒܺܝ̈ܶܐ܆ ܪܽܘܚܳܐ ܓܳܡܰܪ ܫܠܺܝ̣̈ܚܶܐ܆ ܪܽܘܚܳܐ ܡܙܰܝܶܢ ܠܣܳܗ̈ܕܶܐ܆ ܪܽܘܚܳܐ ܡܨܰܒܶܬ ܠܗܰܝܟ̈ܠܶܐ܆ ܪܽܘܚܳܐ ܡܰܒܰܥ ܕܽܘ̣ܓܡ̈ܰܛܰܐ ܠܡܰܠܦܳܢ̈ܶܐ܆ ܪܽܘܚܳܐ ܕܒܶܗ ܗ̱ܘ̣ ܡܶܬܺܝ̣ܕܰܥ ܐܰܒܳܐ܆ ܪܽܘܚܳܐ ܕܒܶܗ ܡܗܰܝܡܰܢ ܒܪܳܐ܆ ܪܽܘܚܳܐ ܕܒܰܠܚܽܘ̣ܕܰܘܗ̱ܝ ܡܶܣܬܓܶܕ ܥܰܡ ܐܰܒܳܐ ܘܰܒܪܳܐ܆ ܪܽܘܚܳܐ ܕܟܽܠܗܶܝܢ ܕܰܐܒܳܐ ܐܺܝ̣ܬ ܠܶܗ ܣܛܰܪ ܡ̣ܶܢ ܝܳܠܽܘ̣ܕܽܘ̣ܬܳܐ܆ ܪܽܘܚܳܐ ܕܟܽܠܗܶܝܢ ܕܰܒܪܳܐ ܐܝ̣ܬ ܠܶܗ ܣܛܰܪ ܡ̣ܶܢ ܝ̣ܺܠܺܝ̣ܕܽܘ̣ܬܳܐ ܘܰܣܛܰܪ ܡ̣ܶܢ ܡܶܬܓܰܫܡܳܢܽܘ̣ܬܳܐ܆ ܪܽܘܚܳܐ ܡܬܽܘ̣ܡܳܝܳܐ ܕܠܳܐ ܙܥܽܘ̣ܪ ܡ̣ܶܢ ܐܰܒܳܐ܆ ܪܽܘܚܳܐ ܐܺܝ̣ܬܝܳܐ ܕܠܳܐ ܛܠܶܐ ܡ̣ܶܢ ܒܪܳܐ. ܪܽܘܚܳܐ ܥܳܠܡܺܝ̣ܢܳܝܳܐ ܕܠܳܐ ܩܰܕܺܝ̣ܡ ܠܰܐܒܳܐ ܘܠܳܐ ܩܰܫܺܝ̣ܫ ܡ̣ܶܢ ܒܪܳܐ. ܠܳܟ ܐܰܠܳܗܳܐ܆ ܪܽܘܚܳܐ ܦܰܪܰܩܠܺܝ̣ܛܳܐ ܡܶܬܟܰܫܦܺܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܟܰܕ ܫܳܐܠܺܝ̣ܢܰܢ ܡ̣ܶܢ ܪܰܒܽܘ̣ܬ ܥܽܘ̣ܬܪ̈ܰܝܟ ܠܳܐ ܡܶܬܕܰܪ̈ܟܳܢܶܐ܆ ܕܳܐܦ ܗܳܫܳܐ ܬܚܰܕܶܬ ܠܘܳܬܰܢ ܫܽܘ̣̈ܟܳܢܰܝܟ ܐܰܠܳܗ̈ܳܝܶܐ ܘܬܰܓܶܢ ܥܠܰܝܢ ܐܰܝܟ ܕܥܰܠ ܫܠܺܝ̣̈ܚܶܐ ܩܰܕܺܝ̣̈ܫܶܐ ܒܥܶܠܺܝ̣ܬܳܐ܆ ܘܦܰܠܶܓ ܠܰܢ ܡܰܘܗ̈ܒܳܬܳܐ ܕܺܝ̣ܠܳܟ ܫܡܰܝ̈ܳܢܝܳܬܳܐ܆ ܘܰܡܠܺܝ̣ ܠܰܢ ܚܶܟܡܬܳܐ ܕܺܝ̣ܠܳܟ ܐܰܠܳܗܳܝܬܳܐ ܘܐ̱ܪ̈ܳܙܶܐ ܕܝܽܘ̣ܠܦܳܢܰܝ̈ܟ ܐܰܠܳܗܳܝ̈ܶܐ. ܘܰܥܒܶܕ ܠܰܢ ܗܰܝ̈ܟܠܶܐ ܠܰܥܡܽܘ̣ܪܝܳܐ ܕܺܐܝ̣ܩܳܪܳܟ܆ ܘܰܐܪܘܳܐ ܠܰܢ ܡ̣ܶܢ ܫܶܩܝܳܐ ܕܛܰܝܒܽܘ̣ܬܳܟ ܡܰܫܦܥܰܬ݂ ܥܰܠ ܟܽܠ܆ ܘܰܐܥܬܰܪ ܠܰܢ ܒܥܽܘ̣ܬܪ̈ܶܐ ܪ̈ܳܡܶܐ ܕܫܽܘ̣̈ܟܳܢܰܝܟ ܘܰܐܨܡܰܚ ܠܰܢ ܒܢܽܘ̣ܗܪܳܐ ܕܙܰܠܺܝ̣̈ܩܰܝܟ܆ ܘܗܰܒܠܰܢ ܕܠܳܟ ܢܺܚܶܐ ܘܠܳܟ ܢܶܫ̇ܠܰܡ ܘܠܳܟ ܢܶܣ̇ܓܽܘ̣ܕ ܕܰܟܝܳܐܺܝܬ ܘܩܰܕܺܝ̣ܫܳܐܺܝܬ ܠܳܟ ܐܰܠܳܗܳܐ ܪܽܘܚܳܐ ܦܰܪܰܩܠܺܝ̣ܛܳܐ܆ ܘܒܺܐܝ̈ܕܰܝܟ ܘܥܰܡܳܟ ܠܰܐܒܳܐ ܓܢܺܝ̣ܙܳܐ ܗܰܘ ܕܡܶܢܶܗ ܢܳܦܶܩ ܐܰܢ̱ܬ܆ ܘܠܰܒܪܳܐ ܗܰܘ ܕܡܶܢܶܗ ܢܳܣܶܒ ܐܰܢ̱ܬ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܩܠܐ: ܒܩ̄ ܦܬܰܚ ܠܺܝ̣ ܬܰܪܥܶܗ ܕܰܚܢܳܢܳܟ
ܒܗܳܢܳܐ ܝܰܘܡܳܐ ܩܰܕܺܝܫܳܐ. ܪܽܘ̣ܚ ܩܽܘ̣ܕܫܳܐ ܦܰܪܰܩܠܺܝ̣ܛܳܐ ܢܚ̣ܶܬ. ܘܶܐܬܦܰܠܰܓ ܠܰܬܪܶܥܣܰܪܬܳܐ. ܒܰܕܡܽܘ̣ܬ ܠܶܫܳܢ̈ܶܐ ܕܢܽܘ̣ܪܳܐ. ܘܶܐܬܠܰܒܰܒܘ̱ ܪ̈ܶܥܝܳܢܰܝܗܽܘ̇ܢ܆ ܘܰܢܦ̣ܰܩܘ̱ ܐܰܟܪܶܙܘ̱ ܒܰܒܪܺܝ̣ܬܳܐ܆ ܐ̱ܪܳܙܳܐ ܬܠܺܝ̣ܬܳܝܳܐ. ܐܰܒܳܐ ܘܰܒܪܳܐ ܘܪܽܘ̣ܚ ܩܽܘ̣ܕܫܳܐ܀
ܫܽܘܒܚܳܐ
ܢܚܶܬ ܪܽܘܚܳܐ ܦܰܪܰܩܠܺܝ̣ܛܳܐ. ܠܟܶܢܫܳܐ ܫܰܦܝܳܐ ܕܬܰܠܡܺܝ̣̈ܕܶܐ ܒܪ̈ܺܝ̣ܟܶܐ. ܘܰܒܠܶܫܳܢ̈ܶܐ ܕܟܽܠ ܥܰܡ̱̈ܡܺܝ̣ܢ. ܐܰܠܶܦ ܠܗܽܘܢ ܐ̱ܪܳܙܳܐ ܡܫܰܒܚܳܐ. ܘܝܰܗ̣ܒ ܒܐܺܝ̣ܕܰܝ̈ܗܽܘ̇ܢ ܫܽܘ̣ܠܛܳܢܳܐ܆ ܕܢܶܫܒܩܽܘ̇ܢ ܚܰܘ̈ܒܶܐ ܘܰܚܛܳܗ̈ܶܐ܆ ܘܢܰܐܣܽܘ̇ܢ ܟܽܠ ܟܺܐܒܺܝ̣̈ܢ. ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ܀
ܥܶܛܪܳܐ
ܡܳܪܝܳܐ ܐܰܠܳܗܳܐ ܕܺܝ̣ܠܰܢ܆ ܗܰܘ ܡܒܰܝܳܐܢܳܐ ܪܽܘܚܳܐ ܩܰܕܺܝܫܳܐ. ܗܰܘ ܕܰܒܠ̈ܶܫܳܢܶܐ ܕܢܽܘ̣ܪܳܐ ܥܰܠ ܫܠܺܝ̣̈ܚܶܐ ܩܰܕܺܝ̣̈ܫܶܐ ܢܚܶܬܬ. ܘܫܽܘ̣̈ܟܳܢܶܐ ܐܰܠܳܗܳܝ̈ܶܐ ܡܠ݂ܰܝܬ݂ ܐܢܽܘ̇ܢ. ܡܠܺܝ̣ ܠܰܢ ܒܛܰܝܒܽܘ̣ܬܳܟ ܚܰܝܠܳܐ ܘܚܶܟܡܬܳܐ ܘܩܰܕܺܝ̣ܫܽܘ̣ܬܳܐ ܕܡܶܢܳܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝ̣ܢܰܢ ܠܳܟ. ܘܰܕܫܳܘܶܝܢܰܢ ܥܒܶܕ ܘܚܰܘܳܐ ܠܰܢ ܠܥܽܘ̣ܬܪܳܐ ܕܡܰܘܗ̈ܒܳܬܳܟ܆ ܘܫܽܘܒܚܳܐ ܘܬܰܘܕܺܝ̣ܬܳܐ ܢܰܣܶܩ ܫܰܘܝܳܐܺܝܬ ܠܰܐܒܳܐ ܕܡܶܢܶܗ ܢܳܦܶܩ ܐܰܢ̱ܬ. ܘܠܺܝ̣ܚܺܝ̣ܕܳܝܳܐ ܡܳܪܰܢ ܝܶܫܽܘܥ ܡܫܺܝܚܳܐ ܕܒܶܗ ܡܶܬܺܝ̣ܕܰܥ ܐܰܢ̱ܬ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܙܘ̣ܡܳܪܳܐ
ܠܒܰܝܬܳܟ ܝܳܐܝܳܐ ܩܰܕܺܝ̣ܫܽܘ̣ܬܳܐ܆ ܡܳܪܝܳܐ ܠܢܽܘ̣ܓܪܳܐ ܕܝܰܘ̈ܡܳܬܳܐ. (ܡܙܡ̄ ܨܓ܆ ܗ)
ܡܳܪܝܳܐ ܐܰܡܠܶܟ ܘܓܰܐܝܽܘܬܳܐ ܠܒܶܫ. ܠܒܰܫ ܡܳܪܝܳܐ ܥܽܘ̣ܫܢܳܐ ܗ̄܀ (ܡܙܡ̄ ܨܓ܆ ܗ)
ܩܶܪ̈ܝܳܢܶܐ:
ܡܶܢܝܳܢܳܐ. ܝܐ: ܝܘ ـ ܠܗ Numeri 11:16-35
ܐ ܫܡܽܘ̣ܐܝܶܠ ܝ: ܛ ـ ܝܗ Samuel 10:9-15
ܦܪܰܟܣܺܝ̣ܣ. ܒ: ܐ ـ ܟܐ Acts 2:1-21
ܐܶܓܰܪܬܶܗ ܕܦܰܘܠܽܘ̣ܣ ܫܠܺܝ̣ܚܳܐ ܕܰܠܘܳܬ ܩܽܘ̣ܪ̈ܺܝ̣ܢܬܳܝܶܐ ܩܰܕܡܳܝܬܳܐ
ܝܒ: ܐ ـ ܝܓ I Corinthians 12:1-13
ܥܰܠ ܪ̈ܽܘܚܳܢܝܳܬ݂ܳܐ ܕ݁ܶܝܢ ܐܰܚܰܝ̈ ܨܳܒ݂ܶܐ ܐ݈ܢܳܐ ܕ݁ܬ݂ܶܕ݁ܥܽܘܢ܂ ܕ݁ܚܰܢ̈ܦ݂ܶܐ ܗ݈ܘܰܝܬ݁ܽܘܢ ܘܠܰܦ݂ܬ݂ܰܟ݂ܪ̈ܶܐ ܐܰܝܠܶܝܢ ܕ݁ܠܰܝܬ݁ ܠܗܽܘܢ ܩܳܠܳܐ ܕ݁ܠܳܐ ܦ݁ܽܘܪܫܳܢ ܡܶܬ݁ܕ݁ܰܒ݂ܪܺܝܢ ܗ݈ܘܰܝܬ݁ܽܘܢ܂ ܡܶܛܽܠ ܗܳܢܳܐ ܡܰܘܕ݁ܰܥ ܐ݈ܢܳܐ ܠܟ݂ܽܘܢ ܕ݁ܠܰܝܬ݁ ܐ݈ܢܳܫ ܕ݁ܰܒ݂ܪܽܘܚܳܐ ܕ݁ܰܐܠܳܗܳܐ ܡܡܰܠܶܠ ܘܳܐܡܰܪ ܕ݁ܰܚܪܶܡ ܗ݈ܽܘ ܝܶܫܽܘܥ ܘܳܐܦ݂ܠܳܐ ܐ݈ܢܳܫ ܡܶܫܟ݁ܰܚ ܠܡܺܐܡܰܪ ܕ݁ܡܳܪܝܳܐ ܗܽܘ ܝܶܫܽܘܥ ܐܶܠܳܐ ܐܶܢ ܒ݁ܪܽܘܚܳܐ ܕ݁ܩܽܘܕ݂ܫܳܐ܂ ܦ݁ܽܘܠܳܓ݂ܶܐ ܕ݁ܶܝܢ ܕ݁ܡܰܘ̈ܗܒ݂ܳܬ݂ܳܐ ܐܺܝܬ݂ܰܝܗܽܘܢ ܐܶܠܳܐ ܚܕ݂ܳܐ ܗ݈ܝ ܪܽܘܚܳܐ܂ ܘܦ݂ܽܘ̈ܠܳܓ݂ܶܐ ܕ݁ܬ݂ܶܫܡܫܳܬ݂ܳܐ ܐܺܝܬ݂ܰܝܗܽܘܢ ܐܶܠܳܐ ܚܰܕ݂ ܗ݈ܽܘ ܡܳܪܝܳܐ܂ ܘܦ݂ܽܘ̈ܠܳܓ݂ܶܐ ܕ݁ܚܰܝ̈ܠܰܘܳܬ݂ܳܐ ܐܺܝܬ݂ ܐܶܠܳܐ ܚܰܕ݂ ܗ݈ܽܘ ܐܰܠܳܗܳܐ ܕ݁ܡܰܥܒ݁ܶܕ݂ ܟ݁ܽܠ ܒ݁ܟ݂ܽܠܢܳܫ܂ ܠܐ݈ܢܳܫ ܐ݈ܢܳܫ ܕ݁ܶܝܢ ܡܶܬ݂ܺܝܗܶܒ݂ ܠܶܗ ܓ݁ܶܠܝܳܢܳܐ ܕ݁ܪܽܘܚܳܐ ܐܰܝܟ݂ ܕ݁ܥܳܕ݂ܪܳܐ ܠܶܗ܂ ܐܺܝܬ݂ ܕ݁ܺܝܗܺܝܒ݂ܳܐ ܠܶܗ ܒ݁ܪܽܘܚܳܐ ܡܶܠܬ݂ܳܐ ܕ݁ܚܶܟ݂ܡܬ݂ܳܐ ܠܰܐ݈ܚܪܺܢܳܐ ܕ݁ܶܝܢ ܡܶܠܬ݂ܳܐ ܕ݁ܺܝܕ݂ܰܥܬ݂ܳܐ ܒ݁ܳܗ̇ ܒ݁ܪܽܘܚܳܐ܂ ܠܰܐ݈ܚܪܺܢܳܐ ܗܰܝܡܳܢܽܘܬ݂ܳܐ ܒ݁ܳܗ̇ ܒ݁ܪܽܘܚܳܐ ܠܰܐ݈ܚܪܺܢܳܐ ܡܰܘܗܒ݂ܳܬ݂ܳܐ ܕ݁ܳܐܣܝܽܘܬ݂ܳܐ ܒ݁ܳܗ̇ ܒ݁ܪܽܘܚܳܐ܂ ܠܰܐ݈ܚܪܺܢܳܐ ܕ݁ܶܝܢ ܚܰܝ̈ܠܶܐ ܠܰܐ݈ܚܪܺܢܳܐ ܕ݁ܶܝܢ ܢܒ݂ܺܝܽܘܬ݂ܳܐ ܠܰܐ݈ܚܪܺܢܳܐ ܕ݁ܶܝܢ ܦ݁ܳܪܽܘܫܽܘܬ݂ܳܐ ܕ݁ܪܽܘܚܳܐ ܠܰܐ݈ܚܪܺܢܳܐ ܕ݁ܶܝܢ ܙܢܰܝ̈ܳܐ ܕ݁ܠܶܫܳܢ̈ܶܐ ܠܰܐ݈ܚܪܺܢܳܐ ܕ݁ܶܝܢ ܦ݁ܽܘܫܳܩܳܐ ܕ݁ܠܶܫܳܢ̈ܶܐ܂ ܟ݁ܽܠܗܶܝܢ ܕ݁ܶܝܢ ܗܳܠܶܝܢ ܚܕ݂ܳܐ ܗ݈ܝ ܪܽܘܚܳܐ ܣܳܥܪܳܐ ܘܰܡܦ݂ܰܠܓ݂ܳܐ ܠܟ݂ܽܠܢܳܫ ܐܰܝܟ݂ ܕ݁ܗܺܝ ܨܳܒ݂ܝܳܐ܂ ܐܰܟ݂ܙܢܳܐ ܓ݁ܶܝܪ ܕ݁ܦ݂ܰܓ݂ܪܳܐ ܚܰܕ݂ ܗ݈ܽܘ ܘܺܐܝܬ݂ ܒ݁ܶܗ ܗܰܕ݁ܳܡ̈ܶܐ ܣܰܓ݁ܺܝ̈ܶܐܐ ܟ݁ܽܠܗܽܘܢ ܕ݁ܶܝܢ ܗܰܕ݁ܳܡ̈ܶܐ ܕ݁ܦ݂ܰܓ݂ܪܳܐ ܟ݁ܰܕ݂ ܣܰܓ݁ܺܝ̈ܶܐܐ ܐܺܝܬ݂ܰܝܗܽܘܢ ܚܰܕ݂ ܐܶܢܽܘܢ ܦ݁ܓ݂ܰܪ ܗܳܟ݂ܰܢܳܐ ܐܳܦ݂ܡܫܺܝܚܳܐ܂ ܐܳܦ݂ ܚܢܰܢ ܓ݁ܶܝܪ ܟ݁ܽܠܰܢ ܒ݁ܰܚܕ݂ܳܐ ܪܽܘܚ ܠܚܰܕ݂ ܦ݁ܓ݂ܰܪ ܥܡܰܕ݂ܢ ܐܶܢ ܝܺܗܽܘ̈ܕ݂ܳܝܶܐ ܘܶܐܢ ܐܰܪ̈ܡܳܝܶܐ ܘܶܐܢ ܥܰܒ݂̈ܕ݁ܶܐ ܘܶܐܢ ܒ݁ܢܰܝ̈ ܚܺܐܪ̈ܶܐ ܘܟ݂ܽܠܰܢ ܚܕ݂ܳܐ ܪܽܘܚܳܐ ܐܶܫܬ݁ܺܝܢ܀
ܗܽܘ̣ܠܳܠܳܐ ܘܦܶܬܓܳܡܳܐ
ܢܺܐܬܶܐ ܪܽܘ̣ܚܳܐ ܩܰܕܺܝܫܳܐ܆ ܘܢܰܐܓܶܢ ܥܰܠ ܚܰܕ ܚܰܕ ܡܶܢܟܽܘ̇ܢ ܗ̄܀
ܐܶܘܰܢܓܶܠܝܽܘܢ ܕܝܽܘܚܰܢܳܢ
(ܝܕ: ܟܗ ـ ܟܙܙ ܘܟܶܢ ܝܗ: ܟܘ. ܟܙܙ ܘܟܶܢ ܝܘ: ܐ ـ ܝܗ) John 14:25-27, 15:26-27, 16:1-15)
ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܟ݁ܰܕ݂ ܠܘܳܬ݂ܟ݂ܽܘܢ ܐܺܝܬ݂ܰܝ܂ ܗܰܘ ܕ݁ܶܝܢ ܦ݁ܰܪܰܩܠܺܛܳܐ ܪܽܘܚܳܐ ܕ݁ܩܽܘܕ݂ܫܳܐ ܗܰܘ ܕ݁ܰܡܫܰܕ݁ܰܪ ܐܳܒ݂ܝ ܒ݁ܫܶܡܝ ܗܽܘ ܢܰܠܶܦ݂ܟ݂ܽܘܢ ܟ݁ܽܠܡܶܕ݁ܶܡ ܘܗܽܘ ܢܰܥ݈ܗܶܕ݂ܟ݂ܽܘܢ ܟ݁ܽܠ ܡܳܐ ܕ݁ܳܐܡܰܪ ܐ݈ܢܳܐ ܠܟ݂ܽܘܢ܂ ܫܠܳܡܳܐ ܫܳܒ݂ܶܩ ܐ݈ܢܳܐ ܠܟ݂ܽܘܢ ܫܠܳܡܳܐ ܕ݁ܺܝܠܝ ܝܳܗܶܒ݂ ܐ݈ܢܳܐ ܠܟ݂ܽܘܢ ܠܳܐ ܗ݈ܘܳܐ ܐܰܝܟ݁ܰܢܳܐ ܕ݁ܝܳܗܶܒ݂ ܥܳܠܡܳܐ ܐܶܢܳܐ ܝܳܗܶܒ݂ ܐ݈ܢܳܐ ܠܟ݂ܽܘܢ ܠܳܐ ܢܶܬ݁ܕ݁ܰܘܰܕ݂ ܠܶܒ݁ܟ݂ܽܘܢ ܘܠܳܐ ܢܶܕ݂ܚܰܠ܀ ܡܳܐ ܕ݁ܶܝܢ ܕ݁ܶܐܬ݂ܳܐ ܦ݁ܰܪܰܩܠܺܛܳܐ ܗܰܘ ܕ݁ܶܐܢܳܐ ܡܫܰܕ݁ܰܪ ܐ݈ܢܳܐ ܠܟ݂ܽܘܢ ܡܶܢ ܠܘܳܬ݂ ܐܳܒ݂ܝ ܪܽܘܚܳܐ ܕ݁ܰܫܪܳܪܳܐ ܗܰܘ ܕ݁ܡܶܢ ܠܘܳܬ݂ ܐܳܒ݂ܝ ܢܳܦ݂ܶܩ ܗܽܘ ܢܰܣܗܶܕ݂ ܥܠܰܝ܂ ܐܳܦ݂ ܐܰܢ݈ܬ݁ܽܘܢ ܣܳܗܕ݁ܺܝܢ ܐܢ݈ܬ݁ܽܘܢ ܕ݁ܡܶܢ ܫܽܘܪܳܝܳܐ ܥܰܡܝ ܐܰܢ݈ܬ݁ܽܘܢ܂ ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܕ݁ܠܳܐ ܬ݁ܶܬ݂ܟ݁ܰܫܠܽܘܢ܂ ܢܰܦ݁ܩܽܘܢܳܟ݂ܽܘܢ ܓ݁ܶܝܪ ܡܶܢ ܟ݁ܢܽܘ̈ܫܳܬ݂ܗܽܘܢ ܘܬ݂ܺܐܬ݂ܶܐ ܫܳܥܬ݂ܳܐ ܕ݁ܟ݂ܽܠ ܕ݁ܢܶܩܛܽܘܠܟ݂ܽܘܢ ܢܰܣܒ݁ܰܪ ܕ݁ܩܽܘܪܒ݁ܳܢܳܐ ܡܩܰܪܶܒ݂ ܠܰܐܠܳܗܳܐ܂ ܘܗܳܠܶܝܢ ܢܶܥܒ݁ܕ݂ܽܘܢ ܡܶܛܽܠ ܕ݁ܠܳܐ ܝܺܕ݂ܰܥܘ ܘܠܳܐ ܠܳܐܒ݂ܝ ܘܠܳܐ ܠܺܝ܂ ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܕ݁ܡܳܐ ܕ݁ܶܐܬ݂ܳܐ ܥܶܕ݁ܳܢܗܶܝܢ ܬ݁ܶܥ݈ܗܕ݁ܽܘܢ ܐܶܢܶܝܢ ܕ݁ܶܐܢܳܐ ܐܶܡܪܶܬ݂ ܠܟ݂ܽܘܢ ܗܳܠܶܝܢ ܕ݁ܶܝܢ ܡܶܢ ܩܕ݂ܺܝܡ ܠܳܐ ܐܶܡܪܶܬ݂ ܠܟ݂ܽܘܢ ܕ݁ܥܰܡܟ݂ܽܘܢ ܗ݈ܘܺܝܬ݂܂ ܗܳܫܳܐ ܕ݁ܶܝܢ ܐܳܙܶܠ ܐ݈ܢܳܐ ܠܘܳܬ݂ ܡܰܢ ܕ݁ܫܰܕ݁ܪܰܢܝ ܘܠܳܐ ܐ݈ܢܳܫ ܡܶܢܟ݂ܽܘܢ ܡܫܰܐܶܠ ܠܺܝ ܠܰܐܝܟ݁ܳܐ ܐܳܙܶܠ ܐܰܢ݈ܬ݁܂ ܐܶܡܪܶܬ݂ ܠܟ݂ܽܘܢ ܓ݁ܶܝܪ ܗܳܠܶܝܢ ܘܶܐܬ݂ܳܬ݂ ܟ݁ܰܪܝܽܘܬ݂ܳܐ ܘܰܡܠܳܬ݂ ܠܶܒ݁ܰܘ̈ܳܬ݂ܟ݂ܽܘܢ܂ ܐܶܠܳܐ ܐܶܢܳܐ ܫܪܳܪܳܐ ܐܳܡܰܪ ܐ݈ܢܳܐ ܠܟ݂ܽܘܢ ܕ݁ܦ݂ܰܩܳܚ ܠܟ݂ܽܘܢ ܕ݁ܶܐܢܳܐ ܐܺܙܰܠ ܐܶܢ ܓ݁ܶܝܪ ܐܶܢܳܐ ܠܳܐ ܐܳܙܶܠ ܐ݈ܢܳܐ ܦ݁ܰܪܰܩܠܺܛܳܐ ܠܳܐ ܐܳܬ݂ܶܐ ܠܘܳܬ݂ܟ݂ܽܘܢ ܐܶܢ ܕ݁ܶܝܢ ܐܺܙܰܠ ܐܶܫܰܕ݁ܪܺܝܘܗ݈ܝ ܠܘܳܬ݂ܟ݂ܽܘܢ܂ ܘܡܳܐ ܕ݁ܶܐܬ݂ܳܐ ܗܽܘ ܢܰܟ݁ܣܺܝܘܗ݈ܝ ܠܥܳܠܡܳܐ ܥܰܠ ܚܛܺܝܬ݂ܳܐ ܘܥܰܠ ܙܰܕ݁ܺܝܩܽܘܬ݂ܳܐ ܘܥܰܠ ܕ݁ܺܝܢܳܐ܂ ܥܰܠ ܚܛܺܝܬ݂ܳܐ ܕ݁ܠܳܐ ܡܗܰܝܡܢܺܝܢ ܒ݁ܺܝ܂ ܥܰܠ ܙܰܕ݁ܺܝܩܽܘܬ݂ܳܐ ܕ݁ܶܝܢ ܕ݁ܰܠܘܳܬ݂ ܐܳܒ݂ܝ ܐܳܙܶܠ ܐ݈ܢܳܐ ܘܠܳܐ ܬ݁ܽܘܒ݂ ܚܳܙܶܝܢ ܐܢ݈ܬ݁ܽܘܢ ܠܺܝ܂ ܥܰܠ ܕ݁ܺܝܢܳܐ ܕ݁ܶܝܢ ܕ݁ܰܐܪܟ݂ܽܘܢܳܐ ܕ݁ܥܳܠܡܳܐ ܗܳܢܳܐ ܕ݁ܺܝܢ ܗ݈ܽܘ܂ ܬ݁ܽܘܒ݂ ܣܰܓ݁ܺܝ ܐܺܝܬ݂ ܠܺܝ ܠܡܺܐܡܰܪ ܠܟ݂ܽܘܢ ܐܶܠܳܐ ܠܳܐ ܡܶܫܟ݁ܚܺܝܢ ܐܢ݈ܬ݁ܽܘܢ ܠܡܶܐܚܰܕ݂ ܗܳܫܳܐ܂ ܡܳܐ ܕ݁ܶܐܬ݂ܳܐ ܕ݁ܶܝܢ ܪܽܘܚܳܐ ܕ݁ܰܫܪܳܪܳܐ ܗܽܘ ܢܕ݂ܰܒ݁ܰܪܟ݂ܽܘܢ ܒ݁ܟ݂ܽܠܶܗ ܫܪܳܪܳܐ ܠܳܐ ܓ݁ܶܝܪ ܢܡܰܠܶܠ ܡܶܢ ܪܶܥܝܳܢ ܢܰܦ݂ܫܶܗ ܐܶܠܳܐ ܟ݁ܽܠ ܕ݁ܢܶܫܡܰܥ ܗܰܘ ܢܡܰܠܶܠ ܘܰܥܬ݂ܺܝܕ݂ܳܬ݂ܳܐ ܢܰܘܕ݁ܰܥܟ݂ܽܘܢ܂ ܘܗܽܘ ܢܫܰܒ݁ܚܰܢܝ ܡܶܛܽܠ ܕ݁ܡܶܢ ܕ݁ܺܝܠܝ ܢܶܣܰܒ݂ ܘܰܢܚܰܘܶܝܟ݂ܽܘܢ܂ ܟ݁ܽܠ ܡܶܕ݁ܶܡ ܕ݁ܺܐܝܬ݂ ܠܳܐܒ݂ܝ ܕ݁ܺܝܠܝ ܗ݈ܽܘ ܡܶܛܽܠ ܗܳܢܳܐ ܐܶܡܪܶܬ݂ ܠܟ݂ܽܘܢ ܕ݁ܡܶܢ ܕ݁ܺܝܠܝ ܢܶܣܰܒ݂ ܘܰܢܚܰܘܶܝܟ݂ܽܘܢ܀
ܡܰܟܪܶܙ ܡܫܰܡܫܳܢܳܐ ܠܽܘ̣ܛܰܢܺܝܰܐ
ܢܩܽܘ̣ܡ ܫܰܦܺܝ̣ܪ ܟܽܠܰܢ ܒܰܚܦܺܝ̣ܛܽܘ̣ܬܳܐ ܘܰܒܩ̈ܳܠܶܐ ܕܰܡܪܰܥܶܝܢ ܠܰܐܠܳܗܳܐ ܢܶܥܢܶܐ ܘܢܺܐܡܰܪ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܐܰܢ̱ܬ ܕܝܰܘܡܳܢܳܐ ܥܰܠ ܫܠܺܝ̣̈ܚܶܐ ܩܰܕܺܝ̣̈ܫܶܐ ܒܰܕܡܽܘ̣ܬܳܐ ܠܶܫܳܢ̈ܶܐ ܕܢܽܘ̣ܪܳܐ ܢܚ̣ܶܬܬ܆ ܘܰܒܫܽܘ̣̈ܟܳܢܶܐ ܐܰܠܳܗܳܝ̈ܶܐ ܓܡ̣ܰܪܬ ܐܶܢܽܘ̇ܢ܆ ܘܢܰܗܺܝ̣ܪܳܐܺܝܬ ܐܶܬܓܠܰܝܬ ܘܶܐܬܺܝ̣ܕܰܥܬ ܕܺܐܝ̣ܬܰܝܟ ܫ̇ܘܶܐ̣ ܒܐܽܘ̣ܣܺܝܰܐ ܠܰܐܒܳܐ ܘܠܰܒܪܳܐ܆ ܐܰܫܘܳܐ ܐܳܦ ܠܰܢ ܠܰܡܩܰܒܳܠܽܘ̣ ܠܥܽܘ̣ܬܪܳܐ ܕܡܰܘ̈ܗܒܳܬܳܟ ܐܰܠܳܗܳܝ̈ܳܬܳܐ܆ ܒܳܥܶܝܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܐܰܝܟ ܕܰܠܨܰܝ̈ܳܕܶܐ ܘܠܳܐ ܣܦܺܝ̣ܪ̈ܶܐ ܝܳܕܽܘ̣̈ܥܶܐ ܕܚܶܟ̈ܡܳܬܳܐ ܐܰܠܳܗܳܝ̈ܳܬܐ ܚܰܘܺܝ̣ܬ܆ ܘܰܠܟܽܠܳܗ̇ ܒܪܺܝ̣ܬܳܐ ܣܒܰܪܬܳܐ ܐܶܘܰܢܓܶܠܳܝܬܳܐ ܐܰܟܪܶܙܘ̱܆ ܚܰܘܳܐ ܐܳܦ ܠܰܢ ܡܳܐܢ̈ܶܐ ܕܟܰܝ̈ܳܐ ܘܰܐܘܳܢ̈ܶܐ ܕܚܳܫܚܺܝ̣ܢ ܠܫܽܘ̣̈ܟܳܢܰܝܟ ܐܰܠܳܗܳܝ̈ܶܐ܆ ܡܦܺܝ̣ܣܺܝ̣ܢܰܢ ܡܶܢܳܟ܀
ܥܰܡܳܐ: ܩܽܘܪܝܶܐܠܰܝܣܳܘܢ܀
ܐܰܢ̱ܬ ܕܰܒܝܰܘܡܳܐ ܕܦܰܢܛܺܝ̣ܩܳܘܣܛܺܝ̣ ܐܰܘܟܺܝ̣ܬ ܕܡܶܐܬܺܝܬܳܐ ܕܺܝܠܳܟ ܐܰܠܳܗܳܐ ܪܽܘ̣ܚܳܐ ܦܰܪܰܩܠܺܝ̣ܛܳܐ ܫܪܰܝܬ ܠܰܓܙܳܪ ܕܺܝ̣ܢܳܐ ܗܰܘ ܕܡܶܛܽܠ ܚܛܳܗܰܝ̈ܢ ܐܶܬܓܙܰܪ ܥܠܰܝܢ ܒܗܰܘ ܕܠܳܐ ܬܶܥܡܰܪܝ̱ ܪܽܘ̣ܚܝ̱ ܒܒܰܪܢܳܫܳܐ ܠܥܳܠܰܡ܆ ܘܰܠܫܽܘ̣ܘܕܳܝܳܐ ܕܰܒܪܳܐ ܫܰܡܠܺܝ̣ܬ܆ ܘܠܰܫܠܺܝ̣̈ܚܶܐ ܚܰܟܶܡ̣ܬ ܘܰܐܢܗ̣ܰܪܬ܆ ܐܰܫܘܳܐ ܐܳܦ ܠܰܢ ܕܰܒܣܶܓܕܬܳܐ ܗܳܕܶܐ ܡܳܪܳܢܳܝܬܳܐ ܢܶܦܣܽܘ̣ܩ ܠܟܽܠܗܽܘܢ ܦܰܚ̈ܶܐ ܘܢܶܟ̈ܠܶܐ ܕܒܺܝ̣ܫܳܐ ܢܳܟܽܘ̣ܠܳܐ ܒܳܥܶܝܢܰܢ. ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܡܫܰܡܫܳܢܳܐ ܢܰܙܥܶܩ ܘܢܺܐܡܰܪ:
ܡ̣ܶܢ ܡܳܪܝܳܐ ܢܶܒܥܶܐ ܘܰܢܣܺܝ̣ܡ ܒܽܘ̣ܪ̈ܟܶܐ ܥܰܠ ܐܰܪܥܳܐ܀
ܟܳܗܢܳܐ ܢܶܬܓܗܶܢ ܥܰܠ ܒܽܘ̣ܪ̈ܟܰܘܗ̱ܝ ܩܕܳܡ ܕܰܪܓܳܐ ܕܡܰܕܒܚܳܐ ܘܰܢܨܰܠܶܐ ܨܠܽܘ̣ܬܳܐ ܗܳܕܶܐ ܥܰܡܳܐ ܘܰܡܫ̈ܰܡܫܳܢܶܐ ܐܳܡܪܺܝ̣ܢ ܩܽܘܪܝܶܐܠܰܝܣܳܘܢ ܥܕܰܡܳܐ ܕܰܢܫܰܠܶܡ ܟܳܗܢܳܐ.
ܟܳܗܢܳܐ ܟܰܕ ܓܗܺܝ̣ܢ
ܣܳܓܕܺܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ ܕܺܝ̣ܠܰܢ܆ ܗܰܘ ܡܒܰܝܳܐܢܳܐ ܪܽܘ̣ܚܳܐ ܦܰܪܰܩܠܺܝ̣ܛܳܐ܆ ܗܰܘ ܕܡ̣ܶܢ ܐܰܒܳܐ ܢܳܦܶܩ ܐܰܢ̱ܬ. ܘܡ̣ܶܢ ܒܪܳܐ ܢܳܣܶܒ ܐܰܢ̱ܬ. ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܐܰܢ̱ܬ ܘܡܶܫܬܰܒܰܚ ܐܰܢ̱ܬ ܘܡܶܬܬܰܘܕܶܐ ܐܰܢ̱ܬ. ܗܰܘ ܕܡ̣ܶܢ ܩܕܺܝ̣ܡ ܒܝܰܕ ܙܢܰܝ̈ܳܐ ܡܫܰܚܠܦ̈ܶܐ ܕܡܰܘܗ̈ܒܳܬܳܐ ܐܰܠܳܗܳܝ̈ܳܬܳܐ܆ ܒܝܰܕ ܢܒܺܝ̈ܶܐ ܒܰܗܽܘ̣ܪܳܐܝ̣ܬ ܡܰܥܒܶܕ ܗ̱ܘܰܝܬ܆ ܘܗܳܫܳܐ ܕܶܝܢ ܥܰܠ ܫܠܺܝ̈ܚܶܐ ܩܰܕܺܝ̣̈ܫܶܐ ܒܰܕܡܽܘ̣ܬ ܠܶܫܳܢ̈ܶܐ ܕܢܽܘ̣ܪܳܐ ܐܰܓܶܢ̣ܬ܆ ܘܰܠܗܰܘ̈ܢܶܐ ܘܰܠܠܶܫܳܢ̈ܶܐ ܕܺܝ̣ܠܗܽܘܢ ܬܡܺܝ̣ܗܳܐܺܝܬ ܡܪܰܩ̣ܬ ܘܫܰܠܗ̣ܶܒܬ܆ ܘܰܐܝܟ ܕܰܠܝܰܥܪܳܐ ܟܽܘ̣ܒܳܢܳܝܳܐ ܕܰܚܛܺܝ̣ܬܳܐ܆ ܠܚܺܐܦ̈ܶܐ ܫܟܺܝ̣ܪ̈ܶܐ ܕܚܰܫ̈ܶܐ ܛܰܠܶܩ̣ܬ ܘܰܐܘܒ̣ܶܕܬ܆ ܐܰܢ̱ܬ ܕܰܠܗܶܕܝܽܘ̣̈ܛܶܐ ܘܠܳܐ ܣܦܺܝ̣ܪ̈ܶܐ܆ ܚܰܟܺܝ̣̈ܡܶܐ ܘܡܰܠܦܳܢ̈ܶܐ ܠܟܽܠܳܗ̇ ܥܳܡܰܪܬܳܐ ܚܰܘܺܝ̣ܬ܆ ܟܰܕ ܟܰܣ̈ܝܳܬܳܐ ܕܚܶܟܡ̣ܬܳܟ ܘܰܣܬܺܝ̣ܪ̈ܳܬܳܐ ܕܺܝ̣ܕܰܥܬܳܟ ܠܟܽܠܗܽܘܢ ܓܠܰܝܬ ܘܚܰܘܺܝ̣ܬ܆ ܘܒܰܕܡܽܘ̣ܬ ܚܶܙ̈ܘܶܐ ܥܰܙܺܝ̣̈ܙܶܐ ܘܢܽܘ̣ܪ̈ܳܢܳܝܶܐ ܥܰܠ ܟܽܠ ܚܰܕ ܚܰܕ ܡܶܢܗܽܘ̇ܢ ܐܰܓܶܢ̣ܬ. ܘܰܒܚܰܝܠܳܐ ܕܢܽܘ̣ܪܳܢܳܝܽܘ̣ܬܳܟ ܐܰܠܳܗܳܝܬܳܐ ܓܡ̣ܰܪܬ ܘܫܰܡܠܺܝ̣ܬ ܐܶܢܽܘ̇ܢ܆ ܘܥܰܠ ܗܳܕܶܐ ܒܫܳܥܬܳܐ ܕܡܰܐܓܢܳܢܽܘ̣ܬܳܐ ܫܒܺܝ̣ܚܬܳܐ ܥܰܠ ܐܰܦܰܝ̈ܢ ܥܰܠ ܐܰܪܥܳܐ ܒܳܪܟܺܝ̣ܢܰܢ܆ ܡܶܛܽܠ ܕܠܰܕܚܺܝ̣ܠܽܘ̣ܬܳܐ ܕܰܚܙܳܬܳܟ ܐܰܠܳܗܳܝܬܳܐ ܠܳܐ ܡܣܰܝܒܪܺܝ̣ܢܰܢ܆ ܘܬܽܘ̣ܒ ܡܶܫܬܰܘܕܥܺܝ̣ܢܰܢ ܒܝܰܕ ܗܳܕܶܐ ܕܒܳܟ ܩܢܰܝܢܰܢ ܘܺܝ̣ܠܶܦܢܰܢ ܕܠܳܟ ܢܶܣܓܽܘ̣ܕ ܣܶܓܕܬܳܐ ܗܳܝ ܕܰܒܪܽܘ̣ܚܳܐ ܘܒܰܫܪܳܪܳܐ ܡܶܣܬܰܓܕܳܐ܆ ܘܥܰܠ ܗܳܕܶܐ ܒܳܥܶܝܢܰܢ ܘܡܶܬܟܰܫܦܺܝ̣ܢܰܢ ܠܳܟ ܒܥܶܕܳܢܳܐ ܗܳܢܳܐ ܕܥܰܕܥܺܐܕܳܐ ܕܺܝ̣ܠܳܟ ܫܒܺܝ̣ܚܳܐ܆ ܕܰܐܡܺܝ̣ܢܳܐܺܝܬ ܬܩܰܘܶܐ ܒܰܢ ܘܬܶܬܚܰܘܶܐ ܒܰܢ ܡܰܥܒܕܳܢܽܘ̣ܬܳܟ ܐܰܠܳܗܳܝܬܳܐ ܒܟܽܠܙܒܰܢ܆ ܒܡܶܠܬܳܐ ܘܒܰܥܒܳܕܳܐ ܘܰܒܗܽܘ݂̣ܦܳܟܳܐ. ܘܰܒܟܽܠ ܣܳܥܽܘ̣ܪܽܘ̣ܬܳܐ ܛܳܒܬܳܐ ܘܰܡܫܰܡܠܰܝܬܳܐ܆ ܘܠܳܐ ܡܶܛܽܠ ܚܛܳܗ̈ܶܐ ܕܺܝ̣ܠܰܢ ܘܠܳܐ ܢܳܡܽܘ̣ܣܳܝ̈ܘܳܬܰܢ ܬܶܓܠܽܘ̣ܙ ܠܰܢ ܡ̣ܶܢ ܛܰܝܒܽܘ̣ܬܳܟ. ܘܠܳܐ ܬܰܗܡܶܐ ܡ̣ܶܢ ܫܰܦ̣ܺܝܪܽܘ̣ܬ ܥܽܘ̣ܕܪ̈ܳܢܰܝܟ ܕܰܠܘܳܬܰܢ. ܐܶܠܳܐ ܡܠܺܝ̣ ܠܠܶܒܰܘ̈ܳܬܰܢ ܚܰܝܠܳܐ ܘܚܶܟܡܬܳܐ ܘܕܰܟܝܽܘ̣ܬܳܐ ܘܩܰܕܺܝ̣ܫܽܘ̣ܬܳܐ ܕܡܶܢܳܟ. ܘܰܐܫܘܳܐ ܠܰܢ ܒܛܰܝܒܽܘ̣ܬܳܟ ܘܰܒܪ̈ܰܚܡܰܝܟ ܕܢܶܗܘܶܐ ܢܰܘ̈ܣܶܐ ܕܟܰܝ̈ܳܐ ܠܬܶܫܡܶܫܬܳܟ ܘܗܰܝ̈ܟܠܶܐ ܩܰܕܺܝ̣̈ܫܶܐ ܠܰܥܡܽܘ̣ܪܝܳܐ ܕܺܐܝ̣ܩܳܪܳܟ. ܐܰܝܟܰܢܳܐ ܕܟܰܕ ܕܟܰܝ̈ܳܐ ܘܰܕܠܳܐ ܛܽܘ̣ܠܫܳܐ ܡܶܬܚܙܶܝܢܰܢ ܩܕܳܡܰܝܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝ̣ܬܳܐ ܘܰܢܩܰܪܶܒ ܠܳܟ ܣܶܓܕܬܳܐ ܪܟܺܝ̣ܢܬܳܐ. ܠܳܟ ܪܽܘ̣ܚܳܐ ܦܰܪܰܩܠܺܝ̣ܛܳܐ ܘܰܡܩܰܕܫܳܢܳܐ ܕܢܰܦܫ̈ܳܬܰܢ ܘܠܰܐܒܳܐ ܗܰܘ ܕܢܳܦܶܩ ܐܰܢ̱ܬ ܡܶܢܶܗ ܘܠܰܒܪܳܐ ܗܰܘ ܕܡܶܢܶܗ ܢܳܣܶܒ ܐܰܢ̱ܬ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܟܳܗܢܳܐ ܢܰܙܥܶܩ ܘܢܺܐܡܰܪ:
ܩܽܘ̣ܡܘ̱ ܒܚܰܝܠܶܗ ܕܰܐܠܳܗܳܐ܀
ܐܳܚܶܕ ܒܺܐܝ̣̈ܕܰܘܗ̱ܝ ܡܶܐܣܰܪܬܳܐ ܕܓܰܘ̈ܙܶܐ ܘܨ̇ܳܒܰܥ ܠܶܗ ܒܡܰܝ̈ܳܐ ܘܪܳܐܶܣ ܥܰܠ ܡܰܕܒܚܳܐ ܘܥܰܠ ܥܰܡܳܐ ܐܰܟܡܳܐ ܕܚܰܘܺܝ̣ܢܰܢ ܒܫܽܘ̣ܪܳܝܳܐ ܘܰܡܫ̈ܰܡܫܳܢܶܐ ܐܳܡܪܺܝ̣ܢ܆ ܡܰܥܢܺܝ̣ܬܳܐ ܗܳܕܶܐ܀
ܡܶܫܬܰܘܕܥܺܝ̣ܢܰܢ ܕܰܒܝܰܕ ܪܽܘ̣ܚܳܐ ܦܰܪܰܩܠܺܝ̣ܛܳܐ܆ ܠܣܶܓܕܬܳܐ ܡܫܰܡܠܰܝܬܳܐ ܝ̣ܺܠܶܦܢܰܢ܆ ܗܳܝ ܕܰܬܠܺܝ̣ܬܳܝܽܘ̣ܬܳܐ ܩܰܕܺܝ̣ܫܬܳܐ܆ ܪܽܘ̣ܚܳܐ ܓܶܝܪ ܐܺܝ̣ܬܰܘܗ̱ܝ ܐܰܠܳܗܳܐ܆ ܘܰܐܝܠܶܝܢ ܕܣܳܓܕܺܝ̣ܢ ܠܶܗ ܙܳܕܶܩ ܠܗܽܘܢ ܕܰܒܪܽܘ̣ܚܳܐ ܘܒܰܫܪܳܪܳܐ ܠܡܶܣܓܰܕ ܩܕܳܡܰܘܗ̱ܝ܀
ܟܳܗܢܳܐ ܢܺܐܡܰܪ ܚܽܘ̣ܬܳܡܳܐ ܗܳܢܳܐ
ܡܳܪܝܳܐ ܐܰܠܳܗܳܐ ܪܽܘ̣ܚܳܐ ܦܰܪܰܩܠܺܝ̣ܛܳܐ ܫܰܟܶܢ ܠܢܰܦܫ̈ܳܬܰܢ ܚܽܘ̣ܣܳܝܳܐ ܘܰܠܦܰܓܪ̈ܰܝܢ ܕܽܘ̣ܟܳܝܳܐ܆ ܘܰܐܫܘܳܐ ܠܰܢ ܠܡܶܛܰܪ ܒܰܢ ܫܽܘ̣̈ܟܳܢܰܝܟ ܐܰܠܳܗܳܝ̈ܶܐ ܘܠܰܡܩܰܪܳܒܽܘ̣ ܠܳܟ ܐܰܡܺܝ̣ܢܳܐܺܝܬ ܣܶܓܕ̈ܳܬܳܐ ܕܰܟܝ̈ܳܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝ݂ܰܝ݂̈ܢ܆ ܕܢܶܗܘܶܐ ܢܰܘ̈ܣܶܐ ܕܟܰܝ̈ܳܐ ܠܫܽܘ̣ܒܚܳܟ ܘܰܠܡܰܥܡܪܳܐ ܦܰܐܝܳܐ ܕܰܐܠܳܗܽܘ̣ܬܳܟ ܘܢܰܙܥܶܩ ܘܢܺܐܡܰܪ ܬܠܳܬ ܙܰܒܢܺܝ̣̈ܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܫܠܶܡ ܛܶܟܣܳܐ ܕܦܰܢܛܺܝܩܽܘܣܛܺܝ ܒܒܳܥܽܘ ܨܰܠܰܘ ܥܰܠ ܟܳܬܽܘܒܳܐ܀