ܕܡܶܫܬܰܡܠܶܐ ܝܕ̄ ܒܺܐܝ̣ܠܽܘ̣ܠ

ܢܽܘ̣ܗܳܪܳܐ

ܟܰܕ ܨܠܺܝܒܳܐ ܬܠܶܐ ܩܕܳܡ ܡܰܕܒܚܳܐ ܒܳܬܰܪ ܫܽܘ̣ܠܳܡ ܬܶܫܡܶܫܬܳܐ ܕܝܳܠܕܰܬ ܐܰ‎ܠܳܗܳܐ. ܢܳܚܬܺܝ̣ܢ ܟܳܗ̈ܢܶܐ ܘܰܡܫ̈ܰܡܫܳܢܶܐ ܟܰܕ ܛܥܺܝ̣ܢܺܝ̣ܢ ܩܶܪ̈ܝܽܘ̣ܢܶܐ ܘܡܰܪ̈ܘܚܳܬܳܐ ܘܰܡܢܰܘ̈ܳܬܳܐ ܕܩܰܕܺܝ̣̈ܫܶܐ. ܘܦܺܝܪܡܳܐ. ܘܛܳܥܶܢ ܪܺܝ̣ܫ ܟܳܗ̈ܢܶܐ ܠܰܨܠܺܝܒܳܐ ܒܐܺܝ̣̈ܕܰܘܗ̱ܝ ܘܢܳܦܩܺܝ̣ܢ ܡܛܰܟܣܳܐܺܝܬ ܡ̣ܶܢ ܓܰܒܳܐ ܕܓܰܪܒܝܳܐ ܒܰܟܪܽܘ̣ܟܝܳܐ ܟܰܕ ܐܳܡܪܺܝ̣ܢ ܒ̈ܳܬܶܐ ܗܳܠܶܝܢ܀

ܩܠܐ: ܒܩ̄ ܗܰܘ ܕܰܨܠܝ̣ܒܶܗ ܥܰܠ ܟܰܬܦܶܗ

ܒܝܽܘ̣ܡ ܥܽܘ̣ܗܕܳܢܶܗ ܕܰܨܠܺܝܒܳܐ܆ ܚܳܕܶܝܢ ܒܶܗ ܫܡܰܝܳܐ ܘܰܐܪܥܳܐ܆ ܘܙܳܡܪܝ̣ܢ ܫܽܘܒܚܳܐ ܘܬܰܘܕܺܝ̣ܬܳܐ܆ ܠܗܰܘ ܦܳܪܩܳܐ ܕܶܐܨܛܠܶܒ ܒܰܒܣܰܪ܀

ܩܽܘ̣ܣܛܰܢܛܺܝ̣ܢܳܘܣ ܙܰܟܳܝܳܐ܆ ܚܙܳܐ ܢܺܝ̣ܫܶܗ ܕܰܨܠܺܝ̣ܒ ܢܽܘ̣ܗܪܳܐ܆ ܘܙܰܝܰܚ ܠܶܗ ܒܰܐܬܪ̈ܰܘܳܬܳܐ܆ ܥܕܰܡܳܐ ܠܪܽܘ̣ܡܺܝ̣ ܥܰܫܺܝ̣ܢܬܳܐ܀

ܒܨܰܦܪܳܐ ܩ̣ܪܳܐ ܩܽܘ̣ܣܛܰܢܛܺܝ̣ܢܳܘܣ܆ ܠܰܒܢ̈ܰܝ ܐ̱ܪ̈ܳܙܶܐ ܘܶܐܡ̣ܰܪ ܠܗܽܘܢ܆ ܕܰܐܝܟܰܢܳܐ ܐܶܬܚܰܘܝܰܬ݂ ܠܶܗ܆ ܐܳܬܳܐ ܬܡܺܝ̣ܗܬܳܐ ܕܰܨܠܺܝܒܳܐ܀

ܒܨܰܦܪܳܐ ܢܶܦܩܰܬ݂ ܡ̣ܶܢ ܪܽܘ̣ܡܺܝ̣܆ ܗܶܠܶܢܺܝ̣ ܐܶܡܶܗ ܕܡܰܠܟܳܐ܆ ܥܰܡ ܚܰܝܠܰܘ̈ܳܬܳܐ ܘܪ̈ܰܟܫܳܐ܆ ܘܣܳܡܰܬ݂ ܐܰܦܶܝ̈ܗ̇ ܠܽܐܘܪܺܫܠܶܡ܀

ܡ̣ܶܢ ܐܽܘܪܺܫܠܶܡ ܐܰܣܶܩܬܶܗ܆ ܗܶܠܶܢܺܝ̣ ܠܰܨܠܺܝ̣ܒ ܢܽܘ̣ܗܪܳܐ܆ ܘܙܰܝܰܚܬܶܗ ܒܰܐܬܪ̈ܰܘܳܬܳܐ܆ ܥܕܰܡܳܐ ܠܪܽܘ̣ܡܺܝ̣ ܡܒܰܪܰܟܬܳܐ܀

ܫܡܰܥ ܡܰܠܟܳܐ ܩܽܘ̣ܣܛܰܢܛܺܝ̣ܢܳܘܣ܆ ܕܶܐܬܡܰܢܰܥ ܨܠܺܝܒܳܐ ܚܰܝܳܐ܆ ܘܰܢܦ̣ܰܩ ܠܐܽܘ̣ܪܥܶܗ ܒܚܰܕܽܘ̣ܬܳܐ܆ ܘܰܣܓܶܕ ܩܽܘ̣ܕܡܰܘܗ̱ܝ ܒܰܪܬܺܝ̣ܬܳܐ܀

ܒܰܨܠܺܝ̣ܒܳܟ ܐܶܬܚܰܕܰܬ ܟܽܠ܆ ܒܰܨܠܺܝ̣ܒܳܟ ܐܶܫܬܰܝܰܢ ܟܽܠ܆ ܒܰܨܠܺܝ̣ܒܳܟ ܐܶܬܚܰܬܰܡ ܟܽܠ܆ ܒܰܨܠܺܝ̣ܒܳܟ ܐܶܫܬܰܠܰܡ ܟܽܠ܀

ܠܳܟ ܬܶܫܒܽܘܚܬܳܐ ܒܪܳܐ ܣܓܺܝ̣ܕܳܐ܆ ܘܠܰܐܒܽܘ̣ܟ ܟܰܣܝܳܐ ܬܰܘܕܺܝ̣ܬܳܐ܆ ܘܰܠܪܽܘ̣ܚ ܩܽܘ̣ܕܫܳܐ ܗܽܘ̣ܠܳܠܳܐ܆ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܀

ܟܰܕ ܡܳܛܶܝܢ ܠܰܩܕܳܡ ܡܰܕܒܚܳܐ ܡܫܰܪܶܝܢ ܒܛܶܟܣܳܐ܀

ܩܰܕܡܳܝܰܬ݂ ܨܠܽܘ̣ܬܳܐ ܕܫܽܘ̣ܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ

ܡܳܪܳܐ ܕܫܰܝܢܳܐ ܫܡܰܝܳܢܳܐ ܘܚܽܘ̣ܒܳܐ ܟܝܳܢܳܝܳܐ܆ ܗܰܘ ܕܫܰܝܶܢ ܒܰܨܠܺܝ̣ܒܶܗ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܆ ܒܰܛܶܠ ܡܳܪܝ̱ ܪܽܘ̣ܓܙܳܐ ܡ̣ܶܢ ܗܳܢ ܐܰܬܪܳܐ ܘܫܰܘܙܶܒ ܠܥܳܠܡܳܐ ܘܰܠܥܳܡܽܘ̣ܪ̈ܰܘܗ̱ܝ ܡ̣ܶܢ ܫܓܽܘ̣ܫܝܳܐ܆ ܒܰܙܩܺܝ̣ܦܽܘ̣ܬܳܟ ܕܰܚܠܳܦܰܘܗ̱ܝ ܒܪܳܐ ܕܰܐ‎ܠܳܗܳܐ ܕܚܰܫ ܡܶܛܽܠ ܦܽܘ̣ܪܩܳܢܰܢ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝ̣ܬܳܐ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܒܩ̄: ܨܠܺܝܒܳܐ ܐܳܬܳܐ ܕܫܰܝܢܳܐ

ܨܠܺܝܒܳܐ ܐܳܬܳܐ ܕܫܰܝܢܳܐ܆ ܨܠܺܝܒܳܐ ܢܺܝ̣ܫܳܐ ܕܙܳܟܽܘ̣ܬ݂ܳܐ܆ ܨܠܺܝܒܳܐ ܕܒܶܗ ܗ̱ܘ̣ܽ ܦܪܺܝ̣ܩܺܝ̣ܢܰܢ܆ ܘܒܶܗ ܟܽܠܰܢ ܡܶܫܬܰܒܗܪܺܝ̣ܢܰܢ܀

ܒܡܰܫܪܺܝܬܳܐ ܕܺܝܣܰܪ̈ܠܳܝܶܐ܆ ܚܶܘܝܳܐ ܩܒܺܝܥ ܗ̱ܘܳܐ ܕܰܢܚܳܫܳܐ܆ ܕܺܐܝܬܰܘܗ̱ܝ ܛܽܘ̣ܦܣܶܗ ܘܰܫܪܳܪܶܗ܆ ܕܰܨܠܺܝܒܳܐ ܡܰܥܒܶܕ ܚܰܝ̈ܶܐ܀

ܒܰܨܠܺܝܒܳܟ ܡܳܪܰܢ ܝܶܫܽܘܥ܆ ܘܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆ ܐܰܥܒܰܪ ܐܳܦ ܒܰܛܶܠ ܡܶܢܰܢ܆ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܒܰܨܠܺܝܒܳܟ ܡܳܪܰܢ ܝܶܫܽܘܥ܆ ܘܒܰܨܠܽܘܬ ܐܶܡܳܐ ܕܺܝܠܶܕܬܳܟ܆ ܐܰܫܪܳܐ ܫܰܝܢܳܟ ܘܰܫܠܳܡܳܟ. ܒܰܐܪ̈ܒܰܥܦܶܢܝܳܢ ܕܰܒܪܺܝܬܳܐ܀

ܒܪܺܝܟ ܗ̱ܘ̣ ܕܥܰܒܕܶܗ ܠܰܨܠܺܝܒܳܐ܆ ܣܶܒܠܬܳܐ ܠܝܰܠܕܰܘ̈ܗ̱ܝ ܕܳܐܕܳܡ܆ ܘܒܶܗ ܐܶܬܥܰܠܺܝܘ ܩܰܕ̈ܡܳܝܶܐ܆ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ܀

ܨܠܺܝܒܳܐ ܙܟܳܐ ܨܠܺܝܒܳܐ ܙܳܟܶܐ܆ ܨܠܺܝܒܳܐ ܙܟܳܝܗܝ̱ ܠܰܒܥܶܠܕܰܪܳܐ܆ ܘܰܨܠܺܝܒܳܐ ܢܶܗܘܶܐ ܫܽܘܪܳܐ܆ ܠܟܽܠ ܡܰܢ ܕܰܐܘܕܺܝ ܒܰܨܠܺܝܒܳܐ܀

ܨܠܺܝܒܳܐ ܐܰܡܠܶܟ ܒܰܫܡܰܝܳܐ܆ ܘܰܨܠܺܝܒܳܐ ܐܰܡܠܶܟ ܒܰܐܪܥܳܐ܆ ܘܰܨܠܺܝܒܳܐ ܢܶܗܘܶܐ ܫܽܘܪܳܐ܆ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ܀

ܨܠܺܝܒܳܐ ܕܢܽܘܗܪܳܐ ܕܶܐܬܚܰܘܺܝ܆ ܠܩܽܘܣܛܰܢܛܺܝܢܳܘܣ ܒܰܫܡܰܝܳܐ܆ ܗܽܘ ܢܶܗܘܶܐ ܫܽܘܪܳܐ ܪܳܡܳܐ܆ ܠܥܺܕ̈ܬܳܐ ܘܰܠܕܰܝܪ̈ܳܬܳܐ܀

ܠܳܐ ܕܳܚܠܺܝ̣ܢܰܢ ܡ̣ܶܢ ܒܺܝ̣ܫܳܐ܆ ܡܶܛܽܠ ܕܡܳܪܝܳܐ ܥܰܡܰܢ ܗ̱ܘ̣܆ ܙܰܝܢܶܗ ܪܰܒܳܐ ܠܒܺܝ̣ܫܺܝ̣ܢܰܢ܆ ܘܒܶܗ ܟܽܠܰܢ ܡܶܫܬܰܒܗܪܺܝ̣ܢܰܢ܀

ܒܰܨܠܺܝܒܳܟ ܡܳܪܰܢ ܝܶܫܽܘܥ܆ ܐܳܚܕܺܝܢܰܢ ܓܰܘܣܳܐ ܟܽܠܝܽܘܡ܆ ܕܗܽܘ ܡܦܰܨܶܐ ܠܰܢ ܡ̣ܶܢ ܒܺܝܫܳܐ܆ ܘܡܰܘܪܶܬ ܠܰܢ ܡܰܠܟܽܘܬ ܪܰܘܡܳܐ܀

ܗܰܘ ܕܰܨܠܺܝܒܶܗ ܥܰܠ ܟܰܬܦܶܗ܆ ܛܰܥܢܶܗ ܘܰܢܦܰܩ ܡ̣ܶܢ ܨܶܗܝܽܘܢ܆ ܗܽܘ̣ ܢܶܪܽܘ̣ܣ ܛܰܠܳܐ ܕܪ̈ܰܚܡܶܐ܆ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ܀

ܡܽܘܠܟܳܢܳܐ ܕܩܰܒܶܠ ܡܶܢܳܟ܆ ܓܰܝܳܣܳܐ ܥܰܠ ܪܺܝܫ ܩܰܝܣܳܐ܆ ܢܩܰܒܠܽܘ̣ܢܳܝܗ̱ܝ ܡܳܪܝ ܥܰܢܺܝ̈ܕܶܐ܆ ܕܰܐܘܕܺܝܘ ܒܰܬܠܺܝܬܳܝܽܘܬܳܐ܀

ܡܫܰܡܫܳܢܳܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܦܪܽܘ̣ܡܝܽܘܢ

ܬܶܫܒܽܘܚܬܳܐ ܠܗܰܘ ܦܳܪܽܘܩܳܐ ܕܰܥܒܰܕ ܨܠܺܝܒܶܗ ܚܶܣܢܳܐ ܠܥܺܕܬܶܗ. ܘܝܰܗܒ ܚܶܣܕܶܗ ܫܽܘܒܗܳܪܳܐ ܠܰܡܟܺܝܪܬܶܗ. ܕܠܶܗ ܝܳܐܶܐ ܫܽܘܒܚܳܐ ܘܐܝܩܳܪܳܐ ܒܗܳܢܳܐ ܥܶܕܳܢܳܐ ܕܣܶܓܕܬܳܐ ܕܰܨܠܺܝܒܳܐ ܦܳܪܽܘ̣ܩܳܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܰܚܝ݂ܰܝ݂̈ܢ ܠܥܳܠܡܺܝܢ܀

ܣܶܕܪܳܐ

ܡܫܺܝܚܳܐ ܐܰ‎ܠܳܗܳܐ ܕܺܝܠܰܢ. ܗܰܘ ܕܟܰܕ ܚܙܰܝܬܳܝܗ̱ܝ ܠܓܶܢܣܳܐ ܕܺܝܠܰܢ ܒܢܰܝ̈ܢܳܫܳܐ ܕܰܒܠܺܝ ܥܰܠ ܩܰܝܣܳܐ ܕܰܨܠܺܝܒܳܐ ܐܶܬܬܠܺܝ̣ܬ ܒܪ̈ܰܚܡܰܝܟ ܕܠܰܢ ܚܰܛܳܝ̈ܶܐ ܘܡܶܣ̈ܟܺܢܶܐ ܬܶܦܪܽܘܩ ܘܰܬܫܰܘܙܶܒ. ܘܥܰܠܗܳܕܶܐ ܠܰܨܠܺܝ̣ܒܳܟ ܩܰܕܺܝܫܳܐ ܢܶܣܓܽܘܕ ܟܰܕ ܐܳܡܪܺܝܢܰܢ܆ ܨܠܺܝܒܳܐ ܙܰܝܢܰܐ ܗ̱ܘ̇ ܕܠܐ ܚܳܐܶܒ. ܨܠܺܝܒܳܐ ܫܽܘܪܰܐ ܗ̄ܘ ܕܠܳܐ ܢܳܦܶܠ. ܨܠܺܝܒܳܐ ܒܰܕܰܪ ܠܥܰܡܳܐ. ܨܠܺܝܒܳܐ ܟܰܢܶܫ ܠܥܰܡ̱̈ܡܶܐ. ܨܠܺܝܒܳܐ ܐܰܒܗܶܬ ܠܟܳܦܽܘܪ̈ܶܐ. ܨܠܺܝܒܳܐ ܟܰܠܶܠ ܠܣܳܗ̈ܕܶܐ. ܨܠܺܝܒܳܐ ܫܰܝܶܢ ܫܡܰܝܳܢ̈ܶܐ ܥܰܡ ܐܰܪ̈ܥܳܢܳܝܶܐ. ܒܰܕܓܽܘܢ ܡܳܪܝ̱ ܒܰܨܠܺܝܒܳܟ ܚܰܣܳܐ ܚܰܘܒܰܝ̈ܢ. ܒܰܨܠܺܝܒܳܟ ܫܒܽܘܩ ܒܽܘܨܳܪ̈ܰܝܢ. ܒܰܨܠܺܝܒܳܟ ܢܰܛܰܪ ܥܺܕ̈ܳܬܰܢ. ܒܰܨܠܺܝܒܳܟ ܪܰܡܪܶܡ ܕܰܝܪ̈ܳܬܰܢ. ܘܰܐܫܘܳܐ ܠܰܢ ܕܢܶܣܓܽܘܕ ܠܳܟ. ܒܗܰܘ ܝܰܘܡܳܐ ܕܓܶܠܝܳܢܳܟ ܕܡ̣ܢ ܫܡܰܝܳܐ ܘܰܬܚܶܝܬ ܟܶܢܦܰܘ̈ܗ̱ܝ ܕܰܨܠܺܝܒܳܟ ܢܶܣܬܰܬܰܪ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ: ܒܩ̄ ܩܽܘ̣ܩܳܝܳܐ

ܡ̣ܶܢ ܪܽܘܡܺܝ ܡܕܺܝܢܰܬ݂ ܡܰܠ̈ܟܶܐ ܥܕܰܡܳܐ ܠܽܐܘܪܺܫܠܶܡ. ܢܶܚܬܰܬ ܗܶܠܶܢܺܝ ܡܰܠܟܬܳܐ ܕܠܰܨܠܺܝܒܳܐ ܬܶܣܓܽܘ̣ܕܝ̱. ܘܶܐܚܕܰܬ ܐܶܢܽܘ̇ܢ ܠܟܽܠܗܽܘܢ ܝܽܘܕܳܝ̈ܶܐ. ܕܬܰܘ ܚܰܘܰܘ ܠܺܝ ܕܽܘܟܬܶܗ ܕܰܨܠܺܝܒܳܐ. ܥܢܰܘ ܗܶܢܽܘ̇ܢ ܘܶܐܡܰܪܽܘܢ ܠܳܗ̇. ܕܪܰܒܳܐ ܐܺܝ̣ܬ ܠܰܢ. ܘܶܐܢ ܬܶܐܚܕܺܝܘܗ̱ܝ ܗܽܘ ܡܚܰܘܶܐ ܠܶܟܝ ܕܽܘܟܬܳܐ ܕܒܳܗ̇ ܐܶܬܬܣܺܝܡ ܗ̄ ܨܠܺܝܒܶܗ ܕܰܡܫܺܝܚܳܐ܀

ܫܽܘܒܚܳܐ

ܨܠܺܝܒܳܐ ܕܰܟܝܳܐ ܘܩܰܕܺܝܫܳܐ ܗܰܘ ܕܰܚܙܳܝܗ̱ܝ ܗ̱ܘܳܐ܆ ܩܽܘ̣ܣܛܰܢܛܺܝ̣ܢܳܘܣ ܙܰܟܳܝܳܐ ܘܰܙܟ̣ܳܐ ܒܶܗ ܠܣܳܐܢܰܘ̈ܗ̱ܝ܆ ܗܘ̣ ܢܶܗܘܶܐ ܠܳܗ̇ ܫܽܘ̣ܪܳܐ ܘܢܳܛܽܘ̣ܪܳܐ. ܠܥܺܕܰܬ݂ ܩܽܘ̣ܕܫܳܐ ܘܰܠܟܽܠܗܽܘܢ ܝܰܠܕܶܝ̈ܗ̇܆ ܘܒܶܗ ܢܶܬܢܰܛܪܽܘ̇ܢ ܡ̣ܶܢ ܒܺܝ̣ܫܳܐ ܕܡܰܩܪܶܒ ܥܰܡܗܽܘ̇ܢ܆ ܘܒܶܗ ܢܶܙܟܽܘ̇ܢ ܠܰܒܥܶܠܕܰܪܳܐ ܘܰܠܟܽܠܶܗ ܚܰܝܠܶܗ ܗ̄ܘܗ̄܀

ܡܶܢ ܥܳܠܰܡ

ܥܰܡܰܢܽܘ̣ܐܝܶܠ ܐܰ‎ܠܳܗܳܐ ܥܰܠ ܩܰܝܣܳܐ ܐܶܬܬܠܺܝ̣. ܒܰܪ ܐܺܝܠܫܰܕܰܝ ܓܰܢ̱ܒܳܪܳܐ ܐܰܪܟܶܢ ܪܺܝ̣ܫܶܗ ܘܡܺܝ̣ܬ. ܪܽܘ̣ܚܶܗ ܒܰܠܚܽܘ̣ܕ ܫܒ̣ܰܩ ܗ̱ܘܳܐ ܥܰܠ ܩܰܝܣܳܐ. ܘܠܰܘ ܐܺܝ̣ܬܽܘ̣ܬܶܗ ܫܰܢܝܰܬ݂ ܡ̣ܶܢ ܦܰܓܪܶܗ܆ ܚܰܝ̈ܶܐ ܐ̱ܢܳܫ̈ܳܝܶܐ ܫܒ̣ܰܩ ܗ̱ܘܳܐ ܘܠܰܘ ܐܺܝ̣ܬܝ݂̈ܳܝ݂ܶܐ܆ ܢܶܬܒܽܘ̇ܢ ܒܶܐܒܠܳܐ ܝܽܘ̣ܕܳܝ̈ܶܐ ܕܰܙܩ̣ܰܦܘ̱ ܠܰܡܪܰܝܡܳܐ ܗ̄ ܘܳܝ ܠܗܽܘܢ ܘܰܠܥܳܠܰܡ܀

ܒܳܥܽܘ̣ܬܳܐ ܕܡܳܪܝ̱ ܝܰܥܩܽܘ̣ܒ

ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ ܡ̣ܶܢ ܛܳܥܝܽܘܬܳܐ܆ ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܨܠܺܝܒ ܢܽܘܗܪܳܐ܀
ܫܰܝܢܳܐ ܕܫܰܝܶܢ ܠܰܫܡܰܝܳܢ̈ܶܐ ܘܠܐܰܪ̈ܥܳܢܳܝܶܐ܆ ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܨܠܺܝܒ ܢܽܘܗܪܳܐ܀

ܣܠܶܩ ܗ̱ܘܳܐ ܩܰܝܣܳܐ ܕܰܙܩܺܝܦܽܘܬܳܐ ܡ̣ܶܢ ܐܽܘܪܺܫܠܶܡ܆ ܟܰܕ ܡܶܙܕܰܝܰܚ ܒܰܐܬܪ̈ܰܘܳܬܳܐ ܕܥܳܒܰܪ ܗ̱ܘܳܐ ܒܗܽܘܢ. ܫܡܰܥ ܗ̱ܘܳܐ ܡܰܠܟܳܐ ܩܽܘܣܛܰܢܛܺܝܢܳܘܣ ܕܰܡܛܳܐ ܨܠܺܝܒܳܐ. ܘܰܕܒܰܪ ܥܰܡܶܗ ܚܰܝ̈ܠܰܘܳܬܶܗ ܘܰܢܦܰܩܘ̱ ܠܐܽܘ̣ܪܥܶܗ܀

ܚܙܳܝܗܝ̱ ܠܰܨܠܺܝܒܳܐ ܘܰܐܪܟܶܢ ܪܺܝܫܶܗ ܘܰܣܓܶܕ ܩܽܘܕܡܰܘܗ̱ܝ܆ ܘܰܦܫܰܛ ܐܝ̈ܕܰܘܗ̱ܝ ܘܰܐܪܺܝܡ ܩܳܠܶܗ ܠܰܡܫܰܒܳܚܽܘ܆ ܡܰܘܕܶܐ ܐ̱ܢܳܐ ܠܳܟ ܒܰܪ ܐܰ‎ܠܳܗܳܐ ܕܝܰܗܒܬ ܠܺܝ ܨܠܺܝܒܳܐ܆ ܕܒܶܗ ܐܶܬܟܰܬܰܫ ܠܽܘܩܒܰܠ ܚܰܝܠܶܗ ܕܰܒܥܶܠܕܰܪܳܐ܀

ܫܽܘܒܚܳܐ ܠܰܐܒܳܐ ܕܟܰܣܺܝ ܨܠܺܝܒܳܐ ܡ̣ܶܢ ܛܳܠܘ̈ܡܶܐ܆ ܘܣܶܓܕܬܳܐ ܠܰܒܪܳܐ ܕܰܓܠܳܐ ܘܚܰܘܝܶܗ ܠܩܽܘܣܛܰܢܛܺܝܢܳܘܣ܆ ܬܰܘܕܺܝ ܠܪܽܘܚܳܐ ܕܝܰܒܠܶܗ ܨܶܐܕܰܝܢ ܒܝܰܕ ܗܶܠܶܢܺܝ܆ ܬܚܶܝܬ ܟܶܢ̈ܦܳܬܶܗ ܣܰܬܰܪ ܠܰܢ ܡܳܪܝ̱ ܡ̣ܶܢ ܢܶܟ̈ܝܳܢܶܐ܀

ܒܪ̈ܰܚܡܶܐ ܕܚܰܢܽܘܗ̱ܝ ܠܗܰܘ ܓܰܝܳܣܳܐ ܝܰܡܺܝܢܳܝܳܐ܆ ܚܽܘܢܰܝܢ ܐܳܦ ܠܰܢ ܒܪܳܐ ܕܰܐ‎ܠܳܗܳܐ ܘܪܰܚܶܡܥܠܰܝܢ܀

ܡܰܥܢܺܝ̣ܬܳܐ

ܟܰܕ ܪܫ̣ܰܡ ܡܽܘܫܶܐ ܢܒܺܝܳܐ܆ ܠܰܨܠܺܝܒܳܐ ܒܚܽܘ̣ܛܪܶܗ ܡܚܳܝܗ̱ܝ ܗ̱ܘܳܐ ܬܪܺܝ̣ܨܳܐܺܝܬ. ܘܦܰܠܓ݂ܶܗ ܠܝܰܡܳܐ ܕܣܽܘ̣ܦ܆ ܩܕܳܡ ܐܺܝܣܪܳܐܝܶܠ ܕܥܳܒܰܪ ܗ̱ܘܳܐ ܒܰܪܓ݂ܶܠ. ܟܰܕ ܕܶܝܢ ܬܽܘ̣ܒ ܐܰܗܦܶܟ܆ ܐܺܝ̣ܕܶܗ ܥܰܠ ܦܶܪܥܽܘܢ ܘܡܰܪ̈ܟܒܳܬܶܗ ܟܰܢܶܫ ܡܰܝ̈ܳܐ ܘܚܰܝܶܕ ܐܶܢܽܘ̇ܢ܆ ܘܰܒܝܰܕ ܐܽܘ̣ܪܟܳܐ ܘܰܦܬܳܝܳܐ ܨܳܪ܆ ܙܰܝܢܳܐ ܠܳܐ ܡܶܙܕܰܟܝܳܢܳܐ ܕܰܨܠܺܝܒܳܐ܆ ܘܥܰܠ ܗܳܝ ܢܫܰܒܰܚ ܠܰܡܫܺܝ̣ܚܳܐ ܐܰ‎ܠܳܗܳܐ ܕܺܝ̣ܠܰܢ܆ ܡܶܛܽܠ ܕܰܡܫܰܒܚܳܐ ܐܺܝ̣ܬܰܘܗ̱ܝ܀

ܟܳܗܢܳܐ ܛܳܥܶܢ ܠܰܨܠܺܝܒܳܐ ܘܦܳܢܶܐ ܠܡܰܕܢܚܳܐ ܘܰܡܙܰܝܰܚ ܘܳܐܡܰܪ ܨܠܘ̣ܬܳܐ ܗܳܕܶܐ܆

ܦܳܢܶܝܢ ܠܡܰܕܢܚܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ

ܩܽܘ̣ܡ ܡܳܪܝܳܐ ܠܺܐܝܳܠܰܢ ܒܙܰܝܢܳܐ ܕܦܽܘ̣ܪܩܳܢܳܟ܆ ܘܗܰܒܠܰܢ ܙܳܟܽܘ̣ܬܳܐ ܒܚܰܝܠܳܐ ܕܝܰܡܺܝ̣ܢܳܟ܆ ܘܰܐܫܘܳܐ ܠܰܢ ܕܢܶܣܓܽܘ̣ܕ ܠܰܨܠܺܝ̣ܒܳܟ ܒܰܪܘܳܙܳܐ ܐܰܡܺܝ̣ܢܳܐ܆ ܘܰܢܩܰܒܠܺܝ̣ܘܗ̱ܝ ܒܩܰܕܺܝ̣ܫܽܘ̣ܬܳܐ ܪܽܘ̣ܚܳܢܳܝܬܳܐ ܘܰܒܕܰܟܝܽܘ̣ܬܳܐ܆ ܘܡܰܘܕܶܝܢܰܢ ܘܣܳܓܕܺܝ̣ܢܰܢ ܠܳܟ ܘܠܰܐܒܽܘ̣ܟ ܘܰܠܪܽܘ̣ܚܳܐ ܕܺܝ̣ܠܳܟ ܩܰܕܺܝܫܳܐ܀

ܩܳܢܘ̣ܢܳܐ

ܟܰܕ ܨܠܺܝܒܳܐ ܪܫܰܡ ܗ̱ܘܳܐ ܡܽܘܫܶܐ܆ ܘܛܽܘ̣ܦܣܶܗ ܕܚܰܫܳܟ ܡܰܚܝܳܢܳܐ ܪܫ̣ܰܡ ܓܰܠܝܳܐܺܝܬ ܠܐܺܝ̣ܣܰܪ̈ܠܳܝܶܐ. ܒܡܶܨܥܰܬ݂ ܐܰܗܪܽܘܢ ܘܚܽܘܪ ܥܰܠ ܛܽܘ̣ܪܳܐ. ܟܰܕ ܐܶܣܟܺܡܳܐ ܕܰܨܠܺܝ̣ܒ ܢܽܘ̣ܗܪܳܐ ܐܶܬܥܰܛܰܦ ܒܰܦܫܳܛ ܐܺܝ̣ܕܰܘ̈ܗ̱ܝ܆ ܘܢܺܝ̣ܫ ܙܳܟܽܘ̣ܬܳܐ ܐܰܩܺܝ̣ܡ ܘܰܐܪܡܺܝ̣ ܒܥܽܘ̣ܫܢܶܗ ܕܰܥܡܳܠܺܝ̣ܩ ܚܰܪܡܳܢܳܐ ܒܥܶܠܕܰܪ ܩܽܘ̣ܫܬܳܐ܆ ܘܥܰܠܗܳܝ ܢ̇ܫܰܒܰܚ ܠܰܡܫܺܝ̣ܚܳܐ ܡܰܠܟܳܐ ܕܰܕܚܺܝ̣ܠ ܥܰܠ ܟܽܠܰܢ. ܡܶܛܽܠ ܕܰܡܫܰܒܚܳܐ ܐܝ̣ܬܰܘܗ̱ܝ܀

ܡܰܙܥܩܳܢܽܘ̣ܬܳܐ

ܚܽܘ̣ܣ ܡܳܪܝܳܐ ܥܰܠ ܥܰܡܳܐ ܕܺܝ̣ܠܳܟ܆ ܘܪܰܚܶܡ ܥܰܠ ܥܳܢ̈ܳܐ ܕܡܰܪܥܺܝ̣ܬܳܟ܆ ܘܪܰܡܪܶܡ ܩܰܪܢܳܐ ܕܰܟܪ̈ܺܝ̣ܣܛܝܳܢܶܐ܆ ܒܢܺܝ̣ܫܶܗ ܪܰܒܳܐ ܕܰܨܠܺܝ̣ܒܳܟ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܠܳܟ ܣܰܓܺܝ̣ ܪ̈ܰܚܡܶܐ ܡܳܪܝܳܐ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀

ܦܳܢܶܝܢ ܠܡܰܥܪܒܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ

ܣܳܓܕܺܝ̣ܢܰܢ ܡܳܪܝ̱ ܠܰܨܠܺܝܒܳܟ܆ ܘܰܬܚܶܝܬ ܟܶܢ̈ܦܳܬܶܗ ܡܶܣܬܰܬܪܺܝ̣ܢܰܢ܆ ܘܰܠܡܳܪܽܘ̣ܬܶܗ ܒܶܝܬ ܓܰܘܣܳܐ ܐܶܚܰܕܢܰܢ܆ ܘܰܒܚܰܝܠܶܗ ܛܪܰܕܢܰܢ ܠܒܺܝ̣ܫܳܐ. ܘܒܶܗ ܩܰܒܶܠܢܰܢ ܠܪܽܘ̣ܫܡܳܐ ܕܡܰܥܡܽܘ̣ܕܺܝ̣ܬܳܐ܆ ܘܺܝ̣ܪܶܬܢܰܢ ܣܺܝ̣ܡܰܬ݂ ܒܢܰܝ̈ܳܐ ܘܒܶܗ ܫܠܰܚܢܰܢ ܡܳܐܢ̈ܶܐ ܕܰܚܛܺܝ̣ܬܳܐ ܘܰܠܒܶܫܢܰܢ ܠܒܽܘ̣ܫܳܐ ܕܪܽܘ̣ܚܳܐ ܕܩܽܘ̣ܕܫܳܐ܆ ܒܶܗ ܫܠܶܡ̣ܢܰܢ ܠܐ̱ܪ̈ܳܙܶܐ ܩܰܕܺܝ̈ܫܶܐ ܘܨܳܪܢܰܢ ܠܨܰܠܡܳܐ ܕܬܰܚܢܰܢܬܳܐ ܕܺܝ̣ܠܳܟ܆ ܘܒܶܗ ܩܢܰܝܢܰܢ ܚܰܝ̈ܶܐ ܚܰܕ̈ܬܶܐ ܐܰܝܠܶܝܢ ܕܠܳܐ ܓܳܡܪܺܝ̣ܢ܆ ܘܥܰܠܢܰܢ ܠܓܰܢܰܬ݂ ܢܽܘ̣ܗܪܳܐ ܐܰܝܟ ܕܶܐܫܬܰܘܕܺܝ̣ܬ ܠܰܢ܆ ܘܒܶܗ ܛܪܰܕܢܰܢ ܠܰܥܢܳܢܳܐ ܗܰܘ ܕܒܳܐܐܰܪ ܘܥܰܡ ܡܰܠܐܰܟ̈ܶܐ ܥܡ̣ܰܪܢܰܢ܆ ܘܥܰܠܗܳܝ ܒܝܽܘ̣ܡ ܥܺܐܕܳܐ ܕܰܫܟܳܚܬܶܗ ܙܰܝܰܚܢܰܢ ܠܶܗ܆ ܘܬܶܫܒܽܘܚܬܳܐ ܠܡܳܪܽܘ̣ܬܳܟ ܐܰܣܶܩ̣ܢܰܢ܆ ܘܥܽܘ̣ܕܪܳܢܳܐ ܡ̣ܶܢ ܡܪܰܚܡܳܢܽܘ̣ܬܳܟ ܒܳܥܶܝܢܰܢ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܢܘ̣ܢܳܐ

ܒܪܽܘ̣ܡܪܳܡܶܗ ܕܰܨܠܺܝܒܳܐ܆ ܕܰܙܠܺܝ̣ܚ ܒܰܕܡܳܐ ܚܰܝܳܐ ܕܡܶܠܬܳܐ ܐܰ‎ܠܳܗܳܐ܆ ܗܰܘ ܕܶܐܬܒܰܣܰܪ. ܘܰܙܡܰܪܘ̱ ܫܽܘܒܚܳܐ ܚܰܝ̈ܠܶܐ ܘܬܳܐܓ̈ܡܶܐ ܕܰܫܡܰܝ̈ܳܐ܆ ܘܕܳܨܘ̱ ܒܚܰܓܳܐ ܕܒܶܗ ܐܶܬܦܪܶܩ ܓܶܢܣܳܐ ܕܐ̱ܢܳܫܳܐ ܟܽܠܶܗ܆ ܥܰܡ̱̈ܡܶܐ ܣܶܓ̈ܕܳܬܳܐ ܩܰܪܶܒܘ̱ ܠܰܨܠܺܝܒܳܐ ܦܳܪܩܳܐ ܪܰܒܳܐ. ܕܒܶܗ ܐܶܫܟܰܚ ܥܳܠܡܳܐ ܚܰܝ̈ܶܐ ܚܰܕ̈ܬܶܐ܆ ܢ̇ܫܰܒܰܚ ܒܟܽܠܙܒܰܢ ܠܥܳܠܰܡ ܥܳܠܡܺܝ̣ܢ܀

ܡܰܙܥܩܳܢܘ̣ܬܳܐ

ܒܳܟ ܡܶܫܬܰܒܗܪܳܐ ܥܺܕܰܬ݂ ܩܽܘ̣ܕܫܳܐ ܡܟܺܝ̣ܪܬܶܗ ܕܡܳܪܝܳܐ ܡܪܰܝܡܳܐ܆ ܘܰܒܪܽܘ̣ܫܡܳܟ ܚܰܝܳܐ ܡܶܬܚܰܬܡܳܐ ܗܺܝ̣ ܘܝܰܠ̈ܕܶܝܗ̇܆ ܘܒܳܟ ܡܶܫܬܰܘܙܒܳܐ ܡܶܢ ܢܶܟܠܰܘ̈ܗ̱ܝ ܕܒܺܝ̣ܫܳܐ ܣܳܩܽܘ̣ܪܳܗ̇܆ ܘܩܰܪ̈ܢܳܬܳܟ ܡܕܰܩܪܳܐ ܠܣܳܢܳܐܗ̇ ܘܒܳܟ ܢܳܣ̇ܒܳܐ ܙܳܟܽܘ̣ܬܳܐ ܡܫܰܡܠܰܝܬܳܐ ܘܰܠܘܳܬ ܗܰܘ ܕܶܐܨܛܠܶܒ ܥܠܰܝܟ ܡܰܙܥܩܳܐ܆ ܚܽܘ̣ܣ ܡܳܪܝܳܐ ܥܰܠ ܥܰܡܳܐ ܕܺܝ̣ܠܳܟ ܘܠܳܐ ܬܰܗܡܶܐ ܡ̣ܶܢ ܝܳܪܬܽܘ̣ܬܳܟ. ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܠܳܟ ܣܰܓܺܝ̣ ܪ̈ܰܚܡܶܐ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀

ܦܳܢܶܝܢ ܠܓܰܪܒܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ

ܪܽܘ̣ܫܡܳܐ ܕܚܰܝ̈ܶܐ܆ ܗܰܘ ܕܒܶܗ ܝ̣ܺܕܰܥܢܰܢ ܐܰ‎ܠܳܗܳܐ܆ ܨܠܺܝܒܳܐ ܩܰܕܺܝܫܳܐ ܗܰܘ ܕܰܥܠܰܘܗ̱ܝ ܐܶܣܬܡܶܟ ܡܶܠܬܶܗ ܕܰܐ‎ܠܳܗܳܐ܆ ܒܶܗ ܡܒܰܪܟܺܝ̣ܢܰܢ ܠܰܐܪܒܰܥ ܦܶܢ̈ܝܳܢ ܕܰܒܪܺܝ̣ܬܳܐ܆ ܒܪܳܐ ܕܡ̣ܶܢ ܐܰܒܳܐ ܕܶܐܬܚܙܺܝ̣ ܒܰܒܣܰܪ ܘܰܦܪܰܩ ܠܰܢ ܡ̣ܶܢ ܚܛܺܝ̣ܬܳܐ ܘܡܰܘܬܳܐ ܘܣܳـܛܳـܢܳـܐ܆ ܗܳܫܳܐ ܥܺܕܬܳܐ ܩܰܕܺܝ̣ܫܬܳܐ ܡܩܰܪܒܳܐ ܬܶܫܒ̈ܚܳܬܳܐ ܕܰܬܠܺܝ̣ܬܳܝ ܩܽܘ̣̈ܕܫܶܐ ܠܗܰܘ ܠܳܐ ܡܳܝܽܘ̣ܬܳܐ ܕܶܐܨܛܠܶܒ ܚܠܳܦܰܝܢ܆ ܒܰܚܬܳܡܳܟ ܗܰܘ ܕܩܰܒ̣ܶܠܢܰܢ ܒܶܗ ܪܳܫܡܺܝ̣ܢܰܢ ܬܠܳܬ ܙܰܒܢܺܝ̣̈ܢ܆ ܨܽܘ̣ܪܬܳܟ ܬܶܗܘܶܐ ܠܰܢ ܫܽܘ̣ܪܳܐ ܬܰܩܺܝ̣ܦܳܐ ܠܥܽܘ̣ܕܪܳܢܰܢ ܠܽܘ̣ܩܒܰܠ ܟܽܠ ܕܣܳܢܶܐ ܠܰܫܪܳܪܳܟ܆ ܘܒܶܗ ܢܶܫܬܰܘܙܰܒ ܡ̣ܶܢ ܟܽܠ ܣܽܘ̣ܓܦܴ̈ܢܶܐ ܕܢܰܦܫܳܐ ܘܰܕܦܰܓܪܳܐ ܘܡ̣ܶܢ ܐ̱ܢܳܫ̈ܳܐ ܒܺܝ̣̈ܫܶܐ ܘܥܰܢ̈ܳܬܶܐ ܘܡ̣ܶܢ ܫܽܘ̣ܒܗܳܪܳܐ ܗܽܘ̣ܠܳܢܳܝܳܐ. ܢܫܰܒܰܚ ܠܳܟ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܢܘ̣ܢܳܐ

ܐܳܘ ܠܳܟ ܩܰܝܣܳܐ ܬܠܺܝ̣ܬܳܝ ܛܽܘ̣ܒܶܗ܆ ܕܰܥܠܰܝܟ ܐܶܬܡܬܰܚ ܗ̱ܘܳܐ ܡܰܠܟܳܐ ܕܥܳܠ̈ܡܶܐ܆ ܘܡܳܪܳܐ ܕܟܽܘ̣ܠܳܐ ܒܳܟ ܐܶܣܬܚܶܦ ܒܺܝ̣ܫܳܐ ܗܰܘ ܕܰܒܩܰܝܣܳܐ ܐܰܛܥܺܝ̣ ܗ̱ܘܳܐ ܠܰܢ܆ ܘܒܳܟ ܐܶܫܬܰܦܰܠ ܚܰܪܡܳܢܳܐ. ܒܰܐܠܳܗܳܐ ܕܰܥܠܰܝܟ ܐܶܬܡܬܰܚ ܒܰܒܣܰܪ ܗܰܘ ܕܫܰܟܶܢ ܒܪ̈ܰܚܡܰܘܗ̱ܝ ܫܰܝܢܶܗ ܪܰܒܳܐ ܘܰܫܠܳܡܶܗ ܠܢܰܦ̈ܫܳܬܳܐ ܕܟܽܠܰܢ܀

ܡܰܙܥܩܳܢܽܘ̣ܬܳܐ

ܒܛܽܘ̣ܦܣܶܗ ܕܰܨܠܺܝܒܳܐ ܦܰܠܶܓ ܗ̱ܘܳܐ܆ ܡܽܘܫܶܐ ܝܰܡܳܐ ܠܐܺܝ̣ܣܰܪ̈ܠܳܝܶܐ܆ ܒܐ̱ܪܳܙܶܗ ܐܶܬܬܠܺܝ̣ ܚܶܘܝܳܐ ܕܰܢܚܳܫܳܐ܆ ܐܰܝܟ ܕܠܳܐܣܝܽܘ̣ܬܳܐ. ܕܢܽܘ̣ܟ̈ܬܳܬ ܚܘ̈ܰܘܳܬܳܐ ܚܰܪ̈ܡܳܢܶܐ. ܘܒܰܦܫܳܛܳܐ ܕܺܐܝ̣ܕܰܘ̈ܗ̱ܝ ܙܟܳܐ ܠܰܥܡܳܠܺܝ̣ܩ. ܗܰܒ ܠܰܢ ܗܳܟܺܝ̣ܠ ܦܳܪܽܘ̣ܩܰܢ ܕܒܶܗ ܢܶܙܟܶܐ܆ ܠܥܳܠܡܳܐ ܕܡܶܬܬܪܺܝ̣ܡ ܠܽܘ̣ܩܒܰܠ ܥܺܕܬܳܟ ܕܶܐܬܦܰܪܩܰܬ݂ ܒܢܺܝ̣ܫܶܗ ܪܰܒܳܐ ܕܰܨܠܺܝܒܳܐ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܠܳܟ ܣܰܓܝ̣ ܪ̈ܰܚܡܶܐ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀

ܦܳܢܶܝܢ ܠܬܰܝܡܢܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ

ܐܳܘ ܡܳܪܝܳܐ ܡܠܶܐ ܪ̈ܰܚܡܶܐ܆ ܐܰܫܦܰܥܬ ܪ̈ܰܚܡܰܝܟ ܥܰܠ ܥܳܢ̈ܳܐ ܕܡܰܪܥܺܝ̣ܬܳܟ ܦܪܺܝ̣ܩܰܬ݂ ܒܰܨܠܺܝ̣ܒܳܟ܆ ܡܰܒܽܘ̣ܥܳܐ ܕܛܳܒ̈ܳܬܳܐ܆ ܫܒܽܘ̣ܩ ܚܰܘ̈ܒܰܝܢ ܒܰܚܢܳܢܳܟ܆ ܐܳܣܝܳܐ ܕܟܽܠ ܟܽܘ̣ܪ̈ܗܳܢܶܐ܆ ܐܰܣܳܐ ܟܺܐܒܰܝ̈ܢ ܒܰܡܪܰܚܡܳܢܽܘ̣ܬܳܟ܆ ܒܶܝܬ ܓܰܙܳܐ ܕܥܽܘ̣ܕܪ̈ܳܢܶܐ܆ ܐܰܥܬܰܪ ܣܢܺܝ̣ܩܽܘ̣ܬܰܢ ܡ̣ܶܢ ܓܰܙܰܝ̈ܟ ܥܰܬܺܝ̣ܪ̈ܶܐ܆ ܪܳܥܝܳܐ ܛܳܒܳܐ ܕܝܰܗ̣ܒ ܢܰܦܫܶܗ ܚܠܳܦ ܥܳܢ̈ܶܗ ܕܰܢܟܰܢܫܺܝ̣ܗ̇ ܡ̣ܶܢ ܡܰܦܽܘ̣ܠܬܳܐ ܕܰܚܛܺܝ̣ܬܳܐ܆ ܦܰܨܳܐ ܡܳܪܝ̱ ܠܬܰܪ̈ܥܝܳܬܰܢ ܡ̣ܶܢ ܛܳܥܝܽܘ̣ܬܳܐ ܘܒܽܘ̣ܛܳܠܳܐ܆ ܘܟܰܢܶܫܰܝܢ ܒܡܰܫܟܢܳܐ ܕܺܝ̣ܠܳܟ ܩܰܕܺܝܫܳܐ܆ ܕܶܒܚܳܐ ܫܡܰܝܳܢܳܐ܆ ܗܰܘ ܕܒܰܩܢܽܘ̣ܡܶܗ ܥܒ̣ܰܕ ܦܽܘ̣ܪܩܳܢܳܐ ܕܢܰܦ̈ܫܳܬܳܐ. ܕܰܟܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܡ̣ܶܢ ܟܽܠ ܛܽܘ̣ܠܫܳܐ ܕܰܚܛܺܝ̣ܬܳܐ܆ ܘܚܰܘܰܪ ܟܽܘ̣ܬܡ̈ܳܬܰܢ ܒܙܽܘ̣ܦܳܟ ܕܰܟܝܳܐ܆ ܕܢܰܘܕܶܐ ܠܛܰܝܒܽܘ̣ܬܳܟ ܘܢܶܣܓܽܘ̣ܕ ܠܰܚܢܳܢܳܟ ܘܰܢܫܰܒܰܚ ܠܪܶܚܡܰܬ݂ ܐ̱ܢܳܫܽܘ̣ܬܳܟ܆ ܥܰܡ ܐܰܒܽܘ̣ܟ ܘܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܢܘ̣ܢܳܐ

ܥܰܠ ܕܰܦܫܰܛ ܐܰܒܽܘ̇ܢ ܐܳܕܳܡ ܐܺܝ̣ܕܶܗ܆ ܘܦܺܐܪܳܐ ܩܛܰܦ ܒܰܥܕܶܝܢ܆ ܦܫ̣ܰܛ ܗ̱ܘܳܐ ܡܳܪܰܢ ܐܺܝ̣̈ܕܰܘܗ̱ܝ ܥܰܠ ܪܺܝ̣ܫ ܓܳܓܽܘ̣ܠܬܳܐ܆ ܘܰܗ̣ܘܳܐ ܠܶܗ ܦܺܐܪܳܐ ܕܚܰܝ̈ܶܐ܆ ܠܳܐܕܳܡ ܘܰܠܟܽܠܗܽܘܢ ܝܰܠܕܰܘ̈ܗ̱ܝ܆ ܘܡܶܛܽܠ ܗܳܕܶܐ ܗܳܐ ܡܙܰܝܚܺܝ̣ܢ ܠܰܨܠܺܝ̣ܒܶܗ܆ ܩܳܥܶܝܢ ܘܳܐܡܪܺܝ̣ܢ܆ ܡܒܰܪܟܳܐ ܐܺܝ̣ܬܰܝܟ ܐܰ‎ܠܳܗܳܐ ܕܰܐܒܳܗ̈ܳܬܳܐ ܕܺܝ̣ܠܰܢ܀

ܡܰܙܥܩܳܢܽܘ̣ܬܳܐ

ܙܽܘ̣ܝܳܚ ܨܠܺܝܒܳܐ ܡܰܥܒܶܕ ܚܰܝ̈ܶܐ܆ ܕܰܠܡܰܕܢܚܳܐ ܘܰܠܡܰܥܪܒܳܐ ܘܰܠܓܰܪܒܝܳܐ ܘܰܠܬܰܝܡܢܳܐ. ܡܶܬܩܰܕܫܳܐ ܟܽܠܳܗ̇ ܥܳܡܰܪܬܳܐ ܘܰܐܝܠܶܝܢ ܕܰܒܟܶܢ̈ܦܳܬܶܗ ܡܶܣܬܰܬܪܺܝ̣ܢ ܒܶܗ ܘܡܶܬܦܰܪܩܺܝ̣ܢ ܡ̣ܶܢ ܝܰܕ ܟܽܠܗܽܘܢ ܢܶܟܝܳܢܰܘ̈ܗ̱ܝ ܕܰܒܥܶܠܕܰܪܳܐ܆ ܘܰܐܝܟ ܚܳܬܡܳܐ ܗܰܘ ܕܥܰܠ ܒ̈ܳܬܶܐ ܕܰܒܢܰܝ̈ ܐܺܝ̣ܣܪܳܐܝܶܠ܆ ܗܳܟܰܢ ܡܶܬܚܰܬܡܺܝ̣ܢ ܪ̈ܶܓܫܶܐ ܕܺܝ̣ܠܰܢ ܘܦܰܓܪ̈ܶܐ ܘܢܰܦ̈ܫܳܬܳܐ ܕܟܽܠܰܢ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܠܳܟ ܣܰܓܺܝ̣ ܪ̈ܰܚܡܶܐ ܟܰܕ ܐܳܡܪܺܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀

ܩܠܐ ܒܩܳܠܳܐ ܕܟܝ̣ܪܳܐ ܗ̱ܝ ܡܒܰܪܰܟܬܳܐ

ܒܪܺܝܫܶܗ ܕܰܨܠܺܝܒܳܐ. ܥܒܰܕܘ̱ ܝܽܘܕܳܝ̈ܶܐ ܡܰܥܨܰܪܬܳܐ. ܘܰܥܨܰܪܘ̱ ܒܳܗ̇ ܣܓܽܘܠܳܐ ܕܒܽܘܪܟܬܳܐ. ܘܥܰܨܪܽܘܗ̱ܝ ܘܠܳܐ ܛܰܥܡܽܘܗ̱ܝ. ܘܩܰܒܶܠܬܶܗ ܥܺܕܰܬ ܩܽܘܕܫܳܐ ܘܟܽܠܝܽܘܡ ܡܶܢܶܗ ܡܶܬܒܰܣܡܳܐ ܗ̄ ܘܗܺܝ ܘܝܰܠܕܶܝ̈ܗ̇ ܥܕܰܡܳܐ ܠܥܳܠܰܡ ܟܽܠܝܽܘܡ ܫܽܘܒܚܳܐ ܠܶܗ ܙܳܡܪܳܐ܀

ܨܠܺܝܒܳܐ ܗܰܘ ܕܰܚܙܳܐ. ܩܽܘܣܛܰܢܛܺܝܢܳܘܣ ܒܰܫܡܰܝܳܐ ܡ̣ܶܢ ܟܽܠܗܽܘܢ ܩܪ̈ܳܒܶܐ ܦܰܨܝܶܗ. ܗܽܘ ܢܶܗܘܶܐ ܫܽܘܪܳܐ. ܠܥܺܕ̈ܬܳܐ ܘܰܠܕܰܝܪ̈ܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ ܗ̄ ܬܚܶܝܬ ܟܶܢ̈ܦܳܬܶܗ ܣܰܬܰܪ ܠܰܢ ܝܶܫܽܘܥ ܦܳܪܽܘܩܶܗ ܕܥܳܠܡܳܐ܀

ܢܒܺܝܳܐ ܕܳܢܺܝܐܝܶܠ܆ ܐܶܬܢܰܒܝ̣ ܒܰܐܪܥܳܐ ܕܒܳܒܶܝܠ܆ ܕܰܡܫܺܝ̣ܚܳܐ ܡܰܠܟܳܐ ܡܶܬܩܛܶܠ܆ ܘܰܡܕܺܝ̣ܢܰܬ݂ ܩܽܘ̣ܕ̈ܫܶܐ܆ ܐܽܘܪܺܫܠܶܡ ܚܳܪܒܳܐ ܒܩܶܛܠܶܗ ܘܥܺܕܬܳܐ ܝܳܪܒܳܐ ܒܰܩܝܳܡܬܶܗ ܗ̄ ܫܽܘܒܚܳܐ ܠܶܗ ܘܰܠܫܳܠܽܘ̣ܚܶܗ ܕܰܠܦܽܘ̣ܪܩܳܢܰܢ ܐܶܬܬܰܚܬܺܝ̣܀

ܛܽܘ̣ܒܰܝ ܘܠܺܝ ܛܽܘܒܳܐ. ܩܥܳܐ ܓܰܝܳܣܳܐ ܒܰܙܩܺܝܦܳܐ ܡ̣ܶܢ ܝܰܡܺܝܢܶܗ ܕܰܡܪܰܝܡܳܐ. ܕܬܰܪܥܳܐ ܗܰܘ ܕܶܐܚܰܕ. ܐܳܕܳܡ ܒܰܥܒܳܪ ܦܽܘܩܕܳܢܳܐ ܐܰܫܘܳܢܝ̱ ܡܳܪܝ̱ ܕܶܐܢܳܐ ܐܶܦܬܚܺܝܘܗ̱ܝ ܗ̄ ܘܶܐܥܽܘܠ ܠܶܗ ܒܓܰܠܝܽܘܬ ܐܰܦ̈ܶܐ ܘܶܐܩܥܶܐ ܠܳܟ ܫܽܘܒܚܳܐ ܡܳܪܝܳܐ܀

ܘܦܳܢܶܝܢ ܠܡܰܕܢܚܳܐ ܘܰܡܙܰܝܰܚ ܪ̈ܺܝ̣ܫܟܳܗܢܶܐ ܠܰܨܠܺܝܒܳܐ ܟܰܕ ܡܰܙܥܶܩ:

ܦܳܢܶܝܢ ܠܡܰܕܢܚܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝ̣ܫܬ ܐܰ‎ܠܳܗܳܐ܀	ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ.
ܩܰܕܺܝ̣ܫܬ ܚܰܝܠܬܳܢܳܐ܀	ܗܰܘ ܕܰܟܪ̈ܘ̣ܒܶܐ ܡܒܰܪܟܺܝ̣ܢ ܠܶܗ.
ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܰܣܪ̈ܳܦܶܐ ܡܩܰܕܫܺܝ̣ܢ ܠܶܗ.

ܘܦܳܢܶܝܢ ܠܡܰܥܪܒܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝ̣ܫܬ ܐܰ‎ܠܳܗܳܐ܀	ܗܰܘ ܕܢܽܘ̣ܪ̈ܳܢܶܐ ܡܗܰܠܠܺܝ̣ܢ ܠܶܗ.
ܩܰܕܺܝ̣ܫܬ ܚܰܝܠܬܳܢܳܐ܀	ܗܰܘ ܕܪ̈ܽܘ̣ܚܳܢܶܐ ܡܗܰܕܪܺܝ̣ܢ ܠܶܗ.
ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܥܰܦܪ̈ܳܢܶܐ ܣܳܓܕܺܝ̣ܢ ܠܶܗ.

ܘܦܳܢܶܝܢ ܠܓܰܪܒܝܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝ̣ܫܬ ܐܰ‎ܠܳܗܳܐ܀	ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ.
ܩܰܕܺܝ̣ܫܬ ܚܰܝܠܬܳܢܳܐ܀	ܗܰܘ ܕܡܶܨܥܳܝ̈ܶܐ ܡܩܰܠܣܺܝ̣ܢ ܠܶܗ.
ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܬܰܚܬܳܝ̈ܶܐ ܡܙܰܝܚܺܝ̣ܢ ܠܶܗ.

ܘܦܳܢܶܝܢ ܠܬܰܝܡܢܳܐ

ܡܫܰܡ̈ܫܳܢܶܐ	ܟܳܗܢܳܐ
ܡܳܪܰܢ ܚܽܘ̣ܣ ܘܪܰܚܶܡܥܠܰܝܢ܀	ܡܳܪܰܢ ܐܶܬܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰ‎ܠܳܗܳܐ܀	ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ.
ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀	ܫܽܘܒܚܳܐ ܠܳܟ ܒܳܪܽܘ̣ܝܳܐ.

ܟܶܢ ܐܳܡܪܺܝܢ ܬܶܫܡܶܫܬܳܐ ܕܰܨܠܺܝܒܳܐ.

ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.

ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܶܡ ܛܶܟܣܳܐ ܕܰܫܟܳܚܬܶܗ ܕܰܨܠܺܝܒܳܐ܀