ܛܟܣܐ ܕܣܘܠܩܗ ܕܡܪܢ ܠܫܡܝܐ
ܒ̈ܳܬܶܐ ܕܰܨܠܺܝܒܳܐ
ܕܡܶܬܰܐܡܪܺܝ̣ܢ ܒܰܟܪܽܘ̣ܟܝܳܐ ܒܝܽܘ̣ܡ ܚܰܡܫܳܐ ܕܣܽܘ̣ܠܳܩܳܐ
ܒ̈ܳܬܶܐ: ܒܩ̄ ܗܰܘ ܕܰܨܠܝ̣ܒܶܗ ܥܰܠ ܟܰܬܦܶܗ
ܨܠܺܝܒܳܐ ܐܳܬܳܐ ܕܫܰܝܢܳܐ܆ ܨܠܺܝܒܳܐ ܢܺܝ̣ܫܳܐ ܕܙܳܟܽܘ̣ܬܳܐ܆ ܨܠܺܝܒܳܐ ܕܒܶܗ ܗ̱ܘ̣ ܦܪܺܝ̣ܩܺܝ̣ܢܰܢ܆ ܘܒܶܗ ܟܽܠܰܢ ܡܶܫܬܰܒܗܪܺܝ̣ܢܰܢ܀
ܒܡܰܫܪܺܝ̣ܬܳܐ ܕܺܝ̣ܣܰܪ̈ܠܳܝܶܐ܆ ܚܶܘܝܳܐ ܩܒܺܝ̣ܥ ܗ̱ܘܳܐ ܕܰܢܚܳܫܳܐ܆ ܕܺܐܝ̣ܬܰܘܗ̱ܝ ܛܽܘ̣ܦܣܶܗ ܘܰܫܪܳܪܶܗ܆ ܕܰܨܠܺܝܒܳܐ ܡܰܥܒܶܕ ܚܰܝ̈ܶܐ܀
ܒܰܨܠܺܝ̣ܒܳܟ ܡܳܪܰܢ ܝܶܫܽܘܥ܆ ܘܒܰܨܠܽܘ̣ܬ ܐܶܡܳܐ ܕܺܝ̣ܠܶܕܬܳܟ. ܐܰܫܪܳܐ ܫܰܝܢܳܟ ܘܰܫܠܳܡܳܟ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝ̣ܬܳܐ܀
ܒܪܺܝ̣ܟ ܗ̱ܘܽ ܕܥܰܒܕܶܗ ܠܰܨܠܺܝܒܳܐ܆ ܣܶܒܶܠܬܳܐ ܠܝܰܠܕܰܘ̈ܗ̱ܝ ܕܳܐܕܳܡ܆ ܘܒܶܗ ܐܶܬܥܰܠܺܝ̣ܘ ܩܰܕ̈ܡܳܝܶܐ܆ ܢܒܺܝ̈ܶܐ ܘܰܫܠܺܝ̣̈ܚܶܐ ܘܣܳܗ̈ܕܶܐ܀
ܨܠܺܝܒܳܟ ܡܳܪܰܢ ܥܰܡܽܘܕܰܐ ܗ̱ܘ܆ ܛܥܺܝܢ ܠܰܐܪܥܳܐ ܛܥܺܝܢ ܠܰܫܡܰܝܳܐ܆ ܘܣܳܗܕ̈ܶܐ ܬܠܶܝܢ ܒܶܗ ܐܰܝܟ ܛܰܒ̈ܥܶܐ܆ ܕܰܒܚܰܪ ܐܶܢܽܘܢ ܝܰܩܕܳܢܳܐ܀
ܨܠܺܝܒܳܐ ܢܽܘܗܪܳܐ ܕܶܐܬܚܰܘܺܝ܆ ܠܩܽܘܣܛܰܢܛܺܝܢܳܘܣ ܒܰܫܡܰܝܳܐ܆ ܗܽܘ ܢܶܗܘܶܐ ܫܽܘܪܳܐ ܪܳܡܳܐ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ܀
ܨܠܺܝܒܳܐ ܐܰܡܠܶܟ ܒܰܫܡܰܝܳܐ܆ ܘܰܨܠܺܝ̣ܒܳܐ ܐܰܡܠܶܟ ܒܰܐܪܥܳܐ. ܘܰܨܠܺܝܒܳܐ ܢܶܗܘܶܐ ܫܽܘ̣ܪܳܐ܆ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ܀
ܒܰܨܠܺܝ̣ܒܳܟ ܡܳܪܰܢ ܝܶܫܽܘܥ܆ ܐܳܚܕܺܝ̣ܢܰܢ ܓܰܘܣܳܐ ܟܽܠܝܽܘ̣ܡ܆ ܕܗܽܘ ܡܦܰܨܶܐ ܠܰܢ ܡ̣ܶܢ ܒܺܝ̣ܫܳܐ܆ ܘܡܰܘܪܶܬ ܠܰܢ ܡܰܠܟܽܘ̣ܬ ܪܰܘܡܳܐ܀
ܗܰܘ ܕܰܨܠܺܝ̣ܒܶܗ ܥܰܠ ܟܰܬܦܶܗ܆ ܛܰܥܢܶܗ ܘܰܢܦ̣ܰܩ ܡ̣ܶܢ ܨܶܗܝܽܘܢ܆ ܗܽܘ̣ ܢܶܪܽܘ̣ܣ ܛܰܠܳܐ ܕܪ̈ܰܚܡܶܐ܆ ܥܰܠ ܓܰܪ̈ܡܰܝܗܽܘ̇ܢ ܕܥܰܢܺܝ̣̈ܕܶܐ܀
ܡܽܘ̣ܠܟܳܢܳܐ ܕܩܰܒ̣ܶܠ ܡܶܢܳܟ܆ ܓܰܝܳܣܳܐ ܥܰܠ ܪܺܝ̣ܫ ܩܰܝܣܳܐ܆ ܢܩܰܒܠܽܘ̣ܢܳܝܗ̱ܝ ܡܳܪܝ̱ ܥܰܢܺܝ̣̈ܕܶܐ܆ ܕܰܐܘܕܺܝ̣ܘ ܒܰܬܠܺܝ̣ܬܳܝܽܘ̣ܬܳܐ܀
ܢܽܘ̣ܗܳܪܳܐ
ܒܳܬܰܪ ܩܽܘ̣ܪܳܒܳܐ ܘܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܢܳܚܬܺܝ̣ܢ ܟܳܗ̈ܢܶܐ ܘܰܡܫ̈ܰܡܫܳܢܶܐ ܘܪ̈ܺܝ̣ܫܟܳܗܢܶܐ ܐܰܘ ܟܳܗܢܳܐ ܛܳܥܶܢ ܠܰܨܠܺܝܒܳܐ ܘܥܳܒܕܺܝ̣ܢ ܟܪܽܘ̣ܟܝܳܐ ܟܰܕ ܐܳܡܪܺܝ̣ܢ «ܒ̈ܳܬܶܐ ܕܰܨܠܺܝܒܳܐ» ܘܟܰܕ ܢܶܡܛܽܘ̇ܢ ܠܰܩܕܳܡ ܬܰܪܥܳܐ ܕܡܰܕܒܚܳܐ ܩܳܝܡܺܝ̣ܢ ܘܰܐܦܰܝ̈ܗܽܘ̇ܢ ܠܡܰܕܒܚܳܐ ܘܪܺܝ̣ܫ ܟܳܗ̈ܢܶܐ ܡܪܺܝ̣ܡ ܨܠܺܝܒܳܐ ܘܳܐܡܰܪ:
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘ̣ܬܳܐ
ܫܰܝܢܳܐ ܕܫܰܝܶܢ ܠܥܶܠܳܝ̈ܶܐ ܒܩܶܛܠܶܗ܆ ܫܠܳܡܳܐ ܕܪܰܥܝ ܠܬܰܚܬܳܝ̈ܶܐ ܒܰܕܒܺܝ̣ܚܽܘ̣ܬܶܗ. ܦܳܪܽܘ̣ܩܳܐ ܕܰܦܪܰܩ ܠܥܰܡ̱̈ܡܶܐ ܒܰܨܠܺܝ̣ܒܶܗ܆ ܚܽܘ̣ܒܳܐ ܕܰܐܠܘܶܬ ܠܰܦܠܺܝ̈ܓܶܐ ܒܢܽܘ̣ܚܳܡܶܗ܆ ܫܰܝܶܢ ܡܳܪܝ̱ ܒܝܰܘܡܳܐ ܗܳܢܳܐ ܕܣܽܘ̣ܠܳܩܳܐ ܕܺܝ̣ܠܳܟ ܫܓܺܝ̣ܫܽܘ̣ܬܳܐ ܕܡܶܬܥܰܡܪܳܢܺܝ̣ܬܳܐ܆ ܘܢܰܛܰܪ ܠܰܢ ܒܰܨܠܺܝ̣ܒܳܟ ܡ̣ܶܢ ܟܽܠ ܡܰܐܟܝܳܢܽܘ̣ܬܳܐ܆ ܕܢܰܘܕܶܐ ܠܳܟ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܡܰܙܥܩܳܢܽܘ̣ܬܳܐ
ܠܳܟ ܣܰܓܺܝ̣ ܪ̈ܰܚܡܶܐ ܡܳܪܝܳܐ܆ ܒܰܩܝܳܡܬܳܟ ܘܰܒܣܽܘ̣ܠܳܩܳܟ ܡܳܪܝ̱ ܐܶܙ̇ܡܰܪ ܠܳܟ܆ ܡ̈ܶܠܶܐ ܕܦܰܐܝ̈ܳܢ ܠܐܺܝ̣ܩܳܪܳܟ܆ ܘܰܒܥܰܕܥܺܐܕܳܟ ܢܰܘܕܽܘ̇ܢ ܠܳܟ ܥܰܡ̱̈ܡܶܐ ܦܪ̈ܺܝ̣ܩܰܝ ܒܰܨܠܺܝ̣ܒܳܟ܆ ܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘ̣ܬܳܐ
ܡܫܺܝ̣ܚܳܐ ܐܰܠܳܗܳܐ ܕܺܝ̣ܠܰܢ ܕܒܰܩܝܳܡܬܳܟ ܚܕܰܝܢܰܢ ܘܶܐܬܦܨܰܚܢܰܢ ܘܰܒܣܽܘ̣ܠܳܩܳܟ ܪܳܘܙܺܝ̣ܢܰܢ܆ ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ܆ ܘܰܐܫܪܳܐ ܒܰܢ ܚܽܘ̣ܒܳܟ ܘܪܶܚܡ̣ܬܳܟ܆ ܘܗܰܒܠܰܢ ܕܢܶܣܓܽܘ̣ܕ ܠܰܨܠܺܝ̣ܒܳܟ ܘܢܰܘܕܶܐ ܒܰܩܝܳܡܬܳܟ܆ ܘܢܶܪܘܰܙ ܒܣܽܘ̣ܠܳܩܳܟ܆ ܘܒܰܣܶܡ ܠܰܢ ܘܰܠܥܰܢܺܝ̣̈ܕܰܝܢ ܒܡܰܠܟܽܘ̣ܬܳܟ ܕܰܢܫܰܒܰܚ ܠܡܳܪܽܘ̣ܬܳܟ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܡܰܙܥܩܳܢܽܘܬܳܐ
ܩܝܳܡܬܳܐ ܠܟܽܠ ܐ̱ܢܳܫ ܐܶܬܝܰܕܥܰܬ݂ ܘܥܰܡܳܐ ܣܰܟܠܳܐ ܟܳܦܰܪ ܒܶܗ. ܕܗܰܘ ܕܰܨܠܰܒܘ̱ ܝܽܗ̱ܘ̣ܕܳܝ̈ܶܐ܆ ܩܳܡ ܠܶܗ ܒܫܽܘܒܚܳܐ ܡ̣ܶܢ ܩܰܒܪܳܐ܆ ܘܝܰܘܡܳܢܳܐ ܗܳܐ ܣܠ̣ܶܩ ܠܰܫܡܰܝܳܐ ܒܙܰܘܚܳܐ ܪܰܒܳܐ܆ ܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܓܰܪܒܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘ̣ܬܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܢܶܣܬܰܬܰܪ ܬܚܶܝܬ ܟܶܢܦܰܘ̈ܗ̱ܝ ܕܰܨܠܺܝ̣ܒܳܟ. ܘܰܕܢܶܛܦܰܣ ܒܰܩܝܳܡܬܳܟ ܘܕܰܢܗܰܝܡܶܢ ܒܢܽܘ̣ܚܳܡܳܟ ܘܰܒܣܽܘ̣ܠܳܩܳܟ. ܘܰܕܢܶܛܰܪ ܦܽܘ̣ܩܕܳܢܳܐ ܕܶܐܘܰܢܓܶܠܝܽܘܢ ܕܺܝ̣ܠܳܟ ܘܰܕܢܶܥܒܶܕ ܨܶܒܝܳܢܳܟ. ܘܕܰܢܫܰܡܠܶܐ ܢܳܡܽܘ̣ܣܳܟ ܘܰܕܢܶܬܓܰܘܰܣ ܘܢܶܬܥܰܕܰܪ ܒܰܨܠܰܘ̈ܳܬܗܽܘ̇ܢ ܕܟܺܐܢ̈ܶܐ ܘܙܰܕܺܝ̣̈ܩܶܐ ܕܰܐܚܒܽܘ̣ܟ܆ ܘܚܰܣܳܐ ܠܰܢ ܘܰܠܥܰܢܺܝ̣̈ܕܰܝܢ ܒܝܰܕ ܒܳܥܘ̈ܳܬܗܽܘ̇ܢ ܕܢܰܘܕܶܐ ܠܳܟ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܡܰܙܥܩܳܢܽܘܬܳܐ
ܚܽܘ̣ܣ ܡܳܪܝܳܐ ܥܰܠ ܥܰܡܳܐ ܕܺܝ̣ܠܳܟ܆ ܘܠܳܐ ܬܰܗܡܶܐ ܡ̣ܶܢ ܝܳܪܬܽܘ̣ܬܳܟ܆ ܘܪܰܡܪܶܡ ܩܰܪܢܳܐ ܕܰܟܪ̈ܺܝ̣ܣܛܝܳܢܶܐ܆ ܒܢܺܝ̣ܫܶܗ ܪܰܒܳܐ ܕܰܨܠܺܝ̣ܒܳܟ܆ ܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘ̣ܬܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܥܰܡ ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܢܪܰܡܪܶܡ ܠܝܰܘܡܳܐ ܗܳܢܳܐ ܕܣܽܘ̣ܠܳܩܳܟ܆ ܘܰܐܫܘܳܐ ܠܰܢ ܕܰܢܫܰܡܠܶܐ ܥܰܕܥܺܐܕܰܝ̈ܟ ܒܰܦܨܺܝ̣ܚܽܘ̣ܬܳܐ ܘܰܕܢܶܣܰܒ ܡܶܢܳܟ ܛܳܒ̈ܳܬܳܐ ܘܒܽܘ̣ܪ̈ܟܳܬܳܐ܆ ܘܰܐܥܒܰܪ ܡܶܢܰܢ ܫܰܒ̈ܛܶܐ ܕܪܽܘ̣ܓܙܳܐ ܘܟܽܠܗܶܝܢ ܡܰܚ̈ܘܳܬܳܐ ܒܝܰܕ ܨܠܺܝ̣ܒܳܟ ܩܰܕܺܝܫܳܐ. ܘܰܒܚܰܝܠܳܟ ܕܫܳܪܶܐ ܒܩܰܕܺܝ̣̈ܫܰܝܟ ܕܢܰܘܕܶܐ ܠܳܟ ܘܰܢܫܰܒܚܳܟ ܘܠܰܐܒܽܘ̣ܟ ܘܰܠܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܡܰܙܥܩܳܢܽܘܬܳܐ
ܡܶܛܽܠ ܟܪ̈ܺܝ̣ܗܶܐ ܘܰܐܠܺܝ̈ܨܶܐ܆ ܘܡܶܛܽܠ ܒܳܝܫ̈ܶܐ ܘܡܶܣ̈ܟܺܢܶܐ܆ ܘܡܶܛܽܠ ܝܰܬܡ̈ܶܐ ܘܰܐܪ̈ܡܠܳܬܳܐ܆ ܘܡܶܛܽܠ ܗܳܝ ܕܢܰܫܪܶܐ ܡܳܪܝܳܐ ܫܰܝܢܶܗ ܘܰܫܠܳܡܶܗ ܒܥܰܡܶܗ ܘܥܺܕܬܶܗ ܘܡܰܪܥܺܝ̣ܬܶܗ܆ ܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܐܶܓܰܪܬܳܐ ܕܦܰܘܠܽܘ̣ܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܕ. ܐ ـ ܝܘ. Ephesians 4:1-16
ܐܰܚܰܝ̈܆ ܒ݁ܳܥܶܐ ܐ݈ܢܳܐ ܗܳܟ݂ܺܝܠ ܡܶܢܟ݂ܽܘܢ ܐܶܢܳܐ ܐܰܣܺܝܪܳܐ ܒ݁ܡܳܪܰܢ ܕ݁ܰܬ݂ܗܰܠܟ݂ܽܘܢ ܐܰܝܟ݁ܰܢܳܐ ܕ݁ܝܳܐܶܐ ܠܩܶܪܝܳܢܳܐ ܕ݁ܶܐܬ݂ܩܪܺܝܬ݁ܽܘܢ܂ ܒ݁ܟ݂ܽܠܳܗ̇ ܡܰܟ݁ܺܝܟ݂ܽܘܬ݂ ܪܶܥܝܳܢܳܐ ܘܢܺܝܚܽܘܬ݂ܳܐ ܘܢܰܓ݁ܺܝܪܽܘܬ݂ ܪܽܘܚܳܐ ܘܰܗܘܰܝܬ݁ܽܘܢ ܡܣܰܝܒ݁ܪܺܝܢ ܚܰܕ݂ ܠܚܰܕ݂ ܒ݁ܚܽܘܒ݁ܳܐ܂ ܘܰܗܘܰܝܬ݁ܽܘܢ ܚܦ݂ܺܝܛܺܝܢ ܠܡܶܛܰܪ ܐܰܘܝܽܘܬ݂ܳܐ ܕ݁ܪܽܘܚܳܐ ܒ݁ܰܚܙܳܩܳܐ ܕ݁ܰܫܠܳܡܳܐ܂ ܕ݁ܬ݂ܶܗܘܽܘܢ ܒ݁ܚܰܕ݂ ܦ݁ܰܓ݂ܪܳܐ ܘܒ݂ܰܚܕ݂ܳܐ ܪܽܘܚܳܐ ܐܰܝܟ݂ ܡܳܐ ܕ݁ܶܐܬ݂ܩܪܺܝܬ݁ܽܘܢ ܒ݁ܚܰܕ݂ ܣܰܒ݂ܪܳܐ ܕ݁ܩܶܪܝܳܢܟ݂ܽܘܢ܂ ܚܰܕ݂ ܗ݈ܽܘ ܓ݁ܶܝܪ ܡܳܪܝܳܐ ܘܰܚܕ݂ܳܐ ܗܰܝܡܳܢܽܘܬ݂ܳܐ ܘܰܚܕ݂ܳܐ ܡܰܥܡܽܘܕ݂ܺܝܬ݂ܳܐ܂ ܘܚܰܕ݂ ܐܰܠܳܗܳܐ ܐܰܒ݂ܳܐ ܕ݁ܟ݂ܽܠ ܘܥܰܠ ܟ݁ܽܠ ܘܰܒ݂ܝܰܕ݂ ܟ݁ܽܠ ܘܰܒ݂ܟ݂ܽܠܰܢ܂ ܠܚܰܕ݂ ܚܰܕ݂ ܡܶܢܰܢ ܕ݁ܶܝܢ ܐܶܬ݂ܝܰܗܒ݁ܰܬ݂ ܛܰܝܒ݁ܽܘܬ݂ܳܐ ܐܰܝܟ݂ ܡܫܽܘܚܬ݂ܳܐ ܕ݁ܡܰܘܗܰܒ݂ܬ݂ܶܗ ܕ݁ܰܡܫܺܝܚܳܐ܂ ܡܶܛܽܠ ܗܳܢܳܐ ܐܰܡܺܝܪ ܕ݁ܰܣܠܶܩ ܠܰܡܪ̈ܰܘܡܳܐ ܘܰܫܒ݂ܳܐ ܫܒ݂ܺܝܬ݂ܳܐ ܘܝܰܗ݈ܒ݂ ܡܰܘܗ̈ܒ݂ܳܬ݂ܳܐ ܠܰܒ݂ܢܰܝ̈ܢܳܫܳܐ܂ ܕ݁ܰܣܠܶܩ ܕ݁ܶܝܢ ܡܳܢܳܐ ܗ݈ܝ ܐܶܠܳܐ ܐܶܢ ܕ݁ܳܐܦ݂ ܢܚܶܬ݂ ܠܽܘܩܕ݂ܰܡ ܠܬ݂ܰܚ̈ܬ݁ܳܝܳܬ݂ܳܗ̇ ܕ݁ܰܐܪܥܳܐ܂ ܗܰܘ ܕ݁ܰܢܚܶܬ݂ ܗܽܘܝܽܘ ܗܰܘ ܕ݁ܳܐܦ݂ ܣܠܶܩ ܠܥܶܠ ܡܶܢ ܟ݁ܽܠܗܽܘܢ ܫܡܰܝܳܐ ܕ݁ܰܢܫܰܠܶܡ ܟ݁ܽܠ܂ ܘܗܽܘ ܝܰܗ݈ܒ݂ ܐܺܝܬ݂ ܕ݁ܰܫܠܺܝ̈ܚܶܐ ܘܺܐܝܬ݂ ܕ݁ܰܢܒ݂ܺܝ̈ܐ ܘܺܐܝܬ݂ ܕ݁ܰܡܣܰܒ݁ܪ̈ܳܢܶܐ ܘܺܐܝܬ݂ ܕ݁ܪ̈ܳܥܰܘܳܬ݂ܳܐ ܘܺܐܝܬ݂ ܕ݁ܡܰܠ̈ܦ݂ܳܢܶܐ܂ ܠܰܓ݂ܡܳܪܳܐ ܕ݁ܩܰܕ݁ܺܝ̈ܫܶܐ ܠܰܥܒ݂ܳܕ݂ܳܐ ܕ݁ܬ݂ܶܫܡܶܫܬ݁ܳܐ ܠܒ݂ܶܢܝܳܢܳܐ ܕ݁ܦ݂ܰܓ݂ܪܳܐ ܕ݁ܰܡܫܺܝܚܳܐ܂ ܥܕ݂ܰܡܳܐ ܕ݁ܟ݂ܽܠܰܢ ܢܶܗܘܶܐ ܚܰܕ݂ ܡܶܕ݁ܶܡ ܒ݁ܗܰܝܡܳܢܽܘܬ݂ܳܐ ܘܒ݂ܺܝܕ݂ܰܥܬ݂ܳܐ ܕ݁ܰܒ݂ܪܶܗ ܕ݁ܰܐܠܳܗܳܐ ܘܚܰܕ݂ ܓ݁ܰܒ݂ܪܳܐ ܓ݁ܡܺܝܪܳܐ ܒ݁ܰܡܫܽܘܚܬ݂ܳܐ ܕ݁ܩܰܘܡܬ݂ܳܐ ܕ݁ܫܽܘܡܠܳܝܶܗ ܕ݁ܰܡܫܺܝܚܳܐ܂ ܘܠܳܐ ܢܶܗܘܶܐ ܝܰܠܽܘ̈ܕ݂ܶܐ ܕ݁ܡܶܙܕ݁ܰܥܙܥܺܝܢ ܘܡܶܫܬ݁ܰܢܶܝܢ ܠܟ݂ܽܠ ܪܽܘܚ ܕ݁ܝܽܘܠ̈ܦ݁ܳܢܶܐ ܢܟ݂ܺܝ̈ܠܶܐ ܕ݁ܰܒ݂ܢܰܝ̈ܢܳܫܳܐ ܗܳܢܽܘܢ ܕ݁ܰܒ݂ܚܳܪܥܽܘܬ݂ܗܽܘܢ ܡܶܨܛܰܢܥܺܝܢ ܕ݁ܢܰܛܥܽܘܢ܂ ܐܶܠܳܐ ܗܘܰܝܢ ܫܰܪܺܝܪܺܝܢ ܒ݁ܚܽܘܒ݁ܰܢ ܕ݁ܟ݂ܽܠ ܡܶܕ݁ܶܡ ܕ݁ܺܝܠܰܢ ܢܶܪܒ݁ܶܐ ܒ݁ܰܡܫܺܝܚܳܐ ܕ݁ܗܽܘܝܽܘ ܪܺܫܳܐ܂ ܘܡܶܢܶܗ ܟ݁ܽܠܶܗ ܦ݁ܰܓ݂ܪܳܐ ܡܶܬ݂ܪܰܟ݁ܰܒ݂ ܘܡܶܬ݂ܩܰܛܰܪ ܒ݁ܟ݂ܽܠ ܫܳܪ̈ܝܳܢ ܐܰܝܟ݂ ܡܰܘܗܰܒ݂ܬ݁ܳܐ ܕ݁ܡܶܬ݂ܝܰܗܒ݁ܳܐ ܒ݁ܰܡܫܽܘܚܬ݂ܳܐ ܠܟ݂ܽܠ ܗܰܕ݁ܳܡ ܠܬ݂ܰܪܒ݁ܺܝܬ݂ܳܐ ܕ݁ܺܝܠܶܗ ܕ݁ܦ݂ܰܓ݂ܪܳܐ ܕ݁ܰܒ݂ܚܽܘܒ݁ܳܐ ܢܶܫܬ݁ܰܠܰܡ ܒ݁ܶܢܝܳܢܶܗ܀
ܗܽܘ̣ܠܳܠܳܐ ܘܦܶܬܓܳܡܳܐ
ܣܠܶܩ̣ܬ ܠܰܡܪܰܘܡܳܐ ܘܰܫܒ̣ܰܝܬ ܫܒܺܝ̣ܬܳܐ܆ ܘܝܰܗ̣ܒܬ ܡܰܘ̈ܗܒܳܬܳܐ ܠܰܒܢܰܝ̈ܢܳܫܳܐ ܗ̄܀
ܐܶܘܰܢܓܶܠܝܽܘܢ ܡܶܢ ܠܘ̣ܩܳܐ
(ܟܕ: ܡܗ ـ ܢܓ Luke 24: 45-53)
ܗܳܝܕ݁ܶܝܢ ܦ݁ܬ݂ܰܚ ܪܶܥܝܳܢܗܽܘܢ ܠܡܶܣܬ݁ܰܟ݁ܳܠܽܘ ܟ݁ܬ݂ܳܒ݂̈ܶܐ܂ ܘܶܐܡܰܪ ܠܗܽܘܢ ܕ݁ܗܳܟ݂ܰܢܳܐ ܟ݁ܬ݂ܺܝܒ݂ ܘܗܳܟ݂ܰܢܳܐ ܙܳܕ݂ܶܩ ܗ݈ܘܳܐ ܕ݁ܢܶܚܰܫ ܡܫܺܝܚܳܐ ܘܕ݂ܰܢܩܽܘܡ ܡܶܢ ܒ݁ܶܝܬ݂ ܡܺܝ̈ܬ݂ܶܐ ܠܰܬ݂ܠܳܬ݂ܳܐ ܝܰܘ̈ܡܺܝܢ܂ ܘܰܕ݂ܢܶܬ݂ܟ݁ܪܶܙ ܒ݁ܰܫܡܶܗ ܬ݁ܝܳܒ݁ܽܘܬ݂ܳܐ ܠܫܽܘܒ݂ܩܳܢܳܐ ܕ݁ܰܚܛܳܗ̈ܶܐ ܒ݁ܟ݂ܽܠܗܽܘܢ ܥܰܡ݈̈ܡܶܐ ܘܫܽܘܪܳܝܳܐ ܢܶܗܘܶܐ ܡܶܢ ܐܽܘܪܺܫܠܶܡ܂ ܘܰܐܢ݈ܬ݁ܽܘܢ ܐܶܢܽܘܢ ܣܳܗ̈ܕ݁ܶܐ ܕ݁ܗܳܠܶܝܢ܂ ܘܶܐܢܳܐ ܐܶܫܰܕ݁ܰܪ ܥܠܰܝܟ݁ܽܘܢ ܡܽܘܠܟ݁ܳܢܳܐ ܕ݁ܳܐܒ݂ܝ ܐܰܢ݈ܬ݁ܽܘܢ ܕ݁ܶܝܢ ܩܰܘܰܘ ܒ݁ܽܐܽܘܪܺܫܠܶܡ ܡܕ݂ܺܝܢ݈ܬ݁ܳܐ ܥܕ݂ܰܡܳܐ ܕ݁ܬ݂ܶܠܒ݁ܫܽܘܢ ܚܰܝܠܳܐ ܡܶܢ ܪܰܘܡܳܐ܂ ܘܰܐܦ݁ܶܩ ܐܶܢܽܘܢ ܥܕ݂ܰܡܳܐ ܠܒ݂ܶܝܬ݂ܥܰܢܝܳܐ ܘܰܐܪܺܝܡ ܐܺܝ̈ܕ݂ܰܘܗ݈ܝ ܘܒ݂ܰܪܶܟ݂ ܐܶܢܽܘܢ܂ ܘܰܗܘܳܐ ܕ݁ܟ݂ܰܕ݂ ܡܒ݂ܰܪܶܟ݂ ܠܗܽܘܢ ܐܶܬ݂ܦ݁ܪܶܫ ܡܶܢܗܽܘܢ ܘܰܣܠܶܩ ܠܰܫܡܰܝܳܐ܂ ܗܶܢܽܘܢ ܕ݁ܶܝܢ ܣܓ݂ܶܕ݂ܘ ܠܶܗ ܘܰܗܦ݂ܰܟ݂ܘ ܠܽܐܘܪܺܫܠܶܡ ܒ݁ܚܰܕ݂ܽܘܬ݂ܳܐ ܪܰܒ݁ܬ݂ܳܐ܂ ܘܰܒ݂ܟ݂ܽܠܙܒ݂ܰܢ ܐܺܝܬ݂ܰܝܗܽܘܢ ܗ݈ܘܰܘ ܒ݁ܗܰܝܟ݁ܠܳܐ ܟ݁ܰܕ݂ ܡܫܰܒ݁ܚܺܝܢ ܘܰܡܒ݂ܰܪܟ݂ܺܝܢ ܠܰܐܠܳܗܳܐ ܐܰܡܺܝܢ܀
ܘܰܡܫܰܪܶܐ ܪܺܝ̣ܫ ܟܳܗ̈ܢܶܐ ܐܰܘ̇ ܟܳܗܢܳܐ ܕܰܛܥܺܝܢ ܨܠܺܝܒܳܐ ܟܰܕ ܐܰܡܰܪ:
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘ̣ܒܶܐ ܡܒܰܪܟܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܰܣܠܶܩ̣ܬ ܒܫܽܘܒܚܳܐ ܠܰܫܡܰܝܳܐ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝ̣ܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܢܽܘ̣ܪ̈ܳܢܶܐ ܡܗܰܠܠܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘ̣ܚܳܢܶܐ ܡܗܰܕܪܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܰܣܠܶܩ̣ܬ ܒܫܽܘܒܚܳܐ ܠܰܫܡܰܝܳܐ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝ̣ܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܰܣܠܶܩ̣ܬ ܒܫܽܘܒܚܳܐ ܠܰܫܡܰܝܳܐ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝ̣ܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘ̣ܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘ̣ܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܘܰܡܚܰܬܶܡ ܪ̈ܺܝ̣ܫܟܳܗܢܶܐ ܠܥܰܡܳܐ ܒܰܨܠܺܝܒܳܐ ܘܡܰܟܪܶܙ ܥܰܠ ܢܺܝ̣ܫܳܐ ܕܝܰܘܡܳܐ܀.
ܫܠܶܡ ܛܶܟܣܳܐ ܕܣܽܘ̣ܠܳܩܳܐ ܕܡܳܪܰܢ ܠܰܫܡܰܝܳܐ܀