ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܐܶܡܳܐ ܕܟܺܝܬܳܐ. ܒܬܽܘܠܬܳܐ ܩܰܕܺܝܫܬܳܐ܆ ܕܰܫܘܳܬ ܕܥܰܠ ܒܽܘܪ̈ܟܶܝܗ̇ ܬܶܛܥܰܢ ܠܰܡܪܰܝܡܳܐ܆ ܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ܀

ܗܰܘ ܕܶܐܬܺܝܠܶܕ. ܡܶܢ ܐܶܡܳܐ ܒܬܽܘܠܬܳܐ܆ ܘܪܰܡܪܶܡ ܘܰܐܘܪܶܒ ܝܰܘܡܳܐ ܕܕܽܘܟܪܳܢܳܗ̇܆ ܪܰܚܶܡ ܥܠܰܝܢ ܐܰܠܳܗܳܐ܀

ܛܽܘܒܰܝܟܝ ܕܰܕܢܰܚ. ܡܶܢ ܥܽܘܒܶܟܝ ܕܰܟܝܳܐ܆ ܡܳܪܝܳܐ ܡܫܺܝܚܳܐ ܦܳܪܽܘܩܶܗ ܕܥܳܠܡܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܛܽܘܒܰܝܟܝ ܡܰܪܝܰܡ. ܕܰܢܒܺܝ̈ܶܐ ܨܳܪܽܘܟܝ܆ ܒܐ̱ܪ̈ܳܙܶܐ ܘܝܽܘܩ̈ܢܶܐ ܘܛܽܘ̈ܦܣܶܐ ܘܦ̈ܶܠܳܐܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܽܘܫܶܐ ܨܳܪܶܟܝ. ܒܣܰܢܝܳܐ ܘܒܰܥܢܳܢܳܐ܆ ܘܰܒܥܰܪܦܶܠܳܐ ܘܩܶܣܛܳܐ ܘܩܺܐܒܽܘܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܠܶܝܡܽܘܢ ܩܪܳܟܝ ܗ̱ܘܳܐ ܓܰܢܬܳܐ ܐܰܚܺܝܕܬܳܐ܆ ܕܰܫܘܰܚ ܡܶܢܳܗ̇ ܢܳܨܽܘܒܳܗ̇ ܕܰܥܕܶܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܫܽܘܒܚܳܐ ܠܰܡܫܺܝܚܳܐ܆ ܕܰܒܪ̈ܰܚܡܰܘܗ̱ܝ ܐܶܬܓܠܺܝ܆ ܘܰܕܢܰܚ ܡܶܢ ܡܰܪܝܰܡ܆ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ܆ ܘܪܰܡܪܶܡ ܕܽܘܟܪܳܢܳܗ̇܆ ܒܪܰܘܡܳܐ ܘܰܒܥܽܘܡܩܳܐ܆ ܒܰܨܠܰܘ̈ܳܬܳܗ̇܆ ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܶܫܰܥܝܳܐ ܢܒܺܝܳܐ܆ ܥܠܰܝܟܝ ܐܶܬܢܰܒܺܝ ܗ̱ܘܳܐ܆ ܕܗܳܐ ܒܬܽܘܠܬܳܐ ܒܳܛܢܳܐ܆ ܘܝܳܠܕܳܐ ܠܶܗ ܠܥܰܡܰܢܽܘܐܶܝܠ܆ ܘܗܳܐ ܢܰܨܺܝܚ ܘܰܫܒܺܝܚ܆ ܝܰܘܡܳܐ ܕܕܽܘܟܪܳܢܶܟܝ܆ ܒܰܨܠܰܘ̈ܳܬܶܟܝ܆ ܫܰܝܢܳܐ ܢܰܡܠܶܟ ܒܰܒܪܺܝܬܳܐ܀

ܐܶܬܟܰܫܰܦܝ ܘܰܒܥܳܝ܆ ܐܶܡܳܐ ܡܒܰܪܰܟܬܳܐ܆ ܠܰܒܪܳܐ ܫܡܰܝܳܢܳܐ܆ ܕܶܐܬܓܰܫܰܡ ܡܶܢ ܕܰܟܝܽܘܬܶܟܝ܆ ܕܰܢܫܰܟܶܢ ܠܟܽܠܰܢ܆ ܪ̈ܰܚܡܶܐ ܘܰܚܢܳܢܳܐ܆ ܘܒܰܨܠܰܘ̈ܳܬܶܟܝ܆ ܢܶܫܒܽܘܩ ܚܰܘ̈ܒܰܝܢ ܘܰܚ̈ܛܳܗܰܝܢ܀

ܒܣܰܢܝܳܐ ܨܳܪܶܟܝ ܗ̱ܘܳܐ܆ ܡܽܘܫܶܐ ܒܛܽܘܪ ܣܺܝܢܰܝ܆ ܘܝܰܥܩܽܘܒ ܟܺܐܢܳܐ܆ ܒܣܶܒܠܬܳܐ ܡܰܬܠܶܟܝ܆ ܐܳܦ ܓܶܕܥܽܘܢ ܒܓܶܙܬܳܐ܆ ܕܛܰܠܳܐ ܪܰܫܡܶܟܝ ܗ̱ܘܳܐ܆ ܘܡܰܠܟܳܐ ܫܠܶܝܡܽܘܢ܆ ܒܓܰܢܬܳܐ ܚܬܺܝܡܬܳܐ ܘܰܛܒܺܝܥܬܳܐ܀

ܒܝܰܘܡܳܐ ܕܥܰܕܥܺܐܕܶܟܝ܆ ܐܶܡܶܗ ܕܰܡܪܰܝܡܳܐ܆ ܩܰܪܶܒܝ ܒܳܥܽܘܬܳܐ܆ ܚܠܳܦ ܟܶܢܫܳܐ ܕܰܡܝܰܩܪ̈ܳܢܰܝܟܝ܆ ܘܫܰܐܠܝ ܠܰܢ ܡܶܢ ܡܳܪܰܢ܆ ܫܰܝܢܳܐ ܘܰܫܠܳܡܳܐ܆ ܕܰܒܚܰܕܽܘܬܳܐ܆ ܢܙܰܝܰܚ ܝܰܘܡܳܐ ܕܕܽܘܟܪܳܢܶܟܝ܀

ܒܶܝܬ ܓܰܘܣܰܢ ܪܳܡܳܐ܆ ܘܥܽܘܫܢܰܢ ܬܰܩܺܝܦܳܐ܆ ܐܰܢ̱ܬܝ ܐܺܝܬܰܝܟܝ ܒܟܽܠ ܙܒܰܢ܆ ܡܒܰܪܰܟܬܳܐ ܘܡܰܠܝܰܬ ܫܽܘܦܪ̈ܶܐ܆ ܒܚܰܝܠܳܐ ܕܒܳܥܽܘܬܶܟܝ܆ ܪ̈ܰܚܡܶܐ ܢܶܫܬܰܦܥܽܘܢ܆ ܥܰܠ ܢܰܦ̈ܫܳܬܳܐ܆ ܕܰܡܙܰܝ̈ܚܳܢ ܝܽܘܡ ܕܽܘܟܪܳܢܶܟܝ܀

ܫܽܘܒܚܳܐ

ܠܺܝ ܢܶܬܠܳــ̈ـܢ ܛܽܘܒܳܐ܆ ܟܽܠܗܶܝܢ ܫܰܪ̈ܒܳܬܳܐ܆ ܥܢܳܬ ܘܶܐܡܪܰܬ ܡܰܪܝܰܡ܆ ܒܚܰܕܽܘܬܳܐ ܪܰܒܬܳܐ܆ ܕܰܒܝܰܠܕܳܐ ܕܝܶܠܕܰܬ܆ ܐܶܬܛܰܠܰܩ ܚܶܫܟܳܐ܆ ܘܰܐܡܠܶܟ ܢܽܘܗܪܳܐ܆ ܥܰܠ ܟܽܠܗܽܘܢ ܥܰܡ̱̈ܡܶܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܛܽܘܒܰܝܟܝ ܐܶܡܳܐ ܕܢܰܟܦܽܘܬܳܐ

ܥܰܡ̱̈ܡܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ܆ ܗܰܒܘ ܛܽܘܒܳܐ ܠܡܰܠܝܰܬ ܫܽܘܦܪ̈ܶܐ܆ ܒܬܽܘܠܬܳܐ ܡܰܪܝܰܡ ܒܰܪ̱ܬ ܕܰܘܺܝܕ܆ ܕܰܕܢܰܚ ܡܶܢܳܗ̇ ܦܳܪܽܘܩܳܐ܆ ܘܶܐܬܒܰܣܰܪ ܡܶܛܽܠܳܬܰܢ ܕܰܢܫܰܘܙܶܒ ܠܰܢ܆ ܡܶܢ ܐܺܝ̈ܕܰܝ ܒܺܝܫܳܐ܆ ܘܢܰܣܩܰܢ ܥܰܡܶܗ ܠܰܫܡܰܝܳܐ܆ ܘܢܰܘܬܒܰܢ ܡܶܢ ܝܰܡܺܝܢ ܐܰܒܽܘܗ̱ܝ܆ ܫܽܘ݉ܒܚܳܐ ܠܗܰܘ ܟܰܣܝܳܐ܆ ܕܰܓܒܳܐ ܠܶܗ ܥܽܘܒܳܐ ܒܬܽܘܠܳܐ܆ ܘܟܰܕ ܐܺܝܬܰܘܗ̱ܝ ܥܰܠ ܡܰܪܟܰܒܬܳܐ܆ ܫܪܳܐ ܒܰܕܟܺܝܬܳܐ ܘܰܕܢܰܚ܆ ܡܶܢܳܗ̇ ܘܰܢܛܺܝܪܳܐ܀

ܫܽܘܒܚܳܐ

ܛܽܘܒܰܝܟܝ ܐܶܡܶܗ ܕܰܐܠܳܗܳܐ܆ ܕܰܒܬܽܘܠܳܐܺܝܬ ܝܺܠܶܕܬܺܝܘܗ̱ܝ܆ ܠܗܰܘ ܕܰܟܪ̈ܽܘܒܶܐ ܘܰܣܪ̈ܳܦܶܐ܆ ܪܳܬܺܝܢ ܡܶܢܶܗ ܨܶܝܕ ܐܰܒܽܘܗ̱ܝ܆ ܒܰܕܪ̈ܳܥܰܝܟܝ ܡܶܙܕܰܝܰܚ ܗ̱ܘܳܐ܆ ܗܰܘ ܕܰܟܪ̈ܽܘܒܶܐ ܟܕܺܝܢܺܝܢ ܠܺܐܝܩܳܪܶܗ܆ ܘܥܰܠ ܚܰܕܝܶܟܝ ܡܶܬܚܰܒܰܒ ܗ̱ܘܳܐ܆ ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܫܽܘ݉ܒܚܳܐ ܠܡܽܘܟܳܟܶܗ܆ ܕܶܐܬܬܰܚܬܺܝ ܘܰܗܘܳܐ ܐ̱ܢܳܫܳܐ܆ ܘܪܰܡܪܶܡ ܘܰܐܘܪܶܒ ܕܽܘܟܪܳܢܶܟܝ. ܒܰܐܪܒܰܥ ܦܶܢ̈ܝܳܢ ܨܠܽܘܬܶܟܝ܆ ܫܽܘܪܳܐ ܬܶܗܘܶܐ ܠܰܢ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܪܺܝܟܽ ܗ̱ܘ ܡܫܺܝܚܳܐ ܕܰܓܒܳܟܝ ܡܰܪܝܰܡ ܒܰܪ̱ܬ ܕܰܘܺܝܕ

ܟܽܠܳܗ̇ ܬܺܒܶܝܠ܆ ܬܰܘܕܶܐ ܘܬܶܣܓܽܘܕ ܘܰܬܫܰܒܰܚ܆ ܠܗܰܘ ܟܰܣܝܳܐ ܕܶܐܬܳܐ ܠܓܶܠܝܳܐ܆ ܡܶܢ ܥܽܘܒܳܗ̇ ܕܡܰܠܝܰܬ ܫܽܘܦܪ̈ܶܐ܆ ܫܽܘܒܚܳܐ ܠܶܗ ܕܟܰܕ ܐܰܠܳܗܰܐ ܗ̱ܘ܆ ܓܒܳܐ ܠܶܗ ܐܶܡܳܐ ܒܰܪ̱ܬ ܐ̱ܢܳܫܳܐ܆ ܘܰܐܘܪܶܒ ܝܰܘܡܳܐ ܕܕܽܘܟܪܳܢܳܗ̇܆ ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܘܗܳܐ ܥܰܡ̱̈ܡܶܐ ܡܶܢ ܟܽܠ ܦܶܢ̈ܝܳܢ܆ ܚܳܕܶܝܢ ܘܕܳܝܨܺܝܢ ܒܥܰܕܥܺܐܕܳܗ̇܀

ܫܽܘܒܚܳܐ

ܣܰܒ ܟܶܢܳܪܳܟ܆ ܢܒܺܝܳܐ ܕܐ̱ܪ̈ܳܙܶܐ ܐܶܫܰܥܝܳܐ܆ ܘܶܐܬܢܰܒܳܐ ܥܰܠ ܒܰܪ ܡܳܪܳܟ܆ ܕܰܐܝܟܰܢ ܕܳܢܰܚ ܒܰܒܪܺܝܬܳܐ܆ ܕܗܳܐ ܒܬܽܘܠܬܳܐ ܒܳܛܢܳܐ܆ ܘܝܳܠܕܳܐ ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܆ ܘܡܶܬܩܪܶܐ ܫܡܶܗ ܥܰܡܰܢܽܘܐܶܝܠ܆ ܕܺܐܝܬܰܘܗ̱ܝ ܥܰܡܰܢ ܐܰܠܳܗܰܢ܆ ܒܪܺܝܟܽ ܗ̱ܘ ܡܳܪܳܐ ܕܰܢܒܺܝ̈ܶܐ܆ ܕܶܐܬܳܐ ܘܫܰܡܠܺܝ ܡܶܠܰܝ̈ܗܽܘܢ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܩܕܳܡ ܐܶܘܰܢܓܶܠܝܳܘܢ

ܐܶܬܢܶܐ ܫܽܘܦܪ̈ܰܝܟܝ̱ ܬܳܗܰܪ ܐ̱ܢܳܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܕܺܐܡܰܪ ܫܰܪܒܶܟ̣ܝ̱ ܠܳܐ ܡܨܶܐ ܐ̱ܢܳܐ܇ ܒܬ̣ܽܘܠܬܳܐ ܩܰܕܺܝܫܬܳܐ܀

ܒܪܺܝܟ̣ܬܳܐ ܒܢܶܫ̈ܶܐ ܐܰܢ̱ܬܝ ܐܺܝܬ̣ܰܝܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟ̣ܝ̱܇ ܐܶܡܪܰܬ̣ ܐܶܠܺܝܫܒܰܥ܀

ܛܽܘܒܰܝܟܝ̱ ܐܳܦ ܠܶܟ̣ܝ̱ ܘܠܰܐܒܳܗܰܝ̈ܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܛܽܘܒܰܘܗܝ ܠܰܐܝܢܳܐ ܕܰܒܟܽܠ ܫܳܥ܇ ܛܽܘܒܳܐ ܝܳܗܶܒ ܠܶܟ̣ܝ̱܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܚܳܕܶܝܢ ܒܝܰܘܡܳܐ ܕܕܽܘܟ̣ܪܳܢܶܟ̣ܝ̱܇ ܨܠܽܘܬ̣ܶܟ̣ܝ̱ ܬܥܰܕܰܪ ܠܰܢ܀

ܦܶܬܓܳܡܳܐ: ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ܆ ܘܡܰܠܟܬܳܐ ܡܶܢ ܝܰܡܺܝܢܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܬܽܘܠܬܳܐ ܕܩܽܘ̈ܕܫܶܐ ܩܪܳܬܰܢܝ ܝܰܘܡܳܢ ܕܶܐܡܰܠܶܠ ܠܳܗ̇܆ ܢܫܰܦܶܐ ܫܶܡܥܰܢ ܠܫܰܪܒܳܗ̇ ܦܰܐܝܳܐ ܕܠܳܐ ܢܶܨܛܰܥܰܪ܆ ܫܡܰܝܳܐ ܕܬܰܪܬܶܝܢ ܕܰܫܪܳܐ ܒܥܽܘܒܳܗ̇ ܡܳܪܶܐ ܪܰܘܡܳܐ܆ ܘܰܕܢܰܚ ܡܶܢܳܗ̇ ܕܶܢܛܪܽܘܕ ܚܶܫܟܳܐ ܡܶܢ ܦܶܢ̈ܝܳܬܳܐ܀

ܫܽܘܒܚܳܐ ܠܰܐܒܳܐ ܕܰܓܒܳܐ ܠܡܰܪܝܰܡ ܕܡܶܣܟܺܢ̱ܬܳܐ ܗ̱ܘܳܬ܆ ܘܣܶܓܕܬܳܐ ܠܰܒܪܳܐ ܕܡܶܣܟܺܢܳܐܺܝܬ ܢܚܶܬ ܘܰܫܪܳܐ ܒܳܗ̇܆ ܬܰܘܕܺܝ ܠܪܽܘܚܳܐ ܕܰܒܡܶܣ̈ܟܺܢܶܐ ܦܫܺܝܩ ܠܶܗ ܕܢܶܥܡܰܪ܆ ܚܰܕ ܗ̱ܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܐ̱ܚܪܺܢܳܐ

ܒܰܪ̱ܬ ܡܶܣ̈ܟܺܢܶܐ ܕܰܗܘܳܬ ܐܶܡܳܐ ܠܒܰܪ ܐܰܠܳܗܳܐ: ܘܝܶܗܒܰܬ ܥܽܘܬܪܳܐ ܠܥܳܠܡܳܐ ܣܢܺܝܩܳܐ ܕܢܺܚܶܐ ܡܶܢܶܗ: ܐܶܠܦܳܐ ܕܛܶܥܢܰܬ ܛܽܘ̈ܒܶܐ ܘܓ̈ܰܙܶܐ ܡܶܢ ܒܶܝܬ ܐܰܒܳܐ: ܘܶܐܬܳܬ ܣܰܦܩܰܬ ܥܽܘܬܪܳܐ ܒܰܐܬܪܰܢ ܕܰܡܓܰܙܰܝ ܗ̱ܘܳܐ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀