ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܙܳܕܶܩ ܕܢܶܗܘܶܐ
ܙܳܕܶܩ ܕܢܶܗܘܶܐ ܕܽܘܟܪܳܢܳܐ ܠܡܰܪܝܰܡ

ܒܗܰܝܡܳܢܽܘܬܳܐ܆ ܕܰܫܪܳܪܳܐ ܚܙܰܝܢܳܝܗ̱ܝ ܠܰܐܒܳܐ ܒܰܒܪܳܐ ܕܡܶܢܶܗ܆ ܦܰܪܰܩܠܺܝܛܳܐ܆ ܪܽܘܚ ܩܽܘܕܫܳܐ ܫܡܳܗ̈ܶܐ ܬܠܳܬܳܐ ܚܰܕ ܐܰܠܳܗܳܐ܆ ܠܗܳܢܳܐ ܚܙܳܐ ܗ̱ܘܳܐ ܟܺܐܢܳܐ ܕܳܢܺܝܐܶܝܠ܆ ܟܰܕ ܝܳܗܶܒ ܗ̱ܘܳܐ ܫܽܘܠܛܳܢܳܐ ܠܰܒܪܶܗ܆ ܘܟܽܘܪ̈ܣܰܘܳܬܳܐ܆ ܚܙܳܐ ܗ̱ܘܳܐ ܘܠܰܬܠܺܝܬܳܝܽܘܬܳܐ ܘܰܟܪ̈ܽܘܒܶܐ ܘܰܣܪ̈ܳܦܶܐ܆ ܩܳܥܶܝܢ ܠܶܗ ܩܰܕܺܝܫ ܩܰܕܺܝܫ܆ ܩܰܕܺܝܫ ܡܳܪܝܳܐ܆ ܒܪܺܝܟ ܐܺܝܩܳܪܳܟ ܡܶܢ ܐܰܬܪܳܟ܆ ܗ̄ ܒܟܽܠ ܥܶܕܳܢܺܝ̈ܢ܀

ܫܽܘܒܚܳܐ

ܬܳܐ ܚܰܙܩܺܝܐܶܝܠ܆ ܒܰܕܶܩ ܠܰܢ ܥܰܠ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ܆ ܕܰܟܕܺܝܢܺܝ̈ܢ ܒܳܗ̇܆ ܚܰܝ̈ܘܳܬܳܐ ܘܺܐܝܬ ܒܳܗ̇ ܓܺܝ̈ܓܠܶܐ ܡܰܠܳܠܴ̈ܬܳܐ܆ ܡܶܢ ܚܰܕ ܓܰܒܳܐ܆ ܟܕܺܝܢ ܐܰܪܝܳܐ ܘܬܰܘܪܳܐ܆ ܒܓܰܒܳܐ ܐ̱ܚܪܺܢܳܐ ܢܶܫܪܳܐ ܘܒܰܪܢܳܫܳܐ܆ ܘܰܠܥܶܠ ܡܶܢܗܽܘܢ܆ ܝܳܬܶܒ ܗܰܘ ܒܪܳܐ ܕܰܐܠܳܗܳܐ܆ ܕܰܨܒܳܐ ܘܰܠܒܶܫ ܦܰܓܪܳܐ܆ ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܆ ܘܰܒܝܽܘܡ ܝܰܠܕܶܗ܆ ܦܪܰܩ ܒܶܪ̈ܝܳܬܳܐ ܡܶܢ ܛܽܘܥܝܰܝ܆ ܗ̄ ܠܶܗ ܬܶܫܒܽܘܚܬܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܝܰܘܡܳܢܳܐ ܐܳܦ ܐܶܫܰܥܝܳܐ܆ ܢܶܚܕܶܐ ܘܢܶܙܡܰܪ ܬܶܫܒܽܘܚܬܳܐ܆ ܕܗܳܐ ܒܬܽܘܠܬܳܐ ܡܰܪܝܰܡ ܝܶܠܕܰܬ܆ ܥܰܡܰܢܽܘܐܺܝܠ ܘܰܚܬܺܝܡܳܐ܆ ܝܰܘܡܳܢܳܐ ܙܟܰܪܝܳܐ ܢܶܪܘܰܙ܆ ܕܗܳܐ ܕܶܢܚܳܐ ܕܰܐܟܪܶܙ ܐܶܬܳܐ܆ ܘܰܒܢܽܘܗܪܳܐ ܕܕܶܢܚܶܗ ܐܰܢܗܰܪ܆ ܠܥܰܡ̱̈ܡܶܐ ܕܰܚܫܶܟܘ ܒܰܚܛܺܝܬܳܐ܀

ܫܽܘܒܚܳܐ ܠܶܗ ܕܰܒܝܽܘܡ ܝܰܠܕܶܗ܆ ܐܶܬܳܐ ܘܫܰܡܠܺܝ ܡܶܠܰܝ̈ܗܽܘܢ܆ ܕܰܢܒܺܝ̈ܶܐ ܕܶܐܬܢܰܒܺܝܘ ܠܶܗ܆ ܘܙܰܕܺܝ̈ܩܶܐ ܕܨܳܪܘ ܕܶܡ̈ܘܳܬܶܗ܆ ܫܽܘܒܚܳܐ ܠܶܗ ܕܰܗܘܳܐ ܐ̱ܢܳܫܳܐ܆ ܟܰܕ ܐܰܠܳܗܰܐ ܗ̱ܘ ܒܰܫܪܳܪܳܐ܆ ܫܽܘܒܚܳܐ ܠܶܗ ܘܠܰܐܒܳܐ ܕܫܰܠܚܶܗ܆ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܥܺܐܕܳܐ ܕܝܰܠܕܶܗ ܕܡܳܪܰܢ ܕܒܰܒܣܰܪ