ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܡܰܠܰܐܟܳܐ ܕܢܽܘܗܪܳܐ ܘܕܰܪܘܳܙܳܐ

ܡܰܠܰܐܟܳܐ ܕܢܽܘܗܪܳܐ ܘܕܰܪܘܳܙܳܐ܆ ܐܶܬܚܰܘܺܝ ܗ̱ܘܳܐ ܠܪ̈ܳܥܰܘܳܬܳܐ܆ ܘܚܰܕܽܘܬܳܐ ܣܰܒܰܪ ܗ̱ܘܳܐ ܐܶܢܽܘܢ܆ ܕܶܐܬܺܝܠܶܕ ܠܟܽܘܢ ܦܳܪܽܘܩܳܐ܆ ܒܒܶܝܬ ܠܚܶܡ ܗܳܝ ܕܺܝܗܽܘܕܳܐ܀

ܠܳܐ ܐܶܫܟܰܚ ܡܽܘܫܶܐ ܕܢܶܚܙܶܝܘܗ̱ܝ܆ ܠܰܐܠܳܗܳܐ ܐܰܝܟܰܢ ܕܰܒܥܳܐ܆ ܡܓܽܘ̈ܫܶܐ ܐܶܬܰܘ ܘܰܚܙܰܐܽܘܗ̱ܝ܆ ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ܆ ܘܝܰܩܰܪܘ ܡܰܘܠܳܕܶܗ܀

ܝܰܘܡܳܢܳܐ ܫܰܝܢܳܐ ܘܰܫܠܳܡܳܐ܆ ܥܺܝܪ̈ܰܝ ܪܰܘܡܳܐ ܣܰܒܰܪܘ ܒܰܐܪܥܳܐ܆ ܘܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ܆ ܘܣܰܒܪܳܐ ܛܳܒܳܐ ܠܐ̱ܢܳܫܽܘܬܳܐ܆ ܒܝܽܘܡ ܝܰܠܕܶܗ ܕܰܒܪܳܐ܀

ܝܰܒܶܒܘ ܗ̱ܘܰܘ ܟܶܢ̈ܫܶܐ ܥܶܠܳܝ̈ܶܐ܆ ܘܰܐܘܕܺܝܘ ܘܫܰܒܰܚܘ ܠܝܰܠܕܳܐ ܣܓܺܝܕܳܐ܆ ܕܰܒܝܰܠܕܶܗ ܫܰܝܶܢ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ܆ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܰܕܺܝܫܳܐ ܕܰܐܫܪܺܝ ܫܟܺܝܢܬܶܗ

ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ: ܓܰܢ̱ܒܳܪܳܐ ܕܟܽܠ ܒܶܪ̈ܝܳܬܳܐ: ܘܪ̈ܳܥܰܘܳܬܳܐ ܘܰܡܓܽܘ̈ܫܶܐ: ܩܰܪܶܒܘ ܗ̱ܘܰܘ ܠܶܗ ܩܽܘܪ̈ܒܳܢܶܐ܀

ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ: ܐܶܬܺܝܠܶܕ ܡܰܠܟܳܐ ܡܫܺܝܚܳܐ: ܘܡܰܠܰܐܟ̈ܶܐ ܘܪ̈ܳܥܰܘܳܬܳܐ: ܘܰܡܓܽܘ̈ܫܶܐ ܐ̱ܬܰܘ ܠܺܐܝܩܳܪܶܗ܀

ܝܰܘܡܳܢ ܐܶܬܺܝܠܶܕ ܝܰܠܕܳܐ: ܕܺܐܝܬܰܘܗ̱ܝ ܓܰܢ̱ܒܳܪܳܐ ܕܥܳܠ̈ܡܶܐ: ܐܰܟܡܳܐ ܕܶܐܬܢܰܒܺܝ ܗ̱ܘܳܐ ܥܠܰܘܗ̱ܝ: ܐܶܫܰܥܝܳܐ ܢܒܺܝܳܐ ܡܫܰܒܚܳܐ܀

ܡܳܪܳܐ ܕܶܐܬܬܰܚܬܺܝ ܒܚܽܘܒܶܗ: ܨܶܝܕ ܥܰܒܕܰܘ̈ܗ̱ܝ ܘܰܣܥܰܪ ܐܶܢܽܘܢ: ܣܥܽܘܪ ܡܳܪܝ ܐܳܦ ܠܰܢ ܒܰܚܢܳܢܳܟ: ܘܰܥܨܽܘܒ ܐܶܢܶܝܢ ܠܢܰܦ̈ܫܳܬܰܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܪ̈ܰܚܡܰܝܟ ܡܳܪܝ ܣܰܓܺܝ̈ܶܐܐ

ܒܝܰܠܕܶܗ ܕܺܝܚܺܝܕܳܝܳܐ܆ ܐܶܬܰܘ ܡܓܽܘ̈ܫܶܐ ܡܶܢ ܦܳܪܶܣ ܘܥܰܠܘ ܗ̱ܘܰܘ ܘܰܣܓܶܕܘ ܠܶܗ܆ ܒܰܡܥܰܪܬܳܐ ܕܰܒܒܶܝܬ ܠܚܶܡ܀

ܒܰܡܥܰܪܬܳܐ ܒܒܶܝܬ ܠܚܶܡ܆ ܬܰܡܳܢ ܐܶܬܺܝܠܶܕ ܡܳܪܰܢ ܡܶܛܽܠ ܦܽܘܪܩܳܢܰܢ܆ ܘܚܰܪܰܪ ܠܰܢ ܡܶܢ ܛܳܥܝܽܘܬܳܐ܀

ܚܰܕܳܐ ܡܳܪܝ ܘܰܐܦܨܰܚ ܠܰܢ܆ ܒܗܳܢܳܐ ܝܰܘܡܳܐ ܕܡܰܘܠܳܕܳܟ܆ ܘܚܰܣܳܐ ܠܰܢ ܚܰܘ̈ܒܰܝܢ܆ ܘܗܰܒܠܰܢ ܫܰܝܢܳܐ ܘܰܫܠܳܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫ̈ܡܰܝܳܢܶܐ

ܠܩܳܠ ܢܽܘܨܪ̈ܳܬܳܗ̇ ܕܒܰܪ̱ܬ ܕܰܘܺܝܕ܆ ܙܳܚܘ ܘܰܢܚܶܬܘ ܥܺܝܪ̈ܶܐ܆ ܟܰܕ ܩܳܥܶܝܢ ܩܰܕܺܝܫ ܩܰܕܺܝܫ܆ ܠܡܳܪܝܳܐ ܕܶܐܬܺܝܠܶܕ܀

ܒܪܺܝܟܽ ܗ̱ܘ ܡܰܘܠܳܕܳܟ ܕܰܐܦܨܰܚ܆ ܠܰܐܪܥܳܐ ܘܠܰܫܡܰܝܳܐ܆ ܘܠܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܫܽܘܒܚܳܐ ܠܫܳܠܽܘܚܳܟ܀

ܝܰܘܡܳܢ ܪ̈ܳܘܙܳܢ ܥܺܕ̈ܳܬܳܐ܆ ܘܚܳܕ̈ܝܳܢ ܕܰܝܪ̈ܳܬܳܐ܆ ܒܝܰܠܕܳܟ ܓܰܐܝܳܐ ܘܰܫܒܺܝܚܳܐ܆ ܘܙܳܡܪ̈ܳܢ ܬܶܫܒܽܘܚܬܳܐ܀

ܫܽܘܒܚܳܐ ܠܛܳܒܳܐ ܕܰܒܪ̈ܰܚܡܰܘܗ̱ܝ܆ ܐܶܬܳܐ ܠܡܰܘܠܳܕܳܐ܆ ܘܡܶܢ ܒܰܪ̱ܬ ܕܰܘܺܝܕ ܐܶܬܒܰܣܰܪ܆ ܕܢܶܦܪܽܘܩ ܒܶܪ̈ܝܳܬܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܝܰܘܡܳܢ ܐܶܬܺܝܠܶܕ ܝܰܠܕܳܐ: ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ: ܘܰܫܡܶܗ ܐܶܬܩܪܺܝ ܕܽܘܡܳܪܳܐ: ܐܰܟܡܳܐ ܕܰܐܡܺܝܪ ܒܰܢܒܺܝܳܐ܀

ܕܢܰܚ ܠܶܗ ܢܽܘܗܪܳܐ ܕܡܰܠܟܽܘܬܳܐ: ܒܳܐܦܰܪܬܳܐ ܩܽܘܪܝܰܬ ܕܰܘܺܝܕ: ܒܽܘܪܟܬܳܐ ܕܒܰܪܶܟ ܗ̱ܘܳܐ ܝܰܥܩܽܘܒ: ܝܰܘܡܳܢܳܐ ܗܘܳܐ ܫܽܘܠܡܳܗ̇܀

ܐܳܕܳܡ ܠܶܗ ܗܽܘ ܣܰܟܺܝ ܗ̱ܘܳܐ: ܕܗܽܘܝܽܘ ܡܳܪܳܐ ܕܰܟܪ̈ܽܘܒܶܐ: ܘܗܽܘ ܡܨܶܐ ܗ̱ܘܳܐ ܕܢܰܥܶܠ ܢܰܫܪܶܝܘܗ̱ܝ: ܥܰܠ ܣܰܘ̈ܟܰܘܗ̱ܝ ܕܺܐܝܠܳܢ ܚܰܝ̈ܶܐ܀

ܝܰܘܡܳܢܳܐ ܛܰܒܥܰܬ ܢܰܦܫܳܗ̇: ܐܰܠܳܗܽܘܬܳܐ ܡܪܰܝܰܡܬܳܐ: ܕܬܶܨܛܰܒܰܬ ܐܳܦ ܐ̱ܢܳܫܽܘܬܳܐ: ܒܓܰܘ ܛܰܒܥܳܐ ܕܰܐܠܳܗܽܘܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܒܶܕ ܡܳܪܝ ܕܽܘܟܪܳܢܳܐ

ܒܗܳܢܳܐ ܝܰܘܡܳܐ ܐܶܬܺܝܠܶܕ܆ ܦܳܪܽܘܩܰܢ ܒܓܰܘ ܒܶܝܬ ܠܚܶܡ܆ ܘܰܢܓܰܕ ܡܓܽܘ̈ܫܶܐ ܠܺܐܝܩܳܪܶܗ܆ ܢܩܰܪܒܽܘܢ ܠܶܗ ܩܽܘܪ̈ܒܳܢܰܝܗܽܘܢ܀

ܥܠܰܝܟ ܐܶܬܢܰܒܺܝ ܕܳܢܺܝܐܶܝܠ܆ ܒܟܺܐܦܳܐ ܓܙܺܝܪܬܳܐ ܕܠܳܐ ܒܺܐܝ̈ܕܺܝܢ܆ ܕܰܕܠܳܐ ܢܶܩܦܳܐ ܕܙܽܘܘܳܓܳܐ܆ ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܀

ܠܳܟ ܗ̱ܽܘ ܚܙܳܐ ܗ̱ܘܳܐ ܚܰܙܩܺܝܐܶܝܠ܆ ܒܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ܆ ܕܡܽܘܬܳܐ ܕܰܐܪܝܳܐ ܘܰܕܬܰܘܪܳܐ܆ ܘܰܕܢܶܫܪܳܐ ܘܰܕܒܰܪܢܳܫܳܐ܀

ܝܰܘܡܳܢܳܐ ܛܰܒܥܰܬ ܢܰܦܫܳܗ̇܆ ܐܰܠܳܗܽܘܬܳܐ ܒܐ̱ܢܳܫܽܘܬܳܐ܆ ܕܬܶܨܛܰܒܰܬ ܐܳܦ ܐ̱ܢܳܫܽܘܬܳܐ܆ ܒܓܰܘ ܛܰܒܥܳܐ ܕܰܐܠܳܗܽܘܬܳܐ܀

ܒܪܺܝܟܽ ܗ̱ܘ ܕܰܢܚܶܬ ܡܶܢ ܪܰܘܡܳܐ܆ ܘܰܫܪܳܐ ܒܓܰܘ ܟܰܪܣܳܐ ܕܒܶܣܪܳܐ܆ ܘܰܐܝܟ ܒܰܪܢܳܫܳܐ ܐܶܬܺܝܠܶܕ܆ ܕܠܳܐ ܙܽܘܘܳܓ ܩܰܕܺܝܫܳܐܺܝܬ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܗܰܘ ܕܰܡܬܰܪܣܶܐ ܠܟܽܠ ܒܶܪ̈ܝܳܢ܆ ܒܦܽܘܩܕܳܢܳܐ ܕܒܳܪܽܘܝܽܘܬܶܗ܆ ܚܰܠܒܳܐ ܝܺܢܶܩ ܡܶܢ ܡܰܪܝܰܡ܆ ܕܰܫܦܰܪ ܠܶܗ ܘܰܗܘܳܐ ܐ̱ܢܳܫܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܛܶܥܢܰܬ ܢܰܨܪܰܬ ܐܳܦ ܚܰܒܒܰܬ܆ ܒܩ̈ܳܠܶܐ ܪ̈ܚܺܝܡܶܐ ܟܰܕ ܡܰܘܕܝܳܐ܆ ܠܥܽܘܠܳܐ ܣܶܓܕܰܬ ܟܰܕ ܐܳܡܪܳܐ܆ ܦܩܽܘܕ ܪܰܒܽܘܠܺܝ ܐܶܥܰܦܩܳܟ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܐܰܝܟ ܝܰܠܽܘܕܳܐ ܕܢܰܚܬ ܡܶܢ ܥܽܘܒܝ܆ ܘܰܐܝܟ ܓܰܢ̱ܒܳܪܳܐ ܡܶܬܥܰܫܢܰܬ܆ ܕܽܘܡܳܪܳܐ ܐܰܢ̱ܬ ܒܰܫܪܳܪܳܐ܆ ܐܰܝܟ ܕܶܐܬܢܰܒܺܝ ܐܶܫܰܥܝܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܰܠܚܶܗ ܐܰܒܳܐ ܠܺܝܚܺܝܕܶܗ܆ ܕܠܳܐܕܳܡ ܨܰܠܡܶܗ ܢܶܦܪܽܘܩ ܗ̱ܘܳܐ܆ ܘܰܢܚܶܬ ܘܰܢܣܰܒ ܠܶܗ ܦܰܓܪܳܐ܆ ܘܒܶܗ ܦܰܪܩܶܗ ܘܶܐܬܚܰܕܰܬ ܒܶܗ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܒܡܰܘܠܳܕܶܗ ܕܡܰܠܟܳܐ ܡܫܺܝܚܳܐ܆ ܚܳܕܶܝܢ ܥܺܝܪ̈ܶܐ ܘܡܰܠܰܐܟ̈ܶܐ܆ ܘܕܳܝܨܺܝܢ ܟܶܢ̈ܫܶܐ ܕܰܐܪ̈ܥܳܢܶܐ܆ ܕܰܒܝܰܠܕܶܗ ܐܰܦܨܰܚ ܐܶܢܽܘܢ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܥܰܡ ܟܶܢ̈ܫܶܐ ܫܡܰܝ̈ܳܢܶܐ

ܒܒܶܝܬ ܠܚܶܡ ܕܺܝܗܽܘܕܳܐ܆ ܐܶܬܺܝܠܶܕ ܠܰܢ ܝܰܠܕܳܐ ܕܕܽܘܡܳܪܳܐ܆ ܘܰܟܪܰܟܬܶܗ ܒܬܽܘܠܬܳܐ ܒܥܰܙܪܽܘܪ̈ܶܐ܆ ܘܒܽܐܘܪܝܳܐ ܣܳܡܬܶܗ ܐܰܝܟ ܫܰܒܪܳܐ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ ܚܰܕ̱ܬܳܐ ܘܦܰܐܝܳܐ܆ ܪܥܶܡ ܒܰܡܥܰܪܬܳܐ ܒܝܰܘܡܳܐ ܕܡܰܘܠܳܕܳܟ܆ ܕܡܰܠܰܐܟ̈ܶܐ ܘܰܕܪ̈ܳܥܰܘܳܬܳܐ܆ ܘܰܕܝܰܘܣܶܦ ܕܰܚܙܰܘ ܡܰܘܠܳܕܳܟ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܓܽܘ̈ܫܶܐ ܦܬܰܚܘ ܣܺܝ̈ܡܳܬܗܽܘܢ܆ ܩܽܘܕܡܰܬ ܡܰܠܟܳܐ ܕܺܝܠܺܝܕ ܒܰܡܥܰܪܬܳܐ܆ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܩܽܘܪ̈ܒܳܢܶܐ ܬܠܳܬܳܐ ܩܰܪܶܒܘ ܠܶܗ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܝܰܘܡܳܢܳܐ ܚܰܕܽܘܬܳܐ܆ ܘܰܦܨܺܝܚܽܘܬܳܐ ܠܟܽܠܗܶܝܢ ܒܶܪ̈ܝܳܬܳܐ܆ ܕܰܐܠܳܗܳܐ ܗܘܳܐ ܒܰܪܢܳܫܳܐ܆ ܘܰܦܪܰܩ ܐܶܢܶܝܢ ܡܶܢ ܛܽܘܥܝܰܝ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ܆ ܩܥܰܘ ܥܶܠܳܝ̈ܶܐ ܠܰܒܪܳܐ ܕܡܶܢ ܐܰܒܳܐ܆ ܕܰܒܚܰܪܬܳܐ ܕܙܰܒ̈ܢܶܐ ܐܶܬܺܝܠܶܕ܆ ܘܠܳܐ ܗ̱ܘܳܐ ܬܪܶܝܢ ܐܶܠܳܐ ܚܰܕ ܗ̱ܽܘ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܕܰܡ̈ܟܶܐ

ܢܚܶܬܘ ܡܰܠܰܐܟ̈ܶܐ ܡܶܢ ܪܰܘܡܳܐ ܠܺܐܝܩܳܪ ܡܳܪܗܽܘܢ: ܘܣܰܒܰܪܘ ܗ̱ܘܰܘ ܠܪ̈ܳܥܰܘܳܬܳܐ: ܕܶܐܬܺܝܠܶܕ ܠܟܽܘܢ ܦܳܪܽܘܩܳܐ: ܒܒܶܝܬ ܠܚܶܡ ܡܕܺܝܢ̱ܬܳܐ ܕܺܝܗܽܘܕܳܐ܀

ܡܰܢܰܥܘ ܗ̱ܘܰܘ ܪ̈ܳܥܰܘܳܬܳܐ ܠܓܰܘ ܒܶܝܬ ܠܚܶܡ: ܘܰܚܙܰܘ ܥܽܘܠܳܐ ܕܣܺܝܡ ܒܽܐܘܪܝܳܐ: ܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ: ܟܰܕ ܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ܀

ܫܡܰܝܳܐ ܘܰܐܪܥܳܐ ܘܟܽܠ ܒܶܪ̈ܝܳܢ ܙܳܡܪܺܝܢ ܫܽܘܒܚܳܐ: ܠܒܰܪ ܐܰܠܳܗܳܐ ܕܶܐܬܺܝܠܶܕ: ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܡܓܽܘ̈ܫܶܐ ܒܩܽܘܪ̈ܒܳܢܶܐ ܣܓܶܕܘ ܠܶܗ ܠܒܰܪ ܐܰܠܳܗܳܐ: ܦܬܰܚܘ ܣܺܝ̈ܡܳܬܗܽܘܢ ܘܩܰܪܶܒܘ ܠܶܗ: ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ: ܘܰܗܦܰܟܘ ܗ̱ܘܰܘ ܘܶܐܙܰܠܘ ܟܰܕ ܚܳܕܶܝܢ܀

ܫܡܰܝ̈ܳܢܶܐ ܘܰܐܪܥܳܢܳܝܶܐ ܙܡܰܪܘ ܠܶܗ ܫܽܘܒܚܳܐ: ܠܰܐܠܳܗܳܐ ܕܶܐܬܳܐ ܒܚܽܘܒܶܗ: ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܘܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܓܰܘ ܒܶܝܬ ܠܚܶܡ ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܐܰܠܳܗܳܐ ܘܒܰܪ ܐܰܠܳܗܳܐ: ܡܰܠܟܶܗ ܓܰܐܝܳܐ ܕܺܐܝܣܪܳܐܶܝܠ: ܘܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܓܰܘ ܒܶܝܬ ܠܚܶܡ ܐܶܬܺܝܠܶܕ ܐܶܡܰܪ ܢܒܺܝܳܐ: ܕܒܰܟܬܳܒܳܐ ܡܳܢܶܐ ܠܥܰܡܶܗ: ܘܦܳܪܶܩ ܠܶܗ ܡܶܢ ܛܳܥܝܽܘܬܳܐ: ܘܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܕܽܘܡܳܪܳܐ ܐܺܝܬܰܘܗ̱ܝ ܒܰܛܢܳܟ ܒܰܪ ܐܰܠܳܗܳܐ: ܘܬܶܗܪܳܐ ܪܰܒܳܐ ܡܰܘܠܳܕܳܟ: ܘܪܳܡ ܡܶܢ ܗܰܘ̈ܢܶܐ ܐ̱ܢܳܫܳܝ̈ܶܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܫܽܘܒܚܳܐ ܠܳܟ ܡܫܺܝܚܳܐ

ܒܥܺܐܕܳܟ ܩܰܕܺܝܫܳܐ܆ ܒܝܰܠܕܳܟ ܢܰܨܺܝܚܳܐ܆ ܚܳܕ̈ܝܳܢ ܒܶܪ̈ܝܳܬܳܐ܆ ܘܣܳܓ̈ܕܳܢ ܠܺܐܝܬܽܘܬܳܟ܆ ܡܫܺܝܚܳܐ ܐܰܠܳܗܳܐ ܕܥܰܠ ܟܽܠ܀

ܬܶܫܒܽܘܚܬܳܐ ܒܪܰܘܡܳܐ܆ ܩܥܰܘ ܗ̱ܘܰܘ ܡܰܠܰܐܟ̈ܶܐ܆ ܠܰܐܠܳܗܳܐ ܕܫܰܝܶܢ܆ ܪܰܘܡܳܐ ܐܳܦ ܥܽܘܡܩܳܐ܆ ܒܝܽܘܡ ܡܰܘܠܳܕܶܗ ܩܰܕܺܝܫܳܐ܀

ܥܰܠܘ ܗ̱ܘܰܘ ܘܰܣܓܶܕ ܠܶܗ܆ ܡܓܽܘ̈ܫܶܐ ܒܩܽܘܪ̈ܒܳܢܶܐ܆ ܟܰܕ ܩܳܥܶܝܢ ܘܳܐܡܪܺܝܢ܆ ܫܽܘܒܚܳܐ ܘܺܐܝܩܳܪܳܐ܆ ܠܡܰܠܟܳܐ ܡܫܺܝܚܳܐ ܕܶܐܬܺܝܠܶܕ܀

ܫܽܘܒܚܳܐ

ܡܓܽܘ̈ܫܶܐ ܡܶܢ ܦܳܪܶܣ܆ ܐܶܬܰܘ ܒܩܽܘܪ̈ܒܳܢܶܐ܆ ܐܳܦ ܪ̈ܳܥܰܘܳܬܳܐ܆ ܩܰܪܶܒܘ ܣܶܓ̈ܕܳܬܳܐ܆ ܘܝܰܘܣܶܦ ܟܰܕ ܙܳܡܰܪ ܫܽܘܒܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܓܕܺܝܢܰܢ ܠܰܨܠܺܝܒܳܟ

ܒܒܶܝܬ ܠܚܶܡ ܒܰܡܥܰܪܬܳܐ܆ ܝܶܠܕܰܬ ܡܰܪܝܰܡ ܠܒܰܪ ܐܰܠܳܗܳܐ܆ ܘܰܡܓܽܘ̈ܫܶܐ ܐ̱ܬܰܘ ܠܺܐܝܩܳܪܶܗ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܠܥܶܠ ܡܶܢ ܒܽܘܪ̈ܟܶܝܗ̇ ܛܥܶܢܬܶܗ܆ ܡܰܪܝܰܡ ܠܒܰܪ ܐܰܠܳܗܳܐ܆ ܘܚܰܠܒܳܐ ܕܰܟܝܳܐ ܐܰܝܢܶܩܬܶܗ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܛܥܺܝܢܳܐ ܠܶܗ ܒܬܽܘܠܬܳܐ ܡܰܪܝܰܡ܆ ܠܗܰܘ ܕܰܛܥܺܝܢ ܠܶܗ ܠܰܪܩܺܝܥܳܐ܆ ܘܰܡܢܰܨܪܳܐ ܠܶܗ ܥܰܠ ܒܽܘܪ̈ܟܶܝܗ̇܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ

ܫܽܘܒܚܳܐ ܠܶܗ ܠܗܰܘ ܕܶܐܬܳܐ܆ ܘܰܗܘܳܐ ܡܶܢܰܢ ܐܰܟܘܳܬܰܢ܆ ܘܫܰܩܠܰܢ ܠܰܢ ܘܰܗܘܰܝܢ ܕܺܝܠܶܗ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ
ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ. ܬܰܘ ܢܺܐܙܰܠ

ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ܆ ܬܰܘ ܢܺܐܙܰܠ ܢܶܬܒܰܩܶܐ ܒܶܗ܆ ܒܩܰܫܺܝܫ ܡܶܢ ܕܳܪ̈ܶܐ ܕܰܒܥܰܙܪܽܘܪ̈ܶܐ ܟܪܺܝܟ܆ ܣܳܒܳܐ ܥܰܬܺܝܩ ܝܰܘ̈ܡܳܬܳܐ ܕܺܝܠܶܕܬܶܗ ܒܬܽܘܠܬܳܐ܆ ܓܰܢ̱ܒܳܪܳܐ ܕܰܬܩܰܠ ܛܽܘܪ̈ܶܐ ܘܙܰܝܰܚܬܶܗ ܥܠܰܝܡܬܳܐ܆ ܗܽܘ ܝܳܗܶܒ ܠܰܚܡܳܐ ܠܟܰܦ̈ܢܶܐ܆ ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ܆ ܒܪܳܐ ܕܠܰܝܬ ܗ̱ܘܳܐ ܠܶܗ ܫܽܘܪܳܝܳܐ܆ ܨܒܳܐ ܘܰܗܘܳܐ ܠܶܗ ܫܽܘܪܳܝܳܐ ܘܶܐܬܳܐ ܠܡܰܘܠܳܕܳܐ ܘܫܽܘܠܳܡܳܐ ܠܰܝܬ ܠܶܗ܀

ܫܽܘܒܚܳܐ

ܦܐܶܐ ܗ̱ܘܳܐ ܘܰܪܓܺܝܓ ܗܰܘ ܩܳܠܳܐ܆ ܕܢܰܨܰܪܬܶܗ ܒܬܽܘܠܬܳܐ ܡܰܪܝܰܡ܆ ܠܰܒܪܳܐ ܕܰܐܠܳܗܳܐ ܒܰܡܥܰܪܬܳܐ ܕܒܶܝܬ ܠܚܶܡ܆ ܬܳܐ ܒܰܫܠܳܡ ܒܰܪ ܡܰܠܟܽܘܬܳܐ ܕܡܶܢ ܪܰܘܡܳܐ ܐܶܫܬܠܰܚ܆ ܬܳܐ ܒܰܫܠܳܡ ܒܰܪ ܥܰܬܺܝܪܳܐ ܕܡܶܣܟܺܢܽܘܬܳܐ ܪܚܶܡ܆ ܬܳܐ ܒܰܫܠܳܡ ܐܳܘ ܒܰܪ ܕܰܘܺܝܕ܆ ܘܰܒܪܶܗ ܚܰܝܳܐ ܕܰܐܠܳܗܳܐ܆ ܐܰܒܽܘܟ ܕܺܝܠܳܟ ܒܰܫܡܰܝܰܐ ܗ̱ܘ܆ ܘܡܶܢ ܡܰܠܰܐܟ̈ܶܐ ܡܶܫܬܰܡܰܫ܆ ܫܽܘܒܚܳܐ ܠܡܽܘܟܳܟܳܟ ܦܳܪܽܘܩܶܗ ܕܥܳܠܡܳܐ܀

ܡܶܢ ܥܳܠܰܡ

ܐܰܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ. ܘܫܰܢܺܝܘ ܡ̣ܶܢ ܚܰܝ̈ܶܐ ܕܙܰܒܢܳܐ. ܥܰܕ ܗܳܘܶܐ ܝܰܘܡܳܐ: ܕܰܩܝܳܡܬܳܐ ܕܕܰܡ̈ܟܶܐ. ܐܰܢܺܝܚ ܡܳܪܝܳܐ ܠܢܰܦ̈ܫܳܬܗܽܘܢ ܒܰܐܘܳܢ̈ܶܐ ܕܢܽܘܗܪܳܐ. ܘܢܶܪܓܫܽܘܢ ܒܩܰܒܪ̈ܶܐ ܓܰܪ̈ܡܰܝܗܽܘܢ ܒܝܰܘܡܳܐ ܕܥܽܘܗܕܳܢܗܽܘܢ. ܡܳܐ ܕܰܡܢܰܚܶܡ ܦܽܘܩܕܳܢܳܟ. ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܢܶܬܥܰܛܦܽܘܢ ܙܺܝܘܳܐ ܘܗܶܕܪܳܐ. ܘܢܶܥܠܽܘܢ ܥܰܡܳܟ ܠܰܓܢܽܘܢܳܐ܆ ܘܢܰܣܩܽܘܢ ܠܳܟ ܫܽܘܒܚܳܐ. ܕܰܐܢ̱ܬ ܗ̣ܽܘ ܡܢܰܚܡܳܢܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܐܺܝܢ ܕܰܘܺܝܕ ܢܰܨܺܝܚܳܐ ܢܒܺܝܳܐ ܕܪܽܘܚܳܐ

ܟܰܘܟܰܒ ܢܽܘܗܪܳܐ ܕܢܰܚ ܗ̱ܘܳܐ ܒܶܝܬ ܡܳܝܽܘ̈ܬܶܐ܆ ܘܣܰܒܰܪ ܐܶܢܽܘܢ ܕܶܐܬܺܝܠܶܕ ܡܳܪܝܳܐ ܘܦܳܪܽܘܩܳܐ܆ ܛܥܶܢܘ ܫܰܪܺܝܪ̈ܶܐ ܕܳܫ̈ܢܶܐ ܡܶܢ ܓܰܘ ܦܳܪܶܣ܆ ܘܩܰܪܶܒܘ ܠܶܗ ܕܠܳܐ ܦܽܘܠܳܓܳܐ ܒܽܐܘܪܝܳܐ ܕܒܶܝܬ ܠܚܶܡ܆ ܚܙܰܘ ܫܽܘܒܚܶܗ ܕܒܰܡܥܰܪܬܳܐ ܫܪܳܐ ܗ̱ܘܳܐ܆ ܘܥܰܙܪܽܘܪ̈ܶܐ ܘܢܽܘܪܳܐ ܟܪܺܝܟܳܐ ܠܶܗ܆ ܘܝܰܗ̱ܒܘ ܬܶܫܒܽܘܚܬܳܐ ܠܰܐܠܳܗܳܐ ܘܰܗܦܰܟܘ ܟܰܕ ܚܳܕܶܝܢ܀

ܫܽܘܒܚܳܐ

ܫܡܰܝܳܐ ܘܰܐܪܥܳܐ ܬܶܗܪܰܬ ܐܳܘ ܚܰܒܺܝ̈ܒܰܝ܆ ܒܢܽܘܪܳܐ ܕܢܶܚܬܰܬ ܡܶܢ ܪܰܘܡܳܐ ܘܰܫܪܳܬ ܒܓܰܘ ܟܰܪܣܳܐ܆ ܡܶܢ ܐܶܕܢܳܐ ܩܰܒܶܠܬܶܗ ܟܰܪܣܳܐ ܕܒܶܣܪܳܐ܆ ܢܦܰܩ ܡܶܢ ܡܰܪܒܥܳܐ ܕܠܳܐ ܚܒܳܠܳܐ ܘܰܐܒܗܶܬ ܠܟܳܦܽܘܪ̈ܶܐ܆ ܫܽܘܒܚܳܐ ܠܶܗ ܕܰܟܡܳܐ ܐܶܬܡܰܟܰܟ܆ ܫܽܘܒܚܳܐ ܠܶܗ ܕܰܗܘܳܐ ܒܰܪܢܳܫܳܐ܆ ܫܽܘܒܚܳܐ ܠܶܗ ܕܰܦܪܰܩ ܠܥܺܕܬܶܗ ܘܗܳܐ ܙܳܡܪܳܐ ܫܽܘܒܚܳܐ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢ̱ܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢ̱ܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢ̱ܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢ̱ܬܽܘܢ. ܡܢܰܚܡܳܢܳܐ ܕܝܰܠ̈ܕܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܦܶܬܓܳܡܳܐ: ܘܰܠܨܶܗܝܽܘܢ ܐܶܬܶܐܡܰܪ ܕܓܰܒܪܳܐ ܓܰܢ̱ܒܳܪܳܐ ܐܶܬܺܝܠܶܕ ܒܳܗ̇ ܘܗܽܘ ܐܰܬܩܢܳܗ̇ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܗܰܠܶܠܘ ܗܰܠܶܠܘ ܗܰܠܶܠܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܗܰܠܠܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀

ܒܗܳܢܳܐ ܝܰܘܡܳܐ ܓܰܢܬܳܐ ܬܶܪܘܰܙ ܥܰܡ ܐܺܝ̈ܠܳܢܶܝܗ̇܆ ܕܝܰܘܡܳܢ ܐܶܬܦܢܺܝ ܝܳܪܬܳܐ ܛܪܺܝܕܳܐ ܠܰܥܕܶܢ ܐܰܬܪܶܗ܆ ܒܗܳܢܳܐ ܝܰܘܡܳܐ ܢܶܚܕܽܘܢ ܥܰܡ̱̈ܡܶܐ ܕܰܒܟܽܠ ܦܶܢ̈ܝܳܢ܆ ܕܰܡܒܰܕܪܺܝܢ ܗ̱ܘܰܘ ܥܰܠ ܟܽܠ ܛܽܘܪ̈ܺܝܢ ܕܒܳܟ ܐܶܬܟܰܢܰܫܘ܀

ܒܗܳܢܳܐ ܝܰܘܡܳܐ ܕܶܐܫܬܰܡܰܫ ܗ̱ܘܳܐ ܒܰܫ̈ܡܰܝܳܢܶܐ܆ ܒܶܗ ܬܶܫܒܽܘܚܬܳܐ ܠܰܒܪܳܐ ܣܓܺܝܕܳܐ ܡܶܢ ܐܰܪ̈ܥܳܢܶܐ܆ ܒܗܳܢܳܐ ܥܺܐܕܳܐ ܠܰܐܒܽܘܟ ܫܽܘܒܚܳܐ ܘܠܳܟ ܪܽܘܡܪܳܡܳܐ܆ ܘܰܠܪܽܘܚ ܩܽܘܕܫܳܐ ܟܠܺܝܠ ܩܽܘ̈ܠܳܣܶܐ ܘܰܥܠܰܝܢ ܪ̈ܰܚܡܶܐ܀

ܙܰܡܰܪܘ ܙܰܡܰܪܘ ܙܰܡܰܪܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܙܰܡܪܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀