ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܠܶܐܣܛܶܦܰܢܳܘܣ. ܕܰܒ̈ܟܺܐܦܶܐ ܐܶܬܪܓܶܡ܆ ܟܠܺܝܠܳܐ ܕܫܽܘܒܚܳܐ ܝܰܡܺܝܢܳܟ ܓܶܕܠܰܬ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܚܰܝܶܠ ܗ̱ܘܳܐ. ܠܣܳܗܕܳܐ ܐ̱ܶܣܛܶܦܰܢܳܘܣ܆ ܘܣܰܝܒܰܪ ܚܰܫ̈ܶܐ ܘܫܶܢ̈ܕܶܐ ܕܰܪܓܽܘܡܝܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܠܶܐܣܛܶܦܰܢܳܘܣ. ܚܰܘܺܝ ܡܕܰܡܝܳܢܶܗ܆ ܘܒܰܟܠܺܝܠܳܐ ܕܫܽܘܒܚܳܐ ܟܰܠܶܠ ܗ̱ܘܳܐ ܘܗܰܕܪܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܒܚܰܝܠܳܐ. ܘܓܰܢ̱ܒܳܪܽܘܬܳܐ ܕܒܶܗ܆ ܥܰܙܺܝ ܣܳܗܕܳܐ ܓܰܒܝܳܐ ܐ̱ܶܣܛܶܦܰܢܳܘܣ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܫܺܝܚܳܐ ܕܚܰܝܠܶܗ. ܠܣܳܗܕܳܐ ܐ̱ܶܣܛܶܦܰܢܳܘܣ܆ ܚܰܝܶܠ ܠܟܶܢܫܰܢ ܕܢܶܙܡܰܪ ܠܳܟ ܫܽܘܒܚܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܽܘܟܪܳܐ ܕܣܳܗ̈ܕܶܐ. ܐ̱ܶܣܛܶܦܰܢܳܘܣ ܓܰܒܝܳܐ܆ ܒܥܺܝ ܚܠܳܦ ܥܺܕܬܳܐ ܕܙܰܝܚܰܬ ܝܽܘܡ ܥܺܐܕܳܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܡܰܢܽܘ ܕܠܳܐ ܢܶܬܡܠܶܐ܆ ܬܶܗܪܳܐ ܘܕܽܘܡܳܪܳܐ܆ ܟܰܕ ܫܳܡܰܥ ܫܰܪܒܶܗ ܕܓܰܒܝܳܐ ܐܶܣܛܶܦܰܢܳܘܣ܆ ܕܶܐܬܪܓܶܡ ܗ̱ܘܳܐ ܒܟܺܐܦ̈ܶܐ܆ ܡܶܢ ܥܰܡܳܐ ܣܰܟܠܳܐ܆ ܘܗܽܘ ܡܨܰܠܶܐ ܗ̱ܘܳܐ܆ ܘܣܳܐܶܡ ܒܽܘܪܟܳܐ ܚܠܳܦܰܝܗܽܘܢ܀

ܓܰܒܝܳܐ ܐ̱ܶܣܛܶܦܰܢܳܘܣ܆ ܩܰܕܡܳܝܳܐ ܕܣܳܗ̈ܕܶܐ܆ ܡܶܛܽܠ ܡܳܢܳܐ܆ ܥܰܠ ܡܰܘܬܳܐ ܕܚܺܝܠܳܐ ܒܰܣܰܪܬ܆ ܚܙܺܝܬܶܗ ܠܰܡܫܺܝܚܳܐ܆ ܕܩܳܐܶܡ ܒܬܶܫܒܽܘܚܬܳܐ ܡܶܢ ܝܰܡܺܝܢ ܐܰܒܽܘܗ̱ܝ܆ ܘܓܳܕܶܠ ܟܠܺܝ̈ܠܶܐ ܠܢܰܨܺܝ̈ܚܶܐ܀

ܣܳܗܕܳܐ ܐ̱ܶܣܛܶܦܰܢܳܘܣ܆ ܦܳܠܚܳܐ ܚܰܝܠܬܳܢܳܐ܆ ܪܬܰܚ ܗ̱ܘܳܐ ܒܰܛܢܳܢܳܐ܆ ܒܚܽܘܒܳܐ ܘܰܒܗܰܝܡܳܢܽܘܬܳܐ܆ ܘܩܳܡ ܗ̱ܘܳܐ ܚܠܺܝܨܳܐܺܝܬ܆ ܠܽܘܩܒܰܠ ܗܰܘ ܥܰܡܳܐ܆ ܣܰܟܠܳܐ ܕܝܗ̱ܽܘ̈ܕܳܝܶܐ܆ ܕܠܳܐ ܨܒܳܐ ܢܗܰܝܡܶܢ ܠܰܫܪܳܪܳܐ܀

ܠܡܳܪܶܗ ܕܳܡܶܐ ܗ̱ܘܳܐ܆ ܣܳܗܕܳܐ ܐ̱ܶܣܛܶܦܰܢܳܘܣ܆ ܕܰܚܠܳܦ ܪ̈ܳܓܽܘܡܰܘܗ̱ܝ܆ ܪ̈ܰܚܡܶܐ ܫܳܐܶܠ ܗ̱ܘܳܐ܆ ܘܰܪܕܳܐ ܒܥܶܩ̈ܒܳܬܶܗ܆ ܘܰܛܒܰܥ ܒܶܗ ܢܰܦܫܶܗ܆ ܘܒܰܕܓܽܘܢ ܫܘܳܐ ܕܢܶܚܙܶܐ܆ ܠܡܳܪܶܗ ܒܬܶܫܒܽܘܚܬܳܐ܀

ܒܰܪܶܟ ܐ̱ܶܣܛܶܦܰܢܳܘܣ܆ ܠܟܶܢܫܳܐ ܕܰܡܗܰܝ̈ܡܢܶܐ܆ ܘܰܒܥܺܝ ܡܶܢ ܡܳܪܳܟ܆ ܚܠܳܦ ܐܰܝܠܶܝܢ ܕܝܰܩܪܽܘܟ܆ ܘܰܐܦܺܝܣ ܠܰܡܫܺܝܚܳܐ܆ ܚܠܳܦ ܥܺܕܬܳܐ ܘܝܰܠ̈ܕܶܝܗ̇܆ ܕܰܒܗܰܝܡܳܢܽܘܬܳܐ܆ ܝܰܩܰܪܘ ܠܝܰܘܡܳܐ ܕܕܽܘܟܪܳܢܳܟ܀

ܫܽܘܒܚܳܐ

ܠܟܶܢ̈ܫܶܐ ܥܶܠܳܝ̈ܶܐ. ܐܰܬܗܰܪ ܚܽܘܡܣܳܢܳܟ܆ ܣܛܶܦܰܢܳܘܣ ܣܳܗܕܳܐ܆ ܫܽܘܦܪܳܐ ܕܰܟܢܰܘ̈ܳܬܶܗ܆ ܘܶܐܫܬܓܶܫܘ ܣܶܕܪ̈ܰܝܗܽܘܢ܆ ܕܰܚܙܰܘ ܛܽܘܪܳܦܳܟ܆ ܘܝܰܗ̱ܒܘ ܫܽܘܒܚܳܐ ܠܡܳܪܝܳܐ܆ ܕܚܰܝܠܳܟ ܒܰܐܓܽܘܢܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ ܡܽܘܢ ܝܺܬܰܪܘ

ܒܪܺܝܟܽ ܗ̱ܘ ܕܚܰܝܶܠ ܠܰܐܬܠܺܝܛܶܗ܆ ܘܰܙܟܳܐ ܘܰܢܨܰܚ ܒܰܐܓܽܘܢܳܐ܆ ܘܣܰܝܒܰܪ ܡܰܘܬܳܐ ܕܥܰܘ̈ܳܠܶܐ܆ ܘܚܽܘܪܳܩ ܫܶܢ̈ܶܐ ܕܥܰܢ̈ܳܬܶܐ܆ ܘܰܚܠܳܦ ܣܰܝܦܳܐ ܕܩܳܛܽܘ̈ܠܶܐ܆ ܒܟܺܐܦ̈ܶܐ ܪܰܓܡܶܗ ܥܰܡܳܐ ܕܝܗ̱ܽܘ̈ܕܳܝܶܐ܆ ܘܰܡܨܰܠܶܐ ܥܰܠ ܪ̈ܳܓܽܘܡܰܘܗ̱ܝ܆ ܘܣܳܐܶܡ ܒܽܘ݉ܪܟܳܐ ܚܠܳܦܰܝܗܽܘܢ܆ ܫܽܘܒܚܳܐ ܠܺܝܚܺܝܕܳܐ܆ ܕܰܕܪܰܫ ܐܽܘܪܚܳܐ ܠܣܳܓܽܘ̈ܕܰܘܗ̱ܝ܆ ܘܰܐܠܶܦ ܐܶܢܘܢ ܠܰܐܬܠܺܝܛܰܘ̈ܗܝ܆ ܕܢܶܬܕܰܡܽܘܢ ܒܶܗ ܘܢܰܩܠܽܘܢ܆ ܥܰܠ ܡܰܘ̈ܬܶܐ ܕܚܺܝ̈ܠܶܐ܀

ܫܽܘܒܚܳܐ

ܒܟܺܐܦ̈ܶܐ ܪܰܓܡܽܘܗ̱ܝ ܠܰܐܬܠܺܝܛܳܐ܆ ܘܶܐܫܰܕܘ ܠܰܕܡܶܗ ܥܰܢ̈ܳܬܶܐ܆ ܟܰܕ ܩܳܐܶܡ ܒܶܝܬ ܪ̈ܳܓܽܘܡܰܘܗ̱ܝ ܚܙܳܐ ܠܰܫ̈ܡܰܝܳܐ ܕܰܦܬܺܝܚܺܝܢ܆ ܘܠܰܒܪܶܗ ܕܐ̱ܢܳܫܳܐ ܟܰܕ ܩܳܐܶܡ܆ ܡܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ܆ ܘܟܰܕ ܫܡܰܥܘ ܗܳܕܶܐ ܛܳܠܽܘ̈ܡܶܐ܆ ܪܰܓܡܽܘܗ̱ܝ ܘܩܰܛܠܽܘܗ̱ܝ ܒܰܚܣܳܡܳܐ܆ ܘܰܢܨܰܚ ܘܶܐܬܟܰܠܰܠ܆ ܘܰܐܥܕܺܝ ܟܠܺܝܠܳܐ ܕܙܳܟܽܘ݉ܬܳܐ܆ ܒܰܨ̈ܠܰܘܳܬܶܗ ܦܳܪܽܘܩܰܢ ܐܰܫܪܳܐ ܫܰܝܢܳܟ ܘܰܫܠܳܡܳܟ܆ ܒܰܐܪܒܰܥ ܦܶܢ̈ܝܳܢ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ

ܒܽܘܟܪܳܐ ܕܣܳܗ̈ܕܶܐ. ܐܶܣܛܶܦܰܢܳܘܣ ܡܠܶܐ ܪܽܘܚ ܩܽܘܕܫܳܐ܆ ܕܨܰܠܺܝ ܗ̱ܘܳܐ ܥܰܠ ܪ̈ܳܓܽܘܡܰܘܗ̱ܝ܆ ܕܡܳܪܰܢ ܝܶܫܽܘܥ ܫܒܽܘܩ ܠܗܽܘܢ܆ ܐܰܝܟܰܢܳܐ ܕܨܰܠܺܝ ܡܳܪܶܗ܆ ܥܰܠ ܙܳܩܽܘ̈ܦܰܘܗ̱ܝ ܘܶܐܬܟܰܫܰܦ܆ ܨܰܠܳܐ ܐܳܦ ܥܠܰܝܢ ܐܳܘ ܐܰܒܽܘܢ܆ ܕܢܶܫܬܰܘܙܰܒ ܡܶܢ ܢܶܟܝ̈ܳܢܶܐ܆ ܘܒܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܆ ܥܰܡܳܟ ܢܶܚܕܶܐ ܘܢܶܬܒܰܣܰܡ܀

ܫܽܘܒܚܳܐ

ܡܳܪܝ ܐܶܣܛܶܦܰܢܳܘܣ. ܡܰܪܓܳܢܺܝܬܳܐ ܕܠܳܐ ܡܽܘܡܳܐ܆ ܕܰܒܝܰܕ ܩܶܛܠܶܗ ܘܰܪܓܽܘܡܝܶܗ܆ ܐܰܥܕܺܝ ܟܠܺܝܠܳܐ ܕܙܳܟܽܘܬܳܐ܆ ܘܡܶܬܒܰܣܰܡ ܒܶܝܬ ܡܰܠܟܽܘܬܳܐ܆ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܆ ܘܕܽܘܟܪܳܢܶܗ ܗܳܐ ܡܶܬܢܰܨܰܚ܆ ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܡܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ܆ ܨܠܽܘܬܶܗ ܫܽܘܪܳܐ ܬܶܗܘܶܐ ܠܰܢ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܢܶܣܬܰܟܪ̈ܳܢ ܣܶܦ̈ܘܳܬܗܽܘܢ ܕܥܰܘ̈ܳܠܶܐ: ܕܰܡܡܰܠܠܺܝܢ ܥܰܠ ܙܰܕܺܝܩܳܐ ܫܽܘܩܪܳܐ ܘܫܳܛܝܽܘܬܳܐ ܗܰܠܶܠܽܘܝܰܗ܀

ܐܰܘ: ܡܶܛܽܠܳܬܳܟ ܐܶܬܩܛܰܠܢ ܒܟܽܠܝܽܘܡ܆ ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܒܽܘܟܪܳܐ ܕܣܳܗ̈ܕܶܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܣܳܥܰܪ ܚܰܝ̈ܠܶܐ ܘܰܗܕܺܝܪ ܡ̈ܶܠܶܐ ܘܢܰܨܺܝܚ ܫܽܘܦܪ̈ܶܐ܆ ܡܗܺܝܪ ܒܺܝܕܰܥܬܳܐ ܘܰܒܣܽܘ̈ܟܳܠܶܐ ܐܰܠܳܗܳܝ̈ܶܐ܆ ܗܰܝܡܳܢܽܘܬܳܐ ܘܪܽܘܚܳܐ ܕܩܽܘܕܫܳܐ ܡܠܶܐ ܗ̱ܘܳܐ ܟܽܠܶܗ܆ ܐܳܦ ܒܳܐܬܘ̈ܳܬܳܐ ܘܰܬܡܺܝ̈ܗܳܬܳܐ ܓܰܢ̱ܒܳܪܳܐ ܗ̱ܘܳܐ܀

ܫܽܘܒܚܳܐ ܠܰܐܒܳܐ ܕܚܰܝܶܠ ܠܥܰܒܕܶܗ ܐܶܣܛܶܦܰܢܳܘܣ܆ ܘܣܶܓܕܬܳܐ ܠܰܒܪܳܐ ܕܒܰܕܒܺܝܚܽܘܬܶܗ ܠܶܗ ܐܶܬܕܰܡܺܝ܆ ܬܰܘܕܺܝ ܠܪܽܘܚܳܐ ܕܒܶܗ ܡܶܬܬܙܺܝܥ ܗ̱ܘܳܐ ܒܟܽܠܗܽܘܢ ܫܽܘܦܪ̈ܶܐ܆ ܘܰܥܠܰܝܢ ܪ̈ܰܚܡܶܐ ܒܟܽܠ ܥܶܕܳܢܺܝ̈ܢ ܒܰܨ̈ܠܰܘܳܬܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀