ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܰܒܝܽܘܡ ܡܰܘܠܳܕܶܗ܆ ܕܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܚܰܕܽܘܬܳܐ ܡܠܰܝܬ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܝܰܘܡܳܢ ܫܽܘܒܚܳܐ ܚܰܕ̱ܬܳܐ܆ ܪܥܶܡ ܗ̱ܘܳܐ ܒܒܰܝܬܶܗ ܕܰܙܟܰܪܝܳܐ܆ ܕܦܺܐܪܳܐ ܪܚܺܝܡܳܐ܆ ܫܪܳܝܗ̱ܝ ܗ̱ܘܳܐ ܠܶܐܣܳܪ ܠܶܫܳܢܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܶܬܺܝܠܶܕ ܟܳܪܽܘܙܳܐ܆ ܠܰܥܩܰܪܬܳܐ ܒܰܪ̱ܬ ܠܶܘܳܝ̈ܶܐ܆ ܘܰܚܕܺܝ ܙܟܰܪܝܳܐ. ܕܶܐܫܬܰܡܠܺܝ ܗ̱ܘܳܐ ܣܽܘܟܳܝܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܚܰܕܘܳܐ ܪܰܒܳܐ ܗܘܳܐ ܗ̱ܘܳܐ܆ ܝܰܘܡܳܢܳܐ ܒܛܽܘܪܳܐ ܕܺܝܗܽܘܕ܆ ܟܰܕ ܐܶܬܺܝܠܶܕ. ܝܽܘܚܰܢܳܢ ܡܶܢ ܐܶܠܺܝܫܒܰܥ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܶܬܡܠܺܝ ܙܟܰܪܝܳܐ ܟܳܗܢܳܐ܆ ܪܽܘܚ ܩܽܘܕܫܳܐ ܘܰܩܥܳܐ ܘܶܐܡܰܪ܆ ܕܰܐܢ̱ܬ ܠܰܡ ܛܰܠܝܳܐ܆ ܢܒܺܝܶܗ ܕܥܶܠܳܝܳܐ ܬܶܬܩܪܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܗܳܢ ܝܰܘܡܳܐ ܕܡܰܘܠܳܕܶܗ܆ ܕܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܬܶܚܕܶܐ ܥܺܕܬܳܐ܆ ܘܰܬܫܰܒܰܚ ܠܡܳܪܝܳܐ ܕܰܓܒܳܝܗ̱ܝ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ

ܒܰܨ̈ܠܰܘܳܬܶܗ ܕܺܐܝܙܓܰܕܳܟ: ܐܰܫܘܳܐ ܠܟܽܠܰܢ ܦܳܪܽܘܩܰܢ: ܠܫܽܘܒܩܳܢ ܚܰܘ̈ܒܶܐ ܘܰܚ̈ܛܳܗܶܐ: ܕܰܒܩܳܠܳܐ ܪܳܡܳܐ ܢܫܰܒܚܳܟ܀

ܐܰܢ̱ܬ ܕܠܰܐܣܽܘܪ̈ܶܐ ܕܥܰܩܪܽܘܬܳܐ: ܫܪܰܝܬ ܐܶܢܽܘܢ ܒܝܽܘܡ ܡܰܘܠܳܕܳܟ: ܫܪܺܝ ܠܟܽܠܰܢ ܒܰܨ̈ܠܰܘܳܬܳܟ: ܡܶܢ ܢܶܫ̈ܒܰܘܗ̱ܝ ܕܰܒܥܶܠܕܰܪܳܐ܀

ܪܳܚܡܶܗ ܕܚܰܬܢܳܐ ܫܡܰܝܳܢܳܐ: ܘܡܳܟܽܘܪܳܗ̇ ܕܥܺܕܰܬ ܩܽܘܕܫܳܐ: ܙܰܡܶܢ ܠܰܢ ܒܰܨ̈ܠܰܘܳܬܳܟ: ܠܡܰܠܟܽܘܬܳܐ ܫܡܰܝܳܢܺܝܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܟܰܕ ܐܶܬܺܝܠܶܕ ܝܽܘܚܰܢܳܢ܆ ܚܰܕܽܘܬܳܐ ܗܘܳܬ ܒܰܒܪܺܝܬܳܐ܆ ܘܥܰܩܪ̈ܶܐ ܐܰܣܶܩܘ ܬܶܫܒܽܘܚܬܳܐ܆ ܕܰܒܝܰܠܕܶܗ ܐܰܦܨܰܚ ܐܶܢܽܘܢ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܰܪܺܝ ܡܰܟܪܶܙ ܒܓܰܘ ܚܽܘܪܒܳܐ܆ ܕܗܳܐ ܡܰܠܟܽܘܬ ܪܰܘܡܳܐ ܩܶܪܒܰܬ܆ ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ܆ ܘܶܐܬܚܰܣܰܘ ܡܶܢ ܚܰܘܒܰܝ̈ܟܽܘܢ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܪܰܒ ܬܶܗܪܳܐ ܕܰܗܘܳܐ ܝܰܘܡܳܢ܆ ܒܒܰܝܬܶܗ ܕܰܙܟܰܪܝܳܐ ܟܳܗܢܳܐ܆ ܕܶܐܠܺܝܫܒܰܥ ܥܩܰܪܬܳܐ ܝܶܠܕܰܬ܆ ܟܳܪܽܘܙܳܐ ܘܦܺܐܪܳܐ ܪܓܺܝܓܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܚܳܕܶܐ ܙܟܰܪܝܳܐ ܘܰܡܫܰܒܰܚ܆ ܒܗܳܢܳܐ ܝܰܘܡܳܐ ܕܡܰܘܠܳܕܶܗ܆ ܕܟܳܪܽܘܙ ܩܽܘܫܬܳܐ ܝܽܘܚܰܢܳܢ܆ ܕܶܐܫܬܪܺܝ ܦܽܘܡܶܗ ܕܰܢܡܰܠܶܠ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܚܕܺܝ ܙܟܰܪܝܳܐ ܘܕܳܨܰܬ ܥܩܰܪܬܳܐ܆ ܚܕܺܝ ܥܰܡܗܽܘܢ ܛܽܘܪܳܐ ܕܺܝܗܽܘܕ܆ ܐܳܦ ܥܺܕܬܳܐ ܡܫܰܒܚܳܐ ܘܚܳܕܝܳܐ܆ ܒܕܽܘܟܪܳܢܶܗ ܕܟܳܪܽܘܙ ܩܽܘܫܬܳܐ܀

ܦܺܐܪܳܐ ܪܓܺܝܓܳܐ ܝܶܗܒܰܬ ܠܰܢ܆ ܥܩܰܪܬܳܐ ܕܝܶܠܕܰܬ ܠܝܽܘܚܰܢܳܢ܆ ܕܰܒܣܰܬܳܐ ܕܥܶܬܩܰܬ ܗܰܒܶܒ܆ ܘܰܗܘܳܐ ܣܓܽܘܠܳܐ ܡܰܠܳܠܳܐ܀

ܝܰܘܡܳܢܳܐ ܬܶܚܕܶܐ ܥܺܕܬܳܐ܆ ܒܡܰܘܠܳܕܶܗ ܕܟܳܪܽܘܙ ܩܽܘܫܬܳܐ܆ ܗܺܝ ܘܝܰܠ̈ܕܶܝܗ̇ ܒܚܰܕ ܝܽܘܒܳܒܳܐ܆ ܬܶܙܡܰܪ ܫܽܘܒܚܳܐ ܠܗܰܘ ܕܰܓܒܳܝܗ̱ܝ܀

ܫܒܺܝܚ ܕܽܘܟܪܳܢܳܟ ܝܽܘܚܰܢܳܢ܆ ܘܢܳܨܰܚ ܒܰܐܪܒܰܥ ܦܶܢ̈ܝܳܬܳܐ܆ ܘܥܺܕܰܬ ܩܽܘܕܫܳܐ ܗܳܐ ܙܳܡܪܳܐ܆ ܬܶܫܒܽܘܚܬܳܐ ܒܝܽܘܡ ܡܰܘܠܳܕܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫ̈ܡܰܝܳܢܶܐ

ܥܩܰܪܬܳܐ ܝܶܠܕܰܬ ܐܺܝܙܓܰܕܳܐ: ܘܰܙܟܰܪܝܳܐ ܡܰܠܶܠ: ܕܶܐܬܢܰܒܺܝ ܡܶܛܽܠܳܬܶܗ: ܕܡܰܟܪܶܙ ܩܕܳܡ ܡܳܪܶܗ܀

ܝܽܘܚܰܢܳܢ ܒܰܪ ܠܶܘܳܝ̈ܶܐ: ܝܶܠܕܰܬ ܗ̱ܘܳܬ ܥܩܰܪܬܳܐ: ܘܰܙܟܰܪܝܳܐ ܐܰܒܽܘܗ̱ܝ ܡܰܠܶܠ: ܘܒܰܕܶܩ ܟܰܣ̈ܝܳܬܳܐ܀

ܫܽܘܒܚܳܐ ܠܡܰܠܟܳܐ ܫܡܰܝܳܢܳܐ: ܕܰܓܒܳܝܗ̱ܝ ܡܶܢ ܟܰܪܣܳܐ: ܠܝܽܘܚܰܢܳܢ ܒܰܪ ܥܰܩܪܽܘܬܳܐ: ܕܢܶܗܘܶܐ ܟܳܪܽܘܙܶܗ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܐܶܬܺܝܠܶܕ ܟܳܪܽܘܙܳܐ ܠܡܶܠܬܳܐ ܐܰܠܳܗܳܐ܆ ܘܰܚܕܺܝ ܙܟܰܪܝܳܐ ܘܕܳܨܰܬ ܥܩܰܪܬܳܐ ܘܛܽܘܪܳܐ ܕܺܝܗܽܘܕ܆ ܘܰܙܡܰܪܘ ܬܰܡܳܢ ܬܶܫܒܽܘܚܬܳܐ܆ ܠܡܰܠܟܳܐ ܫܡܰܝܳܢܳܐ܀

ܝܽܘܚܰܢܳܢ܆ ܐܶܬܺܝܠܶܕ ܘܰܙܟܰܪܝܳܐ ܐܶܫܬܪܺܝ ܠܶܫܳܢܶܗ܆ ܘܢܰܨܪܶܗ ܒܪܽܘܚܳܐ ܕܰܐܢ̱ܬ ܗ̱ܽܘ ܢܒܺܝܶܗ ܕܒܰܪ ܐܰܠܳܗܳܐ܆ ܕܬܺܐܙܰܠ ܩܽܘܕܡܰܘܗ̱ܝ ܕܰܬܛܰܝܶܒ܆ ܐܽܘܪܚܳܐ ܠܡܶܐܬܺܝܬܶܗ܀

ܠܳܟ ܬܶܫܒܽܘܚܬܳܐ܆ ܦܳܪܽܘܩܰܢ ܕܝܰܗ̱ܒܬ ܦܺܐܪܳܐ ܒܥܽܘܒܳܐ ܕܥܰܩܪܽܘܬܳܐ܆ ܘܰܦܬܰܚ ܒܝܰܠܕܶܗ ܦܽܘܡܳܐ ܕܰܐܒܽܘܗ̱ܝ ܘܡܰܪܒܥܳܐ ܕܶܐܡܶܗ܆ ܘܚܰܕܺܝ ܠܥܰܡ̱̈ܡܶܐ ܒܡܰܘܠܳܕܶܗ܆ ܘܰܙܡܰܪܘ ܬܶܫܒܽܘܚܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܢܳܨܪܰܬ ܡܕܺܝܢ̱ܬܳܐ

ܚܶܕܝܰܬ ܝܺܗܽܘܕ ܒܝܰܠܽܘܕܳܐ ܘܕܳܨܰܬ ܥܩܰܪܬܳܐ: ܒܟܳܪܽܘܙܳܐ ܘܰܐܘܕܺܝ ܙܟܰܪܝܳܐ: ܘܶܐܫܬܪܺܝ ܐܶܣܳܪ ܠܶܫܳܢܶܗ: ܘܰܒܚܰܕܽܘܬܳܐ ܢܰܨܰܪ ܝܰܠܕܶܗ: ܕܰܢܒܺܝܶܗ ܐܰܢ̱ܬ ܕܥܶܠܳܝܳܐ: ܕܰܐܢ̱ܬ ܬܰܬܩܶܢ ܐܽܘܪܚܳܐ ܩܕܳܡܰܘܗ̱ܝ܀

ܙܟܰܪܝܳܐ ܟܳܗܢܳܐ ܕܢܳܡܽܘܣܳܐ ܐܳܦ ܐܶܠܺܝܫܒܰܥ ܒܰܪ̱ܬ ܠܶܘܳܝ̈ܶܐ: ܡܶܢ ܒܢ̈ܳܬ ܐܰܗܪܽܘܢ ܝܺܠܶܕܘ̱ ܗ̱ܘܰܘ ܟܳܪܽܘܙ ܩܽܘܫܬܳܐ: ܕܢܶܗܘܶܐ ܡܰܟܪܶܙ ܩܕܳܡ ܒܰܪ ܡܰܠܟܳܐ: ܕܗܳܐ ܡܰܠܟܽܘܬܳܐ ܩܶܪܒܰܬ ܠܳܗ̇ ܐܳܘ ܚܰܛܳܝ̈ܶܐ ܬܽܘܒܘ̱ ܘܰܚܝܰܘ܀

ܝܰܘܡܳܢ ܬܶܚܕܶܐ ܥܺܕܰܬ ܩܽܘܕܫܳܐ ܡܟܺܝܪܬܶܗ ܕܰܒܪܳܐ: ܒܝܽܘܡ ܡܰܘܠܳܕܶܗ ܕܝܽܘܚܰܢܳܢ ܒܰܪ ܥܰܩܪܽܘܬܳܐ: ܪܳܚܡܶܗ ܕܚܰܬܢܳܐ ܘܡܰܥܡܕܳܢܶܗ: ܗܺܝ ܘܝܰܠ̈ܕܶܝܗ̇ ܬܶܙܡܰܪ ܫܽܘܒܚܳܐ: ܠܗܰܘ ܕܰܒܚܽܘܒܶܗ ܡܰܟ̣ܪܳܗ̇ ܒܩܳܠܶܗ ܕܝܽܘܚܰܢܳܢ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ ܐܶܚܰܕ ܗ̱ܘܳܐ ܠܳܗ̇: ܠܰܟܢܽܘܫܬܳܐ ܗܳܝ ܕܠܶܘܳܝ̈ܶܐ: ܟܰܕ ܐܶܬܺܝܠܶܕ ܝܽܘܚܰܢܳܢ ܟܳܪܽܘܙ ܩܽܘܫܬܳܐ ܡܶܢ ܐܶܠܺܝܫܒܰܥ ܘܰܦܬܰܚ ܗ̱ܘܳܐ ܒܝܽܘܡ ܡܰܘܠܳܕܶܗ ܠܦܽܘܡܳܐ ܕܰܐܒܽܘܗ̱ܝ ܘܡܰܪܒܥܳܐ ܥܰܩܪܳܐ ܕܝܳܠܶܕܬܶܗ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܐܶܬܬܥܺܝܪ ܕܰܡ̈ܟܶܐ

ܒܗܳܢܳܐ ܝܰܘܡܳܐ ܐܶܬܚܰܪܰܪ ܘܶܐܫܬܪܺܝ ܙܟܰܪܝܳܐ܆ ܡܶܢ ܦܟܳܪ̈ܶܐ ܫܶܬܩܳܢܳܝ̈ܶܐ܆ ܒܡܰܘܠܳܕܶܗ ܕܟܳܪܽܘܙ ܩܽܘܫܬܳܐ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܗܳܢܳܐ ܝܰܘܡܳܐ ܐܶܬܺܝܠܶܕ ܟܰܘܟܰܒ ܢܽܘܓܗܳܐ܆ ܕܡܰܬܩܶܢ ܐܽܘܪܚܳܐ ܩܕܳܡ ܫܶܡܫܳܐ܆ ܕܙܰܕܺܝܩܽܘܬܳܐ ܕܶܐܬܺܝܠܶܕ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܪܺܝܟܽ ܗ̱ܘ ܕܚܰܕܺܝ ܒܝܽܘܡ ܝܰܠܕܶܗ ܠܣܳܒ̈ܶܐ ܥܰܩܪ̈ܶܐ܆ ܕܥܰܕ ܠܳܐ ܢܶܚܬܽܘܢ ܠܳܗ̇ ܠܰܫܝܽܘܠ܆ ܚܙܰܘ ܦܺܐܪܳܐ ܘܰܚܕܺܝ ܠܶܒܗܽܘܢ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܬܡܺܝܗ ܝܽܘܚܰܢܳܢ ܘܰܡܨܰܒܰܬ ܒܫܽܘܦܪ̈ܶܐ ܪ̈ܳܡܶܐ܆ ܣܓܽܘܠܳܐ ܕܪܰܒܝܰܬ ܪܽܘܚܩܽܘܕܫܳܐ܆ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܬܠܺܝܬܳܝܳܐ ܘܰܠܚܽܘܕܳܝܳܐ ܚܰܕ ܐܰܠܳܗܳܐ ܕܡܶܬܬܰܘܕܶܐ܆ ܬܠܺܝܬܳܐܺܝܬ ܘܰܠܚܽܘܕܳܐܺܝܬ܆ ܐܺܝܬܽܘܬܳܐ ܕܠܳܐ ܡܶܬܒܰܨܪܳܐ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܓܶܕ ܠܳܟ ܡܳܪܝܳܐ

ܝܽܘܚܰܢܳܢ ܒܰܪ ܥܰܩܪܽܘܬܳܐ: ܐܶܬܺܝܠܶܕ ܩܳܠܳܐ ܠܡܶܠܬܳܐ: ܘܰܗܘܳܐ ܣܰܒܪܳܐ ܘܚܰܕܽܘܬܳܐ: ܕܦܽܘܪܩܳܢܳܐ ܕܢܰܚ ܒܰܒܪܺܝܬܳܐ܀

ܡܒܰܪܰܟ ܗ̱ܽܘ ܓܶܝܪ ܐܰܠܳܗܳܐ: ܕܰܣܥܰܪ ܥܰܡܶܗ ܐܰܝܟ ܕܰܟܬܺܝܒ: ܘܝܰܗ̱ܒ ܦܽܘܪܩܳܢܳܐ ܠܺܐܝܣܪܳܐܶܝܠ: ܘܦܽܘܢܳܝܳܐ ܕܟܽܠܗܽܘܢ ܥܰܡ̱̈ܡܶܐ܀

ܠܗܰܘ ܕܰܡܣܰܟܶܝܢ ܗ̱ܘܰܘ ܢܒܺܝ̈ܶܐ: ܕܢܶܚܙܽܘܢܳܝܗ̱ܝ ܒܓܶܠ̈ܝܳܢܰܝܗܽܘܢ: ܒܪܶܗ ܕܰܙܟܰܪܝܳܐ ܕܶܐܬܺܝܠܶܕ: ܗܘܳܐ ܠܶܗ ܩܳܠܳܐ ܒܓܰܘ ܚܽܘܪܒܳܐ܀

ܕܰܘܺܝܕ ܥܠܰܘܗ̱ܝ ܐܶܬܢܰܒܺܝ ܗ̱ܘܳܐ: ܕܢܶܚܙܽܘܢ ܘܰܢܫܰܒܚܽܘܢ ܡܰܠ̈ܟܶܐ: ܕܕܳܢ ܠܰܢ ܡܳܪܝܳܐ ܘܰܦܪܰܩ ܠܰܢ: ܒܝܰܕ ܪ̈ܰܚܡܰܘܗ̱ܝ ܡܶܢ ܫܰܒܳܝܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ܆ ܝܽܘܡ ܡܰܘܠܳܕܳܟ ܟܳܪܽܘܙ ܩܽܘܫܬܳܐ܆ ܕܰܫܪܰܝܬ ܠܶܫܳܢܶܗ ܕܰܐܒܽܘܟ ܕܠܳܐ ܡܡܰܠܶܠ ܗ̱ܘܳܐ܆ ܘܰܦܬܰܚܬ ܡܰܪܒܥܳܐ܆ ܕܶܐܡܳܟ ܕܡܶܡܬܽܘܡ ܠܳܐ ܝܺܠܶܕ܀

ܒܡܰܘܠܳܕܶܗ ܕܟܳܪܽܘܙܳܟ܆ ܢܰܨܺܝܚ ܫܽܘܦܪ̈ܶܐ ܚܳܕܝܳܐ ܥܺܕܬܳܐ܆ ܐܳܦ ܝܰܠ̈ܕܶܝܗ̇ ܙܳܡܪܺܝܢ ܫܽܘܒܚܳܐ ܘܩܳܥܶܝܢ ܘܳܐܡܪܺܝܢ܆ ܐܶܬܕܰܟܪܰܝܢ ܡܳܪܝ܆ ܡܳܐ ܕܳܐܬܶܐ ܐܰܢ̱ܬ ܒܡܰܠܟܽܘܬܳܟ܀

ܙܟܰܪܝܳܐ ܟܳܗܢܳܐ ܕܢܳܡܽܘܣܳܐ܆ ܐܳܦ ܐܶܠܺܝܫܒܰܥ ܒܰܪ̱ܬ ܠܶܘܳܝ̈ܶܐ܆ ܡܶܢ ܒ̈ܢܳܬ ܐܰܗܪܽܘܢ ܝܺܠܶܕܘ ܗ̱ܘܰܘ ܟܳܪܽܘܙ ܩܽܘܫܬܳܐ܆ ܕܢܶܗܘܶܐ ܡܰܟܪܶܙ܆ ܩܕܳܡ ܒܰܪ ܡܰܠܟܳܐ ܫܡܰܝܳܢܳܐ܀

ܝܰܘܡܳܢ ܬܶܚܕܶܐ ܥܺܕܬܳܐ܆ ܡܟܺܝܪܬܶܗ ܕܰܒܪܳܐ ܒܝܽܘܡ ܡܰܘܠܳܕܶܗ܆ ܕܝܽܘܚܰܢܳܢ ܒܰܪ ܥܰܩܪܽܘܬܳܐ ܦܺܐܪܳܐ ܪܓܺܝܓܳܐ܆ ܘܙܳܡܪܳܐ ܫܽܘܒܚܳܐ܆ ܗܺܝ ܘܝܰܠ̈ܕܶܝܗ̇ ܠܡܳܪܝܳܐ ܕܰܓܒܳܝܗ̱ܝ܀

ܫܽܘܒܚܳܐ

ܒܝܽܘܡ ܡܰܘܠܳܕܶܗ ܕܝܽܘܚܰܢܳܢ܆ ܟܳܪܽܘܙ ܩܽܘܫܬܳܐ ܬܶܚܕܶܐ ܥܺܕܬܳܐ܆ ܘܬܶܙܡܰܪ ܫܽܘܒܚܳܐ ܘܬܰܘܕܺܝܬܳܐ ܠܚܰܬܢܳܐ ܡܫܺܝܚܳܐ܆ ܕܫܰܕܪܶܗ ܩܽܘܕܡܰܘܗ̱ܝ܆ ܢܛܰܝܶܒ ܐܽܘܪܚܳܐ ܠܰܣܒܰܪܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܒܝܽܘܡ ܡܰܘܠܳܕܳܟ: ܟܳܪܽܘܙ ܩܽܘܫܬܳܐ ܝܽܘܚܰܢܳܢ: ܚܶܕܝܰܬ ܐܶܠܺܝܫܒܰܥ ܐܶܡܳܟ ܘܰܠܡܳܪܝܳܐ ܐܰܘܕܝܰܬ: ܐܶܬܕܰܟܪܰܝܢ ܡܳܪܝܳܐ܀

ܕܰܘܨܳܐ ܪܰܒܳܐ: ܘܰܪܘܳܙܳܐ ܡܠܶܐ ܗ̱ܘܳܐ ܙܟܰܪܝܳܐ: ܘܰܠܡܳܪܝܳܐ ܫܰܒܰܚ ܘܰܐܘܕܺܝ ܚܰܕ ܪܽܘܚܳܐ ܕܩܽܘܕܫܳܐ: ܐܶܬܕܰܟܪܰܝܢ ܡܳܪܝܳܐ܀

ܚܕܺܝ ܗ̱ܘܳܐ ܙܟܰܪܝܳܐ: ܒܰܒܬܽܘܠܳܐ ܒܰܪ ܥܰܩܪܽܘܬܳܐ: ܕܶܐܫܬܪܺܝ ܐܶܣܳܪ ܠܶܫܳܢܶܗ: ܕܡܶܢ ܥܺܝܪܳܐ ܐܶܬܦܟܰܪ: ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܫܽܘܒܚܳܐ ܠܳܟ ܡܳܪܝ: ܕܝܰܗ̱ܒܬ ܦܺܐܪܳܐ ܠܣܳܒ̈ܶܐ ܥܰܩܪ̈ܶܐ: ܕܢܰܬܩܶܢ ܐܽܘܪܚܳܐ ܠܡܶܐܬܺܝܬܳܟ: ܕܬܶܦܪܽܘܩ ܒܶܪ̈ܝܳܬܳܐ: ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܛܽܘܒܰܝܗܽܘܢ ܠܥܰܒ̈ܕܶܐ ܛܳܒ̈ܶܐ

ܝܽܘܚܰܢܳܢ ܛܰܠܝܳܐ ܪܓܺܝܓܳܐ ܒܪܶܗ ܕܰܙܟܰܪܝܳܐ܆ ܣܓܽܘܠܳܐ ܕܪܰܒܝܰܬ ܪܽܘܚ ܩܽܘܕܫܳܐ ܡܶܢ ܣܰܬܳܐ ܥܩܰܪܬܳܐ܆ ܗܽܘ ܦܬܰܚ ܦܽܘܡܶܗ܆ ܕܰܐܒܽܘܗ̱ܝ ܕܰܐܣܺܝܪ ܗ̱ܘܳܐ܆ ܘܡܰܪܒܥܳܐ ܕܶܐܡܶܗ܆ ܕܡܶܡܬܽܘܡ ܠܳܐ ܐܰܦܪܺܝ܆ ܗܽܘ ܦܰܬܚܳܗ̇ ܠܡܰܥܡܽܘܕܺܝܬܳܐ ܩܕܳܡ ܚܰܛܳܝ̈ܶܐ܆ ܘܢܳܚܬܺܝܢ ܥܳܡܕܺܝܢ ܚܰܝܳܒ̈ܶܐ ܘܙܰܟܳܝ̈ܶܐ ܣܳܠܩܺܝܢ܆ ܗ̄ܘܗ̄܀

ܫܽܘܒܚܳܐ

ܝܰܘܡܳܢܳܐ ܕܳܐܶܨ ܘܰܦܨܺܝܚ ܙܟܰܪܝܳܐ ܟܳܗܢܳܐ܆ ܘܡܰܘܕܶܐ ܠܰܒܪܳܐ ܒܚܰܕܽܘܬܳܐ ܕܰܠܗܳܕܶܐ ܐܰܫܘܝܶܗ܆ ܕܺܝܕܰܥ ܕܰܒܪܶܗ܆ ܗܳܘܶܐ ܟܳܪܽܘܙܳܐ܆ ܡܰܪܬܶܐ ܠܥܰܡ̱̈ܡܶܐ܆ ܡܟܰܘܶܢ ܐܶܡ̈ܘܳܬܳܐ܆ ܐܳܦ ܡܰܟܪܶܙ ܡܰܠܟܽܘܬ ܪܰܘܡܳܐ ܠܥܰܡ̱̈ܡܶܐ ܟܽܠܗܽܘܢ܆ ܘܩܳܪܶܐ ܠܚܰܛܳܝ̈ܶܐ ܕܢܺܐܬܽܘܢ ܠܰܛܝܳܪܳܐ ܕܚܰܝ̈ܶܐ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܕܰܚܛܳܐ ܠܳܐ ܢܶܚܛܶܐ
ܕܰܚܛܳܐ ܠܳܐ ܢܶܚܛܶܐ ܘܰܕܠܳܐ ܚܛܳܐ

ܒܪܺܝܟ ܕܰܐܘܠܶܕ ܦܺܐܪܳܐ܆ ܡܶܢ ܣܰܬܳܐ ܥܩܰܪܬܳܐ܆ ܘܰܕܪܰܒ ܗ̱ܽܘ ܡܶܢܶܗ ܠܳܐ ܩܳܡ ܒܺܝܠܺܝ̈ܕܶܐ܆ ܕܰܒܝܽܘܡ ܡܰܘܠܳܕܶܗ܆ ܬܰܪ̈ܥܶܐ ܐܰܚܺܝ̈ܕܶܐ ܦܬܰܚ܆ ܫܪܳܐ ܡܰܪܒܥܳܐ ܕܶܐܡܶܗ ܘܠܶܫܳܢܶܗ ܕܰܐܒܽܘܗ̱ܝ܆ ܗ̄ܘܗ̄ ܬܰܘܕܺܝ ܠܰܚܢܳܢܶܗ ܕܰܐܦܨܚܳܗ̇ ܠܰܥܩܰܪܬܳܐ܀

ܫܽܘܒܚܳܐ

ܡܰܢܽܘ ܕܠܳܐ ܢܶܬܗܰܪ܆ ܒܗܳܝ ܣܰܬܳܐ ܥܩܰܪܬܳܐ܆ ܕܛܶܥܢܰܬ ܠܰܣܓܽܘܠܳܐ ܚܰܕ̱ܬܳܐ ܡܠܶܐ ܫܽܘܦܪ̈ܶܐ܆ ܘܒܰܣܶܡ ܗ̱ܘܳܐ ܒܚܰܡܪܶܗ܆ ܠܥܰܡ̱̈ܡܶܐ ܛܳܥܰܝ̈ܳܐ܆ ܗܳܐ ܟܠܺܝܠܶܗ ܓܕܺܝܠ ܗ̱ܽܘ ܒܪܰܘܡܳܐ ܕܰܫܡܰܝܳܐ܆ ܗ̄ܘܗ̄ ܒܪܺܝܟ ܕܝܰܩܰܪ ܘܰܐܘܪܶܒ ܝܰܘܡܳܐ ܕܕܽܘܟܪܳܢܶܗ܀

ܡܶܢ ܥܳܠܰܡ

ܢܶܬܕܟܰܪ ܒܰܨܠܽܘܬܳܐ. ܠܥܰܢܺܝ̈ܕܶܐ ܡܗܰܝܡ̈ܢܶܐ. ܘܠܳܐ ܢܶܛܥܶܐ ܐܶܢܽܘܢ ܕܡ̣ܶܢ ܒܰܝܢܳܬܰܢ ܦܪܰܫܘ. ܥܰܠ ܡܰܕܒܰܚ ܩܽܘܕܫܳܐ: ܫܡܳܗܰܝ̈ܗܽܘܢ ܢܶܬܕܟܰܪ. ܘܰܒܟܽܠ ܥܶܕܳܢܺܝ̈ܢ ܢܝܳܚܳܐ ܢܶܗܘܶܐ ܠܗܽܘܢ ܗ̄ܘܗ̄ ܘܢܰܣܩܽܘܢ ܠܳܟ ܫܽܘܒܚܳܐ ܕܰܐܢ̱ܬ ܗܽܘ ܡܢܰܚܡܳܢܗܽܘܢ܀

ܦܶܬܓܳܡܳܐ: ܥܩܰܪܬܳܐ ܝܶܠܕܰܬ ܘܣܶܒܥܰܬ: ܘܣܰܓܺܝܰܐܬ ܒܢܰܝ̈ܳܐ ܨܶܕܝܰܬ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ ܕܠܺܠܝܳܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܟܰܕ ܕܶܝܢ ܡܰܛܺܝ ܙܰܒܢܳܐ ܕܡܶܠܬܳܐ ܢܚܰܘܶܐ ܢܰܦܫܶܗ܆ ܦܩܰܕ ܠܶܗ ܠܩܳܠܳܐ ܘܶܐܬܳܐ ܠܝܰܠܕܳܐ ܐܰܝܟ ܕܶܐܬܰܐܡܪܰܬ܆ ܝܰܗ̱ܒܠܶܗ ܠܣܳܒܳܐ ܦܺܐܪܳܐ ܘܚܰܕܝܶܗ ܐܰܝܟ ܣܽܘܟܳܝܶܗ܆ ܘܚܶܕܝܰܬ ܐܶܡܶܗ ܘܝܶܠܕܰܬ ܦܺܐܪܳܐ ܕܰܪܚܺܝܡ ܘܰܪܓܺܝܓ܀

ܘܟܰܕ ܡܶܬܚܰܫܒܺܝܢ ܘܰܕܢܶܩܪܽܘܢܳܝܗ̱ܝ ܠܰܫܡܶܗ ܙܟܰܪܝܳܐ܆ ܪܡܰܙ ܗ̱ܘܳܐ ܐܰܒܽܘܗ̱ܝ ܕܠܳܐ ܗܳܟܰܢܳܐ ܢܶܬܩܪܶܐ ܛܰܠܝܳܐ܆ ܐܶܠܳܐ ܢܶܗܘܶܐ ܫܡܶܗ ܝܽܘܚܰܢܳܢ ܐܰܝܟ ܕܶܐܬܶܐܡܰܪ܆ ܡܶܢ ܡܰܠܰܐܟܳܐ ܒܰܩܕܽܘܫ ܩܽܘ̈ܕܫܺܝܢ ܒܝܽܘܡ ܣܽܘܒܳܪܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀