ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܒܪܺܝܟܽ ܗ̱ܘ ܕܰܓܒܳܐ. ܟܳܗ̈ܢܶܐ ܥܰܦܪ̈ܳܢܶܐ܆ ܘܰܥܒܰܕ ܐܶܢܽܘܢ ܝܳܪ̈ܬܶܐ ܒܡܰܠܟܽܘܬܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܥܺܕܰܬ ܩܽܘܕܫܳܐ܆ ܩܰܪܶܒܝ ܒܳܥܽܘܬܳܐ܆ ܚܠܳܦ ܟܳܗ̈ܢܶܐ ܕܰܥܢܰܕܘ܆ ܡܶܢ ܡܰܕܒܰܚ ܩܽܘܕܫܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܫܺܝܚܳܐ ܕܦܰܪܩܳܗ̇. ܠܥܺܕܬܶܗ ܒܰܨܠܺܝܒܶܗ܆ ܒܳܟ ܢܶܬܦܰܪܩܽܘܢ ܝܰܠ̈ܕܶܝܗ̇ ܡܶܢ ܢܽܘܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܟܳܗ̈ܢܶܐ ܕܰܕܒܰܪܬ܆ ܡܶܢ ܥܺܕܰܬ ܩܽܘܕܫܳܐ܆ ܒܥܺܕܬܳܐ ܕܒܽܘܟܪ̈ܶܐ ܛܰܟܶܣ ܐܶܢܽܘܢ ܡܳܪܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܡܶܛܽܠ ܕܶܝܢ ܕܰܥܒܰܪ. ܐܳܕܳܡ ܦܽܘܩܕܳܢܳܐ܆ ܣܥܳܐ ܗ̱ܘܳܐ ܡܰܘܬܳܐ ܥܰܠ ܟܽܠ ܕܺܝܠܺܝܕ ܡܶܢ ܐܰܢ̱ܬܬܳܐ܆ ܫܽܘܒܚܳܐ ܠܝܳܗܽܘܒܳܐ܆ ܕܗܳܢ ܟܳܣܳܐ ܠܥܳܠܡܳܐ܆ ܕܟܽܠܢܳܫ ܫܳܬܶܐ ܠܶܗ܆ ܘܥܰܒܪܶܗ ܠܥܳܠܡܳܐ ܕܥܳܩ̈ܳܬܳܐ܀

ܒܰܐܬܪܳܐ ܡܠܶܐ ܛܽܘ̈ܒܶܐ. ܘܒܰܓܢܽܘܢ ܚܰܕ̈ܘܳܬܳܐ܆ ܬܰܡܳܢ ܢܶܬܒܰܣܡܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܕܰܥܢܰܕܘ܆ ܘܢܶܚܕܽܘܢ ܘܰܢܕܽܘܨܽܘܢ܆ ܒܓܽܘ̈ܕܶܐ ܕܩܰܕܺܝ̈ܫܶܐ܆ ܐܰܝܟܳܐ ܕܠܳܐ ܡܕܰܝܪܺܝܢ܆ ܬܰܡܳܢ ܛܽܘܪ̈ܳܦܶܐ܀

ܫܽܘܠܛܳܢܳܐ ܠܥܰܦܪܳܐ܆ ܝܰܗ̱ܒ ܗ̱ܘܳܐ ܨܶܒܝܳܢܳܟ܆ ܕܢܶܐܣܽܘܪ ܘܰܕܢܶܫܪܶܐ ܒܪܰܘܡܳܐ ܘܰܒܥܽܘܡܩܳܐ܆ ܘܰܠܥܰܒ̈ܕܰܝܟ ܡܳܪܝܳܐ܆ ܫܪܳܐ ܐܶܢܽܘܢ ܡܰܘܬܳܐ܆ ܘܰܐܥܶܠ ܚܒܰܫ ܐܶܢܽܘܢ܆ ܒܓܰܘ ܥܽܘܡܪܳܗ̇ ܕܰܫܝܽܘܠ܀

ܥܰܝ̈ܢܶܐ ܡܳܪܝ ܕܰܫܗܰܪ̈ܝ܆ ܒܓܰܘ ܠܰܝ̈ܠܰܘܳܬܳܐ܆ ܐܰܕܢܰܚ ܠܗܶܝܢ ܢܽܘܗܪܳܟ܆ ܒܝܰܘܡܳܐ ܕܡܶܐܬܺܝܬܳܟ܆ ܘܥܰܡ ܣܶܕܪ̈ܶܐ ܕܥܺܝܪ̈ܶܐ܆ ܫܽܘܒܚܳܐ ܢܶܬܠܽܘܢ ܠܳܟ܆ ܘܥܰܡܳܟ ܢܶܬܒܰܣܡܽܘܢ܆ ܒܢܽܘܗܪܳܐ ܫܒܺܝܚܳܐ ܕܦܰܪܨܽܘܦܳܟ܀

ܫܽܘܒܚܳܐ

ܠܳܐ ܕܶܝܢ ܬܶܟܪܶܐ ܠܳܟ܆ ܐܳܕܳܡ ܥܰܠ ܕܰܚܛܰܝܬ܆ ܐܶܡܰܪ ܠܶܗ ܡܳܪܝܳܐ܆ ܕܰܒܨܰܠܡܝ ܨܺܝܪ̈ܳܢ ܕܶܡ̈ܘܳܬܳܟ܆ ܠܳܐ ܓܶܝܪ ܨܳܒܶܐ ܐ̱ܢܳܐ܆ ܕܰܠܥܳܠܰܡ ܬܺܐܒܰܕ܆ ܕܶܐܢܳܐ ܐܳܬܶܐ ܐ̱ܢܳܐ܆ ܘܦܳܪܶܩ ܐ̱ܢܳܐ ܠܳܟ ܘܰܠܝܰܠ̈ܕܰܝܟ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܪܳܥܶܡ ܩܳܠܶܗ ܕܫܺܝܦܽܘܪܳܐ

ܡܫܺܝܚܳܐ ܝܰܡܳܐ ܕܰܚܢܳܢܳܐ܆ ܕܠܳܐ ܡܶܬܬܟܺܝܠܳܐ ܛܰܝܒܽܘܬܳܟ܆ ܠܒܶܝܬ ܥܰܢܺܝ̈ܕܶܐ ܐܶܬܬܰܚܬܺܝܬ܆ ܘܰܐܟܪܶܙܬ ܚܰܝ̈ܶܐ ܠܡܳܝܽܘ̈ܬܶܐ܆ ܘܰܒܬܶܫܒܽܘܚܬܳܐ ܐܶܬܢܰܚܰܡܬ܆ ܘܰܐܪܺܝܡܬ ܬܶܡܗܳܐ ܘܙܰܘܥܳܐ ܒܢܳܛܽܘܪ̈ܶܐ܆ ܒܦܰܓܪܳܟ ܘܰܕܡܳܟ ܢܶܬܚܰܣܽܘܢ܆ ܟܳܗ̈ܢܶܐ ܕܰܫܟܶܒܘ ܥܰܠ ܣܰܒܪܳܟ܆ ܘܢܶܦܪ݉ܚܽܘܢ ܒܰܥ̈ܢܳܢܶܐ܆ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ܆ ܘܢܶܥܠܽܘܢ ܥܰܡܳܟ ܠܰܓܢܽܘܢܳܐ܆ ܘܢܰܣܩܽܘܢ ܫܽܘܒܚܳܐ ܥܰܡ ܥܺܝܪ̈ܶܐ܆ ܘܥܰܡ ܡܰܠܰܐܟ̈ܶܐ܀

ܫܽܘܒܚܳܐ

ܡܳܪܳܐ ܕܪܰܘܡܳܐ ܘܰܕܥܽܘܡܩܳܐ܆ ܕܰܣܥܰܪ ܠܰܐܪܥܳܐ ܒܥܽܘܕܪ̈ܳܢܰܘܗ̱ܝ܆ ܘܣܰܝܒܰܪ ܚܰܫܰܘ̈ܗ̱ܝ ܕܰܨܠܺܝܒܳܐ܆ ܡܶܛܽܠ ܓܶܢܣܰܢ ܐ̱ܢܳܫܳܝܳܐ܆ ܛܰܠܳܐ ܕܰܡܠܶܐ ܫܽܘܒܩܳܢܳܐ܆ ܪܽܘܣ ܥܰܠ ܥܰܒ̈ܕܰܝܟ܆ ܕܰܫܟܶܒܘ ܥܰܠ ܣܰܒܪܳܟ܆ ܘܢܶܬܢܰܦܨܽܘܢ ܡܶܢ ܕܰܚܺܝܚܳܐ܆ ܘܢܶܬܒܰܣܡܽܘܢ ܒܰܓܢܽܘܢ ܢܽܘܗܪܳܐ܆ ܘܒܰܐ݉ܬܪܳܐ ܕܚܰܝ̈ܶܐ ܡܠܶܐ܆ ܘܒܰܡܛܰܠ̱̈ܠܶܐ ܢܰܗܺܝܪ̈ܳܬܳܐ܆ ܢܙܰܡܪܽܘܢ ܫܽܘܒܚܳܐ ܘܬܰܘܕܺܝܬܳܐ ܥܰܡ ܪ̈ܽܘܚܳܢܶܐ ܕܰܡܩܰܕܫܺܝܢ܆ ܠܰܐܠܳܗܽܘܬܳܟ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܛܰܠܳܐ ܕܚܰܝ̈ܶܐ ܗܰܘ ܕܶܐܫܬܰܕܰܪ ܡܶܢ ܐܰܒܳܐ

ܒܢܰܝ̈ ܬܶܫܡܶܫܬܰܢ܆ ܕܩܰܒܶܠܘ ܢܺܝܪܳܟ ܒܰܣܺܝܡܳܐ܆ ܥܒܶܕ ܕܽܘܟܪܳܢܗܽܘܢ ܒܒܶܝܬ ܩܽܘܕܫܳܐ܆ ܕܒܶܗ ܗܽܘ ܫܗܰܪܘ ܘܰܦܠܰܚܘ ܩܽܘܕܡܰܝܟ܆ ܘܡܳܐ ܕܡܶܬܦܰܪܥܺܝܢ ܥܰܡܠܰܝ̈ܗܽܘܢ܆ ܕܟܺܐܢ̈ܶܐ ܕܰܢܛܰܪܘ ܦܽܘܩܕܳܢܰܝ̈ܟ܆ ܐܰܫܘܳܐ ܐܶܢܽܘܢ ܠܰܓܢܽܘܢܳܟ܆ ܘܥܰܡ ܟܽܠ ܕܰܥܒܰܕ ܨܶܒܝܳܢܳܟ܆ ܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ܆ ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܗܽܘܢ܀

ܫܽܘܒܚܳܐ

ܐܰܚܰܝ̈ܢ ܕܰܗܘܰܘ܆ ܟܶܢܳܪ̈ܶܐ ܠܪܽܘܚܳܐ ܕܩܽܘܕܫܳܐ܆ ܘܰܒܥܰܡ̈ܠܶܐ ܘܰܒܕܽܘܒܳܪ̈ܶܐ܆ ܘܦܽܘܠܚܳܢܳܐ ܕܙܰܕܺܝܩܽܘܬܳܐ܆ ܥܒܰܕܘ ܨܶܒܝܳܢܳܟ ܦܳܪܽܘܩܰܢ܆ ܘܶܐܬܟܰܫܰܪܘ ܒܓܰܘ ܒܶܝܬ ܩܽܘܕܫܳܐ܆ ܐܰܫܘܳܐ ܐܶܢܽܘܢ ܠܰܓܢܽܘܢܳܟ܆ ܘܢܶܬܚܰܕܽܘܢ ܒܰܟܠܺܝ̈ܠܰܝܗܽܘܢ܆ ܘܥܰܠ ܦܳܬܽܘܪܳܐ ܕܡܰܠܟܽܘܬܳܟ܆ ܒܫܽܘܒܚܳܐ ܪܰܒܳܐ ܢܶܬܒܰܣܡܽܘܢ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ܆ ܘܙܰܕܺܝܩܰܝ̈ܟ ܫܽܘܒܚܳܐ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܠܟܳܗܢܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܨܶܒܬܳܐ ܕܟܳܗ̈ܢܶܐ ܕܳܫܶܗ ܡܰܘܬܳܐ ܒܥܽܘܡܪܳܗ̇ ܕܰܫܝܽܘܠ܆ ܘܰܚܡܰܠ ܗܶܕܪܳܐ ܕܰܡܫܰܡ̈ܫܳܢܶܐ ܒܓܰܘ ܐܳܦܰܕܢܶܝ̈ܗ̇܆ ܚܕܽܘ̈ܓܶܐ ܕܥܺܕܬܳܐ ܥܒܺܝܕܺܝܢ ܝܰܘܡܳܢ ܣܝܳܢܳܐ ܒܰܫܝܽܘܠ܆ ܘܰܚܪܶܫ ܩܳܠܳܐ ܕܟܶܢܳܪ̈ܰܝܗܽܘܢ ܘܰܒܛܶܠܘ ܗܶܢܽܘܢ܀

ܢܶܚܕܽܘܢ ܥܰܡܳܟ܆ ܟܳܗ̈ܢܶܐ ܕܰܫܟܶܒܘ ܒܰܪ ܐܰܠܳܗܳܐ܆ ܘܒܳܟ ܢܶܬܦܰܨܚܽܘܢ ܡܳܐ ܕܳܐܬܶܐ ܐܰܢ̱ܬ ܒܫܽܘܒܚܳܟ ܪܰܒܳܐ܆ ܐܰܚܰܝ̈ܢ ܕܰܫܟܶܒܘ ܐܳܦ ܐܰܒܳܗܰܝ̈ܢ ܕܰܦܛܰܪܘ ܡܶܢܰܢ܆ ܒܳܟ ܢܶܬܚܰܕܽܘܢ ܒܡܰܠܟܽܘܬ ܪܰܘܡܳܐ ܥܰܡ ܩܰܕܺܝܫܰܝ̈ܟ܀

ܡܫܺܝܚܳܐ ܕܺܐܝܬܰܝܟ ܡܳܪܳܐ ܕܟܽܘܡܪ̈ܶܐ ܘܪܰܒܳܐ ܕܟܳܗ̈ܢܶܐ܆

ܚܰܣܳܐ ܠܟܳܗܢܰܝ̈ܟ ܕܫܰܡܶܫܘ ܐ̱ܪ̈ܳܙܰܝܟ ܘܠܳܟ ܬܶܫܒܽܘܚܬܳܐ܀