ܕܰܐܪܒܥܳܐ ܒܫܰܒܳܐ

ܕܰܬܫܰܥܫܳܥܺܝ̈ܢ

ܩܳܠܳܐ ܒܩ̄: ܒܚܰܕ ܒܫܰܒܳܐ ܚܙܳܬܳܟ ܥܺܕܬܳܐ
(ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܥܶܕܳܢܳܐ ܕܰܐܟܪܶܙ ܝܰܘܢܳܢ܆ ܕܡܶܟܺܝܠ ܡܶܬܗܰܦܟܳܐ ܢܺܝܢܘܶܐ܆ ܒܶܗ ܒܝܰܘܡܳܐ ܘܰܒܥܶܕܳܢܳܐ܆ ܐܶܬܦܰܪܩܰܬ ܡܶܢ ܐܰܒܕܳܢܳܐ܆ ܥܢܳܢܷ̈ܐ ܘܥܰܪ̈ܦܶܠܶܐ ܡܶܢܫܶܠܝ܆ ܐܶܬܒܰܕܰܪ̈ܝ ܘܰܓܡܰܪ̈ܝ ܘܰܛܠܶܩܝ̈܀

ܫܽܘܒܚܳܐ

ܠܡܳܪܝܳܐ ܪܰܥܝܽܘܗ̱ܝ ܒܰܫܡܰܝܳܐ܆ ܘܰܠܝܰܘܢܳܢ ܥܰܒܕܶܗ ܒܰܐܪܥܳܐ܆ ܥܰܡܰܢ ܐܰܢ̱ܬ ܐܳܘ ܒܰܪ ܡܰܬܰܝ܆ ܕܒܺܐܝ̈ܕܰܝܟ ܚܰܝ̈ܶܐ ܐܶܫܟܰܚܢܰܢ܆ ܗܳܠܶܝܢ ܛܽܘ̈ܒܶܐ ܕܰܦܓܰܥܘ ܒܰܢ܆ ܕܡܶܢ ܡܰܘܬܳܐ ܠܚܰܝ̈ܶܐ ܗܦܰܟܢܰܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܠܰܬܝܳܒܽܘܬܳܐ ܐܰܝܟ ܕܠܰܡܕܺܝܢ̱ܬܳܐ ܕܫܽܘܪ̈ܶܐ ܥܰܠܘ ܗ̱ܘܰܘ܆ ܘܰܣܕܰܪܘ ܨܰܘܡܳܐ ܠܽܘܩܒܰܠ ܪܽܘܓܙܳܐ ܠܡܶܬܟܰܬܳܫܽܘ܆ ܣܰܩ̈ܶܐ ܠܒܶܫܘ ܗ̱ܘܰܘ ܘܰܣܕܰܪܘ ܨܠܽܘܬܳܐ ܕܢܺܐܪܥܽܘܢ ܩܪܳܒܳܐ܆ ܘܰܒܨܰܘܡܰܝ̈ܗܽܘܢ ܐܰܩܺܝܡܘ ܓܰܒܳܐ ܕܙܰܕܺܝܩܽܘܬܳܐ܀

ܫܽܘܒܚܳܐ ܠܰܐܒܳܐ ܕܩܰܒܶܠ ܕܶܡ̈ܥܶܐ ܡܶܢ ܢܺܝܢ̈ܘܳܝܶܐ܆ ܘܣܶܓܕܬܳܐ ܠܰܒܪܳܐ ܕܰܒܛܰܝܒܽܘܬܶܗ ܫܡܰܥ ܒܳܥܽܘܬܗܽܘܢ܆ ܬܰܘܕܺܝ ܠܪܽܘܚܳܐ ܕܒܰܛܶܠ ܡܶܢܗܽܘܢ ܠܰܓܙܳܪ ܕܺܝܢܳܐ܆ ܚܽܘܢ ܠܰܢ ܛܳܒܳܐ ܐܰܝܟ ܕܚܰܢܬ ܐܶܢܽܘܢ ܘܪܰܚܶܡ ܥܠܰܝܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܡܫܺܝܚܳܐ ܕܩܰܒܶܠ ܨܰܘܡܳܐ ܕܡܽܘܫܶܐ ܘܡܰܟܺܝܟܽܘܬܶܗ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܫܠܶܡ ܛܶܟܣܳܐ ܕܝܽܘܡ ܐܰܪܒܥܳܐ ܒܫܰܒܳܐ ܕܨܰܘܡܳܐ ܕܢܺܝܢܘܶܐ