ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܥܰܡ ܢܒܺܝ̈ܶܐ ܐܰܘܪܶܒܬܳܝܗ̱ܝ܆ ܘܥܰܡ ܫܠܺܝ̈ܚܶܐ ܦܶܨܬܶܗ ܣܺܝܡܳܐ܆ ܘܳܐܦ ܥܰܡ ܣܳܗ̈ܕܶܐ ܪܺܝܫܶܗ ܒܣܰܝܦܳܐ ܐܶܬܟܰܠܰܠ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟܽ ܗ̱ܘ ܡܫܺܝܚܳܐ ܕܰܓܒܳܟ܆ ܘܪܰܡܪܶܡ ܘܰܐܘܪܶܒ ܕܽܘܟܪܳܢܳܟ܆ ܟܳܪܽܘܙ ܩܽܘܫܬܳܐ܆ ܒܥܺܝ ܪ̈ܰܚܡܶܐ ܥܰܠ ܢܰܦ̈ܫܳܬܰܢ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܠܳܐ ܟܰܝ ܐܶܬܬܙܺܝܥ ܗ̱ܘܳܐ ܓܶܝܪ: ܡܰܠܟܳܐ ܚܰܢܦܳܐ ܟܰܕ ܚܙܳܝܗ̱ܝ ܗ̱ܘܳܐ: ܠܪܺܝܫܳܟ ܡܝܰܩܪܳܐ ܕܰܡܦܰܠܦܰܠ ܒܫܶܠ̈ܬܶܐ ܕܰܕܡܳܐ: ܘܰܒܓܰܘ ܦܺܝܢܟܳܐ ܡܶܙܕܰܝܰܚ ܗ̱ܘܳܐ܀

ܗܶܪܳܘܕܶܣ ܥܰܘܳܠܳܐ܆ ܡܶܢ ܥܰܡܳܐ ܕܰܕܠܳܐ ܢܳܡܽܘܣ܆ ܠܟܳܪܽܘܙ ܩܽܘܫܬܳܐ܆ ܚܒܰܫ ܘܰܩܛܰܠ ܕܠܳܐ ܣܰܟܠܽܘܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܫܳܪܽܘܬܳܐ ܥܒܰܕ ܡܰܠܟܳܐ܆ ܥܰܘܳܠܳܐ ܘܣܳܢܳܐܐ ܕܩܽܘܫܬܳܐ܆ ܘܫܰܕܰܪ ܕܰܒܪܳܗ̇܆ ܠܒܰܪ̱ܬ ܗܶܪܳܘܕܺܝܰܐ ܕܬܶܪܩܰܕ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܠܰܒܬܽܘܠܳܐ ܙܰܗܝܳܐ܆ ܝܽܘܚܰܢܳܢ ܥܒܰܕܬ ܐܺܝܙܓܰܕܳܐ܆ ܫܠܺܝܚܳܐ ܓܰܒܝܳܐ܆ ܘܡܳܟܽܘܪܳܐ ܕܥܺܕܰܬ ܩܽܘܕܫܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܢ̱ܬ ܕܰܠܝܽܘܡ ܕܽܘܟܪܳܢܶܗ܆ ܕܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܪܰܡܪܶܡܬ ܘܰܐܘܪܶܒܬ܆ ܘܝܰܩܰܪܬܳܝܗ̱ܝ ܒܰܐܪܒܰܥ ܦܶܢ̈ܝܳܢ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܕܰܠܝܽܘܚܰܢܳܢ܆ ܕܡܶܛܽܠܳܬܶܗ ܐܶܬܢܟܶܣ܆ ܪܰܡܪܶܡ ܘܰܐܘܪܶܒ ܕܽܘܟܪܳܢܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܕܰܠܩܰܕܺܝ̈ܫܶܐ܆ ܐܶܫܬܰܘܕܺܝܬ ܡܰܠܟܽܘܬ ܪܰܘܡܳܐ܆ ܒܰܨܠܽܘܬܗܽܘܢ ܘܰܕܝܽܘܚܰܢܳܢ. ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܠܳܐ ܟܰܝ ܐܶܬܬܙܺܝܥ ܗ̱ܘܳܐ ܡܰܠܟܳܐ ܚܰܢܦܳܐ܆ ܟܰܕ ܚܙܳܝܗ̱ܝ ܗ̱ܘܳܐ ܠܪܺܝܫܳܐ ܡܝܰܩܪܳܐ܆ ܕܰܡܦܰܠܦܰܠ ܒܫܶܠ̈ܬܶܐ ܕܰܕܡܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܠܥܺܕܬܳܟ ܪܰܡܪܶܡ܆ ܘܒܰܨܠܺܝܒܳܟ ܚܬܽܘܡ ܫܶܬܶܐܣܶܝ̈ܗ̇܆ ܘܫܰܪܰܪܶܝܗ̇ ܒܗܰܝܡܳܢܽܘܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܠܳܟ ܗ̱ܽܘ ܛܽܘܒܰܝܟ: ܝܽܘܚܰܢܳܢ ܓܰܒܝܳܐ܆ ܕܰܐܪܟܶܢܬ ܪܺܝܫܳܟ ܩܕܳܡ ܣܰܝܦܳܐ܆ ܡܶܛܽܠ ܚܽܘܒܶܗ ܕܰܡܫܺܝܚܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܥ̱ܽܘܗܕܳܢܳܐ ܕܟܺܐܢ̈ܶܐ ܠܘܳܬܶܗ ܗ̱ܽܘ܆ ܘܢܰܦ̈ܫܳܬܗܽܘܢ ܒܺܐܝܕܰܘ̈ܗ̱ܝ ܐܶܢܶܝܢ܆ ܘܬܰܫܢܺܝܩܳܐ ܠܗܶܝܢ ܠܳܐ ܩܳܪܶܒ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܛܽܘܒܰܝܟ ܦܺܐܪܳܐ ܕܥܰܩܪܽܘܬܳܐ܆ ܕܰܒܣܰܬܳܐ ܕܥܶܬܩܰܬ ܗܰܒܶܒܬ܆ ܘܰܗܘܰܝܬ ܣܓܽܘܠܳܐ ܡܰܠܳܠܳܐ܆ ܘܰܒܣܶܡ ܚܰܡܪܳܟ ܠܫܳܩܽܘܬܳܐ܀

ܝܽܘܚܰܢܳܢ ܒܣܰܝܦܳܐ ܐܶܬܩܛܶܠ܆ ܘܰܒܦܺܝܢܟܳܐ ܐܶܬܬܣܺܝܡ ܪܺܝܫܶܗ܆ ܘܠܰܩܕܳܡ ܡܰܠܟܳܐ ܐܰܥܶܠܬܶܗ܆ ܙܳܢܺܝܬܳܐ ܨܰܗܝܰܬ ܠܰܕܡܳܐ܀

ܝܽܘܚܰܢܳܢ ܒܟܰܪܣܳܐ ܐܶܬܓܒܺܝ܆ ܘܶܐܬܩܰܕܰܫ ܩܕܳܡ ܡܰܘܠܳܕܶܗ܆ ܕܢܰܟܪܶܙ ܗ̱ܘܳܐ ܩܕܳܡ ܡܶܐܬܺܝܬܶܗ܆ ܕܒܰܪ ܡܳܪܶܗ ܕܳܐܬܶܐ ܠܥܳܠܡܳܐ܀

ܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܛܽܘܒܰܝܟ ܕܡܳܪܳܟ ܐܰܣܗܶܕ ܥܠܰܝܟ܆ ܕܒܺܝܠܺܝ̈ܕܶܐ ܠܳܐ ܩܳܡ ܐܰܟܘܳܬܳܟ ܨܠܽܘܬܳܟ ܫܽܘܪܳܐ ܬܶܗܘܶܐ ܠܰܢ܀

ܫܠܰܚ ܠܶܗ ܡܶܢ ܒܶܝܬ ܐܰܣܺܝܪ̈ܶܐ܆ ܟܳܪܽܘܙ ܩܽܘܫܬܳܐ ܠܰܡܫܺܝܚܳܐ܆ ܕܰܐܢ̱ܬ ܗ̱ܽܘ ܐܺܝܬܰܝܟ ܗܰܘ ܕܳܐܬܶܐ܆ ܐܳܘ ܠܰܐܚܪܺܝܢ ܗ̱ܽܘ ܡܣܰܟܶܝܢܰܢ܀

ܥܰܠ ܕܰܐܟܣܶܗ ܗ̱ܘܳܐ ܝܽܘܚܰܢܳܢ܆ ܠܗܶܪܳܘܕܶܣ ܡܰܠܟܳܐ ܚܰܢܦܳܐ܆ ܒܣܰܝܦܳܐ ܦܰܣܩܶܗ ܗ̱ܘܳܐ ܠܪܺܝܫܶܗ܆ ܘܰܛܠܺܝܬܳܐ ܒܦܺܝܢܟܳܐ ܫܩܰܠܬܶܗ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܐܶܡܰܪ ܗ̱ܘܳܐ ܝܽܘܚܰܢܳܢ ܠܣܰܟܠܳܐ ܗܶܪܳܘܕܶܣ܆ ܕܠܳܐ ܫܰܠܺܝܛ ܠܳܟ ܕܬܶܬܩܰܪܰܒ ܠܳܗ̇ ܠܰܐܢ̱ܬܰܬ ܐܰܚܽܘܟ܆ ܙܰܘܥܰܐ ܗ̱ܘ ܪܰܒܳܐ ܩܕܳܡ ܡܳܪܝܳܐ܆ ܓܰܒܪܳܐ ܠܳܐ ܬܶܚܛܶܐ܀

ܒܗܰܘ ܥܶܕܳܢܳܐ. ܕܶܐܬܩܰܛܰܠ ܒܶܗ ܝܽܘܚܰܢܳܢ ܟܳܪܽܘܙܳܐ ܕܩܽܘܫܬܳܐ܆ ܚܰܫܳܐ ܠܒܶܫ̈ܝ ܗ̱ܘܰܝ̈ ܟܽܠ ܒܶܪ̈ܝܳܬܳܐ ܡܰܪܺܝܪܳܐܺܝܬ܆ ܕܰܚ̈ܙܰܝ ܠܰܕܡܳܐ ܕܶܐܫܬܰܦܰܥ܆ ܒܰܚܣܳܡܳܐ ܕܢܶܟܠܳܐ܀

ܗܶܪܳܘܕܶܣ܆ ܥܰܘܳܠܳܐ ܘܪܰܫܺܝܥܳܐ ܘܰܡܠܶܐ ܒܺܝ̈ܫܳܬܳܐ܆ ܕܰܡܛܰܢܶܦ ܗ̱ܘܳܐ ܠܰܐܢ̱ܬܰܬ ܐܰܚܽܘܗ̱ܝ ܗܶܪܳܘܕܺܝܰܐ܆ ܘܥܰܠ ܕܰܐܟܣܶܗ ܗ̱ܘܳܐ ܝܽܘܚܰܢܳܢ܆ ܒܰܚܣܳܡܳܐ ܩܰܛܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܒܝܽܘܡ ܕܽܘܟܪܳܢܳܟ: ܝܽܘܚܰܢܳܢ ܟܳܪܽܘܙ ܩܽܘܫܬܳܐ ܠܰܡܟܰܠܠܳܢܳܟ: ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ: ܡܒܰܪܟܳܐ ܓܶܝܪ ܐܺܝܬܰܝܟ܀

ܒܪܺܝܟܽ ܗ̱ܘ ܕܰܓܒܳܝܗ̱ܝ ܠܝܽܘܚܰܢܳܢ ܟܳܪܽܘܙ ܩܽܘܫܬܳܐ: ܕܰܢܣܺܝܡ ܐܺܝܕܶܗ: ܥܰܠ ܪܺܝܫܶܗ ܒܝܽܘܪܕܢܳܢ ܢܰܗܪܳܐ: ܡܒܰܪܟܳܐ ܓܶܝܪ ܐܺܝܬܰܝܟ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܒܪܺܝܟܽ ܗ̱ܘ ܡܫܺܝܚܳܐ܆ ܕܢܰܨܰܚ ܘܰܐܘܪܶܒ ܕܽܘܟܪܳܢܶܗ܆ ܕܝܽܘܚܰܢܳܢ ܒܥܺܕܬܳܐ ܡܗܰܝܡܰܢܬܳܐ ܘܗܳܐ ܩܳܥܝܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܦܺܐܪܳܐ ܪܓܺܝܓܳܐ܆ ܕܶܐܬܺܝܠܶܕ ܡܶܢ ܣܰܬܳܐ ܥܩܰܪܬܳܐ܆ ܘܰܡܟܰܪ ܠܶܗ ܥܺܕܬܳܐ ܠܰܡܫܺܝܚܳܐ ܘܗܳܐ ܡܫܰܒܚܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܒܺܝܚ ܟܽܘܠܳܠܳܟ܆ ܒܬܽܘܠܳܐ ܙܰܗܝܳܐ ܝܽܘܚܰܢܳܢ܆ ܘܰܒܪܺܝܟ ܝܰܘܡܳܐ ܕܥܰܕܥܺܐܕܳܟ ܐܳܘ ܢܰܨܺܝܚܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܚܙܳܬܳܐ ܕܚܺܝܠܬܳܐ܆ ܒܬܽܘܠܳܐ ܙܰܗܝܳܐ ܘܩܰܕܺܝܫܳܐ܆ ܕܰܩܛܺܝܠܽ ܗ̱ܘ ܒܣܰܝܦܶܗ ܕܪܰܫܺܝܥܳܐ ܥܰܠ ܕܰܐܟܣܶܗ ܗ̱ܘܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܩܥܳܐ ܝܽܘܚܰܢܳܢ܆ ܠܗܶܪܳܘܕܶܣ ܟܰܕ ܓܳܙܶܡ ܠܶܗ܆ ܕܠܳܐ ܫܰܠܺܝܛ ܠܳܟ ܕܬܶܬܩܰܪܰܒ ܠܰܐܢ̱ܬܰܬ ܐܰܚܽܘܟ܆ ܘܰܒܣܰܝܦܳܐ ܦܰܣܩܶܗ ܠܪܺܝܫܶܗ܆ ܘܒܰܣܡܳܟܳܐ ܐܰܥܶܠ ܙܰܝܚܶܗ܆ ܐܶܬܕܰܟܪܰܝܢ ܡܳܪܝܳܐ܀

ܡܶܛܽܠ ܪܶܩܕܳܐ. ܕܪܰܩܕܰܬ ܒܰܪ̱ܬ ܗܶܪܳܘܕܺܝܰܐ܆ ܐܶܬܦܣܶܩ ܪܺܝܫܶܗ ܕܝܽܘܚܰܢܳܢ ܘܰܒܦܺܝܢܟܳܐ ܐܶܬܬܣܺܝܡ܆ ܐܳܘ ܠܶܗ ܠܪܶܩܕܳܐ ܕܙܳܢܺܝܬܳܐ ܕܦܰܣܩܶܗ ܠܪܺܝܫܶܗ ܕܝܽܘܚܰܢܳܢ܆ ܐܶܬܕܰܟܪܰܝܢ ܡܳܪܝܳܐ܀

ܛܽܘܒܰܝܟ ܓܰܒܝܳܐ܆ ܝܽܘܚܰܢܳܢ ܕܡܳܪܳܟ ܣܗܶܕ ܥܠܰܝܟ܆ ܕܠܳܐ ܩܳܡ ܒܺܝܠܺܝ̈ܕܰܝ ܢܶܫ̈ܶܐ ܐܰܝܟ ܝܽܘܚܰܢܳܢ܆ ܕܣܺܝܡܳܐ ܦܶܨܬܶܗ ܒܰܢ̈ܒܺܝܶܐ ܘܰܚܠܺܝܛ ܫܰܪܒܶܗ܆ ܒܰܫܠܺܝ̈ܚܶܐ܆ ܐܶܬܕܰܟܪܰܝܢ ܡܳܪܝܳܐ܀

ܪܰܒ ܗ̱ܽܘ ܘܰܫܒܺܝܚ܆ ܝܽܘܡ ܕܽܘܟܪܳܢܳܟ ܝܽܘܚܰܢܳܢ܆ ܘܡܶܙܕܰܝܰܚ ܐܳܦ ܥܰܕܥܺܐܕܳܟ ܒܰܐܪܒܰܥ ܦܶܢ̈ܝܳܢ܆ ܘܥܺܕܬܳܐ ܚܳܕܝܳܐ ܥܰܡ ܝܰܠ̈ܕܶܝܗ̇ ܘܙܳܡܪܳܐ ܫܽܘܒܚܳܐ ܠܗܰܘ ܕܰܓܒܳܟ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܒܚܰܕܘܳܐ ܒܰܛܢܶܗ܆ ܘܰܒܕܰܝܨܳܐ ܒܟܰܪܣܳܐ ܕܶܐܡܶܗ܆ ܘܰܒܪܶܩܕܳܐ ܕܗܶܪܳܘܕܺܝܰܐ ܐܶܬܦܣܶܩ ܪܺܝܫܶܗ܆ ܘܒܰܫܡܰܝܳܐ ܪܫܺܝܡ ܕܽܘܟܪܳܢܶܗ ܘܰܒܓܰܘ ܬܺܒܶܝܠ ܢܶܨܚܳܢܶܗ܆ ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܒܕܽܘܟܪܳܢܳܟ ܟܳܪܽܘܙܳܐ: ܘܢܰܨܺܝܚ ܫܽܘܦܪ̈ܶܐ ܡܳܪܝ ܝܽܘܚܰܢܳܢ: ܚܳܕܝܳܐ ܥܺܕܬܳܐ ܐܳܦ ܝܰܠ̈ܕܶܝܗ̇ ܙܳܡܪܺܝܢ ܫܽܘܒܚܳܐ: ܘܩܳܥܶܝܢ ܘܳܐܡܪܺܝܢ: ܐܶܬܕܰܟܪܰܝܢ ܡܳܪܝ ܡܳܐ ܕܳܐܬܶܝܬ܀

ܠܚܶܫ ܒܺܝܫܳܐ ܠܰܐܢ̱ܬܬܳܐ: ܘܫܰܓܫܰܬ ܠܡܰܠܟܳܐ ܩܰܠܺܝܠܽܘܬܳܐ: ܘܦܰܣܩܰܬ ܠܪܺܝܫܶܗ ܕܝܽܘܚܰܢܳܢ ܒܶܝܬ ܐܰܣܺܝܪ̈ܶܐ: ܘܗܳܐ ܥܒܺܝܕ ܫܽܘܪܳܐ: ܠܢܰܦ̈ܫܳܬܳܐ ܕܰܡܝܰܩܪ̈ܳܢܰܘܗ̱ܝ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ

ܝܽܘܚܰܢܳܢ ܛܰܠܝܳܐ ܪܓܺܝܓܳܐ ܒܪܶܗ ܕܰܙܟܰܪܝܳܐ܆ ܣܓܽܘܠܳܐ ܕܪܰܒܝܰܬ ܪܽܘܚ ܩܽܘܕܫܳܐ ܡܶܢ ܣܰܬܳܐ ܥܩܰܪܬܳܐ܆ ܗܽܘ ܦܬܰܚ ܦܽܘܡܶܗ܆ ܕܰܐܒܽܘܗ̱ܝ ܕܰܐܣܺܝܪ ܗ̱ܘܳܐ܆ ܘܥܽܘܒܳܐ ܕܶܐܡܶܗ܆ ܕܡܶܡܬܽܘܡ ܠܳܐ ܐܰܦܪܺܝ܆ ܗܽܘ ܦܰܬܚܳܗ̇ ܠܡܰܥܡܽܘܕܺܝܬܳܐ ܩܕܳܡ ܚܰܛܳܝ̈ܶܐ܆ ܘܢܳܚܬܺܝܢ ܥܳܡܕܺܝܢ ܚܰܝ̈ܳܒܶܐ ܘܙܰܟܳܝ̈ܶܐ ܣܳܠܩܺܝܢ܆ ܗ̄ܘܗ̄܀

ܫܽܘܒܚܳܐ

ܝܽܘܡ ܕܽܘܟܪܳܢܳܟ ܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܫܽܘܪܳܐ ܢܶܗܘܶܐ ܠܥܺܕ̈ܳܬܳܐ ܥܕܰܡܳܐ ܠܫܽܘܠܳܡܳܐ܆ ܚܰܫ̈ܶܐ ܕܰܣܒܰܠܬ. ܘܽܐܘܠ̈ܨܳܢܶܐ ܕܣܰܝܒܰܪܬ܆ ܘܰܕܡܳܐ ܚܰܣܝܳܐ܆ ܕܨܰܘܪܳܟ ܕܶܐܫܬܰܦܰܥ܆ ܐܰܝܟ ܩܽܘܪܒܳܢܳܐ ܢܶܬܩܰܪܰܒ ܠܰܡܠܶܟ ܡܰܠ̈ܟܶܐ܆ ܢܶܬܬܢܺܝܚ ܒܶܗ ܘܢܶܥܒܶܕ ܪ̈ܰܚܡܶܐ ܥܰܠ ܟܽܠܶܗ ܥܳܠܡܳܐ܆ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܬܗܰܪ ܓܰܒܪܺܐܶܝܠ
ܥܰܠ ܒܶܝܬ ܕܺܝܢܳܐ ܥܳܒܰܪ ܗ̱ܘܺܝܬ

ܗܘܳܐ ܝܽܘܚܰܢܳܢ܆ ܩܳܠܳܐ ܕܩܳܪܶܐ ܒܓܰܘ ܚܽܘܪܒܳܐ܆ ܕܡܰܠܟܽܘܬܳܐ ܗܳܝ ܕܰܫܡܰܝܳܐ܆ ܩܶܪܒܰܬ ܠܳܗ̇ ܥܒܶܕܽܘܢ ܦܺܐܪ̈ܶܐ܆ ܐܰܝܠܶܝܢ ܕܫܳܘܶܝܢ ܠܳܗ̇ ܠܰܬܝܳܒܽܘܬܳܐ܆ ܐܰܢ̱ܬܽܘܢ ܝܰܠ̈ܕܶܐ ܕܳܐܟܶܕܢ̈ܶܐ܆ ܕܰܐܟܳܪܳܐ ܕܚܰܝ̈ܶܐ ܡܰܢܰܥ܆ ܘܰܡܛܳܐ ܠܶܗ ܕܢܺܐܬܶܐ܆ ܗܰܘ ܕܰܐܚܺܝܕ ܪܰܦܫܳܐ ܒܺܐܝܕܰܘ̈ܗ̱ܝ܆ ܘܚ̈ܶܛܶܐ ܟܳܢܶܫ ܠܓܰܘ ܐܰܘܨܪ̈ܰܘܗ̱ܝ܆ ܘܰܠܬܶܒܢܳܐ ܡܰܘܩܶܕ ܒܢܽܘܪܳܐ܀

ܫܽܘܒܚܳܐ

ܒܬܽܘܠܳܐ ܙܰܗܝܳܐ܆ ܝܽܘܚܰܢܳܢ ܒܰܪ ܠܶܘܳܝ̈ܶܐ܆ ܓܰܒܪܳܐ ܓܡܺܝܪܳܐ ܕܬܶܕܡܽܘܪܬܳܐ܆ ܕܰܒܓܰܘ ܚܽܘܪܒܳܐ ܐܶܬܪܰܒܺܝ܆ ܡܶܢ ܥܶܩܳܪ̈ܶܐ ܘܰܫܦܰܪ ܠܰܐܠܳܗܳܐ܆ ܘܰܢܦܰܩ ܕܢܶܗܘܶܐ ܟܳܪܽܘܙܳܐ܆ ܠܗܰܘ ܟܰܣܝܳܐ ܕܶܐܬܳܐ ܠܓܶܠܝܳܐ܆ ܠܦܽܘܪܩܳܢ ܒܶܪ̈ܝܳܬܳܐ܆ ܘܣܰܒܰܪ ܗ̱ܘܳܐ ܠܥܺܕܰܬ ܩܽܘܕܫܳܐ܆ ܕܡܰܢܰܥ ܠܶܗ ܚܰܬܢܳܐ ܡܳܪܶܟܝ܆ ܘܰܡܟܺܝܪܶܟܝ ܒܰܪ̱ܬ ܐܺܝܡܳܡܳܐ܀

ܡܶܢ ܥܳܠܰܡ

ܥܰܠ ܒܶܝܬ ܕܺܝܢܳܐ. ܥܳܒܰܪ ܗܘܺܝܿܬ ܕܩܳܠܳܐ ܫܶܡܥܶܬ. ܢܰܦܫܳܐ ܕܳܐܡܪܳܐ ܠܶܗ ܠܦܰܓܪܳܐ. ܠܘܰܝ ܕܶܝܢ ܦܰܓܪܳܐ ܠܳܐ ܚܙܺܝܬܳܟ. ܐܳܦܠܳܐ ܠܒܶܫܬܳܟ ܐܳܦܠܳܐ ܥܶܡ̇ܪܶܬ ܒܳܟ. ܕܫܰܕܰܠܬܳܢܝ ܒܰܪ̈ܓܺܝܓܳܬܳܟ: ܘܓܳܪܶܬ ܘܓܶܢܒܶܬ ܐܳܦ ܩܶܛܠܶܬ: ܘܕܰܝܳܢܳܐ ܠܚܺܝ̣ܡ ܥܠܰܝ. ܘܶܐܢ ܡܳܪܝܳܐ ܠܳܐ ܡܥܰܕܰܪ ܠܺܝ. ܡܰܢ ܗܳܘܶܐ ܠܺܝ ܥܳܕܽܘܪܳܐ. ܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ܀

ܦܶܬܓܳܡܳܐ: ܚܶܟܡܬܳܐ ܪܳܢܶܐ ܦܽܘܡܶܗ ܕܙܰܕܺܝܩܳܐ ܘܠܶܫܳܢܶܗ ܡܡܰܠܶܠ ܕܺܝܢܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܗܳܢܳܐ ܡܠܺܝܠܳܐ ܕܳܐܦ ܠܳܐ ܡܰܪܒܥܳܐ ܒܫܶܬܩܳܐ ܦܰܟܪܶܗ܆ ܡܶܢ ܕܰܢܣܰܒܰܪ ܫܰܪܺܝܪ̈ܳܬܳܐ ܠܥܳܠܡܳܐ ܟܽܠܶܗ܆ ܪܽܘܚܳܐ ܪܰܒܝܶܗ ܒܚܰܝ̈ܶܐ ܚܰܕ̱̈ܬܶܐ ܡܶܢ ܛܰܠܝܽܘܬܶܗ܆ ܘܟܽܠܗܽܘܢ ܫܽܘܦܪ̈ܶܐ ܕܺܐܝܬ ܠܰܟܝܳܢܳܐ ܣܕܺܝܪܺܝܢ ܗ̱ܘܰܘ ܒܶܗ܀

ܠܳܟ ܬܶܫܒܽܘܚܬܳܐ ܝܰܠܕܳܐ ܦܰܐܝܳܐ ܕܰܒܬܽܘܠܽܘܬܳܐ܆ ܕܒܰܪ ܥܰܩܪܽܘܬܳܐ ܥܠܰܝܟ ܐܰܟܪܶܙ ܗ̱ܘܳܐ ܕܒܰܪ ܐܺܝܬܽܘܬܳܐ ܐܰܢ̱ܬ܆ ܘܟܽܠ ܕܰܫܡܰܥ ܗ̱ܘܳܐ ܘܺܝܠܶܦ ܫܪܳܪܳܐ ܕܡܰܠܦܳܢܽܘܬܶܗ܆ ܕܳܫ̈ܢܶܐ ܕܫܽܘܒܚܳܐ ܛܥܺܝܢ ܟܰܕ ܩܳܥܶܐ ܫܽܘܒܚܳܐ ܠܰܫܡܳܟ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀