ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܰܚܠܳܦܰܘܗ̱ܝ. ܝܽܘܚܰܢܳܢ ܐܶܬܢܟܶܣ܆ ܡܶܢ ܥܰܘܳܠܳܐ ܕܡܶܢ ܪܶܓܬܳܐ ܐܶܙܕܟܺܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܒܚܽܘܒܳܐ. ܘܗܰܝܡܳܢܽܘܬܳܐ ܕܒܶܗ܆ ܦܫܰܛ ܝܽܘܚܰܢܳܢ ܨܰܘܪܶܗ ܩܕܳܡ ܣܰܝܦܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܠܒܰܪܬܳܗ̇ ܦܶܩܕܰܬ. ܕܬܶܫܰܐܠ ܡܶܢ ܫܳܛܝܳܐ܆ ܪܺܝܫܶܗ ܕܓܰܒܝܳܐ ܟܳܪܽܘܙܳܐ ܕܩܽܘܫܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܘܳܝܳܐ ܢܛܺܝܪ ܠܶܗ. ܠܗܶܪܳܘܕܶܣ ܦܰܩܪܳܐ܆ ܕܰܦܣܰܩ ܪܺܝܫܶܗ ܕܝܽܘܚܰܢܳܢ ܕܰܐܟܣܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܝܽܘܡ ܕܽܘܟܪܳܢܳܟ. ܟܳܪܽܘܙܳܐ ܕܩܽܘܫܬܳܐ܆ ܫܡܰܝ̈ܳܐ ܚܳܕܶܝܢ ܘܰܐܪܥܳܐ ܗܳܐ ܪܳܘܙܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܪܺܝܟܽ ܗ̱ܘ ܡܫܺܝܚܳܐ. ܕܰܐܘܪܶܒ ܕܽܘܟܪܳܢܳܟ܆ ܒܪܰܘܡܳܐ ܘܥܽܘܡܩܳܐ ܘܒܰܥܕܶܢ ܥܰܠ ܡܰܕܒܚܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܦܫܽܘܛ ܝܰܡܺܝܢܳܟ. ܕܰܠܡܳܪܳܟ ܐܰܥܡܕܰܬ܆ ܘܒܰܪܶܟ ܟܶܢܫܰܢ ܕܙܰܝܰܚ ܕܽܘܟܪܳܢܳܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܒܰܡܣܳܐܢܳܐ ܣܩܺܝܠܳܐ. ܘܪܶܩܕܳܐ ܙܰܠܺܝܠܳܐ܆ ܒܰܪ̱ܬ ܗܶܪܳܘܕܺܝܰܐ܆ ܠܝܽܘܚܰܢܳܢ ܩܶܛܠܰܬ܆ ܘܳܝܳܐ ܠܩܳܛܽܘܠܳܐ. ܘܛܽܘܒܳܐ ܠܰܩܛܺܝܠܳܐ܆ ܕܒܺܝܠܺܝ̈ܕܰܝ ܢܶܫ̈ܶܐ܆ ܕܪܰܒ ܡܶܢܶܗ ܠܳܐ ܩܳܡ܀

ܡܰܢܽܘ ܠܳܐ ܢܶܬܘܰܗ. ܒܚܰܫܳܐ ܘܟܰܪܝܽܘܬܳܐ܆ ܒܰܚܙܳܬܳܐ ܕܚܺܝܠܬܳܐ. ܕܣܽܘܪܳܕܳܐ ܡܰܠܝܳܐ܆ ܒܬܽܘܠܳܐ ܩܰܕܺܝܫܳܐ܆ ܕܰܩܛܺܝܠ ܕܠܳܐ ܣܰܟܠܽܘ܆ ܒܺܐܝ̈ܕܰܝ ܙܳܢܺܝܬܳܐ܆ ܕܰܠܡܰܠܟܳܐ ܫܶܦܪܰܬ܀

ܠܳܐ ܩܳܡ ܒܺܝܠܺܝ̈ܕܶܐ܆ ܕܪܰܒ ܡܶܢ ܝܽܘܚܰܢܳܢ. ܐܰܝܟܰܢܳܐ ܕܰܐܡܺܝܪ܆ ܡܶܢ ܦܽܘܡ ܒܳܪܽܘܝܶܗ܆ ܬܰܘ ܟܽܠܟܽܘܢ ܥܰܡ̱̈ܡܶܐ. ܒܚܰܕܘܳܐ ܘܒܰܕܝܳܨܳܐ܆ ܢܙܰܝܰܚ ܕܽܘܟܪܳܢܶܗ. ܕܰܠܪ̈ܰܚܡܶܐ ܢܶܫܬܘܶܐ܀

ܬܶܗܪܳܐ ܘܕܽܘܡܳܪܳܐ. ܕܰܐܝܟܰܢ ܠܳܐ ܚܫܶܟ ܗ̱ܘܳܐ܆ ܢܽܘܗܪܳܐ ܕܰܣܪ̈ܺܝܚܶܐ܆ ܣܰܟ̈ܠܶܐ ܘܙܰܠܺܝ̈ܠܶܐ܆ ܟܰܕ ܚܳܙܶܝܢ ܗ̱ܘܰܘ ܠܶܗ܆ ܠܪܺܝܫܶܗ ܕܩܰܕܺܝܫܳܐ܆ ܒܺܐܝ̈ܕܰܝ ܙܳܢܺܝܬܳܐ܆ ܒܦܺܝܢܟܳܐ ܘܦܺܝܠ ܒܰܕܡܳܐ܀

ܛܽܘܒܰܝܟ ܝܽܘܚܰܢܳܢ. ܕܡܳܪܳܟ ܐܰܣܗܶܕ ܥܠܰܝܟ܆ ܕܒܺܝܠܺܝ̈ܕܰܝ ܢܶܫ̈ܶܐ܆ ܠܳܐ ܩܳܡ ܐܰܟܘܳܬܳܟ܆ ܕܰܐܢ̱ܬ ܗ̱ܘ ܣܰܒܰܪܬܳܗ̇܆ ܠܥܺܕܬܳܐ ܘܶܐܡܰܪܬ ܠܳܗ̇܆ ܕܗܳܐ ܒܳܬܰܪܝ ܐܳܬܶܐ܆ ܦܳܪܽܘܩܶܗ ܕܥܳܠܡܳܐ܀

ܫܽܘܒܚܳܐ

ܥܰܠ ܩܶܣܛܽܘܢܳܪܳܐ. ܠܓܰܘ ܒܶܝܬ ܐܰܣܺܝܪ̈ܶܐ܆ ܘܶܐܫܟܚܶܗ ܠܝܽܘܚܰܢܳܢ. ܕܰܓܗܺܝܢ ܘܰܡܨܰܠܶܐ܆ ܣܰܝܦܶܗ ܫܡܺܝܛ ܗ̱ܘܳܐ ܠܶܗ܆ ܘܺܐܝ̈ܕܰܘܗ̱ܝ ܪ̈ܳܥܠܳܢ ܗ̱ܘܰܝ̈܆ ܘܦܰܓܪܶܗ ܪܳܐܶܬ ܗ̱ܘܳܐ. ܒܙܰܘܥܳܐ ܘܣܽܘܪܳܕܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ ܡܽܘܢ ܝܺܬܰܪܘ

ܒܬܽܘܠܳܐ ܙܰܗܝܳܐ ܘܩܰܕܺܝܫܳܐ܆ ܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܠܳܟ ܛܽܘܒܰܝܟ ܘܛܽܘܒܳܐ ܠܢܰܦܫܳܟ܆ ܡܶܢ ܟܽܠ ܕܰܒܪܰܘܡܳܐ ܘܥܽܘܡܩܳܐ܆ ܕܡܶܢ ܪܽܘܚܳܐ ܕܩܽܘܕܫܳܐ ܐܶܬܓܒܺܝܬ܆ ܕܬܶܗܘܶܐ ܡܰܥܡܶܕ ܦܳܪܽܘܩܶܗ ܕܥܳܠܡܳܐ܆ ܘܰܬܣܺܝܡ ܐܺܝܕܳܟ ܥܰܠ ܪܺܝܫܶܗ ܕܰܡܫܺܝܚܳܐ ܒܰܪ ܐܰܠܳܗܳܐ܆ ܫܽܘ݉ܒܚܳܐ ܠܛܰܝܒܽܘܬܶܗ ܕܰܓܒܳܟ ܕܬܶܗܘܶܐ ܟܳܪܽܘܙܶܗ܆ ܘܬܰܟܪܶܙ ܐܽܘܪܚܳܐ ܩܕܳܡ ܡܶܐܬܝܶܗ܆ ܘܥܰܠ ܡܰܠܟܽܘܬܳܐ ܚܰܘܺܝܬ܆ ܕܩܶܪܒܰܬ ܠܳܗ̇ ܕܬܺܐܬܶܐ܀

ܫܽܘܒܚܳܐ

ܠܳܟ ܬܶܫܒܽܘܚܬܳܐ ܐܰܠܳܗܳܐ. ܝܺܚܺܝܕܳܝܳܐ ܕܡܶܢ ܐܰܒܳܐ܆ ܕܦܽܘܡܳܟ ܩܰܕܺܝܫܳܐ ܐܶܡܰܪ܆ ܡܶܛܽܠ ܓܰܒܝܳܐ ܝܽܘܚܰܢܳܢ܆ ܕܠܳܐ ܩܳܡ ܒܺܝܠܺܝ̈ܕܰܝ ܢܶܫ̈ܶܐ܆ ܐ̱ܚܪܺܝܢ ܐܰܟܘܳܬܶܗ ܡܥܰܠܝܳܐ ܘܩܰܕܺܝܫܳܐ܆ ܠܶܗ ܗܽܘ ܓܒܰܝܬ ܡܶܢ ܓܰܘ ܟܰܪܣܳܐ܆ ܕܢܶܗܘܶܐ ܩܽܘܕܡܰܝܟ ܐܺܝܙܓܰܕܳܐ܆ ܩܳܠܳܐ ܩܕܳܡ ܡܶܠܬܳܐ܆ ܘܰܫܪܳܓܳܐ ܕܰܩܕܳܡ ܫܶܡܫܳܐ܆ ܘܰܕܢܰܟܪܶܙ ܠܰܬܝܳܒܽܘܬܳܐ ܠܟܽܠܗܽܘܢ ܐܰܝܠܶܝܢ ܕܥܳܡܕܺܝܢ܆ ܡܶܢܶܗ ܒܓܰܘ ܝܽܘܪܕܢܳܢ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ

ܒܬܽܘܠܳܐ ܙܰܗܝܳܐ. ܝܽܘܚܰܢܳܢ ܒܰܪ ܠܶܘܳܝ̈ܶܐ܆ ܓܰܒܪܳܐ ܓܡܺܝܪܳܐ ܕܬܶܕܡܽܘܪܬܳܐ܆ ܕܰܒܓܰܘ ܚܽܘܪܒܳܐ ܐܶܬܪܰܒܺܝ܆ ܘܡܶܢ ܥܶܩܳܪ̈ܶܐ ܕܰܒܕܰܒܪܳܐ܆ ܐܶܣܬܰܝܒܰܪ ܢܽܘܓܪܳܐ ܕܰܫܢܰܘ̈ܗ̱ܝ܆ ܘܰܢܦܰܩ ܕܢܶܗܘܶܐ ܟܳܪܽܘܙܳܐ܆ ܠܗܰܘ ܟܰܣܝܳܐ ܕܶܐܬܳܐ ܠܓܶܠܝܳܐ܆ ܘܰܢܣܰܒܰܪ ܠܥܺܕܰܬ ܩܽܘܕܫܳܐ܆ ܕܡܰܢܰܥ ܠܶܗ ܚܰܬܢܳܐ ܡܳܪܶܗ܀

ܫܽܘܒܚܳܐ

ܬܗܰܪܘ ܥܶܠܳܝ̈ܶܐ. ܘܛܽܘܒܳܐ ܝܰܗ̱ܒܘ ܠܶܗ ܠܝܽܘܚܰܢܳܢ܆ ܕܗܶܢܽܘܢ ܙܳܝܥܺܝܢ ܡܶܢ ܙܺܝܘܶܗ܆ ܘܠܳܐ ܡܶܫܟܚܺܝܢ ܕܰܢܚܽܘܪܽܘܢ ܒܶܗ܆ ܝܰܡܺܝܢܶܗ ܣܳܡ ܥܰܠ ܪܺܝܫܶܗ܆ ܟܰܕ ܐܶܬܳܐ ܠܡܰܥܡܽܘܕܺܝܬܳܐ܆ ܘܡܳܪܶܗ ܐܰܣܗܶܕ ܥܰܠ ܫܽܘܦܪܶܗ܆ ܕܒܺܝܠܺܝ̈ܕܰܝ ܢܶܫ̈ܶܐ ܟܽܠܗܶܝܢ܆ ܠܳܐ ܩܳܡ ܕܪܰܒ ܡܶܢ ܝܽܘܚܰܢܳܢ܆ ܟܳܪܽܘܙܳܐ ܐܰܠܳܗܳܝܳܐ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܚܶܟܡܬܳܐ ܪܳܢܶܐ ܦܽܘܡܶܗ ܕܙܰܕܺܝܩܳܐ ܘܠܶܫܳܢܶܗ ܡܡܰܠܶܠ ܕܺܝܢܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܥܰܠ ܝܽܘܚܰܢܳܢ ܙܰܘܥܰܐ ܗ̱ܘ ܪܰܒܳܐ ܠܰܡܡܰܠܳܠܽܘ܆ ܕܠܰܘ ܚܰܕ ܫܽܘܦܪܳܐ ܐܶܬܚܰܘܺܝ ܒܶܗ ܐܶܠܳܐ ܣܰܓܺܝ܆ ܢܒܺܝܳܐ ܐܶܩܪܶܝܘܗ̱ܝ ܚܠܺܝܛ ܗ̱ܽܘ ܫܰܪܒܶܗ ܥܰܡ ܕܰܫܠܺܝ̈ܚܶܐ܆ ܫܠܺܝܚܳܐ ܐܺܡܪܺܝܘܗ̱ܝ ܗܳܐ ܥܰܡ ܣܳܗ̈ܕܶܐ ܦܶܨܬܶܗ ܣܺܝܡܳܐ܀

ܗܳܢܳܐ ܕܺܝܠܺܝܕ ܡܶܢ ܒܰܪ̱ܬ ܐܰܗܪܽܘܢ ܦܰܓܪܳܢܳܐܺܝܬ܆ ܘܡܰܣܶܩ ܕܶܒ̈ܚܶܐ ܐܰܝܟ ܡܰܠܟܺܝܙܕܶܩ ܪܽܘܚܳܢܳܐܺܝܬ܆ ܗܳܢܳܐ ܕܩܰܒܶܠ ܪܽܘܚܳܐ ܕܩܽܘܕܫܳܐ ܒܟܰܪܣܳܐ ܕܶܐܡܶܗ܆ ܘܰܐܟܪܶܙ ܬܰܡܳܢ ܥܰܠ ܗܰܘ ܒܰܛܢܳܐ ܕܰܒܬܽܘܠܽܘܬܳܐ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀