ܘܕܽܘܟܪܳܢܳܐ ܕܡܳܪܝ ܒܰܣܶܝܠܺܝܳܘܣ ܘܡܳܪܝ ܓܪܺܝܓܳܘܪܺܝܳܘܣ

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܰܐܘܪܶܒܬ ܐܳܦ ܝܰܩܰܪܬ܆ ܕܽܘܟܪ̈ܳܢܰܝܗܽܘܢ ܕܩܰܕܺܝ̈ܫܶܐ܆ ܒܰܣܶܝܠܺܝܳܘܣ ܘܰܕܪܰܒܳܐ ܓܪܺܝܓܳܘܪܺܝܳܘܣ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܳܐ ܢܳܨܰܚ ܕܽܘܟܪܳܢܟܽܘܢ܆ ܐܰܒܳܗ̈ܳܬܳܐ ܩܰܕܺܝ̈ܫܶܐ܆ ܒܰܣܺܝܠܺܝܳܘܣ܆ ܘܢܰܨܺܝ̣ܚܳܐ ܓܪܺܝܓܳܘܪܺܝܳܘܣ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟ ܕܰܐܘܪܶܒ ܐܳܦ ܝܰܩܰܪ܆ ܝܰܘܡܳܐ ܫܒܺܝܚܳܐ ܕܕܽܘܟܪܳܢܗܽܘܢ. ܕܰܐܒܳܗ̈ܳܬܳܐ܆ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܒܠܰܢ ܡܳܪܰܢ ܕܢܶܙܡܰܪ܆ ܫܽܘܒܚܳܐ ܒܝܰܘܡܳܐ ܕܕܽܘܟܪܳܢܗܽܘܢ܆ ܕܰܡܢܺܝܚܳܢܰܝ̈ܟ܆ ܐܰܒܳܗ̈ܳܬܳܐ ܩܰܕܺܝ̈ܫܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܪ̈ܺܝܫܳܢܶܐ ܕܗܰܝܡܳܢܽܘܬܳܐ܆ ܕܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܒܰܣܶܝܠܺܝܳܘܣ܆ ܥܰܡ ܪܰܒܳܐ ܓܪܺܝܓܳܘܪܺܝܳܘܣ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܛܽܘܒܳܐ ܠܟܶܢܫܳܐ ܕܝܰܩܰܪܟܽܘܢ܆ ܛܽܘܒܶܝܗ̇ ܠܥܺܕܬܳܐ ܕܙܰܝܚܰܬܟܽܘܢ܆ ܛܽܘܒ ܠܕܶܐܫܬܰܘܬܰܦ܆ ܒܕܽܘܟܪ̈ܳܢܰܝܟܽܘܢ ܛܽܘ̈ܒܬܳܢܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܠܰܝܬ ܕܩܰܕܺܝܫ ܐܰܟܘܳܬܳܟ

ܡܫܺܝܚܳܐ ܢܽܘܗܪܳܐ ܕܰܫܪܳܪܳܐ܆ ܕܰܐܢܗܰܪ ܠܰܐܪܥܳܐ ܒܙܰܠܺܝ̈ܩܰܘܗ̱ܝ܆ ܘܪܰܕܦܶܗ ܠܚܶܫܟܳܐ ܕܛܳܥܝܽܘܬܳܐ܆ ܡܶܢ ܐܰܦܰܝ̈ ܟܽܠܳܗ̇ ܐܰܪܥܳܐ܆ ܒܝܰܕ ܡܰܠ̈ܦܳܢܶܐ ܪ̈ܽܘܚܳܢܶܐ܆ ܩܰܕܺܝܫܳܐ ܒܰܣܶܝܠܺܝܳܘܣ܆ ܘܢܰܨܺܝܚܳܐ ܓܪܺܝܓܳܘܪܺܝܳܘܣ܀

ܪܰܘܪܒܳܐܺܝܬ ܘܰܚܠܺܝܨܳܐܺܝܬ܆ ܐܶܬܟܰܬܰܫܬܽܘܢ ܒܰܐܓܽܘܢܳܐ܆ ܪ̈ܺܝܫܳܢܶܐ ܕܰܐܒܳܗ̈ܳܬܳܐ܆ ܪ̈ܰܒܰܝ ܒ̈ܳܬܶܐ ܕܰܡܫܺܝܚܳܐ܆ ܩܰܕܺܝܫܳܐ ܒܰܣܶܝܠܺܝܳܘܣ܆ ܘܢܰܨܺܝܚܳܐ ܓܪܺܝܓܳܘܪܺܝܳܘܣ܆ ܒܥܰܘ ܘܶܐܬܟܰܫܰܦܘ ܚܠܳܦ ܟܽܠܰܢ܆ ܕܢܶܣܰܒ ܪ̈ܰܚܡܶܐ ܘܰܚܢܳܢܳܐ܀

ܪ̈ܰܒܰܝ ܒ̈ܳܬܶܐ ܕܪܽܘܚܩܽܘܕܫܳܐ܆ ܪ̈ܺܝܫܰܝ ܟܳܗ̈ܢܶܐ ܚܣܰܝ̈ܳܐ܆ ܘܰܐܒܳܗ̈ܳܬܳܐ ܩܰܕܺܝ̈ܫܶܐ܆ ܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܫܰܝܢܶܗ ܕܡܳܪܟܽܘܢ ܘܰܫܠܳܡܶܗ܆ ܢܕܰܝܰܪ ܒܓܰܘ ܥܺܕܰܬ ܩܽܘܕܫܳܐ܆ ܕܰܡܝܰܩܪܳܐ ܠܝܽܘܡ ܕܽܘܟܪܳܢܟܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ
(ܣܳܠܶܩ: ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ)

ܡܰܢܽܘ ܡܶܫܟܰܚ ܕܰܢܩܰܠܶܣ: ܠܫܽܘܦܪ̈ܰܝܟܝ ܩܰܕܺܝܫܬܳܐ ܘܡܰܠܝܰܬ ܛܰܝܒܽܘܬܳܐ: ܕܰܕܢܰܚ ܡܶܢ ܥܽܘܒܶܟܝ ܕܰܟܝܳܐ: ܗܰܘ ܫܶܡܫܳܐ ܕܙܰܕܺܝܩܽܘܬܳܐ: ܘܰܐܨܡܰܚ ܒܥܳܠܡܳܐ ܙܰܠܺܝ̈ܩܰܘܗ̱ܝ: ܘܰܐܦܢܺܝ ܠܥܰܡ̱̈ܡܶܐ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀

ܟܽܠܰܢ ܡܗܰܝ̈ܡܢܶܐ ܬܰܘ ܢܩܰܠܶܣ: ܠܙܰܘܓܳܐ ܕܢܰܨܺܝ̈ܚܶܐ ܕܰܡܠܶܐ ܟܽܠ ܫܽܘܦܪ̈ܺܝܢ: ܐܰܒܳܗ̈ܳܬܳܐ ܩܰܕܺܝ̈ܫܶܐ: ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ: ܩܰܕܺܝܫܳܐ ܒܰܣܶܝܠܺܝܳܘܣ: ܥܰܡ ܢܰܨܺܝܚܳܐ ܓܪܺܝܓܳܘܪܺܝܳܘܣ܀

ܡܰܢܽܘ ܕܠܳܐ ܢܰܘܕܶܐ ܘܢܶܣܓܽܘܕ: ܠܰܬܠܺܝܬܳܝܽܘܬܳܐ ܪܳܡܰܬ ܡܶܢ ܗܰܘ̈ܢܶܐ: ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܗܽܘܢ: ܕܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ: ܕܰܐܟܪܶܙܘ ܩܽܘܫܬܳܐ ܒܰܒܪܺܝܬܳܐ: ܘܰܐܦܢܺܝܘ ܠܥܰܡ̱̈ܡܶܐ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܛܳܒܳܐ ܕܛܰܟܶܣ ܒܰܚܢܳܢܶܗ܆ ܥܽܘܡܪܳܐ ܕܥܺܝܪ̈ܶܐ ܥܶܠܳܝ̈ܶܐ܆ ܛܰܟܶܣ ܝܰܪ̈ܚܶܐ ܘܒܰܪܶܟ ܡܳܪܝ܆ ܟܠܺܝܠܳܐ ܕܫܰܢ̱ܬܳܐ ܒܛܰܝܒܽܘܬܳܟ܀

ܐܰܫܪܳܐ ܡܳܪܝ ܫܰܝܢܳܟ ܒܰܐܪܥܳܐ܆ ܘܗܰܒܠܰܢ ܝܰܪ̈ܚܶܐ ܕܚܰܕ̈ܘܳܬܳܐ܆ ܘܰܫܢܰܝ̈ܳܐ ܟܰܗܺܝ̈ܢܳܬܳܐ܆ ܘܫܽܘܒܩܳܢ ܚܰܘ̈ܒܶܐ ܘܰܚ̈ܛܳܗܶܐ܀

ܫܽܘܒܚܳܐ ܠܰܐܒܳܐ ܕܰܐܘܪܶܒܟܽܘܢ܆ ܐܰܒܳܗ̈ܳܬܳܐ ܩܰܕܺܝ̈ܫܶܐ܆ ܘܠܰܒܪܳܐ ܣܶܓܕܬܳܐ ܘܪܽܘܡܪܳܡܳܐ܆ ܘܬܰܘܕܺܝܬܳܐ ܠܪܽܘܚܳܐ ܕܩܽܘܕܫܳܐ܀

ܚܢܰܢ ܚܰܛܳܝ̈ܶܐ ܕܝܰܩܰܪܢܰܢ܆ ܕܽܘܟܪܳܢܟܽܘܢ ܒܗܰܝܡܳܢܽܘܬܳܐ܆ ܢܶܫܬܰܘܙܰܒ ܡܶܢ ܢܶܟ̈ܝܳܢܶܐ܆ ܕܰܒܥܶܠܕܰܪܰܢ ܣܳܛܳܢܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܐܰܢ̱ܬ ܕܰܒܚܽܘܒܳܟ: ܐܶܬܓܰܘܙܰܠܘ ܗ̱ܘܰܘ ܢܰܨܺܝ̈ܚܶܐ: ܒܰܣܶܝܠܺܝܳܘܣ ܘܩܰܕܺܝܫܳܐ ܓܪܺܝܓܳܘܪܺܝܳܘܣ: ܡܒܰܪܟܳܐ ܓܶܝܪ ܐܺܝܬܰܝܟ܀

ܒܪܽܘܚܳܐ ܕܩܽܘܕܫܳܐ: ܚܰܟܶܡܬ ܐܶܢܽܘܢ ܠܰܫܠܺܝ̈ܚܰܝܟ: ܘܰܢܦܰܩܘ ܘܰܐܦܢܺܝܘ ܥܰܡ̱̈ܡܶܐ ܠܽܐܘܪܚܳܐ ܕܰܫܪܳܪܳܐ: ܡܒܰܪܟܳܐ ܓܶܝܪ ܐܺܝܬܰܝܟ܀

ܚܢܰܢ ܕܝܰܩܰܪܢܰܢ: ܕܽܘܟܪܳܢܟܽܘܢ ܒܗܰܝܡܳܢܽܘܬܳܐ: ܒܰܨ̈ܠܰܘܳܬܟܽܘܢ ܢܶܣܰܒ ܫܽܘܒܩܳܢ ܚܰܘ̈ܒܳܬܰܢ: ܡܒܰܪܟܳܐ ܓܶܝܪ ܐܺܝܬܰܝܟ܀

ܡܫܺܝܚܳܐ ܕܚܰܟܶܡ: ܠܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܚܰܟܶܡ ܠܥܺܕܬܳܟ. ܒܕܽܘܓ̈ܡܰܛܰܐ ܐܰܠܳܗܳܝ̈ܶܐ: ܡܒܰܪܟܳܐ ܓܶܝܪ ܐܺܝܬܰܝܟ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܬܶܙܡܰܪ ܬܶܫܒܽܘܚܬܳܐ܆ ܒܕܽܘܟܪ̈ܳܢܰܝܟܽܘܢ ܐܳܘ ܡܰܠ̈ܦܳܢܶܐ ܕܗܰܝܡܳܢܽܘܬܳܐ܆ ܕܪܰܡܪܶܡܬܽܘܢܳܗ̇ ܒܕܽܘܓ̈ܡܰܛܰܐ܆ ܕܰܬܪܺܝܨܽܘܬ ܫܽܘܒܚܳܐ܀

ܡܳܐܢ̈ܶܐ ܓܒܰܝ̈ܳܐ܆ ܘܰܒܚܺܝܪ̈ܶܐ ܐܺܝܬܰܝܟܽܘܢ ܡܰܠ̈ܦܳܢܶܐ ܕܩܽܘܫܬܳܐ܆ ܕܰܩܕܳܡ ܛܪ̈ܽܘܢܶܐ ܘܡܰܠ̈ܟܶܐ ܕܰܐܪܥܳܐ ܓܰܢ̱ܒܳܪܳܐܺܝܬ܆ ܛܥܶܢܬܽܘܢ ܠܰܫܡܶܗ ܕܒܰܪ ܡܳܪܟܽܘܢ܆ ܨܠܽܘܬܟܽܘܢ ܬܥܰܕܰܪ ܠܰܢ܀

ܙܰܘܓܳܐ ܦܰܐܝܳܐ܆ ܘܫܰܦܺܝܪܳܐ ܐܺܝܬܰܝܟܽܘܢ ܐܰܒܳܗܰܝ̈ܢ ܚܣܰܝ̈ܳܐ܆ ܒܰܣܶܝܠܺܝܳܘܣ ܓܪܺܝܓܳܘܪܺܝܳܘܣ ܡܳܐܢ̈ܶܐ ܓܒܰܝ̈ܳܐ܆ ܕܰܐܩܪܶܒܘ ܘܰܙܟܰܘ ܠܰܛܪܽܘܢܳܐ܆ ܘܰܐܠܺܝܣ ܪܰܫܺܝܥܳܐ܀

ܦܳܪܽܘܩܰܢ܆ ܡܰܙܥܶܩ ܗ̱ܘܳܐ ܒܶܝܬ ܟܶܢ̈ܫܶܐ ܕܟܽܠ ܕܰܡܗܰܝܡܶܢ ܒܺܝ܆ ܢܰܗܪ̈ܰܘܳܬܳܐ ܕܡܰܝ̈ܳܐ ܚܰܝ̈ܶܐ ܢܶܪܕܽܘܢ ܡܶܢܶܗ܆ ܒܫܶܩܝܳܐ ܚܰܠܝܳܐ ܕܡܶܠܰܝ̈ܟܽܘܢ܆ ܢܶܪܘܶܐ ܘܢܶܬܒܰܣܰܡ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܒܥܶܕܳܢ ܨܰܦܪܳܐ: ܡܩܰܕ̈ܡܳܢ ܣܳܓ̈ܕܳܢ ܒܶܪ̈ܝܳܬܳܐ: ܠܗܰܘ ܕܰܪܕܰܦ ܡܶܢܗܶܝܢ ܚܶܫܽܘܟܳܐ ܘܰܡܫܰܒ̈ܚܳܢ: ܫܽܘܒܚܳܐ ܠܳܟ ܐܰܠܳܗܳܐ܀

ܒܝܽܘܡ ܕܽܘܟܪܳܢܟܽܘܢ. ܚܳܕܝܳܐ ܬܺܒܶܝܠ ܒܰܡܠܳܐܳܗ̇܆ ܘܙܳܡܪܳܐ ܫܽܘܒܚܳܐ ܠܕܰܐܘܪܶܒܟܽܘܢ ܟܰܕ ܐܳܡܪܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܗܳܐ ܥܺܕ̈ܳܬܳܐ. ܘܕܰܝܪ̈ܳܬܳܐ ܙܳܡܪ̈ܳܢ ܬܶܫܒܽܘܚܬܳܐ܆ ܕܰܒܝܽܘܠܦܳܢܟܽܘܢ ܐܶܬܢܰܗܰܪ̈ܝ ܘܰܡܫܰܒ̈ܚܳܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܚܰܬܢܳܐ ܡܫܺܝܚܳܐ. ܕܶܐܬܬܰܚܬܺܝ ܘܦܰܪܩܰܢ ܡܶܢ ܛܽܘܥܝܰܝ܆ ܚܰܠܶܛ ܠܰܢ ܒܟܶܢ̈ܫܶܐ ܕܣܳܓܽܘ̈ܕܰܝܟ ܕܰܢܫܰܒܚܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܪܳܥܝܳܐ ܡܫܺܝܚܳܐ. ܕܣܳܡ ܢܰܦܫܶܗ ܠܡܰܘܬܳܐ ܚܠܳܦ ܥܳܢ̈ܶܗ܆ ܫܰܘܬܶܦ ܠܰܢ ܒܕܽܘܟܪ̈ܳܢܰܝܗܽܘܢ ܕܢܶܩܥܶܐ ܘܢܺܐܡܰܪ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܰܨ̈ܠܰܘܳܬܗܽܘܢ. ܕܩܰܕܺܝ̈ܫܶܐ ܘܡܰܠ̈ܦܳܢܶܐ ܒܚܺܝܪ̈ܶܐ܆ ܚܰܝܶܠ ܠܰܢ ܕܢܶܥܒܶܕ ܥܺܐܕܰܝ̈ܗܽܘܢ ܘܰܢܫܰܒܚܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܒܪܺܝܟܽ ܗ̱ܘ ܡܫܺܝܚܳܐ ܕܪܰܡܪܶܡܟܽܘܢ: ܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ: ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ: ܡܶܢ ܣܰܘ̈ܦܶܝܗ̇ ܠܣܰܘ̈ܦܶܝܗ̇ ܕܰܐܪܥܳܐ܀

ܬܰܘ ܗܳܫܳܐ ܐܳܘ ܦܳܪ̈ܽܘܫܶܐ: ܢܶܬܒܰܩܶܐ ܒܗܽܘܢ ܒܩܰܕܺܝ̈ܫܶܐ: ܐܺܝܓܢܰܐܛܺܝܳܘܣ ܡܠܶܐ ܫܽܘܦܪ̈ܶܐ: ܣܳܗܕܳܐ ܓܰܒܝܳܐ ܕܰܐܠܳܗܳܐ܀

ܩܰܕܺܝܫܳܐ ܒܰܣܶܠܺܝܳܘܣ: ܡܰܪܓܳܢܺܝܬܳܐ ܕܠܳܐ ܡܽܘܡܳܐ: ܘܥܰܡܽܘܕܳܐ ܕܪܽܘܚܳܐ ܕܩܽܘܕܫܳܐ: ܘܡܰܠܦܳܢܳܐ ܕܥܺܕܰܬ ܩܽܘܕܫܳܐ܀

ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܳܟ: ܢܰܨܺܝܚܳܐ ܒܰܣܶܠܺܝܳܘܣ: ܘܨܳܒܘ ܘܶܐܬܰܘ ܡܶܢ ܟܽܠ ܦܶܢ̈ܝܳܢ: ܒܢܰܝ̈ܳܐ ܠܥܺܐܕܳܐ ܕܰܐܒܽܘܗܽܘܢ܀

ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ: ܕܒܶܗ ܐܶܬܢܰܗܰܪܘ ܚܶܫܽܘ̈ܟܶܐ: ܘܗܰܘ ܝܽܘܠܦܳܢܳܐ ܕܛܳܥܝܽܘܬܳܐ: ܒܕܶܢܚܳܐ ܕܨܶܡܚܶܗ ܐܶܬܛܰܠܰܩ܀

ܒܪܺܝܟܽ ܗ̱ܘ ܪܰܒ ܪ̈ܳܥܰܘܳܬܳܐ: ܕܥܰܠ̱̈ـܠܳܢܶܐ ܕܰܦܪܰܩ ܒܰܕܡܶܗ: ܒܝܰܕ ܪ̈ܳܥܰܘܳܬܳܐ ܒܚܺܝܪ̈ܶܐ: ܐܰܓܥܶܠ ܝܰܗܒܳܗ̇ ܒܺܐܝ̈ܕܰܝܗܽܘܢ܀

ܩܰܕܺܝܫܳܐ ܒܰܣܶܠܺܝܳܘܣ: ܘܢܰܨܺܝܚܳܐ ܓܪܺܝܓܳܘܪܺܝܳܘܣ: ܫܪܳܪܳܐ ܒܓܶܠܝܳܐ ܐܰܠܶܦܘ ܗ̱ܘܰܘ: ܘܕܰܓܳܠܽܘܬܳܐ ܒܗܽܘܢ ܚܳܒܰܬ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܡܳܐ ܚܳܕܝܳܐ ܒܗܽܘܢ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܒܡܰܠ̈ܦܳܢܶܐ ܘܰܐܒ̈ܳܗܳܬܳܐ ܬܪ̈ܺܝܨܰܝ ܫܽܘܒܚܳܐ܆ ܐܶܬܕܰܟܪܰܝܢ ܡܳܪܝܳܐ܀

ܠܟܽܘܢ ܛܽܘܒܰܝܟܽܘܢ܆ ܐܰܒܳܗ̈ܳܬܳܐ ܩܰܕܺܝ̈ܫܶܐ܆ ܢܰܨܺܝ̈ܚܶܐ ܒܰܣܶܝܠܺܝܳܘܣ ܘܓܪܺܝܓܳܘܪܺܝܳܘܣ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ ܠܛܳܒܳܐ܆ ܕܰܓܒܳܐ ܐܶܢܽܘܢ ܠܰܫܠܺܝ̈ܚܰܘܗ̱ܝ܆ ܘܝܰܗ̱ܒ ܒܺܐܝ̈ܕܰܝܗܽܘܢ ܫܽܘܠܛܳܢܳܐ ܘܚܰܝܠܳܐ ܕܪܽܘܚ ܩܽܘܕܫܳܐ܆ ܐܶܬܕܰܟܪܰܝܢ ܡܳܪܝܳܐ܀

ܒܥܰܕܥܺܐܕܰܝ̈ܟܽܘܢ܆ ܗܳܐ ܚܳܕܶܝܢ ܫܡܰܝܳܐ ܘܰܐܪܥܳܐ܆ ܘܙܳܡܪܺܝܢ ܘܬܰܘܕܺܝܬܳܐ ܠܡܳܪܝܳܐ ܕܰܐܘܪܶܒܟܽܘܢ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܒܰܨ̈ܠܰܘܳܬܟܽܘܢ܆ ܐܰܒ̈ܳܗܳܬܳܐ ܩܰܕܺܝ̈ܫܶܐ܆ ܬܶܬܢܰܛܰܪ ܥܺܕܬܳܐ ܥܰܡ ܟܽܠܗܽܘܢ ܝܰܠ̈ܕܶܝܗ̇܆ ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝ̈ܕܶܐ
ܠܳܐ ܬܶܟܪܶܐ ܠܟܽܘܢ ܥܰܢܺܝ̈ܕܶܐ (ܣܳܠܶܩ܆ ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܝܰܘܡܳܢܳܐ ܚܳܕܝܳܐ ܥܺܕܬܳܐ܆ ܘܝܰܠ̈ܕܶܝܗ̇ ܙܳܡܪܺܝܢ ܬܶܫܒܽܘܚܬܳܐ܆ ܒܕܽܘܟܪ̈ܳܢܰܝܗܽܘܢ ܕܰܚܣܰܝ̈ܳܐ܆ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܢܶܬܒܰܪܰܟ ܒܰܨ̈ܠܰܘܳܬܗܽܘܢ܆ ܟܶܢܫܳܐ ܕܝܰܩܰܪ ܥܺܐܕܰܝ̈ܗܽܘܢ܀

ܫܽܘܒܚܳܐ

ܢܰܨܺܝܚܳܐ ܒܰܣܶܝܠܺܝܳܘܣ܆ ܘܛܽܘܒܳܢܳܐ ܓܪܺܝܓܳܘܪܺܝܳܘܣ܆ ܬܰܦ̈ܶܐ ܕܰܐܪܕܺܝܘ ܟܰܣ̈ܝܳܬܳܐ܆ ܐܳܦ ܚܶܟ̈ܡܳܬܳܐ ܕܪܽܘܚ ܩܽܘܕܫܳܐ܆ ܘܰܒܝܽܘܠܦܳܢܗܽܘܢ ܐܶܬܢܰܨܚܰܬ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܀

ܡܶܢ ܥܳܠܰܡ

ܠܳܐ ܬܶܟܪܶܐ ܠܟܽܘܢ ܥܰܢܺܝ̈ܕܶܐ. ܕܡܰܘܬܳܐ ܚܰܒܶܠ ܫܽܘܦܪ̈ܰܝܟܽܘܢ: ܕܦܰܓܪܳܐ ܘܰܕܡܳܐ ܕܰܢܣܰܒ̣ܬܽܘܢ܆ ܗ̣ܽܘ ܡܚܰܕܶܬ ܠܰܩܢܽܘ̈ܡܰܝܟܽܘܢ. ܘܡܰܠܒܶܫ ܫܽܘܒܚܳܐ ܠܦܰܓܪ̈ܰܝܟܽܘܢ܆ ܒܝܰܘܡܶܗ ܪܰܒܳܐ ܕܢܽܘܚܳܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ

ܡܶܢ ܗܰܘ ܚܰܝܠܳܐ ܕܶܐܬܥܰܛܰܦܘ ܫܠܺܝ̈ܚܶܐ ܒܥܶܠܺܝܬܳܐ܆ ܐܶܙܕܰܝܰܢܘ ܐܰܒܳܗ̈ܳܬܳܐ ܘܡܰܠ̈ܦܳܢܶܐ ܕܩܽܘܫܬܳܐ܆ ܘܰܢܦܰܩܘ ܐܰܩܪܶܒܘ. ܥܰܡ ܐܳܟܶܠܩܰܪܨܳܐ܆ ܘܦܰܪܣܺܝܘ ܠܪܽܘܫܥܳܐ܆ ܕܟܽܠܗܶܝܢ ܗܶܪ̈ܶܣܺܝܣ܆ ܘܰܐܠܶܦܘ ܠܰܢ ܚܰܕ ܝܺܚܺܝܕܳܐ ܕܢܰܚ ܡܶܢ ܐܰܒܳܐ܆ ܘܰܛܥܶܡ ܡܰܘܬܳܐ ܚܠܳܦ ܟܽܠܰܢ ܘܒܰܨܠܺܝܒܶܗ ܦܰܪܩܰܢ܆ ܗ̄ ܠܶܗ ܬܶܫܒ̈ܚܳܢ ܡܶܢ ܟܽܠ܀

ܫܽܘܒܚܳܐ

ܒܥܶܩ̈ܒܳܬܳܐ ܕܰܬܪܶܥܣܰܪܬܳܐ ܒܗܰܝܡܳܢܽܘܬܳܐ܆ ܪܕܰܘ ܐܰܒܳܗܰܝ̈ܢ ܩܰܕ̈ܡܳܝܶܐ ܕܽܘܟܪܳܢܗܽܘܢ ܠܒܽܘܪܟܬܳܐ܆ ܒܰܣܶܝܠܺܝܳܘܣ܆ ܘܰܓܪܺܝܓܳܘܪܺܝܳܘܣ܆ ܐܳܦ ܩܽܘܪܺܝܠܳܘܣ܆ ܕܦܰܫܶܩ ܠܰܟ̈ܬܳܒܶܐ܆ ܘܡܳܪܝ ܣܶܐܘܺܝܪܶܐ ܢܰܨܺܝܚܳܐ ܕܰܚܠܳܦ ܥܺܕܬܳܐ ܪܕܺܝܦ܆ ܘܡܳܪܝ ܐܰܦܪܶܝܡ ܥܰܡ ܡܳܪܝ ܝܰܥܩܽܘܒ ܘܓܰܒܝܳܐ ܡܳܪܝ ܐܰܒܚܰܝ ܗ̄ ܨܠܽܘܬܗܽܘܢ ܬܥܰܕܰܪ ܠܰܢ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܦܶܬܓܳܡܳܐ: ܬܰܦ̈ܶܐ ܕܢܰܗܪ̈ܰܘܳܬܳܐ: ܢܚܰܕܽܘܢ ܒܰܡܕܺܝܢ̱ܬܶܗ ܕܰܐܠܳܗܰܢ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܟܽܘܢ ܥܰܡܰܢ ܐܰܒܳܗ̈ܳܬܳܐ ܡܰܠ̈ܦܰܝ ܩܽܘܫܬܳܐ܆

ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܗܳܢܽܘܢ ܕܰܗܘܰܘ ܐܰܝܟ ܢܰܗܺܝܪ̈ܶܐ ܕܟܽܠܳܗ̇ ܬܺܒܶܝܠ܆ ܘܗܰܝܡܳܢܽܘܬܗܽܘܢ ܐܰܝܟ ܐܺܝܡܳܡܳܐ ܒܥܳܠܡܳܐ ܕܶܢܚܰܬ܆ ܗܳܠܶܝܢ ܕܰܐܣܡܶܟܘ ܥܳܢ̈ܶܗ ܕܰܒܪܳܐ ܥܰܠ ܡܰܒܽܘܥܳܐ܆ ܘܰܗܘܳܬ ܫܳܬܝܳܐ ܚܰܝ̈ܶܐ ܟܽܠܝܽܘܡ ܕܡܰܝ̈ܳܐ ܫܦܰܝ̈ܳܐ܀

ܗܳܠܶܝܢ ܕܰܣܚܰܦܘ ܟܽܠ ܝܽܘܠ̈ܦܳܢܺܝܢ ܕܰܣܪܺܝܩܽܘܬܳܐ܆ ܘܚܰܕ ܐܰܠܳܗܳܐ ܕܩܽܘܫܬܳܐ ܐܰܟܪܶܙܘ ܒܟܽܠܳܗ̇ ܐܰܪܥܳܐ܆ ܗܳܠܶܝܢ ܕܰܗܘܰܘ ܐܰܝܟ ܗܰܕܳܡ̈ܶܐ ܒܥܺܕܬܶܗ ܕܰܒܪܳܐ܆ ܠܓܽܘܫܡܳܐ ܪܰܒܳܐ ܕܺܐܝܬܰܘܗ̱ܝ ܪܺܝܫܶܗ ܡܳܪܝܳܐ ܡܫܺܝܚܳܐ܀

ܐܰܘ

ܒܰܣܶܝܠܺܝܳܘܣ ܥܰܡ ܢܰܨܺܝܚܳܐ ܓܪܺܝܓܳܘܪܺܝܳܘܣ܆ ܢܰܘ̈ܣܶܐ ܕܪܽܘܚܳܐ ܐܳܦ ܫܺܝܦܽܘܪ̈ܶܐ ܐܰܠܳܗܳܝ̈ܶܐ܆ ܗܳܢܽܘܢ ܕܰܗܘܰܘ ܐܰܝܟ ܐܰܪ̈ܕܺܝܟܠܶܐ ܒܥܺܕܰܬ ܩܽܘܕܫܳܐ܆ ܘܫܰܪܰܪܘ ܣܳܡܽܘܗ̇ ܥܰܠ ܫܶܬܶܐܣܬܳܐ ܕܰܫܠܺܝܚܽܘܬܳܐ܀

ܫܽܘܒܚܳܐ ܠܰܐܒܳܐ ܕܪܰܥܺܝܬܽܘܢܳܝܗ̱ܝ ܒܰܙܡܺܝܪ̈ܳܬܟܽܘܢ܆ ܘܣܶܓܕܬܳܐ ܠܰܒܪܳܐ ܕܩܰܪܶܒܬܽܘܢ ܠܶܗ ܗܽܘܠܳܠܰܝ̈ܟܽܘܢ܆ ܬܰܘܕܺܝ ܠܪܽܘܚܳܐ ܕܗܰܘ ܡܰܠܶܠ ܒܟܽܘܢ ܗܰܝܡܳܢܽܘܬܳܐ܆ ܘܰܥܠܰܝܢ ܪ̈ܰܚܡܶܐ ܒܰܨ̈ܠܰܘܳܬܟܽܘܢ ܒܟܽܠ ܥܶܕܳܢܺܝ̈ܢ܀

ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀