ܘܕܽܘܟܪܳܢܳܐ ܕܡܳܪܝ ܒܰܣܶܝܠܺܝܳܘܣ ܘܡܳܪܝ ܓܪܺܝܓܳܘܪܺܝܳܘܣ

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܒܪܺܝܟܽ ܗ̱ܘ ܡܫܺܝܚܳܐ. ܕܰܐܘܪܶܒ ܕܽܘܟܪܳܢܟܽܘܢ܆ ܘܢܰܨܰܚ ܘܝܰܩܰܪ ܝܰܘܡܳܐ ܕܥܰܕܥܺܐܕܟܽܘܢ܆ ܪܰܚܶܡܥܠܰܝܢ ܐܰܠܳܗܳܐ܀

ܫܶܦ̈ܥܶܐ ܒܪ̈ܺܝܟܶܐ. ܕܡܶܢ ܢܶܒܥܳܐ ܕܚܰܝ̈ܶܐ܆ ܡܰܝ̈ܳܐ ܚܠܰܝ̈ܳܐ ܘܒܰܣܺܝ̈ܡܶܐ ܡܬܰܩܘ ܗ̱ܘܰܘ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܶܠܚܳܐ ܐܰܢ̱ܬܽܘܢ. ܕܒܳܗ̇ ܗ̱ܽܘ ܐܶܬܡܰܕܰܟ܆ ܥܳܠܡܳܐ ܕܰܦܟܰܗ ܗ̱ܘܳܐ ܒܺܐܫܺܝܕܽܘܬ ܛܽܘܥܝܰܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܳܘ ܡܰܠ̈ܦܳܢܶܐ. ܕܥܺܕܬܳܐ ܩܰܕܺܝܫܬܳܐ܆ ܪܰܥܰܘ ܠܡܳܪܟܽܘܢ ܕܰܐܪܓܶܙܢܳܝܗ̱ܝ ܣܰܓܺܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܥܺܕܬܳܐ ܚܳܕܝܳܐ. ܒܝܰܘܡܳܐ ܕܕܽܘܟܪܳܢܟܽܘܢ܆ ܘܙܳܡܪܳܐ ܫܽܘܒܚܳܐ ܠܡܳܪܝܳܐ ܕܰܐܘܪܶܒܟܽܘܢ܆ ܪܰܚܶܡܥܠܰܝܢ ܐܰܠܳܗܳܐ܀

ܢܽܘܗܪܶܗ ܕܥܳܠܡܳܐ. ܦܳܪܽܘܩܰܢ ܠܟܽܘܢ ܩܪܳܐ܆ ܒܝܽܘܠܦܳܢܰܝ̈ܟܽܘܢ ܢܰܦ̈ܫܳܬܰܢ ܢܰܢܗܪ̈ܳܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܫܺܝܚܳܐ ܡܳܪܰܢ. ܕܝܰܩܰܪ ܠܰܪ̈ܚܽܘܡܰܘܗ̱ܝ܆ ܚܰܣܳܐ ܚܰܘ̈ܒܰܝܢ ܕܙܰܝܰܚܢܰܢ ܥܺܐܕܗܽܘܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܐܳܘ ܠܫܰܘܝܽܘܬ ܚܽܘܒܳܐ. ܕܙܰܘܓܳܐ ܟܳܗ̈ܢܰܝ ܒܟܽܠ܆ ܒܰܣܶܝܠܺܝܳܘܣ ܘܢܰܨܺܝܚܳܐ ܓܪܺܝܓܳܘܪܺܝܽܘܣ܆ ܕܒܰܬܪ̈ܰܝܗܽܘܢ ܓܽܘ̈ܫܡܶܐ܆ ܣܛܰܪ ܡܶܢ ܦܽܘܠܳܓܳܐ܆ ܒܰܚܕܳܐ ܟܺܝܬ ܢܰܦܫܳܐ܆ ܐܶܬܡܰܙܰܓ ܗ̱ܘܰܘ ܥܰܡ ܚ̈ܕܳܕܶܐ܀

ܐܰܒܳܐ ܕܝܰܬܡ̈ܶܐ ܬܽܘܒ܆ ܐܶܬܚܙܺܝܬ ܐܳܘ ܐܰܒܽܘܢ܆ ܒܰܣܶܝܠܺܝܳܘܣ܆ ܐܳܦ ܩܳܝܽܘܡܳܐ ܕܰܐܪ̈ܡܠܳܬܳܐ܆ ܘܚܽܘܛܪܳܐ ܕܣܰܝܒܽܘܬܳܐ܆ ܘܬܳܪܐܳܐ ܕܛܰܠܝܽܘܬܳܐ܆ ܘܣܳܢܳܐܐ ܕܚܰܢ̈ܦܶܐ ܘܝܽܘ̈ܕܳܝܶܐ܀

ܥܺܕܬܳܐ ܗܳܐ ܚܳܕܝܳܐ. ܒܝܰܘܡܳܐ ܕܕܽܘܟܪܳܢܟܽܘܢ܆ ܒܰܣܶܝܠܺܝܳܘܣ܆ ܘܢܰܨܺܝܚܳܐ ܓܪܺܝܓܳܘܪܺܝܽܘܣ܆ ܕܰܢܒܺܝܳܐ ܩܪܳܟܽܘܢ܆ ܬܰܦ̈ܶܐ ܕܪ̈ܳܕܰܝܳܐ܆ ܕܰܡܚܰܕܶܝܢ ܠܳܗ̇܆ ܠܰܡܕܺܝܢ̱ܬܶܗ ܕܡܳܪܝܳܐ ܡܳܪܟܽܘܢ܀

ܫܽܘܒܚܳܐ

ܫܽܘܒܚܳܐ ܠܗܰܘ ܕܰܐܘܪܶܒ. ܝܰܘܡܳܐ ܕܥܰܕܥܺܐܕܟܽܘܢ. ܐܰܒ̈ܳܗܳܬܳܐ܆ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܘܢܰܨܰܚ ܕܽܘܟܪܳܢܟܽܘܢ܆ ܒܰܐܪܒܰܥ ܦܶܢ̈ܝܳܬܳܐ܆ ܒܰܨܠܽܘ̈ܳܬܟܽܘܢ܆ ܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ

ܩܰܕܺܝܫܳܐ ܒܰܣܶܝܠܺܝܳܘܣ܆ ܪܳܥܝܳܐ ܙܰܗܝܳܐ ܘܢܰܨܺܝܚܳܐ܆ ܕܰܐܝܟ ܥܰܡܽܘܕܳܐ ܕܰܫܪܳܪܳܐ܆ ܒܥܺܕܰܬ ܩܽܘܕܫܳܐ ܩܳܐܶܡ ܗ̱ܘܳܐ܆ ܘܠܰܒܢܰܝ̈ܢܳܫܳܐ ܡܩܰܪܶܒ ܗ̱ܘܳܐ ܨܶܝܕ ܐܰܠܳܗܳܐ܆ ܒܩ̈ܳܠܶܐ ܕܚܶܟ̈ܡܳܬܶܗ܆ ܘܠܰܐܝܠܶܝܢ ܕܰܒܚܶܫܟܳܐ ܕܛܽܘܥܝܰܝ܆ ܠܘܳܬ ܢܽܘܗܪܳܐ ܐܰܠܳܗܳܝܳܐ܆ ܫܽܘ݉ܒܚܳܐ ܠܗܰܘ ܕܰܓܒܳܝܗ̱ܝ ܘܰܡܠܳܝܗ̱ܝ ܪܽܘܚܳܐ ܩܰܕܺܝܫܳܐ܆ ܘܰܐܓܥܶܠ ܒܺܐܝ̈ܕܰܘܗ̱ܝ ܫܽܘܠܛܳܢܳܐ܆ ܕܪܰܘܡܳܐ ܘܥܽܘܡܩܳܐ܆ ܕܢܶܐܣܽܘܪ ܘܢܶܫܪܶܐ ܙܰܗܝܳܐܺܝܬ܀

ܫܽܘܒܚܳܐ

ܗܰܝܡܳܢܽܘܬܳܐ ܕܰܫܪܳܪܳܐ܆ ܚܰܘܺܝܬܽܘܢ ܐܰܒܳܗ̈ܳܬܳܐ܆ ܐܳܦ ܝܽܘܠ̈ܦܳܢܶܐ ܕܰܫ̈ܠܺܝܚܶܐ܆ ܡܠܰܝܬܽܘܢܳܗ̇ ܠܥܺܕܰܬ ܩܽܘܕܫܳܐ܆ ܘܰܐܠܶܦܬܽܘܢܳܗ̇ ܕܰܬܗܰܝܡܶܢ܆ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܕܩܽܘܕܫܳܐ܆ ܬܠܺܝܬܳܝܽܘܬܳܐ ܡܫܰܒܰܚܬܳܐ܆ ܚܰܕ ܟܝܳܢܳܐ ܚܕܳܐ ܐܽܘܣܺܝܰܐ܆ ܐܰܒܳـ݉ܐ ܝܳܠܽܘܕܳܐ܆ ܘܰܒܪܳܐ ܕܡܶܢܶܗ ܝܺܠܺܝܕܳܐ܆ ܘܪܽܘܚܳܐ ܕܩܽܘܕܫܳܐ ܢܳܦܽܘܩܳܐ܆ ܫܘܶܐ ܒܺܐܝܬܽܳܘܬܳܐ܆ ܓܳܡܰܪ ܟܽܠ ܘܰܡܫܰܡܠܶܐ ܟܽܠ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐܰܘ

ܒܪܺܝܟܽ ܗ̱ܘ ܡܫܺܝܚܳܐ ܕܰܓܒܳܐ ܠܶܗ: ܟܳܪ̈ܽܘܙܶܐ ܕܗܰܝܡܳܢܽܘܬܳܐ: ܘܰܐܝܟ ܠܰܡ̈ܦܺܐܕܶܐ ܣܳܡ ܐܶܢܽܘܢ: ܘܢܶܗܪܰܬ ܒܗܽܘܢ ܟܽܠܳܗ̇ ܒܪܺܝܬܳܐ: ܡܶܢ ܚܶܫܽܘܟܳܐ ܕܛܳܥܝܽܘܬܳܐ ܕܟܽܠ ܗܶܪ̈ܶܣܺܝܣ ܕܰܙܪܰܥ ܒܳܗ̇ ܒܺܝܫܳܐ: ܘܰܢܣܰܟ ܒܳܗ̇ ܡܶܫܚܳܐ ܛܳܒܳܐ: ܘܝܽܘܠ̈ܦܳܢܶܐ ܐܰܠܳܗܳܝ̈ܶܐ: ܘܰܒ݉ܗܰܝܡܳܢܽܘܬܳܐ ܕܰܫܪܳܪܳܐ: ܢܶܗܪܰܬ ܩܳܡܰܬ: ܘܰܥܪܰܩ ܡܶܢܳܗ̇ ܚܶܫܽܘܟܳܐ ܕܠܳܐ ܝܕܰܥܬܳܐ: ܝܽܘܠ̈ܦܳܢܶܐ ܕܕܰܓܳܠܽܘܬܳܐ܀

ܫܽܘܒܚܳܐ

ܐܰܪܕܺܟܠܳܐ ܕܗܰܝܡܳܢܽܘܬܳܐ: ܢܰܨܺܝܚܳܐ ܒܰܣܶܝܠܺܝܳܘܣ: ܢܽܘܗܪܳܐ ܕܬܶܐܘܳܠܳܓܺܝܰܐ: ܩܰܕܺܝܫܳܐ ܓܪܺܝܓܳܘܪܺܝܘܳܣ: ܐܰܝܟ ܠܰܡ̈ܦܺܐܕܶܐ ܡܶܢ ܫܶܡܫܳܐ: ܕܙܰܕܺܝܩܽܘܬܳܐ ܨܡܰܚܘ ܘܰܐܢܗܰܪܘ ܠܰܐܪܒܰܥ ܦܶܢ̈ܝܳܢ: ܘܶܐܬܛܰܠܰܩ ܚܶܫܟܳܐ ܕܛܽܘܥܝܰܝ: ܕܰܦܪܺܝܣ ܗ̱ܘܳܐ ܥܰܠ ܒܶܪ̈ܝܳܬܳܐ: ܘܗܳܐ ܥܺــ݉ـܕܰܬ ܩܽܘܕܫܳܐ: ܚܳܕܝܳܐ ܘܪܳܘܙܳܐ ܘܰܡܫܰܒܚܳܐ: ܒܗܰܝܡܳܢܽܘܬܳܐ ܕܰܫܪܳܪܳܐ: ܕܩܰܒܠܰܬ ܡܶܢܗܽܘܢ: ܘܰܡܝܰܩܪܳܐ ܠܕܽܘܟܪ̈ܳܢܰܝܗܽܘܢ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ

ܒܪܺܝܟܽ ܗ̱ܘ ܡܫܺܝܚܳܐ܆ ܕܰܓܒܳܐ ܠܶܗ ܪ̈ܳܥܰܘܳܬܳܐ܆ ܕܢܶܪܥܽܘܢ ܠܥܺܕܬܶܗ ܩܰܕܺܝܫܬܳܐ܆ ܙܒܺܝܢܰܬ ܒܰܕܡܶܗ ܝܰܩܺܝܪܳܐ܆ ܘܰܢܩܽܘܡܽܘܢ ܐܰܝܟ ܢܰܗܺܝܪ̈ܶܐ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܘܝܰܗ̄ܒ ܒܺܐܝ̈ܕܰܝܗܽܘܢ ܫܽܘܠܛܳܢܳܐ܆ ܕܪܰܘܡܳܐ ܘܥܽܘܡܩܳܐ ܘܟܽܠܕܰܒܗܽܘܢ܆ ܘܰܐܘܪܶܒ ܐܶܢܽܘܢ ܒܰܣܒܰܪܬܳܐ܆ ܘܟܰܠܶܠ ܐܶܢܽܘܢ ܒܺܐܝܩܳܪܳܐ܀

ܫܽܘܒܚܳܐ

ܚܳܕܝܳܐ ܥܺܕܬܳܐ܆ ܘܙܳܡܪܳܐ ܫܽܘܒܚܳܐ ܘܬܰܘܕܺܝܬܳܐ܆ ܠܗܰܘ ܕܰܢܚܶܬ ܡܰܟܪܳܗ̇ ܒܰܕܡܶܗ܆ ܘܰܚܬܰܡ ܦܰܪܩܳܗ̇ ܒܰܨܠܺܝܒܶܗ ܘܰܐܩܺܝܡ ܒܳܗ̇ ܪ̈ܳܥܰܘܳܬܳܐ܆ ܕܢܶܪܥܽܘܢܳܗ̇ ܩܰܕܺܝܫܳܐܺܝܬ܆ ܘܰܢܦܰܨܽܘܢܳܗ̇ ܡܶܢ ܕܺܐܒ̈ܶܐ܆ ܡܚܰܒ̈ܠܳܢܶܐ ܕܟܽܠ ܗܶܪ̈ܶܣܺܝܣ܆ ܘܟܰܠܶܠ ܐܶܢܽܘܢ ܒܰܒܪܺܝܬܳܐ܆ ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܐܰܘ

ܫܶܦ̈ܥܶܐ ܒܪ̈ܺܝܟܶܐ: ܕܡܶܢ ܢܶܒܥܳܐ ܕܚܰܝ̈ܶܐ ܡܬܰܩܘ ܗ̱ܘܰܘ: ܡܰܝ̈ܳܐ ܚܠܰܝ̈ܳܐ ܘܒܰܣܺܝ̈ܡܶܐ: ܘܰܢܦܰܩܘ ܐܰܫܩܺܝܘ ܠܰܒܪܺܝܬܳܐ: ܕܰܡܛܰܪܦܳܐ ܗ̱ܘܳܬ ܒܨܰܗ̈ܘܳܢܶܐ: ܒܰܓܠܺܝܙܽܘܬ ܡܶܛܪܳܐ ܕܩܽܘܫܬܳܐ: ܕܶܐܬܕܠܰܚ ܗ̱ܘܳܐ ܠܶܗ ܡܰܒܽܘܥܳܐ: ܗܰܘ ܕܰܬܪܰܥ ܗ̱ܘܳܐ ܠܳܗ̇ ܦܶܛܪܳܘܣ: ܒܬܶܛܪܶܗ ܢܕܺܝܕܳܐ ܕܰܐܪܺܝܳܘܣ: ܘܰܒܟܽܠܳܗ̇ ܫܥܺܝܢܳܐ ܕܛܽܘܥܝܰܝ܀

ܫܽܘܒܚܳܐ

ܕܽܘܨܝ ܘܶܐܬܪܰܡܪܰܡܝ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܒܝܽܘܡ ܕܽܘܟܪܳܢܗܽܘܢ ܕܰܐܬܠܺܝ̈ܛܶܐ ܡܢܰܨ̈ܚܳܢܶܐ ܕܗܰܝܡܳܢܽܘܬܳܐ: ܘܰܒܝܽܘܠܦܳܢܗܽܘܢ ܫܰܪܺܝܪܳܐ: ܠܛܽܘܥܝܰܝ ܡܶܢ ܫܪ̈ܶܫܶܝܗ̇ ܥܩܰܪܘ ܗ̱ܘܰܘ: ܘܚܰܕܶܬܘ ܒܶܟܝ ܝܽܘܠܦܳܢ ܚܰܝ̈ܶܐ: ܘܰܒܡܰܪ̈ܓܶܐ ܕܥܽܘܫܢܳܐ ܪܥܰܐܘܽܟܝ: ܘܰܠܪܶܥܝܳܐ ܗܰܘ ܡܰܪܺܝܪܳܐ: ܒܢܽܘܪܳܐ ܕܰܛܢܳܢܗܽܘܢ ܐܰܘܩܶܕܘ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܣܽܘܓܺܝܬܳܐ ܕܰܩܕܳܡ ܐܶܘܰܢܓܶܠܝܽܘܢ

ܬܰܘ ܢܥܰܕܥܶܕ ܕܽܘܟܪ̈ܳܢܰܝܗܽܘܢ ܕܰܐܒܳܗ̈ܳܬ̣ܳܐ ܩܰܕܺܝ̈ܫܶܐ܇ ܕܰܠܗܰܝܡܳܢܽܘܬ̣ܳܐ ܫܰܪܰܪܘ̱ ܬܚܽܘܡܳܐ ܕܳܐܪܬܳܘܕܳܘܟܣܺܝܰܐ. ܐܺܝܓܢܰܐܛܝܳܘܣ ܢܽܘܪܳܢܳܐ܇ ܘܬܶܐܘܠܳܘܓܳܘܣ ܝܰܡܳܐ ܕܚܶܟ̈ܡܳܬܳܐ܇ ܘܩܽܘܪܺܝـܠܳܘܣ ܢܶܒܥܳܐ ܚܰܠܝܳܐ܇ ܘܺܐܝܘܰܐܢܢܺܝܣ ܦܽܘܡܳܐ ܕܕܰܗܒܳܐ܇ ܘܰܕܒܰܣܶܝܠܺܝܳܘܣ ܥܰܡ ܪܰܒܳܐ ܓܪܺܝܓܳܘܪܺܝܳܘܣ܇ ܕܺܝܳܘܣܩܳܘܪܳܘܣ ܘܰܩܠܺܝܡܺܝܣ܇ ܦܺܝـܠܳܘܟܣܺܝܢܳܘܣ ܥܰܡ ܢܰܨܺܝܚܳܐ ܣܶܐܘܺܝܪܶܐ: ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܦܶܬܓܳܡܳܐ: ܬܰܦ̈ܶܐ ܘܢܰܗܪ̈ܰܘܳܬܳܐ܆ ܢܚܰܕܽܘܢ ܒܰܡܕܺܝܢ̱ܬܶܗ ܕܰܐܠܳܗܰܢ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܟܽܘܢ ܥܰܡܰܢ ܐܰܒܳܗ̈ܳܬܳܐ ܡܰܠ̈ܦܰܝ ܩܽܘܫܬܳܐ܆

ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܣܶܝܠܺܝܳܘܣ ܥܰܡ ܢܰܨܺܝܚܳܐ ܓܪܺܝܓܳܘܪܺܝܳܘܣ܆ ܢܰܘ̈ܣܶܐ ܕܪܽܘܚܳܐ ܐܳܦ ܫܺܝܦܽܘܪ̈ܶܐ ܐܰܠܳܗܳܝ̈ܶܐ܆ ܗܳܢܽܘܢ ܕܰܗܘܰܘ ܐܰܝܟ ܐܰܪ̈ܕܺܝܟܠܶܐ ܒܥܺܕܰܬ ܩܽܘܕܫܳܐ܆ ܘܫܰܪܰܪܘ ܣܳܡܽܘܗ̇ ܥܰܠ ܫܶܬܶܐܣܬܳܐ ܕܰܫܠܺܝܚܽܘܬܳܐ܀

ܫܽܘܒܚܳܐ ܠܰܐܒܳܐ ܕܪܰܥܺܝܬܽܘܢܳܝܗ̱ܝ ܒܰܙܡܺܝܪ̈ܳܬܟܽܘܢ܆ ܘܣܶܓܕܬܳܐ ܠܰܒܪܳܐ ܕܩܰܪܶܒܬܽܘܢ ܠܶܗ ܗܽܘܠܳܠܰܝ̈ܟܽܘܢ܆ ܬܰܘܕܺܝ ܠܪܽܘܚܳܐ ܕܗܰܘ ܡܰܠܶܠ ܒܟܽܘܢ ܗܰܝܡܳܢܽܘܬܳܐ܆ ܘܰܥܠܰܝܢ ܪ̈ܰܚܡܶܐ ܒܝܰܘܡܳܐ ܕܕܺܝܢܳܐ ܒܰܨ̈ܠܰܘܳܬܟܽܘܢ܀

ܐܰܘ

ܗܳܠܶܝܢ ܕܰܗܘܰܘ ܐܰܝܟ ܢܰܗܺܝܪ̈ܶܐ ܠܟܽܠܳܗ̇ ܬܺܒܶܝܠ: ܘܰܐܝܟ ܡܰܒܽܘܥܳܐ ܕܗܰܝܡܳܢܽܘܬܳܐ ܒܥܳܠܡܳܐ ܐܰܕܢܰܚܘ: ܗܳܠܶܝܢ ܕܰܐܣܡܶܟܘ ܥܳܢܶــ̈ܗ ܕܰܒܪܳܐ ܥܰܠ ܡܰܒܽܘܥܳܐ: ܕܡܰܝ̈ܳܐ ܚܰܝ̈ܶܐ ܬܶܗܘܶܐ ܫܳܬܝܳܐ ܐܰܡܺܝܢܳܐܺܝܬ܀

ܗܳܠܶܝܢ ܕܰܢܛܰܪܘ ܦܰܓܪܳܗ̇ ܕܥܳܢܳــ̈ـܐ ܡܶܢ ܢܶܟ̈ܝܳܢܶܐ: ܕܠܳܐ ܢܶܬܒܰܣܒܰܣ ܡܶܢ ܐܶܫܳܬܳܐ ܕܰܦܠܺܝܓܽܘܬܳܐ: ܗܳܠܶܝܢ ܕܰܗܘܳܐ ܪܽܘܚܳܐ ܕܩܽܘܕܫܳܐ ܣܳܦܪܳܐ ܟܰܣܝܳܐ: ܘܰܐܠܶܦ ܐܶܢܽܘܢ ܟܽܠܗܽܘܢ ܐ̱ܪ̈ܳܙܶܐ ܕܗܰܝܡܳܢܽܘܬܳܐ܀

ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀