ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܚܠܳܦ ܪܰܗܒܽܘܢܳܐ ܕܦܰܓܪܳܟ܆ ܘܰܕܡܳܟ ܚܰܝܳܐ ܗܰܘ ܕܰܢܣܰܒܘ܆ ܚܰܕܳܐ ܠܥܰܒܕܰܝ̈ܟ ܒܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܒܰܚܢܳܢܶܗ ܓܰܒܠܶܗ܆ ܠܰܐܒܽܘܢ ܐܳܕܳܡ ܡܶܢ ܥܰܦܪܳܐ܆ ܢܰܚܶܡ ܘܰܐܚܳܐ܆ ܠܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܫܪܳܐ ܘܰܐܢܺܝܚ ܡܳܪܝܳܐ܆ ܠܢܰܦ̈ܫܳܬܳܐ ܘܦܰܓܪ̈ܶܐ ܕܥܰܒܕܰܝ̈ܟ܆ ܒܡܰܠܟܽܘܬ ܪܰܘܡܳܐ ܥܰܡ ܩܰܕܺܝ̈ܫܶܐ ܕܰܫܦܰܪܘ ܠܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܥܰܡ ܐܰܒܪܳܗܳܡ ܪܳܚܡܳܟ܆ ܘܺܐܝܣܚܳܩ ܕܰܥܒܰܕܘ ܨܶܒܝܳܢܳܟ܆ ܛܰܟܶܣ ܐܶܢܶܝܢ ܠܢܰܦ̈ܫܳܬܳܐ ܕܥܰܒ̈ܕܶܐ ܕܺܝܠܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܚܽܘܣ ܥܰܠ ܨܰܠܡܶܗ ܕܳܐܕܳܡ܆ ܕܨܺܝܪ ܒܶܗ ܨܰܠܡܳܟ ܘܰܕܡܽܘܬܳܟ܆ ܢܰܚܶܡ ܘܰܐܚܳܝܗ̱ܝ ܘܰܐܩܺܝܡܳܝܗ̱ܝ ܡܶܢ ܝܰܡܺܝܢܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܥܰܠ ܡܰܪ̈ܓܰܝ ܥܽܘܫܢܳܐ ܕܰܥܕܶܢ܆ ܘܒܶܝܬ ܐܺܝ̈ܠܳܢܶܐ ܕܦܰܪܕܰܝܣܳܐ܆ ܐܰܢܺܝܚ ܡܳܪܝܳܐ ܠܥܰܢܺܝ̈ܕܶܐ ܕܡܺܝܬܘ ܥܰܠ ܣܰܒܪܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܝܰܡܳܐ ܕܶܐܬܦܰܠܰܓ

ܗܳܐ ܩܪܶܒ ܘܰܡܛܳܐ ܠܶܗ ܙܰܒܢܳܐ ܕܢܶܚܽܘܬ ܡܰܠܟܳܐ܆ ܒܦܰܓܪܳܐ ܕܰܢܣܰܒ ܡܶܢ ܒܬܽܘܠܬܳܐ ܐܰܟܡܳܐ ܕܰܣܠܶܩ܆ ܘܳܐܬܶܝܢ ܩܽܘܕܡܰܘܗ̱ܝ ܡܰܠܰܐܟ̈ܶܐ܆ ܘܥܺܝܪ̈ܰܝ ܪܰܘܡܳܐ ܕܠܳܐ ܡܶܢܝܳܢ܆ ܘܙܳܥܩܳܐ ܩܰܪܢܳܐ ܒܰܩܒܺܝܪ̈ܶܐ ܘܩܳܝܡܺܝܢ ܡܺܝ̈ܬܶܐ܆ ܒܩܳܠܶܗ ܚܰܝܳܐ ܕܦܳܪܽܘܩܰܢ܆ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܗܰܘ ܩܳܠܳܐ ܕܢܰܚܶܡ ܓܰܪ̈ܡܶܐ ܒܝܰܕ ܚܰܙܩܺܝܐܶܝܠ܆ ܘܩܳܡܘ ܟܰܕ ܙܳܡܪܺܝܢ ܬܶܫܒܽܘܚܬܳܐ ܠܰܡܢܰܚܶܡ ܟܽܠ܆ ܗܽܘ ܩܳܪܶܐ ܘܰܡܩܺܝܡ ܠܟܽܘܢ܆ ܐܳܘ ܥܰܢܺܝ̈ܕܶܐ ܠܳܐ ܬܶܟܪܶܐ ܠܟܽܘܢ܆ ܘܥܰܡ ܩܰܕܺܝ̈ܫܶܐ ܬܶܬܒܰܣܡܽܘܢ ܒܰܓܢܽܘܢ ܢܽܘܗܪܳܐ܆ ܫܽܘܒܚܳܐ ܠܰܡܢܰܚܶܡ ܡܺܝ̈ܬܶܐ. ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ ܘܶܐܫܬܺܝܘ ܠܰܕܡܳܟ܆ ܘܥܰܠ ܣܰܒܪܳܐ ܕܗܰܝܡܳܢܽܘܬܳܐ ܥܰܒܪܽܘܗ̱ܝ ܠܥܳܠܡܳܐ܆ ܘܰܫܟܶܒܘ ܘܶܐܬܬܢܺܝܚܘ ܘܰܡܣܰܟܶܝܢ܆ ܠܝܰܘܡܳܐ ܪܰܒܳܐ ܕܰܩܝܳܡܬܳܐ܆ ܒܳܟ ܢܶܬܢܰܦܨܽܘܢ ܡܶܢ ܥܰܦܪܳܐ ܡܰܠܟܳܐ ܡܫܺܝܚܳܐ܆ ܘܥܰܡܳܟ ܢܶܥܠܽܘܢ ܠܰܓܢܽܘܢܳܐ. ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ ܘܢܶܣܓܽܘܕ ܠܰܒܪܳܐ܆ ܘܢܰܘܕܶܐ ܠܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ܆ ܬܠܺܝܬܳܝܽܘܬܳܐ ܡܫܰܒܰܚܬܳܐ܆ ܐܺܝܬܝܳܝܬܳܐ ܘܰܡܬܽܘܡܳܝܬܳܐ܆ ܣܓܺܝܕܰܬ ܒܰܩܢܽܘ̈ܡܶܐ ܬܠܳܬܳܐ ܚܕܳܐ ܐܺܝܬܽܘܬܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ. ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܚܽܘܣ ܥܠܰܝ ܦܳܪܽܘܩܝ ܘܚܽܘܣ ܥܰܠ ܫܰܦܠܽܘܬܝ ܒܗܰܘ ܥܶܕܳܢܳܐ܆ ܕܬܳܩܶܢ ܟܽܘܪܣܰܝ ܪܰܒܽܘܬܳܟ܆ ܩܳܪܒܺܝܢ ܟܺܐܢ̈ܶܐ ܕܢܶܣܒܽܘܢ ܐܰܓܪܳܐ ܥܰܡܗܽܘܢ ܐܰܢܺܝܚ܆ ܠܥܰܒܕܰܝ̈ܟ ܕܰܫܟܶܒܘ ܥܰܠ ܣܰܒܪܳܟ܀

ܢܰܦܶܨ ܐܶܢܽܘܢ ܡܶܢ ܕܰܚܺܝܚܳܐ܆ ܠܝܰܠ̈ܕܰܘܗ̱ܝ ܕܳܐܕܳܡ܆ ܐܰܝܟ ܕܶܐܫܬܰܘܕܺܝܬ ܦܳܪܽܘܩܰܢ܆ ܘܰܐܥܶܠ ܐܶܢܽܘܢ ܠܰܓܢܽܘܢ ܢܽܘܗܪܳܐ ܕܰܐܘܕܺܝܘ ܒܰܫܡܳܟ܆ ܘܒܰܐܒܽܘܟ ܘܰܒܪܽܘܚܳܐ ܕܩܽܘܕܫܳܐ܀

ܡܽܘܢ ܝܳܬܰܪ ܐܰܢ̱ܬ ܐܳܘ ܒܰܪ ܚܰܝܳܐ ܡܶܢ ܥܰܢܺܝ̈ܕܶܐ܆ ܕܰܗܘܰܘ ܥܰܦܪܳܐ ܘܕܰܚܺܝܚܳܐ܆ ܫܪܺܝ ܠܠܶܫܳܢܳܐ ܕܡܶܬܗܰܦܰܟܽ ܗ̱ܘ ܕܰܢܙܰܡܰܪ ܠܳܟ܆ ܫܽܘܒܚܳܐ ܚܰܕܬܳܐ ܘܬܰܘܕܺܝܬܳܐ܀

ܐܰܫܡܰܥ ܐܶܢܽܘܢ ܩܳܠܳܟ ܡܳܪܰܢ ܠܡܺܝ̈ܬܶܐ ܕܰܫܝܽܘܠ܆ ܕܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ܆ ܒܥܺܕܬܳܐ ܕܒܽܘܟܪ̈ܶܐ ܗܳܝ ܕܒܰܫܡܰܝܳܐ ܛܰܟܶܣ ܐܶܢܽܘܢ܆ ܘܥܰܡ ܩܰܕܺܝܫܰܝ̈ܟ ܢܶܬܒܰܣܡܽܘܢ܀

ܚܠܳܦ ܕܶܐܬܛܰܪܰܦܘ ܡܳܪܝ ܒܰܐܟܣܶܢܝܳܐ ܡܰܪܺܝܪܳܐܺܝܬ܆ ܒܰܣܶܡ ܐܶܢܽܘܢ ܥܰܡ ܟܺܐܢ̈ܶܐ܆ ܚܠܳܦ ܕܶܐܬܢܰܟܪܺܝܘ ܡܶܢ ܐܰܒܳܗ̈ܶܐ ܘܓܶܢܣܳܐ ܘܛܽܘܗܡܳܐ܆ ܐܰܥܶܠ ܐܶܢܽܘܢ ܠܡܰܠܟܽܘܬܳܟ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܠܰܝܬ ܕܩܰܕܺܝܫ ܐܰܟܘܳܬܳܟ

ܒܪܰܝܬܳܝܗ̱ܝ ܡܳܪܝ ܡܶܢ ܫܽܘܪܳܝܳܐ܆ ܠܳܐܕܳܡ ܒܨܰܠܡܳܟ ܘܒܰܕܡܽܘܬܳܟ܆ ܘܶܐܫܬܰܠܰܛ ܒܶܗ ܡܰܘܬܳܐ ܕܥܰܓܢܶܗ܆ ܥܰܠ ܕܰܥܒܰܪ ܥܰܠ ܦܽܘܩܕܳܢܳܐ܆ ܛܳܒܳܐ ܕܓܳܠܘ ܪ̈ܰܚܡܰܘܗ̱ܝ ܘܦܰܪܩܶܗ܆ ܘܰܐܩܺܝܡܶܗ ܡܶܢ ܝܰܡܺܝܢܶܗ܆ ܐܰܢܺܝܚ ܠܥܰܒܕܰܝ̈ܟ ܕܰܫܟܶܒܘ ܒܳܟ܀

ܐܰܢ̱ܬ ܡܫܺܝܚܳܐ ܕܰܒܝܰܕ ܩܳܠܳܟ܆ ܠܠܳܥܳܙܳܪ ܘܰܐܩܺܝܡܬܳܝܗ̱ܝ ܘܡܶܢ ܡܰܘܬܳܐ ܠܚܰܝ̈ܶܐ ܐܰܥܕܺܝܬܳܝܗ̱ܝ܆ ܘܰܐܦܨܰܚܬ ܐܶܢܶܝܢ ܠܰܐܚ̈ܘܳܬܶܗ܆ ܠܥܰܢܺܝ̈ܕܶܐ ܕܡܺܝܬܘ ܥܰܠ ܣܰܒܪܳܟ܆ ܐܰܢܺܝܚ ܒܰܓܢܽܘܢ ܚܰܕ̈ܘܳܬܳܐ܆ ܐܰܢ̱ܬ ܛܳܒܳܐ ܘܪܳܚܶܡ ܐ̱ܢܳܫ̈ܳܐ܀

ܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ܆ ܪܽܘܣ ܦܳܪܽܘܩܰܢ ܥܰܠ ܥܰܒܕܰܝ̈ܟ܆ ܕܰܫܟܶܒܘ ܘܶܐܬܬܢܺܝܚ ܥܰܠ ܣܰܒܪܳܟ܆ ܘܰܡܣܰܟܶܝܢ ܠܝܽܘܡ ܓܶܠܝܳܢܳܟ܆ ܘܢܶܦܩܽܘܢ ܠܽܐܘܪܥܳܟ ܟܰܕ ܩܳܥܶܝܢ܆ ܕܠܰܝܬ ܕܩܰܕܺܝܫ ܐܰܟܘܳܬܳܟ܀

ܡܫܺܝܚܳܐ ܕܰܡܠܰܟ ܢܽܘܚܳܡܳܐ܆ ܘܚܰܝ̈ܶܐ ܚܰܕ̱̈ܬܶܐ ܠܒܶܝܬ ܐܳܕܳܡ܆ ܚܽܘܣ ܥܰܠ ܥܰܒ̈ܕܰܝܟ ܕܰܫܟܶܒܘ ܒܳܟ܆ ܘܣܳܓܽܘܕܰܝ̈ܟ ܕܡܺܝܬܘ ܥܰܠ ܣܰܒܪܳܟ܆ ܘܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ܆ ܒܰܣܶܡ ܐܶܢܽܘܢ ܒܰܓܢܽܘܢܳܟ܆ ܗܰܘ ܕܰܢܛܺܝܪܽ ܗ̱ܘ ܠܩܰܕܺܝ̈ܫܶܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܡܫܰܒܚܺܝܢ ܠܳܟ ܡܳܪܝܳܐ

ܚܽܘܣ ܡܳܪܝ ܥܰܠ ܦܰܓܪ̈ܶܐ܆ ܕܶܐܬܚܰܒܰܠܘ ܒܰܫܝܽܘܠ܆ ܘܚܰܕܶܬ ܨܽܘܪ̈ܳܬܗܽܘܢ܆ ܘܚܰܣܳܐ ܚܰܘ̈ܒܰܝܗܽܘܢ܀

ܚܽܘܣ ܡܳܪܝ ܥܰܠ ܓܽܘ̈ܫܡܶܐ܆ ܕܰܒܠܺܝܘ ܒܰܚܒܳܠܳܐ܆ ܘܚܰܕܶܬ ܨܽܘܪ̈ܳܬܳܐ܆ ܕܡܰܘܬܳܐ ܟܫܳܐ ܒܰܫܝܽܘܠ܀

ܚܽܘܣ ܡܳܪܝ ܥܰܠ ܥܰܒܕܰܝ̈ܟ܆ ܕܠܰܒܫܽܘܟ ܡܶܢ ܡܰܝ̈ܳܐ܆ ܘܫܰܩܠܽܘܟ ܡܶܢ ܡܰܕܒܚܳܐ܆ ܘܫܰܡܫܽܘܟ ܒܒܶܝܬ ܩܽܘܕܫܳܐ܀

ܒܥܽܘܒܶܗ ܕܰܐܒܪܳܗܳܡ܆ ܘܕܺܐܝܣܚܳܩ ܘܰܕܝܰܥܩܽܘܒ܆ ܐܰܫܪܳܐ ܡܳܪܝ ܠܥܰܒܕܰܝ̈ܟ܆ ܕܰܫܟܶܒܘ ܥܰܠ ܣܰܒܪܳܟ܀

ܒܰܐܬܪܳܐ ܕܒܶܗ ܥܳܡܪܺܝܢ܆ ܟܺܐܢ̈ܶܐ ܘܙܰܕܺܝ̈ܩܶܐ܆ ܒܶܗ ܢܶܚܕܽܘܢ ܥܰܒܕܰܝ̈ܟ܆ ܕܰܫܟܶܒܘ ܥܰܠ ܣܰܒܪܳܟ܀

ܒܰܐܬܪܳܐ ܕܓܶܐܘ̈ܳܬܳܐ܆ ܕܡܰܒܥܰܕ ܡܶܢ ܩܶܢܛܳܐ܆ ܬܰܡܳܢ ܢܶܬܛܰܟܣܽܘܢ܆ ܐܰܒܳܗܰܝ̈ܢ ܘܰܐܚܰܝ̈ܢ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܡܰܠܟܳܐ ܡܫܺܝܚܳܐ܆ ܕܺܐܝܬܰܝܟ ܢܽܘܚܳܡܳܐ ܘܚܰܝ̈ܶܐ܆ ܐܰܫܘܳܐ ܠܥܰܒܕܰܝ̈ܟ܆ ܕܰܢܩܽܘܡܽܘܢ ܡܶܢ ܝܰܡܺܝܢܳܟ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܐܰܢܺܝܚ ܡܳܪܝܳܐ܆ ܠܢܰܦ̈ܫܳܬܳܐ ܕܥܰܒ̈ܕܶܐ ܕܺܝܠܳܟ܆ ܒܗܳܝ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܫܽܘܒܚܳܐ

ܩܰܒܶܠ ܘܰܐܢܺܝܚ܆ ܒܽܐܘܪܫܠܶܡ ܗܳܝ ܕܒܰܫܡܰܝܳܐ܆ ܠܥܰܒ̈ܕܶܐ ܕܺܝܠܳܟ܆ ܒܰܝܢܳܬ ܟܶܢ̈ܫܶܐ ܕܩܰܕܺܝܫܰܝ̈ܟ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܡܳܐ ܕܳܐܬܶܐ ܐܰܢ̱ܬ܆ ܥܰܡ ܟܶܢ̈ܫܶܐ ܕܢܽܘܪܳܐ ܘܪܽܘܚܳܐ܆ ܕܰܬܕܽܘܢ ܛܽܘܗ̈ܡܶܐ ܘܫܰܪ̈ܒܳܬܳܐ ܒܕܺܝܢܳܐ ܕܟܺܐܢܽܘܬܳܐ܆ ܐܶܬܪܰܚܰܡ ܥܠܰܝܢ܀

ܡܫܺܝܚܳܐ ܕܺܐܝܬܰܝܟ܆ ܢܽܘܚܳܡܳܐ ܘܚܰܝ̈ܶܐ ܚܰܕ̱̈ܬܶܐ܆ ܚܰܣܳܐ ܘܰܫܒܽܘܩ ܚܰܘ̈ܒܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ܆ ܐܶܬܕܰܟܪܰܝܢ ܡܳܪܝܳܐ܀

ܐܰܢܺܝܚ ܡܳܪܝܳܐ܆ ܠܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ܆ ܘܒܰܕܡܳܟ ܚܰܝܳܐ ܐܶܬܚܰܣܺܝܘ܆ ܘܰܒܚܰܫܰܝ̈ܟ ܠܳܐ ܟܦܰܪܘ܆ ܐܶܬܕܰܟܪܰܝܢ ܡܳܪܝܳܐ܀

ܠܳܐ ܬܶܬܥܺܝܩܽܘܢ܆ ܡܶܣ̈ܟܺܢܶܐ ܡܛܰܪ̈ܦܶܐ ܘܒܳܝ̈ܫܶܐ܆ ܕܰܡܫܺܝܚܳܐ ܕܒܶܗ ܐܶܬܬܢܺܝܚܬܽܘܢ܆ ܗܽܘܝܽܘ ܡܢܰܚܶܡ ܠܟܽܘܢ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܐܰܩܺܝܡ ܐܶܢܽܘܢ܆ ܡܶܢ ܗܰܘ ܓܰܒܳܐ ܕܝܰܡܺܝܢܳܐ܆ ܠܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ܆ ܘܰܫܟܶܒܘ ܥܰܠ ܣܰܒܪܳܟ܆ ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ

ܠܰܐܟܣܶܢܝܳܐ ܢܶܦܩܶܬ ܐܺܙܰܠ ܐܳܘ ܚܰܒܺܝ̈ܒܰܝ. ܘܰܐܝܟܳܐ ܕܰܨܒܳܐ ܒܺܝ ܡܳܪܝܳܐ ܬܰܡܳܢ ܫܠܶܡܘ ܚܰܝܰܝ̈܆ ܕܠܰܝܬ ܗ̱ܘܳܐ ܠܺܝ ܒܰܐܟܣܶܢܝܳܐ ܐܶܡܳܐ ܕܬܶܒܟܶܐ. ܘܠܳܐ ܐܰܚ̈ܶܐ ܘܠܳܐ ܚܰܒܺܝ̈ܒܶܐ ܕܩܳܝܡܺܝܢ ܠܥܶܠ ܡܶܢ ܪܺܝܫܝ܆ ܪܽܘܚ ܩܽܘܕܫܳܐ ܗܺܝ ܗܘܳܬ ܠܺܝ ܐܶܡܳܐ. ܚܠܳܦ ܕܶܡ̈ܥܶܐ ܛܰܠܳܐ ܪܳܣܰܬ ܥܠܰܝ܆ ܡܫܺܝܚܳܐ ܡܳܪܳܐ ܕܰܐܟܣܶܢܝܳܐ. ܚܽܘܣ ܘܶܐܬܪܰܚܰܡ ܥܠܰܝ܀

ܫܽܘܒܚܳܐ

ܡܽܘܫܶܐ ܢܒܺܝܳܐ ܪܰܒܳܐ ܕܒܶܝܬ ܝܺܣܪܳܐܶܝܠ. ܡܺܝܬ ܘܶܐܬܥܰܦܺܝ ܒܛܽܘܪ ܢܳܒܽܘ ܒܰܐܬܪܳܐ ܕܰܐܟܣܶܢܝܳܐ܆ ܘܠܳܐ ܩܪ̈ܶܒܝ ܠܶܗ ܐܺܝ̈ܕܰܝ ܒܶܣܪܳܐ ܟܰܕ ܡܶܬܥܰܦܶܐ. ܘܠܳܐ ܐܶܬܥܰܡܰܨ ܡܶܢ ܐܰܚ̈ܶܐ ܘܪ̈ܳܚܡܶܐ ܘܚܰܒܺܝ̈ܒܶܐ܆ ܘܥܰܢܺܝ̈ܕܶܐ ܕܰܥܢܰܕܘ ܒܰܐܟܣܶܢܝܳܐ܆ ܘܶܐܬܪܰܚܰܩܘ ܡܶܢ ܚܰܒܺܝ̈ܒܰܝܗܽܘܢ. ܥܺܝܪ̈ܰܝ ܪܰܘܡܳܐ ܐܰܝܟ ܡܽܘܫܶܐ܆ ܙܰܝܰܚܘ ܦܰܓܪ̈ܰܝܗܽܘܢ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢܬܽܘܢ. ܡܢܰܚܡܳܢܳܐ ܕܝܰܠܕ̈ܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ

ܒܓܰܘ ܡܶܨܪܶܝܢ ܒܰܐܬܪܳܐ ܒܰܐܟܣܶܢܝܳܐ܆ ܝܰܥܩܽܘܒ ܟܺܐܢܳܐ ܐܶܬܥܰܦܺܝ܆ ܟܰܕ ܡܳܐܶܬ ܦܰܩܕܶܗ ܗ̱ܘܳܐ ܠܝܰܘܣܶܦ܆ ܕܢܶܣܰܒ ܓܰܪ̈ܡܰܘܗ̱ܝ ܡܶܢ ܬܰܡܳܢ܆ ܘܰܐܚܰܝ̈ܢ ܕܰܫܟܶܒܘ ܥܰܠ ܣܰܒܪܳܟ܆ ܘܥܰܠ ܬܽܘܟܠܳܢܶܗ ܕܰܚܢܳܢܳܟ܆ ܒܬܰܘܬܳܒܽܘܬܳܐ ܘܛܽܘܪ̈ܳܦܶܐ܆ ܥܰܡ ܐܰܒܪܳܗܳܡ ܘܥܰܡ ܐܺܝܣܚܳܩ܆ ܘܥܰܡ ܝܰܥܩܽܘܒ ܐܰܫܪܳܐ ܐܶܢܽܘܢ܀

ܫܽܘܒܚܳܐ

ܟܰܕ ܡܳܐܶܬ ܝܰܘܣܶܦ ܒܓܰܘ ܡܶܨܪܶܝܢ܆ ܒܰܐܟܣܶܢܝܳܐ ܡܶܢ ܡܽܘܠܟܳܢܳܐ܆ ܩܪܳܐ ܠܰܐܚܰܘ̈ܗ̱ܝ ܘܰܠܗܽܘܢ ܦܰܩܶܕ ܗ̱ܘܳܐ܆ ܒܓܶܠܝܳܢܳܐ ܕܰܢܒܺܝܽܘܬܳܐ܆ ܕܶܐܢܳܐ ܡܶܟܺܝܠ ܝܳܕܰܥ ܐ̱ܢܳܐ܆ ܕܰܠܟܽܘܢ ܡܶܬܕܟܰܪ ܐܰܠܳܗܳܐ܆ ܘܰܠܟܽܘܢ ܡܰܣܶܩ ܡܶܢ ܗܳܪܟܳܐ܆ ܘܡܰܥܶܠ ܠܰܐܪܥܳܐ ܕܡܽܘܠܟܳܢܳܐ܆ ܐܰܣܶܩܘ ܓܰܪ̈ܡܰܝ ܒܰܠܘܺܝܬܟܽܘܢ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܦܶܬܓܳܡܳܐ: ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ܆ ܘܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܠܥܰܒܕܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܗܳܐ ܛܰܝܒܽܘܬܳܐ ܐܶܬܥܰܒܪܰܬ ܒܶܗ ܒܓܶܢܣܶܗ ܕܳܐܕܳܡ܆ ܟܡܳܐ ܠܳܟ ܦܽܘ̈ܡܶܐ ܠܰܡܫܰܒܳܚܽܘ ܠܪ̈ܰܚܡܶܐ ܕܚܰܢܽܘܟ܆ ܠܳܐ ܐܶܫܬܰܕܰܪܘ ܣܪ̈ܳܦܶܐ ܢܚܰܣܽܘܢ ܥܰܠ ܚܰܘ̈ܒܳܬܳܟ܆ ܘܠܳܐ ܡܰܠܰܐܟ̈ܶܐ ܢܦܰܠܓܽܘܢ ܣܰܡܳܐ ܠܰܚܒܳܪ̈ܳܬܳܟ܀

ܚܠܳܦ ܕܶܐܬܪܥܶܡܘ ܡܶܢ ܢܽܘܟܪ̈ܳܝܶܐ ܘܰܫ̈ܚܳܩܶܐ ܣܒܰܠܘ܆ ܥܰܡ ܙܰܕܺܝ̈ܩܶܐ ܢܶܚܕܽܘܢ ܬܰܡܳܢ ܒܰܐܡܺܝܢܽܘܬܳܐ܆ ܚܠܳܦ ܡܽܘܟܳܟܳܐ ܥܰܡ ܛܽܘܪ̈ܳܦܶܐ ܕܣܰܝܒܰܪܘ ܗܳܪܟܳܐ܆ ܢܺܐܪܬܽܘܢ ܬܰܡܳܢ ܡܰܠܟܽܘܬ ܪܰܘܡܳܐ ܕܠܳܐ ܡܶܫܬܰܪܝܳܐ܀

ܟܳܗ̈ܢܶܐ ܕܫܰܡܫܽܘܟ ܒܓܰܘ ܒܶܝܬ ܩܽܘܕܫܳܐ ܡܠܶܐ ܙܰܗܝܽܘܬܳܐ܆ ܐܰܢܺܝܚ ܐܶܢܽܘܢ ܒܰܪ ܐܰܠܳܗܳܐ ܒܶܝܬ ܡܰܠܟܽܘܬܳܐ܆ ܚܠܳܦ ܗܽܘ̈ܠܳܠܶܐ ܕܙܰܡܰܪܘ ܗ̱ܘܰܘ ܠܳܟ ܒܶܝܬ ܐܰܪ̈ܥܳܢܶܐ܆ ܐܰܫܘܳܐ ܐܶܢܽܘܢ ܠܫܽܘܒܚܳܐ ܕܥܺܝܪ̈ܶܐ ܘܓܽܘ̈ܕܶܐ ܕܟܺܐܢ̈ܶܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ܆

ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܐ̱ܚܪܺܢܳܐ

ܠܳܐ ܡܳܪܝ ܢܶܫܡܰܥ ܠܗܳܝ ܒܰܪ̱ܬ ܩܳܠܳܐ ܕܰܦܣܳܩ ܣܰܒܪܳܐ܆

ܕܰܐܘܕܺܝܢܰܢ ܒܳܟ ܡܳܪܝ ܐܰܘܕܳܐ ܒܰܢ ܘܪܰܚܶܡ ܥܠܰܝܢ܀