ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ

ܡܳܐ ܕܳܐܬܶܐ ܒܰܪ ܐܰܠܳܗܳܐ ܒܫܽܘܒܚܳܐ ܕܰܐܒܽܘܗ̱ܝ܆ ܘܥܰܡܶܗ ܟܽܠܗܽܘܢ ܡܰܠܰܐܟܰܘ̈ܗ̱ܝ ܠܰܡܕܳܢ ܒܶܪ̈ܝܳܬܳܐ܆ ܘܙܳܥܩܳܐ ܩܰܪܢܳܐ܆ ܘܡܶܬܢܰܚܡܺܝܢ ܡܺܝ̈ܬܶܐ܆ ܘܢܳܦܩܺܝܢ ܟܺܐܢ̈ܶܐ܆ ܠܽܐܘܪܥܳܐ ܕܡܶܐܬܺܝܬܶܗ܆ ܡܳܐ ܕܬܳܩܶܢ ܟܽܘܪܣܰܝ ܕܺܝܢܳܐ ܠܦܽܘܪܥܳܢܳܐ ܕܟܽܠ ܐ̱ܢܳܫ܆ ܐܰܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ ܚܽܘܢ ܐܶܢܽܘܢ ܡܳܪܝܳܐ܆ ܗ̄ ܘܚܰܣܳܐ ܚܰܘܒܰܝ̈ܗܽܘܢ܀

ܫܽܘܒܚܳܐ

ܡܽܘܢ ܡܛܳܐ ܠܺܝ ܡܶܢ ܥܳܠܡܳܐ ܘܡܶܢ ܩܶܢܝܳܢܰܘ̈ܗ̱ܝ܆ ܐܳܡܪܳܐ ܠܶܗ ܢܰܦܫܳܐ ܠܦܰܓܪܳܐ ܡܳܐ ܕܡܶܢܶܗ ܦܳܪܫܳܐ܆ ܪܳܓܳܐ ܗ̱ܘܳܬ ܠܺܝ܆ ܕܶܐܫܰܕܰܪ ܩܽܘܕܡܰܝ܆ ܥܒܴ̈ܕܶܐ ܛܳܒ̈ܶܐ܆ ܕܡܶܬܒܥܶܝܢ ܠܒܶܝܬ ܕܺܝܢܳܐ܆ ܗܳܐ ܫܒܺܝܩ ܥܽܘܡܪܳܐ ܠܥܳܡܽܘܪ̈ܰܘܗ̱ܝ܆ ܘܩܶܢܝܳܢܳܐ ܠܪ̈ܳܚܡܰܘܗ̱ܝ܆ ܘܳܐܙܳܠ̱ܢ ܕܶܐܥܒܶܕ ܚܽܘܫܒܳܢܳܐ ܥܰܠ ܡܽܘܢ ܕܰܣܥܺܝܪ ܠܺܝ܆ ܗ̄ ܚܰܣܳܐ ܠܺܝ ܚܰܘ̈ܒܰܝ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܠܥܰܒܕܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܐܰܫܡܰܥ ܐܶܢܽܘܢ ܩܳܠܳܟ ܡܳܪܰܢ ܠܡܺܝ̈ܬܶܐ ܕܰܫܝܽܘܠ܆ ܠܰܒ̈ܢܰܝ ܐ̱ܪ̈ܳܙܰܝܟ ܕܬܰܘ ܥܽܘܠܘ ܝܺܪܰܬܘ ܓܰܢܰܬ ܛܽܘ̈ܒܶܐ܆ ܒܥܺܕܬܳܐ ܕܒܽܘܟܪ̈ܶܐ ܗܳܝ ܕܰܫܡܰܝܳܐ ܛܰܟܶܣ ܐܶܢܽܘܢ܆ ܘܥܰܡ ܩܰܕܺܝ̈ܫܶܐ ܒܢܰܝ̈ ܝܳܪܬܽܘܬܳܟ ܒܰܣܶܡ ܐܶܢܽܘܢ܀

ܐܰܫܡܰܥ ܐܶܢܽܘܢ ܗܳܝ ܒܰܪ̱ܬ ܩܳܠܳܐ ܡܚܰܕܝܳܢܺܝܬܳܐ܆ ܕܬܰܘ ܥܽܘܠܘ ܝܺܪܰܬܘ ܗܳܝ ܡܰܠܟܽܘܬܳܐ ܫܡܰܝܳܢܺܝܬܳܐ܆ ܢܰܦܶܨ ܐܶܢܽܘܢ ܡܶܢ ܕܰܚܺܝܚܳܐ ܘܡܶܢ ܙܰܗܡܽܘܬܳܐ܆ ܘܰܐܥܶܠ ܐܶܢܽܘܢ ܠܰܐܘܨܪ̈ܰܝ ܛܽܘ̈ܒܶܐ ܕܗܳܝ ܡܰܠܟܽܘܬܳܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ܆

ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܐ̱ܚܪܺܢܳܐ

ܠܳܐ ܡܳܪܝ ܢܶܫܡܰܥ ܠܗܳܝ ܒܰܪ̱ܬ ܩܳܠܳܐ ܕܰܦܣܳܩ ܣܰܒܪܳܐ܆

ܕܰܐܘܕܺܝܢܰܢ ܒܳܟ ܡܳܪܝ ܐܰܘܕܳܐ ܒܰܢ ܘܪܰܚܶܡ ܥܠܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܥܰܢܺܝ̈ܕܶܐ