ܒܝܽܘܡ 15 ܕܟܳܢܽܘܢ ܐ̱ܚܪܳܝ

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܽܘܒܰܝܟܝ ܐܶܡܳܐ ܕܟܺܝܬܳܐ܆ ܒܬܽܘܠܬܳܐ ܝܳܠܕܰܬ ܐܰܠܳܗܳܐ܆ ܕܦܺܐܪܳܐ ܕܡܶܢܶܟܝ܆ ܡܰܥܒܰܪ ܚܰܫ̈ܶܐ ܕܰܚܛܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܠܩܺܐܒܽܘܬܳܐ ܕܢܳܡܽܘܣܳܐ܆ ܘܰܠܓܶܙܬܳܐ ܕܳܡܝܳܐ ܡܰܪܝܰܡ܆ ܕܒܳܗ̇ ܐܶܣܬܰܝܰܟܘ܆ ܐ̱ܪ̈ܳܙܶܐ ܟܽܠܗܽܘܢ ܕܰܢܒܺܝ̈ܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܕܰܐܫܘܺܝܬܳܢ ܕܢܶܙܡܰܪ ܠܳܟ܆ ܫܽܘܒܚܳܐ ܒܕܽܘܟܪܳܢ ܝܳܠܶܕܬܳܟ܆ ܚܰܕܳܢ ܡܳܪܰܢ܆ ܒܫܽܘܒܩܳܢ ܚܰܘ̈ܒܶܐ ܘܰܚ̈ܛܳܗܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟ ܕܰܕܢܰܚ ܡܶܢ ܥܽܘܒܶܟܝ܆ ܡܰܠܝܰܬ ܪ̈ܰܚܡܶܐ ܘܛܰܝܒܽܘܬܳܐ܆ ܘܪܰܡܪܶܡ ܘܰܐܘܪܶܒ܆ ܝܰܘܡܳܐ ܫܒܺܝܚܳܐ ܕܕܽܘܟܪܳܢܶܟܝ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܠ ܝܽܘܪܕܢܳܢ

ܒܪܺܝܟܳܐ ܗ̱ܝ ܡܰܪܝܰܡ܆ ܕܰܠܦܳܪܽܘܩܳܐ ܝܶܠܕܰܬ܆ ܘܗܳܐ ܡܶܙܕܰܝܰܚ܆ ܕܽܘܟܪܳܢܳܗ̇ ܡܶܢ ܕܳܪ ܠܕܳܪ܀

ܛܽܘܒܰܝܟܝ ܒܬܽܘܠܬܳܐ܆ ܒܰܪ̱ܬ ܕܰܘܺܝܕ ܩܰܕܺܝܫܬܳܐ܆ ܕܰܟܡܳܐ ܝܺܪܶܒܬܝ܆ ܒܝܰܕ ܡܫܺܝܚܳܐ ܕܰܕܢܰܚ ܡܶܢܶܟܝ܀

ܡܫܺܝܚܳܐ ܡܳܪܰܢ܆ ܕܰܠܕܽܘܟܪܳܢܳܐ ܕܶܐܡܳܟ܆ ܒܬܽܘܠܬܳܐ ܡܰܪܝܰܡ܆ ܡܰܘܪܶܒ ܐܰܢ̱ܬ ܘܰܡܝܰܩܰܪ ܐܰܢ̱ܬ܀

ܒܰܨ̈ܠܰܘܳܬܳܗ̇܆ ܕܗܳܝ ܕܺܝܠܶܕܬܳܟ ܡܳܪܰܢ܆ ܚܰܣܳܐ ܚܰܘ̈ܒܰܝܢ܆ ܘܒܺܝ̈ܫܳܬܳܐ ܕܰܣܥܺܝܪ̈ܳܢ ܠܰܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܡܫܺܝܚܳܐ ܐܰܠܳܗܳܐ ܕܰܠܕܽܘܟܪܳܢܳܐ: ܕܶܐܡܳܐ ܒܬܽܘܠܬܳܐ ܕܺܝܠܶܕܬܳܟ: ܡܰܘܪܶܒ ܐܰܢ̱ܬ ܘܰܡܝܰܩܰܪ ܐܰܢ̱ܬ: ܠܘܳܬܳܟ ܩܰܕܡܶܬ ܪܰܚܶܡܥܠܰܝܢ܀

ܗܰܘ ܕܰܠܥܺܝܪ̈ܶܐ ܘܪ̈ܰܒܰܝ ܡܰܠܰܐܟ̈ܶܐ: ܙܰܡܶܢܬ ܠܝܰܘܡܳܐ ܕܕܽܘܟܪܳܢܳܗܿ: ܕܶܐܡܳܐ ܒܬܽܘܠܬܳܐ ܕܺܝܠܶܕܬܳܟ: ܠܘܳܬܳܟ ܩܰܕܡܶܬ ܪܰܚܶܡܥܠܰܝܢ܀

ܛܽܘܒܰܝܟܝ̱ ܒܬܽܘܠܬܳܐ: ܡܰܪܝܰܡ ܒܰܪ̱ܬ ܕܰܘܺܝܕ: ܕܰܒܝܰܕ ܦܺܐܪܳܐ ܕܡܶܢ ܥܽܘܒܶܟܝ̱: ܥܒܰܪ ܗ̱ܘܳܐ ܚܶܣܕܳܐ ܕܒܶܝܬ ܐܳܕܳܡ: ܠܘܳܬܳܟ ܩܰܕܡܶܬ ܪܰܚܶܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܒܰܫܪܳܪܳܐ

ܗܳܕܳܐ ܗ̱ܝ ܒܰܫܪܳܪܳܐ: ܐܶܡܳܐ ܡܰܠܝܰܬ ܛܰܝܒܽܘܬܳܐ: ܗܳܝ ܕܶܐܬܢܰܒܝܰܬ ܥܰܠ ܢܰܦܫܳܗܿ: ܕܟܽܠ ܫܰܪ̈ܒܳܢ ܕܺܐܝܬ ܥܰܠ ܐܰܪܥܳܐ: ܛܽܘܒܳܐ ܪܰܒܳܐ ܝܳܗ̈ܒܳܢ ܠܳܗ̇: ܥܰܠ ܝܰܠܕܳܐ ܡܳܪܳܢܳܝܳܐ: ܕܰܕܢܰܚ ܡܶܢܳܗ̇: ܗܰܘ ܕܠܶܗܽ ܗ̱ܘ ܡܫܰܒܚܺܝܢܰܢ: ܠܥܳܠܰܡ ܥܳܠܡܺܝܢ܀

ܫܠܳܡܠܶܟܝ̱ ܟܰܠܬܳܐ: ܐܶܡܳܐ ܢܰܨܺܝܚܬܳܐ ܕܡܰܠܟܳܐ: ܫܠܳܡܠܶܟܝ̱ ܕܡܶܢܶܟܝ̱ ܐܶܬܺܝܠܶܕ: ܗܰܘ ܕܰܫܡܰܝ̈ܳܐ ܠܳܐ ܡܣܰܟܶܝܢ ܠܶܗ: ܫܠܳܡ ܠܶܟܝ̱ ܐܳܘ ܡܒܰܪܰܟܬܳܐ: ܕܡܶܢ ܟܪ̈ܽܘܒܶܐ ܐܰܠܳܗܳܝ̈ܶܐ ܣܰܓܺܝ ܡܝܰܩܪܰܬܝ̱: ܒܗܳܝ ܕܰܕܢܰܚ ܡܶܢ ܥܽܘܒܶܟܝ̱ ܕܰܟܝܳܐ: ܐܰܠܳܗܳܐ ܕܥܰܠ ܟܽܠ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܡܫܺܝܚܳܐ ܐܰܠܳܗܳܐ: ܗܰܘ ܫܶܡܫܳܐ ܕܙܰܕܺܝܩܽܘܬܳܐ: ܨܶܡܚܳܐ ܕܡܶܢ ܐܰܒܳܐ ܕܢܽܘܗܪܳܐ: ܕܰܕܢܰܚ ܡܶܢ ܒܬܽܘܠܬܳܐ ܡܰܪܝܰܡ: ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܢܶܣܓܽܘܕ ܠܶܗ܀

ܒܝܰܘܡܳܐ ܕܕܽܘܟܪܳܢܶܟܝ̱: ܡܰܠܝܰܬ ܫܽܘܦܪ̈ܶܐ ܘܢܶܨ̈ܚܳܢܶܐ: ܐܶܡܳܐ ܕܺܝܠܳܟ ܩܰܕܺܝܫܬܳܐ: ܚܰܣܳܐ ܠܥܰܡܳܟ ܐܰܠܳܗܳܐ: ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܢܶܣܓܽܘܕ ܠܶܗ܀

ܕܢܰܘܕܶܐ ܘܢܶܣܓܽܘܕ ܠܳܟ: ܘܢܶܙܡܰܪ ܠܳܟ ܫܽܘܒܚܳܐ ܡܳܪܝܳܐ: ܕܰܦܪܰܩܬܳܢ ܡܶܢ ܛܳܥܝܽܘܬܳܐ: ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ: ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܢܶܣܓܽܘܕ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܡܳܐ ܕܶܐܬܦܰܠܰܓ

ܠܶܟܝ̱ ܛܽܘܒܰܝܟܝ̱ ܐܳܘ ܒܰܪ̱ܬ ܕܰܘܺܝܕ ܒܬܽܘܠܬܳܐ ܡܰܪܝܰܡ: ܕܰܫܘܰܝܬܝ̱ ܕܬܶܗܘܶܝܢ ܠܶܗ ܐܶܡܳܐ ܠܒܰܪ ܐܰܠܳܗܳܐ: ܘܰܕܢܰܚ ܫܽܘܒܚܶܗ ܡܶܢ ܥܽܘܒܶܟܝ̱: ܘܪܰܡܪܶܡ ܘܰܐܘܪܶܒ ܝܽܘܡ ܕܽܘܟܪܳܢܶܟܝ̱: ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܘܒܰܐܪܒܰܥ ܦܶܢ̈ܝܳܢ: ܗܳܐ ܡܫܰܒܚܺܝܢ ܠܶܗ ܒܕܽܘܟܪܳܢܶܟܝ̱: ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐܰܢ̱ܬܝ̱ ܗܺܝ ܥܢܳܢܳܐ ܩܰܠܺܝܠܬܳܐ ܕܰܥܠܶܝܗܿ ܐܶܡܰܪ: ܐܶܫܰܥܝܳܐ ܗܰܘ ܒܰܪ ܐܳܡܽܘܨ: ܟܰܕ ܡܶܬܢܰܒܶܐ: ܕܗܳܐ ܡܳܪܝܳܐ ܪܟܺܝܒ ܥܰܠ ܥܢܳܢܳܐ ܩܰܠܺܝܠܬܳܐ ܘܥܳܐܶܠ ܠܡܶܨܪܶܝܢ: ܘܟܽܠܗܽܘܢ ܓܠܺܝ̈ܦܶܐ ܕܡܶܨܪ̈ܳܝܶܐ ܢܳܦܠܺܝܢ ܩܽܘܕܡܰܘܗ̱ܝ: ܘܓܰܠܝܳܐܺܝܬ ܓܠܳܐ ܫܽܘܒܚܶܗ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܕܰܡ̈ܟܶܐ

ܒܗܳܢܳܐ ܝܰܘܡܳܐ ܕܕܽܘܟܪܳܢܶܟܝ ܐܳܘ ܒܰܪ̱ܬ ܕܰܘܺܝܕ܆ ܚܳܕ̈ܝܳܢ ܟܽܠܗܶܝܢ ܒܶܪ̈ܝܳܬܳܐ܆ ܘܙܳܡܪ̈ܳܢ ܫܽܘܒܚܳܐ ܠܗܰܘ ܕܰܓܒܳܟܝ܆ ܠܶܟܝ ܛܽܘܒܰܝܟܝ ܝܳܠܕܰܬ ܐܰܠܳܗܳܐ܀

ܟܽܠ ܒܶܪ̈ܝܳܬܳܐ ܬܰܗܺܝܪ̈ܳܢ ܘܰܡܩܰܠ̈ܣܳܢ ܠܶܟܝ܆ ܒܬܽܘܠܬܳܐ ܡܰܠܝܰܬ ܛܰܝܒܽܘܬܳܐ܆ ܕܰܗܘܰܝܬܝ ܐܶܡܳܐ ܠܰܐܠܳܗܳܐ܆ ܠܶܟܝ ܛܽܘܒܰܝܟܝ ܝܳܠܕܰܬ ܐܰܠܳܗܳܐ܀

ܡܰܪܓܳܢܺܝܬܳܐ ܕܠܳܐ ܡܽܘܡܳܐ ܐܺܝܬܰܝܟܝ ܡܰܪܝܰܡ܆ ܕܰܒܟܽܠ ܦܶܢ̈ܝܳܢ ܗܳܐ ܡܰܦܪܶܓ܆ ܫܽܘܦܪܶܟܝ ܦܰܐܝܳܐ ܒܓܰܘ ܬܺܒܶܝܠ܆ ܠܶܟܝ ܛܽܘܒܰܝܟܝ ܝܳܠܕܰܬ ܐܰܠܳܗܳܐ܀

ܪܳܡ ܫܰܪܒܶܟܝ ܡܶܢ ܡܰܠܳــ̈ـܠܶܐ ܒܬܽܘܠܬܳܐ ܡܰܪܝܰܡ܆ ܘܦܽܘܡܳܐ ܕܐ̱ܢܳܫ̈ܳܐ ܠܳܐ ܣܳܦܶܩ܆ ܕܰܢܬܰܢܶܐ ܟܽܠܗܽܘܢ ܫܽܘܦܪ̈ܰܝܟܝ܆ ܠܶܟܝ ܛܽܘܒܰܝܟܝ ܝܳܠܕܰܬ ܐܰܠܳܗܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܛܽܘܒܰܝܟܝ̱ ܐܳܦ ܠܶܟܝ̱: ܐܳܘ ܡܰܪܝܰܡ ܒܰܪ̱ܬ ܕܰܘܺܝܕ: ܐܶܡܳܐ ܡܒܰܪܰܟܬܳܐ ܕܰܕܢܰܚ ܡܶܢܶܟܝ̱ ܒܰܪ ܐܰܠܳܗܳܐ ܒܚܰܪܰܬ ܙܰܒ̈ܢܶܐ: ܘܗܳܐ ܡܶܙܕܰܝܰܚ ܕܽܘܟܪܳܢܶܟܝ̱ ܒܰܐܪܒܰܥ ܦܶܢ̈ܝܳܬܳܐ܀

ܠܳܟ ܬܶܫܒܽܘܚܬܳܐ: ܝܰܠܕܳܐ ܣܓܺܝܕܳܐ ܕܡܶܢ ܐܰܒܳܐ: ܒܕܽܘܟܪܳܢ ܝܳܠܶܕܬܳܟ: ܕܰܒܛܰܝܒܽܘܬܳܟ ܗܘܰܝܬ ܒܰܪܢܳܫܳܐ ܕܠܳܐ ܫܽܘܚܠܳܦܳܐ: ܘܚܰܪܰܪܬ ܨܰܠܡܳܟ ܕܶܐܬܚܰܒܰܠ: ܒܰܥܒܳܪ ܦܽܘܩܕܳܢܳܐ

ܐ̱ܚܪܺܢܳܐ

ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܫܡܰܝܳܐ ܕܬܰܪܬܶܝܢ ܕܰܛܥܶܢܬܶܗ܆ ܠܰܐܠܳܗܳܐ ܐܰܝܟ ܨܶܒܝܳܢܶܗ܆ ܐܰܦܺܝܣܝ ܘܰܒܥܳܝ ܠܺܝܚܺܝܕܶܟܝ܆ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܛܽܘܒܰܝܟܝ ܐܶܡܶܗ ܕܰܐܠܳܗܳܐ܆ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ܆ ܕܰܛܥܶܢܬܝ ܘܙܰܝܰܚܬܝ ܥܰܠ ܕܪ̈ܳܥܰܝܟܝ܆ ܠܰܒܪܳܐ ܚܰܝܳܐ ܕܰܐܠܳܗܳܐ܀

ܠܶܟܝ ܛܽܘܒܰܝܟܝ ܛܽܘܒܳܢܺܝܬܳܐ܆ ܐܶܡܳܐ ܡܰܠܝܰܬ ܒܽܘܪ̈ܟܳܬܳܐ܆ ܕܠܳܐ ܪܳܡܳܐ ܫܡܰܝܳܐ ܡܶܢܶܟܝ܆ ܕܙܰܝܰܚܬܝ ܠܡܳܪܳܐ ܕܰܫܡܰܝܳܐ܀

ܒܬܽܘܠܬܳܐ ܕܰܗܘܳܬ ܪܺܝܫܺܝܬܳܐ܆ ܘܶܐܬܝܰܒܰܠܘ ܚܰܝ̈ܶܐ ܡܶܢܳܗ̇܆ ܐܰܦܺܝܣ ܘܰܒܥܳܝ ܠܺܝܚܺܝܕܶܟܝ܆ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܒܕܽܘܟܪܳܢܳܗ̇ ܕܰܡܒܰܪܰܟܬܳܐ܆ ܟܽܠܗܶܝܢ ܒܶܪ̈ܝܳܬܳܐ ܚܳܕ̈ܝܳܢ܆ ܘܙܳܡܪ̈ܳܢ ܫܽܘܒܚܳܐ ܘܬܰܘܕܺܝܬܳܐ܆ ܠܰܐܠܳܗܳܐ ܕܰܕܢܰܚ ܡܶܢܳܗ̇܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܫܰܒܰܚ̈ܝ̱ ܟܽܠܗܶܝܢ ܒܶܪ̈ܝܳܬܳܐ: ܘܥܰܡ̱̈ܡܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ: ܠܗܰܘ ܨܶܡܚܳܐ ܕܡܶܢ ܐܺܝܬܽܘܬܳܐ: ܕܰܕܢܰܚ ܒܰܒܣܰܪ ܡܶܢ ܒܬܽܘܠܬܳܐ܀

ܫܠܳܡܠܶܟܝ̱ ܡܰܠܝܰܬ ܛܰܝܒܽܘܬܳܐ: ܕܰܫܘܰܝܬܝ̱ ܕܬܶܗܘܶܝܢ ܠܶܗ ܐܶܡܳܐ: ܠܗܰܘ ܕܬܶܐܓ̈ܡܶܐ ܓܢܺܝܙܳܐ ܕܰܠܥܶܠ ܒܰܪܬܺܝܬܳܐ ܩܳܝܡܺܝܢ ܩܽܘܕܡܰܘܗ̱ܝ܀

ܛܽܘܒܰܝܟܝ ܕܰܗܘܰܝܬܝ ܠܶܗ ܐܶܡܳܐ܆ ܠܗܰܘ ܕܰܫ̈ܡܰܝܳܐ ܙܥܽܘܪܺܝܢ ܠܶܗ܆ ܘܰܕܢܰܚ ܡܶܢ ܥܽܘܒܶܟܝ ܕܰܟܝܳܐ܆ ܗܰܘ ܕܫܶܡܫܳܐ ܕܙܰܕܺܝܩܽܘܬܳܐ܀

ܛܽܘܒܰܝܟܝ ܒܺܝܪܬܳܐ ܡܫܰܟܠܰܠܬܳܐ܆ ܕܰܐܪܕܺܟܠܳܐ ܕܪܰܘܡܳܐ ܩܰܒܶܠܬܝ܆ ܒܛܶܢܬܺܝܘܗ̱ܝ ܘܰܢܛܺܝܪܺܝܢ ܒܬܽܘܠܰܝ̈ܟܝ܆ ܘܺܝܠܶܕܬܺܝܘܗ̱ܝ ܘܩܰܘܺܝܬܝ ܕܟܺܝܬܳܐ܀

ܒܕܽܘܟܪܳܢܳܗ̇ ܕܛܽܘܒܳܢܺܝܬܳܐ܆ ܚܴ̈ܕܝܳܢ ܟܽܠܗܶܝܢ ܒܶܪ̈ܝܳܬܳܐ܆ ܘܕܳܝܨܺܝܢ ܥܺܝܪ̈ܶܐ ܒܰܫܡܰܝܳܐ܆ ܒܗܳܢܳܐ ܝܰܘܡܳܐ ܕܥܰܕܥܺܐܕܳܗ̇܀

ܢܰܥܒܰܪ ܡܳܪܝܳܐ ܡܶܢ ܥܺܕܬܳܐ܆ ܘܡܶܢ ܝܰܠ̈ܕܶܝܗ̇ ܙܰܒ̈ܢܶܐ ܒܺܝ̈ܫܶܐ܆ ܘܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܒܝܰܕ ܨܠܰܘ̈ܳܬܶܟܝ ܩܰܕܺܝܫܬܳܐ܀

ܠܰܝܬ ܠܰܢ ܣܰܒܪܳܐ ܘܒܶܝܬ ܓܰܘܣܳܐ܆ ܣܛܰܪ ܡܶܢܶܟܝ ܐܶܡܳܐ ܕܟܺܝܬܳܐ܆ ܐܰܦܺܝܣܝ ܚܠܳܦܰܝܢ ܐܳܘ ܒܬܽܘܠܬܳܐ܆ ܠܰܐܠܳܗܳܐ ܢܪܰܚܶܡ ܥܠܰܝܢ܀

ܥܶܠܳܝ̈ܶܐ ܙܳܝܥܺܝܢ ܡܶܢܶܗ: ܘܰܒܥܽܘܒܶܟܝ ܨܒܳܐ ܕܢܶܙܕܰܝܰܚ: ܢܽܘܪ̈ܳܢܶܐ ܟܳܘܙܺܝܢ ܡܶܢܶܗ: ܘܰܒܫܰܝܢܳܐ ܐܳܬܶܐ ܨܶܝܕܰܝܟܝ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܠܶܟܝ ܛܽܘܒܰܝܟܝ ܩܰܕܺܝܫܬܳܐ܆ ܒܰܪܬܶܗ ܕܕܰܘܺܝܕ ܒܬܽܘܠܬܳܐ ܡܰܪܝܰܡ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ ܠܒܰܪ ܐܰܠܳܗܳܐ܆ ܘܰܕܢܰܚ ܡܶܢܶܟܝ܆ ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܡܳܐ ܦܐܶܐ ܗ̱ܘܳܐ ܘܫܰܦܺܝܪ ܠܳܗ̇܆ ܠܗܳܝ ܒܰܪ̱ܬ ܕܰܘܺܝܕ ܕܰܛܥܺܝܢܳܐ ܠܶܗ܆ ܠܶܐܡܪܶܗ ܚܰܝܳܐ ܕܰܐܠܳܗܳܐ ܠܥܶܠ ܡܶܢ ܒܽܘܪ̈ܟܶܝܗ̇܆ ܘܝܳܗܒܳܐ ܚܰܠܒܳܐ܆ ܠܙܳܝܽܘܢܳܐ ܕܟܽܠ ܒܶܪ̈ܝܳܬܳܐ܀

ܫܽܘܒܚܳܐ

ܥܒܶܕ ܡܳܪܰܢ ܕܽܘܟܪܳܢܳܐ܆ ܠܗܳܝ ܕܺܝܠܶܕܬܳܟ ܘܰܠܩܰܕܺܝܫܰܝ̈ܟ܆ ܘܫܰܘܬܶܦ ܥܰܡܗܽܘܢ ܠܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ܆ ܘܶܐܫܬܺܝܘ ܠܰܕܡܳܟ܆ ܘܰܢܩܽܘܡܽܘܢ ܡܶܢ ܝܰܡܺܝܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܡܳܐ ܫܰܦܺܝܪ ܠܳܗ̇: ܠܒܰܪ̱ܬ ܕܰܘܺܝܕ ܛܽܘܒܳܢܺܝܬܳܐ: ܒܬܽܘܠܬܳܐ ܝܳܠܕܰܬ ܐܰܠܳܗܳܐ: ܟܰܕ ܐܳܡܪܳܐ ܗ̱ܘܳܬ ܠܶܗ ܠܥܺܝܪܳܐ: ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܡܳܐ ܚܰܒܺܝܒܝ̱ ܗ̱ܘܳܐ: ܕܽܘܟܪܳܢܳܗ̇ ܕܰܡܒܰܪܰܟܬܳܐ: ܒܬܽܘܠܬܳܐ ܝܳܠܕܰܬ ܐܰܠܳܗܳܐ: ܘܰܚܠܶܐ ܪܺܝܚܳܐ ܕܥܽܘܗܕܳܢܳܗ̇: ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܰܝܟ ܦܺܝܪܡܳܐ ܕܩܰܪܶܒ
ܐܰܝܟ ܦܺܝܪܡܳܐ ܕܩܰܪܶܒ ܐܰܗܪܽܘܢ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܠܶܟܝ ܛܽܘܒܰܝܟܝ ܐܳܘ ܒܰܪ̱ܬ ܕܰܘܺܝܕ ܒܬܽܘܠܬܳܐ ܩܰܕܺܝܫܬܳܐ܆ ܕܰܒܬܽܘܠܳܐܺܝܬ ܝܺܠܶܕܬܺܝܘܗ̱ܝ ܠܒܽܘܟܪܶܗ ܕܥܶܠܳܝܳܐ܆ ܘܰܒܝܰܠܕܳܐ ܕܡܶܢ ܕܰܟܝܽܘܬܶܟܝ܆ ܐܶܬܚܰܪܰܪܢܰܢ ܡܶܢ ܛܽܘܥܝܰܝ܀

ܫܽܘܒܚܳܐ

ܥܶܛܪܳܐ ܕܒܶܣ̈ܡܶܐ ܕܩܰܪܶܒܢܰܢ ܒܕܽܘܟܪܳܢ ܝܳܠܶܕܬܳܟ܆ ܢܶܗܘܶܐ ܠܰܢܝܳܚܳܐ ܕܪ̈ܰܚܡܰܝܟ ܘܰܠܚܽܘܣܳܝ ܚܰܘ̈ܒܰܝܢ܆ ܘܰܠܒܽܘܣܳܡܳܐ ܕܥܰܢܺܝ̈ܕܰܝܢ܆ ܒܡܰܠܟܽܘܬܳܐ ܫܡܰܝܳܢܺܝܬܳܐ܀

ܡܶܢ ܥܳܠܰܡ

ܦܳܪ̈ܽܘܫܶܐ ܥܒܶܕܘ ܕܽܘܟܪܳܢܳܐ ܠܥܰܢܺܝ̈ܕܶܐ ܡܗܰܝܡ̈ܢܶܐ. ܘܝܰܩܰܪܘ ܐܶܢܽܘܢ ܒܩܽܘܪ̈ܒܳܢܶܐ ܕܰܒܗܽܘܢ ܡܶܬܬܢܺܝ̣ܚܺܝܢ. ܘܰܠܟܽܘܢ ܝܳܗܶܒ ܦܳܪܽܘܩܰܢ. ܐܰܓܪܳܐ ܛܳܒܳܐ ܕܥܰܡܠܰܝ̈ܟܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ

ܐܳܡܪܳܐ ܠܳܗܿ ܥܺܕܬܳܐ ܠܡܰܪܝܰܡ ܬܳܝ ܢܺܐܙܰܠ ܐܰܟܚܕܳܐ: ܘܰܢܦܺܝܣܺܝܘܗ̱ܝ ܠܰܡܠܶܟ ܡܰܠ̈ܟܶܐ ܓܳܒܽܘܠܶܗ ܕܳܐܕܳܡ: ܐܰܢ̱ܬܝ ܐܰܦܺܝܣܺܘܗ̱ܝ: ܕܰܐܝܢܶܩܬܺܝܘܗ̱ܝ ܚܰܠܒܳܐ: ܘܶܐܢܳܐ ܐܰܦܺܝܣܺܝܘܗ̱ܝ ܕܰܕܡܶܗ ܡܙܰܓ ܒܰܚܠܽܘܠܝ: ܐܰܦܺܝܣܺܝܘܗ̱ܝ ܐܰܢ̱ܬܝ ܐܰܝܟ ܐܶܡܳܐ: ܘܶܐܢܳܐ ܐܰܝܟ ܟܰܠܬܳܐ: ܕܫܳܡܰܥ ܚܶܢܓ̈ܳܬܳܐ ܕܶܐܡܶܗ ܘܕܶܡܥܶܝ̈ܗܿ ܕܰܡܟܺܝܪܬܶܗ: ܗ̄ ܘܥܳܒܶܕ ܥܠܰܝܢ ܪ̈ܰܚܡܶܐ܀

ܫܽܘܒܚܳܐ

ܟܽܠܳܗܿ ܐܰܪܥܳܐ ܕܶܐܦܶܣܳܘܣ ܛܰܐܠܳܐ ܪܶܣܡܰܬ: ܟܰܕ ܐܰܝܬܺܝ ܡܳܪܝ ܝܽܘܚܰܢܳܢ ܟܬܳܒܶܗܿ ܕܰܒܬܽܘܠܬܳܐ: ܘܰܟܬܺܝܒ ܗ̱ܘܳܐ ܒܶܗ ܕܢܶܗܘܶܐ ܕܽܘܟܪܳܢܳܗܿ: ܕܰܡܒܰܪܰܟܬܳܐ ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ: ܒܟܳܢܽܘܢ ܢܶܗܘܶܐ ܥܰܠ ܙܰܪ̈ܥܶܐ: ܘܒܺܐܝܳܪ ܥܰܠ ܫܶܒ̈ܠܶܐ: ܘܒܳܐܒ ܝܰܪܚܳܐ ܡܶܛܽܠ ܓܽܘ̈ܦܢܶܐ ܕܐ̱ܪܳܙ ܚܰܝ̈ܶܐ ܨܺܝܪ ܒܗܽܘܢ: ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܪܺܝܟܽ ܗ̱ܘ ܡܫܺܝܚܳܐ ܕܰܓܒܳܟܝ

ܛܽܘܒܰܝܟܝ ܡܰܪܝܰܡ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ܆ ܠܗܰܘ ܕܰܛܥܺܝܢ ܠܶܗ ܠܰܪܩܺܝܥܳܐ܆ ܘܰܒܚܰܝܠܶܗ ܡܕܰܒܰܪ ܟܽܘܠܳܐ܆ ܘܚܰܠܒܳܐ ܫܺܝܛܳܐ ܐܰܝܢܶܩܬܺܝܘܗ̱ܝ܆ ܠܗܰܘ ܕܰܡܬܰܪܣܶܐ ܠܟܽܠ ܒܶܪ̈ܝܳܢ܆ ܘܗܳܐ ܝܰܘܡܳܢܳܐ ܒܓܰܘ ܬܺܒܶܝܠ܆ ܪܰܡܪܶܡ ܘܰܐܘܪܶܒ ܕܽܘܟܪܳܢܶܟܝ܆ ܘܰܫܡܶܟܝ ܢܳܨܰܚ ܒܰܒܪܺܝܬܳܐ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܫܽܘܒܚܳܐ

ܒܗܳܢܳܐ ܝܰܘܡܳܐ܆ ܕܕܽܘܟܪܳܢܶܟܝ ܛܽܘܒܳܢܺܝܬܳܐ܆ ܫܡܰܝܳܐ ܚܳܕܶܝܢ ܘܰܦܨܺܝܚܺܝܢ܆ ܘܰܐܪܥܳܐ ܪܳܘܙܳܐ ܘܰܚܬܺܝܪܳܐ܆ ܕܦܺܐܪܳܐ ܕܡܶܢܶܟܝ ܐܶܬܺܝܠܶܕ܆ ܥܩܰܪ ܟܽܘ̈ܒܶܐ ܕܰܙܪܰܥ ܒܺܝܫܳܐ܆ ܘܒܰܪܟܳܗ̇ ܠܰܐܪܥܳܐ ܕܠܺܝܛܳܐ ܗ̱ܘܳܬ܆ ܘܥܰܕ ܡܶܢܳܗ̇ ܝܰܥܪܳܐ ܣܰܢܝܳܐ܆ ܘܰܙܪܰܥ ܒܳܗ̇ ܣܰܒܪܳܐ ܘܚܰܝ̈ܶܐ܆ ܒܪܺܝܟܽ ܗ̱ܘ ܕܰܓܒܳܗ̇ ܠܶܗ ܐܶܡܳܐ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܒܩܽܘܪ̈ܒܳܢܶܐ ܬܺܐܙܰܠ ܠܡܰܠܟܳܐ܆ ܘܢܰܘܒܠܽܘܢ ܒܬܽܘ̈ܠܳܬܳܐ ܚܰܒܪ̈ܳܬܳܗ̇ ܒܳܬܪܳܗ̇܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܬܰܘ ܦܳܪ̈ܽܘܫܶܐ ܒܗܰܝܡܳܢܽܘܬܳܐ ܢܶܫܰܐܠ ܘܢܶܒܥܶܐ܆ ܡܶܢ ܐܰܠܳܗܳܐ ܒܝܽܘܡ ܥܰܕܥܺܐܕܳܗ̇ ܕܛܽܘܒܳܢܺܝܬܳܐ܆ ܕܢܰܥܒܰܪ ܒܪ̈ܰܚܡܰܘܗ̱ܝ ܫܰܒ̈ܛܶܐ ܕܪܽܘܓܙܳܐ ܘܟܽܠ ܣܽܘܓ̈ܦܳܢܶܐ܆ ܡܶܢ ܣܳܓܽܘ̈ܕܰܘܗ̱ܝ ܘܡܶܢ ܥܰܠ̱̈ܠܳܬܳܐ ܘܙܰܪ̈ܥܶܐ ܕܥܰܒܕܰܘ̈ܗ̱ܝ܀

ܚܰܝܠܳܐ ܕܚܰܝܠܶܟܝ ܢܚܰܝܶܠ ܠܟܶܢܫܰܢ ܥܰܠ ܩܽܘܠܳܣܰܝ̈ܟܝ܆ ܘܰܢܙܰܡܶܢ ܠܰܢ ܠܰܓܢܽܘܢ ܢܽܘܗܪܳܐ ܒܰܨ̈ܠܰܘܳܬܶܟܝ܆ ܒܓܽܘ̈ܕܶܐ ܕܥܺܝܪ̈ܶܐ ܢܶܡܢܶܐ ܡܳܪܝܳܐ ܠܚܰܝ̈ܶܐ ܘܡܺܝ̈ܬܶܐ܆ ܕܝܰܩܰܪܘ ܥܺܐܕܶܟܝ ܘܶܐܚܰܕܘ ܓܰܘܣܳܐ ܒܰܨ̈ܠܰܘܳܬܶܟܝ܀

ܫܽܘܒܚܳܐ ܠܰܐܒܳܐ ܕܰܠܒܰܪ̱ܬ ܕܰܘܺܝܕ ܝܰܩܰܪ ܘܰܐܘܪܶܒ܆ ܘܣܶܓܕܬܳܐ ܠܰܒܪܳܐ ܕܡܶܛܽܠ ܫܽܘܦܪܳܗ̇ ܢܚܶܬ ܘܰܫܪܳܐ ܒܳܗ̇܆ ܬܰܘܕܺܝ ܠܪܽܘܚܳܐ ܕܨܰܒܬܳܗ̇ ܒܗܶܕܪ̈ܶܐ ܕܰܒܬܽܘܠܽܘܬܳܐ܆ ܘܰܥܠܰܝܢ ܪ̈ܰܚܡܶܐ ܒܰܨ̈ܠܰܘܳܬܳܗ̇ ܒܟܽܠܥܶܕܳܢܺܝ̈ܢ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀

ܐ̱ܚܪܺܢܳܐ

ܡܰܠܝܰܬ ܪ̈ܰܚܡܶܐ ܐܰܦܺܝܣܝ ܘܰܒܥܳܝ ܠܰܡܠܶܐ ܪ̈ܰܚܡܶܐ܆

ܕܢܶܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܳܐ ܕܫܳܐܠܳــ̈ܢ ܪ̈ܰܚܡܶܐ܀