ܒܝܽܘܡ 15 ܕܟܳܢܽܘܢ ܐ̱ܚܪܳܝ

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܐܶܡܳܐ ܕܟܺܝܬܳܐ: ܒܬܽܘܠܬܳܐ ܩܰܕܺܝܫܬܳܐ: ܕܰܫܘܰܝܬܝ ܕܥܰܠ ܒܽܘܪ̈ܟܰܝܟܝ ܬܶܛܥܢܺܝܢ ܠܰܐܠܳܗܳܐ: ܒܥܳܝ ܪ̈ܰܚܡܶܐ ܚܠܳܦ ܢܰܦ̈ܫܳܬܰܢ܀

ܗܰܘ ܕܶܐܬܺܝܠܶܕ: ܡܶܢ ܐܶܡܳܐ ܒܬܽܘܠܬܳܐ: ܪܰܡܪܶܡ ܝܰܘܡܳܐ ܫܒܺܝܚܳܐ ܕܕܽܘܟܪܳܢܳܗ̇: ܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ܀

ܥܰܡ̱̈ܡܶܐ ܚܳܕܶܝܢ܆ ܘܪܳܘܙܺܝܢ ܒܕܽܘܟܪܳܢܶܟܝ܆ ܕܰܒܝܰܕ ܝܰܠܕܶܝܟܝ ܐܶܬܦܪܶܩܘ ܡܶܢ ܛܽܘܥܝܰܝ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܛܽܘܒܰܝܟܝ ܡܰܪܝܰܡ܆ ܕܰܢܒܺܝ̈ܶܐ ܨܳܪܽܘܟܝ܆ ܒܐ̱ܪ̈ܳܙܶܐ ܘܝܽܘ̈ܩܢܶܐ ܘܛܽܘ̈ܦܣܶܐ ܘܦ̈ܶܠܳܐܬܳܐ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܡܽܘܫܶܐ ܨܳܪܶܟܝ܆ ܒܣܰܢܝܳܐ ܘܒܰܥܢܳܢܳܐ܆ ܘܰܒܥܰܪܦܶܠܳܐ ܘܩܶܣܛܳܐ ܘܩܺܐܒܽܘܬܳܐ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܫܠܶܝܡܽܘܢ ܩܪܳܟܝ ܗ̱ܘܳܐ܆ ܓܰܢܬܳܐ ܐܰܚܺܝܕܬܳܐ܆ ܕܰܫܘܰܚ ܡܶܢܳܗ̇ ܢܳܨܽܘܒܳܗ̇ ܕܰܥܕܶܢ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܐܶܫܰܥܝܳܐ ܢܒܺܝܳܐ. ܥܠܰܝܟܝ ܐܶܬܢܰܒܺܝ ܗ̱ܘܳܐ܆ ܕܗܳܐ ܒܬܽܘܠܬܳܐ ܒܳܛܢܳܐ܆ ܘܝܳܠܕܳܐ ܠܶܗ ܠܥܰܡܰܢܽܘܐܶܝܠ܆ ܘܗܳܐ ܢܳܨܰܚ ܘܰܫܒܺܝܚ܆ ܝܰܘܡܳܐ ܕܕܽܘܟܪܳܢܶܟܝ. ܒܰܨ̈ܠܰܘܳܬܶܟܝ܆ ܫܰܝܢܳܐ ܢܰܡܠܶܟ ܒܰܒܪܺܝܬܳܐ܀

ܐܶܬܟܰܫܰܦܝ ܘܰܒܥܳܝ܆ ܐܶܡܳܐ ܡܒܰܪܰܟܬܳܐ܆ ܠܰܒܪܳܐ ܫܡܰܝܳܢܳܐ܆ ܕܶܐܬܓܰܫܰܡ ܡܶܢ ܕܰܟܝܽܘܬܶܟܝ܆ ܕܰܢܫܰܟܶܢ ܠܟܽܠܰܢ܆ ܪ̈ܰܚܡܶܐ ܒܛܰܝܒܽܘܬܶܗ܆ ܘܒܰܨ̈ܠܰܘܳܬܶܟܝ܆ ܢܶܫܒܽܘܩ ܚܰܘܒܰܝ̈ܢ ܘܰܚ̈ܛܳܗܰܝܢ܀

ܒܣܰܢܝܳܐ ܨܳܪܶܟܝ ܗ̱ܘܳܐ: ܡܽܘܫܶܐ ܒܛܽܘܪ ܣܺܝܢܰܝ: ܘܝܰܥܩܽܘܒ ܕܶܝܢ ܟܺܐܢܳܐ: ܒܣܶܒܠܬܳܐ ܡܰܬܠܶܟܝ: ܐܳܦ ܓܶܕܥܽܘܢ ܒܓܶܙܬܳܐ: ܕܛܰܠܳܐ ܪܰܫܡܶܟܝ ܗ̱ܘܳܐ: ܘܡܰܠܟܳܐ ܫܠܶܝܡܽܘܢ: ܒܓܰܢܬܳܐ ܚܬܺܝܡܬܳܐ ܘܰܛܒܺܝܥܬܳܐ܀

ܒܝܰܘܡܳܐ ܕܥܰܕܥܺܐܕܶܟܝ: ܐܶܡܶܗ ܕܰܐܠܳܗܳܐ: ܩܰܪܶܒܝ ܒܳܥܽܘܬܳܐ: ܚܠܳܦ ܟܶܢܫܳܐ ܕܰܡܝܰܩܪ̈ܳܢܰܝܟܝ: ܘܫܰܐܠܺܝ ܠܰܢ ܡܶܢ ܡܳܪܰܢ: ܫܰܝܢܳܐ ܘܰܫܠܳܡܳܐ: ܕܰܒܚܰܕܽܘܬܳܐ: ܢܙܰܝܰܚ ܝܰܘܡܳܐ ܕܥܰܕܥܺܐܕܶܟܝ܀

ܒܶܝܬ ܓܰܘܣܰܢ ܪܳܡܳܐ܆ ܘܥܽܘܫܢܰܢ ܬܰܩܺܝܦܳܐ܆ ܐܰܢ̱ܬܺܝ ܗ̱ܝ ܒܟܽܠܙܒܰܢ܆ ܝܳܠܕܰܬ ܐܰܠܳܗܳܐ܆ ܒܚܰܝܠܳܐ ܕܒܳܥܽܘܬܶܟܝ܆ ܪ̈ܰܚܡܶܐ ܢܶܫܬܰܦܥܽܘܢ܆ ܥܰܠ ܢܰܦ̈ܫܳܬܰܢ܆ ܕܙܰܝܰܚܢܰܢ ܝܽܘܡ ܕܽܘܟܪܳܢܶܟܝ܀

ܫܽܘܒܚܳܐ

ܠܺܝ ܢܶܬܠܳـ̈ܢ ܛܽܘܒܳܐ. ܟܽܠܗܶܝܢ ܫܰܪ̈ܒܳܬܳܐ܆ ܥܢܳܬ ܘܶܐܡܪܰܬ ܡܰܪܝܰܡ܆ ܒܚܰܕܽܘܬܳܐ ܪܰܒܬܳܐ܆ ܕܰܒܝܰܠܕܳܐ ܕܝܶܠܕܶܬ܆ ܐܶܬܛܰܠܰܩ ܚܶܫܟܳܐ܆ ܘܰܐܡܠܶܟ ܢܽܘܗܪܳܐ܆ ܥܰܠ ܟܽܠܳܗ̇ ܬܺܒܶܝܠ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܩܽܘܩܳܝܳܐ
ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ

ܛܽܘܒܳܐ ܪܰܒܳܐ ܢܶܬܠܳــ̈ܢ ܠܺܝ ܟܽܠ ܫܰܪ̈ܒܳܬܳܐ܆ ܐܶܡܪܰܬ ܡܰܪܝܰܡ ܕܺܝܠܶܕܬܶܗ ܠܦܳܪܽܘܩܶܗ ܕܥܳܠܡܳܐ܆ ܫܠܳܡܶܗ ܕܰܐܒܳܐ܆ ܘܪܽܘܚܶܗ ܢܚܶܬ ܨܶܐܕܰܝ܆ ܘܩܰܒܠܶܬ ܒܰܛܢܳܐ܆ ܝܰܠܕܶܗ ܕܥܶܠܳܝܳܐ܆ ܣܒܰܪܬܳܐ ܥܠܰܝܟܽܘܢ ܪ̈ܰܚܺܝܩܶܐ ܥܰܡ ܩܰܪ̈ܺܝܒܶܐ܆ ܕܰܕܢܰܚ ܠܶܗ ܒܪܳܐ ܕܰܐܠܳܗܳܐ܆ ܦܳܪܽܘܩܶܗ ܕܥܳܠܡܳܐ܆ ܗ̄ܘܗ̄܀

ܫܽܘܒܚܳܐ

ܕܽܘܟܪܳܢܳܐ ܛܳܒܳܐ ܢܶܗܘܶܐ ܠܡܰܪܝܰܡ ܐܶܡܶܗ ܕܡܳܪܝ: ܗܳܪܟܳܐ ܘܰܠܥܶܠ ܒܰܫܡܰܝܳܐ ܘܒܰܥܕܶܢ ܥܰܠ ܡܰܕܒܚܳܐ: ܗܳܝ ܕܰܒܛܶܢܬܶܗ: ܘܠܳܐ ܚܰܟܡܳܗ̇ ܓܰܒܪܳܐ: ܗܳܝ ܕܺܝܠܶܕܬܶܗ ܘܰܢܛܺܝܪܺܝܢ ܒܬܽܘܠܶܝ̈ܗ̇: ܗܳܝ ܕܰܟܪܰܟܬܶܗ ܒܥܰܙܪܽܘܪ̈ܶܐ ܘܣܳܡܬܶܗ ܒܽܐܘܪܝܳܐ: ܥܺܝܪ̈ܶܐ ܘܐ̱ܢܳܫ̈ܳܐ ܩܳܥܶܝܢ ܠܶܗ ܕܠܳܟ ܫܽܘܒܚܳܐ ܡܳܪܝܳܐ: ܗ̄ܘܗ̄܀

ܐܰܘ

ܒܝܰܘܡܳܐ ܕܗܳܘܶܐ ܕܽܘܟܪܳܢܳܗ̇ ܕܰܡܒܰܪܰܟܬܳܐ܆ ܫܡܰܝܳܐ ܘܰܐܪܥܳܐ ܘܒܶܪ̈ܝܳܬܳܐ ܚܰܕܽܘܬܳܐ ܡܶܬܡܠܶܝܢ܆ ܓܰܪ̈ܡܶܐ ܕܟܺܐܢ̈ܶܐ܆ ܪܳܘܙܺܝܢ ܒܓܰܘ ܩܰܒܪ̈ܶܐ܆ ܡܶܢ ܬܶܫܡܶܫܬܳܐ܆ ܕܗܳܘܝܳܐ ܒܰܒܪܺܝܬܳܐ܆ ܘܰܐܝܢܳܐ ܕܥܳܒܶܕ ܕܽܘܟܪܳܢܳܗ̇ ܕܛܽܘܒܳܢܺܝܬܳܐ܆ ܐܰܠܳܗܳܐ ܢܒܰܪܶܟ ܥܰܡܠܶܗ ܒܰܬܪ̈ܰܝܗܽܘܢ ܥܳܠ̈ܡܶܐ܆ ܗ̄ ܨܠܽܘܬܶܗ ܬܥܰܕܰܪ ܠܰܢ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܡܳܪܝܳܐ ܡܳܪܰܢ ܟܰܕ ܙܳܚܰܬ

ܒܬܽܘܠܬܳܐ ܡܰܪܝܰܡ. ܕܰܗܘܳܬ ܐܶܡܳܐ ܠܰܐܠܳܗܳܐ. ܘܛܶܥܢܰܬ ܘܙܰܝܚܰܬ ܠܡܳܪܳܐ ܕܒܶܪ̈ܝܳܬܳܐ. ܐܰܦܺܝܣ ܘܰܒܥܳܝ܆ ܠܺܝܚܺܝܕܶܟܝ ܕܢܶܥܒܶܕ ܪ̈ܰܚܡܶܐ ܒܰܨ̈ܠܰܘܳܬܶܟܝ܆ ܥܰܠ ܟܽܠܶܗ ܥܳܠܡܳܐ. ܘܢܰܫܪܶܐ ܫܰܝܢܶܗ܆ ܘܰܫܠܳܡܶܗ ܒܥܺܕܰܬ ܩܽܘܕܫܳܐ. ܘܢܶܙܓܽܘܪ ܡܶܢܳܗ̇܆ ܣܶܕ̈ܩܶܐ ܘܚܶܪ̈ܝܳܢܶܐ܀

ܫܽܘܒܚܳܐ

ܐܶܡܪܰܬ ܡܰܪܝܰܡ. ܕܠܺܝ ܡܶܟܺܝܠ ܢܶܬܠܳــ̈ܢ ܛܽܘܒܳܐ ܟܽܠ ܫܰܪ̈ܒܳܬܳܐ. ܕܰܒܥܳܠܡܳܐ ܗܳܢܳܐ. ܕܰܫܘܺܝܬ ܕܶܐܗܘܶܐ܆ ܐܶܡܳܐ ܘܰܐܡܬܳܐ ܒܬܶܕܡܽܘܪܬܳܐ ܠܗܰܘ ܕܰܟܪ̈ܽܘܒܶܐ܆ ܟܳܘܙܺܝܢ ܡܶܢ ܙܺܝܘܶܗ. ܛܽܘ̈ܦܰܝ ܚܰܠܒܳܐ܆ ܐܰܝܢܶܩܬܶܗ ܐܰܝܟ ܕܰܠܫܰܒܪܳܐ. ܠܗܰܘ ܕܰܡܬܰܪܣܶܐ܆ ܠܟܽܠܗܶܝܢ ܒܶܪ̈ܝܳܬܳܐ܀

ܡܶܢ ܥܳܠܰܡ

ܐܺܝܠ ܓܰܢ̱ܒܳܪܳܐ܆ ܕܩ̣ܳܡ ܥܰܠ ܪܰܘܡܳܗ̇ ܕܓܳܓܽܘܠܬܳܐ: ܘܰܩܥ̣ܳܐ ܒܩܳܠܶܗ: ܘܫܽܘ̈ܥܶܐ ܐܶܨܛܰܪܺܝ̣ܘ. ܐܰܫܡܰܥ ܩܳܠܳܟ. ܒܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ܆ ܘܢܰܚܶܡ ܐܶܢܽܘܢ: ܠܰܫܟܺܝ̈ܒܰܝ ܥܰܦܪܳܐ ܗ̄ ܕܢܰܘܕܽܘܢ ܠܳܟ ܥܰܠ ܛܰܝܒܽܘܬܳܟ. ܕܰܐܢ̱ܬ ܗ̣ܽܘ ܐܺܝܬܰܝܟ: ܡܢܰܚܡܳܢܳܐ ܕܡܺܝ̈ܬܶܐ܀

ܣܽܘܓܺܝܬܳܐ ܕܰܩܕܳܡ ܐܶܘܰܢܓܶܠܝܽܘܢ

ܐܶܬܢܶܐ ܫܽܘܦܪ̈ܰܝܟܝ̱ ܬܳܗܰܪ ܐ̱ܢܳܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܕܺܐܡܰܪ ܫܰܪܒܶܟ̣ܝ̱ ܠܳܐ ܡܨܶܐ ܐ̱ܢܳܐ܇ ܒܬ̣ܽܘܠܬܳܐ ܩܰܕܺܝܫܬܳܐ܀

ܒܪܺܝܟ̣ܬܳܐ ܒܢܶܫ̈ܶܐ ܐܰܢ̱ܬܝ ܐܺܝܬ̣ܰܝܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟ̣ܝ̱܇ ܐܶܡܪܰܬ̣ ܐܶܠܺܝܫܒܰܥ܀

ܛܽܘܒܰܝܟܝ̱ ܐܳܦ ܠܶܟ̣ܝ̱ ܘܠܰܐܒܳܗܰܝ̈ܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܛܽܘܒܰܘܗܝ ܠܰܐܝܢܳܐ ܕܰܒܟܽܠ ܫܳܥ܇ ܛܽܘܒܳܐ ܝܳܗܶܒ ܠܶܟ̣ܝ̱܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܚܳܕܶܝܢ ܒܝܰܘܡܳܐ ܕܕܽܘܟ̣ܪܳܢܶܟ̣ܝ̱܇ ܨܠܽܘܬ̣ܶܟ̣ܝ̱ ܬܥܰܕܰܪ ܠܰܢ܀

ܦܶܬܓܳܡܳܐ: ܒܩܽܘܪ̈ܒܳܢܶܐ ܬܺܐܙܰܠ ܠܡܰܠܟܳܐ܆ ܘܢܰܘܒܠܽܘܢ ܒܬܽܘ̈ܠܳܬܳܐ ܚܰܒܪ̈ܳܬܳܗ̇ ܒܳܬܪܳܗ̇܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܐܰܪܥܳܐ ܨܗܺܝܬܳܐ ܗܘܳܬ ܠܰܢ ܡܰܪܝܰܡ ܘܡܶܛܪܳܐ ܩܰܒܠܰܬ܆ ܘܗܽܘ ܗܰܘ ܡܶܛܪܳܐ ܗܘܳܐ ܠܰܢ ܥܶܣܒܳܐ ܘܒܶܗ ܗܽܘ ܚܝܰܝܢܰܢ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܘܛܰܠܳܐ ܩܰܒܠܰܬ܆ ܘܒܶܗ ܐܶܬܪܰܛܒܰܬ ܝܰܒܺܝܫܽܘܬܶܗ ܕܓܶܢܣܰܢ ܕܺܝܒܶܫ܆ ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܡܶܢܳܗ̇ ܩܛܰܦܢܰܢ܆ ܦܺܐܪܳܐ ܕܚܰܝ̈ܶܐ ܕܡܶܢܶܗ ܐܶܟܰܠܘ ܡܺܝ̈ܬܶܐ ܘܰܚܝܰܘ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܒܰܒܬܽܘܠܽܘܬܳܗ̇܆ ܘܡܶܢܳܗ̇ ܢܣܰܒܢܰܢ ܠܰܚܡܳܐ ܕܚܰܝ̈ܶܐ ܘܒܶܗ ܐܶܬܢܰܦܰܫܢ܀

ܫܽܘܒܚܳܐ ܠܰܐܒܳܐ ܕܰܓܒܳܟܝ ܡܰܪܝܰܡ ܡܶܢ ܪܺܝܫܺܝܬܳܐ܆ ܘܣܶܓܕܬܳܐ ܠܰܒܪܳܐ ܕܰܨܒܳܐ ܘܰܕܢܰܚ ܡܶܢ ܕܰܟܝܽܘܬܶܟܝ܆ ܬܰܘܕܺܝ ܠܪܽܘܚܳܐ ܕܥܰܒܕܶܟܝ ܢܰܘܣܳܐ ܘܥܰܠ ܘܰܫܪܳܐ ܒܶܟܝ܆ ܘܝܰܩܰܪ ܘܰܐܘܪܶܒ ܝܽܘܡ ܕܽܘܟܪܳܢܶܟܝ ܨܠܽܘܬܶܟܝ ܥܰܡܰܢ: ܠܡܳܪܝܳܐ ܫܽܘܒܚܳܐ: ܘܠܶܟܝ ܐܺܝܩܳܪܳܐ ܘܠܶܗ ܪܽܘܡܪܳܡܳܐ: ܘܰܥܠܰܝܢ ܪ̈ܰܚܡܶܐ: ܒܰܨ̈ܠܰܘܳܬܶܟܝ ܐܰܡܺܝܢ ܘܐܰܡܺܝܢ܀

ܐ̱ܚܪܺܢܳܐ

ܐܰܪܥܳܐ ܨܗܺܝܬܳܐ ܗܘܳܬ ܠܰܢ ܡܰܪܝܰܡ ܘܡܶܛܪܳܐ ܩܰܒܠܰܬ܆ ܘܗܽܘ ܗܰܘ ܡܶܛܪܳܐ ܗܘܳܐ ܠܰܢ ܥܶܣܒܳܐ ܘܒܶܗ ܗܽܘ ܚܝܰܝܢܰܢ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܘܛܰܠܳܐ ܩܰܒܠܰܬ܆ ܘܒܶܗ ܐܶܬܪܰܛܒܰܬ ܝܰܒܺܝܫܽܘܬܶܗ ܕܓܶܢܣܰܢ ܕܺܝܒܶܫ܆ ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܡܶܢܳܗ̇ ܩܛܰܦܢܰܢ܆ ܦܺܐܪܳܐ ܕܚܰܝ̈ܶܐ ܕܡܶܢܶܗ ܐܶܟܰܠܘ ܡܺܝ̈ܬܶܐ ܘܰܚܝܰܘ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܒܰܒܬܽܘܠܽܘܬܳܗ̇܆ ܘܡܶܢܳܗ̇ ܢܣܰܒܢܰܢ ܠܰܚܡܳܐ ܕܚܰܝ̈ܶܐ ܘܒܶܗ ܐܶܬܢܰܦܰܫܢ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܘܰܫܘܰܚ ܡܶܢܳܗ̇܆ ܚܰܕ ܥܶܩܳܪܳܐ ܕܚܰܕܺܝ ܠܥܳܠܡܳܐ ܒܪܺܝܚܶܗ ܚܰܠܝܳܐ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܘܡܶܢܳܗ̇ ܚܡܰܠܢܰܢ܆ ܥܠܰܠܬܳܐ ܛܳܒܬܳܐ ܚܰܕ ܒܰܬܠܳܬܺܝܢ ܘܒܶܫܬܺܝܢ ܘܒܰܡܳܐܐ܀

ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܡܶܢܳܗ̇ ܣܳܩܢܰܢ܆ ܚܰܝ̈ܶܐ ܚܰܕ̱̈ܬܶܐ ܐܳܦ ܒܽܘܣܳܡܳܐ ܕܣܳܟ ܠܳܐ ܡܰܘܦܶܐ܆ ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܒܳܗ̇ ܐܶܫܟܰܚܢܰܢ܆ ܡܳܐ ܕܰܐܘܒܶܕܢܰܢ ܒܶܝܬ ܐܺܝ̈ܠܳܢܶܐ ܒܡܶܠܟܶܗ ܕܚܶܘܝܳܐ܆ ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܰܕܠܳܐ ܥܰܡܠܳܐ܆ ܩܢܰܝܢܰܢ ܡܶܢܳܗ̇ ܟܽܠ ܝܽܘܬܪ̈ܳܢܺܝܢ ܐܰܠܳܗܳܝ̈ܶܐ܆ ܐܰܪܥܳܐ ܒܪܺܝܟܬܳܐ ܗܘܳܬ ܠܰܢ ܡܰܪܝܰܡ ܘܒܳܗ̇ ܗܽܘ ܚܙܰܝܢܰܢ܆ ܐܰܠܳܗܽܘܬܳܐ ܗܳܝ ܕܰܒܥܶܠܬܳܗ̇ ܛܪ̈ܺܝܕܶܐ ܗܘܰܝܢܰܢ܆ ܐܰܪܥܳܐ ܛܳܒܬܳܐ ܗܘܳܬ ܠܰܢ ܡܰܪܝܰܡ ܘܒܳܗ̇ ܐܶܬܳܐ ܠܰܢ܆ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܘܪ̈ܰܚܡܶܐ ܫܦܺܝ̈ܥܶܐ܀

ܢܶܣܰܩ ܫܽܘܒܚܳܐ ܡܶܢ ܥܰܢܳܙ̈ܶܐ ܘܪ̈ܳܥܰܘܳܬܳܐ܆ ܕܶܐܫܟܚܰܬ ܥܳܢ̈ܗܽܘܢ ܥܡܺܝܪܳܐ ܠܪܶܥܝܶܗ̇ ܘܡܰܝ̈ܳܐ ܠܫܶܩܝܶܗ̇܆ ܢܶܬܠܽܘܢ ܫܽܘܒܚܳܐ ܐܳܦ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܦܨܺܝ̈ܕܶܐ ܘܶܐܓ̈ܡܶܐ ܐܳܦ ܥܰܝ̈ܢܳܬܳܐ ܒܫܽܘܪ̈ܬܳܚܰܝܗܽܘܢ܆ ܛܽܘܪ̈ܶܐ ܘܢܰܚ̈ܠܶܐ ܐܳܦ ܦܳܩ̈ܥܳܬܳܐ ܢܶܬܠܽܘܢ ܫܽܘܒܚܳܐ܆ ܠܺܝܚܺܝܕܳܝܶܟܝ ܕܰܐܫܦܰܥ ܒܓܰܘܗܽܘܢ ܟܽܠ ܒܽܘܪ̈ܟܳܬܳܐ܀

ܓܠܺܝܕܳܐ ܘܬܰܠܓܳܐ ܘܢܽܘܪܳܐ ܘܒܰܪܕܳܐ ܘܡܰܝ̈ܳܐ ܘܳܐܐܰܪ܆ ܐܰܪܥܳܐ ܘܝܰܡ̱̈ܡܶܐ ܘܟܽܠ ܒܶܪ̈ܝܳܬܳܐ ܕܰܠܥܶܠ ܘܕܰܠܬܰܚܬ܆ ܢܶܬܠܽܘܢ ܫܽܘܒܚܳܐ ܠܰܒܪܳܐ ܡܫܺܝܚܳܐ ܕܰܒܪܳܐ ܐܶܢܽܘܢ܆ ܘܡܶܢܶܟܝ ܒܬܽܘܠܬܳܐ ܫܦܰܪ ܠܶܗ ܕܢܶܗܘܶܐ ܨܠܽܘܬܶܟܝ ܥܰܡܰܢ܀

ܫܽܘܒܚܳܐ ܠܰܐܒܳܐ ܕܰܓܒܳܟܝ ܡܰܪܝܰܡ ܡܶܢ ܪܺܝܫܺܝܬܳܐ܆ ܘܣܶܓܕܬܳܐ ܠܰܒܪܳܐ ܕܰܨܒܳܐ ܘܰܕܢܰܚ ܡܶܢ ܕܰܟܝܽܘܬܶܟܝ܆ ܬܰܘܕܺܝ ܠܪܽܘܚܳܐ ܕܥܰܒܕܶܟܝ ܢܰܘܣܳܐ ܘܥܰܠ ܘܰܫܪܳܐ ܒܶܟܝ܆ ܘܝܰܩܰܪ ܘܰܐܘܪܶܒ ܝܽܘܡ ܕܽܘܟܪܳܢܶܟܝ ܒܰܐܪܒܰܥ ܦܶܢ̈ܝܳܢ܆ ܫܠܳܡܳܐ ܘܫܰܝܢܳܐ ܢܶܣܓܶܐ ܠܥܺܕܬܳܐ ܘܟܶܢܫܳܐ ܕܰܒܢܶܝ̈ܗ̇܆ ܕܰܡܙܰܝܚܺܝܢ ܠܶܗ ܠܝܽܘܡ ܕܽܘܟܪܳܢܶܟܝ ܒܗܰܝܡܳܢܽܘܬܳܐ܆ ܘܠܺܝ ܚܰܛܳܝܳܐ ܫܰܐܠܝ ܡܶܢ ܝܰܠܕܶܟܝ ܛܽܘܒܳܢܺܝܬܳܐ܆ ܚܢܳܢܳܐ ܘܪ̈ܰܚܡܶܐ ܒܝܰܘܡܳܐ ܕܰܣܢܺܝܩ ܟܽܠܢܳܫ ܠܪ̈ܰܚܡܶܐ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀

ܐ̱ܚܪܺܢܳܐ

ܡܰܠܝܰܬ̥ ܪ̈ܰܚܡܶܐ ܐܰܦܺܝܣܝ ܘܰܒܥܳܝ ܠܰܡܠܶܐ ܪ̈ܰܚܡܶܐ܆

ܕܢܶܥܒܶܕ̥ ܪ̈ܰܚܡܶܐ ܥܰܠ ܢܰܦ̈ܫܳܬ̥ܳܐ ܕܫܳܐܠܳــ̈ܢ ܪ̈ܰܚܡܶܐ܀