ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ
ܐܰܝܟ ܬܰܓܳܪܳܐ ܕܪܳܕܶܐ ܒܝܰܡܳܐ

ܣܪ̈ܳܦܶܐ ܕܢܽܘܪܳܐ ܒܓܶܦ̈ܶܐ ܕܢܽܘܪܳܐ܆ ܛܳܫܶܝܢ ܡܶܢܶܗ ܕܠܳܐ ܢܺܐܩܕܽܘܢ ܒܢܽܘܪܶܗ܆ ܘܰܐܪܟܶܢ ܪܺܝܫܶܗ ܩܕܳܡ ܝܽܘܚܰܢܳܢ ܕܢܶܥܡܰܕ ܡܶܢܶܗ܆ ܗܰܘ ܫܳܒܶܩ ܚܰܘ̈ܒܶܐ܆ ܘܶܐܬܩܰܕܰܫܘ ܗ̱ܘܰܘ܆ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ ܒܰܥܡܳܕܶܗ ܕܡܰܠܟܳܐ ܡܫܺܝܚܳܐ܀

ܫܽܘܒܚܳܐ

ܩܪܶܒ ܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܘܣܳܡ ܝܰܡܺܝܢܶܗ ܥܰܠ ܪܺܝܫܳܐ ܕܡܳܪܶܗ܆ ܘܩܳܠܶܗ ܕܰܐܒܳܐ ܩܥܳܐ ܡܶܢ ܪܰܘܡܳܐ܆ ܕܗܳܢܳܐ ܐܺܝܬܰܘܗ̱ܝ ܒܪܳܐ ܕܺܝܠܝ ܚܰܒܺܝܒܳܐ܆ ܘܪܽܘܚܳܐ ܕܩܽܘܕܫܳܐ܆ ܦܶܪܚܰܬ ܢܶܚܬܰܬ ܐܰܝܟ ܝܰܘܢܳܐ܆ ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܝܽܘܠܦܳܢܳܐ ܣܰܘܩܳܐ ܕܐ̱ܢܳܫ̈ܳܐ ܘܡܰܪܕܽܘܬܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܪܺܝܟ ܟܰܣܝܳܐ ܕܶܐܬܳܐ ܠܓܶܠܝܳܐ܆ ܘܰܕܢܰܚ ܡܶܢ ܡܰܥܡܽܘܕܺܝܬܳܐ܆ ܒܪܺܝܟܽ ܗ̱ܘ ܕܩܰܕܶܫ ܒܰܥܡܳܕܶܗ܆ ܡܰܥܡܽܘܕܺܝܬܳܐ ܠܚܽܘܣܳܝܰܢ܀

ܫܽܘܒܚܳܐ ܠܶܗ ܠܗܰܘ ܕܒܰܥܡܳܕܶܗ܆ ܩܰܕܶܫ ܡܰܝ̈ܳܐ ܠܕܽܘܟܳܝܰܢ܆ ܫܽܘܒܚܳܐ ܠܶܗ ܠܗܰܘ ܕܰܒܕܶܢܚܶܗ܆ ܐܰܕܢܰܚ ܢܽܘܗܪܶܗ ܥܰܠ ܟܽܠܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܫܬܺܝܬܳܝܳܐ ܕܒܳܬܰܪ ܕܶܢܚܳܐ