ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܒܝܽܘܡ ܕܶܢܚܶܗ ܕܒܰܪ ܐܰܠܳܗܳܐ܆ ܚܳܕܶܝܢ ܥܺܝܪ̈ܶܐ ܘܡܰܠܰܐܟ̈ܶܐ܆ ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ܆ ܠܰܐܠܳܗܳܐ ܠܥܶܠ ܡܶܢ ܢܰܗܪܳܐ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܕܰܐܝܟܰܢ ܡܶܠܬܳܐ ܐܰܠܳܗܳܐ܆ ܐܶܬܳܐ ܗ̱ܘܳܐ ܕܢܶܥܡܰܕ ܒܝܽܘܪܕܢܳܢ܆ ܡܶܢ ܝܽܘܚܰܢܳܢ ܟܳܪܽܘܙܶܗ܀

ܬܗܰܪܘ ܥܺܝܪ̈ܶܐ ܐܳܦ ܡܰܠܰܐܟ̈ܶܐ܆ ܘܝܰܒܶܒܘ ܟܽܠܗܽܘܢ ܫܰܘܝܳܐܺܝܬ܆ ܟܰܕ ܚܳܙܶܝܢ ܕܡܳܪܗܽܘܢ ܥܳܡܶܕ܆ ܒܓܰܘ ܝܽܘܪܕܢܳܢ ܡܶܢ ܟܳܪܽܘܙܶܗ܀

ܒܪܺܝܟܽ ܗ̱ܘ ܕܒܰܥܡܳܕܶܗ ܩܰܕܫܰܢ܆ ܘܰܥܒܰܕ ܠܰܢ ܒܢܰܝ̈ܳܐ ܠܰܐܒܽܘܗ̱ܝ܆ ܘܰܟܬܰܒ ܫܡܳܗ̈ܶܐ ܕܬܰܝ̈ܳܒܶܐ܆ ܒܣܶܦܪܳܐ ܕܺܝܠܶܗ ܩܰܕܺܝܫܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ

ܩܳܠܳܐ ܕܫܽܘܒܚܳܐ ܘܕܰܪܘܳܙܳܐ܆ ܘܰܕܬܰܘܕܺܝܬܳܐ ܝܽܘܚܰܢܳܢ ܐܰܙܥܶܩ܆ ܒܰܥܡܳܕܶܗ ܕܒܰܪ ܐܰܠܳܗܳܐ܆ ܒܰܝܢܳܬ ܟܶܢ̈ܫܶܐ ܥܰܠ ܢܰܗܪܳܐ ܝܽܘܪܕܢܳܢ܀

ܒܗܳܢܳܐ ܝܰܘܡܳܐ ܕܰܥܡܳܕܳܟ܆ ܝܺܚܺܝܕܳܝܳܐ ܨܶܡܚܳܐ ܕܡܶܢ ܐܰܒܳܐ܆ ܚܳܕܝܳܐ ܬܺܒܶܝܠ ܒܰܡܠܳܐܳܗ̇܆ ܘܙܳܡܪܳܐ ܫܽܘܒܚܳܐ ܠܛܰܝܒܽܘܬܳܟ ܡܳܪܰܢ܀

ܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܒܰܝܢܳܬ ܟܶܢ̈ܫܶܐ ܐܰܙܥܶܩ ܟܰܕ ܐܳܡܰܪ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ܆ ܘܗܽܘܝܽܘ ܡܰܥܡܶܕ ܒܢܽܘܪܳܐ ܘܰܒܪܽܘܚܳܐ܀

ܒܗܳܢܳܐ ܝܰܘܡܳܐ ܐܶܬܩܰܕܫܰܬ܆ ܡܰܥܡܽܘܕܺܝܬܳܐ ܥܰܠ ܝܽܘܪܕܢܳܢ ܢܰܗܪܳܐ܆ ܒܰܥܡܳܕܶܗ ܕܒܰܪ ܐܰܠܳܗܳܐ܆ ܕܡܶܢ ܝܽܘܚܰܢܳܢ ܟܳܪܽܘܙܳܐ ܕܩܽܘܫܬܳܐ܀

ܒܰܥܡܳܕܶܗ ܕܺܝܚܺܝܕܳܝܳܐ܆ ܝܽܘܪܕܢܳܢ ܢܰܗܪܳܐ ܒܬܶܗܪܳܐ ܩܳܐܶܡ ܗ̱ܘܳܐ܆ ܘܰܒܕܽܘܡܳܪܳܐ ܗܘܰܘ ܟܶܢ̈ܫܶܐ܆ ܟܰܕ ܚܙܰܐܽܘܟ ܡܳܪܝ ܕܶܐܬܰܝܬ ܠܰܥܡܳܕܳܐ܀

ܒܗܳܢܳܐ ܝܰܘܡܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܥܰܠ ܝܽܘܪܕܢܳܢ ܢܰܗܪܳܐ܆ ܐܰܒܳܐ ܕܩܳܥܶܐ ܕܗܳܢܰܘ ܒܶܪܝ܆ ܘܰܒܪܳܐ ܕܥܳܡܶܕ ܘܪܽܘܚܳܐ ܕܰܡܪܰܚܶܦ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܠܳܐ ܬܶܥܽܘܠ ܠܕܺܝܢܳܐ

ܡܫܺܝܚܳܐ ܕܗܽܘ ܩܰܕܶܫ܆ ܡܰܝ̈ܳܐ ܒܰܥܡܳܕܶܗ܆ ܩܰܕܶܫ ܢܰܦ̈ܫܳܬܰܢ܆ ܕܢܶܙܡܰܪ ܠܳܟ ܫܽܘܒܚܳܐ܀

ܪܽܘܚܳܐ ܩܰܕܺܝܫܳܐ܆ ܡܶܢ ܪܰܘܡܳܐ ܢܶܚܬܰܬ܆ ܘܥܰܠ ܪܺܝܫܶܗ ܕܰܒܪܳܐ܆ ܫܶܟܢܰܬ ܒܓܰܘ ܝܽܘܪܕܢܳܢ܀

ܙܳܥ ܗ̱ܘܳܐ ܝܽܘܚܰܢܳܢ܆ ܟܰܕ ܚܳܙܶܐ ܗ̱ܘܳܐ ܠܶܗ܆ ܠܡܳܪܰܢ ܐܰܝܟ ܫܚܺܝܡܳܐ܆ ܕܩܳܐܶܡ ܒܶܝܬ ܟܶܢ̈ܫܶܐ܀

ܡܫܺܝܚܳܐ ܕܰܥܡܰܕ ܗ̱ܘܳܐ܆ ܒܝܽܘܪܕܢܳܢ ܡܶܢ ܥܰܒܕܶܗ܆ ܐܰܫܪܳܐ ܡܳܪܝ ܫܰܝܢܳܟ܆ ܒܰܐܪܒܰܥ ܦܶܢ̈ܝܳܬܳܐ܀

ܗܳܢܰܘ ܕܰܡܩܰܕܶܫ܆ ܠܳܐܕܳܡ ܒܰܥܡܳܕܶܗ܆ ܘܡܰܠܒܶܫ ܠܶܗ ܫܽܘܒܚܳܐ܆ ܒܡܰܘܠܳܕܳܐ ܕܡܶܢ ܕܪܺܝܫ܀

ܫܽܘܒܚܳܐ ܠܳܟ ܡܫܺܝܚܳܐ܆ ܕܰܐܪܟܶܢܬ ܪܰܒܽܘܬܳܟ܆ ܘܰܥܡܰܕܬ ܒܓܰܘ ܝܽܘܪܕܢܳܢ܆ ܡܶܢ ܐܺܝ̈ܕܰܝ ܥܰܒܕܳܟ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܡܫܺܝܚܳܐ ܕܰܥܡܰܕ ܒܓܰܘ ܝܽܘܪܕܢܳܢ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܩܰܕܶܫ ܠܰܢ ܒܪܽܘܚܳܐ ܕܩܽܘܕܫܳܐ܆ ܕܢܶܗܘܶܐ ܥܡܽܘܪܝܳܐ ܠܺܐܝܩܳܪܳܟ܀

ܡܫܺܝܚܳܐ ܕܒܰܥܡܳܕܶܗ ܚܰܣܝܳܐ܆ ܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܒܳܟ ܢܶܬܩܴ̈ܕܫܳܢ ܢܰܦ̈ܫܳܬܰܢ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܡܫܺܝܚܳܐ ܢܚܶܬ ܠܝܽܘܪܕܢܳܢ ܢܰܗܪܳܐ܆ ܕܢܶܥܡܰܕ ܡܶܢ ܐܺܝ̈ܕܰܝ ܥܰܒܕܶܗ܆ ܘܰܐܒܳܐ ܐܰܙܥܶܩ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܟܽܠ ܢܶܫ̈ܡܳܬܳܐ

ܢܰܘܕܶܐ ܟܽܠܰܢ܆ ܠܗܰܘ ܕܶܢܚܳܐ ܕܡܶܢ ܐܰܒܳܐ ܕܢܰܚ ܠܰܢ܀

ܢܩܰܠܶܣ ܟܽܠܰܢ܆ ܠܗܰܘ ܐ̱ܪܳܙܳܐ ܕܝܰܘܡܳܢ ܐܶܬܓܠܺܝ ܠܰܢ܀

ܬܰܘܕܶܐ ܥܺܕܬܳܐ܆ ܠܰܡܫܺܝܚܳܐ ܕܥܰܠ ܝܽܘܪܕܢܳܢ ܡܰܟܪܳܗ̇܀

ܢܫܰܒܚܽܘܢ ܝܰܘܡܳܢ܆ ܡܰܒܽܘ̈ܥܶܐ ܘܡܰܝ̈ܳܐ ܕܶܐܬܩܰܕܰܫܘ܀

ܢܶܪܘܰܙ ܝܰܘܡܳܢ܆ ܒܰܪ ܠܶܘܳܝ̈ܶܐ ܕܶܐܥܡܰܕ ܠܡܳܪܶܗ܀

ܒܪܺܝܟ ܕܒܰܥܡܳܕܶܗ܆ ܩܰܕܶܫ ܠܰܢ ܒܪܽܘܚܳܐ ܕܩܽܘܕܝܫܳܐ܀

ܐܰܢܺܝܚ ܡܳܪܝܳܐ܆ ܠܥܰܢܺܝ̈ܕܶܐ ܕܰܫܟܶܒܘ ܥܰܠ ܣܰܒܪܳܟ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܐܶܬܕܰܟܪܰܝܢ ܡܳܪܝܳܐ

ܝܰܘܡܳܢܳܐ ܐܶܬܳܐ. ܠܘܳܬ ܡܰܥܡܽܘܕܺܝܬܳܐ܆ ܡܚܰܣܶܐ ܚܰܘ̈ܒܶܐ܆ ܘܰܚ̈ܛܳܗܶܐ ܕܝܰܠ̈ܕܰܘܗ̱ܝ ܕܳܐܕܳܡ܀

ܝܽܘܚܰܢܳܢ ܐܰܙܥܶܩ. ܘܶܐܡܰܪ ܗ̱ܘܳܐ ܠܟܶܢ̈ܫܶܐ܆ ܕܗܳܢܰܘ ܐܶܡܪܶܗ܆ ܘܰܒܪܶܗ ܚܰܝܳܐ ܕܰܐܠܳܗܳܐ܀

ܝܰܘܡܳܢܳܐ ܐܶܡܰܪ. ܡܫܺܝܚܳܐ ܠܟܳܪܽܘܙܶܗ܆ ܩܪܽܘܒ ܐܰܥܡܶܕܰܝܢܝ܆ ܕܒܺܝ ܬܶܫܬܰܡܠܶܐ ܟܺܐܢܽܘܬܳܐ܀

ܐܰܒܳܐ ܡܶܢ ܪܰܘܡܳܐ. ܐܰܙܥܶܩ ܕܗܳܢܰܘ ܒܶܪܝ܆ ܘܪܽܘܚܳܐ ܕܩܽܘܕܫܳܐ܆ ܐܰܝܟ ܝܰܘܢܳܐ ܫܟܶܢ ܥܰܠ ܪܺܝܫܶܗ܀

ܫܽܘܒܚܳܐ

ܝܰܘܡܳܢܳܐ ܢܰܣܶܩ. ܫܽܘܒܚܳܐ ܠܰܡܫܺܝܚܳܐ܆ ܕܰܥܡܰܕ ܒܝܽܘܪܕܢܳܢ܆ ܘܠܰܢ ܫܰܟܶܢ ܚܰܝ̈ܶܐ ܚܰܕ̱̈ܬܶܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ
ܫܽܘܒܚܳܐ ܠܳܟ ܝܶܫܽܘܥ ܡܰܠܟܰܢ

ܫܡܰܝܳܐ ܘܰܐܪܥܳܐ ܐܶܬܕܰܡܰܪܘ ܟܰܕ ܐܶܬܳܐ ܗ̱ܘܳܐ܆ ܡܳܪܰܢ ܠܰܥܡܳܕܳܐ܆ ܗܰܘ ܕܰܟܪ̈ܽܘܒܶܐ ܘܰܣܪ̈ܳܦܶܐ܆ ܠܳܐ ܡܨܶܝܢ ܚܳܙܶܝܢ ܦܰܪܨܽܘܦܶܗ܆ ܥܰܦܪܳܐ ܕܰܓܒܰܠ ܫܽܘܠܛܳܢܶܗ ܣܳܡ ܗ̱ܘܳܐ ܒܬܶܗܪܳܐ܆ ܐܺܝܕܶܗ ܥܰܠ ܪܺܝܫܶܗ܀

ܫܽܘܒܚܳܐ

ܒܝܰܠܕܳܟ ܡܳܪܰܢ ܣܓܺܝ ܣܰܒܪܰܢ ܘܰܒܝܽܘܡ ܕܶܢܚܳܟ܆ ܚܰܝ̈ܶܐ ܕܢܰܚܘ ܗ̱ܘܰܘ ܠܰܢ܆ ܘܒܰܥܡܳܕܳܟ ܕܡܶܢ ܝܽܘܚܰܢܳܢ܆ ܒܶܗ ܐܶܬܚܰܣܺܝܘ ܚܰܘ̈ܒܳܬܰܢ܆ ܒܪܺܝܟ ܐܰܢ̱ܬ ܡܳܪܝ ܘܰܐܒܳܐ ܕܫܰܠܚܳܟ ܕܶܐܬܰܝܬ ܕܬܶܥܡܰܕ܆ ܡܶܛܽܠ ܦܽܘܪܩܳܢܰܢ܀

ܡܶܢ ܥܳܠܰܡ

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ. ܕܗ̣ܽܘ ܒܨܶܒܝܳܢܶܗ: ܓܰܒܠܰܢ ܡ̣ܶܢ ܥܰܦܪܳܐ. ܘܠܰܒܪܶܗ ܝܶܫܽܘܥ ܬܰܘܕܺܝܬܳܐ. ܕܒܺܐܝ̈ܕܰܘܗ̱ܝ ܐܰܬܩܶܢ ܟܽܠܡܶܕܶܡ. ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ ܕܗ̣ܽܘ ܡܢܰܚܶܡ ܠܰܢ. ܡ̣ܶܢ ܓܰܘ ܕܰܚܺܝ̣ܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܡܰܠܟܽܘܬ ܪܰܘܡܳܐ
ܡܳܐ ܩܰܛܺܝܢ ܬܰܪܥܳܐ ܘܰܐܠܺܝܨܳܐ ܐܽܘܪܚܳܐ

ܪܰܒ ܘܰܫܒܺܝܚ ܥܺܐܕܳܐ. ܕܕܶܢܚܶܗ ܕܦܳܪܽܘܩܰܢ܆ ܒܰܐܪܒܰܥ ܦܶܢ̈ܝܳܬܳܐ܆ ܕܒܶܗ ܐܶܬܚܰܘܺܝ ܠܒܶܪ̈ܝܳܬܳܐ܆ ܐ̱ܪܳܙܳܐ ܕܰܬܠܺܝܬܳܝܽܘܬܳܐ܆ ܘܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܆ ܗܺܝ ܘܝܰܠ̈ܕܶܝܗ̇. ܕܰܦܢܰܘ ܡܶܢ ܛܽܘܥܝܰܝ܀

ܫܽܘܒܚܳܐ

ܐ̱ܪܳܙܳܐ ܕܰܟܣܶܐ ܗ̱ܘܳܐ. ܡܶܢ ܟܽܠܗܽܘܢ ܕܳܪ̈ܶܐ܆ ܒܨܶܒܝܳܢ ܒܳܪܽܘܝܶܗ܆ ܒܕܶܢܚܶܗ ܕܰܡܫܺܝܚܳܐ ܝܰܠܦܽܘܗ̱ܝ܆ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ܆ ܘܫܰܪܺܝܘ ܐ̱ܢܳܫ̈ܳܐ ܥܰܦܪ̈ܳܢܶܐ܆ ܠܡܶܬܢܳܐ ܩܽܘܕܫܳܐ ܕܺܐܝܬܽܘܬܳܐ܆ ܬܠܺܝܬܳܝܽܘܬܳܐ. ܚܕܳܐ ܐܰܠܳܗܽܘܬܳܐ܀

ܡܶܢ ܥܳܠܰܡ

ܐܰܝܠܶܝܢ ܕܰܪܫܺܝܡܺܝܢ: ܒܪܽܘܫܡܶܗ ܕܰܡܫܺܝܚܳܐ. ܡ̣ܶܢ ܡܰܥܡܽܘܕܺܝܬܳܐ. ܘܶܐܟܰܠܘ ܦܰܓܪܶܗ ܩܰܕܺܝܫܳܐ. ܘܶܐܫܬܺܝܘ ܠܰܕܡܶܗ ܡܚܰܣܝܳܢܳܐ. ܒܶܗ ܡܶܬܢܰܚܡܺܝܢ ܡ̣ܶܢ ܥܰܦܪܳܐ. ܘܡܶܬܢܰܦܨܺܝܢ ܡ̣ܶܢ ܕܰܚܺܝ̣ܚܳܐ. ܘܡܶܬܥܰܛܦܺܝܢ: ܐܶܣ‍ܛܰܠ ܬܶܫܒܽܘܚܬܳܐ܀

ܦܶܬܓܳܡܳܐ: ܬܰܦ̈ܶܐ ܘܢܰܗܪ̈ܰܘܳܬܳܐ ܢܚܰܕܽܘܢ܆ ܒܰܡܕܺܝܢ̱ܬܶܗ ܕܰܐܠܳܗܰܢ܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܠܳܟ ܐܰܠܳܗܳܐ ܚܙܰܐܽܘܟ ܡܰܝ̈ܳܐ ܚܙܰܐܽܘܟ ܘܰܕܚܶܠܘ܆ ܐܳܦ ܬܽܗܘ̈ܡܶܐ ܙܳܥܘ ܘܰܪܙܰܦܘ ܡܰܝ̈ܳܐ ܥܢܳܢ̈ܶܐ ܕܳܐܐܰܪ܆ ܟܽܠܶܗ ܟܝܳܢܳܐ ܕܡܰܝ̈ܳܐ ܐܰܪܓܶܫ ܕܰܣܥܰܪܬ ܐܶܢܽܘܢ܆ ܝܰܡ̱̈ܡܶܐ ܬܗܽܘ̈ܡܶܐ ܘܢܰܗܪ̈ܰܘܳܬܳܐ ܡܥܺܝ̈ܢܶܐ ܘܶܐܓ̈ܡܶܐ܀

ܫܽܘܒܚܳܐ ܢܫܰܘܫܶܛ ܠܗܰܘ ܕܰܒܫܺܝܛܽܘ ܐܰܕܢܰܚ ܝܳܬܶܗ܆ ܠܰܐܒܳܐ ܕܫܰܕܪܶܗ ܡܶܛܽܠ ܦܽܘܪܩܳܢ ܓܶܢܣܶܗ ܕܳܐܕܳܡ܆ ܘܰܠܪܽܘܚܩܽܘܕܫܳܐ ܕܒܰܕܡܽܘܬ ܝܰܘܢܳܐ ܫܟܶܢ ܥܰܠ ܪܺܝܫܶܗ܆ ܚܰܕܽ ܗ̱ܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀