ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܰܨܠܽܘܬܳܗ̇ ܕܝܳܠܶܕܬܳܟ

ܒܰܥܡܳܕܳܟ ܦܳܪܽܘܩܰܢ: ܒܡܰܚܰܬܬܳܟ ܕܰܠܓܰܘ ܢܰܗܪܳܐ: ܚܰܣܳܐ ܠܺܝ ܚܰܘ̈ܒܰܝ: ܘܪܰܚܶܡܥܠܰܝ ܐܰܠܳܗܳܐ܀

ܚܙܳܝܗ̱ܝ ܝܽܘܚܰܢܳܢ ܠܰܒܪܳܐ: ܟܰܕ ܐܶܬܳܐ ܠܡܰܥܡܽܘܕܺܝܬܳܐ: ܘܰܩܥܳܐ ܟܰܕ ܐܳܡܰܪ: ܕܗܳܢܰܘ ܚܰܬܢܳܐ ܫܡܰܝܳܢܳܐ܀

ܒܰܥܡܳܕܳܟ ܦܳܪܽܘܩܰܢ: ܐܶܬܩܰܕܫܰܬ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܳܬܰܢ ܪܰܚܶܡܥܠܰܝܢ ܐܰܠܳܗܳܐ܀

ܐܰܒܳܐ ܩܥܳܐ ܡܶܢ ܪܰܘܡܳܐ: ܕܰܐܢ̱ܬ ܐܺܝܬܰܝܟ ܒܶܪܝ ܚܰܒܺܝܒܳܐ: ܘܪܽܘܚܳܐ ܐܰܝܟ ܝܰܘܢܳܐ: ܢܶܚܬܰܬ ܫܶܟܢܰܬ ܥܰܠ ܪܺܝܫܶܗ ܕܰܒܪܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܰܐܝܟ ܣܢܺܝܩܳܐ. ܒܝܽܘܪܕܢܳܢ ܢܰܗܪܳܐ ܥܡܰܕ܆ ܘܠܰܢ ܥܒܰܕ ܒܢܰܝ̈ܳܐ ܠܰܐܒܽܘܗ̱ܝ ܒܛܰܝܒܽܘܬܶܗ܆ ܪܰܚܶܡܥܠܰܝܢ ܐܰܠܳܗܳܐ܀

ܗܰܘ ܕܰܥܡܰܕ ܗ̱ܘܳܐ ܡܶܢ ܐܺܝ̈ܕܰܝ ܥܰܒܕܶܗ܆ ܘܡܶܢ ܐܰܒܳܐ ܐܶܣܬܗܶܕ ܕܗܳܢܰܘ ܒܶܪܝ ܚܰܒܺܝܒܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܥܡܰܕ ܗ̱ܘܳܐ ܒܡܰܝ̈ܳܐ ܐܰܝܟ ܣܢܺܝܩܳܐ܆ ܘܠܰܟܝܳܢ ܐ̱ܢܳܫܳܐ ܩܰܕܶܫ ܐܰܝܟ ܡܰܠܝܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܠܰܥܡܳܕܳܐ. ܥܰܡ ܚܰܝ̈ܳܒܶܐ ܢܚܶܬ܆ ܘܰܠܚܰܛܳܝ̈ܶܐ ܒܰܚܢܳܢܶܗ ܙܰܕܶܩ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܬܶܫܡܶܫܬܳܐ ܪܰܡܫܳܝܬܳܐ

ܬܗܰܪܘ ܗ̱ܘܰܘ ܟܶܢ̈ܫܶܐ ܥܶܠܳܝ̈ܶܐ܆ ܟܰܕ ܚܳܙܶܝܢ ܠܳܟ ܡܳܪܶܐ ܟܽܠ܆ ܕܰܐܝܟ ܚܰܝܳܒܳܐ ܐ̱ܬܰܝܬ ܠܰܥܡܳܕܳܐ܆ ܕܬܶܣܚܶܐ ܒܓܰܘ ܡܰܝ̈ܳܐ ܕܝܽܘܪܕܢܳܢ܆ ܟܰܕ ܐܰܢ̱ܬ ܐܺܝܬܰܝܟ ܡܚܰܣܝܳܢܳܐ܆ ܘܰܡܕܰܟܝܳܢܳܐ ܕܚܰܛܳܝ̈ܶܐ܀

ܙܳܥ ܗ̱ܘܳܐ ܝܽܘܚܰܢܳܢ ܕܰܚܙܳܟ܆ ܟܰܕ ܩܳܐܶܡ ܗ̱ܘܰܝܬ ܒܶܝܬ ܟܶܢ̈ܫܶܐ܆ ܘܰܒܨܶܒܥܳܐ ܚܰܘܝܳܟ ܘܶܐܡܰܪ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ ܕܠܰܚܛܺܝܬܶܗ ܕܥܳܠܡܳܐ ܫܳܩܶܠ܆ ܘܦܳܪܶܩ ܠܶܗ ܡܶܢ ܛܳܥܝܽܘܬܳܐ܀

ܐܶܡܰܪ ܡܳܪܰܢ ܠܝܽܘܚܰܢܳܢ܆ ܕܺܐܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ܆ ܘܶܐܢܳܐ ܠܡܰܝ̈ܳܐ ܡܩܰܕܶܫ ܐ̱ܢܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܒܪܺܝܟܽ ܗ̱ܘ ܕܩܰܕܫܰܢ ܒܰܥܡܳܕܶܗ܆ ܘܥܰܒܕܰܢ ܝܳܪ̈ܬܶܐ ܒܡܰܠܟܽܘܬܶܗ܀

ܫܽܘܒܚܳܐ

ܒܗܳܢܳܐ ܝܰܘܡܳܐ ܦܳܪܽܘܩܰܢ܆ ܐܶܬܳܐ ܗ̱ܘܳܐ ܠܝܽܘܪܕܢܳܢ ܢܰܗܪܳܐ܆ ܘܰܥܡܰܕ ܗ̱ܘܳܐ ܡܶܢ ܝܽܘܚܰܢܳܢ܆ ܘܩܰܕܶܫ ܠܰܟܝܳܢܳܐ ܕܡܰܝ̈ܳܐ܆ ܗܰܘ ܕܗܽܘܝܽܘ ܒܰܠܚܽܘܕܰܘܗ̱ܝ܆ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܩܽܘܡܘ̱ ܣܳܗ̈ܕܶܐ ܣܰܬܰܪܽܘܢܳܗܿ ܠܰܒܪܺܝܬܳܐ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܪܶܗܛܰܬ ܥܺܕܬܳܐ ܠܘܳܬ ܓܰܒܝܳܐ ܝܽܘܚܰܢܳܢ܆ ܕܬܶܚܙܶܐ ܠܚܰܬܢܳܐ ܟܰܕ ܥܳܡܶܕ ܒܝܽܘܪܕܢܳܢ ܢܰܗܪܳܐ܆ ܩܳܠܶܗ ܫܶܡܥܰܬ ܒܶܝܬ ܟܶܢ̈ܫܶܐ ܟܰܕ ܐܳܡܰܪ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ ܕܶܐܬܳܐ ܠܥܳܠܡܳܐ܀

ܫܽܘܒܚܳܐ

ܪܥܶܠ ܢܰܗܪܳܐ ܟܽܠܶܗ ܒܰܪܬܺܝܬܳܐ ܘܙܰܘܥܳܐ܆ ܘܶܐܫܬܓܰܪܘ ܫܶܦܥܰܘ̈ܗ̱ܝ ܡܶܢ ܪܶܬܚܳܐ ܕܫܰܠܗܶܒܺܝܬܳܐ܆ ܓܰܘܙܰܠܬܳܐ ܕܢܽܘܪܳܐ ܥܶܠܰܬ ܒܪ̈ܳܕܰܝܳܐ܆ ܘܣܶܘܚܰܬ ܠܶܗ ܠܒܰܪ ܐܰܠܳܗܳܐ ܡܰܥܡܽܘܕܺܝܬܳܐ܀

ܡܶܢ ܥܳܠܰܡ

ܐܶܡܰܪ ܐܳܕܳܡ ܣܳܓܶܕ ܐ̱ܢܳܐ ܠܗܰܘ ܩܳܠܳܐ: ܕܰܩܪܳܐ ܠܺܝ ܒܶܝܬ ܐܺܝ̈ܠܳܢܶܐ ܘܚܳܒܶܬ ܡܶܢܶܗ: ܗܽܘ ܢܶܩܪܶܐ ܠܺܝ ܘܰܠܝܰܠ̈ܕܰܝ ܒܢܽܘܚܳܡܳܐ: ܘܰܢܩܺܝܡܰܢܝ ܡܶܢ ܝܰܡܺܝܢܳܐ ܕܰܐܠܳܗܽܘܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ
ܒܪܺܝܟܽ ܗ̱ܘ ܕܫܰܡܠܺܝ ܐܰܓܽܘܢܳܟ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܰܕܡܳܐ ܘܡܰܝ̈ܳܐ ܕܰܪܕܳܐ ܠܰܢ܆ ܡܶܢ ܕܰܦܢܶܗ ܡܰܥܒܕܰܬ ܚܰܝ̈ܶܐ܆ ܒܳܗ̇ ܓܰܒܠܰܢ ܥܽܘ̈ܠܶܐ ܚܰܕ̱̈ܬܶܐ܆ ܘܰܢܦܰܚ ܒܰܢ ܪܽܘܚܳܐ ܕܩܽܘܕܫܳܐ܆ ܘܰܡܠܳܢ ܩܽܘܕܫܳܐ ܚܠܳܦ ܢܰܦܫܳܐ܆ ܘܚܰܕܶܬ ܨܰܠܡܰܢ ܕܰܥܬܶܩ ܠܶܗ܆ ܒܡܰܘܠܳܕܳܐ ܕܰܬܪܶܝܢ܆ ܪܽܘܚܳܢܳܐ ܕܡܰܥܡܽܘܕܺܝܬܳܐ܀

ܫܽܘܒܚܳܐ

ܕܡܳܐ ܘܡܰܝ̈ܳܐ ܘܪܽܘܚܳܐ ܝܰܗ̱ܒ ܠܰܢ܆ ܬܠܳܬܳܐ ܣܳܗ̈ܕܶܐ ܫܰܪܺܝܪ̈ܶܐ܆ ܕܰܒܗܽܘܢ ܩܳܐܶܡ ܡܰܘܠܳܕܳܐ܆ ܕܰܒܢܰܝ̈ܳܐ ܐܰܠܳܗܳܝ̈ܶܐ܆ ܕܬܶܗܘܽܘܢ ܐܰܚ̈ܶܐ ܠܰܡܫܺܝܚܳܐ܆ ܘܫܰܘ̈ܬܳܦܶܐ ܠܪܽܘܚܳܐ ܕܩܽܘܕܫܳܐ܆ ܘܰܒܢܰܝ̈ܳܐ ܕܰܐܒܳܐ܆ ܘܢܳܛܪ̈ܰܝ ܟܽܠܗܽܘܢ ܦܽܘ̈ܩܕܳܢܰܘܗ̱ܝ܀

ܡܶܢ ܥܳܠܰܡ

ܒܪܺܝܟܽ ܗ̱ܘ ܕܰܐܘܪܶܒܗ ܠܢܽܘܚܳܡܰܢ. ܘܰܐܣܓܺܝ ܠܳܗܿ ܣܰܒܪܳܐ ܠܰܩܝܳܡܬܰܢ. ܘܣܳܗܶܕ ܦܰܘܠܳܘܣ ܛܽܘܒܳܢܳܐ܆ ܕܡܰܟܶܣ ܠܰܦܠܺܝܓܳܐ ܘܳܐܡܰܪ. ܣܰܟܠܳܐ ܙܰܪܥܳܐ ܕܙܳܪܰܥ ܐܰܢ̱ܬ܆ ܐܶܢ ܠܳܐ ܡܳܐܶܬ ܠܳܐ ܚܳܝܶܐ. ܚܰܘܺܝ ܕܰܒܫܽܘܒܚܳܐ܆ ܩܳܐܶܡ ܓ̣ܶܢܣܳܐ ܕܒܶܝܬ ܐܳܕܳܡ܀

ܦܶܬܓܳܡܳܐ: ܡܶܛܽܠ ܕܡܰܒܽܘܥܳܐ ܕܚܰܝ̈ܶܐ ܥܰܡܳܟܽ ܗ̱ܘ: ܘܰܒܢܽܘܗܪܳܟ ܚܳܙܶܝܢܰܢ ܢܽܘܗܪܳܐ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܙܽܘܪ ܕܰܗܒܳܐ ܕܰܚܫܺܝܠ ܘܰܩܪܺܝܡ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܠܶܒܫܰܬ ܛܽܘܦܣܳܐ ܕܝܰܘܢܳܐ ܒܪܺܝܪܬܳܐ ܘܶܐܬܳܬ ܕܬܶܣܗܰܕ܆ ܥܰܠ ܫܰܪܺܝܪܳܐ ܒܰܦܫܺܝܛܽܘܬܶܗ ܫܰܪܺܝܪܳܐܺܝܬ܆ ܠܰܘ ܕܰܬܩܰܕܫܺܝܘܗ̱ܝ ܠܰܒܪܳܐ ܫܶܠܚܰܬ ܟܰܕ ܢܶܚܬܰܬ ܗ̱ܘܳܬ܆ ܕܠܳܐ ܚܰܣܺܝܪ ܗ̱ܘܳܐ ܡܶܠܬܳܐ ܣܓܺܝܕܳܐ ܡܶܢ ܝܳܠܽܘܕܶܗ܀

ܐܰܒܳܐ ܘܪܽܘܚܳܐ ܒܫܰܘܝܽܘܬ ܐܰܟܪܶܙܘ ܥܰܠ ܝܺܚܺܝܕܳܐ܆ ܕܡܶܢ ܢܳܡܽܘܣܳܐ ܙܶܕܩܳܐ ܢܶܬܠܽܘܢ ܥܰܠ ܫܰܪܺܝܪܳܐ܆ ܩܳܠܶܗ ܕܰܐܒܳܐ ܘܪܽܘܚܳܐ ܕܩܽܘܕܫܳܐ ܢܚܶܬܘ ܫܰܘܝܳܐܺܝܬ܆ ܘܚܰܕܽ ܗ̱ܘ ܐ̱ܪܳܙܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀