ܒܝܘܡ 14 ܐܝܠܘܠ

ܩܝܢܬܐ ܚ

ܦܬܓܡܐ:

ܒܳܟ ܢܕܰܩܰܪ ܠܰܒܥܶܠܕܒܳܒܰܝ̈ܢ ܘܡܶܛܽܠ ܫܡܳܟ ܢܕܽܘܫ ܠܣܳܐܢ̈ܰܝܢ ܗ̄܀

ܬܒܪܬ‌ܐ:

ܒܪܳܐ ܕܒܰܨܠܺܝ̣ܒܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܨܠܺܝܒ ܢܽܘܗܪܳܐ܀

ܫܰܝܢܳܐ ܕܫܰܝܶܢ ܠܰܫܡܰܝ̈ܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܨܠܺܝ̣ܒ ܢܽܘܗܪܳܐ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܬܳܐ ܨܠܺܝ̣ܒܳܐ ܐܶܫܬܰܥܳܐ ܠܰܢ ܡܳܢܰܘ ܚܰܝܠܳܟ. ܕܡܶܢ ܣܰܘ̈ܦܶܐ ܠܣܰܘ̈ܦܶܐ ܕܰܐܪܥܳܐ ܥܰܡ̈ܡܶܐ ܠܳܟ ܣܳܓܕܺܝܢ. ܡܰܕܒܚܳܐ ܥܒܺܝܕ ܗܘܺܝܬ: ܥܰܠ ܪܺܝܫ ܓܳܓܽܘܠܬܳܐ. ܘܰܥܠܰܝ ܨܰܠܒܽܘܗܝ ܠܰܒܪܳܐ ܕܰܐܠܳܗܳܐ. ܥܰܨܪܽܘܗܝ ܝܽܘܕܳܝ̈ܶܐ ܒܪܽܘܡܚܳܐ ܘܡܶܢ ܚܰܡܪܶܗ ܠܳܐ ܛܥܶܡܘ: ܘܩܰܒܶܠܬܶܗ ܥܺܕܰܬ ܩܽܘܕܫܳܐ: ܘܩܰܪܶܒܬܶܗ ܠܡܰܕܒܚܳܐ ܗ̄ ܘܡܶܢܶܗ ܡܶܬܒܰܣܡܳܐ܀

ܠܘܛܢܝܐ ܒܩ̄: ܢܶܩܝܳܐ ܗܘܺܝܬ

ܨܠܺܝܒܳܐ ܐܺܝ̣ܠܳܢ ܛܳܒ̈ܳܬܳܐ: ܕܣܰܘܟܰܘ̈ܗܝ ܩܒܺܝ̣̈ܥܳܢ ܒܰܫܡܰܝܳܐ. ܦܺܐܪ̈ܰܝܟ ܕܚܰܝ̈ܶܐ ܘܒܽܘܪ̈ܟܳܬܳܐ: ܕܫܶܩܝܳܟ ܕܶܡ ܐܶܡܪܳܐ ܚܰܝܳܐ܀

ܡܶܢ ܨܶܡ̈ܚܶܐ ܫܒܺܝ̈ܚܶܐ ܕܰܐܦܰܝ̈ܟ: ܚܶܫܟܳܐ ܛܠܶܩ ܡܶܢ ܦܶܢ̈ܝܳܬܳܐ. ܘܒܰܕܡܳܐ ܕܰܙܠܰܚ ܥܰܠ ܟܶܢܦܰܝ̈ܟ: ܓܗܳܝܳܐ ܩܢܰܝ̈ ܟܽܠ ܒܶܪ̈ܝܳܬܳܐ܀

ܒܪܺܝܟ ܐܰܢܬ ܡܰܒܽܘܥ ܫܽܘܒܩܳܢܳܐ: ܘܓܳܡܰܪ ܐܪ̈ܳܙܶܐ ܩܰܕܺܝ̈ܫܶܐ. ܕܰܐܢܬ ܗܽܘ ܣܰܒܪܳܐ ܕܦܽܘܪܩܳܢܳܐ: ܠܽܘܩܒܰܠ ܟܽܠ ܢܶܒ̈ܗܶܐ ܒܺܝ̈ܫܶܐ܀

ܐܳܘ ܢܺܝܫܳܐ ܕܡܰܠܟܽܘܬ ܪܰܘܡܳܐ: ܒܳܟ ܪ̈ܫܺܝܡܰܝܟ ܓܰܘܣܳܐ ܐܳܚܕܺܝܢ. ܗܘܺܝ ܣܶܬܳܪܗܽܘܢ ܒܗܰܘ ܝܰܘܡܳܐ: ܕܟܽܠ ܥܰܡ̈ܡܶܐ ܩܕܳܡܰܝܟ ܣܳܓܕܺܝܢ܀

ܗܫܐ ܚܙܝ ܛܟܣܐ ܕܫܟܚܬܗ ܕܨܠܝܒܐ ܦܪܘܩܝܐ

ܚܘܬܡܐ ܒܩ̄: ܗܳܐ ܩܛܺܝ̣ܠ ܗܘ

ܗܰܘ ܨܠܺܝܒܳܐ ܕܪܰܨܶܨ: ܪܺܝܫܶܗ ܕܚܶܘܝܳܐ. ܕܰܐܛܥܺܝ ܗܘܳܐ ܒܶܐܡܰܢ ܒܶܝܬ ܐܺܝ̈ܠܳܢܶܐ. ܗܽܘ ܢܶܗܘܶܐ ܙܰܝܢܳܐ: ܠܥܺܕܰܬ ܩܽܘܕܫܳܐ. ܠܽܘܩܒܰܠ ܟܽܠ ܚܰܝܠܳܐ ܕܡܰܩܪܶܒ ܥܰܡܳܗ̇܀